ಕಟಪಾಡಿ: ಮಟ್ಟ್ ದಲ್ಪ ಕಡಲ್ ಡ್ ಸುಕ್ರಾರ ಕಾಂಡೆ ಬೂತಾಯಿ ಮೀನ್ ದ ಸುಗ್ಗಿಯೇ ಸುಗ್ಗಿ !!
ಹನುಮ ದೀಕ್ಷಾ ಕೈರಂಪಣಿ ಮೀನುಗಾರಿಕೆದ ಪೊರ್ತುಡು ಮಸ್ತ್ ಬೂತಾಯಿ ಮೀನ್ ನ್ ಬಲೆಟ್ ಪತ್ತ್ ದೆರ್. ಸುಮಾರ್ ನಾಲ್ ಟನ್ ದಾತ್ ಮೀನ್ ತಿಕ್ಕಿನ ಕಾರಣ ಮೀನ್ ದ ಸುಗ್ಗಿಯೇ ತಿಕ್ಕಿಲೆಕಾತ್ಂಡ್. ಸುದ್ದಿ ಕೇನ್ದ್ ಕೈತಲ್ ದ ಜನಕುಲು ಆ ಜಾಗೆಗ್ ಭಾರಿ ಸಂಖ್ಯೆಡ್ ಬೈದೆರ್.
ಕುಡ್ಲ : ಕರ್ನಾಟಕ ವಿಧಾನಸಭೆತ್ತ ವಿರೋಧಪಕ್ಷದ ಉಪನಾಯಕೆರ್, ಉಲ್ಲಾಳ ಶಾಸಕೆರ್ ಯು.ಟಿ.ಖಾದರ್ ಮೆರೆನ್ ಹಿಮಾಚಲ ಪ್ರದೇಶದ 18 ಧರ್ಮಶಾಲಾ ವಿಧಾನಸಭೆ ಕ್ಷೇತ್ರದ ವೋಟುದ ವೀಕ್ಷಕೆರಾದ್ ಅಖಿಲ ಭಾರತ ಕಾಂಗ್ರೆಸ್ ಕಮಿಟಿ(ಎಐಸಿಸಿ) ನೇಮಕ ಮಲ್ದ್ಂಡ್.
ಎಐಸಿಸಿಸಿದ ಹಿಮಾಚಲಪ್ರದೇಶ ಉಸ್ತುವಾರಿ, ಸಂಸದೆರ್, ಕೇಂದ್ರದ ಮಾಜಿ ಸಚಿವೆರ್ ರಾಜೀವ್ ಶುಕ್ಲಾ ಮೇರ್ ಯು.ಟಿ.ಖಾದರ್ ಮೆರೆನ್ ನೇಮಕ ಮಲ್ದೆರ್.
ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆದ 18 ಧರ್ಮಶಾಲೆ ವಿಧಾನಸಭಾ ಕ್ಷೇತ್ರೊಗು ನಡಪುನ ವೋಟುದ ಪೊರ್ತುಡು ಖಾದರ್ ಮೇರ್ ಎಡ್ಡೆ ಬೇಲೆ ಮಲ್ಪುವೆರ್ ಪನ್ಪಿನ ವಿಶ್ವಾಸೊಡು ನೇಮಕ ಮಲ್ತ್ ದ ಪಂದ್ ಶುಕ್ಲಾ ತೆರಿಪಾದೆರ್.
ಕುಡ್ಲ: ದುಷ್ಕರ್ಮಿಲೆನ ಗುಂಪೊಂಜಿ ಬೊಲ್ತೇರ್ ಶಾಸಕೆ ಹರೀಶ್ ಪೂಂಜಾ ಅರೆನ ಕಾರ್ ನ್ ಅಡ್ಡಕಟ್ಟ್ ದ್ ತಲ್ವಾರ್ ಬೀಜಿನ ಘಟನೆ ಅ.13 ದಾನಿ ರಾತ್ರೆ ಸುಮಾರ್ 2 ಗಂಟೆದ ಪೊರ್ತುಡು ಫರಂಗಿಪೇಟೆಡ್ ನಡತ್ಂಡ್.
ಶಾಸಕೆರ್ ಬೆಂಗ್ಲೂರ್ ರ್ದ್ ಕುಡ್ಲಗ್ ಬತ್ತ್ ದ್, ಕುಡ್ಲರ್ದ್ ಬೊಲ್ತೇರ್ ಗ್ ಆರ್ ತನ್ನ ಕಾರ್ ದ ಬದಲ್ ಸಂಬಂಧದಾರ್ನ ಕಾರ್ ಡ್ ಬರೋದು ಇತ್ತೆರ್. ಈ ಪೊರ್ತುಡು ದುಷ್ಕರ್ಮಿಲು ಪಡೀಲ್ರ್ದ್ ಫರಂಗಿಪೇಟೆ ಮುಟ್ಟ ಕಾರ್ ನ್ ಬೆರಿಪತೊಂದು ಬತ್ತ್ ದ್ ಫರಂಗಿಪೇಟೆ ಡ್ ಕಾರ್ ಅಡ್ಡಕಟ್ಟ್ ಡ್ ಬೊರ್ಚಾಂದಿನ ಶಬ್ದಲೆರ್ದ್ ನೆರ್ದ್, ತಲ್ವಾರ್ ಬೀಜಿ ದ್ ಬಲಿತೆರ್.
ಈ ಬಗೆಟ್ ಶಾಸಕೆರ್ ಪೂಂಜಾ ಬೊಕ್ಕ ಕಾರ್ ಚಾಲಕೆರ್ ನವೀನ್ ಮೊಕುಲು ಬಂಟ್ವಾಳ ಗ್ರಾಮಾಂತರ ಠಾಣೆಡ್ ದೂರು ಕೊರ್ತೆರ್.
ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ ಮರೋಳಿ ಶ್ರೀ ಸೂರ್ಯನಾರಾಯಣ ದೇವಲ್ಯದ ಕೈತಲ್ ದ ಇಪ್ಪುನ ಮಾರ್ಗ ದ ಬೇಲೆ ಬೊಕ್ಕ ತಡೆಗೋಡೆ ಕಟ್ಟಾವುನ ಬೇಲೆಗ್ ಶಾಸಕೆರ್ ವೇದವ್ಯಾಸ್ ಕಾಮತ್ ಕೆಸರ್ ಕಲ್ಲ್ ಪಾಡಿಯೆರ್.
ಈ ಪೊರ್ತುಡು ಪಾತೆರ್ನ ಶಾಸಕೆರ್, ಈ ಭಾಗದ ಜನಕ್ಲೆನ ಬೇಡಿಕೆದಂಚನೆ ಕಾಮಗಾರಿಗ್ ಅನುದಾನ ಬಿಡುಗಡೆ ಆತ್ಂಡ್. ಬೋಗೊಡೆ ನೆತ್ತ ಬೇಲೆಲ ಸುರು ಆಪುಂಡು. ಇತ್ತೆ ನೆಟ್ಟೆ ಎಲ್ಯ ಮಾರ್ಗ ಇಪ್ಪುನೆರ್ದಾವೆರ ಗಾಡಿ ಪೋಯೆರೆಗ್ ಭಂಗ ಆಪುಂಡು. ಅಂಚಾದ್ ಮಾರ್ಗ ಅಗೆಲ ಮಲ್ತ್ ದ್, ತಡೆಗೋಡೆ ಮಲ್ಪುನ ಯೋಜನೆ ಉಂದು ಪಂದ್ ಪಂಡೆರ್.
ಈ ಪೊರ್ತುಡು ಮೇಯರ್ ಜಯಾನಂದ ಅಂಚನ್, ಪಾಲಿಕೆ ಸ್ಥಾಯಿ ಸಮಿತಿ ಅಧ್ಯಕ್ಷೆರ್ ಕಿಶೋರ್ ಕೊಟ್ಟಾರಿ, ಕಾರ್ಪೋರೇಟರ್ ಕೇಶವ ಮರೋಳಿ, ನಾಮನಿರ್ದೇಶಿತ ಸದಸ್ಯೆರ್ ಭಾಸ್ಕರ್ ಚಂದ್ರ ಶೆಟ್ಟಿ, ರಮೇಶ್ ಕಂಡೆಟ್ಟು, ಬಿಜೆಪಿ ಮುಖಂಡೆರಾಯಿನ ಜಗದೀಶ್ ಶೆಣೈ, ಕೃಷ್ಣ ಎಸ್.ಆರ್, ಜನಾರ್ದನ್ ದೇವಾಡಿಗ, ಜಗನ್ನಾಥ ದೊಡ್ಡಮನೆ, ಸರಳ ಕುಲಾಲ್, ಅರುಣ್ ಶೆಟ್ಟಿ, ಪುರುಷೋತ್ತಮ ಕೋಟ್ಯಾನ್, ಕಿರಣ್ ದೇವಾಡಿಗ ಮರೋಳಿ, ಪ್ರಶಾಂತ್ ಮರೋಳಿ, ಅನಿತಾ ಅರುಣ್, ಮಾಲತಿ ಅರುಣ್ ಶೆಟ್ಟಿ, ರಾಜೇಶ್, ಪ್ರಮೀಳಾ ಶೆಟ್ಟಿ, ಲೀಲಾ ಸತೀಶ್, ರಾಘವೇಂದ್ರ ಶೆಣೈ ಇತ್ತೆರ್.
ಕುಡ್ಲ: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನೆತ್ತ ಮುತಾಲಿಕೆಡ್ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಬಯಲು ರಂಗ ಮಂದಿರದ ಲೋಕಾರ್ಪಣೆ ಲೇಸ್ ಅ.14 ಸುಕ್ರಾರ ಕಾಂಡೆ 10 ಗಂಟೆಗ್ ಉರ್ವಸ್ಟೋರ್ ದ ತುಳುಭವನಡ್ ನಡಪರೆ ಉಂಡು.
ಈ ಲೇಸ್ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಕುಡ್ಲದ ಗುರ್ಕಾಲು ಮಟ್ಟಾರ್ ರತ್ನಾಕರ ಹೆಗ್ಡೆ ಮೇರ್ನ ಗುರ್ಕಾರ್ಮೆಡ್ ನಡಪುಂಡು. ಕುಡ್ಲ ಲೋಕಸಭಾ ಕ್ಷೇತ್ರದ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಉದಿಪನ ಮಲ್ಪರೆ ಉಲ್ಲೆರ್. ತೆನ್ಕಾಯಿ ಕುಡ್ಲ ಕ್ಷೇತ್ರದ ಶಾಸಕೆರ್ ವೇದವ್ಯಾಸ ಕಾಮತ್ ಮಾನಾದಿಗೆದ ಮದಿಪು ಕೊರಿಯರೆ ಉಲ್ಲೆರ್. ಮೇಯರ್ ಜಯಾನಂದ ಅಂಚನ್ “ಮದಪೆರಾವಂದಿನ ತುಳುವೆರ್” ಬೂಕು ಬುಡುಗಡೆ ಮಲ್ಪುವೆರ್. ಕಾರ್ಪೊರೇಟರ್ ಗಣೇಶ್ ಕುಲಾಲ್ ಮಲ್ಲ ಬಿನ್ನೆರಾದ್ ಬರ್ಪೆರ್.
ಸಾಹಿತಿ ಬೊಕ್ಕ ಸಂಶೋಧಕೆರ್ ಆಯಿನ ಡಾ.ಸದಾನಂದ ಪೆರ್ಲ ಮೇರೆಗ್ ಮಾನಾದಿಗೆ ನಡಪುಂಡು. ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾಲು ದಯಾನಂದ ಜಿ.ಕತ್ತಲ್ ಸಾರ್ ಬಿನ್ನೆರೆನ್ ಎದುಕೊನುವೆರ್.
ಅಂಚನೆ ತುಳುನಾಡ್ ದ ಸಂಸ್ಕೃತಿ-ಸಂಸ್ಕಾರದ ದಾಖಲೀಕರಣ ಮಲ್ತಿನ ನಮ್ಮ ಕುಡ್ಲ, ನಮ್ಮ ಟಿ.ವಿ, ವಿ4, ಚಾನೆಲ್ 9, ದೈಜಿವರ್ಲ್ಡ್, ಚಾನೆಲ್ ದಕ್ಲೆಗ್ ಮಾನಾದಿಗೆ ನಡಪರೆ ಉಂಡು. ಈ ಲೇಸ್ ಗ್ ರಿಜಿಸ್ಟ್ರಾರ್ ಕವಿತ, ಗುರ್ಕಾರ್ಲು ದಯಾನಂದ ಜಿ.ಕತ್ತಲ್ ಸಾರ್ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾತಾ ಪದುಕೆರ್ ಮಾತೆರೆನ್ಲಾ ಮೋಕೆಡ್ ಎದ್ಕೊಂದೆರ್.
ಕುಡ್ಲ : ಕುಡ್ಲ ಬಂದರ್ ದ ಕೇಂದ್ರ ಕೈಗಾರಿಕಾ ಭದ್ರತಾ ಪಡೆತ್ತ ಪಿಎಸ್ಐ ಆದ್ ಬೇಲೆ ಮಲ್ತೊಂದು ಇತ್ತಿನ ಜ್ಯೋತಿಬಾಯಿ ತನ್ನ ಮಿತ್ತ್ ಗುಂಡು ಪಾಡೊಂದು ಸೈಯರೆ ತೂಯಿನ ಘಟನೆ ಎನ್ ಎಮ್ ಪಿಟಿ ದ ಮಲ್ಲ ಗೇಟ್ದ ಕೈತಲ್ ನಡತ್ಂಡ್.
ಮೇರ್ ಸೈಯೆರೆ ತೂಪುನ ದುಂಬೇ ಅಪ್ಪೆಗ್ ಬರೆಯಿನ ಡೆತ್ ನೋಟ್ ತಿಕ್ ದ್ಂಡ್. ಆಯಿಟ್ “ಸ್ಸಾರಿ ಅಮ್ಮ, ಯಾನ್ ಎನ್ನ ಇಷ್ಟದಂಚನೆ ಸೈಪುನೇ, ನೆಕ್ ಏರ್ನಲ ಒತ್ತಡ ಇಜ್ಜಿ” ಪಂದ್ ಬರೆತೆರ್.
ಸದ್ಯ ಮಸ್ತ್ ಪೆಟ್ಟಾಯಿನ ಮೇರೆನ್ ಎಜೆ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್, ಚಿಕಿತ್ಸೆ ನಡತೊಂದು ಉಂಡು. ಮೇರ್ನ ಕಂಡನಿ ಓಂಬೀರ್ ಸಿಂಗ್ ಪರ್ಮಾರ್ ಎಮ್ ಆರ್ ಪಿಎಲ್ ಡ್ ಅಸಿಸ್ಟೆಂಟ್ ಕಮಾಂಡೆಂಟ್ ಆದ್ ಬೇಲೆ ಮಲ್ತೊಂದು ಉಲ್ಲೆರ್.
ಮೊಕುಲು ಕಂಡನಿ ಬೊಡೆದಿ ರಡ್ಡ್
ಜನಲ ರಾಜಸ್ತಾನದ ಭರತಪುರ ಜಿಲ್ಲೆದಕುಲು ಪಂದ್ ಕಮಿಷನರ್ ಶಶಿಕುಮಾರ್ ಮಾಹಿತಿ ಕೊರ್ತೆರ್.
ಒಡಿಪು: ಈ ಸರ್ತಿ ದೀಪಾವಳಿರ್ದ್ ಬೊಕ್ಕ ಲಕ್ಷದೀಪೋತ್ಸವದ ಸಮಯಡ್ ರಡ್ಡ್ ಅಪರೂಪದ ಗ್ರಹಣ ನಡಪರೆ ಉಂಡು ಪಂದ್ ಒಡಿಪುದ ಡಾ.ಎ.ಪಿ ಭಟ್ ತೆರಿಪಾದೆರ್.
ದೀಪಾವಳಿ ಪರ್ಬದ ದುಂಬುನಾನಿ (ಅ.25) ಪಾರ್ಶ್ವ ಸೂರ್ಯ ಗ್ರಹಣ ಆಂಡ, ಕಾರ್ತೀಕ ತಿಂಗೊಲ್ದ ಪುಣ್ಣಮೆದಾನಿ (ನ.8) ಪಾರ್ಶ್ವ ಚಂದ್ರ ಗ್ರಹಣ ಆಯರೆ ಉಂಡು. ಸೂರ್ಯ ಗ್ರಹಣ ಬಯ್ಯಗ್, ಚಂದ್ರಗ್ರಹಣ ಬೊಲ್ಪುಗು ಆಪುನೆರ್ದಾವೆರ ಈ ರಡ್ಡ್ ಗ್ರಹಣಲು ಭಾರತಗ್ ಮಸ್ತ್ ಅಪರೂಪವಾದುಂಡು. ಅ.25 ತ್ತ ಪಾರ್ಶ್ವ ಸೂರ್ಯ ಗ್ರಹಣ ಬಯ್ಯಗ್ 5.08ಕ್ ಸುರುವಾದ್ 6.29 ಕ್ ಮುಗಿಪುಂಡು. ಬೊಕ್ಕ ನ.8 ತ್ತ ಪಾರ್ಶ್ವ ಚಂದ್ರಗ್ರಹಣ ಪುಣ್ಣಮೆದ ಚಂದ್ರೆ ಮೂಡುನಗ ಕಾಂಡೆ 6 ಕ್ಕ್ ಸುರು ಆದ್ ಬಜಿ 19 ನಿಮಿಷ ಇಪ್ಪುಂಡು. ಬೊಕ್ಕ ಬಯ್ಯಗ್ 6.19 ಕ್ ಗ್ರಹಣ ಮುಗಿಪುಂಡು.
ಸೂರ್ಯ ಗ್ರಹಣದ ಪೊರ್ತುಡು ಸೂರ್ಯನ್ ಕಾಲಿ ಕಣ್ಣ್ ಡ್ ಏಪಲ ತೂಯರೆ ಬಲ್ಲಿ. ಆಂಡ ಚಂದ್ರ ಗ್ರಹಣದ ಪೊರ್ತುಡು ಚಂದ್ರ ನ್ ಕಾಲಿ ಕಣ್ಣ್ ಡ್ ತೂವೊಲಿ ಪಂದ್ ಆರ್ ಪಂಡೆರ್.
ಶಿಮಂತೂರ್ (ಮುಲ್ಕಿ) : ನಮ್ಮ ಸಂಸ್ಕೃತಿದ ಪ್ರತೀಕವಾಯಿನ ಭಜನೆ ಕಲೆತ ವೈಭವನ್ ನನದ ಪೀಳಿಗೆಗ್ ತೆರಿಪಾವುನ ಬೊಕ್ಕ ಅವೆನ್ ಒರಿಪುನ ದೃಷ್ಟಿ ಡ್ ಯುವಕ ಮಂಡಲ ಶಿಮಂತೂರ್(ರಿ.) ಮುತಾಲಿಕೆಡ್ ರಾಜ್ಯ ಮಟ್ಟದ ನಲಿಪು ಭಜನಾ ಪಂತ ಅ.30 ಗು ಶ್ರೀ ಆದಿ ಜನಾರ್ದನ ದೇವಲ್ಯಡ್ ನಡಪರೆ ಉಂಡು.
ಈ ಲೇಸ್ ಗ್ ಮತೆರ್ಲಾ ಬಂಧು ಮಿತ್ರೆರ್ ಬತ್ತ್ ದ್ ತನು ಮನ ಧನರ್ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡ್ ಪಂದ್ ಯುವಕ ಮಂಡಲ ಶಿಮಂತೂರ್ ದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಅಂಬ್ಲಮೊಗೆರ್ ಗ್ರಾಮದ ಬಾರ್ದಡ್ಕ ಪೋಪುನ ಸಾದಿಡ್ ಇಪ್ಪುನ ಸಂಕೊರ್ದು ಬೂರ್ದು ಅ.5 ದಾನಿ ಸುರೇಶ್ ಆಚಾರ್ಯ ತೀರ್ ಪೋಯೆರ್.
ಮುಲ್ಪದ ಕೆಲಸ ಸುಮಾರ್ ಒಂಜಿ ವರ್ಷೋದಿಂಚ ಉಂತುದು, ನೆಟ್ಟೆ ಪೋಪುನ ಜನಕುಲ್ ನಡತ್ತೊಂದು ಪೋನಗ ತೊಂದರೆ ಆವೊಂದು ಉಂಡು. ಅವ್ವತ್ತಂದೆ ಈ ಸಾದಿದ ನಡುಟ್ ಮಲ್ಲ ಸಂಕೊನು ಮಲ್ದೆರ್. ನೆಟ್ಟೆ ಮಲ್ಲ ಕಲ್ಲ್ ದ ರಾಶಿಲ ಉಂಡು. ಅಂಚಾದ್ ಮೇರ್ ಈ ಸಾದಿಡ್ ನಡತ್ತೊಂದು ಬನ್ನಗ ಬೂರ್ದು ತರೆಕ್ ಪೆಟ್ಟಾದ್ ತೀರ್ ಪೋಯೆರ್.
ಈ ಸಮಸ್ಯೆಗ್ ಈ ವಾರ್ಡ್ದ ಪಂಚಾಯತ್ ಸದಸ್ಯೆರಾಯಿನ ಮಾಜಿ ಅಧ್ಯಕ್ಷೆರ್ ಮಹಮ್ಮದ್ ರಫಿಕ್ ಬೊಕ್ಕ ಇತ್ತೆದ ಅಧ್ಯಕ್ಷೆರಾಯಿನ ಲತಾ ಪರಮೇಶ್ವರ ಅಕುಲು ಒವ್ವೇ ರೀತಿದ ಸ್ಪಂದನೆ ಕೊರ್ತುಜೆರ್. ಆ ಸಾದಿಡ್ ಸಾಲೆ ಜೋಕುಲು,ಕೆಲಸಗ್ ಪೋಪುನಕುಲ್ ಈ ಸಾದಿಡ್ ನಡತ್ತೊಂದು ಪೋಪೆರ್. ಉಂದು ಪಂಚಾಯತ್ ದಕ್ಲೆನ ನಿರ್ಲಕ್ಷ್ಯ ರ್ದ್ ಆತಿನಿ ಪಂದ್ ವರದಿ ಆತ್ಂಡ್.
ವರದಿ: ಸಂತೋಷ್ ಅಂಬ್ಲಮೊಗೆರ್
ಒಡಿಪು : ಬೊಲ್ಪುದ ಪರ್ಬ ದೀಪಾವಳಿ ಕೈತಲ್ ಬರೊಂದು ಇಪ್ಪುನ ಪೊರ್ತುಡು ಏತೋ ಜನ ಕಲೆಗಾರೆರ್ ಮಣ್ಣ್ ದ ತಿಬಿಲೊಲೆನ್ ಉತ್ಪತ್ತಿ ಮಲ್ತ್ ದ್ ಮಾರ್ದ್ ಜೀವನ ದೆಪ್ಪುವೆರ್.
ಅಂಚೆನೆ ಇಲ್ಲಡ್ ಕಷ್ಟ ಉಪ್ಪುನಗ ಕಲ್ಪರೆ ಬೋಡಾದ್ ಉಪ ಕೆಲಸ ಮಲ್ತ್ ದ್ ಶಾಲೆ ಕಲ್ತ್ ದ್ ಅಪ್ಪೆ ಅಮ್ಮೆರ್ನ ಪಣವುದ ದುನ್ನೊನು ಕಮ್ಮಿ ಮಲ್ಪುನಕುಲುಲ ಏತೋಜನ ಉಲ್ಲೆರ್. ಬೆದ್ರದ ಖಾಸಗಿ ಕಾಲೇಜ್ ದ ದೃಶ್ಯಕಲಾ ವಿಭಾಗದ ವಿದ್ಯಾರ್ಥಿನಿ ಒರ್ತಿ ಮಣ್ಣ್ ದ ದೀಪಲೆಗ್ ರಂಗ್ ಕೊರ್ದು ಮೆನ್ಕುಲೆಕ ಮಲ್ದೆರ್. ಒಡಿಪು ಜಿಲ್ಲೆದ ಕಾಪುದ ಕಲಾವಿದೆ ರಕ್ಷಾ ಆರ್ ಪೂಜಾರಿ, ತನ್ನ ಶಿಕ್ಷಣಕ್ಕಾದ್ ಮಾತ್ರ ಅತ್ತಾಂದೆ ಡಿಪ್ಲೊಮಾ ಕಲ್ತೊಂದು ಇಪ್ಪುನ ತನ್ನ ಮೆಗ್ಯನ ಶಿಕ್ಷಣಗ್ ಸಕಾಯ ಮಲ್ಪುನ ಉದ್ದೇಶಡ್ ದೀಪಲೆನ್ ಮಲ್ತ್ ದ್, ಮಾರ್ಯೆರೆ ನಿರ್ಧಾರ ಮಲ್ದೆರ್. ನೆತ್ತ ಒಟ್ಟಿಗೆ ಸಾಲೆ ಜೋಕುಲೆಗ್ಲಾ ಕ್ರೀಯಾಶೀಲತೆ ಬರೊಡು ಪಂದ್ ಅಕಲೆಗ್ಲಾ ಬಣ್ಣ ಪಡುನೆನ್ ಕಲ್ಪಾದ್ ಕೊರೊಂದು ಉಲ್ಲೆರ್. ಅಂಚನೆ ಬೇತೆ ಬೇತೆ ವಿನ್ಯಾಸದ ದೀಪಲೆಗಾದ್ ಮೇರೆಗ್ ನಿಕುಲು ಕ್ವಾಲ್ ಮಲ್ಪೊಲಿ.
ರಕ್ಷಾ ಪೂಜಾರಿ: 9964777580
