ಬೆಂಗ್ಲೂರ್: ರಾಜ್ಯಡ್ ನನ ನಾಲ್ ದಿನ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು.
ಬೆಂಗ್ಲೂರ್, ಶಿವಮೊಗ್ಗ, ಚಾಮರಾಜನಗರ, ತುಮಕೂರ್ ಇಂಚ ಸುಮಾರ್ ಜಿಲ್ಲೆಲೆಡ್ ಬರ್ಸ ಬರ್ಪುಂಡು. ಬಂಗಾಳ ಕೊಲ್ಲಿಡ್ ಚಂಡಮಾರುತ ಆಂಡ ಕರ್ನಾಟಕದ ಸುಮಾರ್ ರಾಜ್ಯಲೆಡ್ ಬರ್ಸ ಬರ್ಪುಂಡು. ಅವ್ವತ್ತಂದೆ ರಾಜಧಾನಿ ಬೆಂಗ್ಲೂರ್ ಡ್ ಕರಿನ ಒಂಜಿ ವಾರರ್ದ್ ಬರ್ಸ ಬರೊಂದು ಇಪ್ಪುನೆರ್ದಾವೆರ ಜನಕುಲೆಗ್ ಭಾರಿ ಸಮಸ್ಯೆ ಆತ್ಂಡ್.
ಕೋಟ: ರೇಷನ್ ಕಾರ್ಡ್ ದ ಅರಿಕ್ಕ್ ಪಲಿ- ಮೆಗ್ದಿನ ನಡುಟ್ಟು ಗಲಾಟೆ ಆದ್, ಪಲಿ ಆಸ್ಪತ್ರೆಗ್ ಸೇರಿನ ಘಟನೆ ಅ.17 ಕ್ಕ್ ವಡ್ಡರ್ಸೆ ಎಂ.ಜಿ. ಕಾಲನಿಡ್ ನಡತ್ಂಡ್.
ಬಂಜಿನಾರ್ ಆದಿಪ್ಪುನ ಪಲಿ ಜ್ಯೋತಿ (32) ಕಂಡನಿ ಬೊಕ್ಕ ಜೋಕುಲೆನ ಒಟ್ಟಿಗೆ ಬಿದ್ಕಲ್ ಕಟ್ಟೆಡ್ ಬಾಡಿಗೆದ ಇಲ್ಲಲ್ ಇತ್ತೆರ್. ಮೇರ್ ಅ.17 ದಾನಿ ಬೊಲ್ಪುಗು ವಡ್ಡರ್ಸೆ ಗ್ರಾಮದ ಎಂ.ಜಿ. ಕಾಲನಿಡ್ ಇಪ್ಪುನ ಅಪ್ಪೆ ಇಲ್ಲಡೆ ಬನ್ನಗ, ಅಪ್ಪೆ ಬೇಲೆಗ್ ಪೋದಿತ್ತೆರ್. ಈ ಪೊರ್ತುಡು ಮೆಗ್ದಿ ಆಶಾಡ ರೇಷನ್ ಕಾರ್ಡ್ ಡ್ ತಿಕ್ಕುನ ತನ್ನ ಪಾಲ್ ದ ಅರಿನ್ ಎಂಕ್ ಕೊರ್ಲ ಪಂದ್ ಕೇಂಡೆರ್. ನೆಕ್ಕ್ ಬೆಚ್ಚ ಆಯಿನ ಆಶಾ ಬೊರ್ಚಂದಿನ ನೆರ್ದ್, ಜ್ಯೋತಿಗ್ ದೊಣ್ಣೆಡ್ ಹಾಕ್ ದೆರ್. ಮಸ್ತ್ ಪೆಟ್ಟಾಯಿನ ಜ್ಯೋತಿ ಗ್ ಕೋಟ ಸಮುದಾಯ ಆರೋಗ್ಯ ಕೇಂದ್ರಡ್ ಚಿಕಿತ್ಸೆ ಕೊರ್ದು, ಬೊಕ್ಕ ಒಡಿಪು ಜಿಲ್ಲಾಸ್ಪತ್ರೆಗ್ ದಾಖಲ್ ಮಲ್ತೆರ್. ಈ ಬಗೆಟ್ ಕೋಟ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಬೊಲ್ತೇರ್: ಜುಗಾರಿ ಗೊಬ್ಬೊಂದು ಇತ್ತಿನ ಜಾಗೆಗ್ ಬತ್ತಿನ ಪೊಲೀಸೆರ್ 9 ಜನನ್ ಅರೆಸ್ಟ್ ಮಲ್ತಿನ ಘಟನೆ ಬೊಲ್ತೇರ್ ಡ್ ನಡತ್ಂಡ್.
ಶಿಶಿಲ ಗ್ರಾಮದ ವೆಂಕಪ್ಪ ಪೂಜಾರಿ(55), ವಸಂತ ಗೌಡ(48), ಕೃಷ್ಣಪ್ಪ ಗೌಡ(45), ಶಿವರಾಮ ಗೌಡ(53), ಸದಾಶಿವ(38), ಮುಳಿಮಜಲು ಪೊಡಿಯಾ(50), ಹೊನ್ನಪ್ಪ (47), ಸುರೇಶ್(33), ಕೇಶವ(42) ಮೊಕುಲು ಶಿಶಿಲ ಗ್ರಾಮದ ಕಂಚಿನಡ್ಕ ಸರಕಾರಿ ಗುಡ್ಡೆಡ್ ಅಂದರ್ಬಾಹರ್ ಪನೊಂದು ಇಸ್ಪೀಟ್ ಗೊಬ್ಬೊಂದು ಇತ್ತೆರ್. ಮಾಹಿತಿ ತೆರಿದ್ ಜಾಗೆಗ್ ಬತ್ತಿನ ಪೋಲಿಸೆರ್ ಮೊಕಲೆನ್ ಬೊಕ್ಕ 11,370 ರೂ. ದುಡ್ಡು ಒಂಜಿ ಕಾರ್, ಒಂಜಿ ಬೈಕ್, ಸೇರ್ದ್ ಅಂದಾಜಿ1 ಲಕ್ಷ ರೂಪಾಯಿ ಬಿಲೆತ್ತ ಸೊತ್ತುನು ವಶಕ್ ಪಡೆತೆರ್.
ಬೊಂಬೈ: ಭಾರತ ತಂಡ 2023ಟ್ ಪಾಕಿಸ್ತಾನಡ್ ಅಟ್ಟಣೆ ಮಲ್ತಿನ ಏಷ್ಯಾಕಪ್ ಒಂಜಿ ದಿನತ್ತ ಕ್ರಿಕೆಟ್ ಟೂರ್ನಿಗಾದ್ ಪಾಕಿಸ್ತಾನಗ್ ಪೋಪುಜಿ ಪಂದ್ ಬಿಸಿಸಿಐ ಕಾರ್ಯದರ್ಶಿ ಜಯ್ ಶಾ ಪಂನ್ತೆರ್.
ಮೇರ್ ಕೋಡೆ ನಡತಿನ ಬಿಸಿಸಿಐ ಸದಸ್ಯೆರೆನ 91ನೇ ವಾರ್ಷಿಕ ಸಾಮಾನ್ಯ ಸಭೆಟ್ ತೆರಿಪಾದೆರ್.
ರಿಯಾಧ್ : ಜೈ ಗುರುದೇವ ಬಿಲ್ಲವ ಸಂಘ, ಸೌದಿ ಅರೇಬಿಯಾ ನೆತ್ತ ಮುತಾಲಿಕೆಡ್ ಅ.13 ಬಯ್ಯಗ್ 5 ಗಂಟೆಗ್ ರಿಯಾಧ್ ಡ್ ಬ್ರಹ್ಮ ಶ್ರೀ ನಾರಾಯಣ ಗುರು ಜಯಂತಿ ಬಾರಿ ಗೌಜಿಡ್ ನಡತ್ಂಡ್.
ಬಿಲ್ಲವ ಸಂಘದ ಅಧ್ಯಕ್ಷೆರ್ ಲೀಲಾಧರ್ ಗುಜರನ್ ಬೊಕ್ಕ ಅರೆನ ಬೊಡೆದಿ, ಗೌರವಾಧ್ಯಕ್ಷೆರ್ ಕೆ. ಸಿ ಭಾಸ್ಕರ್, ಕಾರ್ಯದರ್ಶಿ ಪ್ರಕಾಶ್ ಒಡಿಪು, ಜೊತೆ ಕಾರ್ಯದರ್ಶಿ ರಕ್ಷಿತಾ ಜಗದೀಶ್ ಮೊಕುಲು ತುಡರ್ ಅರ್ಲಾದ್ ಲೇಸ್ ನ್ ಉದಿಪನ ಮಲ್ತೆರ್.
ಈ ಪೊರ್ತುಡು ಸಂಘದ ಸದಸ್ಯೆರ್ ಗುರುದೇವೆರ್ನ ಭಜನೆ ಮಲ್ತೆರ್.
ಸೌದಿ ಬಿಲ್ಲವ ಸಂಘಡ್ 230 ಸದಸ್ಯೆರ್ ಉಲ್ಲೆರ್. ಪ್ರತೀ ವರ್ಷ ನಡಪುನ ಗುರು ಜಯಂತಿ ಲೇಸ್ ಡ್ ಸದಸ್ಯೆರೆನ ವಾರ್ಷಿಕ ಸದಸ್ಯತ್ವದ ಪಣವುನ್ ಒಟ್ಟು ಮಲ್ತ್ ದ್, ಊರುಡು ಇಪ್ಪುನ ಗ್ರಾಮೀಣ ಭಾಗದ 8 ಬಿಲ್ಲವ ಸಂಘೊಲೆನ ಮುಖೇನ ಆಯಾ ಊರುದ ಬಿಲ್ಲವೆರೆನ ಬಡಪತ್ತ್ ದ ಜೋಕುಲೆನ್ ಗುರ್ತಿಸಾದ್ ಸ್ಕಾಲರ್ ಶಿಪ್ ಕೊರ್ಪೆರ್. ಬೊಕ್ಕ ಮದಿಮೆದ ಪ್ರಾಯೊಗ್ ಬತ್ತಿನ 8 ಪೊಣ್ಣು ಜೋಕುಲೆಗ್ ಪಣವುದ ಸಕಾಯನ್ ಕೊರೊಂದು ಬರೊಂದು ಉಲ್ಲೆರ್.
ಈ ಪೊರ್ತುಡು ಸಾಂಸ್ಕೃತಿಕ ಕಾರ್ಯಕ್ರಮ ಅಂಚೆನೆ ದಂಪತಿಲೆಗ್, ಸದಸ್ಯೆರೆಗ್ ಗೊಬ್ಬುದ ಪಂತೊಲು ನಡತ್ಂಡ್. ಇಂಡಿಯನ್ ಸೋಶಿಯಲ್ ಫೋರಮ್ ಕರ್ನಾಟಕ ಸ್ಟೇಟ್ ಕಮಿಟಿದ ಅಧ್ಯಕ್ಷೆರ್ ನಿಜಾಮುದ್ದೀನ್ ಬಜ್ಪೆ ಮೇರೆಗ್ ಮೇರ್ ಮಲ್ತಿನ ಎಡ್ಡೆ ಕೆಲಸೊಲೆನ್ ಗುರ್ತಿಸಾದ್ “ಆಪದ್ಬಾಂಧವೆ” ಪನ್ಪಿನ ಬಿರುದು ಕೊರ್ದು ಮಾನಾದಿಗೆ ಮಲ್ತೆರ್.
ಈ ಲೇಸ್ ಗ್ ಪೊರ್ಲುದ ಮಿತ್ತರ್ಮೆದ ಚಾವಡಿನ್ ಗಣೇಶ್ ಪೂಜಾರಿ ಬೊಕ್ಕ ಶೈಲೇಶ್ ಪೂಜಾರಿ ಉಂಡು ಮಲ್ತ್ ಕೊರ್ತೆರ್. ಅಂಚೆನೆ ದಮ್ಮಮ್ ಬಿಲ್ಲವ ಸಂಘದ ಉಪಾಧ್ಯಕ್ಷೆರ್ ಚೇತನ ಸದಾಶಿವ ಪೂಜಾರಿ ಬೊಕ್ಕ ಕಾರ್ಯದರ್ಶಿ ಸುಂದರ್ ದಾಸ್ ಪೂಜಾರಿ ಲೇಸ್ ಗ್ ಎಡ್ಡೆಪ್ಪುನು ಬಯಕಿಯೆರ್.
ಬತ್ತಿಂಚಿ ಮಾತ ಬಿನ್ನೆರೆಗ್ ಸಾಗರ್ ರೆಸ್ಟೋರೆಂಟ್ ದ ಕೆ. ಸಿ ಭಾಸ್ಕರ್ ಮೇರ್ ಅನ್ನ ಸಂತರ್ಪಣೆ ಕೊರ್ಯೆರ್. ಈ ಪೊರ್ಲುದ ಲೇಸ್ ನ್ ಜಗದೀಶ್ ಪೂಜಾರಿ ಬೊಕ್ಕ ರಂಜಿತ್ ಪೂಜಾರಿ ಸುಧಾರಿಕೆ ಮಲ್ತೆರ್.
Jai Gurudev Billava Sangha , Saudi Arabia celebrate Brahmashree Narayana Guru Jayanti
Riyadh: Jai Gurudev Billava Sangha, Saudi Arabia celebrated Sri Narayan Guru Jayanti on the 13 th of October.
The program was inaugurated by the president of the Sangha Mr and Mrs Leeladhar Gurujan, honorary president K C Bhaskar, secretary Prakash Udupi and joint secretary Rakshita Jagdish.
The Sangha has 230 members.On the occasion of Guru Jayanti donation is collected from members and distributed to the needy students back home through Billava association in the home town.Monitary aid is also given to needy families for conducting wedding of girls in the community.
Cultural programme was arranged on the occasion and compititions were held for the members.
Nizamuddin president of Karnataka state committee ,indian social forum was honoured with the title
” Apatbandava” for the social service done by him.
The beautiful stage decoration was done by Ganesh Poojary and Shailesh Poojary.
Chetan Sadashiva Poojary of Dammam Billava Sangha and Secretary Sundardas Poojary sent in their good wishes.
The food arrangements were made by K C Bhaskar if Sagar Restaurant.
The program was hosted by Jagdish Poojary and Ranjit Poojary.
ಇನಿ ಕುಡ್ಲದ ದ.ಕ ಜಿಲ್ಲಾ ಪಂಚಾಯತಿ ಸಭಾಂಗಣಡ್ ಬಿನ್ನಾಪು ಸ್ವೀಕಾರ ಮಲ್ಪುನ ಕಜ್ಜೋಡು ತುಳು ಬಾಸೆ ರಾಜ್ಯದ ಅಧಿಕೃತ ಅವೊಡು ಪಂದ್ ಕುಡ್ಲದ ತುಳು ಅಭಿಮಾನಿಲು ಕೆಲವು ತುಳು ಸಂಘಟನೆದ ಅಕುಲು ಸೇರ್ದ್ ಮಾನ್ಯ ಸಚಿವೆರ್ ಆಯಿನ ಸುನೀಲ್ ಕುಮಾರ್ ಗ್ ತುಳು ಆಯಿನಾತ್ ಬೇಗ ಅಧಿಕೃತ ಮಲ್ಪೊಡ್ ಪಂದ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರ್ ನಮ್ಮ ತುಳುನಾಡ್ ದ ಪೆರ್ಮೆದ ಸಚಿವೆರ್ ವಿ.ಸುನೀಲ್ ಕುಮಾರ್ ಒಂಜಿ ತಿಂಗೂಲ್ದ ಉಲಯಿ ತುಳು ಬಾಸೆನ್ ಕ್ಯಾಬಿನೆಟ್ ಗ್ ಪತೊಂದು ಬತ್ತ್ಂದ್ ಚರ್ಚೆ ಮಲ್ಪಾದ್ ಅಧಿಕೃತ ಮಲ್ಪಾವೆ ಪನ್ಪುನ ಭರವಸೆನ್ ಕೊರ್ಯೆರ್. ಅಂಚನೆ ನಮ್ಮ ತುಳುನಾಡ್ ದ ಜನಕುಲು ಅಮಸರ ಮಲ್ಪೆರೆ ಬಲ್ಲಿ, ಬಾರಿ ಶಾಂತಿಯುತ ವಾದ್ ಇಪ್ಪೊಡು ಪಂದ್ ಪಂಡೆರ್.
ಕುಡ್ಲ: ಬಿಲ್ಲವ, ಈಡಿಗ ಪಂದ್ 26 ಪಂಗಡಲೆನ ಅಭಿವೃದ್ಧಿಗಾದ್ ಬೊಕ್ಕ ಈ ಸಮುದಾಯಲೆಗ್ ನ್ಯಾಯಯುತವಾದ್ ತಿಕ್ಕೊಡಾಯಿನ ಸವಲತ್ತ್ ಲೆನ್ ಪಡೆಯೆರೆ ಸಮಾಜದ ಹಿರಿಯ ನಾಯಕೆರಾಯಿನ ಬಿ.ಜನಾರ್ದನ ಪೂಜಾರ್ಲೆನ ಮುತಾಲಿಕೆಡ್ 2023 ಫೆಬ್ರವರಿ ತಿಂಗೊಲ್ ಡು ಪೇಂಟೆಡ್ ಬೃಹತ್ ಸಮಾವೇಶ ಮಲ್ಪರೆ ಬಿರುವ ಸಮಾಜದಕುಲು ನಿರ್ಧಾರ ಮಲ್ತ್ ದೆರ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಐತಾರ ನಡತಿನ ಅಟ್ಟಣೆದ ಸಭೆಟ್ಟ್ ತುಳುನಾಡ್ ಜಿಲ್ಲೆದ ಸುಮಾರ್ ಬಿಲ್ಲವ ಸಂಘಟನೆಲೆನ ಪ್ರಮುಖೆರ್ ಪಕ್ಷ ಭೇದ ಇಜ್ಜಾಂದೆ ಒಗ್ಗಟ್ಟ್ ಡ್ ಸಮಾಜದ ಶಕ್ತಿಪ್ರದರ್ಶನ ನಡಪವುನ ಬಗೆಟ್ ನಿರ್ಣಯ ಮಲ್ತೆರ್. ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಪುದರ್ ಡ್ ನಿಗಮ ಸ್ಥಾಪನೆ ಮಲ್ತ್ ದ್ ಅಯಿತ ಅಡಿಟ್ ಬಿಲ್ಲವೆರೆಗ್ ಇಸೇಸ ಸವಲತ್ತ್ ಕೊರೊಡು ಬೊಕ್ಕ ಬಿಲ್ಲವೆರೆನ್ ಪ್ರವರ್ಗ 1ಕ್ ಸೇರ್ಸಾವೊಡು ಪನ್ಪುನ ನಿರ್ಣಯಲೆನ್ ನೆರ್ದ್ ದುಂಬು ಬ್ರಹ್ಮಾವರಡ್ ನಡತಿನ ಬಿಲ್ಲವೆರೆ ಸಮಾವೇಶಡ್ ನಿರ್ಣಯ ಮಲ್ತ್ ಇತ್ಂಡ್. ಈ ಬೇಡಿಕೆನ್ ಸರ್ಕಾರ ನನಲ ಈಡೇರಿಸಾದಿಜಿ ಪಂದ್ ಮುಖಂಡೆರ್ ಬೆಚ್ಚ ಆತೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಖಜಾಂಚಿ ಪದ್ಮರಾಜ್ ಪಾತೆರ್ದ್, ಬಿಲ್ಲವ ಸಮಾಜನ್ ರಾಜಕೀಯ ಪಕ್ಷಲು ಗಲಸೊಂದು ಉಲ್ಲ. ಆಂಡ ಸಮುದಾಯದಕಲೆಗ್ ಸವಲತ್ತು ತಿಕ್ಕೊಂದು ಉಂಡಾ ಪಂದ್ ಆತ್ಮವಿಮರ್ಶೆ ಮಲ್ಪೊಡಾಪುಂಡು. ಬಿಲ್ಲವೆರೆನ್ ಪ್ರವರ್ಗ 2ಎ ತ ಅಡಿಟ್ ಸೇರ್ಸದೆರ್. 100ಕ್ ಜಾಸ್ತಿ ಜಾತಿಲು ಈ ಪ್ರವರ್ಗಡ್ ಉಂಡು. ಇತ್ತೆ ರಾಜ್ಯದ ಕೆಲವು ಪ್ರಬಲ ಜಾತಿದಕುಲು ಈ ಪ್ರವರ್ಗ 2ಎ ಕ್ ಸೇರ್ಸಾಯೆರೆ ಸರ್ಕಾರದ ಮಿತ್ತ್ ಒತ್ತಡ ದೀತೆರ್. ನೇರ್ದ್ ಬಿಲ್ಲವೆರ್ ನನಾತ್ ವಂಚಿತೆರಾಪುನ ಸ್ಥಿತಿ ನಿರ್ಮಾಣ ಅಪುಂಡು ಪಂದ್ ಪಂಡೆರ್.
ಶ್ರೀ ನಾರಾಯಣಗುರು ವಿಚಾರ ವೇದಿಕೆ ರಾಜ್ಯಾಧ್ಯಕ್ಷೆರ್ ಸತ್ಯಜಿತ್ ಸುರತ್ಕಲ್ ಪಾತೆರ್ದ, ಉಭಯ ಜಿಲ್ಲೆಡ್ ಬಿಲ್ಲವ ಸಮಾಜ ಮಲ್ಲ ಸಂಖ್ಯೆಡ್ ಉಂಡು. ಆಂಡ ರಾಜಕೀಯ ಪಕ್ಷಲು ವೋಟುಡು ಉಂತರೆ ಅವಕಾಶ ಕೊರೊಂದು ಇಜ್ಜಿ. 8 ವಿಧಾನಸಭಾ ಸ್ಥಾನ ಇಪ್ಪುನ ಜಿಲ್ಲೆಡ್ ಕೇವಲ 1 ಸ್ಥಾನ ಮಾತ್ರ ಬಿಲ್ಲವೆರೆಗ್ ಕೊರ್ತುಂಡು ಪಂದ್ ಪಂಡೆರ್. ಸರ್ಕಾರಲು ಸಮಾಜದ ಅಭಿವೃದ್ಧಿದ ಬಿನ್ನಾಪುಗ್ ಸ್ವಂದನೆ ಮಲ್ತೊಂದು ಇಜ್ಜಿ, ನಮ್ಮ ಹಕ್ಕ್ ಲೆನ್ ನಮ ಸೇರ್ದ್ ದೆತೊನೊಂಡು ಪಂದ್ ರಾಷ್ಟ್ರೀಯ ಬಿಲ್ಲವೆರೆ ಮಹಾಮಂಡಲ ಅಧ್ಯಕ್ಷೆರ್ ರಾಜಶೇಖರ್ ಕೋಟ್ಯಾನ್ ಬಿನ್ನಾಪು ಮಲ್ತೆರ್.
ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ, ಶ್ರೀಕ್ಷೇತ್ರ ಗೆಜ್ಜೆಗಿರಿ ಅಧ್ಯಕ್ಷೆರ್ ಪೀತಾಂಬರ ಹೆರಾಜೆ, ರಾಷ್ಟ್ರೀಯ ಬಿಲ್ಲವೆರೆ ಮಹಾಮಂಡಲದ ಉಪಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ,ಒಡಿಪು ಬಿಲ್ಲವ ಯುವ ವೇದಿಕೆ ಅಧ್ಯಕ್ಷೆರ್ ಪ್ರವೀಣ್ ಪೂಜಾರಿ, ಬಿಲ್ಲವ ಪರಿಷತ್ ಅಧ್ಯಕ್ಷೆರ್ ನವೀನ್ ಅಮೀನ್, ಪ್ರಮುಖೆರ್ ಜಯಂತ ನಡುಬೈಲ್, ಅಚ್ಚುತ್ತ ಕಲ್ಮಾಡಿ, ಲೀಲಾಕ್ಷ ಕರ್ಕೇರ, ಜಗನ್ನಾಥ ಕೋಟೆ, ಅನಿಲ್ ಕುಮಾರ್, ಬೇಬಿ ಕುಂದರ್, ಪಿ.ಎ.ಪೂಜಾರಿ, ಸದಾನಂದ ಪೂಜಾರಿ, ಎಂ.ಎಸ್. ಕೋಟ್ಯಾನ್, ಚಿದಾನಂದ ಎಲ್ದಕ್ಕ, ಎಲ್ದಪ್ಪ ಪೂಜಾರಿ, ಜಯವಿಕ್ರಮ್, ಡಾ.ಅನುಸೂಯ, ಸುಖಲಾಕ್ಷಿ ಸುವರ್ಣ, ಮಾಜಿ ಮೇಯರ್ ವಿಜಯ ಅರುಣಾ, ಶ್ರೀಲತಾ ಬೊಕ್ಕ ಉಭಯ ಜಿಲ್ಲೆಲೆನ ಬಿಲ್ಲವ ಸಂಘಲು ಬೊಕ್ಕ ಯುವ ಸಂಘಟನೆಲೆನ 500ಕ್ ಜಾಸ್ತಿ ಬಿಲ್ಲವ ಪ್ರತಿನಿಧಿಲು ಸಭೆಟ್ಟ್ ಪಾಲ್ ಪಡೆದಿತ್ತೆರ್.
ಸುರತ್ಕಲ್ ಟೋಲ್ ದ ವಿಚಾರೊಡು ವಿಧಾನ ಸಭೆತ ಸದನಡ್ ಪ್ರಸ್ತಾಪ ಮಲ್ತಿನಪಗ ಸರಕಾರ ನೆನ್ ನಿಯಮ ಬಾಹಿರ ಬೊಕ್ಕ ಕೆಲವೊಂಜಿ ತಾಂತ್ರಿಕ ಕಾರಣಲೆರ್ದ್ ಟೋಲ್ ಗೇಟ್ ದೆಪ್ಪೆರೆ ಸಮಯಾವಕಾಶ ಬೋಡುಂದು ಪಂದಿತ್ತ್ಂಡ್
ಆತಾನಗನೇ ಜಿಲ್ಲಾಧಿಕಾರಿಲು ಈ ಬಗೆಟ್ ರಾಜ್ಯ ಮಾರ್ಗದ ಅಧಿಕಾರಿಲೆನ ಸಭೆ ಲೆತ್ತ್ ದ್ ಟೋಲ್ ದೆಪ್ಪೆರೆ ಇಪ್ಪುನ ತಾಂತ್ರಿಕ ಕಾರಣಲೆನ್ ಸರಿಮಲ್ಪೊಡಿತ್ತ್ಂಡ್. ಆಂಡ ಇತ್ತೆ ಈತ್ ಮಾತ ಗೊಂದಲಗ್ ಕಾರಣ ಜಿಲ್ಲಾಧಿಕಾರಿಲೆನ ನಿರ್ಲಕ್ಷ್ಯನೇ ಪಂದ್ ಶಾಸಕೆರ್, ವಿಪಕ್ಷ ಉಪನಾಯಕೆರ್ ಯು.ಟಿ.ಖಾದರ್ ಪಂಡೆರ್. ಅವ್ವತ್ತಂದೆ ನನ ಆಂಡಲ ಸಭೆ ಲೆತ್ ದ್ ಈ ಸಮಸ್ಯೆನ್ ಸರಿ ಮಲ್ಪೊಡು. ಅಂಚನೆ ಜಬದಾರಿ ಸ್ಥಾನಡ್ ಇಪ್ಪುನ ಮಾನ್ಯ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಮೇರ್ ಗೊಂದಲ ಸರಿ ಮಲ್ಪೊಡು ಬುಡ್ದು ಈ ಬಗೆಟ್ ಕೋರ್ಟ್ ಗ್ ಪೋಪೆ ಪಂಡ್ ದ್ ಜನಕುಲೆಗ್ ನನಾತ್ ಗೊಂದಲ ಕೊರ್ಪಿನ ಸರಿ ಅತ್ತ್ ಪಂದ್ ಪಂಡೆರ್.
ಕೈತಲ್ ದ ಗೋವಾದಂಚಿನ ಎಲ್ಯ ರಾಜ್ಯದ ಬಾಸೆ ಕೊಂಕಣಿಗ್ ಮಾನ್ಯತೆ ತಿಕ್ಕುಂಡಾಂಡ ಸಾಹಿತ್ಯ, ಸಂಸ್ಕೃತಿ, ಲಿಪಿ ಸಂಪನ್ನ ತುಲು ಬಾಸೆಗ್ ಲ ಅಂಚಿನನೆ ಮಾನ್ಯತೆ ತಿಕ್ಕೊಡು, ಆಯಿಕ್ಕಾದ್ ತುಳುನಾಡ್ ದ ರಾಜಕಾರಣಿಲು ಮಾತ ಸೇರ್ದ್ ಒತ್ತಾಯ ಮಲ್ಪೊಡು ಪಂದ್ ಅಮೆರಿಕಾದ ಎಎಟಿಎ (ಆಟ) ಸಂಸ್ಥೆದ ಅಧ್ಯಕ್ಷೆರ್ ಭಾಸ್ಕರ್ ಶೇರಿಗಾರ್ ಬೊಕ್ಕ ಸಂಸ್ಕೃತಿ ಇಲಾಖೆದ ಮಂತ್ರಿ ಸುನಿಲ್ ಕುಮಾರ್ ಬೊಕ್ಕ ಬೇತೆ ತುಳುನಾಡ್ ದ ಶಾಸಕೆರ್ ಮಂತ್ರಿಲೆನ್ ಬಿನ್ನಾಪು ಮಲ್ತೆರ್.
ಆಲ್ ಅಮೇರಿಕಾ ತುಳು ಅಸೋಸಿಯೇಷನ್ ವರ್ಷದ ತುಳು ಉಚ್ಚಯ 2022 ವರ್ಚುಯಲ್ ಲೇಸ್ ಡ್ ದೇಶ ವಿದೇಶದ ತುಳು ಅಭಿಮಾನಿಲೆನ್ ಉದ್ದೇಶಿಸಾದ್ ಎಎಟಿಎ ನಡತೊಂದು ಬತ್ತಿನ ಬೊಕ್ಕ ಆಯಿನ ಉದ್ದೇಶದ ಮಾಹಿತಿ ಕೊರ್ಯೆರ್. ತುಲುಬಾಸೆ, ತುಲುಲಿಪಿ ಬೊಕ್ಕ ಸಾಹಿತ್ಯ ಸಂಸ್ಕೃತಿನ್ ಒರಿಪಾವುನೆ ಬೊಕ್ಕ ಬುಲೆಪಾವೊನೆ ಎಎಟಿಎ ಸಂಸ್ಥೆದ ಮುಖ್ಯ ಉದ್ದೇಶ ಆತ್ಂಡ್. ಅಂಚಾದ್ ವರ್ಷಗ್ ರಡ್ಡ್ ಸರ್ತಿ ಬಿಸು ಬೊಕ್ಕ ತುಳು ಉಚ್ಚಯ ಲೇಸ್ ನ್ ಮಲ್ಪೊಡು ಪಂದ್ ಪಂಡೆರ್. ಈ ಸರ್ತಿದ ತುಳು ಉಚ್ಚಯ 2022ಟ್ ಕನ್ನಡ ಸಂಸ್ಕೃತಿ ಬೊಕ್ಕ ಇಂಧನ ಇಲಾಖೆದ ಸುನಿಲ್ ಕುಮಾರ್, ಹಂಪಿದ ಕನ್ನಡ ವಿಶ್ವವಿದಾಲಯದ ನಿವೃತ್ತ ಉಪಕುಲಪತಿ ಡಾ. ವಿವೇಕ್ ರೈ, ವಿದ್ವಾಂಸೆರ್ ವೆಂಕಟ್ರಮಣ ಭಟ್ ಬೊಕ್ಕ ದೈಜಿ ವರ್ಲ್ಡ್ ಸಂಸ್ಥೆದ ಮುಖ್ಯಸ್ಥೆರ್, ಪತ್ರಕರ್ತೆರ್ ವಾಲ್ಟರ್ ನಂದಳಿಕೆ ಬಿನ್ನೆರಾದ್ ಇತ್ತೆರ್.
ತುಳು ಭಾಷೆದ ಲೇಸ್ ನ್ ತುಳುನಾಡ್ ಡ್ ನಡಪುನವು ಇಸೇಸ ಅತ್ತ್. ಆಂಡ ಪಿದಯಿ ದೇಶಡ್ ತುಳುವೆರ್ ಒಂಜೆ ಕುಟುಂಬದಕಲೆನಲೆಕ್ಕ ಒಟ್ಟಿಗೆ ಸೇರ್ದ್ ನಡಪುನೆ ಇಸೇಸ ಪಂದ್ ಎಎಟಿಎ ಸಂಸ್ಥೆದ ಲೇಸ್ ನ್ ಪುಗರಿರ್ಯೆರ್.
ಡಾ. ವಿವೇಕ್ ರೈ ತುಲು ಬಾಸೆದ ಕಾವ್ಯ ಸೌಂದರ್ಯನ್ ಬುಡುಪ ಬುಡುಪಾದ್ ಪನೊಂದು ಈ ಪಾಡ್ದನ ಪದ್ಯಲು ಕೃಷಿ ಬೇಲೆದಕುಲೆನ ನಡುತ ಸಂಬಂಧ ಸಂಕೋಲೆ ಆದ್ ಬೇಲೆ ಮಲ್ತೊಂದು ಇಪ್ಪುನೆನ್ ನೆಂಪು ಮಲ್ತೆರ್. ಕೃಷಿ ಸಂಪತ್ತು ಸಂಪನ್ನ ಆವೊಡು ಪನ್ಪುನವು ಈ ಪದ್ಯದ ಮೂಲ ಸಂಕಲ್ಪ ಆತ್ಂಡ್, ನೆನ್ ಮಾತ ನನದ ಪೀಳಿಗೆಗ್ ತೆರಿಪವುನ ಜಬದಾರಿನ್ ನೆಂಪು ಮಲ್ತೆರ್. ತುಳು ಕನ್ನಡ ವಿದ್ವಾಂಸೆರ್ ವೆಂಕಟರಾಮ ಭಟ್ ಪಾತೆರ್ದ್ ”ತುಳುಟ್ ನನಾತ್ ಘನ ಸಾಹಿತ್ಯದ ರಚನೆ ಆವೊಡು ಪನ್ಪುನ ಕಾರಣಗ್ ಲಕ್ಷ್ಮೀಶನ ಜೈಮಿನಿ ಭಾರತನ್ ತುಳುಕ್ ಅನುವಾದ ಮಲ್ಪೆರೆ ಸುರು ಆತ್ಂಡ್. ತುಳುತ ಪರತ್ ಶಬ್ದಲೆನ್ ಒರಿಪಾವುನ ಪೊಸ ಶಬ್ದಲೆನ್ ಪುಟ್ಟವೊಂದು ತುಳು ಭಾಷೆನ್ ಬುಲೆಪವೊಡು” ಪಂದ್ ಪಂಡೆರ್.
ಡೈಜಿ ವರ್ಲ್ಡ್ ಸಂಸ್ಥೆದ ಮುಖ್ಯಸ್ಥೆರ್ ವಾಲ್ಟರ್ ನಂದಳಿಕೆ ”ಪಿದಯಿ ದೇಶಡ್ ಬಾಸೆನ್ ಬುಲೆಪುನ ಎಎಟಿಎ ಸಂಸ್ಥೆನ್ ಪುಗರೊಂದು ತುಲು ಬಾಸೆ ಎಲ್ಮ್ ನೇ ಪರಿಚ್ಚೇಧಗ್ ಸೇರುನೆಟ್ ವಿದೇಶದ ತುಳುವೆರ್ ಸಕಾಯ ಆವೊಡು” ಪಂದ್ ಪಂಡೆರ್.
ಅಮಿತಾ ಅನುಜ್ ಪ್ರಾರ್ಥನೆ ಮಲ್ತೆರ್. ಆಟದ ಉಪಾಧ್ಯಕ್ಷೆರ್ ಶಿರೀಶ್ ಶೆಟ್ಟಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರೆ. ಸುದರ್ಶನ್ ಶೆಟ್ಟಿ, ಕ್ಯಾಲಿಫೋರ್ನಿಯಾದ ಅನಿತಾ ನಾಯಕ್,ಪ್ರೀತಿ ಶೆಟ್ಟಿ, ರೋಷನ್ ಪಯಸ್ ಬಿನ್ನೆರೆನ ಮಾಹಿತಿ ಕೊರ್ಯೆರ್.
ಕುಡ್ಲದ ನಂದಗೋಕುಲ ಬೊಕ್ಕ ಗ್ರೀನ್ ಪಾರ್ಕ್ ಟೈಗರ್ಸ್ ದ ಶ್ರೀ ದೇವಿ ವೈಭವ ಬೊಕ್ಕ ಪಿಲಿನಲಿಕೆ, ವಿಠ್ಠಲ ನಾಯಕೆರೆನ ಗೀತಾ ಸಾಹಿತ್ಯ, ಸನಾತನ ನಾಟ್ಯಾಲಯದ ಸತ್ಯನಾಪುರ ಸಿರಿ ನೃತ್ಯ ನಾಟಕ, ಬೊಕ್ಕ ಐಲೆಸಾದ ಡಾ.ರಮೇಶ್ಚಂದ್ರ ತಂಡದ ಗೀತಾ ಗಾಯನ ನಡತ್ಂಡ್.
ಈ ಲೇಸ್ ನ್ ಸಿದ್ದಾರ್ಥ್ ಶೆಟ್ಟಿ ಬೊಕ್ಕ ಮಿಥಾಲಿ ಸಿದ್ದಾರ್ಥ್ ಶೆಟ್ಟಿ ಡಲ್ಲಾಸ್ ಸುಧಾರಿಕೆ ಮಲ್ತೆರ್. ಪಿಕ್ಚರ್ ದ ನಟೆ ವಿನೀತ್, ಅಭಿಷೇಕ್ ಶೆಟ್ಟಿ ಬೊಕ್ಕ ಶ್ರೀವಲ್ಲಿ ರೈ ಮಾರ್ಟೆಲ್ ಮನೋರಂಜನೆನ್ ಕೊರ್ಯೆರ್.
ಪೊಪ್ಪನ ಒಟ್ಟಿಗೆ ಪೊಲೀಸ್ ಠಾಣೆಗ್ ಬತ್ತಿನ 3 ವರ್ಷದ ಬಾಲೆ ಒರಿ ಅಮ್ಮ ಎಂಕ್ ಚಾಕೋಲೆಟ್, ಕ್ಯಾಂಡಿ ತಿನಿಯೆರೆ ಬುಡ್ಪುಜೆರ್ ಪಂದ್ ಕೇಸ್ ಕೊರ್ನ ಘಟನೆ ಮಧ್ಯಪ್ರದೇಶದ ಭುರಾನ್ ಪುರ್ ಜಿಲ್ಲೆದ ಡೆಧಾತಲೈ ಗ್ರಾಮಡ್ ನಡತ್ಂಡ್.
ಈ ಕೇಸ್ ನ್ ಪೊಂಜೋವ್ ಪೊಲೀಸೆರ್ ದೆತೊಂದೆರ್. ಬಾಲೆ ಮೀನಗ ಚಾಕೋಲೆಟ್ ಕೇನ್ನೆಕ್ ಕೊರ್ತಿಜೆರ್. ಬೊಕ್ಕ ಕುಡ ಮೀದ್ ಬತ್ ದ್ ಕೇನ್ನಗ ಅಮ್ಮ ಮೆಲ್ಲ ಹಾಕಿಯೆರೆ. ನೇರ್ದ್ ಬುಲಿಪೆರೆ ಸುರು ಮಲ್ತಿನ ಬಾಲೆ, ಪೊಲೀಸ್ ಠಾಣೆಗ್ ಲೆತೊಂದು ಪೋಯೆರ್ ಅಟ ಮಲ್ತ್ಂಡ್. ಅಯಿಕ್ ಲೆತ್ತೊಂದು ಬತ್ತೆ ಪಂದ್ ಬಾಲೆದ ಅಮ್ಮೆರ್ ಪಂಡೆರ್.
