ತಮಿಳುನಾಡ್ ಡ್ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO) 2 ನೇ ಬಾಹ್ಯಾಕಾಶ ಕೇಂದ್ರನ್ ನಿರ್ಮಾಣ ಮಲ್ಪರೆ ಉಂಡು.
ತೂತುಕುಡಿ ಜಿಲ್ಲೆದ ಕುಲಶೇಖರಪಟ್ಟಿಣಂಡ್ 2 ಸಾರ ಎಕರೆಡ್ ನಿರ್ಮಾಣ ಆಯೆರೆ ಇಪ್ಪುನ ಈ ಬಾಹ್ಯಾಕಾಶ ನಿಲ್ದಾಣ 2 ವರ್ಷಡ್ ಆಪುಂಡು.
ಈ ಬಾಹ್ಯಾಕಾಶ ಸಂಶೋಧನಾ ಕೇಂದ್ರನ್ ಖಾಸಗಿ ವಲಯಗ್ ಸೇರ್ಸಾಯೆರೆ ಬಾಹ್ಯಾಕಾಶ ನೌಕೆ ಬೊಕ್ಕ ಉಪಗ್ರಹಲೆಗ್ ಮಾತ್ರ ಗಲಸೆರೆ ಆಪುಂಡು ಪಂದ್ ತೆರಿದ್ ಬೈದ್ಂಡ್. ಇತ್ತೆ ಶ್ರೀಹರಿಕೋಟಾಡ್ ISRO ಗ್ ತನ್ನ ಉಪಗ್ರಹ ಉಡಾವಣಾ ಕೇಂದ್ರ ಉಂಡು.
ರಾಜಬೂಡು ಬೆಂಗ್ಲೂರ್ ಡ್ 2 ನೇ ಏರ್ಪೋರ್ಟ್ ನಿರ್ಮಾಣದ ಚರ್ಚೆ ನಡತೊಂದು ಉಂಡು.
ಇತ್ತೆ ಕೆಂಪೇಗೌಡ ಇಮಾನ ನಿಲ್ದಾಣಡ್ ದಿನ-ದಿನ ಪ್ರಯಾಣಿಕೆರೆನ ಸಂಖ್ಯೆ ಎಚ್ಚಾವೊಂದು ಉಂಡು. ನನ ಪ್ರಯಾಣಿಕೆರೆನ ಸಂಖ್ಯೆಡ್ ಈ ವರ್ಷ ಶೇ.25 ದಾತ್ ಪ್ರಗತಿ ಆತ್ಂಡ್. ಉಂದು ನನಾತ್ ಎಚ್ಚಾಪುಂಡು ಪಂದ್ ಬೆಂಗ್ಲೂರ್ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣದ CEO ಹರಿ ಮರರ್ ತೆರಿಪಾದೆರ್.
ಪ್ರಯಾಣಿಕೆರೆನ ಸಂಖ್ಯೆ ಕಮ್ಮಿ ಮಲ್ಪರೆ ಪೊಸ ಇಮಾನ ನಿಲ್ದಾಣದ ಯೋಜನೆ ಸರ್ಕಾರದ ದುಂಬು ಉಂಡು ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಅ.28 ಬೊಕ್ಕ 29 ಕ್ಕ್ ಒಡಿಪುಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಮ್ಮೇಳನ-2023 ದ ಲೆಪ್ಪೋಲೆ ಬುಡುಗಡೆ ಲೇಸ್ ಬುಧಾರ ಬಯ್ಯಗ್ ಪೇಂಟೆದ ಗೋಲ್ಡ್ ಫಿಂಚ್ ಹೋಟೆಲ್ ಡ್ ನಡತ್ಂಡ್.
ಈ ಲೇಸ್ ನ್ ಬತ್ತಿ ಬಿನ್ನೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಪಾತೆರ್ದ್, ಐಕಳ ಹರೀಶ್ ಶೆಟ್ಟಿ ಮೇರ್ ಬಂಟ ಸಮಾಜದ ಅತ್ಯದ್ಭುತ ನಾಯಕೆ. ಅರೆನ ಸಂಘಟನಾ ಶಕ್ತಿ ಬೇತೆಕ್ಲೆಗ್ ಮಾದರಿ. ಇನಿ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆನ್ ಬುಡುಗಡೆ ಮಲ್ದ. ಉಂದು ಬಂಟ ಸಮಾಜದ ಇಲ್ಲ ಇಲ್ಲಗ್ ಎತ್ತೊಡು. ಆ ಮುಖೇನ ಒಂಜೇ ಚಾವಡಿಡ್ ಸಮಾಜದ ಮಾತೆರ್ಲಾ ಪಾಲ್ ಪಡೆಪುಲೆಕ್ಕ ಅವಡ್, ಸಮ್ಮೇಳನರ್ದ್ ಸಮಾಜಗ್ ಪ್ರಯೋಜನ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಬಂಟರ ಯಾನೆ ನಾಡವರ ಮಾತೃಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ ಪಾತೆರ್ದ್, ಲೇಸ್ ಖಂಡಿತಾ ಯಶಸ್ವಿ ಆಪುಂಡು. ಆಂಡ ಮಲ್ಲ ಸಂಖ್ಯೆಡ್ ನಮ್ಮ ಸಮುದಾಯದ ಜನಕ್ಲೆನ್ ಸೇರಿಸಾವುನ ಮುಖೇನ ನಮ್ಮ ಶಕ್ತಿನ್ ಈ ಮುಖೇನ ತೂಪಾವೊಡು ಪಂದ್ ಪಂಡೆರ್.
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುಖೇನ ಸಮಾಜದ ಜನಕ್ಲೆನ ಹಿತದೃಷ್ಟಿಗಾದ್ ಸಂಘಟನೆ ಮುಖೇನ ಸುಮಾರ್ ಲೇಸ್ ನ್ ಆಯೋಜನೆ ಮಲ್ದ. ಸಮುದಾಯದ ಮಾತೆರೆನ್ಲಾ ಒಂಜೇ ಚಾವಡಿಗ್ ಕನಪುನ ಉದ್ದೇಶರ್ದ್ ವಿಶ್ವ ಬಂಟರ ಸಮ್ಮೇಳನ ಆಯೋಜನೆ ಮಲ್ದ. ಮಾತೆರ್ಲಾ ಒಗ್ಗಟ್ಟಾದ್ ರಡ್ಡ್ ದಿನ ಮುಟ್ಟ ಲೇಸ್ ದ ಯಶಸ್ಸಿಗಾದ್ ಕೆಲಸ ಮಲ್ಪೊಡು ಪಂದ್ ಪಂಡೆರ್.
ಬಂಟ್ಸ್ ವೆಲ್ ಫೇರ್ ಟ್ರಸ್ಟ್ ದ ಗುರ್ಕಾರೆ ಎ. ಸದಾನಂದ ಶೆಟ್ಟಿ ಮೇರ್ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟಗ್ ಪೊಸ ದಿಕ್ಕ್ ತೋಜಿಪಾಯಿನಕುಲು ಐಕಳ ಹರೀಶ್ ಶೆಟ್ಟಿ ಮೇರ್. ಮೆರೆರ್ದ್ ಇನಿ ಬಂಟರ ಸಂಘಲು ಒಗ್ಗಟ್ಟಾದ್ ಕೆಲಸ ಸುರು ಮಲ್ತೊಂದುಂಡು. ಬಲಿಷ್ಟ ಸಮಾಜದ ನಿರ್ಮಾಣಗ್ ಬಂಟರ ಸಮ್ಮೇಳನದ ಯಶಸ್ಸಿಗ್ ನಮ ಮಾತ ಒಟ್ಟಾದ್ ಬೇಲೆ ಮಲ್ಪುಗ ಪಂಡೆರ್.
ಮಾಜಿ ಸಚಿವೆರ್ ಬಿ. ರಮಾನಾಥ್ ರೈ ಮೇರ್ ಪಾತೆರ್ದ್, ಒಂಜಿ ಪುಗರ್ತೆದ ಲೇಸ್ ಗ್ ನಮ ಮಾತೆರ್ಲಾ ದಿನಗಣನೆ ಮಲ್ತೊಂದು ಉಲ್ಲ. ಒಡಿಪುಡ್ ನಡಪರೆ ಇಪ್ಪುನ ಈ ಲೇಸ್ ಗ್ ಕುಡೊಂಜಿ ಇತಿಹಾಸ ನಿರ್ಮಾಣ ಮಲ್ದ್ಂಡ್. ನಮ್ಮ ಸಂಘಟನೆ ಶಕ್ತಿ ಈ ಮುಖೇನ ತೋಜಿಪಾವೊಡಾಪುಂಡು. ಲೇಸ್ ದ ಯಶಸ್ಸಿಗ್ ನಮ ಮಾತ ಬೆನೊಡು ಪಂದ್ ಪಂಡೆರ್.
ಈ ಪೊರ್ತುಡು ಬಂಟರ ಮಾತೃ ಸಂಘದ ಉಪಾಧ್ಯಕ್ಷೆರ್ ಕಾವು ಹೇಮನಾಥ್ ಶೆಟ್ಟಿ, ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಶೆಟ್ಟಿ ರಂಗೋಲಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಸುಧಾಕರ ಎಸ್. ಪೂಂಜ, ಎ.ಜಗನ್ನಾಥ ಚೌಟ, ಲೋಕೇಶ್ ಶೆಟ್ಟಿ ಕೊಳ, ಸುರೇಶ್ ರೈ ಮಕರಜ್ಯೋತಿ ಪಾಲ್ ಪಡೆದಿತ್ತೆರ್. ಕರ್ನಿರೆ ವಿಶ್ವನಾಥ್ ಶೆಟ್ಟಿ ಬಿನ್ನೆರೆನ್ ಎದ್ಕೊನಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಖ್ಯಾತ್ ಶೆಟ್ಟಿ ಪ್ರಾರ್ತನೆ ಮಲ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಪನ್ಪುನ ಸರಣಿ ಲೇಸ್ ಅ.12 ಗುರುವಾರ ಬಯ್ಯಗ್ 5ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ಅ.13 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬ್ರಹ್ಮಾವರ: ನೀಲಾವರ ಶ್ರೀ ಮಹಿಷಮರ್ದಿನೀ ದೇವಲ್ಯಡ್ ಅ.15-24 ಮುಟ್ಟ ಶರನ್ನವರಾತ್ರಿ ಉಚ್ಚಯ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಪ್ರತಿದಿನೊಲ ದುರ್ಗಾಹೋಮ, ವಿಜಯ ದಶಮಿದಾನಿ ಚಂಡಿಕಾ ಹೋಮ ಬೊಕ್ಕ ಬಯ್ಯಗ್ ಸಾಮೂಹಿಕ ದೀಪ ನಮಸ್ಕಾರ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.
ಕೇಂದ್ರದ ಕಾರ್ಮಿಕೆರೆನ ಬೊಕ್ಕ ಉದ್ಯೋಗ ಸಚಿವಾಲಯದ ಅಧೀನಡ್ ಬರ್ಪುನ ಕಾರ್ಮಿಕೆರೆನ ರಾಜ್ಯ ವಿಮಾ ನಿಗಮಡ್ (ESIC) ಖಾಲಿ ಇಪ್ಪುನ 1038 ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ ECG ಟೆಕ್ನೀಷಿಯನ್, ಜೂನಿಯರ್ ರೇಡಿಯೋಗ್ರಾಫರ್, OT ಅಸಿಸ್ಟೆಂಟ್, ರೆಕಾರ್ಡ್ ಅಸಿಸ್ಟೆಂಟ್, ಡೆಂಟಲ್ ಮೆಕ್ಯಾನಿಕ್ ಸೇರಿನಂಚೆನೆ ಬೇತೆ ಬೇಲೆಗ್ ಬೇತೆ ಬೇತೆ ರಾಜ್ಯಲೆನ ನಿಗಮಡ್ ನೇಮಕ ಆತ್ಂಡ್. ಆನ್ ಲೈನ್ ಮುಖೇನ ಅರ್ಜಿ ಸಂದಾಯೆರೆ ಅ.30 ಕ್ಕ್ ಅಕೇರಿದ ದಿನ ಆತ್ಂಡ್.
ಕಾರ್ಲ: ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ವಿಶ್ವಕರ್ಮ ಸಂಘ ಸಂಸ್ಥೆಲೆನ ಕೇಂದ್ರ ಸಂಸ್ಥೆ ಆಯಿನ ವಿಶ್ವಕರ್ಮ ಒಕ್ಕೂಟ ಒಡಿಪುದ ಗುರ್ಕಾರೆ ಮಧು ಆಚಾರ್ಯ ಕುಡೊರ ಆಯ್ಕೆ ಆತೆರ್.
ಬಿಜೆಪಿ ಕಾರ್ಲ ವಿಧಾನಸಭೆ ಕ್ಷೇತ್ರದ ಸಾಮಾಜಿಕ ಜಾಲತಾಣ ಪ್ರಕೋಷ್ಠದ ಸಂಚಾಲಕೆರ್, ನಿಟ್ಟೆ ವಿಶ್ವಕರ್ಮ ಸಂಘದ ಗುರ್ಕಾರೆ ಹರ್ಷವರ್ಧನ್ ಆಚಾರ್ಯ ನಿಟ್ಟೆ, ಪ್ರಧಾನ ಕಾರ್ಯದರ್ಶಿಯಾದ್ ಅವಿರೋಧವಾದ್ ಆಯ್ಕೆ ಆತೆರ್.
ಐತಾರ ಒಡಿಪು ಕುಂಜಿಬೆಟ್ಟು ಗಾಯತ್ರಿ ಕಲ್ಯಾಣ ಮಂಟಪಡ್ ಆಯ್ಕೆ ಪ್ರಕ್ರಿಯೆ ನಡತ್ಂಡ್. ಗೌರವಾಧ್ಯಕ್ಷೆರಾದ್ ಯು.ಕೆ. ಸೀತಾರಾಮ ಆಚಾರ್ಯ, ಉಪಾಧ್ಯಕ್ಷೆರಾದ್ ಅಲೆವೂರು ಯೋಗೀಶ್ ಆಚಾರ್ಯ, ಕೆ.ಮುರಳೀಧರ ಆಚಾರ್ಯ, ಕೋಶಾಧಿಕಾರಿಯಾದ್ ಜನಾರ್ದನ ಎಸ್. ಆಚಾರ್ಯ, ಕಾರ್ಯದರ್ಶಿಯಾದ್ ಪ್ರಕಾಶ್ ಆಚಾರ್ಯ ನೇರಂಬಳ್ಳಿ, ಸಂಘಟನಾ ಕಾರ್ಯದರ್ಶಿಯಾದ್ ಸತೀಶ್ ಆಚಾರ್ಯ ಬೇಳೂರು, ವಸಂತ್ ಆಚಾರ್ಯ ಕಾಟಿಪಳ್ಳ, ಆಂತರಿಕ ಲೆಕ್ಕ ಪರಿಶೋಧಕೆರಾದ್ ಬಿ. ಎ. ಆಚಾರ್ಯ ಮಣಿಪಾಲ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ಕೋಣಿ ನಾರಾಯಣ ಆಚಾರ್ಯ, ಜಿ. ಸತೀಶ್ ಆಚಾರ್ಯ ಪಡ್ಡೆದ್ರ, ಭಾರತಿ ದಿವಾಕರ, ಗೋಕುಲ್ ಆಚಾರ್ಯ, ಅರುಣ್ ಆಚಾರ್ಯ, ಎಚ್.ಎಂ. ಗಂಗಾಧರ ಆಚಾರ್ಯ, ಆನಂದ ಆಚಾರ್ಯ ವಕ್ವಾಡಿ, ರವಿ ಆಚಾರ್ಯ, ರಮೇಶ್ ಆಚಾರ್ಯ ಬಂಟಕಲ್ಲು, ಶರತ್ ಶರ್ಮಾ ಪಡ್ಡೆದ್ರ, ನೀಲಯ ಆಚಾರ್ಯ, ಸುನೀತಾ ದಿವಾಕರ ಆಚಾರ್ಯ, ಸಂಧ್ಯಾ ಲಕ್ಷ್ಮಣ ಆಚಾರ್ಯ ಆಯ್ಕೆ ಆತೆರ್.
ಕುಡ್ಲ: ತೋಡ್ಲಮಜಲು ಶ್ರೀ ದುರ್ಗಾಚಾಮುಂಡೇಶ್ವರೀ ಕ್ಷೇತ್ರಡ್ ದಸರಾ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅ.15 ಐತಾರ ಬೊಲ್ಪುಗು ದೇವೆರೆನ ದರ್ಶನ, ತೋರಣ ಮೂರ್ತ, ರಾತ್ರೆ ಕುಂಕುಮಾರ್ಚನೆ ಪೂಜೆ, ಅ.17 ಅಂಗಾರೆ ಬೊಲ್ಪುಗು ಬೊಂಡದ ಅಭಿಷೇಕ, ನಿತ್ಯಪೂಜೆ, ರಾತ್ರೆ ರಂಗಪೂಜೆ, ಸತ್ಯನಾರಾಯಣ ಕಥೆ, ಅ.18 ಬುಧಾರ ಬೊಲ್ಪುಗು ಗಣಯಾಗ, ಚಂಡಿಕಾಯಾಗ, ಮಹಾಪೂಜೆ ನಡಪರೆ ಉಂಡು.
ಅ.19 ಗುರುವಾರ ಬೊಲ್ಪುಗು ನಾಗತಂಬಿಲ, ಪಂಚಾಮೃತ ಅಭಿಷೇಕ ಸೇವೆ, ಸತ್ಯನಾರಾಯಣ ಪೂಜೆ, ಮಧ್ಯಾಹ್ನ ಮಹಾಪೂಜೆ, ಲಲಿತ ಪಂಚಮಿ, ಅ.20 ಸುಕ್ರಾರ ಬೊಲ್ಪುಗು ದೈವೊಲೆನ ದರ್ಶನ ಸೇವೆ, ಅ.21 ಸನಿಯಾರ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಗುಸು ಗುಸು ಉಂಡುಗೆ ತುಳು ನಾಟಕ ನಡಪರೆ ಉಂಡು.
ಅ.22 ಐತಾರ ಮಧ್ಯಾಹ್ನ ಶ್ರೀ ಶಾರದಾ ಪೂಜೆ, ರಾತ್ರೆ ಕುಂಕುಮಾರ್ಚನೆ, ನೃತ್ಯರೂಪಕ, ಅ.23 ಸೋಮಾರ ಬೊಲ್ಪುಗು ನಿತ್ಯಪೂಜೆ, ಆಯುಧ ಪೂಜೆ, ಅ.24 ಬೊಲ್ಪುಗು ನಿತ್ಯ ಪೂಜೆ, ಮಧ್ಯಾಹ ವಿಜಯದಶಮಿ ಮಹಾಪೂಜೆ ಬೊಕ್ಕ ಶೋಭಾಯಾತ್ರೆ, ಸರ್ವಾಲಂಕಾರ ಪೂಜೆ ನಡಪರೆ ಉಂಡು ಪಂದ್ ತೋಡ್ಲಮಜಲು ಆಡಳಿತ ಮಂಡಳಿ, ಧರ್ಮದರ್ಶಿಲು ನಾಗೇಶ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಅಡುಮರೋಳಿ ಶ್ರೀ ಮಾರಿಕಾಂಬಾ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲ ಕುಟುಂಬ ಸಮೇತೆರಾದ್ ಬತ್ತ್ ದ್, ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಅಡುಮರೋಳಿ ಶ್ರೀ ಮಾರಿಕಾಂಬಾ ದೇವಲ್ಯದ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಚಂದ್ರಹಾಸ್ ಬಿ ಪಾಂಪುಮನೆ, ಯಂ ಕಮಲಾಕ್ಷ ಸುವರ್ಣ ನಟ್ಟಿಮನೆ, ಯಂ ಜಗನ್ನಾಥ್ ಡೊಡ್ಡಮನೆ, ಆಡಳಿತ ಗುರ್ಕಾರೆ ಯಂ. ನಾಗೇಶ್ ಸುವರ್ಣ ನಟ್ಟಿಮನೆ ಕಾರ್ಯದರ್ಶಿ ಶೇಖರ್ ಅಮೀನ್ ಪಾಂಪುಮನೆ ಬೊಕ್ಕ ಮರೋಳಿ ಗ್ರಾಮದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈದ ಚರ್ಚ್ ಗೇಟ್ ದ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ನೇ ವರ್ಷೊದ ಮಾರ್ನೆಮಿ ಬೊಕ್ಕ ದಸರಾ ಉಚ್ಚಯ, ಸುವರ್ಣ ಮಹೋಚ್ಚಯ ಲೇಸ್ ಅ.15-24 ಮುಟ್ಟ ನಡಪರೆ ಉಂಡು.
ಪ್ರತಿದಿನೊಲ ಬೇತೆ ಬೇತೆ ಪೂಜೆ, ಭಜನೆ ಬೊಕ್ಕ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಅಂಚೆನೆ ಅ.21 ಸನಿಯಾರ ಶ್ರೀ ಅಣ್ಣಪ್ಪ ಪಂಜುರ್ಲಿ ದೈವೊದ ಪೂಜೆ, ಅ.23 ಸೋಮಾರ ಮಹಾಕಾಳಿ ಅಮ್ಮನ ಪೂಜೆ ಬೊಕ್ಕ ಅ.24 ಅಂಗಾರೆ ವಿಜಯದಶಮಿದ ಲೆಕ್ಕೊಡು ಬಯ್ಯಗ್ ಸಭಾ ಲೇಸ್ ಬೊಕ್ಕ ಮಂಡಳಿದ ಸುವರ್ಣ ಉಚ್ಚಯದ ಲೆಕ್ಕೊಡು ಮಂಡಳಿಡ್ ಮಸ್ತ್ ವರ್ಷ ಸೇವೆ ಸಂದಾಯಿನಕ್ಲೆಗ್ ಸನ್ಮಾನ ನಡಪರೆ ಉಂಡು ಪಂದ್ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
