ಇಸ್ರೇಲ್ ಬೊಕ್ಕ ಹಮಾಸ್ ನಡುಟ್ಟ್ ಕರಿನ ಪತ್ತ್ ದಿನರ್ದಿಂಚ ನಡಪುನ ಯುದ್ದರ್ದ್ ಸುಮಾರ್ 4 ಸಾರ ಜನ ತೀರ್ ಪೋತೆರ್ ಪಂದ್ ವರದಿ ಆತ್ಂಡ್.
ಇಸ್ರೇಲ್ ಅಧಿಕಾರಿಲು ಹಮಾಸ್ ದಾಳಿರ್ದ್ 1400 ಜನ ತೀರ್ ಪೋತೆರ್ ಪಂದ್ ಘೋಷಣೆ ಮಲ್ದೆರ್. 2620 ಪ್ಯಾಲೇಸ್ಟೈನಿಯನ್ ಲು ಸೈದೆರ್, 9600 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ಗಾಜಾ ಆರೋಗ್ಯ ಸಚಿವಾಲಯ ತೆರಿಪಾದ್ಂಡ್.
ಉತ್ತರಾಖಂಡದ ಪಿಥೋರಗಢಡ್ 4.0 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪನಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.
ಭೂಕಂಪದ ಅನುಭವ ಆಯಿನ ಕೂಡ್ಲೆ ಜನ ಇಲ್ಲರ್ದ್ ಪಿದಯಿ ಬತ್ತ್ ದ್ ಸುರಕ್ಷಿತ ಜಾಗೆಗ್ ಬಲಿತೆರ್ ಪಂದ್ ವರದಿ ಆತ್ಂಡ್. ಈ ಘಟನೆಗ್ ಸಂಬಂಧಪಟ್ಟಿನಂಚೆನೆ ಆಸ್ತಿ-ಪಾಸ್ತಿಗ್ ತೊಂದರೆ ಆಯಿನ ಬಗೆಟ್ಟ್ ಪೊಲಬು ತೆರಿದ್ ಬೈದಿಜಿ.
ಹಳೆಯಂಗಡಿ: ಪ್ರತಿಯೊಂಜಿ ಇಂಗ್ರೇರ್ಜಿದಕುಲು ಮಲ್ಪುನ ಸುಗ್ಗಿ ಪರ್ಬದ ಪಂತೊಲು ಕುಟುಂಬದ ಎಡ್ಡೆಪ್ಪುಗು ಅನು ಕೊರ್ಪುಂಡು ಪಂದ್ ಕುಡ್ಲದ ಅಥೆನಾ ಆಸ್ಪತ್ರೆದ ಮ್ಯಾನೇಜಿಂಗ್ ಡೈರೆಕ್ಟರ್ ಡಾ. ಅಶಿತ್ ಶೆಟ್ಟಿಯಾನ್ ಪಂಡೆರ್.
ಮೇರ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಮುತಾಲಿಕೆಡ್ ನಡತಿನ ಸುಗ್ಗಿ ಪರ್ಬದ ಪಂತೊಡು ಗೆಂದಿನಕ್ಲೆಗ್ ಇನಾಮು ಕೊರ್ಪುನ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಲೇಸ್ ದ ಗುರ್ಕಾರ್ಮೆನ್ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಸಭಾ ಪಾಲಕೆರ್ ರೆವೆರೆಂಡ್ ಅಮೃತ್ ರಾಜ್ ಖೊಡೆ ಮೇರ್ ಒಯಿಸೊಂದು ಎಡ್ಡೆಪ್ಪು ಬಯಕಿಯೆರ್.
ಸಿಎಸ್ಐ ಕ್ರಿಸ್ತ ಕಾಂತಿ ಚರ್ಚ್ ಪಣಂಬೂರುದ ಸಭಾ ಪಾಲಕೆರ್ ರೆವೆರೆಂಡ್ ಸಂಧ್ಯಾ ಖೊಡೆ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ಸಭಾ ಪರಿಪಾಲನ ಸಮಿತಿದ ಸದಸ್ಯೆರ್ ಆಸ್ಟಿನ್ ಕರ್ಕಡ, ವಸಂತ ಬೆರ್ನಾಡ್,
ಲಾವಣ್ಯ ಕೋಟ್ಯಾನ್, ಶರ್ಲಿ ಬಂಗೇರ, ಜೇಮ್ಸ್ ಕರ್ಕಡ, ಬೊಕ್ಕ ಸಿಡ್ನಿ ಕರ್ಕಡ ಪಾಲ್ ಪಡೆದಿತ್ತೆರ್.
ಪಂದ್ಯಾಟ ಸಮಿತಿದ ಕಾರ್ಯದರ್ಶಿ ರೆಮ್ಮಿ ಎಲಿಸಾ ಸಾಮುವೆಲ್ ಎದ್ಕೊನಿಯೆರ್. ಕೋಶಾಧಿಕಾರಿ ಸುಹಾನ್ ಪಾಲನ್ನ ಸೊಲ್ಮೆ ಸಂದಾಯೆರ್. ಅಡ್ಲಿನ್ ನವ್ಯ ಪಾಲನ್ನ ಲೇಸ್ ದ ಸುಧಾರಿಕೆ ಮಲ್ತೆರ್.
ಕುಡ್ಲ : ನೇತ್ರಾವತಿ ಸಂಕಡ್ ಸೋಮಾರ ಬಯ್ಯಗ್ ನಡತಿನ ಸರಣಿ ಅಪಘಾತ ಆದ್ ಸುಮಾರ್ 2 ಗಂಟೆ ಟ್ರಾಫಿಕ್ ಜಾಮ್ ಆತ್ಂಡ್.
ಸಂಕದ ನಡುಟ್ಟು ಒಂಜಿ ಲಾರಿ ಹಾಳಾದ್ ಉಂತುದು ಇತ್ತ್ಂಡ್. ಈ ಪೊರ್ತುಡು ಬರ್ಸ ಬತ್ತಿರ್ನೆದಾವೆರ ಅಯಿಕ್ ಒಂಜಿ ಕಾರ್ ಗುದ್ದುದ್ಂಡ್.ಇಂಚ ಬೆರಿಕ್ಕ್ ಬೆರಿಕ್ಕ್ ಮಾತ ಗಾಡಿಲುಲ ಒಂಜೆಕ್ಕೊಂಜಿ ತಾಂಟ್ ದ್ ಈ ಘಟನೆ ನಡದ್ಂಡ್. ನೆರ್ದ್ 6 ಗಾಡಿ ಲಗಾಡಿ ಆತ್ಂಡ್.
ಕುಡ್ಲ ದಕ್ಷಿಣ ಸಂಚಾರಿ ಠಾಣೆ ಪೊಲೀಸೆರ್ ಜಾಗೆಗ್ ಬತ್ತ್ ದ್ ಗಾಡಿಲೆನ್ ದೆಪ್ಪಾದ್ ಸಂಚಾರೊಗು ಸರಿ ಮಲ್ತ್ ಕೊರಿಯೆರ್.
ಮುಲ್ಕಿ: ಮುಲ್ಕಿ ತಾಲೂಕ್ ಡ್ ಬರ್ಸದ ನೀರ್ ಸಂಗ್ರಹ ಮಲ್ಪುನೆನ್ (ರೈನ್ ವಾಟರ್ ಹಾರ್ವೆಸ್ಟಿಂಗ್) ಕಟ್ವಾನದ ಲೈಸೆನ್ಸ್ ಬೊಕ್ಕ ಅನುಭೋಗ ಪ್ರಮಾಣಪತ್ರ ಕೊರ್ನಗನೇ ಕಡ್ಡಾಯ ಮಲ್ಪೊಡು ಪಂದ್ ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ (ಎಸಿಇ) ಮುಲ್ಕಿದ ಸ್ಥಾಪಕಾಧ್ಯಕ್ಷೆರ್ ಜೀವನ್ ಕೆ ಶೆಟ್ಟಿ ಮೇರ್ ಅ.16 ಕ್ಕ್ ತಹಶೀಲ್ದಾರೆರ್ ಪ್ರದೀಪ್ ಕುರುಡೇಕರ್ ಮೆರೆನ್ ಭೇಟಿ ಮಲ್ತ್ ದ್ ಬಿನ್ನಾಪು ಮಲ್ತೆರ್.
ನೆಕ್ಕ್ ತಹಶಿಲ್ದಾರೆರ್ ಎಡ್ಡೆ ಸ್ಪಂದನೆ ಕೊರಿಯೆರ್. ನನ ದುಂಬಗ್ ಅಸೋಸಿಯೇಶನ್ ದ ಮುಖೇನ ಅಭಿವೃದ್ಧಿ ಕಾರ್ಯಗ್ ತನ್ನ ಸಹಕಾರನ್ ಕೊರ್ಪೆ ಪಂದ್ ಭರವಸೆ ಕೊರಿಯೆರ್. ಈ ಪೊರ್ತುಡು ACEM ದ ಕೋಶಾಧಿಕಾರಿ ವರುಣ್ ಇತ್ತೆರ್.
ಮಕರ ಶ್ರೀ ಭಜನಾ ಮಂಡಳಿ ಬೆಂಗ್ಲೂರ್ ಕೂಟದ ಭಜಕೆರ್ ಮಾತ ಈ ವರ್ಷೊದ ದಸರಾ ಉಚ್ಚಯದ ಸುರುತ್ತ ದಿನ ಅ.15 ಐತಾರ ರಾಜರಾಜೇಶ್ವರಿ ನಗರಡ್ ನೆಲೆ ಇಪ್ಪುನ ಶ್ರೀ ರಾಜರಾಜೇಶ್ವರಿ ಅಮ್ಮನ ಸನ್ನಿಧಿಗ್ ನಡತೊಂದು ಬತ್ತ್ ದ್ ಭಜನಾ ಸೇವೆ ಮಲ್ತ್ ದ್ ಶ್ರೀ ದೇವಿನ ಅನುಗ್ರಹ ಪಡೆಯೆರ್.
ಶ್ರೀ ಸೌಮ್ಯನಾಥ ಸ್ವಾಮೀಜಿ ಮೆರೆನ ಆಶೀರ್ವಾದದೊಟ್ಟಿಗೆ ಹೊಸಳ್ಳಿ ಶ್ರೀ ಗಂಗಾಧರೇಶ್ವರ ದೇವಲ್ಯರ್ದ್ ಬೊಲ್ಪುಗು 4 ಗಂಟೆಗ್ ಸರಿಯಾದ್ ಸುಮಾರ್ 40 ಭಕ್ತೆರೆನೊಟ್ಟಿಗೆ ಸುರು ಆಯಿನ ಪಾದಯಾತ್ರೆ ದೇವಿ ಸನ್ನಿದಿಗ್ 10 ಗಂಟೆಗ್ ಸರಿಯಾದ್ ಎತ್ತ್ ದ್ಂಡ್. ಬೊಕ್ಕ ಸನ್ನಿಧಿಡ್ ಭಜನೆ ಸೇವೆ ಕೊರ್ದು ಪ್ರಸಾದ ಸ್ವೀಕಾರ ಮಲ್ತೆರ್.
ವರದಿ: ರಂಜು ತುಳುರಂಗಪ್ರೇಮಿ
ಕುಡ್ಲ: ತೆಡಿಲ್ ಹಾಕ್ ದ್ ಶಾರ್ಟ್ ಸರ್ಕ್ಯುಟ್ ಆದ್ ಪೊಂಜೋವ್ ಬೊಕ್ಕ ಬಾಲೆಗ್ ಪೆಟ್ಟಾಯಿನ ಘಟನೆ ಕುಡ್ಲದ ವಾಮಂಜೂರು ಅಮೃತ ನಗರದ ಗೋಪಾಲ ಪೂಜಾರಿ ಪನ್ಪುನಾರೆನ ಇಲ್ಲಲ್ ನಡತ್ ದ್ಂಡ್.
ತೆಡಿಲ್ ದ ಸೌಂಡ್ ಗ್ ಇಲ್ಲಲ್ ಶಾರ್ಟ್ ಸರ್ಕ್ಯುಟ್ರ್ದ್ ಸ್ವಿಚ್ ಬೋರ್ಡ್ ಬೊಕ್ಕ ಮೀಟರ್ ಬಾಕ್ಸ್ ಪೊಡಿ ಆತ್ಂಡ್. ಅತ್ತಂದೆ ಪೊಂಜೋವ್ ಶ್ವೇತಾ ಬೊಕ್ಕ 5 ವರ್ಷೊದ ಬಾಲೆದ ಕೆಬಿಕ್ಕ್ ಪೆಟ್ಟಾತ್ಂಡ್. ಮೊಕುಲು ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಈ ಘಟನೆ ನಡಪುನ ಪೊರ್ತುಡು ಇಲ್ಲಲ್ ನಾಲ್ ಜನ ಕುಟುಂಬಸ್ಥೆರ್ ಇತ್ತೆರ್.
ಭಾಯಂದರ್ ಶ್ರೀ ದುರ್ಗಾಪರಮೇಶ್ವರಿ ಭಕ್ತ ವೃಂದ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ-2023 ಅ.15-24 ಮುಟ್ಟ ನಡಪರೆ ಉಂಡು.
ಅ.19 ಕ್ಕ್ ರಂಗಪೂಜೆ, ತೀರ್ಥ ಪ್ರಸಾದ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು. ಅ.22 ಕ್ಕ್ ಮಹಾಪೂಜೆ, ಬೊಲ್ಪುಗು ದುರ್ಗಾಹೋಮ, ಭಜನೆ, ಮಹಾಮಂಗಳಾರತಿ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ತುಳು ಯಕ್ಷಗಾನ ಮಹಿಮೆದ ಮಂತ್ರ ದೇವತೆ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬೊಲ್ಪುಗು ಪೂಜೆ, ಮಂಗಳಾರತಿ, ತೀರ್ಥ ಪ್ರಸಾದ, ಬಯ್ಯಗ್ ಬೇತೆ ಬೇತೆ ಮಂಡಳಿದಕ್ಲೆರ್ದ್ ಭಜನೆ, ರಾತ್ರೆ ಮಂಗಳಾರತಿ, ತೀರ್ಥ ಪ್ರಸಾದ ಬೊಕ್ಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಕುಟುಂಬ ಸಮೇತೆರಾದ್ ಬತ್ತ್ ದ್ ಶ್ರೀ ದೇವೆರೆನ ಆಶೀರ್ವಾದ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ನರಮಾನಿಲೆಗ್ ಗ್ ಒಂಜೇ ಜಾತಿ ಒಂಜೇ ಮತ ಒಂಜೇ ದೇವೆರ್ ಪಂದ್ ಜಗತ್ತ್ ಗ್ ತೊಜಪಾದ್ ಕೊರಿನ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನಂಚಿನ ಮಹಾಪುರುಷೆರೆನ ಸಿದ್ಧಾಂತ ಇತ್ತೆದ ಸಮಾಜಗ್ ಅಗತ್ಯ. ನಮ ಮಾತೆರ್ಲಾ ದೇವೆರ್ನ ಜೋಕುಲು. ಕುದ್ರೋಳಿ ಕ್ಷೇತ್ರಡ್ ಜಾತಿ ಮತ ಬೇಧ ಇಜ್ಜಂದೆ ನಡತೊಂದು ಇಪ್ಪುನ ಉಚ್ಚಯ ಸ್ನೇಹ ಸೌಹಾರ್ದತೆಗ್ ಮಾದರಿ ಪಂದ್ ಸಿರೋ-ಮಲಬಾರ್ ಬೊಲ್ತೇರ್ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷೆರ್ ಬಿಷಪ್ ಲಾರೆನ್ಸ್ ಮುಕುಝಿ ಪಂಡೆರ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ನಡತೊಂದು ಇಪ್ಪುನ ಐತಿಹಾಸಿಕ ದಸರಾ ಉಚ್ಚಯಡ್ ಸೋಮಾರ ಪಾಲ್ ಪಡೆದ್ ದೇವೆರೆನ ದರ್ಶನ ಪಡೆದ್ ಕ್ಷೇತ್ರದ ಬಗೆಟ್ಟ್ ಕುಷಿನ್ ಪಟ್ಟೊಂಡೆರ್.
ಕುದ್ರೋಳಿ ಕ್ಷೇತ್ರದ ಪರವಾದ್ ಗುರ್ಕಾರೆ ಎಚ್.ಎಸ್.ಸಾಯಿರಾಂ, ಪ್ರಧಾನ ಕಾರ್ಯದರ್ಶಿ ಮಾಧವ ಸುವರ್ಣ, ಕೋಶಾಧಿಕಾರಿ ಪದ್ಮರಾಜ್ ಆರ್., ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಗುರ್ಕಾರೆ ದೇವೇಂದ್ರ ಪೂಜಾರಿ, ಸದಸ್ಯೆರ್ ರಾಧಾಕೃಷ್ಣ, ಬೊಂಬೈ ಭಾರತ್ ಕೋ ಆಪರೇಟಿವ್ ಬ್ಯಾಂಕ್ ದ ಚೇರ್ಮನ್ ಸೂರ್ಯಕಾಂತ್ ಜೆ. ಸುವರ್ಣ ಬತ್ತಿ ಬಿನ್ನೆರೆನ್ ಎದ್ಕೊನಿಯೆರ್.
ಕಂಕನಾಡಿ ಆಲ್ಫೋನ್ಸ್ ಚರ್ಚ್ ಧರ್ಮಗುರು ಫಾ.ಮಾಣಿ, ಬೊಲ್ತೇರ್ ಧರ್ಮಪ್ರಾಂತ್ಯ ಪಿಆರ್‌ಓ ಸೆಬಾಸ್ಟಿಯನ್ ಕೆ.ವಿ ಈ ಪೊರ್ತುಡು ಇತ್ತೆರ್.
ಬೆದ್ರ: ಪ್ರೆಸ್ ಕ್ಲಬ್ ದ ಮಾಜಿ ಗುರ್ಕಾರೆ, ಜಯಕಿರಣ ಪತ್ರಿಕೆದ ಬೆದ್ರ ತಾಲೂಕ್ ವರದಿಗಾರೆ ಬೊಕ್ಕ ಯುವ ನ್ಯಾಯವಾದಿ ವೇಣುಗೋಪಾಲ (30) ಮೇರ್ ಇನಿ ತಿಗಲೆ ಬೇನೆಡ್ ತೀರ್ ಪೋಯೆರ್.
ಸಚ್ಚೇರಿಪೇಟೆದ ಆನಂದ ಪೂಜಾರಿ ಮೆರೆನ ಮಗೆ ಆಯಿನ ವೇಣುಗೋಪಾಲ ಮೇರ್ ಪತ್ರಿಕಾ ಕ್ಷೇತ್ರಡ್ ಮಾತ್ರ ಅತ್ತಂದೆ ಸಾಂಸ್ಕೃತಿಕ ಬೇತೆ ಬೇತೆ ಕ್ಷೇತ್ರಡ್ ಕೆಲಸ ಮಲ್ದೆರ್.
ಮೆರೆನ ಸಾವುಗ್ ಬೆದ್ರ ತಾಲೂಕ್ ಕಾರ್ಯನಿರತ ಪತ್ರಕರ್ತರೆನ ಸಂಘ, ಬೆದ್ರ ವಕೀಲೆರೆನ ಸಂಘ, ಬೊಕ್ಕ ಜಿಲ್ಲಾ ಪತ್ರಕರ್ತೆರೆನ ಸಂಘ ಸಂತಾಪ ತೆರಿಪಾದೆರ್.
