Tulu News

ಪಾವಂಜೆಡ್ ರಂಗೋಲಿ ಪಂತೊ-2023: ಶ್ರಾವ್ಯ ಬೆದ್ರಗ್ ಸುರುತ್ತ ಇನಾಮು

ಹಳೆಯಂಗಡಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.)ದ ಸುವರ್ಣ ಮಹೋತ್ಸವದ ಲೆಕ್ಕೊಡು ಮುಕ್ತ ರಂಗೋಲಿ ಪಂತೊ-2023 ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯಡ್ ನಡತ್ಂಡ್.

ಈ ಲೇಸ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯ, ಹಳೆಯಂಗಡಿ ಶ್ರೀ ಗಣೇಶೋತ್ಸವ ಸೇವಾ ಟ್ರಸ್ಟ್ (ರಿ.), ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೇವಾ ಸಮಿತಿ, ಶ್ರೀ ವಿದ್ಯಾ ವಿನಾಯಕ ರಜತ ಸೇವಾ ಟ್ರಸ್ಟ್ (ರಿ), ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ದ ಒಟ್ಟುಸೇರಿಗೆಡ್ ನಡತ್ಂಡ್. ಈ ಪಂತೊಡು ಜಿಲ್ಲೆದ ಬೇತೆ ಬೇತೆ ಕಡೆರ್ದ್ 32 ಸ್ಪರ್ಧಿಲು ಪಾಲ್ ಪಡೆದಿತ್ತೆರ್.

ಈ ಪಂತೊಡು ಗೆಂದಿನಕ್ಲೆಗ್ ನಗದು ಇನಾಮು, ಕಾಯಂ ಫಲಕ ಬೊಕ್ಕ ಪ್ರಮಾಣ ಪತ್ರ ಕೊರಿಯೆರ್. ನೆತ್ತ ಸುರುತ್ತ ಇನಾಮು ಕು.ಶ್ರಾವ್ಯ ಬೆದ್ರ, ರಡ್ಡನೇ ಇನಾಮು ಧನಲಕ್ಷ್ಮಿ, ಎನ್.ಎಂ.ಪಿ.ಟಿ. ಕಾಲನಿ ಪಣಂಬೂರು, ಮೂಜಿನೇ ಇನಾಮು ವಿದ್ಯಾ ವಿಶ್ವೇಷ್ ಮಣಿಪಾಲ ಬೊಕ್ಕ ನಾಲ್ ನೇ ಇನಾಮುನ್ ಕು.ಸಂಜನಾ ಡಿ.ಕೋಟ್ಯಾನ್ ಕಾರ್ನಾಡು ಮುಲ್ಕಿ ಮೊಕುಲು ಪಡೆತೆರ್.

ತೀರ್ಪುಗಾರೆರಾದ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಸೂರ್ಯ ಪುರೋಹಿತ್ ಕಾರ್ಲ, ತಾರಾ ಧನರಾಜ್ ಸುರತ್ಕಲ್ ಬೊಕ್ಕ ಹರಿಪ್ರಸಾದ್ ಶರ್ಮ ಕಾಸ್ರೋಡು ಸಹಕಾರ ಕೊರಿಯೆರ್.

ಮುಗಿತಲದ ಲೇಸ್ ಡ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಬಿ.ಸೂರ್ಯ ಕುಮಾರ್, ಜೀರ್ಣೋದ್ದಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಗುರ್ಕಾರೆ ರಘು ಕೆ. ದೇವಾಡಿಗ, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ನಾನಿಲ್, ಯುವಕ ಮಂಡಲದ ಗುರ್ಕಾರೆ ನಾಗೇಶ್ ಟಿ.ಜಿ., ಸಲಹಾ ಸಮಿತಿದ ಗುರ್ಕಾರೆ ಮೋಹನ್ ಬಂಗೇರ ಬೊಕ್ಕ ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್. ಅಮೀನ್ ಚಾವಡಿಡ್ ಇತ್ತೆರ್.

ಗೆಂದಿನಕ್ಲೆಗ್ ಇನಾಮು ಬೊಕ್ಕ ಪಾಲ್ ಪಡೆಯಿನ ಮಾತ ಸ್ಪರ್ಧಾಳುಲೆಗ್ ಪ್ರಮಾಣ ಪತ್ರನ್ ನ.10 ಕ್ಕ್ ಬಯ್ಯಗ್ 5 ಗಂಟೆಗ್ ನಡಪುನ ಯುವಕ ಮಂಡಲದ ಸುವರ್ಣ ಮಹೋತ್ಸವ ಲೇಸ್ ಡ್ ಕೊರಿಯೆರೆ ಉಂಡು.

ಯುವಕ ಮಂಡಲದ ಗುರ್ಕಾರೆ ನಾಗೇಶ್ ಟಿ. ಜಿ. ಎದ್ಕೊನಿಯೆರ್. ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್. ಅಮೀನ್ ಸೊಲ್ಮೆ ಸಂದಾಯೆರ್. ಸುವರ್ಣ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಲೇಸ್ ದ ಸುಧಾರಿಕೆ ಮಲ್ತೆರ್.

ಅ.16-18: ಕಲ್ಲಮುಂಡ್ಕೂರು ಸಾರ್ವಜನಿಕ ಶ್ರೀ ಶಾರದೋತ್ಸವ ಸೇವಾ ಸಮಿತಿದ ಸುರುತ್ತ ವರ್ಷೊದ ಮಾರ್ನೆಮಿ ಉಚ್ಚಯ

ಬಾನಂಗಡಿ: ಕಲ್ಲಮುಂಡ್ಕೂರು ಸಾರ್ವಜನಿಕ ಶ್ರೀ ಶಾರದೋತ್ಸವ ಸೇವಾ ಸಮಿತಿದ ಸುರುತ್ತ ವರ್ಷೊದ ಮಾರ್ನೆಮಿ ಉಚ್ಚಯ ಅ.16-18 ಮುಟ್ಟ ನಡಪುಂಡು.

ಈ ಉಚ್ಚಯ ಮಾಲ್ದಬೆಟ್ಟು ಜಯಪ್ರಕಾಶ್ ಪಡಿವಾಳ್ ಮೆರೆನ ಮುತಾಲಿಕೆಡ್, ದೈಲಬೆಟ್ಟು ಶ್ರೀಧರ ಭಟ್ ಮೆರೆನ ಪೌರೋಹಿತ್ಯಡ್ ಗೌಜಿಡ್ ನಡತೊಂದು ಉಂಡು.

ಅ.16 ಸೋಮಾರ ಶ್ರೀ ಶಾರದ ದೇವಿನ ಮೂರ್ತಿನ್ ಕುದ್ರಿಪದವುರ್ದ್ ಮೆರವಣಿಗೆಡ್ ಕನತ್ ದ್ ಬೊಲ್ಪುಗು ಗಣಹೋಮ, ಶ್ರೀ ಶಾರದ ದೇವಿನ ಪ್ರತಿಷ್ಠಾಪನೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಡ್ಯಾನ್ಸಿಂಗ್ ಸ್ಟಾರ್ಸ್ ಕಲ್ಲಮುಂಡ್ಕೂರು ಮೊಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಅ.17 ಅಂಗಾರೆ ಬೊಲ್ಪುಗು ಭಜನೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ರಾತ್ರೆ ನುಪ್ಪು ಪ್ರಸಾದ ಸೇವೆ ಆದ್, ದಿನಕರ ಭಂಡಾರಿ ಕಣಂಜಾರ್ ರಚನೆ ಮಲ್ತಿನ ಉಂದು ಎಂಚಿನ? ತುಳು ನಾಟಕ ನಡತ್ಂಡ್.

ಅಂಚೆನೆ ಇನಿ (ಅ.18) ಬಯ್ಯಗ್ ನಡಪುನ ಶ್ರೀ ಶಾರದಾ ದೇವಿನ ಶೋಭಾಯಾತ್ರೆಡ್ ಭಕ್ತಾದಿಲು ಪಾಲ್ ಪಡೆದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕಲ್ಲಮುಂಡ್ಕೂರು ಸಾರ್ವಜನಿಕ ಶ್ರೀ ಶಾರದೋತ್ಸವ ಸಮಿತಿದ ಗುರ್ಕಾರೆ, ಸದಸ್ಯೆರ್ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಪರಿಸರ ಸಂರಕ್ಷಣೆದ ಜಾಗೃತಿ ಮಲ್ಪರೆ ಎನ್‌ಎಸ್‌ಎಸ್‌ ದಂಚಿನ ಸಂಘಟನೆಲು ಮುಖ್ಯ: ಉಪ ವಲಯಾರಣ್ಯಾಧಿಕಾರಿ ಅಪೂರ್ವ

ಸುಬ್ರಹ್ಮಣ್ಯ: ಯುವ ಜನಾಂಗಗ್ ಪರಿಸರ ಸಂರಕ್ಷಣೆದ ಜಾಗೃತಿ ಪುಟ್ಟಾವರೆ ಎನ್‌ಎಸ್‌ಎಸ್‌ ದಂಚಿನ ಸಂಘಟನೆಲು ಮುಖ್ಯ. ಕಲ್ಪಾರ್ಥಿ ದೆಸೆರ್ದ್ ಸೇವಾ ಮನೋಭಾವನೆ ಬೊಕ್ಕ ಸ್ವಚ್ಚತಾ ಜಾಗೃತಿ ಮೂಡಿಸಾಯೆರೆ ಇಸೇಸ ಶಿಬಿರಲು ಪೂರಕ ಆಪುಂಡು ಪಂದ್ ಸುಬ್ರಹ್ಮಣ್ಯ ವಲಯದ ಉಪ ವಲಯಾರಣ್ಯಾಧಿಕಾರಿ ಅಪೂರ್ವ ಪಂಡೆರ್.

ಮೇರ್ ಕೈಕಂಬ ಉನ್ನತೀಕರಿಣ ಮಲ್ತಿನ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಡ್ ನಡಪುನ ಸುಬ್ರಹ್ಮಣ್ಯದ ಎಸ್‌ಎಸ್‌ಪಿಯು ಕಾಲೇಜ್ ದ ರಾಷ್ಟೀಯ ಸೇವಾ ಯೋಜನಾ ಘಟಕದ ವಾರ್ಷಿಕ ವಿಶೇಷ ಶಿಬಿರಡ್ ಸನಿಯಾರ ನಿವೃತ್ತ ಯೋಧೆರೆನ್ ಗೌರವಿಸಾದ್ ಪಾತೆರಿಯೆರ್.

ಬಿಳಿನೆಲೆ ಗ್ರಾ.ಪಂ. ಗುರ್ಕಾರ್ದಿ ಶಾರದಾ ದಿನೇಶ್ ಕೊಡಿ ರಾಪಾಯೆರ್. ಶಿಬಿರನ್ ಕೈಕಂಬ ಶಾಲೆದ ಎಸ್‌ಡಿಎಂಸಿ ಗುರ್ಕಾರೆ ಮೋಹನ್ಉದಿಪನ ಮಲ್ತೆರ್. ಲೇಸ್ ದ ಗುರ್ಕಾರ್ಮೆನ್ ಕಾಲೇಜ್ ದ ಶಿಕ್ಷಕ ರಕ್ಷಕ ಸಂಘದ ಗುರ್ಕಾರೆ ರಾಜೇಶ್ ಮಾವಿನಕಟ್ಟೆ ಒಯಿಸ್ ದಿತ್ತೆರ್.

ಕುಮಾರಸ್ವಾಮಿ ಪದವಿಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ಸಂಕೀರ್ತ್ ಹೆಬ್ಬಾರ್ ವಿಸ್ಮಯ ವಿಶ್ವ ಪನ್ಪುನ ಇಸಯದ ಉಪನ್ಯಾಸ ಕೊರಿಯೆರ್. ಕೈಕಂಬ ಯುವಕ ಮಂಡಲದ ಗುರ್ಕಾರೆ ಶಿವಪ್ರಸಾದ್ ನಡುತೋಟ ಕೊಡಿ ರಾಪಾಯೆರ್.

ಮಲ್ಲ ಬಿನ್ನೆರಾದ್ ಕಾಲೇಜ್ ದ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್, ನಿವೃತ್ತ ಭಾರತೀಯ ಯೋಧೆರ್ ಮಧುಕುಮಾರ್ ಎರ್ಮಾಯಿಲ್, ಸೋಮಶೇಖರ್, ದಿವ್ಯಪ್ರಕಾಶ್ ಎರ್ಮಾಯಿಲ್, ಅರಣ್ಯ ಇಲಾಖಾ ಸಿಬ್ಬಂದಿ ಮಹಾಂತೇಶ್, ಕೈಕಂಬ ಶಾಲೆದ ಮುಖ್ಯಗುರು ಪವಿತ್ರ.ಎ, ಶಾಲೆದ ಎಸ್‌ಡಿಎಂಸಿ ಸದಸ್ಯೆರ್ ನಾಗೇಶ್ ಕೋಟೆಬಾಗಿಲು, ಅತಿಥಿ ಶಿಕ್ಷಕಿ ವೇದಾವತಿ, ಆಶಾ ಕಾರ್ಯಕರ್ತೆ ಕುಸುಮಾ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಕಾಲೇಜ್ ದ ಉಪನ್ಯಾಸಕಿ ಜ್ಯೋತಿ.ಪಿ.ರೈ, ಶ್ಯಾಮಿಲಿ, ಎನ್‌ಎಸ್‌ಎಸ್ ಯೋಜನಾಧಿಕಾರಿ ಭವ್ಯಶ್ರೀ ಹರೀಶ್ ಕುಲ್ಕುಂದ ಚಾವಡಿಡ್ ಇತ್ತೆರ್.

ಲೇಸ್ ಡ್ ನಿವೃತ್ತ ಯೋಧೆರ್ ಮಧುಕುಮಾರ್ ಎರ್ಮಾಯಿಲ್, ಸೋಮಶೇಖರ್, ದಿವ್ಯಪ್ರಕಾಶ್ ಎರ್ಮಾಯಿಲ್ ಮೆರೆನ್ ಸನ್ಮಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್. ಶಿಬಿರಾರ್ಥಿ ವಿಶಾಲ್ ಕಿರಣ್ ಎದ್ಕೊನಿಯೆರ್. ವಿದ್ಯಾರ್ಥಿನಿ ಶರಣ್ಯಾ ಸೊಲ್ಮೆ ಸಂದಾಯೆರ್. ಘಟಕದ ನಾಯಕೆ ಪವನ್ ಕುಮಾರ್ ನಿವೃತ್ತ ಯೋಧೆರೆನ್ ಪರಿಚಯ ಮಲ್ತೆರ್. ಶಿಬಿರಾರ್ಥಿ ಮೋಕ್ಷಿತಾ.ಎ ಲೇಸ್ ದ ಸುಧಾರಿಕೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಅಗ್ನಿನೇತ್ರ ಕ್ರಿಯೇಶನ್ಸ್ ರ್ದ್ ಪಾರೆಂಕಿದ ಅಪ್ಪೆ ಶ್ರೀ ಮಹಿಷಮರ್ದಿನಿ ಭಕ್ತಿಸುಗಿಪು

ಅಗ್ನಿನೇತ್ರ ಕ್ರಿಯೇಶನ್ಸ್ ದ ಮುತಾಲಿಕೆಡ್, ಮಡಂತ್ಯಾರು ಪಾರೆಂಕಿ ಶ್ರೀ ಮಹಿಷಮರ್ಧಿನಿ ದೇವಲ್ಯದ ಭಕ್ತಿಸುಗಿಪು “ಪಾರೆಂಕಿದ ಅಪ್ಪೆ ಶ್ರೀ ಮಹಿಷಮರ್ದಿನಿ” ಆಯಿನಾತ್ ಬೇಗಡೇ ಬುಡುಗಡೆ ಆಯೆರೆ ಉಂಡು.

ಈ ಭಕ್ತಿಸುಗಿಪು ಪ್ರವೀಣ್ ಶೆಟ್ಟಿ ಮಡಂತ್ಯಾರ್ ಮೆರೆನ ನಿರ್ಮಾಣಡ್, ವಿಜಯ್ ಕಾರಿಂಜ ಮೆರೆನ ಸಾಹಿತ್ಯಡ್, ತೇಜಸ್ ಕೋಡೊಟ್ಟು ಮೆರೆನ ಗಾಯನಡ್, ಯಶು ಸ್ನೇಹಗಿರಿ ನೈನಾಡು ಮೆರೆನ ರೆಕಾರ್ಡಿಂಗ್ ಸ್ಟುಡಿಯೋ, ಪ್ರಿತೇಶ್ ಕೋಡೊಟ್ಟು ಮೆರೆನ ಸಂಕಲನಡ್, ಕು. ರಕ್ಷಿತಾ ಪುಂಜಾಲಕಟ್ಟೆ, ಕು. ಚೈತ್ರ ಪಾದೆಕೋಡಿ ಮೆರೆನ ಸಹ ಗಾಯನಡ್, ಶ್ರೀ ವಿದ್ಯಾಸರಸ್ವತಿ ಭಜನಾ ಮಂಡಳಿ ಪಾರೆಂಕಿ, ಮಡಂತ್ಯಾರ್ ದ ಸಂಪೂರ್ಣ ಸಹಕಾರಡ್ ಬುಡುಗಡೆ ಆಪುಂಡು.

ಹಳೆಯಂಗಡಿ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಗ್ ಪೊಸ ಅಭಿವೃದ್ಧಿ ಸಮಿತಿ ರಚನೆ: ರಾಜ್ಯ ಸರ್ಕಾರದ ಆದೇಶ

ಹಳೆಯಂಗಡಿ : ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಮೆರೆನ ಅನುಮೋದನೆದ ಮಿತ್ತ್ ಹಳೆಯಂಗಡಿ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಗ್ ಪೊಸ ಕಾಲೇಜ್ ಅಭಿವೃದ್ಧಿ ಸಮಿತಿ ರಚನೆ ಆತ್ಂಡ್.

ಈ ಸಮಿತಿದ ಸದಸ್ಯೆರಾದ್ ಮಿಥುನ್ ಎಂ ರೈ, ಎಚ್ ವಸಂತ ಬೆರ್ನಾಡ್, ಪ್ರಮೋದ್ ಕುಮಾರ್, ಗಣೇಶ್ ದೇವಾಡಿಗ ಮುಲ್ಕಿ, ಅಬ್ದುಲ್ ಖಾದರ್, ಅಬ್ದುಲ್ ಅಜೀಜ್, ನವನೀತ್ ಸಾಲಿಯಾನ್, ಜೈ ಕೃಷ್ಣ ಕೋಟ್ಯಾನ್, ಸುದರ್ಶನ್, ನವೀನ್ ಪಂಜ, ರಜಿಯಾ ಬಾನು, ಅನಿಲ್ ಪೂಜಾರಿ ಸಸಿಹಿತ್ಲು, ಸಂತೋಷ್ ಕುಮಾರ್ ಕೊಪ್ಪಲ ಮೊಕ್ಲೆನ್ ನೇಮಕ ಮಲ್ಪುಲೆ ಪಂದ್ ಕಾಲೇಜ್ ಶಿಕ್ಷಣ ಇಲಾಖೆದ ಆಯುಕ್ತೆರ್ ಆದೇಶ ಮಲ್ದೆರ್. ನನದ ದಿನಟ್ಟ್ ಈ ಸಮಿತಿ ಕಾಲೇಜ್ ದ ಅಭಿವೃದ್ಧಿಗಾದ್ ಕೆಲಸ ಮಲ್ಪುಂಡು.

ಅ.23-24: ಕೆದಿಲ ಶ್ರೀ ಉಳ್ಳಾಕ್ಲು ಧೂಮಾವತಿ ಮಲರಾಯ ದೈವೊಲ್ಯಡ್ ಮಾರ್ನೆಮಿ ಉಚ್ಚಯ

ಬಂಟ್ವಾಳ: ಕೆದಿಲ ಶ್ರೀ ಉಳ್ಳಾಕ್ಲು ಧೂಮಾವತಿ ಮಲರಾಯ ದೈವೊಲ್ಯಡ್ ಮಾರ್ನೆಮಿ ಉಚ್ಚಯ ಅ.23 ಬೊಕ್ಕ 24 ಕ್ಕ್ ನಡಪರೆ ಉಂಡು.

ಈ ಲೇಸ್ ದ ವೈದಿಕ ವಿಧಿ ವಿಧಾನಲು ಕ್ಷೇತ್ರದ ತಂತ್ರಿಲಾಯಿನ ಕೆಮ್ಮಿಂಜೆ ನಾಗೇಶ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.

ಅ.23 ಸೋಮಾರ ಬಯ್ಯಗ್ ಮಾರ್ನೆಮಿ ಪೂಜೆ, ಆಯುಧ ಪೂಜೆ ರಾತ್ರೆ ಮಂಗಳಾರತಿ, ಪ್ರಸಾದ ಪಟ್ಟುನ ಲೇಸ್ ನಡಪರೆ ಉಂಡು.

ಅ.24 ಅಂಗಾರೆ ವಿಜಯದಶಮಿಗ್ ಮಧ್ಯಾಹ್ನ ಮಹಾಪೂಜೆ, ಚಂಡಿಕಾಹೋಮ, ಮಹಾಮಂಗಳಾರತಿ, ಪ್ರಸಾದ ಪಟ್ಟುನ ಲೇಸ್ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕ್ಷೇತ್ರದ ಗುರ್ಕಾರೆ ಜೆ.ಕೃಷ್ಣ ಭಟ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.