ಬಿಹಾರ: ಬಿಹಾರದ ಕತಿಹಾರ್ ಜಿಲ್ಲೆಡ್ ಬೈಕ್ಡ್ ಬತ್ತಿನ ರಡ್ಡ್ ಜನ ಬಚ್ಚಾಲಿಲು ಬಿಜೆಪಿದ ಮಾಜಿ ಜಿಲ್ಲಾಧ್ಯಕ್ಷೆರ್ ತೆಲ್ಟಾ ಗ್ರಾಮದ ಸಂಜೀವ್ ಮಿಶ್ರಾ ಮೆರೆಗ್ ಗುಂಡು ಪಾಡ್ದ್ ಕೆರಿನ ಘಟನೆ ಸೋಮಾರ ನಡತ್ಂಡ್.
ಮೇರ್ ತನ್ನ ಇಲ್ಲದ ಪಿದಯಿ ಕುಲ್ಲುದಿಪ್ಪುನ ಪೊರ್ತುಡು ಬಚ್ಚಾಲಿಲು ಬತ್ತ್ ದ್ ಮೆರೆನ ಮಿತ್ತ್ ಗುಂಡು ಪಾಡ್ದೆರ್. ರಡ್ಡ್ ಗುಂಡುದ ಪೆಟ್ಟ್ ರ್ದ್ ಮೇರ್ ಇತ್ತಿನ ಜಾಗೆಡೆ ತೀರ್ ಪೋಯೆರ್ ಪಂದ್ ವರದಿ ತೆರಿಪಾದ್ಂಡ್.
ತಮಿಳುನಾಡ್ : ತಮಿಳುನಾಡ್ ದ ತೆಂಕಶಿ ಜಿಲ್ಲೆದ ಕಾಡ ಜಾಗೆಡ್ ಕರಡಿಯೊಂಜಿ ದಾಳಿ ಮಲ್ತ್ ದ್, ಮೂಜಿ ಜನಕ್ ಪೆಟ್ಟಾಯಿನ ಘಟನೆ ನಡತ್ಂಡ್.
ಒರಿ ಬೈಕ್ ಡ್ ಕಾಡ ಜಾಗೆಡ್ ಪೋವೊಂದು ಇತ್ತಿನ ಪೊರ್ತುಡು ಈ ಕರಡಿ ದಾಳಿ ಮಲ್ದ್ಂಡ್. ಆ ಪೊರ್ತುಡು ಅಲ್ಪ ಇತ್ತಿನ ಜನಕುಲು ರಕ್ಷಣೆಗ್ ಬೈದೆರ್. ಆಂಡ ಕರಡಿ ಬಲಿಪಂದೆ ಅಕಲ್ನ ಮಿತ್ತ್ ಲ ದಾಳಿ ಮಲ್ದ್ಂಡ್. ಇಚಾರ ತೆರಿದ್ ಜಾಗೆಗ್ ಬತ್ತಿನ ಅರಣ್ಯ ಇಲಾಖೆ ಸಿಬ್ಬಂದಿಲು ಮಸ್ತ್ ಪೆಟ್ಟಾಯಿನ ಮೂಜಿ ಜನನ್ ಕರಡಿದ ಬಾಯಿರ್ದ್ ತಪ್ಪಾದ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಬೊಕ್ಕ ಈ ಕರಡಿನ್ ಪತ್ತ್ ದ್, ಅರಣ್ಯ ಪ್ರದೇಶಗ್ ಬುಡಿಯೆರೆ ಆಂಡ್ ಪಂದ್ ಅರಣ್ಯ ಇಲಾಖೆ ಅಧಿಕಾರಿ ಮಾಹಿತಿ ಕೊರ್ತೆರ್.
ಒಡಿಪು: ಎಲಿ ಪಾಷಾಣ ತಿಂದ್ ಆತ್ಮಹತ್ಯೆ ಮಲ್ಪೆರೆ ತೂಯಿನ ಪೊಂಜೋವು ಚಿಕಿತ್ಸೆ ಫಲಕಾರಿ ಆವಂದೆ ಶನಿಯಾರ ಆಸ್ಪತ್ರೆಡ್ ತೀರ್ ಪೋಯಿನ ಘಟನೆ ಒಡಿಪು ಜಿಲ್ಲೆದ ಬ್ರಹ್ಮಾವರಡ್ ನಡತ್ಂಡ್.
ಮೇರ್ ಬ್ರಹ್ಮಾವರದ ಕೆ.ಜೆ. ಶೈಜಿ ಥೋಮಸ್ ಮೆರೆನ ಬೊಡೆದಿ ಬಿನ್ಸಿ ಶೈಜಿ ಥೋಮಸ್ (30) ಪಂದ್ ತೆರಿದ್ ಬೈದ್ಂಡ್. ಮೆರೆನ ಕಂಡನಿ ದುಬೈಡ್ ಇಪ್ಪುನ ಕಾರಣ ಮೇರ್ ಕಂಡನಿನ ಇಲ್ಲಲ್ ಮಗಲೆನೊಟ್ಟಿಗೆ ಇತ್ತೆರ್. ಅ. 26 ದಾನಿ ರಾತ್ರೆ ಸುಮಾರ್ 10 ಗಂಟೆದ ಪೊರ್ತುಡು ಎಲಿ ಪಾಷಾಣ ತಿಂದಿನ ಮೇರ್ ಅ.31ದಾನಿ ಕಕ್ಕೆರೆ ಸುರು ಮಲ್ದೆರ್. ಕೂಡ್ಲೆ ಮೆರೆನ್ ಬ್ರಹ್ಮಾವರ ಜೀವನ್ ಜ್ಯೋತಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ವೈದ್ಯೆರ್ ಕೊರ್ನ ಸಲಹೆದಂಚನೆ ಕೂಡ ನ. 3ಕ್ ಮಣಿಪಾಲದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಆಂಡ ಅಲ್ಪ ಚಿಕಿತ್ಸೆ ಫಲಕಾರಿ ಅವಂದೆ ಮೇರ್ ನ. 5 ಕ್ ಬೊಲ್ಪುಗು ತೀರ್ ಪೋಯೆರ್. ಆತ್ಮಹತ್ಯೆಗ್ ದುಂಬು ಡೆತ್ನೋಟ್ ಪತ್ತೆ ಆತ್ಂಡ್. ಕಾರಣ ತೆರಿದ್ ಬೈದಿಜಿ. ಈ ಬಗೆಟ್ ಬ್ರಹ್ಮಾವರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಮಾಣಿ ಕೊಡಾಜೆಡ್ ಪೊಸ ರಿಕ್ಷಾ ನಿಲ್ದಾಣಗ್ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್ ಉಳಿಪ್ಪಾಡಿ ಕೆಸರ್ ಕಲ್ಲ್ ಪಾಡಿಯೆರ್.
ಈ ಪೊರ್ತುಡು ಬಂಟ್ವಾಳ ಬಿಜೆಪಿ ಅಧ್ಯಕ್ಷೆರ್ ದೇವಪ್ಪ ಪೂಜಾರಿ, ಬೂಡಾ ಅಧ್ಯಕ್ಷೆರ್ ದೇವದಾಸ ಶೆಟ್ಟಿ, ಸುಲೋಚನ ಜಿಕೆ ಭಟ್, ಅನಂತಾಡಿ ಗ್ರಾ.ಪಂ ಅಧ್ಯಕ್ಷೆರ್ ಗಣೇಶ್, ನೆಟ್ಲಮುಡ್ನೂರು ಗ್ರಾ.ಪಂ ಅಧ್ಯಕ್ಷೆರ್ ಸತೀಶ್, ವೀರಕಂಭ ಗ್ರಾ.ಪಂ ಅಧ್ಯಕ್ಷೆರ್ ದಿನೇಶ್, ಬಿಜೆಪಿ ಪ್ರಮುಖೆರ್ ಡೊಂಬಯ ಅರಳ ಸನತ್ ಕುಮಾರ್ ರೈ, ಅಶೋಕ್ ರೈ, ತನಿಯಪ್ಪ ಗೌಡ, ಪುಷ್ಪರಾಜ್ ಚೌಟ, ಗಣೇಶ್ ರೈ ಮಾಣಿ, ಬೊಕ್ಕ ಸ್ಥಳೀಯೆರ್ ಇತ್ತೆರ್.
ಗದಗ: ದೇವಲ್ಯಡ್ ಕೊರ್ಪುನ ತೀರ್ತ ಪರ್ಪುನೆರ್ದ್ ಸೀಕ್ ಬರ್ಪುಂಡು. ತೀರ್ಥ ಕೊರ್ಪುನಕುಲು ಸರಿಯಾದ್ ಕೈ ದೆಕ್ಕ್ ದ್ ಇಪ್ಪುಜೆರ್. ನೇರ್ದಾವೆರ ಏತೋ ಜನ ಕಕ್ಕ್ ದೆರ್ ಪಂದ್ ಮಾಜಿ ಸಚಿವೆ ಬಿ.ಟಿ. ಲಲಿತಾ ನಾಯಕ್ ಪಂಡೆರ್.
ಮಾತೆರ್ನಲ ಇಲ್ಲಲ್ ಲ ನೀರ್ ಉಂಡು. ಅಂಚ ಇಪ್ಪುನಗ ತೀರ್ಥ ದಾಯೆಗ್ ಪರೋಡು, ಪುನ ಪೊತ್ತಾದ್ ಗಂಗಾ ತುದೆಕ್ ದಕ್ಕುವೆರ್, ನೇರ್ದಾವೆರ ತುದೆಟ್ ಪುನೊಕ್ಕುಲು ನೀಂದೊಂದು ಬರ್ಪ. ಇಂಚಿನ ನೀರ್ ನ್ ಗಂಗಾ ನೀರ್ ಪಂದ್ ದಾಯೆ ಪರೋಡು ಪಂದ್ ಮೇರ್ ಪ್ರಶ್ನೆ ಮಲ್ದೆರ್.
ತೋಜಂದಿನ ದೇವೆರೆಗ್ ಪೂಜೆ ಮಲ್ಪುನೆರ್ದ್ ಪೂ, ತುತ್ತೈತ ದಾಯೆ ಪಾಡೊಡು. ದೇವಲ್ಯಡ್ ಯೆರಾ ಪಂಡೆರ್ ಪಂದ್ ದುಡ್ಡು ಪಾಡುವೆರ್. ಇಂಚ ಜನಕುಲು ಅನಗತ್ಯ ದುಡ್ಡು ವೇಸ್ಟ್ ಮಲ್ಪರೆ ಬಲ್ಲಿ. ಆಂಡ ಇತ್ತೆ ಜನಕುಲೆಗ್ಲಾ ತಿಳುವಳಿಕೆ ಬತ್ತ್ ದ್ ಎಚ್ಚಿನಕುಲು ದೇವಲ್ಯಡ್ ದುಡ್ಡು ಪಾಡೊಂದು ಇಜ್ಜೆರ್ ಪಂದ್ ಪಂಡೆರ್. ಪೂಜೆ ಪಂಡ ಶರೀರ, ಮನಸ್ಸ್ ನ್ ಶುದ್ಧಡ್ ದೀಪುನವು, ನೆನ್ ಸರ್ಕಾರಲು, ಸಂಘಸಂಸ್ಥೆಲು ಜನಕುಲೆಗ್ ಮನವರಿಕೆ ಮಲ್ತ್ ದ್ ಕೊರೊಡು ಪಂದ್ ತನ್ನ ಅಭಿಪ್ರಾಯನ್ ತೆರಿಪಾದೆರ್.
ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಬಲಿ ಉಚ್ಚಯ ನ.28 ಬೊಕ್ಕ ನ.29 ದಾನಿ ನಡಪರೆ ಉಂಡು.
ಈ ಲೇಸ್ ಶಿಬರೂರು ವೇದಮೂರ್ತಿ ಶ್ರೀ ಗೋಪಾಲಕೃಷ್ಣ ತಂತ್ರಿ ಮೆರೆನ ಮುತಾಲಿಕೆಡ್ ನಡಪುಂಡು. ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ದರ್ಶನ ಪಡೆದ್, ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ತಂತ್ರಿಲು, ಅರ್ಚಕೆರ್, ಸಿಬ್ಬಂದಿ ವರ್ಗ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಬೊಕ್ಕ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್, ಸದಸ್ಯೆರ್ ಟಿ.ಕೆ ಮಧುಸೂದನ್ ಆಚಾರ್, ವಿಜಯ ಕುಮಾರ್ ರೈ, ಲೋಕಯ್ಯ ಪೂಜಾರಿ, ಪುರುಷೋತ್ತಮ ರಾವ್, ಯೋಗೀಶ್ ಆರ್. ಕೋಟ್ಯಾನ್, ವಿಶ್ವನಾಥ ವಿಪುಲ ಡಿ.ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ ಲೆಪ್ಪೋಲೆಡ್ ತೆರಿಪಾದೆರ್.
ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ನ. 28, 29 ದಾನಿ ಸುಬ್ರಹ್ಮಣ್ಯ ಷಷ್ಠಿ ಸರಳವಾದ್ ನಡಪರೆ ಉಂಡು.
ಷಷ್ಠಿ ಉಚ್ಚಯದ ಅಟ್ಟಣೆಗಾದ್ ದೇವಲ್ಯದ ಸಭಾಭವನಡ್ ಬೇತೆ ಬೇತೆ ಸಂಘ ಸಂಸ್ಥೆಲು ಬೊಕ್ಕ ಗ್ರಾಮಸ್ಥೆರೆನ ಸಭೆಟ್ಟ್ ಈ ವಿಷಯ ತೆರಿದ್ ಬೈದ್ಂಡ್. ಸಭೆತ್ತ ಗುರ್ಕಾರ್ಮೆ ಒಯಿಸ್ ದಿತ್ತಿನ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಹರಿದಾಸ್ ಭಟ್ ಪಾತೆರ್ದ್, ದೇವಲ್ಯದ ಜೀರ್ಣೋದ್ಧಾರದ ಬೇಲೆ ಆವೊಂದುಂಡು. ಈ ಸರ್ತಿ ಷಷ್ಠಿ ಉಚ್ಚಯನ್ ಸರಳವಾದ್ ಆಚರಣೆ ಮಲ್ಪರೆ ತೀರ್ಮಾನ ಮಲ್ದ್ಂಡ್. ದೇವೆರೆನ ಬಲಿ ಉಚ್ಚಯ, ಅನ್ನ ಸಂತರ್ಪಣೆ ಮಾತ್ರ ನಡಪುಂಡು. ರಥೋತ್ಸವ ಇಪ್ಪುಜಿ, ಅಂಚಾದ್ ಭಕ್ತೆರ್ ಸಹಕಾರ ಕೊರ್ದು ದೇವಲ್ಯದ ಅಭಿವೃದ್ಧಿಗ್ ಸಕಾಯ ಮಲ್ಪೊಡು ಪಂದ್ ಪಂಡೆರ್. ಈ ಪೊರ್ತುಡು ಪ್ರಧಾನ ಅರ್ಚಕೆರ್ ಮಧುಸೂದನ್ ಆಚಾರ್, ಜೀರ್ಣೋದ್ಧಾರ ಸಮಿತಿದ ಮೋಹನದಾಸ, ರತ್ನಾಕರ ಗುರಿಕಾರ, ವಿನೋದ್ ಸಾಲ್ಯಾನ್, ಭಾಸ್ಕರ್ ಅಮೀನ್ ತೋಕೂರು, ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ವಿಜಯಕುಮಾರ್ ರೈ, ಪುರುಷೋತ್ತಮ ರಾವ್, ಲೋಕಯ್ಯ ಸಾಲ್ಯಾನ್, ಯೋಗೀಶ್ ಕೋಟ್ಯಾನ್, ವಿಶ್ವನಾಥ್, ವಿಪುಲ ಡಿ. ಶೆಟ್ಟಿಗಾರ್ ಬೊಕ್ಕ ಗ್ರಾಮಸ್ಥೆರ್ ಇತ್ತೆರ್.
ಹೊಸದಿಲ್ಲಿ: ಆರ್ಥಿಕವಾದ್ ಪಿರ ಒರಿದಿನ ವರ್ಗದಕಲೆಗ್(ಇಡಬ್ಲ್ಯುಎಸ್) ಕಾಲೇಜ್ ಲೆಗ್ ಬೊಕ್ಕ ಸರಕಾರಿ ಬೇಲೆಲೆಡ್ ಶೇ.10 ಮೀಸಲಾತಿ ಕೊರ್ಪಿನೆಕ್ಕ್ ಸುಪ್ರೀಂಕೋರ್ಟ್ ಸೋಮಾರ ಅನು ಕೊರ್ತುಂಡು.
ಉಂದು ಸಂವಿಧಾನದ ಮೂಲ ರಚನೆನ್ ತತ್ತ್ ದಿಜಿ ಪಂದ್ ಸುಪ್ರೀಂ ಕೋರ್ಟ್ ಪನ್ತ್ಂಡ್.
ಐನ್ ಜನ ನ್ಯಾಯಾಧೀಶೆರೆನ ಸಾಂವಿಧಾನಿಕ ಪೀಠಡ್ ನಾಲ್ ನ್ಯಾಯಾಧೀಶೆರ್ ನಕುಲು ಆರ್ಥಿಕವಾದ್ ಪಿರವು ಒರಿನ ವರ್ಗದಕಲೆಗ್ ಶೇ.10 ಮೀಸಲಾತಿದ ತೀರ್ಪು ಕೊರ್ತೆರ್.
ಇಡಬ್ಲ್ಯುಎಸ್ ಮೀಸಲಾತಿನ್ 2019 ತ ಸಾರ್ವತ್ರಿಕ ಚುನಾವಣೆದ ದುಂಬು ಸುರು ಮಲ್ದಿತ್ತೆರ್. ಅವೆತ್ರ ವಿರುದ್ಧ 40 ಅರ್ಜಿಲೆನ್ ಸುಪ್ರೀಂ ಕೋರ್ಟ್ಡ್ ಸಂದಾದಿತ್ತೆರ್.
ಒಡಿಪು: ಉತ್ಥಾನ ದ್ವಾದಶಿದ ಲೆಕ್ಕೊಡು ಶ್ರೀಕೃಷ್ಣ ಮಠಡ್ ಸುರು ಆಯಿನ ನಾಲ್ ದಿನತ ತೆಪ್ಪೋತ್ಸವ ಬೊಕ್ಕ ಲಕ್ಷ ದೀಪೋತ್ಸವ, ಮಹೋತ್ಸವಡ್ ಸಾರ ಸಾರ ಭಕ್ತೆರ್ ಪಾಲ್ ಪಡೆತೆರ್.
ಈ ಲೇಸ್ ಡ್ ಪರ್ಯಾಯ ಕೃಷ್ಣಾಪುರ ಮಠದ ಶ್ರೀ ವಿದ್ಯಾಸಾಗರ ತೀರ್ಥ ಸ್ವಾಮೀಜಿ ಪೂಜೆ ಸಂದಾಯೆರ್.
ಬಯ್ಯಗ್ ಬೇತೆ ಬೇತೆ ಮಠತ ಹಿರಿಯ-ಕಿರಿಯ ಸ್ವಾಮಿಲು ರಥಬೀದಿಡ್ ಸೇರ್ದ್ ಲಕ್ಷ ದೀಪೋತ್ಸವನ್ ಮಲ್ತೆರ್. ನೆಟ್ ಸಾರ ಸಾರ ಭಕ್ತೆರ್ ಸೇರ್ದ್ ದೀಪಲೆನ್ ಪೊತ್ತಾದ್ ಆಶೀರ್ವಾದ ಪಡೆಯೆರ್.
ಉಚ್ಚಯ ಮೂರ್ತಿನ್ ಅಲಂಕಾರ ಮಲ್ತಿನ ತೆಪ್ಪಡ್ ದೀದ್ ಸಂಗೀತ ವಾದ್ಯರ್ದ್ ಕೆರೆತ ಸುತ್ತಲ ಕೊನೊಯೆರ್. ನ. 8 ಮುಟ್ಟ ಈ ಲಕ್ಷದೀಪೋತ್ಸವ ನಡಪರೆ ಉಂಡು.
ಆರ್. ಎಸ್. ಎಸ್ ಕರ್ನಾಟಕ ದಕ್ಷಿಣ ಪ್ರಾಂತ್ಯದ ಧರ್ಮ ಜಾಗರಣದ ಸಮನ್ವಯ ಪರಿಯೋಜನಾ ಪ್ರಮುಖ್ ಬೊಕ್ಕ ಅಲೆಮಾರಿ ಜನಾಂಗದ ಎಡ್ಡೆಪ್ಪುಗಾದ್ ಬೆಂದಿನ ಭಾಸ್ಕರ್ ದಾಸ್ ಎಕ್ಕಾರ್ ಐತಾರ ಬಯ್ಯಗ್ ಬೆಂಗ್ಲೂರ್ ದ ಜೈನ್ ಆಸ್ಪತ್ರೆಡ್ ದೇವೆರೆ ಪಾದ ಸೇರ್ಯೆರ್.
ಮೇರ್ ಭಾರತ ಸರಕಾರದ ಸಾಮಾಜಿಕ ನ್ಯಾಯ ಹಕ್ಕ್ ಲೆನ ಸಬಲೀಕರಣ ಸಚಿವಾಲಯದ ಡಿಎನ್ ಟಿ- ಎನ್ ಟಿ- ಎಸ್ ಎನ್ ಟಿ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯೆರಾದ್, ಕೃಷಿಕೆರಾದ್, ಸಮಾಜ ಸೇವಕೆರಾದ್ ಸೇವೆ ಸಂದಾದೆರ್.
