ಸಿಡ್ನಿ: ಹುಷಾರ್ ಇಜ್ಜಂದೆ ಆಸ್ಪತ್ರೆಗ್ ದಾಖಲ್ ಆಯಿನ ಪೊಂಜೋವ್ ಒರ್ತಿನ ಮೆದುಳುರ್ದ್ ಜೀವದ ಪುರಿನ್ ಡಾಕ್ಟರ್ ಪಿದಯಿ ದೆತ್ತಿನ ಘಟನೆ ಆಸ್ಟ್ರೇಲಿಯಾಡ್ ನಡತ್ ದ್ಂಡ್.
ಆಸ್ಟ್ರೇಲಿಯಾದ ನ್ಯೂ ಸೌತ್‌ ವೇಲ್ಸ್‌’ದ 64 ವರ್ಷೊದ ಪೊಂಜೋವ್ ನ ಮೆದುಳುಡು 8 ಸೆಂಮೀ ಉದ್ದದ ಪುರಿವೊಂಜಿ ಪತ್ತೆ ಆತ್ಂಡ್. ಜೀವಂತ ಇಪ್ಪುನ ಈ ಪುರಿ ಮೆದುಳುಡು ಪತ್ತೆ ಆಯಿನವು ಜಗತ್ತ್ ಡೇ ಸುರುತ್ತ ಕೇಸ್ ಪಂದ್ ಡಾಕ್ಟರ್ ಪಂತೆರ್.
ಕುಡ್ಲ ನಾರಾಯಣ ಗುರು ಯುವವೇದಿಕೆ (ರಿ.) ದ ಮುತಾಲಿಕೆಡ್ 169 ನಾರಾಯಣ ಗುರು ಜಯಂತಿದ ಲೆಕ್ಕೊಡು ಕಲ್ಪಾರ್ಥಿಲೆಗ್ ಸ್ಕಾಲರ್ ಶಿಪ್ ಪಟ್ಟುನ ಲೇಸ್ ಸೆ.2 ಕ್ಕ್ ಕುಡ್ಲದ ಕೇರಳ ಸಮಾಜಂ ಕಟ್ವಾನಡ್ ಮಲ್ಪರೆ ಅಟ್ಟಣೆ ಮಲ್ದೆರ್.
ಮಧ್ಯಾಹ್ನ ಕಲ್ಪಾರ್ಥಿಲೆಗ್ ಭಾಷಣ ಪಂತೊ ಬೊಕ್ಕ ರಸಪ್ರಶ್ನೆ ಪಂತೊ ನಡಪರೆ ಉಂಡು. ಬಯ್ಯಗ್ ಸಭಾ ಲೇಸ್ ನಡಪರೆ ಇತ್ತ್ ದ್ ಕಲ್ಪಾರ್ಥಿ ವೇತನ ಬೊಕ್ಕ ಇನಾಮು ಪಟ್ಟುನ ಲೇಸ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ನಾರಾಯಣ ಗುರು ಯುವ ವೇದಿಕೆದ ಗುರ್ಕಾರ್ರೆ ಬ್ರಜೇಶ್ ಅಂಚನ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಹಿಂದುಳಿದ ವರ್ಗಲೆನ ಆಯೋಗದ ಸದಸ್ಯೆರ್ ಕೆ.ಟಿ ಸುವರ್ಣ, ಮುಲ್ಕಿ ಜೆ.ಕೆ ಮೊಸೈಕ್ಸ್ ದ ಧಣಿ ಲೋಕನಾಥ್ ಕೆ, ಕುಡ್ಲ ಕೇರಳ ಸಮಾಜಂದ ಗುರ್ಕಾರ್ರೆ ಟಿ.ಕೆ ರಾಜನ್, ಕೋಡಿಕಲ್ ಬೃಂದಾವನ ಕನ್ ಸ್ಟ್ರಕ್ಷನ್ಸ್ ದ ಧಣಿ ಚಂದ್ರಹಾಸ ಪೂಜಾರಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕುಡ್ಲ ನಾರಾಯಣ ಗುರು ಯುವ ವೇದಿಕೆದ ಸಲಹಾ ನಿರ್ದೇಶಕೆರ್ ಬೊಕ್ಕ ಸದಸ್ಯೆರ್ ತೆರಿಪಾದೆರ್.
ಬೆಂಗ್ಲೂರ್: ಚಂದ್ರನ ದಕ್ಷಿಣ ಧ್ರುವದ ಮಿತ್ತ್ ಗಂಧಕ ಇಪ್ಪುನೆನ್ ಚಂದ್ರಯಾನ-3ತ್ತ ರೋವರ್ (ಪ್ರಜ್ಞಾನ್) ಪತ್ತೆ ಮಲ್ದ್ಂಡ್.
ನಿರೀಕ್ಷೆದಂಚೆನೆ ಅಲ್ಯುಮಿನಿಯಂ(ಎಎಲ್), ಕ್ಯಾಲ್ಸಿಯಂ, ಕರ್ಬ, ಕ್ರೋಮಿಯಂ, ಟೈಟೆನಿಯಂ, ಮ್ಯಾಂಗನೀಸ್, ಸಿಲಿಕಾನ್ ಬೊಕ್ಕ ಆಮ್ಲಜನಕ ಧಾತುಲು ಪತ್ತೆ ಆತ್ಂಡ್. ಜಲಜನಕ ಧಾತುದ ಪತ್ತೆ ಕಾರ್ಯ ನಡತೊಂದು ಉಂಡು ಪಂದ್ ಇಸ್ರೋ ತೆರಿಪಾದ್ಂಡ್.
ಪ್ರಜ್ಞಾನ್ ಡ್ ಇಪ್ಪುನ ಲಿಬ್ ಉಪಕರಣ ಈ ಧಾತುನ್ ಪತ್ತೆ ಮಲ್ದ್ಂಡ್, ಚಂದ್ರನ ದಕ್ಷಿಣ ಧ್ರುವಡ್ ರೋವರ್ ಜತ್ತ್ ದ್ ಬುಧಾರಗ್ ಒಂಜಿ ವಾರ ಆಪುಂಡು. ನನ 7 ದಿನತ್ತ ಕಾಲ ಪ್ರಯೋಗ ದುಂಬರಿಯೆರೆ ಉಂಡು. ಆಂಡ ಸೆ.5 ಕ್ಕ್ ಚಂದ್ರನಲ್ಪ ಕತ್ತಲೆ ಆಯೆರೆ ಉಂಡು. ಅಲ್ಪ ಬೊಲ್ಪು ತೂಜಿಯೆರೆ ನನ 14 ದಿನ ಕಾಪೊಡು. ಆವೆರ್ದ್ ಬೊಕ್ಕ ಲ್ಯಾಂಡರ್ ಬೊಕ್ಕ ರೋವರ್ ಗ್ ಕುಡ ಜೀವ ಕೊರಿಯೆರೆ ಸಾಧ್ಯನಾ ಪನ್ಪುನೆನ್ ಇಸ್ರೋ ಪ್ರಯತ್ನ ಮಲ್ಪುನ ಸಾಧ್ಯತೆ ಉಂಡು ಪಂದ್ ಮೂಲಲು ತೆರಿಪಾದ್ಂಡ್.
ಅಖಿಲ ಭಾರತ ಬಿಲ್ಲವರ ಯೂನಿಯನ್ (ರಿ.) ಕುಡ್ಲ ಬೊಕ್ಕ ನಾರಾಯಣ ಗುರು ವಿದ್ಯಾಸಂಸ್ಥೆಲು ಕುದ್ರೋಳಿ ನೆತ್ತ ಒಟ್ಟುಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ಪುಟ್ಟು ದಿನತ್ತ ಆಚರಣೆ (ಆ.31) ಇನಿ ಕುದ್ರೋಳಿ ದಾಮೋದರ್ ಆರ್ ಸುವರ್ಣ ಸಭಾಂಗಣಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ಬೊಕ್ಕ ನಾರಾಯಣ ಗುರು ವಿದ್ಯಾಸಂಸ್ಥೆಲು ಕುದ್ರೋಳಿದ ಗುರ್ಕಾರ್ಲು ನವೀನ್ ಚಂದ್ರ ಸುವರ್ಣ ಒಯಿಸೊನ್ವೆರ್. ಶಿಕ್ಷಕಿ, ಬರವುಗಾರ್ತಿ ರೇಣುಕಾ ಕಣಿಯೂರು ಗುರುಸಂದೇಶ ಕೊರಿಯೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಕುಡ್ಲ ಶಾಸಕೆರ್ ಡಿ.ವೇದವ್ಯಾಸ ಕಾಮತ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ದ ಪ್ರಾಂಶುಪಾಲೆರ್, ಮುಖ್ಯೋಪಾಧ್ಯಾಯಿನಿ, ಅಧ್ಯಾಪಕೆರ್, ಬೊಕ್ಕ ಕಲ್ಪಾರ್ಥಿಲು ನಾರಾಯಣ ಗುರು ವಿದ್ಯಾಸಂಸ್ಥೆದ ಗುರ್ಕಾರ್ಲು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.
ಕುಡ್ಲ: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಒಟ್ಟುಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿದ ಲೆಕ್ಕೊಡು ವಿದ್ಯಾರ್ಥಿವೇತನ ಪಟ್ಟುನ ಲೇಸ್ ಸೆ.17 ಐತಾರ ಶ್ರೀ ಕ್ಷೇತ್ರದ ಕೂಟಕ್ಕಳ ಆಡಿಟೋರಿಯಂಡ್ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ಸುತ್ತುಗೋಪುರದ ಪುನರ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ಸೆ.11 ಸೋಮಾರ ನಡಪರೆ ಉಂಡು.
ಈ ಲೇಸ್ ಶ್ರೀ ನಿತ್ಯಾನಂದ ಯೋಗಾಶ್ರಮ ಕೊಂಡೆವೂರುದ ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿಲೆನ ಆಶೀರ್ವಾದಡ್, ಬೂಡುಮನೆ ನಾರಾಯಣ ಪದಕಣ್ಣಾ ತಂತ್ರಿಲೆನ ಉಪಸ್ಥಿತಿಡ್, ಬ್ರಹ್ಮಶ್ರೀ ಉಚ್ಚಿಲತ್ತಾಯ ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್, ಪುಗರ್ತೆದ ಉದ್ಯಮಿ, ಕೊಡುಗೈದಾನಿ ಸದಾನಂದ ಶೆಟ್ಟಿ ಕುಳೂರು ಕನ್ಯಾನ ಮೆರೆನ ಕೈಟ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಉಪ್ಪಳ ಶ್ರೀ ಭಗವತೀ ಕ್ಷೇತ್ರಗ್ ಸಂಬಂಧಪಟ್ಟಿನಕುಲು, ಗುರಿಕಾರೆರ್, ಮಾನಾದಿಗೆದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಉಳ್ಳಾಲ: ಸಜೀಪ ಶ್ರೀ ವೀರಾಂಜನೇಯ ಯುವಕ ಸಂಘದ 33 ನೇ ವರ್ಷೊದ ಮೊಸರು ಕುಡಿಕೆ ಉಚ್ಚಯ ಸೆ.7 ಗುರುವಾರ ಸಜೀಪನಡು ಶ್ರೀ ಷಣ್ಮುಖ ಸುಬ್ರಹ್ಮಣ್ಯ ದೇವಲ್ಯಡ್ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಸಜೀಪ ಶ್ರೀ ವೀರಾಂಜನೇಯ ಯುವಕ ಸಂಘದ ಗುರ್ಕಾರ್ರೆ ಸುರೇಶ್ ಬೋಳಮೆ, ಮಾನಾದಿಗೆದ ಗುರ್ಕಾರ್ರೆ ರಾಮ ಪೂಜಾರಿ ದೇರಾಜೆ ಬರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಒಟ್ಟುಸೇರಿಗೆಡ್ 169 ನೇ ವರ್ಷೋದ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ ಆಚರಣೆ ಆ.31 ಗುರುವಾರ ನಡಪರೆ ಉಂಡು.
ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಗುರ್ಕಾರ್ಲು ಸುಂದರ್ ಗರೋಡಿ ಬೊಕ್ಕ ಚಂದ್ರಕಲಾ ಗರೋಡಿ ಈ ಲೇಸ್ ಡ್ ತುಡರ್ ಅರ್ಲಾದ್ ಉದಿಪನ ಮಲ್ಪರೆ ಉಲ್ಲೆರ್. ಅವೆರ್ದ್ ಬೊಕ್ಕ ಮಧ್ಯಾಹ್ನ ಗುರುಪೂಜೆ ನಡಪರೆ ಉಂಡು.
ಈ ಲೇಸ್ ಗ್ ಭಕ್ತಾಭಿಮಾನಿಲು ಬೊಕ್ಕ ಸಮಾಜ ಬಾಂದವೆರ್ ಕುಟುಂಬ ಸಮೇತೆರಾದ್ ಬತ್ತ್ ದ್ ಶ್ರೀ ನಾರಾಯಣ ಗುರುಕುಲೆನ ಬೊಕ್ಕ ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಒಟ್ಟುಸೇರಿಗೆಡ್ ‘ಚಿಣ್ಣರ ದನಿ ಲೇಸ್ ದ 23ನೇ ಸಂಚಿಕೆ ಆ.30 ಬುಧಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಬಾಲ ಪ್ರತಿಭೆ ಮೋನಿಷ್ ಪಾಲ್ ಪಡೆಯೆರೆ ಉಲ್ಲೆರ್. ಆ.31 ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಓಪನ್ ಮಲ್ತ್ ದ್ ಕೇನೊಲಿ ಪಂದ್
ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಸಾಗರ: ಶಿವಪ್ಪನಾಯಕ ನಗರದ ಶ್ರೀ ಶಿವಪ್ಪನಾಯಕ ಯುವಜನ ಸಂಘದ ಮುತಾಲಿಕೆಡ್ 37 ನೇ ವರ್ಷೊದ ಗಣೇಶೋತ್ಸವ ಸೆ.18-28 ಮುಟ್ಟ ನಡಪರೆ ಉಂಡು.
ಸೆ.18 ಸೋಮಾರ ಬೊಲ್ಪುಗು ಶ್ರೀ ಮಹಾಗಣಪತಿ ವಿಗ್ರಹನ್ ರಾಜಬೀದಿ ಮೆರವಣಿಗೆಡ್ ಕನತ್ ದ್ ಪ್ರತಿಷ್ಠಾಪನೆ ಮಲ್ಪೆರೆ ಉಲ್ಲೆರ್.
ಸೆ.19 ಅಂಗಾರೆ ಬಯ್ಯಗ್ ಸಾಂಸ್ಕೃತಿಕ ಲೇಸ್ ದ ಉದಿಪನ ಲೇಸ್ ನೃತ್ಯ ಸಂಜೆ ಪೇಂಟೆದ ಜೋಕುಲೆರ್ದ್ ನಡಪರೆ ಉಂಡು.
ಸೆ.20 ಬುಧಾರ ಜೀ ಟಿವಿ ಕಾಮಿಡಿ ಕಿಲಾಡಿದ ಪುಗರ್ತೆದ ಅಂತರಾಷ್ಟ್ರೀಯ ಮಿಮಿಕ್ರಿ ಕಲಾವಿದೆ ರಮೇಶ್ ಬಾಬು ವಿ.ಎಂ ಬೊಕ್ಕ ಕೂಟದಕ್ಲೆರ್ದ್ ಹಾಸ್ಯ ಸಂಜೆ ಲೇಸ್ ನಡಪರೆ ಉಂಡು.
ಸೆ.21 ಗುರುವಾರ ಸ್ಮಾರ್ಟ್ ಗ್ರೂಪ್ ಶಿರಸಿ ಮೊಕ್ಲೆರ್ದ್ ಬೊಕ್ಕ ಜೀ ಕನ್ನಡ ಬೊಕ್ಕ ಸ್ಟಾರ್ ಸುವರ್ಣ ಟಿವಿ ಕಲಾವಿದೆರೆರ್ದ್ ವೈವಿಧ್ಯಮಯ ನೃತ್ಯ ಪ್ರದರ್ಶನ ನಡಪರೆ ಉಂಡು.
ಸೆ.22 ಸುಕ್ರಾರ ಗುರುವಂದನಾ ಲೇಸ್, ಎಸ್ಎನ್ ನಗರ ವ್ಯಾಪ್ತಿದ ಎಸ್‌ಎಸ್ಎಲ್ ಸಿ ಬೊಕ್ಕ ಪಿಯುಸಿಡ್ 90% ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ, ಶ್ರೀ ಮಹಾಗಣಪತಿ ಯಕ್ಷಗಾನ ಮಂಡಳಿ ನಡೂರ್, ಮಂದರ್ತಿ ಮೊಕ್ಲೆರ್ದ್ ಶಿವದೂತ ಪಂಜುರ್ಲಿ ಹಾಸ್ಯ ಪ್ರಸಂಗ ನಡಪರೆ ಉಂಡು.
ಸೆ.23 ಸನಿಯಾರ ಝೇಂಕಾರ್ ಮೆಲೋಡಿಸ್ ಭಟ್ಕಳ ಮೊಕ್ಲೆರ್ದ್ ವೈವಿಧ್ಯಮಯ ರಸಮಂಜರಿ ಲೇಸ್, ಮಿಮಿಕ್ರಿ ಡ್ಯುಯಲ್ ವಾಯ್ಸ್ ಮೊಕ್ಲೆರ್ದ್ ನಡಪರೆ ಉಂಡು.
ಸೆ.24 ಐತಾರ ಕಲಾಮಯಂ ಒಡಿಪು ಮೊಕ್ಲೆರ್ದ್ ಜಾನಪದ ಜಾತ್ರೆ, ಆಟ, ಕಂಗೀಲು ನಲಿಕೆ, ವೀರಗಾಸೆ, ಹಾಲಕ್ಕಿ ಸುಗ್ಗಿ ನಲಿಕೆ, ಪೂಜಾ ನಲಿಕೆ, ಕರಗ ಕೋಲಾಟ ನಡಪರೆ ಉಂಡು.
ಸೆ.25 ಸೋಮಾರ ಓಂಕಾರ್ ಕಲಾವಿದೆರ್ ಕನ್ನುಕೆರೆ, ತೆಕ್ಕಟ್ಟೆ ಮೊಕ್ಲೆರ್ದ್ ಹೊಸ ಶೈಲಿದ ಹಾಸ್ಯಮಯ ನಾಟಕ ಕಣ್ಣಾ ಮುಚ್ಚಾಲೆ ನಡಪರೆ ಉಂಡು.
ಸೆ.26 ಅಂಗಾರೆ ಬೊಲ್ಪುಗು ಸಾರ್ವತ್ರಿಕ ಗಣಹೋಮ, ಮಧ್ಯಾಹ್ನ ನುಪ್ಪು ಪ್ರಸಾದ, ಬಯ್ಯಗ್ ಪೇಂಟೆದ ಜೋಕುಲೆರ್ದ್ ನೃತ್ಯ ವೈವಿಧ್ಯ ಬೊಕ್ಕ ರವಿವರ್ಮ ಚಿತ್ರಕಲಾ ಶಾಲೆದ ಜೋಕುಲೆರ್ದ್ ಕಾವ್ಯ ಚಿತ್ರ ರಚನೆ ನಡಪರೆ ಉಂಡು.
ಸೆ.27 ಬುಧಾರ ರೂಪಕಲಾ (ಕುಳ್ಳಪ್ಪು) ಕುಂದಾಪುರ ಮೊಕ್ಲೆರ್ದ್ ಹೇ ದೇವ್ರೆ ಗಿರಾಕಿಯೇ ಇಲ್ಲಾ ಮಾರಾಯ ಹಾಸ್ಯಮಯ ನಾಟಕ ನಡಪರೆ ಉಂಡು.
ಸೆ.28 ಗುರುವಾರ ಶ್ರೀ ಶಿವಪ್ಪನಾಯಕ ಯುವಜನ ಸಂಘದ ಶ್ರೀ ಮಹಾಗಣಪತಿನ ವಿಸರ್ಜನಾ ಉಚ್ಚಯ ರಾಜ್ಯದ ಬೇತೆ ಬೇತೆ ಪುಗರ್ತೆದ ಜಾನಪದ ಪ್ರಕಾರಲಾಯಿನ ಕೇರಳದ ಪುಗರ್ತೆದ ತಯೈಂ ನೃತ್ಯಾವಳಿ ಗಾರುಡಿ ಗೊಂಬೆ, ಪಿಲಿವೇಷ, ಆಟದವೇಷ, ಜೋಕರ್, ಕೀಲುಕುದುರೆ, ಮೋಟುಪತ್ಲು, ಮಿಕಿಮೌಸ್, ಆ್ಯಂಗ್ರಿಬರ್ಡ್ಸ್, ಪಾಂಡಾದ ಪ್ರದರ್ಶನದೊಟ್ಟಿಗೆ ವೈವಭವದ ರಾಜಬೀದಿ ಮೆರವಣಿಗೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
