ದುಬೈ: ಮಸ್ತ್ ಜನ ಭಕ್ತೆರೆನ ಅಪ್ಪೆ ಪಂದೇ ಲೆಪ್ಪುನ ಕಾಪು ಶ್ರೀ ಮಾರಿಯಮ್ಮ ತನ್ನ ದೈವಿಕ ಶಕ್ತಿರ್ದ್ ದೇಶ ವಿದೇಶದ ಭಕ್ತೆರೆಗ್ ಅಭಯ ಪ್ರೇರಣೆ ಕೊರೊಂದು ಉಲ್ಲೆರ್. ನೆತ್ತಂಚನೆ ಕಾಪು ಶ್ರೀ ಪೊಸ ಮಾರಿಗುಡಿ ದೇವಲ್ಯದ ಅಭಿವೃದ್ಧಿಗಾದ್ ಯುಎಇ ಘಟಕ ಸ್ಥಾಪನೆ ಆಂಡ್. ನೆತ್ತ ಉದಿಪನ ಲೇಸ್ ಇಂಚಿಪ್ಪ ನಡತ್ಂಡ್.
ಈ ಪೊರ್ತುಡು ಕಾಪು ಶ್ರೀ ಪೊಸ ಮಾರಿಗುಡಿ ದೇವಲ್ಯದ ಅಭಿವೃದ್ಧಿ ಘಟಕದ ಕಾರ್ಯಾಧ್ಯಕ್ಷೆರ್ ವಾಸುದೇವ ಶೆಟ್ಟಿ ಮೇರ್ ಪಾತೆರ್ದ್ “ದೇಶ ವಿದೇಶಡ್ ಎನ್ನ ಮಸ್ತ್ ಭಕ್ತೆರ್ ಉಲ್ಲೆರ್. ಅಕ್ಲೆಗ್ ಎನ್ನ ಬಗ್ಗೆ ಪ್ರಚಾರ ಕೊರ್ದು ಪ್ರೇರಣೆ ಯಾನ್ ಕೊರ್ಪೆ, ಕಾಸ್ ನ್ ಬಾಯಿ ಬುಡ್ದ್ ಕೇನೊರ್ಚಿ, ರಶೀದ್ ಬೂಕ್ ದೆತೊಂದು ಪೋವೊರ್ಚಿ, ಅಕ್ಲೆಗ್ ಜೀರ್ಣೋದ್ಧಾರ ಕಜ್ಜೊದ ಬಗ್ಗೆ ಮಾಹಿತಿ ಕೊರ್ದು ಕಾಸ್ ತಿಕುಲೆಕ್ಕ ಯಾನ್ ಅಕ್ಲೆಗ್ ಪ್ರೇರಣೆ ಕೊರ್ಪೆ” ಉಂದು ಕಾಪು ಅಮ್ಮನ ಅಭಯದ ನುಡಿ ಆತ್ಂಡ್ ಪಂದ್ ಪಂಡೆರ್.
ಕಾಪು ಶ್ರೀ ಪೊಸ ಮಾರಿಗುಡಿ ದೇವಲ್ಯದ ಅಭಿವೃದ್ಧಿ ಯುಎಇ ಘಟಕದ ಉದಿಪನ ಲೇಸ್ ಡ್ ನವ ದುರ್ಗೆನ ಪ್ರತೀತಿಯಾದ್ 9 ಸಮಾಜದ ಸದಸ್ಯೆರೆನ್, ಸಂಚಾಲಕೆರೆನ್ ಆಯ್ಕೆ ಮಲ್ತ್ ದ್, ಅಂತಾರಾಷ್ಟ್ರೀಯ ಮಟ್ಟಡ್ ಘಟಕಲೆನ್ ಸ್ಥಾಪನೆ ಮಲ್ಪುವ ಪಂದ್ ಕಾಪು ಅಮ್ಮನ ಅಭಯ ಆತ್ಂಡ್. ನೆತ್ತ ಲೆಕ್ಕನೇ ಕರಿನ ಶುಕ್ರಾರ ಒಮಾನ್ ಡ್ ಅಂತಾರಾಷ್ಟ್ರೀಯ ಸಮಿತಿದ ಅಧ್ಯಕ್ಷೆರಾದ್ ಸರ್ವೋತ್ತಮ ಶೆಟ್ಟಿ ಮೆರೆನ್ ಆಯ್ಕೆ ಮಲ್ತ್ ದ್ ಒಮಾನ್ ಘಟಕ ಸ್ಥಾಪನೆ ಮಲ್ಪರೆ ಆಂಡ್ ಪಂದ್ ಪಂಡೆರ್. ಬೊಕ್ಕ ಯುಎಇ ಘಟಕದ ಉದಿಪನ ಲೇಸ್ ಡ್ ನಮ ಸೇರ್ದ್, ನಿಕಲೆಡ ಅತ್ ಕೊರ್ಲೆ, ಈತ್ ಕೊರ್ಲೆ ಪಂದ್ ಕೇನುಜ, ಅಪ್ಪೆ ನಿಕಲೆಗ್ ಪ್ರೇರಣೆ ಕೊರ್ನ ಅಂಚನೆ ಕ್ಷೇತ್ರದ ಜೀರ್ಣೋದ್ಧಾರದ ಕಜ್ಜೊಗ್ ಸಕಾಯ ಮಲ್ಪುಲೆ ಪಂದ್ ಪಂಡೆರ್.
ಒಂಜಿ ಶಿಲೆಕ್ಕ್ 999 ರೂ. 9 ಶಿಲೆಕ್ಕ್ 9,999/- ,99 ಶಿಲೆಕ್ಕ್ 99,999/- , 999 ಶಿಲೆಕ್ಕ್ 9,99,999/- ಬೊಕ್ಕ 99999 ಶಿಲೆಕ್ಕ್ 99,99,999 ರೂ. ಪಂದ್ ಶಿಲೆ ಸೇವೆದ ಬಗ್ಗೆ ಮಾಹಿತಿ ಕೊರಿಯೆರ್. ಅಂಚನೆ ಜೀರ್ಣೋದ್ಧಾರ ಆವೊಂದು ಇಪ್ಪುನ ಕಾಪು ಶ್ರೀ ಪೊಸ ಮಾರಿಗುಡಿ ದೇವಲ್ಯದ ಅಭಿವೃದ್ಧಿ ಸಮಿತಿದ ಯುಎಇ ಘಟಕ ಪೇಂಟೆದ ಫಾರ್ಚೂನ್ ಪ್ಲಾಜಾದ ಬಾಂಕ್ವೆಟ್ ಚಾವಡಿಡ್ ಯುಎಇದ ನೂದೆರ್ದ್ ಎಚ್ಚ ಕಾಪು ಅಮ್ಮನ ಭಕ್ತೆರೆನ ಸಮ್ಮುಖಡ್ ನಡತ್ಂಡ್.
ಬೊಕ್ಕ ಅಂತಾರಾಷ್ಟ್ರೀಯ ಕಾಪು ಶ್ರೀ ಪೊಸ ಮಾರಿಗುಡಿ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ ಮೇರ್ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, “ಯುಎಇಡ್ ಇಪ್ಪುನ ಮಾತ ಸಮಾಜದ ಸಂಘ ಸಂಸ್ಥೆಲೆಗ್ ಈ ಜೀರ್ಣೋದ್ಧಾರದ ಮಾಹಿತಿನ್ ನಮ ಮಾತ ಕೊರೊಡು. ಬೊಕ್ಕ ಯುಎಇ ಘಟಕದ ವತಿರ್ದ್ ಎಚ್ಚ ಬಿಲೆ ಕೊರ್ದು ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಪಂಡೆರ್. ಬೊಕ್ಕ ನಡತಿನ ಘಟಕ ಉದಿಪನ ಲೇಸ್ ಡ್ ಯುಎಇ ಘಟಕಗ್ 9 ಜನ ಸಂಚಾಲಕೆರೆನ್ ಆಯ್ಕೆ ಮಲ್ತೆರ್.
ಅಧ್ಯಕ್ಷೆರಾದ್ ಫಾರ್ಚೂನ್ ಗ್ರೂಪ್ ಆಫ್ ಸಂಸ್ಥೆದ ಅಧ್ಯಕ್ಷೆರ್ ಪ್ರವೀಣ್ ಕುಮಾರ್ ಶೆಟ್ಟಿ ವಕ್ವಾಡಿ, ಸಂಚಾಲಕೆರಾದ್ ಆಕ್ಮೆ ಬಿಲ್ಡಿಂಗ್ ಬೊಕ್ಕ ಮೆಟೀರಿಯಲ್ಸ್ ಸಂಸ್ಥೆದ ಅಧ್ಯಕ್ಷೆರಾದ್ ಹರೀಶ್ ಶೇರಿಗಾರ್, ದುಬೈ ಸೋರ್ಸ್ ದ ಹರೀಶ್ ಬಂಗೇರ, ಬಿಲ್ಲವಾಸ್ ದುಬೈದ ಸತೀಶ್ ಪೂಜಾರಿ, ಸುಧಾಕರ ರಾವ್ ಪೇಜಾವರ, ದಿನೇಶ್ ಶೆಟ್ಟಿ ಕೊಟಿಂಜ, ರಘುರಾಮ ಶೆಟ್ಟಿಗಾರ್, ರಾಮಚಂದ್ರ ಹೆಗ್ಡೆ, ಬಾಲಕೃಷ್ಣ ಸಾಲಿಯಾನ್ ನ್ ಆಯ್ಕೆ ಮಲ್ತೆರ್. ಬೊಕ್ಕ ಯುಎಇ ಘಟಕನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಯುಎಇ ಘಟಕದ ಅಧ್ಯಕ್ಷೆರಾಯಿನ ಪ್ರವೀಣ್ ಕುಮಾರ್ ಶೆಟ್ಟಿ ಪಾತೆರ್ದ್, ಎನ್ನ ಊರು ಕುಂದಾಪುರ ಆಂಡಲ ಎನ್ನ ಬೊಡೆದಿ ಬ್ರಹ್ಮಾವರದಾರ್, ಕಾಪುದ ಅಮ್ಮಗ್ ಮಾತೆರ್ಲಾ ಜೋಕುಲೆಗ್ ಸಮಾನ. ಕಾಪುದ ಅಮ್ಮಗ್ ಊರು ಮುಖ್ಯ ಅತ್ತ್, ಅಮ್ಮನ ಎದುರು ಭಕ್ತಿ ಮುಖ್ಯ ಪಂದ್ ಪಂಡೆರ್.
ಉದ್ಯಮಿಲಾಯಿನ ಸುಂದರ ಶೆಟ್ಟಿ, ಪ್ರೇಮ್ ನಾಥ್ ಶೆಟ್ಟಿ, ಸುಜತ್ ಶೆಟ್ಟಿ ಪಾತೆರ್ದ್ ಘಟಕಗ್ ಎಡ್ಡೆಪ್ಪು ಬಯಕಿಯೆರ್. ಚಾವಡಿಡ್ ಊರುರ್ದ್ ಬತ್ತಿನ ಬಿನ್ನೆರಾಯಿನ ಬೊಂಬೈ ಘಟಕದ ಅಧ್ಯಕ್ಷೆರ್ ಸುಧಾಕರ ಹೆಗ್ಡೆ, ಹಣಕಾಸು ಸಂಸ್ಥೆದ ಮುಖ್ಯಸ್ಥೆರ್ ಉದಯ ಸುಂದರ ಶೆಟ್ಟಿ, ಮನೋಹರ ಸುಂದರ ಶೆಟ್ಟಿ, ರತ್ನಾಕರ ಶೆಟ್ಟಿ ಮೊಕುಲು ಮಾತ ಪೊಸ ಘಟಕದ ಸದಸ್ಯೆರೆಗ್ ಅಭಿನಂದನೆ ಸಂದಾದ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ಕಾಪು ಮಾರಿಯಮ್ಮನ ಭಾವಚಿತ್ರೊಗು 9 ಜನ ಸುಮಂಗಲಿಯೆರ್ 9 ತುಡರ್ ಅರ್ಲಾದ್ ಮಂಗಳಾರತಿ ಮಲ್ತೆರ್. ಕು.ಸನ್ನಿಧಿ ವಿಶ್ವನಾಥ ಶೆಟ್ಟಿ ಪ್ರಾರ್ತನೆ ಮಲ್ತೆರ್. ಸರ್ವೋತ್ತಮ ಶೆಟ್ಟಿ ಎದ್ಕೊನಿಯೆರ್. ಬಿ.ಕೆ. ಗಣೇಶ್ ರೈ ಲೇಸ್ ದ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್. ಅಕೇರಿಗ್ ಅನ್ನದಾನ, ಮಹಾಪ್ರಸಾದದೊಟ್ಟಿಗೆ ಲೇಸ್ ಮುಗಿಂಡ್.
ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
