Times of kudla

ಆಲ್ ಅಮೆರಿಕಾ ತುಳು ಅಸೋಸಿಯೇಷನ್ ತುಳು ಉಚ್ಚಯ 2022: ತುಳುನಾಡ್ ದ ಮಂತ್ರಿಲು ಶಾಸಕೆರ್ ತುಲುಬಾಸೆದ ಮಾನ್ಯತೆಗ್ ಬೇಲೆ ಮಲ್ಪೊಡು : ಭಾಸ್ಕರ್ ಶೇರಿಗಾರ್

ಕೈತಲ್ ದ ಗೋವಾದಂಚಿನ ಎಲ್ಯ ರಾಜ್ಯದ ಬಾಸೆ ಕೊಂಕಣಿಗ್ ಮಾನ್ಯತೆ ತಿಕ್ಕುಂಡಾಂಡ ಸಾಹಿತ್ಯ, ಸಂಸ್ಕೃತಿ, ಲಿಪಿ ಸಂಪನ್ನ ತುಲು ಬಾಸೆಗ್ ಲ ಅಂಚಿನನೆ ಮಾನ್ಯತೆ ತಿಕ್ಕೊಡು, ಆಯಿಕ್ಕಾದ್ ತುಳುನಾಡ್ ದ ರಾಜಕಾರಣಿಲು ಮಾತ ಸೇರ್ದ್ ಒತ್ತಾಯ ಮಲ್ಪೊಡು ಪಂದ್ ಅಮೆರಿಕಾದ ಎಎಟಿಎ (ಆಟ) ಸಂಸ್ಥೆದ ಅಧ್ಯಕ್ಷೆರ್ ಭಾಸ್ಕರ್ ಶೇರಿಗಾರ್ ಬೊಕ್ಕ ಸಂಸ್ಕೃತಿ ಇಲಾಖೆದ ಮಂತ್ರಿ ಸುನಿಲ್ ಕುಮಾರ್ ಬೊಕ್ಕ ಬೇತೆ ತುಳುನಾಡ್ ದ ಶಾಸಕೆರ್ ಮಂತ್ರಿಲೆನ್ ಬಿನ್ನಾಪು ಮಲ್ತೆರ್.

ಆಲ್ ಅಮೇರಿಕಾ ತುಳು ಅಸೋಸಿಯೇಷನ್ ವರ್ಷದ ತುಳು ಉಚ್ಚಯ 2022 ವರ್ಚುಯಲ್ ಲೇಸ್ ಡ್ ದೇಶ ವಿದೇಶದ ತುಳು ಅಭಿಮಾನಿಲೆನ್ ಉದ್ದೇಶಿಸಾದ್ ಎಎಟಿಎ ನಡತೊಂದು ಬತ್ತಿನ ಬೊಕ್ಕ ಆಯಿನ ಉದ್ದೇಶದ ಮಾಹಿತಿ ಕೊರ್ಯೆರ್. ತುಲುಬಾಸೆ, ತುಲುಲಿಪಿ ಬೊಕ್ಕ ಸಾಹಿತ್ಯ ಸಂಸ್ಕೃತಿನ್ ಒರಿಪಾವುನೆ ಬೊಕ್ಕ ಬುಲೆಪಾವೊನೆ ಎಎಟಿಎ ಸಂಸ್ಥೆದ ಮುಖ್ಯ ಉದ್ದೇಶ ಆತ್ಂಡ್. ಅಂಚಾದ್ ವರ್ಷಗ್ ರಡ್ಡ್ ಸರ್ತಿ ಬಿಸು ಬೊಕ್ಕ ತುಳು ಉಚ್ಚಯ ಲೇಸ್ ನ್ ಮಲ್ಪೊಡು ಪಂದ್ ಪಂಡೆರ್. ಈ ಸರ್ತಿದ ತುಳು ಉಚ್ಚಯ 2022ಟ್ ಕನ್ನಡ ಸಂಸ್ಕೃತಿ ಬೊಕ್ಕ ಇಂಧನ ಇಲಾಖೆದ ಸುನಿಲ್ ಕುಮಾರ್, ಹಂಪಿದ ಕನ್ನಡ ವಿಶ್ವವಿದಾಲಯದ ನಿವೃತ್ತ ಉಪಕುಲಪತಿ ಡಾ. ವಿವೇಕ್ ರೈ, ವಿದ್ವಾಂಸೆರ್ ವೆಂಕಟ್ರಮಣ ಭಟ್ ಬೊಕ್ಕ ದೈಜಿ ವರ್ಲ್ಡ್ ಸಂಸ್ಥೆದ ಮುಖ್ಯಸ್ಥೆರ್, ಪತ್ರಕರ್ತೆರ್ ವಾಲ್ಟರ್ ನಂದಳಿಕೆ ಬಿನ್ನೆರಾದ್ ಇತ್ತೆರ್.

ತುಳು ಭಾಷೆದ ಲೇಸ್ ನ್ ತುಳುನಾಡ್ ಡ್ ನಡಪುನವು ಇಸೇಸ ಅತ್ತ್. ಆಂಡ ಪಿದಯಿ ದೇಶಡ್ ತುಳುವೆರ್ ಒಂಜೆ ಕುಟುಂಬದಕಲೆನಲೆಕ್ಕ ಒಟ್ಟಿಗೆ ಸೇರ್ದ್ ನಡಪುನೆ ಇಸೇಸ ಪಂದ್ ಎಎಟಿಎ ಸಂಸ್ಥೆದ ಲೇಸ್ ನ್ ಪುಗರಿರ್ಯೆರ್.
ಡಾ. ವಿವೇಕ್ ರೈ ತುಲು ಬಾಸೆದ ಕಾವ್ಯ ಸೌಂದರ್ಯನ್ ಬುಡುಪ ಬುಡುಪಾದ್ ಪನೊಂದು ಈ ಪಾಡ್ದನ ಪದ್ಯಲು ಕೃಷಿ ಬೇಲೆದಕುಲೆನ ನಡುತ ಸಂಬಂಧ ಸಂಕೋಲೆ ಆದ್ ಬೇಲೆ ಮಲ್ತೊಂದು ಇಪ್ಪುನೆನ್ ನೆಂಪು ಮಲ್ತೆರ್. ಕೃಷಿ ಸಂಪತ್ತು ಸಂಪನ್ನ ಆವೊಡು ಪನ್ಪುನವು ಈ ಪದ್ಯದ ಮೂಲ ಸಂಕಲ್ಪ ಆತ್ಂಡ್, ನೆನ್ ಮಾತ ನನದ ಪೀಳಿಗೆಗ್ ತೆರಿಪವುನ ಜಬದಾರಿನ್ ನೆಂಪು ಮಲ್ತೆರ್. ತುಳು ಕನ್ನಡ ವಿದ್ವಾಂಸೆರ್ ವೆಂಕಟರಾಮ ಭಟ್ ಪಾತೆರ್ದ್ ”ತುಳುಟ್ ನನಾತ್ ಘನ ಸಾಹಿತ್ಯದ ರಚನೆ ಆವೊಡು ಪನ್ಪುನ ಕಾರಣಗ್ ಲಕ್ಷ್ಮೀಶನ ಜೈಮಿನಿ ಭಾರತನ್ ತುಳುಕ್ ಅನುವಾದ ಮಲ್ಪೆರೆ ಸುರು ಆತ್ಂಡ್. ತುಳುತ ಪರತ್ ಶಬ್ದಲೆನ್ ಒರಿಪಾವುನ ಪೊಸ ಶಬ್ದಲೆನ್ ಪುಟ್ಟವೊಂದು ತುಳು ಭಾಷೆನ್ ಬುಲೆಪವೊಡು” ಪಂದ್ ಪಂಡೆರ್.

ಡೈಜಿ ವರ್ಲ್ಡ್ ಸಂಸ್ಥೆದ ಮುಖ್ಯಸ್ಥೆರ್ ವಾಲ್ಟರ್ ನಂದಳಿಕೆ ”ಪಿದಯಿ ದೇಶಡ್ ಬಾಸೆನ್ ಬುಲೆಪುನ ಎಎಟಿಎ ಸಂಸ್ಥೆನ್ ಪುಗರೊಂದು ತುಲು ಬಾಸೆ ಎಲ್ಮ್ ನೇ ಪರಿಚ್ಚೇಧಗ್ ಸೇರುನೆಟ್ ವಿದೇಶದ ತುಳುವೆರ್ ಸಕಾಯ ಆವೊಡು” ಪಂದ್ ಪಂಡೆರ್.

ಅಮಿತಾ ಅನುಜ್ ಪ್ರಾರ್ಥನೆ ಮಲ್ತೆರ್. ಆಟದ ಉಪಾಧ್ಯಕ್ಷೆರ್ ಶಿರೀಶ್ ಶೆಟ್ಟಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರೆ. ಸುದರ್ಶನ್ ಶೆಟ್ಟಿ, ಕ್ಯಾಲಿಫೋರ್ನಿಯಾದ ಅನಿತಾ ನಾಯಕ್,ಪ್ರೀತಿ ಶೆಟ್ಟಿ, ರೋಷನ್ ಪಯಸ್ ಬಿನ್ನೆರೆನ ಮಾಹಿತಿ‌ ಕೊರ್ಯೆರ್.

ಕುಡ್ಲದ ನಂದಗೋಕುಲ ಬೊಕ್ಕ ಗ್ರೀನ್ ಪಾರ್ಕ್ ಟೈಗರ್ಸ್ ದ ಶ್ರೀ ದೇವಿ ವೈಭವ ಬೊಕ್ಕ ಪಿಲಿನಲಿಕೆ, ವಿಠ್ಠಲ ನಾಯಕೆರೆನ ಗೀತಾ ಸಾಹಿತ್ಯ, ಸನಾತನ ನಾಟ್ಯಾಲಯದ ಸತ್ಯನಾಪುರ ಸಿರಿ ನೃತ್ಯ ನಾಟಕ, ಬೊಕ್ಕ ಐಲೆಸಾದ ಡಾ.ರಮೇಶ್ಚಂದ್ರ ತಂಡದ ಗೀತಾ ಗಾಯನ ನಡತ್ಂಡ್.
ಈ ಲೇಸ್ ನ್ ಸಿದ್ದಾರ್ಥ್ ಶೆಟ್ಟಿ ಬೊಕ್ಕ ಮಿಥಾಲಿ ಸಿದ್ದಾರ್ಥ್ ಶೆಟ್ಟಿ ಡಲ್ಲಾಸ್ ಸುಧಾರಿಕೆ ಮಲ್ತೆರ್. ಪಿಕ್ಚರ್ ದ ನಟೆ ವಿನೀತ್, ಅಭಿಷೇಕ್ ಶೆಟ್ಟಿ ಬೊಕ್ಕ ಶ್ರೀವಲ್ಲಿ ರೈ ಮಾರ್ಟೆಲ್ ಮನೋರಂಜನೆನ್ ಕೊರ್ಯೆರ್.

ಚಾಕ್ಲೆಟ್ ಕೊರಂದಿನ ಅಪ್ಪೆನ್ ಜೈಲಿಗ್ ಪಾಡ್ಲೆ ಪಂದ್ ಪೊಲೀಸೆರೆಗ್ ದೂರು ಕೊರ್ನ 3 ವರ್ಷದ ಮಗೆ!

ಪೊಪ್ಪನ ಒಟ್ಟಿಗೆ ಪೊಲೀಸ್ ಠಾಣೆಗ್ ಬತ್ತಿನ 3 ವರ್ಷದ ಬಾಲೆ ಒರಿ ಅಮ್ಮ ಎಂಕ್ ಚಾಕೋಲೆಟ್, ಕ್ಯಾಂಡಿ ತಿನಿಯೆರೆ ಬುಡ್ಪುಜೆರ್ ಪಂದ್ ಕೇಸ್ ಕೊರ್ನ ಘಟನೆ ಮಧ್ಯಪ್ರದೇಶದ ಭುರಾನ್ ಪುರ್ ಜಿಲ್ಲೆದ ಡೆಧಾತಲೈ ಗ್ರಾಮಡ್ ನಡತ್ಂಡ್.

ಈ ಕೇಸ್ ನ್ ಪೊಂಜೋವ್ ಪೊಲೀಸೆರ್ ದೆತೊಂದೆರ್. ಬಾಲೆ ಮೀನಗ ಚಾಕೋಲೆಟ್ ಕೇನ್ನೆಕ್ ಕೊರ್ತಿಜೆರ್. ಬೊಕ್ಕ ಕುಡ ಮೀದ್ ಬತ್ ದ್ ಕೇನ್ನಗ ಅಮ್ಮ ಮೆಲ್ಲ ಹಾಕಿಯೆರೆ. ನೇರ್ದ್ ಬುಲಿಪೆರೆ ಸುರು ಮಲ್ತಿನ ಬಾಲೆ, ಪೊಲೀಸ್ ಠಾಣೆಗ್ ಲೆತೊಂದು ಪೋಯೆರ್ ಅಟ ಮಲ್ತ್ಂಡ್. ಅಯಿಕ್ ಲೆತ್ತೊಂದು ಬತ್ತೆ ಪಂದ್ ಬಾಲೆದ ಅಮ್ಮೆರ್ ಪಂಡೆರ್.

ಈ ಸರ್ತಿ ಕೊರೊನಾ ಸೀಕ್ ಇತ್ತ್ಂಡಲ ಟಿ 20 ವಿಶ್ವಕಪ್‌ಡ್ ಗೊಬ್ಬೊಲಿ : ಐಸಿಸಿ ಘೋಷಣೆ

ದಿಲ್ಲಿ: ಈ ಸರ್ತಿದ ಟಿ 20 ವಿಶ್ವಕಪ್ ಡ್ ಗೊಬ್ಬುನಕಲೆಗ್ ಕೊರೊನಾ ಸೀಕ್ ಇತ್ತ್ಂಡಲ ಗೊಬ್ಬುರ್ದು ಪಿದಯಿ ಬತ್ತ್ ದ್ ಕ್ವಾರಂಟೈನ್‌ ಡ್ ಇಪ್ಪುನ ಅವಶ್ಯಕತೆ ಇಜ್ಜಿ. ದಾಯೆ ಪಂಡ ಕೊರೊನಾ ಸೀಕ್ ಬತ್ತಿನಕಲೆಗ್ ಗೊಬ್ಬುನ ಅವಕಾಶನ್ ಐಸಿಸಿ ಕೊರ್ತುಂಡು.

ಟಿ 20 ವಿಶ್ವಕಪ್ ದ ನಿಯಮದಂಚನೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಇತ್ತೆನೆ ಈ ನಿಯಮನ್ ಬುಡುಗಡೆ ಮಲ್ತ್ಂಡ್. ಈ ಗೊಬ್ಬುದ ಪೊರ್ತುಡು ಕಡ್ಡಾಯ ಕೋವಿಡ್ ಪರೀಕ್ಷೆ ಇಪ್ಪುಜಿ. ಕೊರೊನಾ ಸೀಕ್ ಇತ್ತಿನ ಆಟಗಾರೆರೆನ್ ಕ್ವಾರಂಟೈನ್‌ಡ್ ದೀಪುಜ. ಅಂಚೆನೆ ಸೀಕ್ ಇತ್ತಿನಕಲೆಗ್ ದೇಹಡ್ ಶಕ್ತಿ ಇತ್ತ್ಂಡಲ ಗೊಬ್ಬರೆ ಆಪುಂಡು‌. ಆಂಡ ನೆಕ್ಕ್ ಡಾಕ್ಟರ್ ನ್ ಅನುವು ಬೋಡು ಪಂದ್ ಪಂಡ್. ಮಾತೆರ್ಲಾ ಇಂಜೆಕ್ಷನ್‌ ದೆತೊನೆರ್ದಾವೆರ ಇತ್ತೆ ಸೀಕ್ ದ ಪ್ರಮಾಣ ಕಡಿಮೆ ಆತ್ಂಡ್. ಅವ್ವತ್ತಂದೆ ಈ ಸರ್ತಿದ ಟಿ 20 ವಿಶ್ವಕಪ್ ಲ ಸುರು ಆತ್ಂಡ್. ಈ ಸರ್ತಿ ಗೊಬ್ಬರೆ ಅವಕಾಶ ಕೊರ್ನೆದಾವೆರ ಆಸ್ಟ್ರೇಲಿಯಾದ ಪೊಂಜೋವು ಕ್ರಿಕೆಟ್ ತಂಡದ ಆಲ್‌ರೌಂಡರ್ ತಹ್ಲಿಯಾ ಮೆಕ್‌ಗ್ರಾತ್​ಗ್ ತಂಡಡ್ ಗೊಬ್ಬೆರೆ ಅವಕಾಶ ತಿಕ್ಕುಂಡು.

ಪುಂಜಾಲಕಟ್ಟೆ: ಗೂಡ್ಸ್ ಟೆಂಪ- ಪಿಕಪ್ ತಾಂಟ್ ಡ್ ತೀರ್ ಪೋಯಿನ ಪಿಕಪ್ ಚಾಲಕೆ..!!

ಪುಂಜಾಲಕಟ್ಟೆ: ಶ್ರೀರಾಮನಗರ ಪ್ರಗತಿ ಹಾರ್ಡ್ ವೇರ್ ದ ರಾಜ್ಯ ಮಾರ್ಗಡ್ ಸೋಮಾರ ಬಯ್ಯಗ್ ನಡತಿನ ಅಪಘಾತಡ್ ಪೆಟ್ಟಾಯಿನ ಪಿಕಪ್ ಚಾಲಕೆ, ಪಾಂಡವರಕಲ್ಲು ಕುದ್ರು ನಿವಾಸಿ ಇಬ್ರಾಹಿಂ ಅರೆನ ಮಗೆ ಸಾಹಿಲ್ (21) ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.

ಕೋಡೆ ಬಯ್ಯಗ್ ನಡತಿನ ಅಪಘಾತಡ್ ಮಸ್ತ್ ಪೆಟ್ಟಾಯಿನ ಸಾಹಿಲ್, ಅವಿನಾಶ್ ಬೊಕ್ಕ ಧೀರಜ್ ನ್ ಚಿಕಿತ್ಸೆಗ್ ಕುಡ್ಲ ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಆಂಡ ತರೆ ಬೊಕ್ಕ ತಿಗಲೆಗ್ ಮಸ್ತ್ ಪೆಟ್ಟಾದ್ ಇತ್ತಿನ ಸಾಹಿಲ್ ಚಿಕಿತ್ಸೆ ಫಲಕಾರಿ ಆವಂದೆ ರಾತ್ರೆ ತೀರ್ ಪೋಯೆರ್. ಇಬ್ರಾಹಿಂ ಅರೆಗ್ ನಾಲ್ ಜೋಕುಲು ಅಯಿಟ್ ಸಾಹಿಲ್ ಲಾಸ್ಟ್ ದಾರ್. ಮೇರ್ ಮಡಂತ್ಯಾರ್ ಸೇಕ್ರೆಡ್ ಹಾರ್ಟ್ ಕಾಲೇಜ್ ಡ್ ಕಲ್ತೊಂದು ಇತ್ತೆರ್. ರಜೆತ ಪೊರ್ತುಡು ಪಿಕಪ್ ಚಾಲಕೆರಾದ್ ಬೇಲೆ ಮಲ್ತೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ಮೇರೆಗ್ ಪೊಪ್ಪ, ಅಮ್ಮ, ಮೂಜಿ ಅಣ್ಣನಕುಲು ಉಲ್ಲೆರ್.

ಅ.25 ಸೂರ್ಯ ಗ್ರಾಣದ ಲೆಕ್ಕೊಡು ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯಡ್ ಸೇವಾ ಕಾರ್ಯ ಇಜ್ಜಿ

ಕುಕ್ಕೆ ಸುಬ್ರಹ್ಮಣ್ಯ: ಅ.25ದಾನಿ ಸೂರ್ಯ ಗ್ರಾಣದ ಕಾರಣ ನಾಗಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯಡ್ ಒವ್ವೇ ರೀತಿದ ಸೇವೆ ಉಪ್ಪುಜಿ.

ಅನ್ನಪ್ರಸಾದ, ತೀರ್ಥ ಪ್ರಸಾದದ ವ್ಯವಸ್ಥೆಲ ಇಜ್ಜಿ ಪಂದ್ ದೇವಲ್ಯದ ಪ್ರಕಟಣೆಡ್ ತೆರಿಪಾದೆರ್.
ಅ.26 ಬುಧಾರದಾನಿ ದೇವೆರೆನ ನಿತ್ಯದ ಪೂಜೆ ಸಮಯಡ್ ವ್ಯತ್ಯಾಸ ಆಪುನೆರ್ದಾವರ ಭಕ್ತಾದಿಲೆಗ್ ಬೊಲ್ಪುಗು 9 ಗಂಟೆರ್ದ್ ದೇವೆರೆನ ದರ್ಶನಗ್ ಅನುವು ಮಲ್ತ್ ಕೊರ್ತೆರ್.
(ವರದಿ: ಗೋಪಿಚಂದನ ಕೆ.ಎಸ್.)

Notice:
On account of Surya grahan on October 25th; all the sevas in Kukke Subramanya Kshetra stands cancelled.There will be no sevas at all.There will also be no ” Prasad food” ; informed temple sources.

On the 26 th of October there will be alight change in temple darshan timings. Devotees can come for dharshan from 9 a.m onwards.

ಗುರುಬೆಳದಿಂಗಲು ಫೌಂಡೇಶನ್‌ ವತಿರ್ದ್ ಬೆಂಜನಪದವುದ ಭವಾನಿ ರವೀಂದ್ರ ಮೇರೆಗ್ ಪೊಸ ಇಲ್ಲ್ ಕೊರ್ಪಿನ ಲೇಸ್

ಕುಡ್ಲ : ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ 168ನೇ ಜನ್ಮದಿನದ ಸವಿನೆಂಪುಗಾದ್ ಗುರುಬೆಳದಿಂಗಲು ಫೌಂಡೇಶನ್ ಕುದ್ರೋಳಿ ವತಿರ್ದ್ ಬೆಂಜನಪದವು ರಾಮನಗರದ ನಿವಾಸಿ ಭವಾನಿ ರವೀಂದ್ರ ಮೇರ್ನ ಕುಟುಂಬಗ್ ಪೊಸತ್ತಾದ್ ಕಟ್ಟಿನ ಇಲ್ಲ್ ನ್ ಕೊರ್ಪಿನ ಲೇಸ್ ಐತಾರ ನಡತ್ಂಡ್.

ಈ ಲೇಸ್ ಡ್ ಸಾಮಾಜಿಕ ಕಾರ್ಯಕರ್ತೆರ್ ಉಷಾ ಮರೋಳಿ, ಒಡಿಪು ಜಿಲ್ಲೆದ ಬಿಲ್ಲವ ಯುವ ವೇದಿಕೆದ ಅಧ್ಯಕ್ಷೆರ್ ಪ್ರವೀಣ್ ಪೂಜಾರಿ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ, ಗುರುಬೆಳದಿಂಗಲು ಫೌಂಡೇಶನ್ ದ ಅಧ್ಯಕ್ಷೆರ್ ಪದ್ಮರಾಜ್ ಆರ್, ಉದ್ಯಮಿ ಕಿಶೋರ್ ದಂಡೆಕೇರಿ, ಶ್ರೀನಿವಾಸ ಕೂಳೂರ್ ,ವಿಷ್ಣುದಾಸ್, ಸಾಮಾಜಿಕ ಕಾರ್ಯಕರ್ತೆರ್ ಸತೀಶ್ ಪೂಜಾರಿ ಸಜಿಪ, ಗೆಜ್ಜೆಗಿರಿ ಕ್ಷೇತ್ರದ ಉಪಾಧ್ಯಕ್ಷೆರ್ ರವಿ ಚಿಲಿಂಬಿ, ವಕ್ತಾರೆರ್ ರಾಜೇಂದ್ರ ಚಿಲಿಂಬಿ, ಗುರುಬೆಳದಿಂಗಲು ಫೌಂಡೇಶನ್ ಉಪಾಧ್ಯಕ್ಷೆರ್ ರಘುನಾಥ ಮಾಬಿಯಾನ್, ಕಾರ್ಯದರ್ಶಿ ರಾಜೇಶ್ ಸುವರ್ಣ ಬಂಟ್ವಾಳ, ಮುನ್ನಾ ಲೋಹಿತ್, ರವಿರಾಜ್ ದಂಬೇಲ್, ಪುಷ್ಪರಾಜ್ ದಂಬೇಲ್‌ ಬೊಕ್ಕ ಅನುಸೂಯ ಇತ್ತೆರ್.

ಗಜೇಂದ್ರ ಪೂಜಾರಿ ಪ್ರಾಸ್ತಾವಿಕ ಪಾತೆರ ಪಂಡೆರ್. ಕುಸುಮಾಕರ್ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬಾಲಚಂದ್ರ ಸೊಲ್ಮೆ ಸಂದಾದೆರ್.

ಈ ಪೊರ್ತುಡು ಕ್ಯಾಂಡಲ್ ತಯಾರ್ ಮಲ್ಪುನ ಬಗೆಟ್ ವನಿತಾ ಎಸ್, ದೀಪದ ಬತ್ತಿ ತಯಾರ್ ಮಲ್ಪುನ ಬಗೆಟ್ ಅನಿಲ್ ಕುಮಾರ್ ಕದ್ರಿ ಮೊಕುಲು ಉದ್ಯೋಗ ಕಾರ್ಯಾಗಾರ ನಡಪಾದ್ ಕೊರ್ಯೆರ್.
ಉಂದುವೇ ಪೊರ್ತುಡು ಶೃತಿ ಸಂಜೀವ ಶೆಟ್ಟಿ, ಮನೋಹರ್ ಆನಂದ, ಸುರೇಖಾ, ಸವಿತಾ ನಾರಾಯಣ, ಪವಿತ್ರಾ ನಾರಾಯಣ ಕುಟುಂಬಲೆಗ್ ಟೈಲರಿಂಗ್ ಮಿಸನ್ ಬೊಕ್ಕ ಮೋಟಾರ್ ಪಟ್ಟಿಯೆರ್.

ಹೆಲ್ಪ್ ಲೈನ್ ಸೇವಾ ತಂಡ ಬೊಕ್ಕ ಅರ್ಪಣಾ ಸೇವಾ ಸಮಿತಿದ ಒಟ್ಟುಸೇರಿಗೆಡ್ ಹುಷಾರ್ ದಾಂತಿನಕ್ಲೆಗ್ ಪನವುದ ಸಕಾಯ

ಉಚ್ಚಿಲ : ಹೆಲ್ಪ್ ಲೈನ್ ಸೇವಾ ತಂಡ ಬೊಕ್ಕ ಅರ್ಪಣಾ ಸೇವಾ ಸಮಿತಿದ ಮುತಾಲಿಕೆಡ್ “ಭವತಿ ಭಿಕ್ಷಾಂದೇಹಿ ” ಪಂದ್ ವಿಚಿತ್ರ ಏಸ ಪಾಡ್ದ್ ಒಟ್ಟು ಮಲ್ತಿನ ಪಣವುದ ಸಕಾಯನ್ ಅ.9 ಐತಾರದಾನಿ ಬೊಲ್ಪುಗು 10 ಗಂಟೆಗ್ ಉಚ್ಚಿಲ ದೇವಲ್ಯಡ್ ಆರೋಗ್ಯ ಚಿಕಿತ್ಸೆಗಾದ್ ಮಾಸ್ಟರ್ ಗೌರವ್ ಗ್ 70,686 ರೂ., ಕುಮಾರಿ ಶ್ರುತಿಗ್ 60,000 ರೂ.,ಚಂದ್ರಾವತಿ ಮೆರೆಗ್ 50,000 ರೂ., ಪನವುದ ಸಕಾಯೊನು ಪಟ್ಟಿಯೆರ್.

ಈ ಪೊರ್ತುಡು ಸಮಾಜ ಸೇವಕೆರಾಯಿನ ರವಿ ಕಟಪಾಡಿ ಬೊಕ್ಕ ಉಚ್ಚಿಲ ದೇವಲ್ಯದ ಆಡಳಿತ ಸಮಿತಿದ ಅಧ್ಯಕ್ಷೆರಾಯಿನ ಜಯ ಬಿ. ಕೋಟ್ಯಾನ್, ಬೊಕ್ಕ ಹೆಲ್ಪ್ ಲೈನ್ ಸೇವಾ ತಂಡ ಬೊಕ್ಕ
ಅರ್ಪಣಾ ಸೇವಾ ಸಮಿತಿದ ಸದಸ್ಯೆರಾಯಿನ ಧನು ಅಂಚನ್ ಪಕ್ಷಿಕೆರೆ, ಗಿರೀಶ್ ಮುಲ್ಕಿ,ಪವನ್ ಪಡುಬಿದ್ರೆ, ಗೋಪಾಲಕೃಷ್ಣ ಪುನರೂರ್,
ಮಹೇಶ್ ಅಮೀನ್, ಪೂರ್ಣಪ್ರಕಾಶ್, ನಿಶಾನ್ ಅಂಚನ್, ಸಿದ್ದು, ಜಯಂತ್ ಕೊಳಂಬೆ, ಪ್ರದೀಪ್, ಅರುಣ್ ಕಿನ್ನಿಗೋಳಿ, ಅಕ್ಷಯ್ ಪಕ್ಷಿಕೆರೆ, ಅಕ್ಷಯ್ ಕುಮಾರ್ ಪಕ್ಷಿಕೆರೆ,ಅಭಿ ಪುತ್ತೂರ್, ದರ್ಶನ್, ಸ್ವಸ್ತಿಕ್, ರಾಧಾ, ಉದಯ್, ಮುನ್ನ, ರಮ್ಯಾ, ಕೀರ್ತಿ, ದೀಪ, ಕಾವ್ಯ ಇತ್ತೆರ್.
ಅಂಚೆನೆ ಈ ಪುಣ್ಯ ಕಜ್ಜೊಡು ಪಾಲ್ ಪಡೆಯಿನ ಮಾತೆರೆಗ್ಲ ಆ ದೈವ -ದೇವೆರ್ ಆಯುರಾರೋಗ್ಯ ಕೊರಡ್
ಪಂದ್ ಕೂಟದಕುಲು ಸುಗಿತೊಂದೆರ್.

ಯುವವಾಹಿನಿ(ರಿ) ಬೆಂಗ್ಲೂರ್ ಕೂಟದ ತಿಂಗೊಲ್ದ ಸಭೆ, ಗುರು ಭಜನೆ

ಯುವವಾಹಿನಿ(ರಿ) ಬೆಂಗ್ಲೂರ್ ಕೂಟದ ತಿಂಗೊಲ್ದ ಸಭೆ ಅ.16 ಐತಾರ ಘಟಕದ ಪ್ರಚಾರ ನಿರ್ದೇಶಕೆರ್ ಸುದರ್ಶನ್ ಮೆರೆನ ಟಿ.ದಾಸರಹಳ್ಳಿದ ಸರಸ್ವತಿ ನಿವಾಸಡ್ ನಡತ್ಂಡ್.

ಮಧ್ಯಾಹ್ನ 3 ಗಂಟೆಗ್ ಗುರು ಭಜನೆ ಸುರುವಾದ್ ಬಯ್ಯಗ್ 4.30 ಕ್ ಮಂಗಳಾರತಿದ ಒಟ್ಟಿಗೆ ಮುಗಿತಲ ಆಂಡ್.
ಬೊಕ್ಕ 4.45ಕ್ಕ್ ಘಟಕದ ತಿಂಗೊಲ್ದ ಸಭೆತ ಉದಿಪನ ಮಲ್ತೆರ್.
ವಿಜಯಾ ಪ್ರಮೋದ್ ಬಿನ್ನೆರೆನ್ ಎದ್ಕೊಂಡೆರ್. ಅಕ್ಷತಾ ಸುಧೀರ್ ಗುರುದೇವೆರೆನ ಪ್ರಾರ್ಥನೆ ಪಂಡೆರ್.
ಬೊಕ್ಕ ವಿಜಯಾ ಪ್ರಮೋದ್ ಕರಿನ ತಿಂಗೊಲ್ದ ವರದಿನ್ ಸಭೆಟ್ ದೀಯೆರ್. ಕೋಶಾಧಿಕಾರಿ ಅಕ್ಷತಾ ಸುಧೀರ್ ಕೂಟದ ಲೆಕ್ಕಪತ್ರ ಓದುಪಂಡೆರ್.
ಕಲೆ ಬೊಕ್ಕ ಸಾಹಿತ್ಯ ನಿರ್ದೇಶಕೆರ್ ಆಯಿನ ನವನೀತ್, ನನ ಬರ್ಪುನ ಯುವ ವೈಭವದ ಬಗೆಟ್ ಸಭೆಕ್ಕ್ ತೆರಿಪಾಯೆರ್. ಬೊಕ್ಕ ಪೊಸತಾದ್ ಕೂಟಗ್ ಬತ್ತಿನ ಸಂದೀಪ್, ಪುನೀತ್, ಚೇತನ್ ಕುಮಾರ್, ಪವಿತ್ರ ಚೇತನ್ ಬೊಕ್ಕ ಚೇತನ್ ಮೊಕುಲು ಪೊಲಬು ಪಂಡೆರ್.
ಕೇಂದ್ರ ಸಮಿತಿದ ಸಂಘಟನಾ ಕಾರ್ಯದರ್ಶಿ ಕಿಶನ್ ಪೂಜಾರಿ ಮೇರ್ ಪಾತೆರ್ದ್, ನಮ್ಮ ಸಂಘಟನೆ ನನಲ ಮಲ್ಲ ಮಟ್ಟ್ ಗ್ ಪೋವಡ್ ಪಂದ್ ಪಂಡೆರ್.
ಕೂಟದ ಸಲಹೆಗಾರೆರ್ ರಘು ಮಟ್ಟು ಮೇರ್, ಪ್ರತಿ ಸದಸ್ಯೆರೆನ ಜಬದಾರಿನ್ ತೆರಿಪಾಯೆರ್.
ಸ್ಥಾಪಕ ಅಧ್ಯಕ್ಷೆರ್ ಸುಧೀರ್ ಪೂಜಾರಿ, ನನ ಬರ್ಪುನ ಪರ್ಬಗ್ ಪಣವುದ ನೆರವು ಆಪುನ ಯೋಜನೆದ ಬಗೆಟ್ ಪಾತೆರ್ಯೆರ್.
ಕೂಟದ ಅಧ್ಯಕ್ಷೆರ್ ಶ್ರೀಧರ್ ಡಿ ಪೂಜಾರಿ ಪಾತೆರ್ದ್, ನಮ್ಮ ಕೂಟಗ್ ಪೊಸ ಸದಸ್ಯೆರೆನ್ ಸೇರ್ಸವುನೆಟ್ಟ್ ನಮ ರಡ್ಡನೇ ಸ್ಥಾನಡ್ ಉಲ್ಲ ಪನ್ಪಿನ ಕುಸಿನ್ ಪಟ್ಟಿಯೆರ್. ಬೊಕ್ಕ ಕುದ್ರೋಳಿ ಕ್ಷೇತ್ರಗ್ ವನಸ್ ದ ಸಕಾಯನ್ ಮಲ್ತಿನ ಮಾತ ಸದಸ್ಯೆರೆಗ್ ಸೊಲ್ಮೆ ಸಂದಾಯೆರ್. ವೇಣೂರುಡ್ ನಡತಿನ ಕೆಸರ್ಡೊಂಜಿ ದಿನ ಕೂಟೊಡು ಪಾಲ್ ಪಡೆಯಿನ ಮಾತ ಸದಸ್ಯೆರೆಗ್ ಅಭಿನಂದನೆ ಸಂದಾಯೆರ್.
ನನ ಬರ್ಪುನ ಯುವ ವೈಭವಗ್ ಅಟ್ಟಣೆ ನಡಪಾವುನ ಆಯಾ ತಂಡದ ಲೀಡರ್ ನಕ್ಲೆಗ್ ಎಡ್ಡೆ ಆವಡ್ ಪಂಡೆರ್. ಅಶ್ವಿನಿ ಅಮೀನ್ ಮೇರ್ನ ಸೊಲ್ಮೆ ಸಂದೈತದೊಟ್ಟಿಗೆ ಸಭೆ ಮುಗಿತಲ ಆಂಡ್.

ಪೂಪಾಡಿಕಲ್ಲ್ ಡ್ ಶ್ರೀ ಕ್ಷೇತ್ರ ಧ.ಗ್ರಾ.ಯೋಜನೆದ 39ನೇ ವರ್ಷದ ಯೋಗೋತ್ಸವದ ಮುಗಿತಲದ ಲೇಸ್

ಊರುದಕುಲು, ಶಿಬಿರಾರ್ಥಿಲು, ಸ್ವ ಸಹಾಯ ಸಂಘದ ಸದಸ್ಯೆರ್, ಊರುದ ಗಣ್ಯೆರೆನ ಮುತಾಲಿಕೆಡ್ ಅ.15ದಾನಿ ಕಡಂದಲೆದ ಪೂಪಾಡಿಕಲ್ಲ್ ಗುರುನಾರಾಯಣ ಸಭಾಭವನಡ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಯೋಜನೆದ 39ನೇ ವರ್ಷದ ಯೋಗೋತ್ಸವದ ಮುಗಿತಲದ ಲೇಸ್ ನಡತ್ಂಡ್.

ಈ ಲೇಸ್ ಡ್ ಗುರುನಾರಾಯಣ ಸೇವಾ ಸಂಘದ ಅಧ್ಯಕ್ಷೆರ್ ಸುಧಾಕರ್ ಬಿ ಅಂಚನ್ ಕುಕ್ಕುಂಜೆ, ಅಧ್ಯಕ್ಷತೆ ವಹಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಗ್ರಾಮ ಪಂಚಾಯಿತಿ ಅಧ್ಯಕ್ಷೆರ್ ದಿನೇಶ್ ಕಂಗ್ಲಾಯ್, ಸುಭಾಶ್ಚಂದ್ರ ಚೌಟ, ಒಕ್ಕೊಟಲೆನ ವಲಯದ ಅಧ್ಯಕ್ಷೆರ್ ಜಗದೀಶ್ ಟಿ ಕೋಟ್ಯಾನ್, ಬಿ ಸೀತಾರಾಮ್ ತೋಳ್ಪಡಿತ್ತಾಯ, ಕಾರ್ಯದರ್ಶಿಲು ಶಾಂತಿವನ ಟ್ರಸ್ಟ್, ಡಾ ಐ. ಶಶಿಕಾಂತ್ ಜೈನ್ ನಿರ್ದೇಶಕೆರ್ ಯೋ. ನೈ. ಶಿ. ಶಾಂತಿವನ ಟ್ರಸ್ಟ್, ಸತೀಶ್ ಶೆಟ್ಟಿ ಜಿಲ್ಲಾ ನಿರ್ದೇಶಕೆರ್ ತುಳುನಾಡ್, ನಾರಾಯಣ ಶೆಟ್ಟಿ ತಾಲೂಕ್ ಯೋಜನಾಧಿಕಾರಿಲು ಬೆದ್ರ ಬಿನ್ನೆರಾದ್ ಪಾಲ್ ಪಡೆಯೆರ್.
ಸಂಪಿಗೆ ವಲಯದ ಮತ ಮೇಲ್ವಿಚಾರಕೆರ್, ವಲಯದ ಒಕ್ಕೊಟದ ಅಧ್ಯಕ್ಷೆರ್ ಸೇವಾ ಪ್ರತಿನಿಧಿಲು ಈ ಪೊರ್ತುಡು ಇತ್ತೆರ್. ಮಧ್ಯಾಹ್ನ ಸಮಾರಂಭ ಸಮಾಪನೆ ಆದ್ ಬತ್ತಿನಕಲೆಗ್ ವನಸ್ ದ ವ್ಯವಸ್ಥೆನ್ ಶಾಂತಿವನ ಟ್ರಸ್ಟ್ ವತಿರ್ದ್ ಮಲ್ತ್ ದೆರ್.