ಸೆ.24 ಕ್ಕ್ ದೇಶದ ಬೇತೆ ಬೇತೆ ವಿಭಾಗಡ್ ಸಂಚಾರ ಮಲ್ಪುನ ಒಟ್ಟು 9 ವಂದೇ ಭಾರತ್ ರೈಲ್ ಗ್ ಪ್ರಧಾನಿ ನರೇಂದ್ರ ಮೋದಿ ಚಾಲನೆ ಕೊರಿಯೆರೆ ಉಲ್ಲೆರ್.
ಹೈದರಾಬಾದ್-ಬೆಂಗ್ಲೂರ್, ಚೆನ್ನೈ-ತಿರುನಲ್ವೇಲಿ, ವಿಜಯವಾಡ-ಚೆನ್ನೈ, ಪಟ್ನಾ-ಹೌರಾ, ರೌರ್ ಕೆಲಾ-ಪುರಿ, ಕಾಸ್ರೋಡು-ಅಲಪ್ಪುಳ- ತಿರುವನಂತಪುರಂ, ಜೈಪುರ-ಉದಯಪುರ, ರಾಂಚಿ-ಟಾಟಾ ನಗರ- ಕೋಲ್ಕತಾ, ಜಾಮಾನಗರ- ರಾಜ್ ಕೋಟ್- ಅಹಮದಾಬಾದ್ ಮಾರ್ಗಗ್ ಹಸಿರು ನಿಶಾನೆ ತೋಪಾದೆರ್. ಇತ್ತೆ ದೇಶಡ್ 25 ವಂದೇ ಭಾರತ್ ರೈಲ್ ಸಂಚಾರ ಮಲ್ಪುಂಡು.
ಮಧ್ಯಪ್ರದೇಶಡ್ 2 ಸಾರ ಕೋಟಿ ರೂ. ಖರ್ಚಿಡ್ 108 ಅಡಿ ಎತ್ತರಡ್ ನಿರ್ಮಾಣ ಆಯಿನ ಆದಿ ಶಂಕರಾಚಾರ್ಯೆರೆನ ಪ್ರತಿಮೆ ಇನಿ ಅನಾವರಣ ಆಪುಂಡು.
ಈ ಪ್ರತಿಮೆ ಭೋಪಾಲ್ ದ ನರ್ಮದಾ ತುದೆತ್ತ ಬರಿಟ್ಟ್ ಇಪ್ಪುನ ಓಂಕಾರೇಶ್ವರ ಪ್ರದೇಶಡ್ ಉಂಡು. ಮುಲ್ಪದ ಸಿಎಂ ಶಿವರಾಜ್ ಸಿಂಗ್ ಚೌಹಾನ್ ಮೇರ್ ಈ ಪ್ರತಿಮೆನ್ ಅನಾವರಣ ಮಲ್ಪುವೆರ್. ಸೆ.18 ಕ್ಕ್ ನಡಪೊಡಾಯಿನ ಅನಾವರಣ ಲೇಸ್ ಭಾರೀ ಬರ್ಸದಾವೆರ ಇನಿ ನಡಪುಂಡು.
ಸುಮಾರ್ ಬೇಡಿಕೆನ್ ಈಡೇರಿಸಾಯೆರೆ ಒತ್ತಾಯ ಮಲ್ತ್ ದ್ ಕೆಎಸ್ ಆರ್ ಟಿಸಿ ನೌಕರೆರ್ ಅ.5 ಕ್ಕ್ ಬೆಂಗ್ಲೂರ್ ಡ್ ಪ್ರತಿಭಟನೆ ಮಲ್ಪರೆ ನಿರ್ಧಾರ ಮಲ್ದೆರ್.
ಸಂಬಳ ಎಚ್ಚದ ಪರಿಷ್ಕೃತ ಬಾಕಿನ್ ಕೊರೊಡು ಪಂದ್ ಎಲೆಕ್ಟ್ರಿಕ್ ಬಸ್ ನ್ ಸರ್ಕಾರಿ ನೌಕರೆರೆನ ನೇಮಕ ಮಲ್ಪುನ ಬಗೆಟ್ಟ್ ಸೇರಿನಂಚೆನೆ ಸುಮಾರ್ ಬೇಡಿಕೆನ್ ಮೊಕುಲು ಸರ್ಕಾರ ದುಂಬು ದೀತೆರ್. ಅತ್ತಂದೆ ಸಂಸ್ಥೆದ ಮಾತ ನೌಕರೆರ್ ಪ್ರತಿಭಟನೆಡ್ ಪಾಲ್ ಪಡೆಪುನೆರ್ದಾವೆರ ಅನಿ ಕೆಎಸ್ ಆರ್ ಟಿಸಿ ಬಸ್ ಸಂಚಾರ ಸಾಧ್ಯ ಇಜ್ಜಿ ಪಂದ್ ವರದಿ ಆತ್ಂಡ್.
ಐಸಿಸಿ ಟಿ20 ವಿಶ್ವಕಪ್-2024 ಮೆಗಾ ಟೂರ್ನಿ ಅಮೆರಿಕಡ್ ನಡಪರೆ ಉಂಡು ಪಂದ್ ಘೋಷಣೆ ಆತ್ಂಡ್.
ಅಮೆರಿಕದ ಡಲ್ಲಾಸ್, ಫ್ಲೋರಿಡಾ ಬೊಕ್ಕ ನ್ಯೂಯಾರ್ಕ್ ಪೇಂಟೆಲು ಈ ಲೇಸ್ ನ್ ಆಯೋಜನೆ ಮಲ್ಪುಂಡು ಪಂದ್ ಐಸಿಸಿ ತೆರಿಪಾದ್ಂಡ್.
ಬೊಂಬಾಯಿ: ಕಲ್ಯಾಣ್ ದ ತುಳುನಾಡ ತುಳುವೆರ್ ಕೂಟದ ಮಹಿಳಾ ಸದಸ್ಯೆರೆರ್ದ್ ಚೌತಿದಾನಿ ಗಣಪತಿ ದೇವೆರೆನ ಪ್ರತಿಷ್ಠೆ ಪೂಜೆ ಬೊಕ್ಕ ವಿಸರ್ಜನೆ ಲೇಸ್ ಬಾರಿ ಭಕ್ತಿ ಬೊಕ್ಕ ಗೌಜಿಡ್ ನಡತ್ಂಡ್.
ಕಲ್ಯಾಣ್ ಪೂರ್ವದ ಹನುಮಾನ್ ನಗರದ ಸಾಯಿನಾಥ್ ಅಪಾರ್ಟ್ ಮೆಂಟ್ ಡ್ ಶ್ರೀ ಗಣೇಶೋತ್ಸವ ಅಂಗವಾದ್ ಭಜನೆ ನಡತ್ಂಡ್.
ಈ ಪೊರ್ತುಡು ತುಳುನಾಡ ತುಳುವೆರ್ ಸಂಘಟನೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಲ್ಯ ಗುತ್ತು ಪಂಜ-ಕೊಯಿಕುಡೆ ಮೆರೆನ್ ಶಾಲ್ ಪಾಡ್ ದ್ ಪೂತ್ತ ಗೊಂಚಿಲ್ ಕೊರ್ದು ತಮ್ಮನ ಮಲ್ತೆರ್.
ಈ ಲೇಸ್ ಡ್ ಯಜಮಾಂದಿ ಪದ್ಮ ಸುವರ್ಣ ಬೊಕ್ಕ ತುಳುನಾಡ ತುಳುವೆರೆ ಮಹಿಳಾ ಸದಸ್ಯೆರಾಯಿನ ಪ್ರಭಾವತಿ ಸುವರ್ಣ, ಅಂಜನ ಪೂಜಾರಿ, ಯಮುನಾ ಕುಲಾಲ್, ಶ್ರೀಮತಿ ಸುವರ್ಣ, ಜಾನಕಿ ಸುವರ್ಣ, ಶಶಿ ಪೂಜಾರಿ, ಜಾನಕಿ ಸುವರ್ಣ, ದೀಪ ಪೂಜಾರಿ, ವಿದ್ಯಾ ಪೂಜಾರಿ, ಸರೋಜಿನಿ ಪೂಜಾರಿ, ಆಶಿಕಾ ಪೂಜಾರಿ, ಗಣೇಶ್ ಸುವರ್ಣ, ಮಂಗೇಶ್ ಪೂಜಾರಿ, ಈಶ್ವರ್ ಪೂಜಾರಿ, ಚೇತನ್ ಪೂಜಾರಿ, ದರ್ಶನ್ ಪೂಜಾರಿ, ಬೊಕ್ಕ ಪ್ರಮೋದ್ ಸಾಲಿಯಾನ್ ಇತ್ತೆರ್.
ಭಜನೆ ಕಾರ್ಯಕ್ರಮದ ಬೊಕ್ಕ ಮಂಗಳಾರತಿ ಆದ್ ತೀರ್ಥ ಪ್ರಸಾದ ಪಟ್ಟುನ ಲೇಸ್ ನಡತ್ಂಡ್.
ಕೇಂದ್ರ ಲೋಕಸೇವಾ ಆಯೋಗಡ್ ಖಾಲಿ ಇಪ್ಪುನ 167 ಎಂಜಿನಿಯರಿಂಗ್ ಸರ್ವಿಸಸ್ ಎಕ್ಸಾಮಿನೇಷನ್ ಬೇಲೆಗ್ ಅರ್ಜಿ ಸಂದಾವೊಲಿ.
ಈ ಬೇಲೆಗ್ ಡಿಪ್ಲೊಮಾ, ಎಂಜಿನಿಯರಿಂಗ್ ಪದವಿ, ಎಂ.ಎಸ್ಸಿ, ಸ್ನಾತಕೋತ್ತರ ಪದವಿ ಆಯಿನ ಅಭ್ಯರ್ಥಿಲು ಮಾತ್ರ ಅರ್ಜಿ ಸಂದಾಯೆರೆ ಆಪುನೇ. ಅರ್ಜಿನ್ ಆನ್ ಲೈನ್ ಮುಖೇನ ಸಂದಾವೊಲಿ. ಅರ್ಜಿ ಸಂದಾಯೆರೆ ಸೆ.26 ಕಡೆತ್ತ ದಿನ ಆತ್ಂಡ್.
ಮಲಾಡ್: ವಿಶ್ವಕರ್ಮ ಸಮಾಜ ಬಾಂಧವೆರ್ ಸ್ಥಾಪನೆ ಮಲ್ತಿನ ಕರ್ನಾಟಕ ವಿಶ್ವಕರ್ಮ ಅಸೋಸಿಯೇಷನ್ ವಾರ್ಷಿಕ ಶ್ರೀ ವಿಶ್ವಕರ್ಮ ಮಹೋತ್ಸವ ಸೆ.17 ಕ್ಕ್ ಬೊಲ್ಪುರ್ದ್ ಮಲಾಡ್ ಪೂರ್ವದ ಶಾರದಾ ಹೈಸ್ಕೂಲ್ ದಲ್ಪದ ಶ್ರೀ ಸ್ವಾಮಿ ನಾರಾಯಣ ಮಂದಿರಡ್ ಧಾರ್ಮಿಕ ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ನಡತ್ಂಡ್.
ಬೊಲ್ಪುಗು ಶ್ರೀ ವಿಶ್ವಕರ್ಮ ಹೋಮ ವೇದಮೂರ್ತಿಲಾಯಿನ ಶಂಕರ್ ನಾಥ್ ಪುರೋಹಿತ್, ಗೋಪಾಲಕೃಷ್ಣ ಪುರೋಹಿತ್, ಪ್ರಸನ್ನ ಪುರೋಹಿತ್, ಸಂತೋಷ್ ಪುರೋಹಿತ್, ಪ್ರಶಾಂತ್ ಪುರೋಹಿತ್ ಮೊಕ್ಲೆರ್ದ್ ಅಸೋಸಿಯೇಷನ್ ದ ಉಪಾಧ್ಯಕ್ಷೆರ್ ರವೀಶ್ ಆಚಾರ್ಯ ದಂಪತಿಲೆನ ಯಜಮಾನಿಕೆಡ್ ರಂಗ ಕಲಾವಿದೆ, ಸಂಘಟಕೆ ಅಶೋಕ್ ಕೊಡ್ಯಡ್ಕ ನಿರ್ಮಾಣ ಮಲ್ತಿನ ದೇವೆರೆನ ಮಂಟಪಡ್ ನಡತ್ಂಡ್.
ಬೊಲ್ಪುಗು ಭಜನೆ ಮಹೋತ್ಸವಡ್ ಕರ್ನಾಟಕ ವಿಶ್ವಕರ್ಮ ಅಸೋಸಿಯೇಶನ್ ಕಾರ್ಯಕಾರಿ ಸಮಿತಿ, ಯುವ ವಿಭಾಗ, ಮಹಿಳಾ ವಿಭಾಗ, ವಿಶ್ವಕರ್ಮ ಮಹಿಳಾ ಬಳಗ ಡೊಂಬಿವಲಿ, ಶ್ರೀ ಸ್ವಾಮಿನ ಲಲಿತಾಂಬಾ ಭಜನೆ ಮಂಡಳಿ ಬೊರಿವಲಿ, ಶ್ರೀ ವಿಶ್ವ ಕರ್ಮ ಕಾಳಿಕಾಂಬ ಭಜನಾ ವೃಂದ ಮಲಾಡ್ ಮಂಡಳಿಲೆರ್ದ್ ಭಜನೆ ನಡತ್ಂಡ್.
ಮಧ್ಯಾಹ್ನ ಮಹಾಮಂಗಳಾರತಿ ನಡತಿನ ಬೊಕ್ಕ ಮಹಾಪ್ರಸಾದ, ನುಪ್ಪು ಪ್ರಸಾದ ಸೇವೆ ನಡತ್ಂಡ್. ಮಧ್ಯಾಹ್ನದ ಬೊಕ್ಕ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ಜೋಕುಲೆರ್ದ್ ಶಾಸ್ತ್ರೀಯ ನೃತ್ಯ, ಫ್ಯಾನ್ಸಿ ಡ್ರೆಸ್, ಸಾಂಸ್ಕೃತಿಕ ಲೇಸ್ ಬೊಕ್ಕ ವೈವಿಧ್ಯಮಯ ಲೇಸ್ ಸುರೇಶ್ ಶೆಟ್ಟಿ ಪನ್ವೆಲ್ ಬೊಕ್ಕ ಕೂಟದಕ್ಲೆರ್ದ್ ಭಕ್ತಿಸಂಗೀತ ನಡತ್ಂಡ್.
ಬಯ್ಯಗ್ ಅಸೋಸಿಯೇಷನ್ ದ ಗುರ್ಕಾರೆ ಸದಾನಂದ ಆಚಾರ್ಯ ಮೆರೆನ ಗುರ್ಕಾರ್ಮೆಡ್ ಸಭಾ ಲೇಸ್ ನಡತ್ಂಡ್.
ಈ ಮಹೋತ್ಸವದ ಯಶಸ್ವಿಗ್ ಅಸೋಸಿಯೇಷನ್ ದ ಪದಾಧಿಕಾರಿಲಾಯಿನ ಕಾರ್ಯದರ್ಶಿ ಸನತ್ ಕುಮಾರ್ ಆಚಾರ್ಯ, ಪ್ರಸಾದ್ ಆಚಾರ್ಯ, ಕೋಶಾಧಿಕಾರಿ ಬಾಬುರಾಜ ಆಚಾರ್ಯ, ಜತೆ ಕೋಶಾಧಿಕಾರಿ ಸುಧೀರ್ ಆಚಾರ್ಯ, ಆಂತರಿಕ ಲೆಕ್ಕಪರಿಶೋಧಕೆರ್ ಅರುಣ್ ಆಚಾರ್ಯ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ಶುಭಾ ಎಸ್ ಆಚಾರ್ಯ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ರಾಜೇಶ್ ಆಚಾರ್ಯ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್, ಮಹಿಳಾ ವಿಭಾಗ, ಸಮಾಜ ಕಲ್ಯಾಣ ಸಮಿತಿದ ಸದಸ್ಯೆರ್ ಬೆಂದ್ ದೆರ್. ಪೂಜೆದ ಪೊರ್ತುಡು ಮಸ್ತ್ ಸಂಖ್ಯೆಡ್ ಸಮಾಜ ಬಾಂಧವೆರ್ ಪಾಲ್ ಪಡೆದಿತ್ತೆರ್.
ಬೊಂಬೈ: ಕುಲಾಲ ಸಂಘ ಬೊಂಬೈದ ಮುತಾಲಿಕೆಡ್ ಜ್ಯೋತಿ ಕೊ-ಆಪರೇಟಿವ್ ಕ್ರೆಡಿಟ್ ಸೊಸೈಟಿದ 42ನೇ ವಾರ್ಷಿಕ ಮಹಾಸಭೆ ಸೆ.23 ಸನಿಯಾರ ಬಯ್ಯಗ್ 4 ಗಂಟೆಗ್ ಬೊಂಬೈದ ಆರ್ಯ ಸಮಾಜ ಭವನಡ್ ಸೊಸೈಟಿದ ಕಾರ್ಯಾಧ್ಯಕ್ಷೆರ್ ಗಿರೀಶ ಬಿ. ಸಾಲ್ಯಾನ್ ಮೆರೆನ ಘನ ಅಧ್ಯಕ್ಷತೆಡ್ ನಡಪರೆ ಉಂಡು.
ಸೊಸೈಟಿದ ಷೇರುದಾರೆರೆಗ್ ಇತ್ತೆನೆ ವಾರ್ಷಿಕ ವರದಿ ಬೊಕ್ಕ ಲೆಕ್ಕ ಪತ್ರಲೆನ ಪಿಡಿಎಫ್ ಪೈಲ್‌ದ ಲಿಂಕ್ ನ್ ಎಸ್.ಎಮ್.ಎಸ್. ಮುಖೇನ ಕಡಪಾದ್ಂಡ್. ವರದಿದ ಮುದ್ರಣ ಪ್ರತಿ ಬೋಡಾಯಿನಕುಲು ಸೊಸೈಟಿದ ಮಾತ ಶಾಖೆಡ್ ತಿಕ್ಕುಂಡು ಪಂದ್ ಸೊಸೈಟಿದ ಪ್ರಕಟಣೆ ತೆರಿಪಾದ್ಂಡ್.
ಬೊಂಬೈ ಮಹಾನಗರದ ಪುಗರ್ತೆದ ಕುಲಾಲ ಸಂಘ ಬೊಂಬೈ ನೆತ್ತ ಮುತಾಲಿಕೆಡ್ 1981 ಟ್ಟ್ ಸ್ಥಾಪನೆ ಆಯಿನ ಜ್ಯೋತಿ ಕೊ-ಆಪರೇಟಿವ್ ಕ್ರೆಡಿಟ್ ಸೊಸೈಟಿ ಕರಿನ 42 ವರ್ಷೊರ್ದಿಂಚ ಬೊಂಬೈ, ಥಾಣೆ, ನವಿ ಬೊಂಬೈ ಬೊಕ್ಕ ಪುಣೆ ಮಹಾನಗರಡ್ ತನ್ನ ಆರ್ಥಿಕ ಸೇವೆ ಸಂದಾವೊಂದು ಉಂಡು. ಒಟ್ಟು 6 ಶಾಖೆಡ್ ಎಡ್ಡೆ ಸೇವೆ ಕೊರ್ದು, ಜನಮಾನ್ಯೆರೆರ್ದ್ ಪುಗರ್ತೆ ಪಡೆತ್ಂಡ್.
ಅಂಚೆನೆ ದಿ.ಡಾ| ಎಚ್. ಎಂ. ಸುಬ್ಬಯ್ಯ, ದಿ. ಬಂಟ್ವಾಳ ಬಾಬು ಸಾಲ್ಯಾನ್, ದಿ. ಅರ್ ಎಂ, ಮಡ್ವ, ಎನ್. ಜಿ. ಮೂಲ್ಯ ಬೊಕ್ಕ ಗಿರೀಶ ಬಿ. ಸಾಲ್ಯಾನ್ ಮೆರೆನ ಗುರ್ಕಾರ್ಮೆಡ್, ದಕ್ಷ ಆಡಳಿತ ಮಂಡಳಿ ಬೊಕ್ಕ ನಿಪುಣ ಸಿಬ್ಬಂದಿ ವರ್ಗ, ನಿಷ್ಠಾವಂತ ಪಿಗ್ಮಿ ಎಜೆಂಟೆರ್ ಇಪ್ಪುನ ಈ ಸೊಸೈಟಿ ತನ್ನ ಎಡ್ಡೆ ರೀತಿದ ಬೇತೆ ಬೇತೆ ಸೇವೆನ್ ಗ್ರಾಹಕೆರೆಗ್ ಕೊರೊಂದು ಉಂಡು.
ವರ್ಷೊದ ವೈವಾಟ್ ಡ್ ಒಟ್ಟು ಷೇರುದಾರೆರ್: 5897, ಷೇರು ಬಂಡವಾಳ: 348.29 ಲಕ್ಷ, ಒಟ್ಟು ಮೀಸಲ್: 364.23 ಲಕ್ಷ, ಒಟ್ಟು ಠೇವಣಿ: 2753.60 ಲಕ್ಷ, ಒಟ್ಟು ಮುಂಗಡ: 2130.59, ಒಟ್ಟು ಹೂಡಿಕೆ: 1130.57 ಲಕ್ಷ, ಬೆನ್ಪುನ ಬಂಡವಾಳ: 3588.53 ಲಕ್ಷ, ನಿವ್ವಳ ಲಾಭ: 6.70 ಲಕ್ಷ, ಎನ್ ಪಿ ಎ: ಶೇ.4.29, ಅಡಿಟ್ ವರ್ಗೀಕರಣ ‘ಎ’, ಪ್ರಾಸ್ತಾವಿಕ ಲಾಭಾಂಶ: ಶೇ.4 ಆತ್ಂಡ್.
ಸರ್ವ ಸದಸ್ಯೆರ್ ಮಹಾಸಭೆಟ್ಟ್ ಕ್ಲಪ್ತ ಪೊರ್ತುಡು ಪಾಲ್ ಪಡೆದ್ ಸಭೆಕ್ಕ್ ಸಹಕಾರ ಮಲ್ಪೊಡು ಪಂದ್ ಉಪ ಕಾರ್ಯಾಧ್ಯಕ್ಷೆರ್ ಪಿ. ದೇವದಾಸ್ ಎಲ್. ಕುಲಾಲ್, ಗೌರವ ಕಾರ್ಯದರ್ಶಿ ಪಿ. ಶೇಖರ ಮೂಲ್ಯ, ಗೌರವ ಕೋಶಾಧಿಕಾರಿ ಭಾರತಿ ಪಿ. ಆರ್ಕ್ಯನ್, ಕಾರ್ಯಕಾರಿ ಸಮಿತಿ ಸದಸ್ಯೆರ್ ಡೊಂಬಯ್ಯ ಐ ಮೂಲ್ಯ, ಚಂದು ಕೆ ಮೂಲ್ಯ, ಸುರೇಖಾ ಕರ್ಕೆರ, ಕರುಣಾಕರ ಬಿ. ಸಾಲ್ಯಾನ್, ಗಿರೀಶ್ ವಿ. ಕರ್ಕೇರ, ನ್ಯಾಯವಾದಿ ಉಮಾನಾಥ ಕೆ. ಮೂಲ್ಯ, ದೇವದಾಸ ಎಮ್. ಬಂಜನ್, ನ್ಯಾಯವಾದಿ ಸೋಪನ್ ಎಸ್. ವಾಂಖೇಡೆ, ನ್ಯಾಯವಾದಿ ಪವಿತ್ರಾ ಮನೇಶ್, ವೇಣುಗೋಪಾಲ ಡಿ. ಕರ್ಕೇರ ಮೊಕುಲು ಪ್ರಕಟಣೆಡ್ ತೆರಿಪಾದೆರ್.
ಬಂಟರ ಮಾತೃಸಂಘದ ಚೌತಿದ ಧಾರ್ಮಿಕ ಸಭೆ
ಕುಡ್ಲ: ಬಂಟೆರ್ ಮಾತ್ರ ಅತ್ತಂದೆ ಸಮಾಜದ ಮಾತ ವರ್ಗಲೆನ ಜನಕ್ಲೆನ್ ಒಟ್ಟು ಸೇರ್ಸಾದ್ ನಡಪುನ ಚೌತಿದಂಚಿನ ಲೇಸ್ ಲು ಸಮಾಜಗ್ ಮಾದರಿ ಆವಡ್, ಈ ಮುಖೇನ ಮಾತ ಜಾತಿ ಧರ್ಮಲೆನ ಜನಕ್ಲೆನ ನಡುಟ್ಟ್ ಪ್ರೀತಿ,ಮೆಗ್ಯೆ ಪಲಯೆ ಪನ್ಪಿನ ಭಾವನೆ ಬುಲೆದ್ ಸ್ವಸ್ಥ ಸಾಮರಸ್ಯದ ಸಮಾಜ ನಿರ್ಮಾಣ ಆವಡ್, ಯಾನ್ ಸ್ಪೀಕರ್ ಆಯಿನ ಬೊಕ್ಕ ಪ್ರತಿಪಕ್ಷಲೆಗ್ ಎಚ್ಚದ ಅವಕಾಶ ಕೊರ್ದು ಸರಕಾರನ್ ಸರಿಯಾಯಿನ ರೀತಿಡ್ ನಡಪಾವರೆ ಎನರ್ದ್ ಆಯಿನ ಸಹಕಾರ ಕೊರ್ಪೆ. ಆಂಡ ಉಂದುವೇ ಕಾರಣಗ್ ಸ್ಪೀಕರ್ ಸರಿ ಇಜ್ಜೆರ್ ಪನ್ಪುನಕ್ಲ ಉಲ್ಲೆರ್. ವಿಧಾನಸಭೆಟ್ಟ್ ನಡಪುನ ಗಲಾಟೆಲು ಕೇವಲ ಅಡೆಗ್ ಮಾತ್ರ ಸೀಮಿತ ಆದಿಪ್ಪುಂಡು. ಪಿದಯಿ ಮಾತ ಪಕ್ಷಲೆನ ನಾಯಕೆರ್ ಪುಗೆಲ್ ದ ಮಿತ್ತ್ ಕೈ ಪಾಡ್ದ್ ದೋಸ್ತಿಲೆಕ್ಕ ಇಪ್ಪುವೆರ್. ಇಂಚಾದ್ ಕಾಲಿ ಟಿವಿಡ್ ಗಲಾಟೆ ತೂದು ಮುಲ್ಪ ಗಲಾಟೆ ಮಲ್ಪೊರ್ಚಿ ಪಂದ್ ರಾಜ್ಯ ವಿಧಾನಸಭಾ ಸ್ಪೀಕರ್ ಯು.ಟಿ. ಖಾದರ್ ಪಂಡೆರ್.
ಮೇರ್ ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್, ದ.ಕ., ಒಡಿಪು ಬೊಕ್ಕ ಕಾಸ್ರೋಡುದ ಬಂಟರ ಸಂಘಲೆನ ಒಟ್ಟುಸೇರಿಗೆಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಅಂಗವಾದ್ ಬಂಟ್ಸ್ ಹಾಸ್ಟೆಲ್ ದ ಓಂಕಾರ ಪೇಂಟೆಡ್ ನಡತಿನ ಚೌತಿದ ಧಾರ್ಮಿಕ ಸಭೆಟ್ಟ್ ಸನ್ಮಾನ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.
“ಬಂಟ್ಸ್ ಹಾಸ್ಟೆಲ್ ಡ್ ಬಂಟೆರ್ ಮಾತ್ರ ಅತ್ತಂದೆ ಹಿಂದೂ ಮುಸ್ಲಿಂ ಕ್ರೈಸ್ತೆರ್ ಮಾತೆರ್ಲಾ ಇತ್ತ್ ದ್, ಕಲ್ತೊಂದು ಉಲ್ಲೆರ್. ಉಂದು ಇಡೀ ಸಮಾಜಗ್ ಮಾದರಿ. ಮಾತೆರೆನ್ಲಾ ಒಟ್ಟುಸೇರ್ಸಾವುನ ಶಕ್ತಿ ಬಂಟ ಸಮಾಜಗ್ ಉಂಡು. ಆ ಜಬದಾರಿನ್ ಬಂಟ ಸಮುದಾಯದ ಹಿರಿಯೆರ್ ದೆತೊಂದೆರ್. ಚೌತಿ ಪನ್ಪುನ ಧಾರ್ಮಿಕ ಲೇಸ್ ದ ಮುಖೇನ ಸಮಾಜಡ್ ಶಾಂತಿ ಒರಿಯಡ್, ಗಣಪತಿ ದೇವೆರೆನ ಆಶೀರ್ವಾದ ನಮ್ಮ ಮಾತೆರ್ನಲ ಮಿತ್ತ್ ಇಪ್ಪಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಗುರ್ಕಾರೆ, ಸಿದ್ದಿವಿನಾಯಕ ಪ್ರತಿಷ್ಠಾನದ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ ಒಯಿಸ್ ದಿತ್ತೆರ್. ಈ ಪೊರ್ತುಡು ಬಂಟರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಕೆ.ಎಮ್ ಶೆಟ್ಟಿ, ಕೋಶಾಧಿಕಾರಿ ರಾಮಮೋಹನ್ ರೈ, ಶ್ರೀ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿ ಕೃಷ್ಣ ಪ್ರಸಾದ್ ರೈ, ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ಜಿಲ್ಲಾ ಸಂಚಾಲಕೆರ್ ಬಿ.ನಾಗರಾಜ ಶೆಟ್ಟಿ, ಎಮ್ ಸಂಜೀವ ಶೆಟ್ಟಿ ಕಾಸ್ರೋಡು ಪಾಲ್ ಪಡೆದಿತ್ತೆರ್.
ಬೆದ್ರ: ಯುವಶಕ್ತಿ ವಾಟ್ಸಾಪ್ ಬಳಗ ಬೆಳುವಾಯಿದ ಮುತಾಲಿಕೆಡ್ ಸೆ.22 ಸುಕ್ರಾರ ರಾತ್ರೆ ಬೆಳುವಾಯಿ ಕಮಲಮ್ಮ ಕಾಂಪ್ಲೆಕ್ಸ್ ದ ಪಿರವು ದಶಮಾನೋತ್ಸವ ಸಂಭ್ರಮ, ಪ್ರತಿಭಾನ್ವಿತೆರೆಗ್ ಸನ್ಮಾನ, ಆಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಯುವಶಕ್ತಿ ವಾಟ್ಸಾಪ್ ಬಳಗ ಬೆಳುವಾಯಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
