Tulu News

Kulashekara: AlupasTulu Shasana reinstalled ಕುಲಶೇಖರ: ಆಳುಪ ಅರಸೆರೆನ ತುಳು ಶಾಸನಗ್ ಸರಿಯಾಯಿನ ನಿಲೆ

ಕುಡ್ಲ: ಕುಲಶೇಖರದ ಶ್ರೀ ವೀರನಾರಾಯಣ ದೇವಲ್ಯಡ್ ಇತ್ತಿನ 12ನೇ ಶತಮಾನಗ್ ಸೇರಿನ ತುಳು ಬರವು ಬೊಕ್ಕ ತುಳು ಭಾಷೆದ ಶಾಸನಗ್ ಇತ್ತೆ ಸರಿಯಾಯಿನ ನಿಲೆ ತಿಕ್ ದ್ಂಡ್.

ಅಳುಪ ಅರಸೆರೆನ ಕಾಲಡ್ ತುಳು ಆಡಳಿತ ಭಾಷೆ ಆದಿತ್ತ್ಂಡ್ ಪನ್ಪುನೆಕ್ಕ್ ಈ ತುಳು ಶಾಸನನೇ ಸಾಕ್ಷಿ ಆತ್ಂಡ್. ಇಂಚಿಪ್ಪ ದೇವಲ್ಯದ ಜೀರ್ಣೋದ‍್ಧಾರದ ಪೊರ್ತುಡು ನೆನ್ ದೆತ್ತ್ ದ್ ಬರಿಕ್ಕ್ ದೀದಿತ್ತೆರ್.

ತುಳು ಶಾಸನ ಒರಿಪಾದ್ ತುಳು ಸಂಸ್ಕೃತಿ, ಪರಪೋಕುನು ಬುಲೆಪಾವೊಡು. ಉಂದು ಸಾರ ವರ್ಷದ ಇತಿಹಾಸ ಇಪ್ಪುನ ಶಾಸನ ಅತ್ತಂದೆ ತುಳು ಲಿಪಿ ಒರಿಪಾಯೆರೆ ಆಧಾರ ಆತ್ಂಡ್ ಪನ್ಪಿನ ನಿಲೆಟ್ಟ್ ದೇವಲ್ಯದ ಆಡಳಿತ ಮಂಡಳಿದಕುಲು ನೆಕ್ಕ್ ಒಂಜಿ ಸರಿತ್ತ ಜಾಗೆನ್ ಕೊರ್ದು ಗೌರವ ಕೊರ್ತೆರ್.

ಶಾಸನನ್ ಸಂರಕ್ಷಣೆ ಮಲ್ಪೊಡು ಪನ್ಪಿನ ತುಳುವೆರ್ನ ಬಿನ್ನಾಪುಗು ಬಿಲೆ ಕೊರ್ನ ಆಡಳಿತ ಮಂಡಳಿ ಬೊಕ್ಕ ತುಳುವೆರ್ ಒಟ್ಟಾದ್ ಒಂಜಿ ಕಟ್ಟೆ ನಿರ್ಮಾಣ ಮಲ್ತ್ ದ್ ಶಾಸನನ್ ಒರಿಪಾವುನ ಬೇಲೆ ಮಲ್ದೆರ್. ಆತೆ ಅತ್ತಂದೆ ಅಯಿತೊಟ್ಟಿಗೆ ಒಂಜಿ ಕನ್ನಡ ಶಾಸನನ್ ಲ ಒರಿಪಾದೆರ್.

Dr D Veerendra Heggade receives the renewed Global Accreditation certificate for PGDBM course for SDM institute of Management ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರ ಸ್ವೀಕಾರ ಮಲ್ತಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್

ಉಜಿರೆ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆಲೆನ ಆಡಳಿತಡ್ ಮೈಸೂರ್ ಡ್ ನಡತೊಂದು ಇಪ್ಪುನ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಇನ್‌ಸ್ಟಿಟ್ಯೂಟ್ ಆಫ್ ಮೆನೇಜ್‌ಮೆಂಟ್ ಡೆವೆಲಪ್‌ಮೆಂಟ್ (ಎಸ್.ಡಿ.ಎಂ.ಐ.ಎಂ.ಡಿ.) ಸಂಸ್ಥೆದ ಪಿ.ಜಿ.ಡಿ.ಎಂ. ಕೋರ್ಸ್ ಗ್ ರಡ್ಡನೇ ಸರ್ತಿ ಯುರೋಪಿಯನ್ ಫೆಡರೇಶನ್ ಆಫ್ ಮೆನೇಜ್‌ಮೆಂಟ್ ಡೆವೆಲಪ್‌ಮೆಂಟ್ (ಇ.ಎಫ್.ಎಂ.ಡಿ.) ಸಂಸ್ಥೆದ ಜಾಗತಿಕ ಮಾನ್ಯತೆ ಕೊರ್ದು ಗೌರವಿಸಾದ್ಂಡ್.

ಫ್ರಾನ್ಸ್ ದೇಶದ ಲಿಯೋನ್‌ಡ್ ಜೂ.12 ಕ್ಕ್ ನಡತಿನ ಇಸೇಸ ಲೇಸ್ ಡ್ ಸಂಸ್ಥೆದ ಆಡಳಿತ ಮಂಡಳಿ ಅಧ್ಯಕ್ಷೆರ್, ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಮೇರ್ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರನ್ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಆಡಳಿತ ಮಂಡಳಿ ಉಪಾಧ್ಯಕ್ಷೆರ್ ಡಿ. ಸುರೇಂದ್ರ ಕುಮಾರ್ ಬೊಕ್ಕ ಎಸ್.ಡಿ.ಎಂ. ಐ.ಎಂ.ಡಿ. ನಿರ್ದೇಶಕೆರ್ ಡಾ. ಎನ್. ಆರ್. ಪರಶುರಾಮನ್ ಇತ್ತೆರ್.

ಇ.ಎಫ್.ಎಂ.ಡಿ. ಅಧ್ಯಕ್ಷೆರ್ ಎರಿಕ್‌ಕೋರ್ನ್‌ವೆಲ್, ನಿರ್ದೇಶಕೆರ್ ಆಲ್ಫೋನ್ಸ್ ಸಾಕ್ವೆಟ್ ಬೊಕ್ಕ ಬರ್ಬರಾ ಸ್ಪೋರ್ನ್ ಬೊಕ್ಕ ಮಾರ್ಗದರ್ಶಕ ಅಧಿಕಾರಿ ನಿಶಿತ್ ಜೈನ್ ಮಾನ್ಯತೆ ನವೀಕರಣ ಪತ್ರ ಕೊರ್ದು ಹೆಗ್ಗಡೆ ಮೆರೆನ್ ಗೌರವಿಸಾಯೆರ್.

ಜಾಗತಿಕ ಮಟ್ಟಡ್ ಸಂಸ್ಥೆದ ಆಡಳಿತ ನಿರ್ವಹಣೆದ ಉತ್ಕೃಷ್ಟತೆನ್ ಮನ್ನಿಸಾದ್ ಸಂಸ್ಥೆಗ್ ರಡ್ಡನೇ ಸರ್ತಿ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರನ್ ಕೊರಿಯೆರ್. ಭಾರತಡೇ ಸುರುತ್ತ ಸರ್ತಿ 2017ಟ್ಟ್ ಸಂಸ್ಥೆಗ್ ಜಾಗತಿಕ ಮಾನ್ಯತೆ ತಿಕ್ಕ್ ದ್ಂಡ್. ಬೊಕ್ಕ 2020 ಟ್ಟ್, ರಡ್ಡನೇ ಸರ್ತಿ 2023 ಟ್ಟ್ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರ ಕೊರ್ದು ಗೌರವಿಸಾಯೆರ್.

ನೇರ್ದ್ ಎಸ್.ಡಿ.ಎಂ.ಐ.ಎಂ.ಡಿ. ಜಗತ್ತ್ ದ 17 ಪುಗರ್ತೆದ ಮೆನೇಜ್‌ಮೆಂಟ್ ಸಂಸ್ಥೆದ ವಿಶ್ವವಿದ್ಯಾಲಯದೊಟ್ಟಿಗೆ ಅಧ್ಯಯನಕ್ಕಾದ್ ಸಂಪರ್ಕ ಬೊಕ್ಕ ಮಾನ್ಯತೆರ್ದ್ ಉಂಡು. ಆಯಿತ್ತ ಮುತಾಲಿಕೆಡ್ ಜಂಟಿಯಾದ್ ಇಸೇಸ ಅಧ್ಯಯನ ಬೊಕ್ಕ ಸಂಶೋಧನೆ ನಡಪಾಯೆರೆ ಮುಕ್ತ ಅವಕಾಶ ಉಂಡು. ಇತ್ತೆದ ಎಸ್.ಡಿ.ಎಂ.ಐ.ಎಂ.ಡಿ.ದ 32 ಕಲ್ಪಾರ್ಥಿಲು ಅಮೇರಿಕಾ, ಮಧ್ಯಪೂರ್ವ ಬೊಕ್ಕ ಯುರೋಪಿಯನ್ ದೇಶದ ವಿಶ್ವವಿದ್ಯಾಲಯಡ್ ಇಸೇಸ ಅಧ್ಯಯನ ಬೊಕ್ಕ ಸಂಶೋಧನಾ ಕಾರ್ಯಡ್ ಉಲ್ಲೆರ್.

Dr D Veerendra Heggade receives the renewed Global Accreditation certificate for PGDBM course for SDM institute of Management

The certificate was issued from the European Federation of Management development

” Yuvavahini” Mulki organises an induction program for new members and honours student acheivers ಯುವವಾಹಿನಿ ಮುಲ್ಕಿ ಪದಗ್ರಹಣ, ಸಾಧಕ ವಿದ್ಯಾರ್ಥಿಲೆಗ್ ತಮ್ಮನ

ತುಳುನಾಡ್ ದ ಸಂಸ್ಕೃತಿ, ಸಂಸ್ಕಾರನ್ ನನದ ಸಂತೇಸಿಗ್ ತೆರಿಪಾದ್, ಅಕ್ಲೆರ್ದ್ ಲೋಕೊರ್ಮೆ ಪಸೆರುಲೆಕ ಮಲ್ಪುನ ಯುವವಾಹಿನಿ ಮುಲ್ಕಿ ಘಟಕ ಸಮಾಜದ ಬಡ ಜನಕ್ಲೆನ ಸೇವೆ ಮಲ್ತೊಂದುಪ್ಪಿನವು ಬೇತೆ ಸಂಘಟನೆಲೆಗ್ ಮಾದರಿ ಆತ್ಂಡ್ ಪಂದ್ ಯುವವಾಹಿನಿ ಕೇಂದ್ರ ಸಮಿತಿ ಅಧ್ಯಕ್ಷೆರ್ ರಾಜೇಶ್ ಬಿ. ಪಂಡೆರ್.

ಮೇರ್ ಯುವವಾಹಿನಿ ಮುಲ್ಕಿ ಘಟಕದ ಆಶ್ರಯಡ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘಡ್ ನಡತಿನ ಸಾಧಕ ಕಲ್ಪಾರ್ಥಿಲೆಗ್ ತಮ್ಮನ ಬೊಕ್ಕ ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್ ಡ್ ಪದಗ್ರಹಣ ಅಧಿಕಾರಿಯಾದ್ ಪಾತೆರಿಯೆರ್.

ಸಾಧಕ ಕಲ್ಪಾರ್ಥಿಲಾಯಿನ ಮಿಥುನ್ ಸಿ. ಅಂಚನ್ (ಶೇ.98.72), ಯಶಸ್ವಿನಿ (ಶೇ.95.83), ಅನಿಷಾ (ಶೇ.95.66), ಶಾಶ್ವತ್ ಬಿ. ಕರ್ಕೇರ (ಶೇ.95.05), ಭುವನ್ ಕೆ. ಶಾಂತಿ (ಶೇ.93.44), ಭುವಿತ್ ಯು. ಸಾನಿಲ್ಕರ್ (ಶೇ.89.83) ಮೊಕ್ಲೆಗ್ ತಮ್ಮನ ಮಲ್ತೆರ್.

ಅವೆರ್ದ್ ಬೊಕ್ಕ ಪೊಸ ಅಧ್ಯಕ್ಷೆರಾದ್ ನಿವೃತ್ತ ಯೋಧ ಕಿಲ್ಪಾಡಿ ಮಾಧವ ಪೂಜಾರಿ ಬೊಕ್ಕ ಕೂಟದ ಪದಗ್ರಹಣ ಮಲ್ತ್ ದ್ ಪ್ರಮಾಣ ವಚನ ಓದಿಯೆರ್.

ಈ ಲೇಸ್ ದ ಗುರ್ಕಾರ್ಮೆನ್ 2022-23 ನೇ ಸಾಲ್ ದ ಅಧ್ಯಕ್ಷೆರ್ ಭಾರತಿ ಭಾಸ್ಕರ ಕೋಟ್ಯಾನ್ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಕುಡ್ಲ ತಾಲೂಕ್ ಸಾಹಿತ್ಯ ಪರಿಷತ್ ಮಾಜಿ ಅಧ್ಯಕ್ಷೆರ್ ಎಂ. ಸರ್ವೋತ್ತಮ ಅಂಚನ್, ಉದ್ಯಮಿ ಪ್ರದೀಪ್ ಮುಲ್ಕಿ, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ, ಯುವವಾಹಿನಿ ಕೇಂದ್ರ ಸಮಿತಿದ ಸಂಘಟನಾ ಕಾರ್ಯದರ್ಶಿ ಪ್ರವೀಣ್ ಕುಮಾರ್ ಒಡಿಪು, ಮುಲ್ಕಿ ಘಟಕದ ಕಾರ್ಯದರ್ಶಿ 2022-23 ನೇ ಸಾಲ್ ದ ಜಾಹ್ನವಿ ಮೋಹನ್, ಕಾರ್ಯದರ್ಶಿ ವಿನಯ ವಿಶ್ವನಾಥ ಕಿಲ್ಪಾಡಿ ಪಾಲ್ ಪಡೆದಿತ್ತೆರ್.

ಭಾರತಿ ಭಾಸ್ಕರ್ ಎದ್ಕೊನಿಯೆರ್, ಜಾಹ್ನವಿ ಮೋಹನ್ ವರದಿ ಓದಿಯೆರ್, ಚುನಾವಣಾಧಿಕಾರಿ ಭರತೇಶ್ ಅಮೀನ್ ಪದಾಧಿಕಾರಿಲೆನ ಪರಿಚಯ ಮಲ್ತೆರ್. ಹಾರ್ದಿಕ್ ಕುಬೆವೂರು ಸಾಧಕ ಕಲ್ಪಾರ್ಥಿಲೆನ ಪರಿಚಯ ಮಲ್ತೆರ್. ಮೋಹನ್ ಸುವರ್ಣ ಬೊಕ್ಕ ನರೇಂದ್ರ ಕೆರೆಕಾಡು ಈ ಲೇಸ್ ದ ಸುಧಾರಿಕೆ ಮಲ್ತೆರ್. ವಿನಯ ವಿಶ್ವನಾಥ್ ಸೊಲ್ಮೆ ಸಂದಾಯೆರ್.

Radio Manipal to air ‘ Hombelaku’ a series program on personality development ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 11ನೇ ಸಂಚಿಕೆ ಜೂನ್ 13 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನನ ಜೂನ್ 14 ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

U T Khadhar honoured by Commercial and Industrial Association, Uppinangady ಉಬಾರ್ ವಾಣಿಜ್ಯ ಬೊಕ್ಕ ಕೈಗಾರಿಕಾ ಸಂಘದ ವತಿರ್ದ್ ವಿಧಾನ ಸಭಾಧ್ಯಕ್ಷೆರ್ ಯು.ಟಿ. ಖಾದರ್‌ಗ್ ತಮ್ಮನ

ಉಬಾರ್: ಪೊಸ ವಿಧಾನ ಸಭಾಧ್ಯಕ್ಷೆರಾಯಿನ ಬೊಕ್ಕ ಸುರುತ್ತ ಸರ್ತಿ ಉಬಾರ್ ಗ್ ಭೇಟಿ ಕೊರಿನ ಯು.ಟಿ. ಖಾದರ್ ಮೆರೆನ್ ಜೂ.12 ಕ್ಕ್ ಉಬಾರ್ ದ ವಾಣಿಜ್ಯ ಬೊಕ್ಕ ಕೈಗಾರಿಕಾ ಸಂಘದ ವತಿರ್ದ್ ತಮ್ಮನ ಮಲ್ತೆರ್.

ಈ ಪೊರ್ತುಡು ಸಂಘದ ಅಧ್ಯಕ್ಷೆರ್ ಪ್ರಶಾಂತ್ ಡಿಕೋಸ್ತ, ಕಾರ್ಯದರ್ಶಿ ಅಬ್ದುಲ್ ರಹಿಮಾನ್ ಯುನಿಕ್, ಉಪಾಧ್ಯಕ್ಷೆರ್ ಶಬೀರ್ ಕೆಂಪಿ, ಸಂಘದ ಕೈಲಾರ್ ರಾಜಗೋಪಾಲ ಭಟ್, ಇರ್ಷಾದ್ ಯು.ಟಿ. ಇತ್ತೆರ್.

Team from Puthila family visits Bharat Seva Ashram, Kanyana and donates rupees 25,000 ಕನ್ಯಾನ ಭಾರತ್ ಸೇವಾ ಆಶ್ರಮಗ್ ಭೇಟಿ ಕೊರ್ದು ದೇಣಿಗೆ ಕೊರಿನ ಪುತ್ತಿಲ ಪರಿವಾರದ ನಿಯೋಗ

ವಿಟ್ಲ: ಕನ್ಯಾನಡ್ ಇಪ್ಪುನ ಭಾರತ್ ಸೇವಾ ಆಶ್ರಮಗ್ ಪುತ್ತಿಲ ಪರಿವಾರದ ನಿಯೋಗ ಭೇಟಿ ಕೊರ್ದು, ನೆತ್ತ ವತಿರ್ದ್ 25000 ರೂ. ದೇಣಿಗೆ ಕೊರಿಯೆರ್.

ಬೊಕ್ಕ ಈ ಆಶ್ರಮಡ್ ಇಪ್ಪುನ ಜನಸಂಘ ಕಾರ್ಲದಿಂಚಲ ನಿಶ್ವಾರ್ಥ ಸೇವೆನ್ ಸಂದಾಯಿನ ಹಿಂದೂ ಮುಸ್ಲಿಂ ಬೊಕ್ಕ ಕ್ರಿಶ್ಚಿಯನ್ ಗ್ರಂಥದ ಬಗ್ಗೆ ಅಪಾರ ಪಾಂಡಿತ್ಯ ಇಪ್ಪುನ ಶಶಿಕಾಂತ್ ಬೋರ್ಕರ್ ಮೆರೆಗ್ ವೈಯಕ್ತಿಕ ನೆಲೆಟ್ಟ್ 20000 ರೂ. ನ್ ಕೊರ್ದು ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಅರುಣ್ ಕುಮಾರ್ ಪುತ್ತಿಲ, ಪುತ್ತಿಲ ಪರಿವಾರ ಅಧ್ಯಕ್ಷೆರ್ ಪ್ರಸನ್ನ ಮಾರ್ತಾ ಬೊಕ್ಕ ಪದಾಧಿಕಾರಿಲು ಇತ್ತೆರ್.

Bharat Bandh on June 15 th ಜೂ.15 ಕ್ಕ್ ಭಾರತ ಬಂದ್

ಆದಿವಾಸಿ ಸೆಂಗಲ್ ಅಭಿಯಾನದ ಅಧ್ಯಕ್ಷೆರ್ ಸಲ್ಖಾನ್ ಮುರ್ಮು ಮೇರ್ ಸರ್ಣ ಧರ್ಮ ಸಂಹಿತೆಗ್ ಮಾನ್ಯತೆ ಕೊರ್ಪುನೆ ಅತ್ತಂದೆ ಸುಮಾರ್ ಬೇಡಿಕೆನ್ ಈಡೇರಿಸಾಯೆರೆ ಒತ್ತಾಯ ಮಲ್ದೆರ್.

2011 ತ್ತ ಜನಗಣತಿ ಪ್ರಕಾರ ಜೈನ ಧರ್ಮದಕ್ಲೆನ ಸಂಖ್ಯೆ 44 ಲಕ್ಷ ಇತ್ತ್ಂಡ, ಆದಿವಾಸಿಲೆನ ಸಂಖ್ಯೆ 50 ಲಕ್ಷ ಇತ್ತ್ಂಡ್. ಈತ್ ಇತ್ತ್ಂಡಲ ಜೈನ ಧರ್ಮಗ್ ತಿಕ್ಕಿನ ಮಾನ್ಯತೆ ಸರ್ಣ ಧರ್ಮಗ್ ತಿಕಿಜಿ ಪಂದ್ ಮೇರ್ ಸರ್ಣ ಧರ್ಮಗ್ಲಾ ಮಾನ್ಯತೆ ಕೊರೊಡು ಪಂದ್ ಕೇಂದ್ರನ್ ಒತ್ತಾಯ ಮಲ್ತ್ ದ್ ಜೂನ್ 15 ಕ್ಕ್ ಭಾರತ್ ಬಂದ್ ಗ್ ಲೆಪ್ಪು ಕೊರ್ತೆರ್.

Bharat Bandh on June 15 th

President of Adivasi Sengal Abhyan Salkan Murmu has called for Bharth bandh on June 15th to press for certain demands including recognition for ” Sarna Dharma Samhitha”.

Umanath Kotian serves the common man – Dugganna Sawant ಜನಸಾಮಾನ್ಯೆರ್ನ ಜನ ಸೇವಕೆ ಉಮಾನಾಥ್ ಕೋಟ್ಯಾನ್: ದುಗ್ಗಣ್ಣ ಸಾವಂತೆರ್

ಹಳೆಯಂಗಡಿ: ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೇರ್ ಕ್ಷೇತ್ರದ ಜನಕ್ಲೆನ ಸಮಸ್ಯೆಗ್ ಸ್ಪಂದಿಸಾದ್, ಜನಸಾಮಾನ್ಯೆರೆನ ಜನ ಸೇವಕೆರಾದುಲ್ಲೆರ್. ಅಂಚಾದ್ ಜನಕುಲು ಅರೆನ್ ರಡ್ಡನೇ ಸರ್ತಿ ಆಯ್ಕೆ ಮಲ್ದೆರ್ ಪಂದ್ ಮುಲ್ಕಿ ಸೀಮೆದ ಅರಸುಲು ಎಂ. ದುಗ್ಗಣ್ಣ ಸಾವಂತೆರ್ ಪಂಡೆರ್.

ಆರ್ ಪಡುಪಣಂಬೂರು ಕೈತಲ್ ದ ಮುಲ್ಕಿ ಅರಮನೆತ್ತ ಕಾಂತಾಬಾರೆ ಬೂದಾಬಾರೆ ಧರ್ಮ ಚಾವಡಿಡ್ ಮುಲ್ಕಿ-ಬೆದ್ರ ವಿಧಾನಸಭೆ ಕ್ಷೇತ್ರಗ್ ರಡ್ಡನೇ ಸರ್ತಿ ಆಯ್ಕೆ ಆಯಿನ ಉಮಾನಾಥ ಕೋಟ್ಯಾನ್ ಮೇರೆಗ್ ಸಾರ್ವಜನಿಕ ಅಭಿನಂದನಾ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ನಿಸ್ವಾರ್ಥ ಸೇವೆ ಮಲ್ಪುನ ಕೋಟ್ಯಾನ್ರ್ ಕ್ಷೇತ್ರನ್ ನನಾತ್ ಬೆಳಗಾವೊಡು, ಪ್ರತೀ ಗ್ರಾಮದ ಸಮಸ್ಯೆಗ್ ಪರಿಹಾರ ಮಲ್ಪಾದ್ ಮೆರೆನ ಪುದರ್ ಶಾಶ್ವತವಾದ್ ಉಪ್ಪೊಡು. ಅವ್ವತ್ತಾಂದೆ ಆರ್ ರಾಜ್ಯಡೇ ಮಾದರಿ ಶಾಸಕೆರಾದ್ ತನ್ನ ವ್ಯಕ್ತಿತ್ವನ್ ತೊಜಪಾದೆರ್ ಪಂದ್ ಆರ್ ಪಂಡೆರ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಅಭಿನಂದನಾ ಭಾಷಣ ಮಲ್ತೆರ್.

ಈ ಪೊರ್ತುಡು ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಎನ್.ಎಸ್. ಮನೋಹರ ಶೆಟ್ಟಿ, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ. ಸೂರ್ಯಕುಮಾರ್, ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್‌ದ ಮಾಜಿ ಉಪಾಧ್ಯಕ್ಷೆರ್ ಕಸ್ತೂರಿ ಪಂಜ, ಸಾಮಾಜಿಕ ಚಿಂತಕೆರ್ ಕೋಲ್ನಾಡುಗುತ್ತು ವಿದ್ಯಾಧರ್ ಶೆಟ್ಟಿ, ಮುಲ್ಕಿ ಅರಮನೆ ವೆಲ್ಫೇರ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್‌ದ ಅಧ್ಯಕ್ಷೆರ್ ಗೌತಮ್ ಜೈನ್, ಪಡುಪಣಂಬೂರು ಗ್ರಾಮ ಪಂಚಾಯತ್‌ದ ಉಪಾಧ್ಯಕ್ಷೆರ್ ಕುಸುಮಾ ಇತ್ತೆರ್.

ಅಂಚೆನೆ ಸಾರ್ವಜನಿಕೆರ್ ಶಾಸಕೆರೆಗ್ ತಮ್ಮನ ಮಲ್ತ್ ದ್, ಪೂಮಾಲೆ ಪಾಡಿಯೆರ್. ನವೀನ್‌ಕುಮಾರ್ ಎಡ್ಮೆಮಾರ್ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

Swara Madurya Balaga- organises a program to honour Puttur MLA Ashok Kumar Rai ಸ್ವರ ಮಾಧುರ್ಯ ಬಳಗರ್ದ್ ಪುತ್ತೂರ್ ಶಾಸಕೆರ್ ಅಶೋಕ್ ಕುಮಾರ್ ರೈ ಗ್ ಅಭಿನಂದನೆ

ಸ್ವರ ಮಾಧುರ್ಯ ಬಳಗ ನೆತ್ತ ವತಿರ್ದ್ ಸುದಾನ ಶಾಲೆದ ಸಭಾ ಭವನಡ್ ಜೂನ್ 10 ಕ್ಕ್ ಬಯ್ಯಗ್ 4:00 ಗಂಟೆಗ್ ಪುತ್ತೂರ್ ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ಮೆರೆಗ್ ಅಭಿನಂದನೆ ಲೇಸ್ ನಡತ್ಂಡ್.

ಈ ಲೇಸ್ ಡ್ ದ.ಕ.ಜಿಲ್ಲಾ ದಲಿತ್ ಸೇವಾ ಸಮಿತಿ ಸ್ಥಾಪಕಧ್ಯಕ್ಷೆರ್ ಬಿ.ಕೆ. ಸೇಸಪ್ಪ ಬೆದ್ರಕಾಡು ಬೊಕ್ಕ ಸುಮಾರ್ ಗಣ್ಯೆರ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಸುಮಾರ್ ಬೇಡಿಕೆನ್ ಬಿನ್ನಾಪುದ ಮುಖೇನ ಶಾಸಕೆರೆಗ್ ಸಂದಾಯೆರ್.

‘Yuvashakthi Sevapatha ‘ provide medical aid under it’s ‘ Arogya Nidhi ‘ scheme ಯುವಶಕ್ತಿ ಸೇವಾಪಥದ ಆರೋಗ್ಯನಿಧಿ ಕೊರಿಯೆರ್

ಪ್ರತಿಭಾವಂತ ಕಲ್ಪಾರ್ಥಿ, ತನ್ನ ಭಾಷಣದ ಮುಖೇನ ರಾಷ್ಟೀಯವಾದದ ಚಿಂತನೆನ್ ಸಮಾಜಗ್ ತೆರಿಪಾವೊಂದು ಇತ್ತಿ‌ನ ಸಹೋದರಿ ಶ್ರೀದೇವಿ ಪುತ್ತೂರ್ ಮೇರ್ ಮಾರ್ಗ ಆಕ್ಸಿಡೆಂಟ್ ರ್ದ್ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್.‌

ಮೆರೆಗ್ ಸುಮಾರ್ 15 ಲಕ್ಷ ರೂ. ಚಿಕಿತ್ಸೆದ ಕರ್ಚಿ ಆಪುಂಡು ಪಂದ್ ಕುಟುಂಬದ ಸದಸ್ಯೆರ್ ದಾನಿಲೆಡ ಸಮಾಜದ ಸಕಾಯನ್ ಕೇನ್ ದಿತ್ತೆರ್.

ಅಂಚಾದ್ ಕೂಡ್ಲೆ ಕಾರ್ಯಪ್ರವೃತ್ತವಾಯಿನ ಸಾಮಾಜಿಕ ಸೇವಾ ಸಂಸ್ಥೆ ಯುವಶಕ್ತಿ ಸೇವಾಪಥ ಶ್ರೀದೇವಿ ಪುತ್ತೂರ್ ಮೆರೆಗ್ ಆರೋಗ್ಯ ನಿಧಿ ಯೋಜನೆದ ಮುಖೇನ ಕಾಲಿ 24 ಗಂಟೆಡ್ ದಾನಿಲೆರ್ದ್ ಸಾಮಾಜಿಕ ಜಾಲತಾಣದ ಮುಖೇನ 4,34,950 ರೂ. ನ್ ಒಟ್ಟು ಮಲ್ತ್ ದ್ ಶ್ರೀದೇವಿ ಮೆರೆನ ಪೋಷಕೆರೆಗ್ ಯುವಶಕ್ತಿ ಸೇವಾಪಥದ ಸದಸ್ಯೆರ್ ಕುಡ್ಲ ಮಂಗಳಾ ಆಸ್ಪತ್ರೆಗ್ ಪೋದು ಆರೋಗ್ಯ ನಿಧಿನ್ ಕೊರಿಯೆರ್.

ಕರಿನ ಫೆಬ್ರವರಿಡ್ ನಡತಿನ ಯುವಶಕ್ತಿ ಸೇವಾಪಥದ ಸುರುತ್ತ ವರ್ಷದ ಗೌಜಿಡ್ ಪ್ರಮುಖ ಭಾಷಣಗಾರ್ತಿಯಾದ್ ಶ್ರೀದೇವಿ ಪುತ್ತೂರ್ ಮೇರ್ ಪಾಲ್ ಪಡೆದಿತ್ತೆರ್. ಒಂತೆ ಪೊರ್ತುಡು ಮಲ್ಲ ಮನಸ್ಸ್ ಡ್ ಸಹಕಾರ ಮಲ್ತಿನ ಸೇವಾಬಂಧುಲೆಗ್ ಯುವಶಕ್ತಿ ಸೇವಾಪಥ ಸೊಲ್ಮೆ ಸಂದಾಯೆರ್.