ಕಬಕ: ಶ್ರೀ ಕ್ಷೇತ್ರ ಕೂವೆತ್ತಿಲದ ಶ್ರೀ ಆದಿಶಕ್ತಿ ದುರ್ಗಾಪರಮೇಶ್ವರೀ ಅಮ್ಮನ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಈ ಲೇಸ್ ದ ವೈದಿಕ ವಿಧಿ ವಿಧಾನಲು ಉಂಡೆಮನೆ ಶ್ರೀಕೃಷ್ಣ ಭಟ್ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಪ್ರಸಾದ ದೆತೊಂದು ಶ್ರೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಧರ್ಮದರ್ಶಿಲು ಕೆ ದೇವಕಿ ಅಮ್ಮ, ಕೂವೆತ್ತಿಲ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ, ಕಾರ್ಯದರ್ಶಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೆದಿಲ: ಗಾಂಧಿನಗರ ಶ್ರೀ ದೇವಿ ಭಜನಾ ಮಂಡಳಿದ ಮುತಾಲಿಕೆಡ್ ಅ.15-24 ಮುಟ್ಟ ಶ್ರೀ ದೇವಿ ಭಜನಾ ಮಂದಿರಡ್ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬಯ್ಯಗ್ ಶ್ರೀದುರ್ಗಾಪೂಜೆ, ರಾತ್ರೆ ಭಜನೆ, ಮಂಗಳಾರತಿ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸರ್ಮೆತೆರಾದ್ ಬತ್ತ್ ದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಗಾಂಧಿನಗರ ಶ್ರೀ ದೇವಿ ಭಜನಾ ಮಂಡಳಿದ ಗುರ್ಕಾರೆ ಕೆ. ಚೆನ್ನಪ್ಪ ಗೌಡ ಕುದುಮಾನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಪೇರಮೊಗ್ರು: ಕೆದಿಲ ಗ್ರಾಮದ ದೇಂತಡ್ಕ ಶ್ರೀ ವನದುರ್ಗಾ ದೇವಲ್ಯಡ್ ಶರನ್ನವರಾತ್ರಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅ.15 ಕ್ಕ್ ಬೊಲ್ಪುಗು ನಿತ್ಯಪೂಜೆ, ಚಂಡಿಕಾಹೋಮ, ಸರ್ವಾಲಂಕಾರ ಪೂಜೆ, ಸರ್ವಸೇವೆ, ಮಹಾಪೂಜೆ, ಮಧ್ಯಾಹ್ನ ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ದುರ್ಗಾ ನಮಸ್ಕಾರ ಪೂಜೆ, ರಂಗಪೂಜೆ, ಬೊಕ್ಕ ಶಾಸ್ತ್ರೀಯ ಸಂಗೀತ ಬೊಕ್ಕ ಅ.16 ಕ್ಕ್ ಗಣಹೋಮ, ಶ್ರೀ ವನದುರ್ಗಾ ಹೋಮ, ಬಯ್ಯಗ್ ತಾಳಮದ್ದಳೆ ನಡತ್ಂಡ್.
ಅ.17 ಬೊಕ್ಕ 18 ಕ್ಕ್ ಬಯ್ಯಗ್ ಭಜನೆ, ಅ.19 ಲಲಿತಾ ಪಂಚಮಿ, ತಾಳಮದ್ದಳೆ, ಅ.22 ಕ್ಕ್ ದುರ್ಗಾಷ್ಠಮಿ, ಬಯ್ಯಗ್ ಆಟ ಸುದರ್ಶನ ವಿಜಯ ಚಂದ್ರಾವಳಿ ವಿಲಾಸ, ಅ.23 ಕ್ಕ್ ಮಹಾನವಮಿ, ಆಯುಧ ಪೂಜೆ, ಗಾಡಿ ಪೂಜೆ, ಭಜನಾ ಸಂಧ್ಯಾ, ಬೊಕ್ಕ ಅ.24 ಕ್ಕ್ ವಿಜಯದಶಮಿ, ವಿದ್ಯಾರಂಭ ಬೊಕ್ಕ ಭರತನಾಟ್ಯ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇಂತಡ್ಕ ಶ್ರೀ ವನದುರ್ಗಾ ದೇವಲ್ಯದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 29ನೇ ಸಂಚಿಕೆ ಅ.17 ಕ್ಕ್ ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರ್. ಅ.18 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೊಂಬೈ: ಕರ್ನಾಟಕ ಸಂಘ ಸಯನ್ ದ ಉದಿಪನ ಲೇಸ್ ಅ.15 ಕ್ಕ್ ಬೊಲ್ಪುಗು ನಿತ್ಯಾನಂದ ಸಭಾಗೃಹಡ್ ಗೌಜಿಡ್ ನಡತ್ಂಡ್.
ಮಲ್ಲ ಬಿನ್ನೆರಾದ್ ಸಯನ್ ಪರಿಸರದ ರಾಮ್ ದೇವ್ ಹೋಟೇಲ್ ದ ಧಣಿ, ಮಹಾದಾನಿ, ಸುಂದರ ಶೆಟ್ಟಿ, ಮಾನಾದಿಗೆದ ಬಿನ್ನೆರ್ ಅಂತರಾಷ್ಟ್ರೀಯ ಪುಗರ್ತೆ ದ ಹೃದಯ ತಜ್ಞೆರ್ ಡಾ. ಸದಾನಂದ ಶೆಟ್ಟಿ, ಕರ್ನಾಟಕ ಸಂಘ ಸಾಯನ್ ದ ಗುರ್ಕಾರೆ ಪ್ರವೀಣ್ ಭಟ್ ಮೇರ್ ಸಂಘದ ಬ್ಯಾನರ್ ನ್ ಬುಡುಗಡೆ ಮಲ್ತೆರ್. ಬೊಕ್ಕ ಸಂಘದ ಉದಿಪನ ಮಲ್ತೆರ್.
ಈ ಪೊರ್ತುಡು ಮಾನಾದಿಗೆದ ಬಿನ್ನೆರಾದ್ ರಾಜಕೀಯ ನೇತಾರ ಅಮಿತ್ ಜೆ.ಶೆಟ್ಟಿ, ಖ್ಯಾತ ನಾಟಕ ನಿರ್ದೇಶಕೆರ್ ವಿಜಯ ಕುಮಾರ್ ಶೆಟ್ಟಿ ಕೊಡಿಯಾಲ್ ಬೈಲ್, ಸಂಘದ ಗೌರವಾಧ್ಯಕ್ಷೆರ್, ಅಜಂತ ಕ್ಯಾಟರರ್ಸ್ ದ ಧಣಿ ಜಯರಾಮ್ ಶೆಟ್ಟಿ, ಸಲಹೆಗಾರೆ, ರಾಜಕೀಯ ಮುಂದಾಳು ಭಾಸ್ಕರ್ ಶೆಟ್ಟಿ, ಗಿರೀಶ್ ಬಿ.ಸಾಲ್ಯಾನ್, ಪ್ರದೀಪ್ ಶೆಟ್ಟಿ, ಸುಂದರ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಆರ್.ಶೆಟ್ಟಿ, ದಿನೇಶ್ ಶೆಟ್ಟಿ, ಸದಾಶಿವ ಬಿಎನ್ ಶೆಟ್ಟಿ, ಸದಾನಂದ ಶೆಟ್ಟಿ, ಸಂಘದ ಸಂಸ್ಥಾಪಕ ಸದಸ್ಯೆರ್ ಹ್ಯಾರಿ ಸಿಕ್ವೇರ, ಗೌರವ ಕಾರ್ಯದರ್ಶಿ ಡಾ.ಜಿ.ಪಿ.ಕುಸುಮ, ಜತೆ ಕಾರ್ಯದರ್ಶಿ ಜಯಶೀಲ ಬಿ.ಮೂಲ್ಯ, ಉಮೇಶ್ ಶೆಟ್ಟಿ ಕುಕ್ಕುಂದೂರು, ದಯಾನಂದ ಆರ್.ಮೂಲ್ಯ, ನವೀನ್ ಪೂಜಾರಿ, ಗೌರವ ಕೋಶಾಧಿಕಾರಿ ಸುರೇಶ್ ಶೆಟ್ಟಿ, ಜತೆ ಕೋಶಾಧಿಕಾರಿ ಚಂದ್ರಿಕಾ ಶೆಟ್ಟಿ, ಚೈತನ್ಯ ಕೆ.ಆಚಾರ್ಯ, ಸಾಂಸ್ಕೃತಿಕ ಸಮಿತಿದ ತೇಜಾಕ್ಷಿ ಎಸ್.ಶೆಟ್ಟಿ, ಪ್ರಭಾ ಎನ್.ಸುವರ್ಣ ಪಾಲ್ ಪಡೆದಿತ್ತೆರ್.
ಪುತ್ತೂರ್ ದ ದರ್ಬೆ ಫಿಲೋಮಿನ ಕಾಲೇಜ್ ಕೈತಲ್ ದ ಬೈಪಾಸ್ ಸರ್ಕಲ್‌ ದ ಅನಾಜೆ ಅಮ್ಮು ರೈ ಕಾಂಪ್ಲೆಕ್ಸ್ ಡ್ ಇಪ್ಪುನ ಫ್ಯಾಷನ್ ಝೋನ್ ಮೆನ್ಸ್ ಕಲೆಕ್ಷನ್ ಇತ್ತೆ ಪರ್ಬದ ಮಲ್ಲ ಆಫರ್ ನ್ ಗ್ರಾಹಕೆರೆಗ್ ಕೊರೊಂದು ಉಂಡು.
ದಸರಾ ಬೊಕ್ಕ ಆಯುಧ ಪೂಜೆದ ಲೆಕ್ಕೊಡು ಗ್ರಾಹಕೆರೆಗಾದ್ 20% ಮೆಗಾ ಡಿಸ್ಕೌಂಟ್ ಸೇಲ್ಸ್ ನಡತೊಂದು ಉಂಡು. ಇನಿರ್ದ್ ಸುರು ಅಪುನ ಈ ಆಫರ್ ಉಂದುವೇ ತಿಂಗೊಲ್ 24 ಮುಟ್ಟ ನಡಪರೆ ಉಂಡು. ಫ್ಯಾಷನ್ ಝೋನ್ ಡ್ರೆಸ್ ಶಾಪ್‌ಗ್ ಭೇಟಿ ಕೊರ್ದು 20% ಮೆಗಾ ಡಿಸ್ಕೌಂಟ್ ಗ್ ಡ್ರೆಸ್ ಪಡೆವೊಲಿ ಪಂದ್ ತೆರಿಪಾದೆರ್.
ಬೊಲ್ತೇರ್: ಸವಣಾಲು ಗ್ರಾಮದ ಮಂಜದಬೆಟ್ಟು ನಿವಾಸಿ ನಾರಾಯಣ ಆಚಾರ್ಯ ಮೇರ್ ಹುಷಾರ್ ಇಜ್ಜಂದೆ ತೀರ್ ಪೋಯೆರ್.
ಮೆರೆಗ್ ಬೊಡೆದಿ ದೇವಕಿ, ಮಗಲ್ ಸವಿತಾ, ಮಮತ, ಮಗೆ ಸಂತೋಷ್, ಪುಲ್ಲಿನಕುಲು ಚೇತನ್ ಬೊಕ್ಕ ಚೈತನ್ಯ ಉಲ್ಲೆರ್.
ರಾಜ್ಯದ ಸುಮಾರ್ ಜಿಲ್ಲೆಡ್ ಸೋಮಾರ ಭಾರೀ ಬರ್ಸ ಬೈದ್ಂಡ್. ಇನಿಲ ಕೆಲವು ಕಡೆಟ್ಟ್ ತೆಡಿಲ್ ಮೆಂಚ್ ದ ಬರ್ಸ ಬರೊಂದು ಉಂಡು.
ಅಂಚಾದ್ ದಕ್ಷಿಣ ಕನ್ನಡ, ಒಡಿಪು, ಉ.ಕನ್ನಡ, ಕೊಡಗು, ಚಿಕ್ಕಮಗಳೂರು, ಹಾಸನ ಸೇರಿನಂಚೆನೆ ಸುಮಾರ್ ಜಿಲ್ಲೆಡ್ ಇನಿ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದೆರ್. ಅತ್ತಂದೆ ಅ.21 ಮುಟ್ಟ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ಎಚ್ಚರಿಕೆ ಕೊರ್ತುಂಡು.
ಮಲೆನಾಡು ಜನಹಿತ ರಕ್ಷಣಾ ವೇದಿಕೆದ ಮುತಾಲಿಕೆಡ್ ನ.8ಕ್ಕ್ ಸುಬ್ರಹ್ಮಣ್ಯರ್ದ್ ರೈತ ರಕ್ಷಣಾ ಚಳವಳಿ ಸುರು ಮಲ್ಪುವ ಪಂದ್ ವೇದಿಕೆದ ಸಂಚಾಲಕೆರ್ ಕಿಶೋರ್ ಶಿರಾಡಿ ಸುಬ್ರಹ್ಮಣ್ಯಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಂಡೆರ್.
ರೈತೆರೆಗ್ ನೆಮ್ಮದಿ ಇಜ್ಜಿ, ಒಂಜಿ ಕಡೆ ಕಾಡ್ ಪ್ರಾಣಿಲೆನ ತೊಂದರೆ, ನನೊಂಜಿ ಕಡೆ ಅರಣ್ಯ ಇಲಾಖೆದ ಅಧಿಕಾರಿನ ದಬ್ಬಾಳಿಕೆ ನಡತೊಂದು ಉಂಡು. ಲಂಚ ಕೊರಿನಕ್ಲೆಗ್ ಕಂದಾಯ ಇಲಾಖೆ ಜಾಗದ ರೆಕಾರ್ಡ್ ಮಲ್ತ್ ದ್ ಕೊರ್ಪುಂಡು ಪಂದ್ ಮೇರ್ ಆರೋಪ ಮಲ್ದೆರ್.
ಪತ್ರಿಕಾಗೋಷ್ಠಿಡ್ ಜಯಪ್ರಕಾಶ್ ಕೂಜುಗೋಡು, ಹರೀಶ್ ಬಳ್ಪ, ವೀರೇಶ್ ಪಂಜೋಡಿ ಇತ್ತೆರ್.
ವರದಿ: ಗೋಪಿಚಂದನ್ ಕೆಎಸ್
ಮುಲ್ಕಿ: ಪುನರೂರು ಪ್ರತಿಷ್ಠಾನದ ಮುತಾಲಿಕೆಡ್ ಜನವಿಕಾಸ ಸಮಿತಿ ಸಹಕಾರಡ್, ವಿಶ್ವ ಆಹಾರ ದಿನಾಚರಣೆ ಆಹಾರ ಜಾಗೃತಿ ಅಭಿಯಾನ 2023 ಕಿನ್ನಿಗೋಳಿ ಕೈತಲ್ ದ ಬಳ್ಕುಂಜೆ ತೋಟ ಹೌಸ್ ಡ್ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಒಯಿಸೊಂದು ಪಾತೆರ್ದ್, ವಿಶ್ವ ಆಹಾರದ ದಿನಾಚರಣೆದ ಲೆಕ್ಕೊಡು ಆಹಾರ ಪೂರೈಸಾವುನ ರೈತನ ಪ್ರಾಮುಖ್ಯತೆನ್ ತೆರಿಪಾವೊನೆತ್ತೊಟ್ಟಿಗೆ ದೇಶದ ಬೆನ್ನೆಲು ಆಯಿನ ಸಾಧಕ ಪ್ರಗತಿಪರ ರೈತೆರೆನ್ ಗುರುತಿಸಾದ್, ಮಾನಾದಿಗೆ ಮಲ್ಪುನೇ ಕರ್ತವ್ಯ ಆತ್ಂಡ್. ಅತ್ತಂದೆ ತೆನಸ್ ದ ಅಪವ್ಯಯನ್ ಉಂತಾಯೆರೆ ಆಹಾರ ಜಾಗೃತಿ ಲೇಸ್ ಎಪಲ ನಡಪರೆ ಉಂಡು ಪಂದ್ ಪಂಡೆರ್.
ಈ ಪೊರ್ತುಡು ಪುತ್ತೂರು ದೇಂದಡ್ಕ ಶ್ರೀ ಮಹಾಲಿಂಗೇಶ್ವರ ಮಹಾ ಗಣಪತಿ ದೇವಲ್ಯದ ಅರ್ಚಕೆರ್ ಸುಬ್ರಹ್ಮಣ್ಯ ಭಟ್, ಬಳ್ಕುಂಜೆ ಭಜನಾ ಮಂದಿರದ ಗುರ್ಕಾರೆ ಪ್ರಸಾದ್ ಶೆಟ್ಟಿ, ಉದ್ಯಮಿ ಸತೀಶ ರಾಮ ಪೂಜಾರಿ, ಪ್ರತಿಷ್ಠಾನದ ಗುರ್ಕಾರೆ ದೇವ ಪ್ರಸಾದ್, ಪ್ರಧಾನ ಕಾರ್ಯದರ್ಶಿ ಶ್ರೇಯ, ಜನವಿಕಾಸ ಸಮಿತಿದ ಗುರ್ಕಾರೆ ಶೋಭಾರಾವ್, ಜಿತೇಂದ್ರ ವಿ ರಾವ್, ಪ್ರಾಣೇಶ್ ಭಟ್, ಶಶಿಕರ, ದಾಮೋದರ್ ಶೆಟ್ಟಿ ಕೊಡೆತ್ತೂರು ಪಾಲ್ ಪಡೆದಿತ್ತೆರ್.
ಈ ಲೇಸ್ ಡ್ ಕೃಷಿ ಕ್ಷೇತ್ರದ ಸಾಧಕೆರ್ ಎಲಿಯಾಸ್ ಡಿಸೋಜಾ ಬಳ್ಕುಂಜೆ ಮೆರೆಗ್ ಕೃಷಿ ರತ್ನ 2023 ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.
