Tulu News

Rains forecast in the state in the next three days- meteorological department ರಾಜ್ಯಡ್ ನನ ಮೂಜಿ ದಿನ ಬರ್ಸ ಬರ್ಪಿನ ಅಂದಾಜಿ: ಹವಾಮಾನ ಇಲಾಖೆದ ಸೂಚನೆ

ಬೆಂಗ್ಲೂರ್: ನನ ಮೂಜಿ ದಿನ ರಾಜ್ಯದ ಬೇತೆ ಬೇತೆ ಜಿಲ್ಲೆಡ್ ತೆಡಿಲ್, ಮೆಂಚ್ ದ ಬರ್ಸ ಬರ್ಪಿನ ಅಂದಾಜಿ ಉಂಡು.

ಬೊಲ್ಪರ್ದೆ ಮುಗಲ್ ಪಾಡುಂಡು. ಬಯ್ಯಗ್ ಜೋರು ಬರ್ಸ ಬರ್ಪುಂಡು. ಬೊಲ್ಪುಗುದ ಪೊರ್ತು ಕೆಲವೊರ ದುಂಬುಲ ಎಚ್ಚಾಪುನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.

ದಕ್ಷಿಣ ಕನ್ನಡ, ಒಡಿಪು, ಚಿಕ್ಕಮಗಳೂರು, ಉತ್ತರ ಒಳನಾಡ್ ದ ಕೆಲವು ಕಡೆಟ್ ಜೋರು ಬರ್ಸ ಬರ್ಪುಂಡು. ಗಾಳಿದ ಬಿರ್ಸ್ ಗಂಟೆಗ್ 40 ಕಿ.ಮೀ ರ್ದ್ 50 ಕಿ.ಮೀ ಇಪ್ಪುನ ಅಂದಾಜಿ ಉಂಡು.

A devotee offers eight lakh rupees in two thousand rupee notes at a temple near Shimla 2 ಸಾರ ರೂ. ನೋಟುದ 8 ಲಕ್ಷ ರೂ. ಕಾಸ್ ನ್ ದೇವಲ್ಯಗ್ ಡಬ್ಬಿಗ್ ಕಾಣಿಕೆ ಪಾಡಿನ ಭಕ್ತೆ

ಶಿಮ್ಲಾ: ಭಕ್ತೆಯೊರಿ 8 ಲಕ್ಷ ರೂ. ಬಿಲೆತ್ತ 2 ಸಾರ ರೂ. ನೋಟುನ್ ದೇವಲ್ಯದ ಡಬ್ಬಿಗ್ ಕಾಣಿಕೆ ಪಾಡ್ದೆರ್.

ಕಂಗ್ರಾಡ್ ಇಪ್ಪುನ ಮಾ ಜ್ವಾಲಾ ದೇವಿ ದೇವಲ್ಯದ ಕಾಣಿಕೆ ಡಬ್ಬಿಗ್ ಒಂಜಿ ಜನ 2 ಸಾರ ರೂಪಾಯಿ ಮುಖಬೆಲೆತ್ತ ಸುಮಾರ್ 400 ನೋಟುನ್ ಪಂಡ 8 ಲಕ್ಷ ರೂಪಾಯಿ ಕಾಸ್ ನ್ ದೇವಲ್ಯದ ಡಬ್ಬಿಗ್ ಪಾಡ್ದೆರ್.

ಭಾರತೀಯ ರಿಸರ್ವ್ ಬ್ಯಾಂಕ್​ (ಆರ್​ಬಿಐ) 2 ಸಾರ ರೂ. ಮುಖಬೆಲೆತ್ತ ನೋಟುನ್ ಪಿರ ದೆತೊನುನ ನಿರ್ಧಾರನ್ ಮೇ19 ಕ್ಕ್ ಘೋಷಣೆ ಮಲ್ದ್ಂಡ್. ಆ ನೋಟುನ್ ಬದಲ್ ಮಲ್ಪುನ ಪ್ರಕ್ರಿಯೆ ಅಂಗಾರೆ ಸುರು ಆತ್ಂಡ್.

May 26 th: ” Pirkilu” Tulu movie to be released ಮೇ26: “ಪಿರ್ಕಿಲು” ತುಳು ಪಿಕ್ಚರ್ ಬುಡುಗಡೆ

ಕುಡ್ಲ: “ಕರಾವಳಿ ಸಿನಿಮಾಸ್ ಲಾಂಛನಡ್, ಸತೀಶ್ ಪೆರ್ನೆ, ಶಿವಪ್ರಸಾದ್ ಇಷ್ಟಾವು ನಿರ್ಮಾಣಡ್, ಹೆಚ್.ಡಿ ಆರ್ಯ ನಿರ್ದೇಶನಡ್, ತಯಾರಾಯಿನ ಪಿರ್ಕಿಲು ತುಳು ಪಿಕ್ಚರ್ ಮೇ26 ಕ್ಕ್ ತುಳುನಾಡ್ ಡ್ ಬುಡುಗಡೆ ಆವರೆ ಉಂಡು.

ಕುಡ್ಲಡ್ ರೂಪವಾಣಿ, ಬಿಗ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲಡ್ ಭಾರತ್ ಸಿನಿಮಾ, ಐನಾಕ್ಸ್, ಪಡ್ಡೆದ್ರಡ್ ಭಾರತ್ ಸಿನಿಮಾ, ಸುರತ್ಕಲ್ ಡ್ ನಟರಾಜ್ ಸಿನಿ ಗ್ಯಾಲಕ್ಸಿ, ಪುತ್ತೂರ್ ಡ್ ಭಾರತ್ ಸಿನಿಮಾ, ಬೆದ್ರಡ್ ಅಮರಶ್ರೀ, ಕಾರ್ಲಡ್ ರಾಧಿಕಾ, ಪ್ಲಾನೆಟ್, ಸುಳ್ಯಡ್ ಸಂತೋಷ್, ಬೊಲ್ತೇರ್ ಡ್ ಭಾರತ್ ಸಿನಿಮಾಡ್ ರಿಲೀಸ್ ಆಪುಂಡು.

ಪಿರ್ಕಿಲು ಪಿಕ್ಚರ್ ಸುಳ್ಯ, ಪುತ್ತೂರ್, ಕುಡ್ಲ, ಉಬಾರ್ ಡ್ 29 ದಿನ ಶೂಟಿಂಗ್ ನಡತ್ಂಡ್. ಅತ್ತಂದೆ ಈ ಪಿಕ್ಚರ್ ಗ್ U/A ಸರ್ಟಿಫಿಕೆಟ್ ತಿಕ್ಕ್ ದ್ಂಡ್. ಈ ಪಿಕ್ಚರ್ ಡ್ ಕಾಮಿಡಿ ಬೊಕ್ಕ ಕೌಟುಂಬಿಕ ಮನರಂಜನೆ ಉಂಡು. ಮಾತ ವರ್ಗದ ಜನಕುಲು ಇಷ್ಟ ಪಡೆಪುನ ಕತೆನ್ ಕಾಮಿಡಿದ ರೂಪಡ್ ನಿರ್ದೇಶಕೆರ್ ತೂಪಾದೆರ್. ನಿರ್ದೇಶಕೆರ್ ಹೆಚ್.ಡಿ ಆರ್ಯ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆತೆರ್. ಬಬಿತ ತುಳು ಸಂಭಾಷಣೆ ತರ್ಜಿಮೆನ್ ಮಲ್ದೆರ್.

ತಾರಾ ಕೂಟಡ್ ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್, ನವರಸ ರಾಜೆ ಭೋಜರಾಜ ವಾಮಂಜೂರು, ದೀಪಕ್ ರೈ, ಪಾಣಾಜೆ, ರವಿ ರಾಮಕುಂಜ ಉಲ್ಲೆರ್. ನಾಯಕ ನಟೆಯಾದ್ ವರ್ಧನ್ ಬೊಕ್ಕ ಸುದೇಶ್, ನಾಯಕಿಯಾದ್ ಸಲೋಮಿ ಡಿ.ಸೋಜ, ಲತಾ ಅಭಿನಯ ಮಲ್ದೆರ್. ಬೊಕ್ಕ ಸುಮಿತ್ರ, ಅಮಿತ, ನವೀನ್ ಬೋಂದೆಲ್, ಅರ್ಪಣ್, ಅನಿಲ್ ರೈ, ರಂಜಿತ್ ರ, ತಿಮ್ಮಪ್ಪ, ಕುಲಾಲ್, ಪುಭಾಕರ ಶೆಟ್ಟಿ, ಮೊಹನ್, ಸೊನಿ ಉಲ್ಲೆರ್.

ಯುಟಿ ಖಾದರ್ ಪೊಸ ಸ್ವೀಕರ್

ವಿಧಾನಸಭೆತ್ತ ಪೊಸ ಸ್ವೀಕರಾದ್ ಯುಟಿ ಖಾದರ್ ಮೇರ್ ಅವಿರೋಧ ಆಯ್ಕೆ ಆತೆರ್.

ಕಾಂಗ್ರೆಸ್ ರ್ದ್ ಖಾದರ್ ಒರಿಯೇ ನಾಮಪತ್ರ ಸಂದಾಯಿನ ಕಾರಣ, ಅವಿರೋಧವಾದ್ ಸಭಾಧ್ಯಕ್ಷೆರೆ ತಾನನ್ ಪಡೆತೆರ್. ಪೊಸ ಸ್ವೀಕರ್ ಗ್ ಹಂಗಾಮಿ ಸ್ವೀಕರ್ ಆಯಿ‌ನ ಆರ್.ವಿ ದೇಶಪಾಂಡೆ ಮೇರ್ ತನ್ನ ಅಧಿಕಾರನ್ ಬೂರ್ದು ಕೊರಿಯೆರ್. ಪೊಸ ಸಭಾಧ್ಯಕ್ಷೆರ್ ಖಾದರ್ ಮೆರೆಗ್ ಸಿಎಂ ಸಿದ್ದರಾಮಯ್ಯ ಮೇರ್ ಅಭಿನಂದನೆ ಸಂದಾಯೆರ್.

Dr Vaishnavi is a special officer to CM Siddaramaiah ಡಾ.ವೈಷ್ಣವಿ ಇತ್ತೆ ಮುಖ್ಯಮಂತ್ರಿಲೆನ ಇಸೇಸ ಕರ್ತವ್ಯಾಧಿಕಾರಿ

ರಾಜ್ಯಡ್ ಕೊರೊನಾ ಪೊರ್ತುಡು ಗಮನಾರ್ಹ ಸೇವೆ ಸಂದಾದ್ ಭಾರೀ ಪುದರ್ ಪಡೆಯಿನ ಪೌರಾಡಳಿತ ಇಲಾಖೆದ ಡಾ. ಕೆ. ವೈಷ್ಣವಿ ಮೆರೆನ್ ಕೂಡ್ಲೆ ಜಾರಿಗ್ ಬರ್ಪುಲೆಕ್ಕ, ಮುಖ್ಯಮಂತ್ರಿಲೆನ ಇಸೇಸ ಕರ್ತವ್ಯಾಧಿಕಾರಿಯಾದ್ ನಿಯೋಜನೆ ಮಲ್ದೆರ್.

2014 ರ್ದ್ ಇಲಾಖೆಡ್ ಆನೇಕಲ್ ತಾಲೂಕ್ ಇಂಡ್ಲವಾಡಿ ಗ್ರಾ.ಪಂ‌.ದ ಪಿಡಿಒ ಆದ್ ನೇಮಕ ಆಯಿನ ವೈಷ್ಣವಿ ಮೇರ್‌ ಸಿಎಸ್ ಆರ್ ಅನುದಾನದ ಸಮರ್ಪಕ ಬಳಕೆದ ಮುಖೇನ ಗಮನ ಸೆಳೆತೆರ್. ಅಂಚೆನೆ ಬಿಬಿಎಂ ವ್ಯಾಪ್ತಿಡ್ ಎಡ್ಡೆ ಬೇಲೆ ಮಲ್ದೆರ್.

Dr Vaishnavi is a special officer to CM Siddaramaiah

Dr Vaishnavi who shot to fame with exceptional service during covid times in civic administration has been appointed as special task officer to CM Siddaramaiah with immediate effect.

Punar Pratistapane and Kalashabisheka at Kotraguttu Shri Kordabbu Daivastana today ಇನಿ ಕೋಟ್ರಗುತ್ತು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಕಲಶಾಭಿಷೇಕ

ಕುಡ್ಲ: ಅಂಬ್ಲಮೊಗರುದ ಕೋಟ್ರಗುತ್ತು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಇನಿ ಪುನರ್ ಪ್ರತಿಷ್ಠಾ ಕಲಶಾಭಿಷೇಕ ನಡಪರೆ ಉಂಡು.

ಮೇ23 (ಕೋಡೆ) ಅಂಗಾರೆ ಬಯ್ಯಗ್ ಶ್ರೀ ಲಕ್ಷಿನರಸಿಂಹ ದೇವಲ್ಯ ಕೋಟ್ರಗುತ್ತು ಮುಲ್ಪರ್ದ್ ಶ್ರೀ ಕೋರ್ದಬ್ಬು ದೈವೊದ ಪೊಸ ಪರಿಕರದ ಶೋಭಾಯಾತ್ರೆ, ರಾತ್ರೆ ಜಾಗೆ ಶುದ್ದ ಬೊಕ್ಕ ವಾಸ್ತು ಪೂಜೆ ನಡತ್ಂಡ್.

ಇನಿ ಬೊಲ್ಪುಗು ಶ್ರೀ ದೈವೊಲೆನ ಪ್ರತಿಷ್ಠೆ, ಕಲಶಾಭಿಷೇಕ, ಶ್ರೀ ಕೋರ್ದಬ್ಬು ಬೊಕ್ಕ ಶ್ರೀ ಸಂಕೋಲೆ ಗುಳಿಗ ದೈವೊಲೆನ ದರ್ಶನ ಸೇವೆ ನಡತ್ಂಡ್.

ಮಧ್ಯಾಹ್ನ ಪ್ರಸಾದ ಕೊರಿ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು. ರಾತ್ರೆ ಶ್ರೀ ದೈವೊಲೆಗ್ ತಂಬಿಲ ಸೇವೆ ಆದ್ ಪ್ರಸಾದ ಕೊರಿಯೆರೆ ಉಂಡು. ಅವೆರ್ದ್ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಗಂಧ ಪ್ರಸಾದ ದೆತೊಂದು, ಶ್ರೀ ಕೋರ್ದಬ್ಬು ಬೊಕ್ಕ ಪರಿವಾರ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಂಬ್ಲಮೊಗೆರ್ ದ ಕೋಟ್ರಗುತ್ತು ಶ್ರೀ ಕೋರ್ದಬ್ಬು ಜೀರ್ಣೋದ್ಧಾರ ಸಮಿತಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ವರದಿ: ಸಂತೋಷ್ ಅಂಬ್ಲಮೊಗೆರ್

U T Khadar gets a prestigious position in the state hierarchy as the Speaker ಉಳ್ಳಾಲದ ಉಮೇದ್ ದ ರಾಜಕಾರಣಿಗ್ ರಾಜ್ಯೊಡೇ 2ನೇ ತಾನ

ಕುಡ್ಲ: ಆಣ್ ಜೋಕ್ಲೆನ ಒಟ್ಟಿಗೆ ಕ್ರಿಕೆಟ್ ಗೊಬ್ಬುನ, ಜಾತ್ರೆಡ್ ಮಾರ್ಗದ ಬರಿತ್ತ ಕಮಲ್ಲಮ್ಮರ್ದ್ ಕಡ್ಲೆ ದೆತೊಂದು ತಿನ್ಪುನ, ಕೋಲ, ನೇಮಗ್ ಪೋಪಿನ, ಪಲ್ಲಿ-ಚರ್ಚ್ ಡ್ ಪ್ರಾರ್ತನೆ ಮಲ್ಪುನ ಉಲ್ಲಾಳದ ಉಮೇದ್ ರಾಜಕಾರಣಿ ಯು.ಟಿ. ಖಾದರ್ ಪಂಡ ಕುಡ್ಲ ಕ್ಷೇತ್ರದ ಜನಕ್ಲೆಗ್ ಮಾತ್ರ ಅತ್ತ್, ನಾಡ್ ದ ಮಾತ ಜನಕ್ಲ ಮೋಕೆ.‌

ಈ ಕಾರಣಗ್ 2008 ಟ್ಟ್ ವೋಟುದ ರಾಜಕೀಯಗ್ ಬತ್ತಿನ ಮೇರ್ ಬೊಕ್ಕ ತಿರ್ಗ್ ದ್ ತೂತಿಜೆರ್.‌ ಅಂಚೆನೆ ಇತ್ತೆ ಮೇರ್ ವಿಧಾನಸಭೆತ್ತ ಸ್ಪೀಕರ್ ಆದ್ ರಾಜ್ಯೋಡೇ ರಡ್ಡನೇ ತಾನದ ಮಣೆಟ್ಟ್ ಕುಲ್ದೆರ್.

ಯು ಟಿ. ಅಬ್ದುಲ್ ಖಾದರ್ ಮೇರ್ ತನ್ನ ಅಮ್ಮೆರ್ ಶಾಸಕೆ ಯು ಟಿ ಫರೀದ್ ತೀರ್ ಪೋಯಿನ ಬೊಕ್ಕ ಆ ತಾನಗ್ ನಡತಿನ ಉಪ ಚುನಾವಣೆಡ್ ಸುರುತ್ತ ಸರ್ತಿ ವಿಧಾನ ಸಭೆ ಪ್ರವೇಶ ಮಲ್ಪುವೆರ್. ಬೊಕ್ಕ 2008, 2013, 2018 ಬೊಕ್ಕ 2023 ಟ್ಟ್ ಸೇರ್ದ್ 5 ಸರ್ತಿ ಶಾಸಕೆರಾದ್ ಆಯ್ಕೆ ಆತೆರ್. 2008 ರ್ದ್ 2013 ಮುಟ್ಟ ವಿಧಾನಸಭೆತ್ತ ಕಾರ್ಯ ವೈಖರಿಗಾದ್ ಸದನ ವೀರ ಬೊಕ್ಕ ಶೈನಿಂಗ್ ಇಂಡಿಯಾ ಅವಾರ್ಡ್ ಪಡೆತೆರ್ . ‌

2013ಕ್ಕ್ ಸಿದ್ದರಾಮಯ್ಯ ಸರಕಾರಡ್ ಆರೋಗ್ಯ ಸಚಿವೆರಾದ್ 2016 ಮುಟ್ಟ ಬೇಲೆ ಮಲ್ದೆರ್. ಈ ಪೊರ್ತುಡು ರಾಜ್ಯಡ್ ಗುಟ್ಕಾ ನಿಷೇಧ, ಬೈಕ್ ಅಂಬ್ಯುಲೆನ್ಸ್, 108, ಆರೋಗ್ಯಶ್ರೀ, ದಂತ ಭಾಗ್ಯ, ಸರಕಾರೀ ತಾಲೂಕ್ ಆಸ್ಪತ್ರೆಡ್ ಡಯಾಲಿಸಿಸ್ ಘಟಕ, ಹರೀಶ್ ಸಾಂತ್ವನ ಯೋಜನೆ, ಕ್ರಾಂತಿಕಾರಿ ಯೋಜನೆನ್ ಜಾರಿಗ್ ಕನತ್ ದ್ ಕೇಂದ್ರ ಸರಕಾರ ಕೊರ್ಪಿನ ಉತ್ತಮ ಆರೋಗ್ಯ ಸಚಿವ ಪ್ರಶಸ್ತಿನ್ ಗೆಂದ್ ದೆರ್. ಬೊಕ್ಕ 2016 ರ್ದ್ 2018 ಮುಟ್ಟ ಆಹಾರ ಸಚಿವೆರಾದ್ ಅಧಿಕಾರ ಸ್ವೀಕಾರ ಮಲ್ತ್ ದ್, ಬಡಪತ್ತ್ ಜನಕುಲು ರೇಷನ್ ಕಾರ್ಡ್ ಗ್ ಸಂದಾವೊಡಾಯಿನ 10 ರ್ದ್ 13 ದಾಖಲೆನ್ ಉಂತಾದ್ ಕೇವಲ ಆಧಾರ್ ಕಾರ್ಡ್ ಮುಖೇನ ಅರ್ಜಿ ಸಂದಾದ್ ಇಲ್ಲ್ ಬಾಕಿಲ್ ಗ್ ರೇಷನ್ ಕಾರ್ಡ್ ಎತ್ತಾವುನ ಕ್ರಾಂತಿಕಾರಿ ಯೋಜನೆಗ್ ಚಾಲನೆ ಕೊರ್ದು ಇತಿಹಾಸ ನಿರ್ಮಿಸಾದೆರ್.

ಬಿಪಿಎಲ್ ಕಾರ್ಡ್ ಮಲ್ಪರೆ ನಿಗದಿ ಮಲ್ತಿನ ಆದಾಯ ಮಿತಿನ್ ಉಂತಾದ್ ಬಿಪಿಎಲ್ ಕಾರ್ಡ್ ರ್ದ್ ವಂಚಿತೆರಾಯಿನ ಲಕ್ಷರ್ದ್ ಎಚ್ಚ ಜನ ರೇಷನ್ ಕಾರ್ಡ್ ಪಡೆಯೆರೆ ಸಕಾಯ ಮಲ್ತೆರ್. 2018ಟ್ಟ್ ಮೈತ್ರಿ ಸರಕಾರಡ್ ನಗರಾಭಿವೃದ್ಧಿ ಬೊಕ್ಕ ವಸತಿ ಸಚಿವೆರಾದ್ ಅಧಿಕಾರ ಸ್ವೀಕಾರ ಮಲ್ತ್ ದ್ ಕುಡ್ಲ ಸ್ಮಾರ್ಟ್ ಸಿಟಿದೊಟ್ಟಿಗೆ ಮಸ್ತ್ ಯೋಜನೆನ್ ಪರಿಚಯ ಮಲ್ತ್ ದ್ ಯಶಸ್ವಿ ಆಯೆರ್. ಕರ್ನಾಟಕ ವಸತಿ ನಿಗಮದ ಅಧ್ಯಕ್ಷೆರಾದ್, ಕರ್ನಾಟಕ ನಗರನೀರು ಸರಬರಾಜು ಬೊಕ್ಕ ಒಳಚರಂಡಿ ಮಂಡಳಿದ ಅಧ್ಯಕ್ಷೆರಾದ್, ರಾಜೀವ್ ಗಾಂಧಿ ಹೌಸಿಂಗ್ ಬೋರ್ಡ್ ದ ಅಧ್ಯಕ್ಷೆರಾದ್, ಕರ್ನಾಟಕ ಕೊಳಗೇರಿ ಮಂಡಳಿದ ಅಧ್ಯಕ್ಷೆರಾದ್ ಬೇಲೆ ಮಲ್ದೆರ್. 2021 ಟ್ಟ್ ಕರ್ನಾಟಕ ವಿಧಾನಸಭೆತ್ತ ಪ್ರತಿ ಪಕ್ಷದ ಉಪ ನಾಯಕೆಯಾದ್ ಆಯ್ಕೆಯಾದ್ 2023 ಮುಟ್ಟ ಬೇಲೆ ಮಲ್ತ್ ದ್ ಪ್ರತೀ ಹಂತಡ್ ಸರಕಾರದ ನ್ಯೂನತೆನ್ ಸದನಡ್ ತೆರಿಪಾದೆರ್.

ಶಿಕ್ಷಣ:
ಯು ಟಿ ಖಾದರ್ ಮೇರ್ ತನ್ನ ಎಲ್ ಕೆಜಿ ಶಿಕ್ಷಣನ್ ರೋಶನಿ ನಿಲಯಡ್, 1-4 ಮುಟ್ಟ ಸೈಂಟ್ ಜೆರೋಝ, 4ನೇ ಕ್ಲಾಸ್ ರ್ದ್ ಪ್ರೌಢ ಶಿಕ್ಷಣ ಮುಟ್ಟ ಸೈಂಟ್ ಅಲೋಶಿಯಸ್ ಡ್, ಪದವಿ ಪೂರ್ವ ಶಿಕ್ಷಣನ್ ಬೆದ್ರದ ಮಹಾವೀರ ಕಾಲೇಜ್ ಡ್ ಕಲ್ತ್ ದ್ ಬೊಕ್ಕ ಎಸ್ ಡಿಎಂ ಕಾಲೇಜ್ ಡ್ ಬಿಎ, ಎಲ್ ಎಲ್ ಬಿ ಪದವಿ ಶಿಕ್ಷಣ ಮುಗಿತೆರ್.

ಹವ್ಯಾಸ:
ಮೆರೆಗ್ ಎಲ್ಯ ಪ್ರಾಯಡೇ
ಬೈಕ್ ಬೊಕ್ಕ ಕಾರ್ ರೇಸ್ ಡ್ ಎಚ್ಚದ ಆಸಕ್ತಿ ಇತ್ಂಡ್. ರಾಜ್ಯ ಬೊಕ್ಕ ರಾಷ್ಟ್ರ ಮಟ್ಟದ ಮೋಟೋ ರೇಸ್ ಚಾಂಪಿಯನ್ಶಿಪ್ ಡ್ ಪಾಲ್ ಪಡೆತೆರ್. ಕ್ರೀಡೆಡ್ ಆಸಕ್ತಿ ಇತ್ತಿನ ಮೇರ್ ಕ್ರಿಕೆಟ್, ಫುಟ್ಬಾಲ್, ವಾಲಿಬಾಲ್, ಹಾಕಿ, ಟೆನ್ನಿಸ್ ಗೊಬ್ಬೊಂದು ಇತ್ತೆರ್.

ರಾಜಕೀಯ:
1990ಟ್ಟ್ ಎನ್ ಎಸ್ ಯುಐ ಜಿಲ್ಲಾ ಪ್ರಧಾನ ಕಾರ್ಯದರ್ಶಿಯಾದ್, 1994 ರ್ದ್ 1999 ಮುಟ್ಟ ಎನ್ ಎಸ್ ಯುಐ ಜಿಲ್ಲಾಧ್ಯಕ್ಷೆರಾದ್,1999 ರ್ದ್ 2001 ಮುಟ್ಟ ಎನ್ ಎಸ್ ಯುಐ ರಾಜ್ಯ ಉಪಾಧ್ಯಕ್ಷೆರಾದ್ ಸೇವೆ ಸಂದಾದೆರ್. 2003ಟ್ಟ್ ಘಟಪ್ರಭಡ್ ನಡತಿನ ರಾಷ್ಟ್ರ ಮಟ್ಟದ ಸೇವಾದಳ ತರಬೇತಿ ಶಿಬಿರಡ್, 2004 ಟ್ಟ್ ಹಿಮಾಚಲ ಪ್ರದೇಶದ ಕಂದಘಾಟ್ ಡ್ ನಡೆತಿನ ರಾಷ್ಟ್ರ ಮಟ್ಟದ ಸೇವಾದಳ ತರಬೇತಿ ಶಿಬಿರಡ್ ಪಾಲ್ ಪಡೆದ್ 2005 ಟ್ಟ್ ಸೇವಾದಳದ ಹೆಚ್ಚುವರಿ ಮುಖ್ಯ ಸಲಹೆಗಾರೆರಾದ್ ಆಯ್ಕೆ ಆದಿತ್ತೆರ್. ಬೊಕ್ಕ ಕೆಪಿಸಿಸಿ ಸದಸ್ಯೆರಾದ್ 2008 ಟ್ಟ್ ಕೆಪಿಸಿಸಿ ಕಾರ್ಯದರ್ಶಿಯಾದ್ ಆಯ್ಕೆ ಆಯೆರ್.

TV actress Vaibhavi dies in a car accident ಕಾರ್ ಆಕ್ಸಿಡೆಂಟ್ ಡ್ ತೀರ್ ಪೋಯೆರ್ ಯುವ ನಟಿ ವೈಭವಿ

ಬೊಂಬೈ: ಬೊಂಬೈ ಮೂಲದ ಯುವ ನಟಿ ಬೊಕ್ಕ ಸೀರಿಯಲ್‌ ಕಲಾವಿದೆ ವೈಭವಿ (32) ಉಪಾಧ್ಯಾಯ ಮೇರ್ ಹಿಮಾಚಲ ಪ್ರದೇಶಡ್ ನಡತಿನ ಕಾರ್ ಆಕ್ಸಿಡೆಂಟ್ ಡ್ ತೀರ್ ಪೋಯೆರ್.

ಪುಗರ್ತೆದ ಸಾರಾಭಾಯ್ Vs ಸಾರಾಭಾಯ್ ಟಿವಿ ಶೋದ ಪಾತ್ರಗಾದ್ ಮೇರ್ ಎಚ್ಚ ಜನಪ್ರಿಯ ಆಯೆರ್. ಉತ್ತರ ಭಾರತಡ್ ನಡತಿನ ಮಾರ್ಗ ಆಕ್ಸಿಡೆಂಟ್ ಡ್ ವೈಭವಿ ತೀರ್ ಪೋಯೆರ್ ಪಂದ್ ನಿರ್ಮಾಪಕೆ ಜೆಡಿ ಮಜೇಥಿಯಾ ಮೇರ್ ಇನ್‌ಸ್ಟಾಡ್ ಪಾಡ್ದೆರ್.

ಮೇರ್ ತನ್ನ ಭಾವಿ ಕಂಡನಿನೊಟ್ಟಿಗೆ ಹಿಮಾಚಲಗ್ ಪ್ರವಾಸಗ್ ಪೋದಿತ್ತೆರ್. ಅಲ್ಪ ಕಾರ್ ಕಣಿಕ್ಕ್ ಬೂರ್ದು ಆಕ್ಸಿಡೆಂಟ್ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.

ಏಪಮುಟ್ಟ ನಮ ಧರ್ಮೊನು ಒರಿಪಾವನ ಅದಮುಟ್ಟ ನಮನ್ ಧರ್ಮ ಒರಿಪಾವುಂಡು: ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ

ತೋಕೂರು ಬ್ರಹ್ಮಕಲಶ, ನಾಗಮಂಡಲ ಉಚ್ಚಯದ ಅಕೇರಿದ ಧರ್ಮ ಸಭೆ

ಧರ್ಮ ಪನ್ಪಿನವು ಶ್ರೇಷ್ಠ. ಅಯಿಕ್ಕಾದೇ ಸುರೂತ್ತ ಮುಟ್ಟು. ಅರ್ಥ, ಕಾಮ ಇಂಚಿನೆಕ್ಕ್ ಮಾತ ತಿರ್ತ್ ದ ಮುಟ್ಟು. ಏತ್ ಸಮಯ ನಮ ಧರ್ಮೊನ್ ಒರಿಪಾವನ ಅದಮುಟ್ಟ ನಮನ್ ಧರ್ಮ ಒರಿಪಾವುಂಡು ಪಂದ್ ಶ್ರೀ ಕ್ಷೇತ್ರ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ಅಕೇರಿದ ಧರ್ಮಸಭೆಟ್ಟ್ ಅನುಗ್ರಹ ಸಂದೇಶ ಕೊರ್ದು ಪಾತೆರಿಯೆರ್.

ಶಿಸ್ತುಬದ್ಧ ಬದ್ ಕ್ ಒಂಜಿ ಕಡೆಟ್ಟ್ ಆಂಡ ಹೈಫೈ ಬದ್ ಕ್ ಬೊಕ್ಕೊಂಜಿ ಕಡೆಟ್ಟ್ ಆವೊಂದುಪ್ಪುಂಡು. ಆಂಡ ಹೈಫೈ ಬದ್ ಕ್ ಎಚ್ಚ ದಿನ ಬರ್ಪುಜಿ. ಭಾರತೀಯ ಸಂಸ್ಕೃತಿ ಪಂಡ ನೀರ್ ಇತ್ತಿಲೆಕ. ಹೈಫೈ ಸಂಸ್ಕೃತಿ ಪಂಡ ಪೇರ್ ದ ಲೆಕ್ಕ. ಮೀನ್ ನ್ ಪೇರ್ ಪಾಡ್ಂಡ ಬದುಕುಜಿ, ನೀರ್ ಗೇ ಪಾಡೊಡು. ಮರೆ ದಾಂತೆ ಇರೆ ಇಜ್ಜಿ. ಇರೆ ದಾಂತೆ ಮರೆ ಇಜ್ಜಿ . ಅಂಚೆನೆ ಧರ್ಮ ದಾಂತೆ ನಮ ಉಪ್ಪರೆ ಸಾಧ್ಯ ಇಜ್ಜಿ. ನಮ ದಾಂತೆ ಧರ್ಮ ಒರಿಪುಜಿ ಪಂದ್ ಆರ್ ಪಂಡೆರ್.

ಜ್ಯೋತಿಷಿ ವೇದಮೂರ್ತಿ ಕೊಲೆಕಾಡಿ ವಾದಿರಾಜ ಉಪಾಧ್ಯಾಯ ಮೇರ್ ನಾಗಮಂಡಲ- ನಾಗಾರಾಧನೆ ವಿಚಾರೊಡು ಉಪನ್ಯಾಸ ಕೊರ್ದು ಸರ್ಪೆ ಬೇತೆ ನಾಗೆ ಬೇತೆ ಪಂದ್ ಪೊಲಬು ಕೊರಿಯೆರ್.

ನಾಗಪಾತ್ರಿ ಸಗ್ರಿ ಶ್ರೀ ಗೋಪಾಲಕೃಷ್ಣ ಸಾಮಗೆರ್ ವಿಶೇಷ ಬಿನ್ನೆರಾದ್ ಬತ್ತಿತ್ತೆರ್.

ಈ ಪೊರ್ತುಡು ಪಾಕತಜ್ಞೆರ್ ಪಾವಂಜೆ ವೆಂಕಟೇಶ್ ಭಟ್, ಬ್ರಹ್ಮವಾಹಕೆರ್ ಪಾವಂಜೆ ಅಚ್ಯುತ ಭಟ್, ಎಲ್ಲೂರು ವಿಷ್ಣುಮೂರ್ತಿ ಭಟ್,ಕುಲಾಲ್ ಕುಟುಂಬಸ್ಥೆರ್ ಮೊಕ್ಲೆನ ಮಾನಾದಿಗೆ ನಡತ್ಂಡ್. ಹಿಂದೂ ಮುಖಂಡ ಅರುಣ್ ಪುತ್ತಿಲ ಮೆರೆಗ್ ನೆಂಪು ಕಾಣಿಕೆ ಕೊರಿಯೆರ್.

ಮಲ್ಲ ಬಿನ್ನೆರಾದ್ ಮಾಜಿ ಸಚಿವೆರ್ ನಾಗರಾಜ್ ಶೆಟ್ಟಿ, ಕಬಡ್ಡಿ ಆಟಗಾರೆ ರಿಷಾಂತ್ ದೇವಾಡಿಗ, ವಕೀಲೆರ್ ಶಶಿರಾಜ್ ಕಾವೂರು, ಡಾ.ವಿಶಾಲ್, ಉದ್ಯಮಿ ರವಿ ದೇವಾಡಿಗ ಮುಂಬೈ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಕನ್ನಡಸಾಹಿತ್ಯ ಪರಿಷತ್ ದ ಮಾಜಿ ಜಿಲ್ಲಾಧ್ಯಕ್ಷೆರ್ ಪ್ರದೀಪ್ ಕುಮಾರ್ ಕಲ್ಕೂರ, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ಪುರುಷೋತ್ತಮ ರಾವ್, ವಿಜಯಕುಮಾರ್ ರೈ, ಯೋಗೀಶ್ ಕೋಟ್ಯಾನ್,
ಎಲ್. ಕೆ. ಸಾಲ್ಯಾನ್ ಇತ್ತೆರ್.

ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಹೆಗ್ಡೆ ಬಿನ್ನೆರೆನ್ ಎದ್ಕೊಂಡೆರ್. ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಪ್ರಸ್ತಾವಿಕವಾದ್ ಪಾತೆರಿಯೆರ್. ಹೇಮಂತ್ ಸಭೆ ಸುಧಾರಿಕೆ ಮಲ್ತೆರ್. ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಸೊಲ್ಮೆ ಸಂದಾಯೆರ್.

ತೋಕೂರು ದೇವಲ್ಯಡ್ ದೈವ-ದೇವೆರ್ನ ಅಪರೂಪದ ಭೇಟಿ

ತೋಕೂರು: ಸುಮಾರ್ ವರ್ಷೊರ್ದು ಬೊಕ್ಕ ತೋಕೂರುದ ಸುಬ್ರಾಯ ದೇವೆರ್ ಬೊಕ್ಕ ಕಾಂತೇರಿ ಜುಮಾದಿ ದೈವದ ಭೇಟಿದ ಪೊರ್ಲುನು ತೂಪಿನ ಭಾಗ್ಯ ಸೋಮಾರ ರಾತ್ರೆ ಸೇರ್ದಿನ ಭಕ್ತೆರೆಗ್ ಒದಗ್ ದ್ ಬತ್ತ್ಂಡ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ಕರಿನ 15 ದಿನೊರ್ದು ನಡಪುನ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಟ್ಟ್ ವಿಶೇಷತೆದ ಒಟ್ಟುಗೆ ಸುಮಾರ್ 36 ವರ್ಷರ್ದ್ ಬೊಕ್ಕ ದೇವಲ್ಯದ ಶ್ರೀ ಕಾಂತೇರಿ ಜುಮಾದಿ ದೈವ ಬೊಕ್ಕ ಶ್ರೀ ಸುಬ್ರಾಯ ದೇವೆರ್ನ ಭೇಟಿನ್ ಭಕ್ತೆರ್ ಕಣ್ಣಾರೆ ತೂಯೆರ್.

ಜೀರ್ಣೋದ್ಧಾರ ಸಂದರ್ಭಡ್ ದೇವರ ಪ್ರಶ್ನೆಡ್ ಬತ್ತಿಲೆಕನೆ ಈ ಸರ್ತಿ ಕಾಂತೇರಿ ಜುಮಾದಿ ದೈವದ ಪುನಃಪ್ರತಿಷ್ಠೆ ಆದ್ ನೇಮ ಮಲ್ಪರೆ ವ್ಯವಸ್ಥೆ ಆದಿತ್ತ್ಂಡ್. ಅಂಚೆನೆ ಬ್ರಹ್ಮಕಲಶೋತ್ಸವದ ನಿಲೆಟ್ಟ್ ಬಾಕಿಮಾರ್ ಕಂಡೊಡು ಮಹಾರಥೋತ್ಸವ ನಡತ್ಂಡ್. ಅವೆರ್ದ್ ಬೊಕ್ಕ ದೇವರ್ ಪರಂಪರೆದಂಚ ಕೆರೆಕಾಡ್ ದ ಪೂಪಾಡಿಕಟ್ಟೆಡ್ ಕಟ್ಟೆ ಪೂಜೆ ಆದ್ ಬೆಳ್ಳಾಯರುಡು ಪುನರ್‌ನವೀಕರಣ ಆತಿನ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಜಳಕದ ಕೆರೆಟ್ಟ್ ಜಲಕ ಆದ್ ದೇವಲ್ಯಗ್ ಪೊಗ್ಗುನ ದ್ವಾರದಲ್ಪ ದೈವ-ದೇವೆರ್ನ ಭೇಟಿ ನಡತ್ ದ್ ಕೊಡಿ ಜಾಯೆರ್. ರಾತ್ರೆಡ್ ಶ್ರೀ ಕಾಂತೇರಿ ಜುಮಾದಿ ಬಂಟ ದೈವದ ನೇಮ ನಡತ್ಂಡ್.

ದೈವದ ಕೆಲಸೊನು ಮುಕೇಶ್ ಬೋಂದೆಲ್ ಅರಡನ ಕೂಟದಕುಲು ನಡಪಾದ್ ಕೊರಿಯೆರ್.
ದೇವಳದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ, ಮುಂಬೈ ಸಮಿತಿದ ಅಧ್ಯಕ್ಷೆರ್ ನಾಗೇಶ್ ಶೆಟ್ಟಿ, ಬೇತೆ ಬೇತೆ ಸಮಿತಿದ ಕೆ.ಭುವನಾಭಿರಾಮ ಉಡುಪ, ರಾಮಣ್ಣ ದೇವಾಡಿಗ, ಸೋಂದಾ ಭಾಸ್ಕರ ಭಟ್, ಮೋಹನ್‌ದಾಸ್, ವಿಜಯಕುಮಾರ್ ರೈ, ಟಿ.ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ಯೋಗೀಶ್ ಆರ್. ಕೋಟ್ಯಾನ್, ವಿಜಯ ಶೆಟ್ಟಿ, ರಾಜೇಶ್ ದಾಸ್, ಅನಂತರಾಮ ಶಿಮಂತ್ರಾಯ, ಆರ್.ಎನ್. ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ಶಂಕರ ಶೆಟ್ಟಿಗಾರ್ ಬೆಳ್ಳಾಯರು, ಸಂಪತ್ ದೇವಾಡಿಗ, ವಿನೋದ್ ಬೊಳ್ಳೂರು, ಸಂತೋಷ್‌ಕುಮಾರ್, ದೀಪಕ್ ಸುವರ್ಣ, ವನಿತಾ ಸನಿಲ್, ವಿನೋದ್‌ಕುಮಾರ್, ಸಂತೋಷ್ ದೇವಾಡಿಗ, ವರುಣ್ ಅಂಚನ್, ನಾರಾಯಣ ಜಿ.ಕೆ, ಅನುಪಮಾ ರಾವ್, ಸಂಪತ್ ಶೆಟ್ಟಿ, ಭಾಸ್ಕರ ಅಮೀನ್ ಮೊಕುಲು ಆಯಾ ಜಬದಾರಿ ನಿರ್ವಹಣೆ ಮಲ್ತೆರ್.