ಫ್ರೆಂಡ್ಸ್ ಸರ್ಕಲ್ ಕಣಂಜಾರ್ ಬೊಂಬೈದ 20 ನೇ ವರ್ಷೊದ ಲೆಕ್ಕೊಡು ಶಶಿಧರ ಕೆ ಶೆಟ್ಟಿ ಇನ್ನಂಜೆ ಮೆರೆನ ಗುರ್ಕಾರ್ಮೆಡ್, ಪ್ರವೀಣ್ ಶೆಟ್ಟಿ ಕಣಂಜಾರ್ ಮೆರೆನ ಮುತಾಲಿಕೆಡ್ ನಾಲಾಸೋಪಾರಡ್ ಕಣಂಜಾರು ಕಲೋತ್ಸವ-2023 ಅ.13 ಸುಕ್ರಾರ ನಾಲಾಸೋಪಾರದ ಗ್ಯಾಲಕ್ಸಿ ಸಭಾಂಗಣಡ್ ನಡಪರೆ ಉಂಡು.
ಅಂಚೆನೆ ಈ ಲೇಸ್ ದೊಟ್ಟಿಗೆ ಸಾಂಸ್ಕೃತಿಕ ಲೇಸ್, ಸಭಾ ಲೇಸ್ ಬೊಕ್ಕ ಸಾಧಕೆರೆಗ್ ಸನ್ಮಾನ ಲೇಸ್ ನಡಪರೆ ಉಂಡು.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಗ್ ಬತ್ತ್ ದ್ ವಾಪಸ್ ಪೋನಗ ಬಸ್ ಬರ್ತುನ ಪೊರ್ತುಡು ಕೊಡಗು ಜಿಲ್ಲೆದ ಪೊಂಜೋವ್ ಒರ್ತಿನ ಕರಿಮಣಿ ಸರನ್ ಕಂಡಿನ ಘಟನೆ ನಡತ್ಂಡ್.
ಕೊಡಗು ಜಿಲ್ಲೆದ ಸೋಮವಾರ ಸಂತೆ ನಿವಾಸಿ ಲೀಲಾ (55) ಪನ್ಪುನಾರ್ ಈ ಬಗೆಟ್ಟ್ ಸುಬ್ರಹ್ಮಣ್ಯ ಪೊಲೀಸೆರೆಗ್ ದೂರು ಕೊರ್ತೆರ್. ಪೋಲಿಸೆರ್ ಕೇಸ್ ದಾಖಲ್ ಮಲ್ದೆರ್. ಲೀಲಾ ಮೆರೆನ ಸುಮಾರ್ 87 ಸಾರ ರೂ.ದ ಕರಿಮಣಿ ಸರ ಕಂಡ್ ದ್ ಪೋತ್ಂಡ್ ಪಂದ್ ತೆರಿದ್ ಬೈದ್ಂಡ್.
ವರದಿ: ಗೋಪಿಚಂದನ್ ಕೆಎಸ್
ಚೆನ್ನೈ: ಶ್ರೀಹರಿಕೋಟಾಡ್ ರಾಕೆಟ್ ಉಡಾವಣೆರ್ದ್ ದುಂಬು ಸಮಯನ್ ಕೌಂಟ್‌ಡೌನ್ ಮಲ್ಪೆರೆ ಸ್ವರ ಕೊರೊಂದು ಇತ್ತಿನ ವಿಜ್ಞಾನಿ ವಲರ್ಮತಿ (Scientist Valarmathi) ಮೇರ್ ತಿಗಲೆ ಬೇನೆಡ್ ದೇವೆರೆ ಪಾದೊ ಸೇರಿಯೆರ್.
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಡ್ (ಇಸ್ರೋ) ವಿಜ್ಞಾನಿಯಾದ್ ಸೇವೆ ಸಂದಾವೊಂದು ಇತ್ತಿನ ವಲರ್ಮತಿ ಮೇರ್ ತಿಗಲೆ ಬೇನೆ ಬತ್ತ್ಂಡ್ ಪಂದ್ ಕೋಡೆ ಚೆನ್ನೈದ ಖಾಸಗಿ ಆಸ್ಪತ್ರೆಗ್ ಚಿಕಿತ್ಸೆಗ್ ಪಂದ್ ದಾಖಲ್ ಆದಿತ್ತೆರ್. ಆಂಡ ಚಿಕಿತ್ಸೆ ಫಲಿಸಂದೆ ತೀರ್ ಪೋಯೆರ್ ಪಂದ್ ವೈದ್ಯೆರ್ ತೆರಿಪಾದೆರ್.
ಕುಡ್ಲ ಕಮೀಷನರೇಟ್ ವ್ಯಾಪ್ತಿದ ಬಜ್ಪೆ ಕೈತಲ್ ದ ಕರ್ ವಾರ್ ಡ್ ದೋಸ್ತಿಲೆನೊಟ್ಟಿಗೆ ಗೊಬ್ಬುದು ಇಲ್ಲಡೆ ಪೋನಗ ಜವನೆಯೊರಿಗ್ ಬಿಸತ್ತಿ ಪಾಡ್ದ್ ಪೆಟ್ಟ್ ಮಲ್ತಿನ ಘಟನೆಗ್ ಸಂಬಂಧಪಟ್ಟಿನಂಚೆನೆ ಮೂಜಿ ಜನ ಆರೋಪಿಲೆನ್ ಸುರತ್ಕಲ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಅರೆಸ್ಟ್ ಆಯಿನಕುಲು ಪ್ರಶಾಂತ್ ಅಲಿಯಾಸ್ ಪಚ್ಚು (28), ಧನರಾಜ್ (23), ಯಜ್ಞೇಶ್ (22) ಪಂದ್ ತೆರಿದ್ ಬೈದ್ಂಡ್.
ಪೆಟ್ಟಾಯಿನ ಜವನೆ ಬಜ್ಪೆ ಕರ್ ವಾರ್ ಶಾಂತಿಗುಡ್ಡೆ ನಿವಾಸಿ ಅಬ್ದುಲ್ ಸಫ್ವಾನ್‌ (23) ಪಂದ್ ಗೊತ್ತಾತ್ತ್ಂಡ್. ಮೆರೆನ್ ಚಿಕಿತ್ಸೆಗ್ ಬಜ್ಪೆದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಬೊಕ್ಕ ಕುಡ್ಲಗ್ ಲೆತೊಂದು ಪೋತೆರ್.
ಈ ಘಟನೆಗ್ ಸಂಬಂಧಪಟ್ಟಿನಂಚೆನೆ ಸುರತ್ಕಲ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ತುಳುಕೂಟ ಪೌಂಡೇಶನ್ (ರಿ.) ನಾಲಾಸೋಪಾರದ ಮುತಾಲಿಕೆಡ್ ಧರ್ಮಾರ್ಥ ಕಣ್ಣ್ ಪರೀಕ್ಷೆ ಬೊಕ್ಕ ನೆತ್ತೆರ್ ಉಂಬೊಲಿ (ರಕ್ತ ದಾನ) ಲೇಸ್ ಸೆ.10 ಐತಾರ ನಾಲಾಸೋಪಾರದ ಗ್ಯಾಲಕ್ಸಿ ಸಭಾಂಗಣಡ್ ನಡಪರೆ ಉಂಡು.
ವಸಾಯಿ ವಿರಾರ್ ದ ಮಾಜಿ ಉಪ ಮೇಯರ್ ಉಮೇಶ್ ನಾಯ್ಕ್ ಲೇಸ್ ದ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ವಸಾಯಿ ತಾಲೂಕ್ ದ ತಹಶಿಲ್ದಾರ್ ಅವಿನಾಶ್ ಕೋಸ್ವಿ, ವಿವಿ ಎಮ್ ಸಿ ಉಪ ಆಯುಕ್ತೆರ್ ವಿಜಯಕುಮಾರ್ ದ್ವಾಸೆ ಬರಿಯೆರೆ ಉಲ್ಲೆರ್. ಮಾನಾದಿಗೆದ ಬಿನ್ನೆರಾದ್ ಡಾ.ಸತ್ಯಪ್ರಕಾಶ್ ಶೆಟ್ಟಿ ಪಾಲ್ ಪಡೆಪೆರ್.
ಅಂಚೆನೆ ಮಹಾರಾಷ್ಟ್ರ ಸರ್ಕಾರರ್ದ್ ತಿಕ್ಕುನ ಆರೋಗ್ಯದ ಯೋಜನೆ ಜ್ಯೋತಿಬಾ ಮಹಾತ್ಮಾ ಪುಲೆ ಯೋಜನೆ ಬೊಕ್ಕ ಕೇಂದ್ರ ಸರ್ಕಾರರ್ದ್ ಪ್ರದಾನಮಂತ್ರಿ ಆಯುಷ್ಮಾನ್ ಆರೋಗ್ಯ ಯೋಜನೆದ ಪ್ರಯೋಜನನ್ ಪಡೆಯೆರೆ ತಜ್ಞೆರ್ ಪೊಲಬು ಕೊರ್ಪೆರ್.
ಈ ಮಾತ ಲಾಭನ್ ಸಮಾಜ ಬಾಂಧವೆರ್ ಪಡೆವೊಡು, ಅಂಚೆನೆ ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ತುಳುಕೂಟ ಪೌಂಡೇಶನ್ (ರಿ.) ನಾಲಾಸೋಪಾರದ ಗುರ್ಕಾರ್ಲು ಶಶಿಧರ್ ಕೆ ಶೆಟ್ಟಿ ಇನ್ನಂಜೆ, ಮಾನಾದಿಗೆದ ಕಾರ್ಯದರ್ಶಿ ಜೆ.ಡಿ ಶೆಟ್ಟಿ ಪಳ್ಳಿ, ಮಾನಾದಿಗೆದ ಕೋಶಾಧಿಕಾರಿ ರಾಜೇಶ್ ವೈ ಕರ್ಕೇರ, ವೈದ್ಯಕೀಯ ಸಮಿತಿದ ಕಾರ್ಯಾಧ್ಯಕ್ಷೆರ್ ದಯಾನಂದ ಬೋಂಟ್ರ ಬಿನ್ನಾಪು ಮಲ್ದೆರ್.
ಪೊಣ್ಣನ್ ಮದಿಮೆ ಆವಂದೆ ದೀಪಾವೊಂದಿನ ಸಂಬಂಧ ಅತ್ತ್ಂಡ ಅಕ್ರಮ ಸಂಬಂಧದ ಮುಖೇನ ಪುಟ್ಟಿನ ಬಾಲೆದ ಪೋಷಕೆರೆಗ್ ಸೇರಿನ ಮಾತ ಆಸ್ತಿಡ್ ಹಕ್ಕ್ ಉಂಡು ಪಂದ್ ಸುಪ್ರೀಂ ಕೋರ್ಟ್ ತೀರ್ಪು ಕೊರ್ತುಂಡು.
ಮುಖ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ್ ಮುತಾಲಿಕೆಡ್ ಮೂಜಿ ಸದಸ್ಯೆರ್ನ ನ್ಯಾಯಪೀಠ ಈ ಮಹತ್ವದ ತೀರ್ಪುನ್ ಕೊರ್ತುಂಡು.
ಹಿಂದೂ ಉತ್ತರಾಧಿಕಾರ ಕಾಯ್ದೆ ಬೊಕ್ಕ ಹಿಂದೂ ವಿವಾಹ ಕಾಯ್ದೆ ಅನ್ವಯದ ಜೋಕುಲೆಗ್ ಆಸ್ತಿಡ್ ಅಧಿಕಾರ ಇಪ್ಪುಂಡು ಪಂದ್ ನ್ಯಾಯಪೀಠ ತೆರಿಪಾದ್ಂಡ್.
2011ಕ್ಕ್ ಮದ್ರಾಸ್ ಹೈಕೋರ್ಟ್ ಕೊರ್ನ ತೀರ್ಪುನ್ ಈ ಮುಖೇನ ಸುಪ್ರೀಂ ಕೋರ್ಟ್ ಕ್ಯಾನ್ಸಲ್ ಮಲ್ದ್ಂಡ್. ಅಕ್ರಮ ಸಂಬಂಧದ ಬಾಲೆಗ್ ಪೋಷಕೆರ್ ಸಂಪಾದನೆ ಮಲ್ತಿನ ಆಸ್ತಿಡ್ ಮಾತ್ರ ಹಕ್ಕ್ ಉಂಡು. ಆಂಡ, ಪಿತ್ರಾರ್ಜಿತ ಆಸ್ತಿಡ್ ಹಕ್ಕ್ ಇಜ್ಜಿ ಪಂದ್ ಮದ್ರಾಸ್ ಹೈಕೋರ್ಟ್ ತೀರ್ಪು ಕೊರ್ದಿತ್ತ್ಂಡ್. ಸುಪ್ರೀಂ ಕೋರ್ಟ್ ದ ಈ ತೀರ್ಪುರ್ದ್ ಹೈಕೋರ್ಟ್ ತೀರ್ಪು ಕ್ಯಾನ್ಸಲ್ ಆತ್ಂಡ್.
ಕುಡ್ಲ: ಕರ್ನಾಟಕ ರಾಜ್ಯ ಉನ್ನತ ಶಿಕ್ಷಣ ಅಕಾಡೆಮಿ ನಿರ್ದೇಶಕೆರಾದ್ ನಿವೃತ್ತ ಪ್ರಾಧ್ಯಾಪಕೆ, ಲೇಖಕೆ, ಚಿಂತಕೆ ಡಾ.ಚಂದ್ರ ಪೂಜಾರಿ ಮೆರೆನ್ ರಾಜ್ಯ ಸರಕಾರ ನೇಮಕ ಮಲ್ದ್ಂಡ್.
ಧಾರವಾಡಡ್ ಕೇಂದ್ರ ತಾನ ಇಪ್ಪುನ ಉನ್ನತ ಶಿಕ್ಷಣ ಅಕಾಡೆಮಿ ರಾಜ್ಯದ ಉನ್ನತ ಶಿಕ್ಷಣದ ನೀತಿ ನಿರೂಪಣೆನ್ ತಯಾರ್ ಮಲ್ಪರೆ ಸರಕಾರಗ್ ಸಲಹೆ, ಮಾರ್ಗಸೂಚಿನ್ ಕೊರ್ಪುನ ಅತ್ಯುನ್ನತ ಸಂಸ್ಥೆ ಆತ್ಂಡ್.
ಡಾ.ಚಂದ್ರ ಪೂಜಾರಿ ಮೇರ್ ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಅಭಿವೃದ್ಧಿ ಅಧ್ಯಯನ ವಿಭಾಗದ ಪ್ರಾಧ್ಯಾಪಕೆರಾದ್ ಬೊಕ್ಕ ಹಾವೇರಿ ಜಾನಪದ ವಿಶ್ವವಿದ್ಯಾಲಯದ ಅನ್ವಯಿಕ ಜಾನಪದ ವಿಭಾಗದ ಡೀನ್ ಆದ್ ಸೇವೆ ಸಂದಾದೆರ್. ಸಮಾಜ ಸಂಶೋಧನೆಡ್ ಇಪ್ಪುನ ಮೇರ್ ಸುರುತ್ತ ಸರ್ತಿ ರಾಜ್ಯಡ್ ದಲಿತ್ ಡೆವೆಲಪ್ಮೆಂಟ್ ಇಂಡೆಕ್ಸ್ ತಯಾರ್ ಮಲ್ತಿನ ತಜ್ಞೆರಾತೆರ್.
ಪಂಚಾಯತ್ ರಾಜ್ ಕಾಯಿದೆ ತಿದ್ದುಪಡಿ ಕೋರ್ ಕಮಿಟಿ ಸದಸ್ಯೆರಾದ್, ಸ್ಟೇಟ್ ಹ್ಯೂಮನ್ ಡೆವಲಪ್ಮೆಂಟ್ ಇಂಡೆಕ್ಸ್ ಕೋರ್ ಕಮಿಟಿ ಸದಸ್ಯೆರಾದ್, ರಾಜ್ಯ ಆಡಳಿತ ತರಬೇತಿ ಸಂಸ್ಥೆದ ಸಂಪನ್ಮೂಲ ವ್ಯಕ್ತಿಯಾದ್, ಮೈಸೂರ್ ದ ಅಬ್ದುಲ್ ನಝೀರ್ ಸಾಬ್ ಗ್ರಾಮೀಣಾಭಿವೃದ್ಧಿ ಸಂಸ್ಥೆದ ಸಂಪನ್ಮೂಲ ವ್ಯಕ್ತಿಯಾದ್ ಸೇವೆ ಸಂದಾದೆರ್.
ಒಟ್ಟು 22 ಬೂಕುಲೆನ್ ಬರೆಯಿನ ಡಾ.ಚಂದ್ರ ಪೂಜಾರಿ ಮೇರ್ ವಿಜಯ ಕರ್ನಾಟಕ, ಕನ್ನಡ ಪ್ರಭ ಪ್ರಜಾವಾಣಿ ಪತ್ರಿಕೆದ ಪತ್ರಿಕೆದ ಅಂಕಣ ಬರವುಗಾರೆರಾದ್ ಇತ್ತೆರ್. ರಾಜ್ಯದ ಬೇತೆ ಬೇತೆ ಟಿ.ವಿ. ಮಾಧ್ಯಮಲೆಡ್ ವಿಚಾರ ಮಂಡನೆ ಮಲ್ತೊಂದು ಇತ್ತೆರ್.
ಮೂಲತಃ ಪುತ್ತೂರ್ ತಾಲೂಕ್ ದಾರ್ ಆಯಿನ ಮೇರ್ ಸೈಂಟ್ ಫಿಲೋಮಿನಾ ಹೈಸ್ಕೂಲ್ ಬೊಕ್ಕ ಸೈಂಟ್ ಫಿಲೋಮಿನಾ ಕಾಲೇಜ್ ಡ್ ವ್ಯಾಸಂಗ ಮಲ್ದೆರ್. ಎಂ.ಕಾಂ ಅಧ್ಯಯನನ್ ಕುಡ್ಲ ವಿಶ್ವವಿದ್ಯಾನಿಲಯಡ್ ಮಲ್ದೆರ್. ಬೊಕ್ಕ ಉಂದುವೇ ವಿಶ್ವವಿದ್ಯಾಲಯಡ್ ಬಿಸಿನೆಸ್ ಅಡ್ಮಿನಿಸ್ಟ್ರೇಷನ್ ವಿಷಯಡ್ ಪಿ.ಎಚ್.ಡಿ ಪದವಿ ಪಡೆತೆರ್.
ಶೋಷಿತ ಜನಕೋಟಿ ಜ್ಞಾನವಂತೆರಾವೊಡು, ಶೋಷಕೆರ್ ಮನೋಧರ್ಮ ಬದಲಾಯಿಸಾವುನ ಜ್ಞಾನಿಲಾವೊಡು ಪನ್ಪುನೆನ್ ನಾರಾಯಣ ಗುರು ಚಳವಳಿದ ಮೂಲ ಉದ್ದೇಶ ಆತ್ಂಡ್. ಮೇರ್ ಧಾರ್ಮಿಕತೆದ ತಳಹದಿಡ್ ಸಾಮಾಜಿಕ, ಶೈಕ್ಷಣಿಕ, ಆರ್ಥಿಕ ಪರಿವರ್ತನೆನ್ ಕೇರಳಡ್ ಅನುಯಾಯಿಲೆನ ಬೆಂಬಲರ್ದ್ ತನ್ನ ಜೀವಿತಾವಧಿಡೇ ಯಲ್ಲೇ ಸಾಧಿಸಾದೆರ್ ಪಂದ್ ಶ್ರೀ ನಾರಾಯಣ ಗುರು ಅಧ್ಯಯನ ಪೀಠದ ಪೂರ್ವ ನಿರ್ದೇಶಕೆರ್, ಸಾಹಿತಿ ಮುದ್ದು ಮೂಡುಬೆಳ್ಳೆ ಪಂಡೆರ್.
ಮೇರ್ ಬೆಂಗ್ಲೂರ್ ದ ರವೀಂದ್ರ ಕಲಾಕ್ಷೇತ್ರಡ್ ಕರ್ನಾಟಕ ಸರಕಾರ, ಆರ್ಯ ಈಡಿಗ ಮಹಾಸಂಸ್ಥಾನದ ಒಟ್ಟುಸೇರಿಗೆಡ್ ಆಯೋಜನೆ ಮಲ್ತಿನ ಶ್ರೀ ನಾರಾಯಣ ಗುರು ಜಯಂತಿ ಲೇಸ್ ದ ವಿಶೇಷ ಉಪನ್ಯಾಸಕೆರ್ನ ನಿಲೆಟ್ಟ್ ಪಾತೆರಿಯೆರ್.
ಈ ಲೇಸ್ ದ ಉದಿಪನನ್ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಮಲ್ತೆರ್.
ಈ ಪೊರ್ತುಡು ಸೋಲೂರು ಆರ್ಯ ಈಡಿಗ ಮಹಾಸಂಸ್ಥಾನದ ಪೀಠಾಧಿಪತಿ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಶಿಕ್ಷಣ ಸಚಿವೆರ್ ಮಧು ಬಂಗಾರಪ್ಪ, ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ ಶಿವರಾಜ ತಂಗಡಗಿ, ಆರ್ಯ ಈಡಿಗ ಸಂಸ್ಥಾನದ ಅಧ್ಯಕ್ಷೆರ್ ಡಾ ತಿಮ್ಮೆ ಗೌಡ, ಶಾಸಕೆರ್ ಬೇಳೂರು ಗೋಪಾಲಕೃಷ್ಣ, ಹೆಚ್ ಆರ್ ಗವಿಯಪ್ಪ, ಎಂ ಎಲ್ ಸಿ ಹರೀಶ್ ಕುಮಾರ್, ಬೆಂಗ್ಲೂರ್ ಬಿಲ್ಲವ ಅಸೋಶಿಯೇಶನ್ ದ ಗುರ್ಕಾರ್ಲು ಎಂ.ವೇದ ಕುಮಾರ್ ಪಾಲ್ ಪಡೆದಿತ್ತೆರ್.
ಪದಿನೆಡ್ಮ ದೇವಲ್ಯಲೆನ, 18 ಬಸದಿಲೆನ, 18 ಕೆರೆತ್ತ ಪೊರ್ಲುದ ಪೇಂಟೆ ಬೆದ್ರ. ಮೂಡುವೇಣುಪುರ ಪಂದ್ ಲ ಲೆಪ್ಪುವೆರ್. ಮುಲ್ಪ ವಿಜಯನಗರ ಸಾಮ್ರಾಜ್ಯದ ಕಾಲದ ದುಂಬುರ್ದ್ ಲ ಸಾರರ್ದ್ ಎಚ್ಚ ವರ್ಷೊಲೆರ್ದ್ ಆರಾಧನೆ ಮಲ್ತಿನ ಐತಿಹಾಸಿಕ ಪುಗರ್ತೆದ ಶ್ರೀ ಗೋಪಾಲಕೃಷ್ಣ ದೇವಲ್ಯ ಬೆದ್ರದ ಕಲ್ಸಂಕದ ಕೈತಲ್ ಉಂಡು.
ಈ ದೇವಲ್ಯನ್ ದುಂಬು ಕಲ್ಸಂಕ ಪ್ರದೇಶದ ಪೊಸ ಕೇರಿ ಪಂದ್ ಲೆತೊಂದು ಇತ್ತೆರ್. ಆ ಪೊರ್ತುಡು ಪೊಸ ಕೇರಿ ಶ್ರೀ ಗೋಪಾಲಕೃಷ್ಣ ದೇವೆರ್ ಪಂದ್ ಲ ಲೆತೊಂದು ಇತ್ತೆರ್. ಉಂದು ಇತಿಹಾಸಿಕ ಬೂಕುಲೆಡ್ ದಾಖಲೆ ಆತ್ಂಡ್.
2017ನೇ ಇಸವಿಡ್ ದೇವಲ್ಯ ಪುನರುತ್ಥಾನ ಆಂಡ್. ದೇವಸ್ಥಾನದ ಎದುರುಭಾಗಡ್ ಸುಂದರವಾಯಿನ ಪುಷ್ಕರಣಿ ಉಂಡು. ದುಂಬು ಈ ದೇವಲ್ಯಗ್ ಚಾತುರ್ಮಾಸದ ಪೊರ್ತುಡು ಒಡಿಪುದ ಯತಿಲು ಬತ್ತ್ ದ್ ಮೊಕ್ಕಾಂ ಇತ್ತೆರ್. ಶ್ರೀ ಗೋಪಾಲಕೃಷ್ಣ ಆಟದ ಮೇಳ ಪುಗರ್ತೆನ್ ಪಡೆದಿತ್ತ್ಂಡ್. ಶ್ರೀ ಗೋಪಾಲಕೃಷ್ಣ ದೇವೆರೆಗ್, ಆಟಗ್ ಅವಿನಾಭಾವ ಸಂಬಂಧ ಉಂಡು. ಶ್ರೀ ಗೋಪಾಲಕೃಷ್ಣ ದೇವಲ್ಯದ ಯಕ್ಷಗಾನೀಯ ಮೊಸರು ಕುಡಿಕೆದ ಶತಮಾನಗ್ ಮಿಗಿಲಾಯಿನ ಇತಿಹಾಸ ಇಪ್ಪುನ ಶೋಭಾಯಾತ್ರೆದ ಸೊಬಗು. ತೆಂಕು ತಿಟ್ಟುದ ಆಟದ ಹಿಮ್ಮೇಳನಡ್ ಪೇಟೆ ಉದ್ದಗ್ಲಾ ನೇತಾಡಿನ ಮಡಿಕೆಲು ಚಕ್ರಾಯುಧಡ್ ಪುಡತೊಂದು ಪೋಪಿನ ದೃಶ್ಯ ತೂಯೆರೆನೆ ಪೊರ್ಲು. ತುಳುನಾಡ್ ದ ಸಂಸ್ಕೃತಿನ್ ತೂಪಾವುನ ಈ ಉಚ್ಚಯಡ್ ಅನಾದಿರ್ದ್ ಲ ಜನಸಂಖ್ಯೆ ಉಂಡು.
ಮೊಸರು ಕುಡಿಕೆ ಉಚ್ಚಯಗ್ 107 ವರ್ಷೊದ ಇತಿಹಾಸ ಉಂಡು. ಸುರುಟ್ಟ್ ಶ್ರೀ ಕೃಷ್ಣನೊಟ್ಟಿಗೆ ಬಲರಾಮ ಬೊಕ್ಕ ಸುಭದ್ರೆ ಆಟದ ವೇಷಧಾರಿಲು ಕರ ಪುಡಪುನ ಸಂಪ್ರದಾಯ ಇತ್ತ್ಂಡ್. ಕಾಲ ಕರಿಲೆಕ್ಕನೇ ಕೆಲವೊಂಜಿ ಆಚರಣೆ ಬದಲಾದ್ ಇತ್ತೆ ಕೃಷ್ಣ ವೇಷ ಪಾಡಿನಕುಲು ಮೊಸರು ಕುಡಿಕೆನ್ ಪುಡಪುನೆನ್ ತೂವೊಲಿ.
ದುಂಬು ದಕ್ಷಿಣ ಕನ್ನಡ, ಒಡಿಪು ಜಿಲ್ಲೆಡ್ ಗೌಜಿಡ್ ಪಗೆಲ್ ಮೊಸರು ಕುಡಿಕೆ ಉಚ್ಚಯ ಪಂದ್ ಈ ಉಚ್ಚಯನ್ ಲೆತ್ತೊಂದು ಇತ್ತೆರ್. ಕಾಲ ಕರಿಲೆಕ್ಕನೆ ಈ ಉಚ್ಚಯ ಶ್ರೀ ಗೋಪಾಲಕೃಷ್ಣ ದೇವಲ್ಯದ ಉಚ್ಚಯ ಪಂದ್ ಮರತ್ ದ್ ಉಚ್ಚಯದ ಲೆಕ್ಕೊಡು ನಡಪುನ ಮನೋರಂಜನೆ ಮಾತ್ರ ಆತ್ಂಡ್. ಅತ್ತಂದೆ ದೇವಲ್ಯಗ್ ಬರ್ಪುನಕ್ಲೆನ ಸಂಖ್ಯೆಲ ಕಮ್ಮಿ ಆತ್ಂಡ್.
ಆಂಡ ಈ ವರ್ಷ ಅಷ್ಟಮಿದ ದಿನ ಬೆದ್ರದ ಕಲ್ಸಂಕಡ್ ಇಪ್ಪುನ ಐತಿಹಾಸಿಕ ಶ್ರೀ ಗೋಪಾಲಕೃಷ್ಣ ದೇವಲ್ಯಗ್ ಭೇಟಿ ಕೊರ್ದು ಕೃಷ್ಣನ ಆಶೀರ್ವಾದ ಪಡೆಲೆ ಪಂದ್ ಪ್ರಕಟಣೆಡ್ ತೆರಿಪಾದೆರ್.
ಶಕ್ತಿ ಯೋಜನೆರ್ದ್ ಖಾಸಗಿ ಬಸ್, ಕ್ಯಾಬ್, ಟ್ಯಾಕ್ಸಿ ಬೊಕ್ಕ ರಿಕ್ಷಾಗ್ ನಷ್ಟ ಆಯಿನ ಬಗೆಟ್ಟ್ ಸರ್ಕಾರ ಗಮನ ಕೊರೊಡು ಪನ್ಪುನ ಬೇಡಿಕೆನ್ ಈಡೇರಿಸಾಯೆರೆ ರಾಜ್ಯ ಖಾಸಗಿ ಸಾರಿಗೆ ಸಂಘಲೆನ ಒಕ್ಕೂಟ ಸರ್ಕಾರಗ್ ಕೊರ್ನ ಗಡುವು ಮುಗಿತ್ ದ್ಂಡ್.
ಅಂಚಾದ್ ಪ್ರತಿಭಟನೆದ ಅಂಗವಾದ್ ಬೆಂಗ್ಲೂರ್ ಬಂದ್ ಮಲ್ಪರೆ 32 ಸಾರಿಗೆ ಸಂಘಟನೆಲು ನಿರ್ಧಾರ ಮಲ್ದ್ಂಡ್. ಈ ಬಗೆಟ್ಟ್ ಇನಿ ಪ್ರತಿಗೋಷ್ಠಿ ನಡಪಾಯೆರೆ ಇಪ್ಪುನ ಸಂಘಟನೆಲು ಸೆ.11 ಕ್ಕ್ ಬೆಂಗ್ಲೂರ್ ಬಂದ್ ಮಲ್ಪುನೆನ್ ಘೋಷಣೆ ಮಲ್ಪರೆ ಉಂಡು ಪಂದ್ ತೆರಿದ್ ಬೈದ್ಂಡ್.
