ಮೈಸೂರ್ : ಇಲ್ಲದ ಜಾಲ್ ಡ್ ದೀದಿತ್ತಿನ ಶೂತ್ತ ಉಲಯಿ ಉಚ್ಚು ಸೇರ್ದಿತ್ತ್ ದ್ ಶೂ ಪಾಡರೆ ಪೋನಗ ಜಿಡೆ ದೆರ್ತಿನ ಘಟನೆ ನಡತ್ ದ್ಂಡ್.
ಇಲ್ಲದಾರ್ ಶೂ ಪಾಡಿಯೆರೆ ಪೋನಗ ಅಯಿಟ್ ಉಚ್ಚು ಇಪ್ಪುನೆನ್ ತೂದು ಬೊಬ್ಬೆ ಪಾಡ್ದೆರ್. ಇಲ್ಲಲ್ ದಕುಲ್ ಪೋಡಿದ್ ಪಿದಯಿ ಬತ್ತ್ಂದ್ ತೂನಗ ಉಚ್ಚು ಪಿದಯಿ ಬತ್ತ್ಂದ್ ಜಿಡೆ ದೆತ್ತ್ ದ್ ಇತ್ತ್ಂಡ್.
ಉಚ್ಚು ಪತ್ತುನಕುಲೆನ್ ಇಲ್ಲಡೆ ಲೆತ್ತ್ ದ್ ಅವೆನ್ ಬೇತೆ ಕಡೆಕ್ಕ್ ಬುಡ್ತೆರ್.
ಇಂಚಿಪ್ಪದ ದಿನೊಕ್ಲೆಡ್ ಇಂಚಿನ ಮಸ್ತ್ ಘಟನೆಲು ನಡತೊಂದುಂಡು. ಅಂಚಾದ್ ಮಾತೆರ್ಲ ಜಾಗ್ ರ್ತೆಡ್ ಉಪ್ಪೊಡು.
ಧಾರವಾಡ: ಡಿವೈಡರ್ ಗ್ ಕಾರ್ ಗುದ್ದುದು ಮುನವಳ್ಳಿ ಯುವ ಕಾಂಗ್ರೆಸ್ ಘಟಕದ ಅಧ್ಯಕ್ಷೆರ್ ಯಶವಂತ ಯಲಿಗಾರ ( 25) ಬೊಕ್ಕ ಅರೆನ ದೋಸ್ತಿ ತೀರ್ ಪೊಯಿನ ಘಟನೆ ಬೆಳಗಾವಿಡ್ ನಡುರಾತ್ರೆ ನಡದ್ಂಡ್.
ಕರಿನ ರಾತ್ರೆ ಯಶವಂತ್ ಬೊಕ್ಕ ಅರೆನ ದೋಸ್ತಿ ಅಕ್ಷಯ ವಿಜಯ ಕಡಕೋಡ (25) ಕಾರ್ ಡ್ ಬನ್ನಗ ಕಾರ್ ಮಾರ್ಗದ ವಿಭಜಕಗ್ ಗುದ್ದುದು ಪಲ್ಟಿ ಆತ್ಂಡ್. ಈ ಘಟನೆಡ್ ರಡ್ಡ್ ಜನಲ ತೀರ್ ಪೋತೆರ್.
ಶಾಸಕೆರ್ ಆನಂದ್ ಮಾಮನಿ, ಸಿಪಿಐ ಶ್ರೀಮಂತ ಇಲ್ಲಾಳ ಜಾಗೆಗ್ ಬೇಟಿ ಕೊರ್ತೆರ್.
ಬಂಟ್ವಾಳ : ಶಾಸಕೆರ್ ರಾಜೇಶ್ ನಾಯ್ಕ್ ಉಳಿಪ್ಪಾಡಿಗುತ್ತು ಮೇರ್ನ ಅಪ್ಪೆ, ಶ್ರೀ ಕ್ಷೇತ್ರ ಪೊಳಲಿದ ಮಾಜಿ ಮೊಕ್ತೇಸರೆರ್ ಆದಿತ್ತಿನ ದಿ.ರಮೇಶ್ ನಾಯ್ಕ್ ಉಳಿಪ್ಪಾಡಿಗುತ್ತು ಮೇರ್ನ ಧರ್ಮಪತ್ನಿ ಸರೋಜಿನಿ ಆರ್ ನಾಯ್ಕ್ (90) ಕೋಡೆ ತೀರ್ ಪೋತೆರ್.
ಇನಿ ಕಾಂಡೆ ಒಡ್ಡೂರು ಫಾರ್ಮ್ಸ್ ಡ್ ಅರೆನ ಕಡೆತ ವಿಧಿ ನಡಪರೆ ಉಂಡು.
ಇರುವೈಲ್ : ಸುಮಾರ್ ವರ್ಷೊರ್ದಿಂಚ ಕಂಬುಲದ ಕಲಟ್ಟ್ ಭಾರಿ ಮಲ್ಲ ಪುದರ್ ಪಡೆಯಿನ ಕಂಬುಲ ಕ್ಷೇತ್ರದ ಯಜಮಾನೆರ್ ಇರುವೈಲು ಪಾಣಿಲ ಬಾಡ ಪೂಜಾರಿ ಮೇರ್ ದೇವೆರೆ ಪಾದ ಸೇರಿಯೆರ್.
ಭಾರಿ ವರ್ಷೊರ್ದಿಂಚಿ ಕಂಬುಲದ ಕಂಡೊಗು ಎರ್ಲೆನ್ ಜಪುಡಾವೊಂದಿತ್ತಿನ ಮೇರ್ 23 ರ್ದ್ ಲ ಎಚ್ಚ ಪ್ರಶಸ್ತಿಲೆನ್ , ಮಾನಾದಿಗೆನ್ ಪಡೆತೆರ್.
ಅರೆನ ಆತ್ಮೊಗು ಶಾಂತಿ ತಿಕ್ಜಡ್ ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಯುವ ನಾಯಕೆರ್ ಮಿಥುನ್ ರೈ, ವಸಂತ ಬೆರ್ನಾಡ್ ದೇವೆರೆನ್ ಸುಗಿತ್ತೆರ್.
ಸುರತ್ಕಲ್: ಅ. 16ದಾನಿ ನಡಪರೆ ಇಪ್ಪುನ ತುಳು ದಿಬ್ಬನದ ಅಟ್ಟಣೆದ ಸಭೆ ಸುರತ್ಕಲ್ ದ ಬಿಜೆಪಿ ಯುವ ಮೋರ್ಚಾ ಕಚೇರಿಡ್ ನಡತ್ಂಡ್.
ಬಿಜೆಪಿ ಯುವ ಮೋರ್ಚಾ ಕುಡ್ಲ ಪೇಂಟೆದ ಉತ್ತರ ಮಂಡಲ ಬೊಕ್ಕ ಜೈ ತುಳುನಾಡ್ ಸಮಿತಿದ ವತಿರ್ದ್ ತುಳು ಲಿಪಿ ಶಂಶೋಧಕೆರ್ ಡಾ /ಪುಂಡೂರು ವೆಂಕಟರಾಜ ಪುಣಿಂಚಿತ್ತಾಯೆರೆನ ಪುಟ್ಟು ದಿನತ ನೆಂಪುಗಾದ್ ಆಚರಣೆ ಮಲ್ಪುನ ವಿಶ್ವ ತುಳು ಲಿಪಿ ದಿನತ ಅಂಗವಾದ್ ಅ 16 ದಾನಿ ಬೊಲ್ಪುಗು 9.30 ಕ್ ಸುರತ್ಕಲ್ ಗೋವಿಂದದಾಸ ಕಾಲೇಜ್ ದ ಎದುರು ಮೆರವಣಿಗೆನ್ ಉದಿಪನ ಮಲ್ತ್ ದ್, ಬೊಕ್ಕ ರಾಜ್ಯ ಮಾರ್ಗಡ್ ಮೆರವಣಿಗೆ ಪೋದು ಸುರತ್ಕಲ್ ಜಂಕ್ಷನ್ ದ ಕರ್ನಾಟಕ ಸೇವಾ ವೃಂದಡ್ ಮುಗಿಪುಂಡು.
ಈ ಮೆರವಣಿಗೆಡ್ ತುಳು ಲಿಪಿ ಅಕ್ಷರ, ತುಳು ಅಪ್ಪೆನ ಭಾವಚಿತ್ರ, ತುಳು ಧ್ವಜದೊಟ್ಟಿಗೆ ಮೆರವಣಿಗೆ ನಡಪುಂಡು ಪಂದ್ ಸಭೆಟ್ ತೀರ್ಮಾನ ಆಂಡ್.
ಅಂಚನೆ ಈ ಪೊರ್ತುಡು ಜೈ ತುಳುನಾಡ್ ಸಮಿತಿದ ಸದಸ್ಯೆರ್ ಕಿರಣ್ ತುಳುವೆ ಪುಂಡೂರು ವೆಂಕಟರಾಜ ಪುಣಿಂಚಿತ್ತಾಯೆರ್ ನ ತುಳು ಲಿಪಿತ ಬಗೆಟ್ ಮಾಹಿತಿ ಕೊರಿಯೆರ್.
ಮ ನ ಪಾ ಸದಸ್ಯೆರ್ ವರುಣ್ ಚೌಟ, ಮೋರ್ಚಾ ಅಧ್ಯಕ್ಷೆರ್ ಭರತ್ ರಾಜ್ ಕೃಷ್ಣಾಪುರ ಲೇಸ್ ದ ಬಗೆಟ್ ಪಾತೆರಿಯೆರ್.
ಈ ಪೊರ್ತುಡು ಮ ನ ಪಾ ಸದಸ್ಯೆರಾಯಿನ ಮನೋಜ್ ಕುಮಾರ್ ಕೋಡಿಕಲ್, ಶ್ವೇತಾ ಪೂಜಾರಿ, ಬಿಜೆಪಿ ಪ್ರಮುಖೆರ್ ಪುಷ್ಪರಾಜ್ ಮುಕ್ಕ, ಮಹಿಳಾ ಪ್ರಮುಖ್ ಪವಿತ್ರ ನಿರಂಜನ್, ಜೈ ತುಳುನಾಡ್ ಸಮಿತಿದ ಸದಸ್ಯೆರ್ ರಕ್ಷಿತ್ ಕೋಟ್ಯಾನ್, ವಿನಯ್ ರೈ, ದೀಕ್ಷಿತ ಮಧ್ಯ, ಶ್ವೇತ ಶೆಟ್ಟಿ, ದುರ್ಗಾಪ್ರಸಾದ್ ರೈ, ಯುವ ಮೋರ್ಚಾ ಸದಸ್ಯೆರ್ ಇತ್ತೆರ್.
ಕುಡ್ಲ : ನಾಪತ್ತೆ ಆದಿತ್ತಿನ ಉಳ್ಳಾಲ ಚೆಂಬುಗುಡ್ಡೆದ ಝಾಕಿರ್ (36) ಮಂಜೇಶ್ವರ ಕಡಲ್ ದ ಬರಿಟ್ ಪುಣ ಆದ್ ತಿಕ್ಕಿನ ಘಟನೆ ನಡತ್ಂಡ್.
ಮೇರ್ ಸೆ.26 ದಾನಿ ತೊಕ್ಕೊಟ್ಟ್ ಗು ಪೋದು ಬರ್ಪೆ ಪಂದ್ ಇಲ್ಲರ್ದ್ ಪೋಯಿನಾರ್ ಪಿರ ಇಲ್ಲಡೆ ಬರಂದೆ ಮಂಜೇಶ್ವರದ ಕಡಲ್ ಡ್ ಪುಣ ಆದ್ ತಿಕ್ಕ್ ದೆರ್.
ಅರೆನ ಪುಣನ್ ಮಂಗಲ್ಪಾಡಿ ಸರ್ಕಾರಿ ಆಸ್ಪತ್ರೆದ ಶವಾಗಾರಡ್ ದೀದ್ ಇತ್ತೆರ್. ಈ ಘಟನೆ ಸುಮಾರ್ ಅನುಮಾನಗ್ ಕಾರಣ ಆತ್ಂಡ್. ಅಂಚನೆ ನೆತ್ತ ಬಗ್ಗೆ ಪರಿಚಯಸ್ಥೆರ್ ಮಂಜೇಶ್ವರ ಇಜ್ಜಿನ್ಂಡ ಕುಂಬ್ಳೆ ಪೊಲೀಸ್ ಠಾಣೆಡ್ ಕೆನೋಲಿ ಪಂದ್ ಪ್ರಕಟಣೆಡ್ ತೆರಿಪಾದಿತ್ತೆರ್. ಆಂಡ ಒಂಜಿ ವಾರದ ಬೊಕ್ಕ ಇಲ್ಲಲ್ ದಕುಲೆಗ್ ವಿಷಯ ತೆರಿದ್ ಗುರ್ತ ಪತ್ ದೆರ್.
ಪಶ್ಚಿಮ ಬಂಗಾಳ : ಮುಲ್ತ ದಿಘಾ ಮೀನ್ ಮಾರ್ಕೆಟ್ ಡ್ ಸುಮಾರ್ 1 ಕೋಟಿ ರೂ.ಬಿಲೆತ್ತ 22 ತೇಲಿಯಾ ಭೋಲಾ ಮೀನುಲು ಮಾರಾಟೊಗು ಬೈದ.
ಈ ಮಲ್ಲ ಮೀನ್ ಲೆನ್ ತೂಯೆರೆ ಮಸ್ತ್ ಜನ ಪ್ರವಾಸಿಗೆರ್ ಬೊಕ್ಕ ಮೀನ್ ವ್ಯಾಪಾರಿಲು ಬೈದೆರ್.
ಪ್ರತಿ ಮೀನ್ ದ ತೂಕ 20-22 ಕೆ.ಜಿ. ಉಂಡು. ಕೋಲ್ಕತ್ತಾದ ಕಂಪನಿ ಒಂಜೆಟ್ ಈ ಮೀನ್ ಗ್ ಪ್ರತಿ ಕೆಜಿಗ್ 14,800 ರೂ. ಉಂಡು. ಈ ಮೀನ್ಲೆನ್ ವಿದೇಶೊಗು ರಫ್ತು ಮಲ್ಪುವೆರ್. ಅಂಚನೆ ಈ ಮೀನ್ ಡ್ ಸುಮಾರ್ ಎಚ್ಚ ಕಾಸ್ದ್ ಜೂವರಕ್ಷಕ ಮರ್ದ್ ಲೆನ್ ತಯಾರ್ ಮಲ್ಪುವೆರ್. ಅಂಚಾದ್ ಭೋಲಾ ಮೀನ್ ಲೆಗ್ ಬಿಲೆ ಜಾಸ್ತಿ.
ಬೆಂಗ್ಲೂರ್ : ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮುತಾಲಿಕೆಡ್ ಭಾರತ್ ಜೋಡೋ ಯಾತ್ರೆ ನಡತೊಂದು ಇಪ್ಪುನ ಪೊರ್ತುಡು ನಟೆ, ರಾಜಕಾರಣಿ ಪ್ರಕಾಶ್‌ ರಾಜ್ ಕಾಂಗ್ರೆಸ್ ಸೇರ್ಯೆರೆ ಉಲ್ಲೆರ್.
ನೆರ್ದ್ ದುಂಬು ಪ್ರಕಾಶ್‌ ರೈ ಬೆಂಗ್ಲೂರ್ ಕೇಂದ್ರ ಲೋಕಸಭಾ ಕ್ಷೇತ್ರಡ್ ಪಕ್ಷೇತರ ಅಭ್ಯರ್ಥಿಯಾದ್ ವೋಟುಗು ಉಂತುದಿತ್ತೆರ್. ಅಂಚನೆ ಕಾಂಗ್ರೆಸ್ ದ ಸೈದ್ಧಾಂತಿಕ ಬದ್ಧತೆನ್ ಮೆಚ್ಚ್ ದ್ ಪಕ್ಷ ಸೇರೊಂದು ಉಲ್ಲೆ ಪಂದ್ ಪಂಡೆರ್.
ಪಾಲಡ್ಕ : ಪಾಲಡ್ಕ ಗ್ರಾಮ ಪಂಚಾಯತ್ ವ್ಯಾಪ್ತಿದ ಕಡಂದಲೆ ಗ್ರಾಮಡ್ 400/220 ಕೆ.ವಿ ದ ಕರೆಂಟ್ ಕೇಂದ್ರ ಸ್ಥಾಪನೆ ಮಲ್ಪುನ ಬಗೆಟ್ ಸಾರ್ವಜನಿಕೆರೆನ ಮಾಹಿತಿಗಾದ್ ಅ.10 ಕ್ಕ್ ಅಟ್ಟಣೆ ಮಲ್ದಿನ ಇಸೇಸ ಗ್ರಾಮಸಭೆನ್ ಅನಿವಾರ್ಯ ಕಾರಣರ್ದ್ ಅ.11 ಕ್ ದುಂಬು ಕೊನೊತೆರ್.
ಈ ಸಭೆ ಶ್ರೀ ನಾರಾಯಣ ಗುರು ಸಭಾಭವನ ಪೂಪಾಡಿಕಲ್ಲ್ ಮೂಲು ನಡಪರೆ ಉಂಡು. ಈ ಸಭೆಕ್ ಗ್ರಾಮಸ್ಥೆರ್ ಹೆಚ್ಚಿನ ಸಂಖ್ಯೆಡ್ ಸೇರೊಡು ಪಂದ್ ಗ್ರಾಮ ಪಂಚಾಯತ್ ಪಾಲಡ್ಕದ ಅಧ್ಯಕ್ಷೆರ್, ಉಪಾಧ್ಯಕ್ಷೆರ್, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಬೊಕ್ಕ ಸರ್ವಸದಸ್ಯೆರ್, ಸಿಬ್ಬಂದಿ ವರ್ಗದಕುಲ್ ಲೆಪ್ಪೋಲೆಡ್ ತೆರಿಪಾದೆರ್.
ತುಮಕೂರ್ : ಕಾಂಗ್ರೆಸ್ ಅಧ್ಯಕ್ಷೆ ಚುನಾವಣೆಡ್ ಭಾಗವಹಿಸುನ ಮಲ್ಲಿಕಾರ್ಜುನ ಖರ್ಗೆ ಬೊಕ್ಕ ಶಶಿ ತರೂರ್ ನೆಟ್ಟ್ ಏರ್ ಗೆಂದ್ಂಡಲ ಅಕುಲ್ ಪಕ್ಷಡ್ ಸ್ವತಂತ್ರವಾದ್ ಇಪ್ಪುವೆರೆ ಹೊರತು ರಿಮೋಟ್ ಕಂಟ್ರೋಲರ್ ಆಪುಜೆರ್ ಪಂದ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಭಾರತ ಜೋಡೋ ಯಾತ್ರೆ ತುಮಕೂರ್ ಎತ್ತಿನ ಪೊರ್ತುಡು ಸುದ್ದಿಗೋಷ್ಠಿಡ್ ಪಂಡೆರ್.
ಖರ್ಗೆ ಎಐಸಿಸಿ ಅಧ್ಯಕ್ಷೆರಾಂಡ ಅರ್ ಸೋನಿಯಾ ಗಾಂಧಿನ ರಿಮೋಟ್ ಕಂಟ್ರೋಲರ್ ಆಪೆರ್ ಪನ್ಪುನ ಬಿಜೆಪಿದ ಟೀಕೆಗ್ ರಾಹುಲ್ ಗಾಂಧಿ ಈ ಪಾತೆರ ಪಂಡೆರ್ .
