ತುಳು ಅಪ್ಪೆ ಕೂಟದ ಉದಿಪನ, ತಮ್ಮನ ಬಲ್ಮನ, ಪಂಚಮಿನದನ ಲೇಸ್‌ದ ಲೆಪ್ಪೋಲೆ ಬುಡುಗಡೆ
ತುಳು ನಾಡ್, ನುಡಿ, ಸಂಸ್ಕೃತಿ, ಸಂಪ್ರದಾಯದ ಆಚರಿಪು, ನಿಲನಿಪ್ಪುದ ಒರಿಪುಗು ಪುಣೆಪಿ ಪೊಂಜೋವುಲೆನ ಒತ್ತೊರ್ಮೆದ ಕೂಟೊ ಆಯಿನ ತುಳು ಅಪ್ಪೆ ಕೂಟ ಪುತ್ತೂರುದ ಉದಿಪನ, ತಮ್ಮನ ಬಲ್ಮನ ಬೊಕ್ಕ ಪಂಚ ಮಿನದನ ಲೇಸ್‌ದ ಲೆಪ್ಪೋಲೆ ಬೊಕ್ಕ ತುಳು ಅಪ್ಪೆ ಕೂಟದ ಲಾಂಛನ/ಲೋಗೋ ಬುಡುಗಡೆ ಮಲ್ತ್ ಶ್ರೀ ಗುರುದೇವದತ್ತ ಸಂಸ್ಥಾನಮ್ ಒಡಿಯೂರುದ ಶ್ರೀ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ ಬೊಕ್ಕ ಒಡಿಯೂರು ಕ್ಷೇತ್ರದ ಸಾಧ್ವಿ ಮಾತಾನಂದಮಯೀ ಆಸ್ರಾದೊದ ಸಿರಿಮದಿಪು ಕೊರಿಯೆರ್.
ತುಳುನಾಡ ಸುರುತ ಪೊಂಜೋವುಲೆನ ತುಳುಕೂಟ ಪನ್ಪಿ ಪೆರ್ಮೆ ಪಟ್ಟೊಂದಿ ತುಳು ಅಪ್ಪೆ ಕೂಟದ ಉದಿಪನ ಲೇಸ್ ಸೋನೊಡು 10 ಪೋಪುನಾನಿ, ದಿನತಂಕೆ 27.08.2023 ಐತಾರೊ ಕಾಂಡೆ ಗಂಟೆ 09.00ಡ್ದ್ ಮದ್ಯಾನ 2.30 ಮುಟ್ಟ ಪುತ್ತೂರು ಮಹಾತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಾಲ್ಯೊದ ನಟರಾಜ ವೇದಿಕೆಡ್ ನಡಪೆರೆ ಇತ್ತ್‌ದ್ ಲೇಸ್‌ನ್ ಶ್ರೀ ಕ್ಷೇತ್ರ ಒಡಿಯೂರುದ ಸಾಧ್ವಿ ಶ್ರೀ ಮಾತಾನಂದಮಯೀ ಉದಿಪನ ಮಲ್ಪೆರೆ ಉಲ್ಲೆರ್. ಲೇಸ್‌ದ ಗುರ್ಕಾರ್ಮೆ ಅಖಿಲ ಭಾರತ ತುಳು ಒಕ್ಕೂಟದ ಗುರ್ಕಾರ್ರ್ ಆದುಪ್ಪುನ ಎ.ಸಿ ಭಂಡಾರಿ ವಯಿಸೊನುವೆರ್. ಮಾನಾದಿಗೆದ ಬಿನ್ನೆರಾದ್ ಶಾಸಕೆರಾಯಿನ ಅಶೋಕ್ ಕುಮಾರ್ ರೈ, ಕುಮಾರಿ ಭಾಗೀರಥಿ ಮುರುಳ್ಯ, ಕೇಶವ ಪ್ರಸಾದ್ ಮುಳಿಯ, ಮಲ್ಲ ಬಿನ್ನೆರಾದ್ ಕೆ ಸೀತಾರಾಮ ರೈ ಸವಣೂರು, ಜಯಂತ ನಡುಬೈಲ್, ವಿಜಯ ಹಾರ್ವಿನ್, ಶ್ರೀಮತಿ ವಿಜಯಲಕ್ಷ್ಮೀ ಪ್ರಸಾದ್ ರೈ, ಉಮೇಶ್ ನಾಯಕ್, ಪ್ಯಾಟ್ರಿಕ್ ಸಿಪ್ರಿಯನ್ ಮಸ್ಕರೇನಸ್, ಪೂವರಿ ತುಳು ತಿಂಗೊಲ್ದ ಪತ್ರಿಕೆದ ವಿಜಯಕುಮಾರ್ ಭಂಡಾರಿ ಹೆಬ್ಬಾರಬೈಲ್ ಪಾಲ್ ಪಡೆಯೆರುಲ್ಲೆರ್. ವಕೀಲೆರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ದುರ್ಗಾಪ್ರಸಾದ್ ರೈ ಕುಂಬ್ರ ಪ್ರಸ್ತಾವನೆ ಮಲ್ಪುವೆರ್.
ಲೇಸ್‌ಡ್ ಶ್ರೀಮತಿ ಲಕ್ಷ್ಮೀ ಬಳ್ಳಕ್ಕುರಾಯ (ಪುಲಮರ್ದ್, ಸಾಹಿತ್ಯ) ಕರ್ನಾಟಕ ಕಲಾರತ್ನ, ವಿದುಷಿ ನಯನಾ ವಿ ರೈ ಕುದ್ಕಾಡಿ (ಆರ್ಯಭಟ ಪ್ರಶಸ್ತಿ ಪುರಸ್ಕೃತ ಭರತನಾಟ್ಯ ಕಲಾವಿದೆ) ಶ್ರೀಮತಿ ಪ್ರೇಮಲತಾ ರಾವ್ (ಸಂಘಟನೆ, ಮಾಜಿ ಸದಸ್ಯೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ) ವಿದುಷಿ ಅಪರ್ಣಾ ಕೊಡೆಂಕಿರಿ (ಸಂಗೀತ, ಭರತನಾಟ್ಯ ಕಲಾವಿದೆ, ಭಗವದ್ಗೀತೆನ್ ತುಳು ಲಿಪಿಟ್ ಬರೆತಿನಾರ್) ಶ್ರೀಮತಿ ಪ್ರೇಮಲತಾ ಮಾಧವ ಬಂಗೇರ (ಹೈನುಗಾರಿಕೆ, ಕೃಷಿ) ತಮ್ಮನ ಬಲ್ಮನದ ಮಾನಾದಿಗೆ ಪಡೆಯರುಲ್ಲೆರ್.
ಉದಿಪನ ತಮ್ಮನ ಬಲ್ಮನ ಆದ್ ನಡಪಿ ಪಂಚ ಮಿನದನ ಲೇಸ್‌ಡ್ ತುಳು ನಾಡ್, ನುಡಿ, ಸಂಸ್ಕೃತಿ, ಆಚಾರ ವಿಚಾರಗ್ ಸಮ್ಮಂದಪಟ್ಟ್‌ದ್ ಅಪ್ಪೆ ಮಣ್ಣ ಕಮ್ಮೆನ – ತುಳು ಕಬಿಕೂಟ ಶಕುಂತಳಾ ಟಿ ಶೆಟ್ಟಿನ ಗುರ್ಕಾರ್ಮೆಡ್ ವಸಂತಲಕ್ಷ್ಮೀ ಪುತ್ತೂರು ಬೊಕ್ಕ ಶಾಂತಾ ಕುಂಟಿನಿ ಸಂಚಾಲಕತ್ವಡ್, ಮಲ್ಲಿಕಾ ಜೆ ರೈ ಗುಂಡ್ಯಡ್ಕ ಸುಧಾರಿಕೆಡ್ ತುಳು ಕಬಿಕೂಟಡ್ ಅಪೂರ್ವ ಕಾರಂತ್, ಸಂಧ್ಯಾ ರಾವ್ ಪುತ್ತೂರು, ದೇವಕಿ ಬನ್ನೂರು, ರೋಹಿಣಿ ರಾಘವ ಆಚಾರ್ಯ, ಶಾಂತಾ ಪುತ್ತೂರು, ಪರಮೇಶ್ವರಿ ಪ್ರಸಾದ್, ಶಾರದಾ ಕೇಶವ ನಾಯ್ಕ್ ಬೊಕ್ಕ ಸುಪ್ರೀತಾ ಚರಣ್ ಪಾಲಪ್ಪೆ ಪಾಲ್ ಪಡೆಪೆರ್.
ಅರುಣಾಬ್ಜ ಕಬಿನ ತುಳು ಮಹಾಭಾರತೋ ಮಹಾಕಾವ್ಯದ ವಾಚನೊ ವ್ಯಾಖ್ಯಾನೊ ದ್ರೌಪದಿ ಸ್ವಯಂವರೊತ ವಾಚನೊ ಡಾ. ಶೋಭಿತಾ ಸತೀಶ್, ವ್ಯಾಖ್ಯಾನೊ ಕವಿತಾ ಅಡೂರು, ಪುತ್ತೂರು ಮಲ್ಪೆರೆ ಉಲ್ಲೆರ್.
ಜೋಕುಲೆ ತೆಲಿಕೆ ನಲಿಕೆ ಪದರಂಗೀತೊಡು ವಿವೇಕಾನಂದ ಕನ್ನಡ ಮಾಧ್ಯಮ ಶಾಲೆದ ಜೋಕುಲೆನ ಬೊಕ್ಕ ಕೂಟೊದಪ್ಪೆಲ್ಲೆ ಚಾತಿರ್ಪುದ ಜೋಕುಲೆನ ತುಳು ಪದೊರಂಗೀತೊ ನಡಪೆರೆ ಉಂಡು.
ಭಾರತೀಯ ದುತ್ತೈತೊಡು ಪೊಂಜೋವುಲೆ ಒಯ್ಯಾರೋಪಸಾಲೆ ಪನ್ಪಿ ಅಶಯಡ್ ಸಾಂಪ್ರದಾಯಿಕ ತುತ್ತೈತೊ ತೂಪರಿಕೆ ಲೇಸ್ ರೋಹಿಣಿ ರಾಘವ ಆಚಾರ್ಯ, ಸವಿತಾ ರೈ ಮದಕ ಸಂಚಾಲಕತ್ವಡ್ ನಡಪೆರೆ ಉಂಡು.
ಲೇಸ್‌ಡ್ ಪಾಲ್ ಪಡೆಯಿ ಒರಿಯಗ್ ಪೊಲ್ಸುದ ಪೊದಿಕೆ /ಅದೃಷ್ಟ ವ್ಯಕ್ತಿ ಇನಾಮು ಉಂಡು. ಚಾ ಒನಸ್‌ದ ಅಟ್ಟಣೆದೊಟ್ಟು ತುಳು ಅಪ್ಪೆಕೂಟದ ಲೇಸ್ ನಡಪೆರೆ ಉಂಡು ಪಂದ್ ತುಳು ಅಪ್ಪೆ ಕೂಟದ ಗುರ್ಕಾರ್ರ್ ಹರಿಣಾಕ್ಷಿ ಜೆ ಶೆಟ್ಟಿ, ಕಾರ್ಯಂತೆರ್ ವಿದ್ಯಾಶ್ರೀ ಎಸ್ ತುಳುನಾಡ್, ಪಣವುದ ಪಾಲವೆರ್ ಭಾರತಿ ವಸಂತ್ ಪತ್ರಿಕೆಗ್ ತೆರಿಪಾದೆರ್.
ತುಳು ಅಪ್ಪೆ ಕೂಟದ ಲೆಪ್ಪೋಲೆ ಬೊಕ್ಕ ಲಾಂಛನ ಬುಡುಗಡೆಡ್ ಒಡಿಯೂರು ತುಳು ಕೂಟದ ಗುರ್ಕಾರ್ರ್ ಯಶವಂತ್ ವಿಟ್ಲ , ಕೂಟೊದ ಗುರ್ಕಾರ್ರ್ ಹರಿಣಾಕ್ಷಿ ಜೆ ಶೆಟ್ಟಿ, ಮಾನಾದಿಗೆದ ಗುರ್ಕಾರ್ರ್ ಪ್ರೇಮಲತಾ ರಾವ್, ಮಾನಾದಿಗೆದ ಮದಿಪುದಾರ್/ಸಲಹೆಗಾರೆರ್ ವಸಂತಲಕ್ಷ್ಮೀ ಪುತ್ತೂರು, ಪಣವುದ ಪಾಲವೆರ್ ಭಾರತಿ ವಸಂತ್, ಪದುಕೆರ್ ಅಂಬಿಕಾ ರಮೇಶ್ ಪಾಲ್ ಪಡೆಯೆರ್.
ತುಳು ಅಪ್ಪೆ ಕೂಟದ ಲೋಗೋ
‘ಕೇಸರಿ, ಬೊಲ್ದು, ಪಚ್ಚೆ ಗೆರೆ’ ಭಾರತಪ್ಪೆನ ಕೊಡಿನ್ ಪ್ರತಿನಿಧಿಸಾಂಡ, ‘ಕೇಪುಳ ವರ್ಣ ಸೂರ್ಯ ಚಂದ್ರೆರ್’ ತುಳುನಾಡ ಕೊಡಿತ್ತ ಪುರಪು. ಸುತ್ತುದ ‘ಪಚ್ಚೆ ಸಿರಿ’ ದೈವಾರಾಧನೆ ಸೇರಿನಂಚ ತುಳುನಾಡ್‌ಗ್ ಕಿರೀಟ ಆದುಪ್ಪಿ ಮಲೆ ಕಾಡ್‌ಲೆನ ಪಿನ್ಪು. ಪಿರವುದ ‘ಸೀರೆ’ ಯಕ್ಷಗಾನದ ಒಟ್ಟುಡು ಪೊಣ್ಣು ಪೊಂಜೋವುಲೆ ಕೂಟದ ಪುರಪು. ಪೊಣ್ಣು ತುಳುನಾಡ ‘ಬಂಗಾರ ಕಲಶ’ ಪನ್ಪಿನ ಒಟ್ಟುಡು ಭಾರತಡ್ ಸೊರ್ಣೊದ ಐಸಿರಿಡ್ ಕಳಶಪ್ರಾಯ ಆದ್ ಮೆರೆಪಿ ತುಳುನಾಡ್‌ಡ್ ‘ಕುರಲ್’ ಅರಿಬಾರ ಬುಲೆ ಬುಲೆಪಿ ಮಣ್ಣ್ ಪನ್ಪುಂಡು. ‘ತುಳುನಾಡ ನಕಾಸೆದ’ ವಿಸ್ತಾರದ ಸುತ್ತ ಇಪ್ಪುನ ‘ಬೊಲ್ದು ಗೆರೆ’ ಸುದೆ ಕಡಲ್ ಸುತ್ತ್‌ದುಂತಿ ನಾಡ್ ನಮ್ಮವು ಪನ್ಪಿನ ಒಟ್ಟುಡು ತುಳು ಬಾಸೆಗ್ ತನ್ನನೇ ಆಯಿನ ಲಿಪಿ ಉಂಡು ಪನ್ಪಿ ಪುರಪುನು ‘ತುಳು ಲಿಪಿ’ಟ್ ಬರೆಯಿ ‘ತುಳು ಅಪ್ಪೆ ಕೂಟ ಪುತ್ತೂರು’ ಪನ್ಪಿ ಬರವು ದುನಿಪುಂಡು. ಬರಿಟ್ ಇಪ್ಪುನ ‘2023’ ನಮ್ಮ ತುಳು ಕೂಟ ಉದಿಪನ ಆಯಿನ ಒರ್ಸೊ. ತಿರ್ತ್ ಇಪ್ಪುನ ‘ಕೆಂಪು’ ತ್ಯಾಗಡ್ ತುಳುನಾಡ್ ಕರ್ನಾಟಕ ಕೇರಳದ ಪಾಲ್ ಆಯಿ ಕತೆ ಪಂಡ ‘ಬಂಗಾರ ರೇಖೆ’ ತುಳುನಾಡ ಬಂಗಾರ್ ಚರಿತೆದ ಒಟ್ಟುಡು ಪೊಣ್ಣು ಪೊಂಜೋವುಲೆ ಸಿಂಗಾರದ ಪುರಪು ಪನ್ಪಿ ನಿಲೆಕಟ್ಟ ಆಶಯ ದೀವೊಂದು ಈ ಲಾಂಛನ ಮಲ್ತಿನಾರ್ ಶ್ರೀಶಾವಾಸವಿ ತುಳುನಾಡ್.
ವರದಿ: ಸಿರಿಗಂಗೆ
