ಉತ್ತರಾಖಂಡದ 5 ವರ್ಷದ ತೇಜಸ್ ತಿವಾರಿ ಚೆಸ್ ಡ್ ವಿಶ್ವದಾಖಲೆ ಮಲ್ದೆ.
ಎಲ್ಯ ಪ್ರಾಯಡೇ FIDE ರೇಟಿಂಗ್ (1149) ಪಡೆಯಿನ ಆಟಗಾರೆ ಆತೆ. 4ನೇ ವರ್ಷಡ್ ಜಿಲ್ಲಾ ಬೊಕ್ಕ ರಾಜ್ಯ ಮಟ್ಟದ ಚೆಸ್ ಗೊಬ್ಬೊಂದು ಇತ್ತಿನ ತೇಜಸ್, 13 ರಾಜ್ಯಡ್ ನಡತಿನ ಚೆಸ್ ಪಂತೊಡು ಪಾಲ್ ಪಡೆತೆ.
ಕರಿನ ವರ್ಷ 8 ವರ್ಷದೊಲಯಿದಕ್ಲೆನ ವಿಭಾಗಡ್ ಉತ್ತರಾಖಂಡಡ್ ನಡತಿನ ಪಂತೊಡು ಬೊಕ್ಕ ಭುವನೇಶ್ವರದ ರಾಷ್ಟ್ರೀಯ ಶಾಲೆದ ಚೆಸ್ ಡ್ ಟ್ರೋಫಿ ಗೆಂದ್ ದೆ.
24 ಕ್ಯಾರೆಟ್ 10 ಗ್ರಾಂ. ಬಂಗಾರ್ ದ ಬಿಲೆ ಇನಿ 380 ರೂ. ಕಮ್ಮಿ ಆತ್ಂಡ್.
ಕೋಡೆ 60490 ರೂ. ಇತ್ತಿನ ಬಂಗಾರ್ ದ ಬಿಲೆ ಇತ್ತೆ 60110 ರೂ. ಆತ್ಂಡ್. ಅಂಚೆನೆ 22 ಕ್ಯಾರೆಟ್ 10 ಗ್ರಾಂ ಬಂಗಾರ್ ದ ಬಿಲೆ 350 ರೂ. ಕಮ್ಮಿಯಾದ್ 55100 ರೂ. ಆತ್ಂಡ್. ಕೋಡೆ ನೆತ್ತ ಬಿಲೆ 55,450 ಇತ್ಂಡ್. ಆಂಡ ಬೊಳ್ಳಿ ಬಿಲೆಟ್ಟ್ ಒವ್ವೇ ಎಚ್ಚಿಕಮ್ಮಿ ಆತಿಜಿ. ಬೆಂಗ್ಲೂರ್ ಡ್ ಒಂಜಿ ಕೆಜಿ ಬೊಳ್ಳಿ ಬಿಲೆ 77250 ರೂ. ಆತ್ಂಡ್.
ಕಟೀಲ್: ದುಂಬುದ ಕಾಲಡ್ ಆಟಿ ತಿಂಗೊಲ್ ಪಂಡ ಕಷ್ಟದ ದಿನಕುಲು. ಆಚರಣೆಡ್ ವೈಜ್ಞಾನಿಕ ಕಾರಣಲು ಇತ್ತ್ಂಡ್. ಆರೋಗ್ಯದಾಯಕ ತೆನಸ್ ಲ ಇತ್ತ್ಂಡ್. ಗಂಜಿ ವನಸ್ ಗ್ ಇಪ್ಪುನ ಮಹತ್ವ ನಮಕ್ ತೆರಿದ್ ಇಪ್ಪೊಡು. ತುಳು ನಾಡ್, ನುಡಿ, ಆಚರಣೆದ ಬಗ್ಗೆ ಅಭಿಮಾನ ಇಪ್ಪೊಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.
ಮೇರ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಶಿಕ್ಷಣ ಸಂಸ್ಥೆದ ಶ್ರೀ ವಿದ್ಯಾ ಚಾವಡಿಡ್ ನಡತಿನ ಆಟಿದ ನೆಂಪು ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ರಂಗನಟೆ ನವೀನ್ ಡಿ.ಪಡೀಲ್ ಪಾತೆರ್ದ್, ಕಲಿಕೆಡ್ ಸಾಧನೆ ಮಲ್ಪೊಡು. ಅಂಚ ಪಂದ್ ಬದಕ್ ಡ್ ಪಾಠನ್ ಓದುದ್ ಪರೀಕ್ಷೆಡ್ ಪಾಸಾಪುನೇ ಮಾತ್ರ ಸಾಧನೆ ಅತ್ತ್. ಬೇತೆ ಬೇತೆ ಕ್ಷೇತ್ರಡ್ಲಾ ಸಾಧನೆ ಮಲ್ಪೊಲಿ. ಪರೀಕ್ಷೆಡ್ ಸೋತೆ ಪಂದ್ ಆತ್ಮಹತ್ಯೆದಂಚಿನ ನಿರ್ಧಾರ ದೆತೊನಿಯೆರೆ ಬಲ್ಲಿ ಪಂದ್ ಪಂಡೆರ್.
ಪಿಯುಸಿ ಪರೀಕ್ಷೆಡ್ ಎಚ್ಚ ಮಾರ್ಕ್ ಪಡೆಯಿನ ಬೊಕ್ಕ ಕ್ರೀಡಾ ಕ್ಷೇತ್ರಡ್ ರಾಷ್ಟ್ರಮಟ್ಟಡ್ ಸಾಧನೆ ಮಲ್ತಿನ 100 ಕಲ್ಪಾರ್ಥಿಲೆನ್ ಬೊಕ್ಕ ನಿವೃತ್ತಿ ಆಯೆರೆ ಇಪ್ಪುನ ಪ್ರೌಢಶಾಲೆದ ಶಿಕ್ಷಕೆರ್ ಸಾಯಿನಾಥ ಶೆಟ್ಟಿ ಬೊಕ್ಕ ಉಪಪ್ರಾಚಾರ್ಯೆರ್ ಸೋಮಪ್ಪ ಅಲಂಗಾರ್ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಕೆ.ಕೆ ಪೇಜಾವರ, ಕಲ್ಲಡ್ಕ ವಿಟ್ಠಲ ನಾಯಕ್ ಮೆರೆರ್ದ್ ಆಟಿದ ಸಂಪ್ರದಾಯ ಬೊಕ್ಕ ಜಿಲ್ಲೆದ ಪುಗರ್ತೆದ ಕಲಾವಿದೆರ್ದ್ ದೇವಪೂಂಜ ತುಳು ಆಟ ನಡತ್ಂಡ್.
ಚಾವಡಿಡ್ ದೈವಾರಾಧನೆದ ಕೊಡಿಯಡಿತ್ತ ಕಲ್ಪನೆನ್ ಮಡಲ್ ಡ್ ವಿಶಿಷ್ಟ ರೀತಿಡ್ ರಚನೆ ಮಲ್ತ್ ದ್ ಇತ್ತೆರ್. ಕಲ್ಪಾರ್ಥಿಲೆಗ್ ತುಳುನಾಡ್ ದ ತೆನಸ್ ವನಸ್ ದ ವ್ಯವಸ್ಥೆ ಇತ್ತ್ಂಡ್.
ಈ ಪೊರ್ತುಡು ದೇವಲ್ಯದ ಆಡಳಿತ ಮಂಡಳಿ ಅಧ್ಯಕ್ಷೆರ್ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು, ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣ, ವೆಂಕಟರಮಣ ಅಸ್ರಣ್ಣ, ಅನಂತಪದ್ಮನಾಭ ಅಸ್ರಣ್ಣ, ಕಮಲಾದೇವಿಪ್ರಸಾದ ಅಸ್ರಣ್ಣ, ಪ್ರದ್ಯುಮ್ನ ರಾವ್ ತಿಬರೂರ್, ಸಂತೋಷ್ ಕುಮಾರ್ ಹೆಗ್ಡೆ ಎಳೆತ್ತೂರ್, ಕೆ.ಎಂ ಶೆಟ್ಟಿ ಮಧ್ಯಗುತ್ತು, ರತ್ನಾಕರ ಶೆಟ್ಟಿ ಮುಂಡ್ಕೂರ್, ಬಿಪಿನಿಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು, ದೇವಲ್ಯದ ಇಸೇಸ ಅಧಿಕಾರಿ ಮೋಹನ್ ರಾವ್, ತ್ಯಾಗರಾಯ ಆಚಾರ್ಯ, ಹಳೆವಿದ್ಯಾರ್ಥಿ ಸಂಘದ ಲೋಕಯ್ಯ ಸಾಲಿಯಾನ್ ಇತ್ತೆರ್.
ಸೋಮಪ್ಪ ಅಲಂಗಾರ್ ಪ್ರಸ್ತಾವನೆ ಮಲ್ತೆರ್. ವಾದಿರಾಜ ರಾವ್ ತಮ್ಮನ ಇಪ್ಪುನ ಕಲ್ಪಾರ್ಥಿಲೆನ್ ಪಟ್ಟಿ ಓದಿಯೆರ್. ಸಾಯಿನಾಥ ಶೆಟ್ಟಿ ಎದ್ಕೊನಿಯೆರ್. ಶಿಕ್ಷಕಿ ರೋಹಿಣಿ ಶೆಟ್ಟಿ ಬೊಕ್ಕ ಪ್ರದೀಪ್ ಮೇರ್ ಲೇಸ್ ಸುಧಾರಿಕೆ ಮಲ್ತೆರ್. ಸುಷ್ಮಾ ಸೊಲ್ಮೆ ಸಂದಾಯೆರ್.
ಒಡಿಪು: ಏಣಗುಡ್ಡೆದ ಕಟಪಾಡಿ ಯುವಜನ ಸೇವಾ ಸಂಘ ಬೊಕ್ಕ ಒಡಿಪು ಜಿಲ್ಲೆದ ತೋಟಗಾರಿಕೆ ಬೊಕ್ಕ ಕೃಷಿ ಇಲಾಖೆದ ಒಟ್ಟು ಸೇರಿಗೆಡ್ (ಹಲಸುಮೇಳ) ಪೆಲಕಾಯಿ ಮೇಳ-2023 ಜುಲೈ 29 ಬೊಕ್ಕ 30 ಕ್ಕ್ ಒಡಿಪುದ ಕಟಪಾಡಿ ಎಸ್.ವಿ.ಎಸ್ ಹೈಸ್ಕೂಲ್ ಡ್ ಬೊಲ್ಪುಗು 9 ಗಂಟೆರ್ದ್ ಬಯ್ಯ 7 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಬೇತೆ ಬೇತೆ ಬಗೆತ್ತ ಪೆಲಯಿ ಪ್ರದರ್ಶನ, ಮಾರಾಟ, ಬೊಕ್ಕ ಬೇತೆ ಬೇತೆ ತಳಿತ್ತ ಪೆಲಕಾಯಿ ದೈತ್ತ ಮಾರಾಟ, ಸಾವಯವ ಉತ್ಪನ್ನಲು, ಕೆರೆಂಗ್, ಬೇತೆ ಬೇತೆ ತರಕಾರಿ ದೈ, ದೇಸಿ ತರಕಾರಿ ಬಿತ್ತ್ ದ ಮಾರಾಟ, ಬೇತೆ ಬೇತೆ ಬಗೆತ್ತ ಪೆಲಕಾಯಿ ತೆನಸ್ ಲು, ಪೆಲಕಾಯಿ ಹೋಳಿಗೆ, ಐಸ್ ಕ್ರೀಮ್, ಕಲ್ಪ ರಸದ ಪ್ರದರ್ಶನ ಬೊಕ್ಕ ಮಾರಾಟ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪಿನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 18 ನೇ ಸಂಚಿಕೆ ಜುಲೈ 28 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಜುಲೈ 29 ಕ್ಕ್ ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಚ್ಚರ್ ಆಗಸ್ಟ್ 11 ಕ್ಕ್ ಬುಡುಗಡೆ ಆಯೆರೆ ಉಂಡು.
ಅಡ್ಯಾರ್ ಮಾಧವ ನಾಯಕ್ ಅರ್ಪಣೆ ಮಲ್ಪುನ ಈ ಪಿಚ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಈ ಪಿಚ್ಚರ್ ಡ್ ಒಂಜಿ ಊರುದ ಯಜಮಾನೆ ಬೊಕ್ಕ ಆಯನ್ ನಂಬುದು, ಜೀವನನೇ ಆಯಗ್ ಸಮರ್ಪಣೆ ಮಲ್ತಿನ ಕೆಲಸದಾಯನ ಕತೆನ್ ನಮ ತೂವೊಲಿ.
ಏರ್ ಪೋರ್ಟ್ ಅಥಾರಿಟಿ ಆಫ್ ಇಂಡಿಯಾ ಜ್ಯೂ. ಅಸಿಸ್ಟೆಂಟ್, ಅಸಿಸ್ಟೆಂಟ್, ಎಕ್ಸಿಕ್ಯೂಟಿವ್ ಸೇರಿನಂಚೆನೆ 342 ಬೇಲೆಗ್ ಅರ್ಜಿ ಸಂದಾವೊಲಿ.
ಅರ್ಜಿ ಸಂದಾವೊನಕ್ಲೆಗ್ 30 ವರ್ಷ ಆದಿಪ್ಪೊಡು. ಹಿಂದುಳಿದ ವರ್ಗ ಬೊಕ್ಕ ಪರಿಶಿಷ್ಟದಕ್ಲೆಗ್ ಪ್ರಾಯಡ್ ಸಡಿಲಿಕೆ ಉಂಡು. ಅಭ್ಯರ್ಥಿಲು ಮಾನ್ಯತೆ ಪಡೆಯಿನ ವಿವಿಡ್ ಪದವಿ, ಬಿಕಾಂ, ಬಿ-ಟೆಕ್, LLB ಮುಗಿತ್ ಇಪ್ಪೊಡು. ಆ.5 ರ್ದ್ ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಸೆ.4 ಅಕೇರಿದ ತಾರೀಕ್ ಆತ್ಂಡ್. ಎಚ್ಚದ ಪೊಲಬುಗಾದ್ http://www.aai.aero/ ಗ್ ಭೇಟಿ ಕೊರೊಲಿ.
ಕುಡ್ಲ ಆಕಾಶ್ ಭವನ 1 ಕ್ರಾಸ್ ದ ನಿವಾಸಿ ವಾಸುದೇವ (59) ಮೇರ್ ಜು.26 ಕ್ಕ್ ಕುಡ್ಲದ ಕುಂಜತ್ತಬೈಲ್ ದುರ್ಗಾದೇವಿ ಮಂದಿರರ್ದ್ ಸೈಕಲ್ ಡ್ ಪಿದಡ್ದೆರ್.
ಮೇರ್ ಉಜ್ಜಯಿನಿ ಕೇದಾರಿನಾಥ ಬದ್ರಿನಾಥ ಧಾರ್ಮಿಕ ಕ್ಷೇತ್ರಗ್ 2630km ದೂರಗ್ ಸ್ವಇಚ್ಚೆರ್ದ್ ಸೈಕಲ್ ಡ್ ಪೋವೊಂದುಲ್ಲೆರ್.
ಮೇರ್ ನೆರ್ದ್ ದುಂಬು ನಡತ್ತೊಂದೆ ಕಾಶಿ, ಆಯೋದ್ಯೆಗ್ ಭೇಟಿ ಕೊರ್ದಿತ್ತೆರ್.
ಅಟಿಲ್‌ದ ಬೇಲೆ ಮಲ್ತೊಂದು ಇತ್ತಿನ ಪೊಂಜೋವ್ ಹಾಸನ ಜಿಲ್ಲೆದ ಆಲೂರ್ ತಾಲೂಕ್ ದ ಮಡಬಲು ಗ್ರಾಮ ಪಂಚಾಯತಿ ಅಧ್ಯಕ್ಷೆರಾದ್ ಆಯ್ಕೆ ಆತೆರ್.
ಕರಿನ 7 ವರ್ಷೊದಿಂಚ ಆಲೂರುದ ಪೊಣ್ಣುಲೆನ ಮೆಟ್ರಿಕ್ ದ ಬೊಕ್ಕ ವಿದ್ಯಾರ್ಥಿನಿಲಯಡ್ ಗುತ್ತಿಗೆ ಆಧಾರಡ್ ಬೇಲೆ ಮಲ್ತೊಂದು ಇತ್ತಿನ ರಾಜೇಶ್ವರಿ ಮೇರ್ ಕೋಡೆ ನಡತಿನ ವೋಟುಡು ಅವಿರೋಧವಾದ್ ಆಯ್ಕೆ ಆತೆರ್.
ಒವ್ವೇ ಕಾರಣಗ್ಲಾ ತತ್ತ್ ದ್‌ಲ ಕೆಬಿ ಬೇನೆನ್ ನಿರ್ಲಕ್ಷ ಮಲ್ಪೆರೆ ಬಲ್ಲಿ. ದಾಯೇ ಪಂಡ ಕೆಬಿಟ್ಟ್ ಸೋಂಕು ಸುರು ಆದ್ ಬೇನೆ ಬತ್ತ್ಂಡ, ಅವು ಬೊಕ್ಕದ ದಿನಟ್ಟ್ ಮಲ್ಲ ಸಮಸ್ಯೆಗ್ ಕಾರಣ ಆಪುಂಡು.
ನೆಕ್ಕ್ ಬೊಲ್ಲುಲ್ಲಿದ ಎಸಲ್ ನ್ ದೆತ್ತ್ ದ್ ಸೋಕು ಗುದ್ದುಲೆ. ನನೊಂಜಿ ಎಲ್ಯ ಬನಲೆಡ್ ಮೂಜಿ ನಾಲ್ ಚಮಚ ಎಡ್ಮೆದೆಣ್ಣೆ ಪಾಡ್ದ್ ಬೆಚ್ಚ ಮಲ್ಪುಲೆ. ಎಣ್ಣೆ ಬೆಚ್ಚ ಆಯಿನ ಬೊಕ್ಕ ಆಯಿಕ್ಕ್ ಬೊಲ್ಲುಲ್ಲಿ ಪಾಡ್ದ್ ಅರಪೆರೆ ಬುಡೊಡು. ಎಣ್ಣೆ ಅರತಿ ಬೊಕ್ಕ ಕೆಬಿಕ್ಕ್ 2 ರ್ದ್ 3 ಬಿಂದ್ ಬುಡ್ಲೆ. ಉಂದೆನ್ 2 ರ್ದ್ 3 ಸರ್ತಿ ಮಲ್ತ್ಂಡ ಕೆಬಿ ಬೇನೆ ಬೇಗ ಕಮ್ಮಿ ಆಪುಂಡು.
