ಉಳ್ಳಾಲ: ಜಿಲ್ಲಾಡಳಿತ ನಿರ್ದೇಶನದಂಚನೆ ಪಾಡ್ದಿನ ಸಿಸಿಟಿವಿನ್ ಪೊಯ್ಯೆದ ದಂಧೆದಕುಲು ದೆಪ್ಪರೆ ತೂಯಿನ ಘಟನೆ ಸೋಮೇಶ್ವರ ಮೂಡ ಲೇಔಟ್ ಡ್ ನಡತ್ಂಡ್.
ಈ ಬಗೆಟ್ ಉಳ್ಳಾಲದ ಗ್ರಾಮಲೆಕ್ಕಾಧಿಕಾರಿ ಈ ಸಂತೋಷ್ ಕೊರ್ನ ದೂರುದಂಚನೆ ಉಳ್ಳಾಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕೆಲವು ತಿಂಗೊಲ್ದ ಪಿರವು ಸೋಮೇಶ್ವರ ಕಡಲ್ ದ ಬರಿಟ್ಟ್ ಪಾಡ್ದಿನ ಸಿಸಿಟಿವಿನ್ ಲಾರಿಡ್ ಗುದ್ದುದು ದೆತ್ತಿನ ಕೇಸ್ ಡ್ ನಾಲ್ ಜನ ಅರೆಸ್ಟ್ ಆದಿತ್ತೆರ್.
ಮುಲ್ಕಿ: ಕಿನ್ನಿಗೋಳಿ ಕೈತಲ್ ದ ಐಕಳ ಬಾವ ಕಾಂತಾಬಾರೆ ಬೂದಾಬಾರೆ ಕಂಬುಲ ಫೆಬ್ರವರಿ 4 ಕ್ ನಡಪರೆ ಉಂಡು.
ಈ ಸರ್ತಿ ಗ್ರಾಮಸ್ಥೆರೆನ, ಸಂಘ ಸಂಸ್ಥೆಲೆನ ಸಹಕಾರ ಬೋಡು, ಕಂಬುಲದ ಅಟ್ಟಣೆಗಾದ್ ಈ ಸರ್ತಿ ಕ್ರೀಡೋತ್ಸವ ನಡಪರೆ ಉಂಡು ಪಂದ್ ಐಕಳ ಬಾವ ಕಾಂತಾಬಾರೆ ಬೂದಾಬಾರೆ ಕಂಬುಲ ಸಮಿತಿದ ಅಧ್ಯಕ್ಷೆರ್ ಡಾ.ದೇವಿ ಪ್ರಸಾದ್ ಶೆಟ್ಟಿ ಮೇರ್ ಐಕಳ ಬಾವಡ್ ನಡತಿನ ಐಕಳ ಕಂಬುಲದ ಅಟ್ಟಣೆ ಸಭೆಟ್ ಪಂಡೆರ್. ಉಂದುವೇ ಪೊರ್ತುಡು ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾ ಮಂಡಲದ ನಿರ್ದೇಶಕೆರಾದ್ ಆಯ್ಕೆ ಆಯಿನ ಸಮಿತಿ ಸದಸ್ಯೆರ್ ದೇವಿಪ್ರಸಾದ್ ಶೆಟ್ಟಿ ಮೆರೆನ್ ಸಮಿತಿ ವತಿರ್ದ್ ಗೌರವಿಸಾಯೆರ್.
ಈ ಪೊರ್ತುಡು ಸಮಿತಿದ ಚಿತ್ತರಂಜನ್ ಭಂಡಾರಿ, ಮುರಳೀಧರ ಶೆಟ್ಟಿ, ಪ್ರಕಾಶ್ ಶೆಟ್ಟಿ ಪಡುಬಿದ್ರೆ, ಕೃಷ್ಣ ಮಾರ್ಲ, ಸ್ವರಾಜ್ ಶೆಟ್ಟಿ, ಶರತ್ ಶೆಟ್ಟಿ, ಸಾಯಿನಾಥ ಶೆಟ್ಟಿ, ಯೋಗೀಶ್ ರಾವ್, ದಯೇಶ್ ಐಕಳ, ಲೀಲಾಧರ ಶೆಟ್ಟಿ, ರಘುರಾಮ ಶೆಟ್ಟಿ, ಸುಧಾಮ ಶೆಟ್ಟಿ ಇತ್ತೆರ್.
ಬೊಲ್ತೇರ್: ಸಂಘಟನೆ ಒಂಜೆತ್ತ ಪ್ರಚಾರ ಮಲ್ಪುನ ಫ್ಲೆಕ್ಸ್ ಪಾಡೊಂದು ಇತ್ತಿನ ಪೊರ್ತುಡು ಕರೆಂಟ್ ಶಾಕ್ ಆಕ್ ದ್ ಒರಿ ತೀರ್ ಪೋಯಿನ ಘಟನೆ ಬೊಲ್ತೇರ್ ಬಸ್ ಸ್ಯಾಂಡ್ ದ ಕೈತಲ್ ನ.8 ದಾನಿ ನಡತ್ಂಡ್. ಕುಡೊರಿಯಗ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದುಲ್ಲೆರ್.
ಕಾರ್ಮಿಕ ಸಂಘವೊಂಜೇತ ಸಮಾವೇಶನ್ ಕುಡ್ಲಡ್ ಅಟ್ಟಣೆ ಮಲ್ಪುನ ನೆತ್ತ ಲೆಕ್ಕೊಡು ರಾಜ ಮಾರ್ಗದ ಕೈತಲ್ ಇಪ್ಪುನ ಶ್ರೀ ಗೋಕರ್ಣನಾಥ ಕೋ ಆಪರೇಟೀವ್ ಬ್ಯಾಂಕ್ ದ ಎದುರು ಭಾರತೀಯ ಮಜ್ದೂರ್ ಸಂಘದಕುಲು ಸೇರ್ದ್ ಕುಟುಂಬ ಮಿಲನ -2022 ಲೇಸ್ ದ ಪ್ಲೆಕ್ಸ್‌ ಪಾಡ್ನಗ ಈ ಘಟನೆ ನಡತ್ಂಡ್. ಕರೆಂಟ್ ಶಾಕ್ ಆಕಿನ ಬೊಲ್ತೇರ್ ಕೋರ್ಟ್ ನಿವಾಸಿ ವ್ಯಾಸರಾಯ ಆಚಾರ್ಯ ಮೆರೆನ ಮಗೆ ಪ್ರಶಾಂತ್ ಆಚಾರ್ಯ (32) ಬೊಕ್ಕ ಬೊಲ್ತೇರ್ ತಾಲೂಕ್ ದ ಕೊಯ್ಯೂರ್ ಗ್ರಾಮದ ಮಲೆಬೆಟ್ಟು ನಿವಾಸಿ ಸಂಜೀವ ಆಚಾರ್ಯ ಮೆರೆನ ಮಗೆ ಸತೀಶ್ (25) ನ್ ಆಸ್ಪತ್ರೆಗ್ ದಾಖಲ್ ಮಲ್ದಿತ್ತೆರ್. ಆಂಡ ಪ್ರಶಾಂತ್ ಗ್ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ಆಸ್ಪತ್ರೆಗ್ ಬೊಲ್ತೇರ್ ಮಾಜಿ ಶಾಸಕೆರ್ ಕೆ.ವಸಂತ ಬಂಗೇರ, ರಕ್ಷಿತ್‌ ಶಿವರಾಮ್‌ ಬೊಕ್ಕ ಕಾಂಗ್ರೆಸ್‌ ಮುಖಂಡೆರ್ ಭೇಟಿ ಕೊರ್ತೆರ್. ಆಸ್ಪತ್ರೆ ಎದುರುಡ್ ನೂದೆರ್ದ್ ಲ ಎಚ್ಚ ಜನ ಸೇರ್ದಿತ್ತೆರ್.
ಕುಡುಮಪುರತ್ತ ಮಂಜುನಾಥ ಸ್ವಾಮಿಗ್ “ನಂದಿ” ಕಾಣಿಕೆ ಕೊರಿನ ಟೆಕ್ಕಿ
ಬೆಂಗ್ಲೂರ್ ದ ಪುಗರ್ತೆದ ಕಂಪೆನಿಡ್ ಬೇಲೆ ಮಲ್ತೊಂದು ಇಪ್ಪುನ ಶ್ರೇಯಂಶ ಡಿ. ಜೈನ್ ಮೇರ್ ತಾನ್ ಸಾಂಕ್ ದಿನ ಗೀರ್ ತಳಿತ್ತ ಕಂಜಿ ” ಭೀಷ್ಮ” ನ್ ಪತೊಂದು ಬೆಂಗಳೂರ್ದು ಧರ್ಮಸ್ಥಳ ಮುಟ್ಟ ಪಾದಯಾತ್ರೆ ಮಲ್ತ್ ದ್ ಬೈದೆರ್.
ಹೊರನಾಡ್ ದ ಧರ್ಮಪಾಲ್ ಬೊಕ್ಕ ಯಶಸ್ವತಿ ಮೆರೆನ ಮಗೆ ಮೇರ್. ಇತ್ತೆ ಮೊಕ್ಲೆನ ಇಲ್ಲ್ ಧರ್ಮಸ್ಥಳಡ್ ಉಂಡು. ಶ್ರೀ ಮಂಜುನಾಥ ಸ್ವಾಮಿನ ಭಕ್ತೆರಾಯಿನ ಈ ಜವನೆ ಬೆಂಗ್ಲೂರುಡು ಲಾಕ್ ಡೌನ್ ಪೊರ್ತುಡು ವರ್ಕ್ ಫ್ರಮ್ ಹೋಮ್ ಬೇಲೆ ಮಲ್ತೊಂದು ಇತ್ತೆರ್. ಅಪಗ ಗೀರ್ ತಳಿತ್ತ ಪೆತ್ತ ಒಂಜೆನ್ ದೆತೊಂದು ತಾಂಕೆರೆ ಸುರು ಮಲ್ತೆರ್.
ಮೆರೆಗ್ ಎಲ್ಯೆರ್ದೆ ಕೈಕಂಜಿ ಪಂಡ ಮಸ್ತ್ ಪ್ರೀತಿ. ಬೆಂಗ್ಲೂರ್ ಡ್ ಬಾಡಿಗೆ ಇಲ್ಲಲ್ ಇತ್ತ್ ದ್, ಪೆತ್ತ ತಾಂಕುನ ಕಷ್ಟದ ಬೇಲೆ. ಅಂಚಿನ ಪೊರ್ತುಡು ಮೆರೆಗ್ ಸಪೋರ್ಟ್ ಮಲ್ತಿನಿ ಮೆರೆನ ಬೊಡೆದಿ ರಶ್ಮಿ ಶ್ರೇಯಂಶ.
ಆ ಪೆತ್ತಗ್ ಪಾರ್ವತಿ ಪಂದ್ ಪುದರ್ ದೀಯೆರ್. ಆ ಪೆತ್ತದ ಮಗೆನೇ ಭೀಷ್ಮೆ. ಸುರುತ ಕಂಜಿ ಆಯಿನ 2 ವರ್ಷದ ಭೀಷ್ಮನ್ ಧರ್ಮಸ್ಥಳದ ಗೋ ಶಾಲೆಗ್ ಬುಡುಪುನೆ ಪಂದ್ ಪರಕೆ ಪಂಡ್ ದಿತ್ತೆರ್. ಪರಕೆ ತೀರ್ಸಾರೆ ಭೀಷ್ಮ ನ್ ಧರ್ಮಸ್ಥಳಗ್ ಲೆತ್ತೊಂದು ಬರಿಯೆರೆ ದಿನ ನಿಗಂಟ್ ಮಲ್ತ್ ದ್ ಇಂಚೊಗು ಧರ್ಮಸ್ಥಳಗ್ ಯಾತ್ರೆ ಸುರು ಮಲ್ದೆರ್. ಭೀಷ್ಮ ನ ಒಟ್ಟಿಗೆ ಪಾದಯಾತ್ರೆದೊಟ್ಟಿಗೆ ಪಿದಡಿನ ಮೇರ್ ಭೀಷ್ಮ ನ ಒಟ್ಟಿಗೆ ಅಪ್ಪೆ ಬಾಲೆದ ರೀತಿಡ್ ಬೆರಿಕ್ಕ್ ಎಣ್ಣೆ ಪೂಜಿದ್ ಜೆಪುಡಾದ್ ಒಲ್ಪಲ ಚೂರುಲ ಭೀಷ್ಮಗ್ ಬೇನೆ ಅವಂದಿನಂಚ ತೂದು ಆಯೆ ಜೆತ್ತಿ ಬೊಕ್ಕ ಕಂಪೆನಿದ ಬೇಲೆ ಮಲ್ತೊಂದು ಸುಮಾರ್ 33 ದಿನತ ಪ್ರಯಾಣದೊಟ್ಟಿಗೆ ಧರ್ಮಸ್ಥಳಗ್ ಬತ್ತ್ ದ್ ಪರಕೆ ಸಂದಾಯೆರ್.
ಮೆರೆನ ಪ್ರಯಾಣ ಬೊಲ್ಪುಗು 4 ಗಂಟೆಗ್ ಸುರು ಮಲ್ತ್ಂಡ 9 ಗಂಟೆಗ್ ವಿಶ್ರಾಂತಿ ದೆತೊನುವೆರ್. ಭೀಷ್ಮೆ ಜೆತ್ತಿ ಬೊಕ್ಕ ಮೆರೆನ ಕಂಪೆನಿದ ಬೇಲೆ ಮಲ್ತೊಂದು ಇತ್ತೆರ್. ಬೆರಿಕ್ ಒಂಜಿ ಲ್ಯಾಪ್ ಟಾಪ್ ಬ್ಯಾಗ್ ಪಾಡೊಂದು, ಗತ್ತ್ ಗಾಂಭೀರ್ಯರ್ದ್ ನಡಪುನ ಭೀಷ್ಮನೊಟ್ಟಿಗೆ ಮೆರೆನ ಪ್ರಯಾಣ. ಏರೆಗ್ಲಾ ತೆರಿಪಾವಂದೆ ಎರೆಗ್ಲಾ ಪ್ರಚಾರ ಮಲ್ಪದೆ ಭಕ್ತಿರ್ದ್ ಪಾದಯಾತ್ರೆ ಮೇರ್ ಮಲ್ದೆರ್.
ಕಡಬ: ಕಾರೊಂಜಿ ಡ್ರೈವರ್ ನ ಅಕಲ್ ತತ್ತ್ ದ್ ಕರೆಂಟ್ ಕಂಬೊಗು ಗುದ್ದ್ ದ್, ಐನ್ ಜನಕ್ ಮಸ್ತ್ ಪೆಟ್ಟಾಯಿನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಕಡಬ ತಾಲೂಕ್ ದ ಧರ್ಮಸ್ಥಳ– ಸುಬ್ರಹ್ಮಣ್ಯ ರಾಜ್ಯ ಮಾರ್ಗದ ಮರ್ಧಾಳಡ್ ಇಪ್ಪುನ ಕಲ್ಲಾಜೆಡ್ ನಡತ್ಂಡ್.
ಈ ಘಟನೆಡ್ ಪೆಟ್ಟಾಯಿನಕ್ಲೆಗ್ ಕಡಬ ಸಮುದಾಯ ಆರೋಗ್ಯ ಕೇಂದ್ರಡ್ ಪ್ರಾಥಮಿಕ ಚಿಕಿತ್ಸೆ ಕೊರ್ದು, ಹೆಚ್ಚದ ಚಿಕಿತ್ಸೆಗಾದ್ ಪುತ್ತೂರ್ ದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ಪೆರೆ ಆತ್ಂಡ್ ಪಂದ್ ಮಾಹಿತಿ ತೆರಿದ್ ಬೈದ್ಂಡ್.
ಹಾವಂಜೆ ಗ್ರಾಮದ ಛಾಯಾಗ್ರಾಹಕೆರ್ ಕೀಳಂಜೆ ಗಣೇಶ್ ಶೆಟ್ಟಿ ಬೊಕ್ಕ ಜಯಲಕ್ಷ್ಮೀ ಶೆಟ್ಟಿ ದಂಪತಿಲೆನ ಮಗಲ್ ರಿಯಾ ಜಿ ಶೆಟ್ಟಿ ಮೇರ್ ರಾಷ್ಟ್ರಮಟ್ಟದ ಕರಾಟೆದ ರಡ್ಡ್ ವಿಭಾಗೊಡ್ಲ ಬಂಗಾರ್ ದ ಪದಕ ಗೆಂದ್ ದೆರ್.
ಮೇರ್ ನ.5 ಬೊಕ್ಕ 6 ಕ್ಕ್ ಇನ್ಸ್ ಟಿಟ್ಯೂಟ್ ಅಫ್ ಕರಾಟೆ ಎಂಡ್ ಆಟ್ಸ್೯ ಕೊಡವೂರು ನೆತ್ತ ಮುತಾಲಿಕೆಡ್ ಒಡಿಪುದ ಅಮ್ರತ್ ಗಾರ್ಡನ್ ದ ಸಭಾಂಗಣಡ್ ನಡತಿನ ರಾಷ್ಟ್ರ ಮಟ್ಟದ 40 ನೇ ಸ್ಪರ್ಧಾ ಕೂಟಡ್ ಪದಕ ಗೆಂದ್ ದೆರ್. ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾಯಿನ ರಿಯಾ ಜಿ. ಶೆಟ್ಟಿ ಕಟಾ ಬೊಕ್ಕ ಕುಮಿಟೆ ರಡ್ಡ್ ವಿಭಾಗಡ್ ಲ ಬಂಗಾರ್ದ ಪದಕ ಗೆಂದಿನ ಸಾಧಕಿ ಆತೆರ್. ಮೇರ್ ಒಡಿಪು ಒಳಕಾಡು ಶಾಲೆದ 8 ನೇ ಕ್ಲಾಸ್ ದ ವಿದ್ಯಾರ್ಥಿನಿ. ಅಂತರಾಷ್ಟ್ರೀಯ ಮಟ್ಟದ ಕರಾಟೆ ಪಟು ಶಿಕ್ಷಕಿ ಪ್ರವೀಣ ಪರ್ಕಳ ಮೆರೆನ ಶಿಷ್ಯೆ. ಪರ್ಕಳ ಪಿ.ಕೆ.ಸಿ ಕೂಟದ ಪೆರ್ಮೆದ ಸದಸ್ಯೆ ಆದುಲ್ಲೆರ್. ಕರಾಟೆಡ್ ಮಲ್ಲ ಸಾಧನೆ ಮಲ್ತಿನ ಈ ಎಲ್ಯ ಪ್ರತಿಭೆ ಭವಿಷ್ಯಡ್ ಕರಾಟೆ ಚಾಂಪಿಯನ್ ಆಪುನ ಭರವಸೆ ತೊಜಪಾದೆರ್.
ಅಡಿಲೈಡ್: ಭಾರತ ಕ್ರಿಕೆಟ್ ಟೀಮ್ ದ ಕ್ಯಾಪ್ಟನ್ ರೋಹಿತ್ ಶರ್ಮಾಗ್ ಪ್ರಾಕ್ಟೀಸ್ ದ ಪೊರ್ತುಡು ಕೈಕ್ಕ್ ಪೆಟ್ಟಾತ್ಂಡ್.
ಗುರುವಾರ ಭಾರತ- ಇಂಗ್ಲೆಂಡ್ ದ ನಡುಟ್ಟು ಸೆಮಿಫೈನಲ್ ಗೊಬ್ಬು ನಡಪರೆ ಉಂಡು. ನೆತ ಅಟ್ಟಣೆಗಾದ್ ಪ್ರಾಕ್ಟೀಸ್ ಮಲ್ತೊಂದು ಇಪ್ಪುನ ಪೊರ್ತುಡು ಚೆಂಡ್ ರೋಹಿತ್ ಶರ್ಮಾ ಮೆರೆನ ಬಲತ ಕೈಕ್ ಬೂರ್ದುಂಡು. ಆಂಡ ಮಲ್ಲ ಪೆಟ್ಟಾತಿಜಿ. ಒಂತೆ ಬೇನೆ ಉಂಡು ಪಂದ್ ಡಾಕ್ಟರ್ ತೆರಿಪಾದೆರ್.
ನಿಷ್ಠಾವಂತ ಸಮಾಜ ಸೇವಕೆರ್, ಧೀಮಂತ ವ್ಯಕ್ತಿತ್ವದ ವಾಸುದೇವ ಆರ್ ಕೋಟ್ಯಾನ್ ಮೇರ್ ದೇವೆರೆ ಪಾದ ಸೇರಿಯೆರ್. ಆರ್ ನನ ನಂಕ್ ನೆಂಪು ಮಾತ್ರ.
ಮೇರ್ ಬಿಲ್ಲವ ಅಸೋಸಿಯೇಷನ್‌ದ ಕೋಶಾಧಿಕಾರಿಯಾದ್, ಉಪಾಧ್ಯಕ್ಷೆರಾದ್, ಸುಮಾರ್ ವರ್ಷ ಸೇವೆ ಸಂದಾದೆರ್. 5 ವರ್ಷ ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರಾದ್, 10 ವರ್ಷ ಉಪ ಕಾರ್ಯಾಧ್ಯಕ್ಷೆರಾದ್, ಜೀವ ಇಪ್ಪುನ ಮುಟ್ಟ ನಿರ್ದೇಶಕೆರಾದ್ ಸೇವೆ ಸಂದಾದ್, ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ಮಲ್ಲ ಮಟ್ಟ್ ಡ್ ಬುಳೆಯರೆ ಕಾರಣ ಆತೆರ್. ಮೇರ್ ಏತೋ ಜನಕ್ಕ್ ಜೀವದಾನ ಮಲ್ತಿನ ಪುಣ್ಯಾತ್ಮೆರ್.
ಬೊಂಬೈ ದ ಪುಗರ್ತೆದ ಡಾಕ್ಟರ್ ನಕುಲೆನ ಗುರ್ತ ದೀವೊಂದಿನ ಮೆರೆನ ಅಡೆಗ್ ಹುಷಾರ್ ಇಜ್ಜಿಂದ್ ಯೇರೇ ಬತ್ತ್ಂಡಲ ಅಕಲೆನ್ ಒರಿಪಾಯೆರೆ ಏತೇ ಕರ್ಚಿ ಆಂಡಲ ಪಿರ ಜಾರೊಂದು ಇಜ್ಜಂಡ್. ಇನಿ ಅವೇತೋ ಜನ ಮೆರೆರ್ದ್ ಆರೋಗ್ಯವಂತೆರಾದ್, ವಿದ್ಯಾವಂತೆರಾದ್ ಉಲ್ಲೆರ್. ಮೆರೆನ ಪರಿಶ್ರಮರ್ದ್ ಇನಿ ಪೆಜಮಾಡಿ ಊರುಡು ಆರ್ ಚಿರಪರಿಚಿತೆರ್. ಮುಖ್ಯವಾದ್ ಮೇರ್ ಪೆಜಮಾಡಿ ಬಿಲ್ಲವ ಸಂಘ, ಪೆಜಮಾಡಿ ಬ್ರಹ್ಮ ಬೈದೆರ್ಲೆ ಗರಡಿ, ಪೆಜಮಾಡಿ ಮಹಾಲಿಂಗೇಶ್ವರ ದೇವಲ್ಯ, ಮಾರುತಿ ಮಂದಿರ ಪೆಜಮಾಡಿ ಅಂಚನೆ ತುಳುನಾಡ್ ದ ಸುಮಾರ್ ದೈವ ದೇವಸ್ಥಾನಲೆನ ಜೀರ್ಣೋದ್ದಾರದ ರೂವಾರಿ. ಇಂಚಿನ ವ್ಯಕ್ತಿನ್ ಕಲೆವೊಂದು ಮಾತೆರ್ಲಾ ದುಃಖೊಡು ಉಲ್ಲೆರ್. ಮೆರೆನ ಆತ್ಮೊಗು ದೇವೆರ್ ಚಿರಶಾಂತಿ, ನೆಮ್ಮದಿನ್ ಕೊರಡ್ ಪಂದ್ ದೇವೆರೆಡ ಸುಗಿತೊನುವ
(ವರದಿ : ವೈ.ಟಿ.ಶೆಟ್ಟಿ)
Vasudev R Kotian director and former Chairman of Bharat Cooperative bank is no more
A well known social worker, a person with humility and empathy; is no more.
He served as treasurer and vice President of Billava Association Mumbai, for many terms.
He was the chairman of Bharat Cooperative bank for five years, and vice President for a period of ten years.As a director he was responsible for taking Bharat Cooperative bank to greater heights.
He was always ready to help people in distress and had provided contacts to well known doctors for people with serious ailments.He had even given financial aid for medical expenses.
His contribution to his hometown Pejmady has made him a household name here.
He was responsible for the development of Billava Sangha, renovation of many temples and Daivastana around here.
A heartfelt condolences to the family and well wishers and a prayer may his soul rest in peace.
ಮೂಳೂರು: ಪ್ರಶಸ್ತಿದ ಬೆರಿಯೆ ಪೋಪಿನ ಒಂಜಿ ಕಾಲ ಇತ್ತ್ಂಡ್. ಆಂಡ ಇನಿ ಪ್ರಶಸ್ತಿ ಯೋಗ್ಯ ವ್ಯಕ್ತಿನ್ ನಾಡೊಂದು ಬತ್ತಿನ ಪೊರ್ತು ಬೈದ್ಂಡ್. ಯೋಗ್ಯವಾಯಿನಾರೇ ಈ ಪ್ರಶಸ್ತಿಗ್ ಆಯ್ಕೆ ಆತೆರ್ ಪಂದ್ ಜಾನಪದ ವಿದ್ವಾಂಸೆರ್ ಡಾ.ವೈ.ಎನ್.ಶೆಟ್ಟಿ ಪಂಡೆರ್.
ಮೇರ್ 2022 ನೇ ವರ್ಷದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಪಿಲಿ ಕೋಲ ದೈವನರ್ತಕೆರ್ ಗುಡ್ಡ ಪಾಣಾರ ಮೂಳೂರು ಮೆರೆನ ಪುಟ್ಟಿನ ಊರುದ ತಮ್ಮನ ಲೇಸ್ ಡ್ ಪಾತೆರ್ಯೆರ್. ಈ ಲೇಸ್ ನ್ ಬಿಕ್ರಿಗುತ್ತು ಸುಂದರ ಹೆಗ್ಡೆ ದೀಪ ಪೊತ್ತಾದ್ ಉದಿಪನ ಮಲ್ತೆರ್.
ಸರ್ವೇಶ್ವರ ಫ್ರೆಂಡ್ಸ್ ಮುತಾಲಿಕೆಡ್ ನಡತಿನ ತಮ್ಮನ ಲೇಸ್ ಡ್ ಪ್ರಶಸ್ತಿ ವಿಜೇತೆರಾಯಿನ ಗುಡ್ಡ ಪಾಣಾರ ಮೆರೆನ್ ಶಾಲ್, ಪೇಟ ಪಾಡ್ದ್ ಸನ್ಮಾನ ಪತ್ರ ಕೊರ್ಪುನೆತದೊಟ್ಟಿಗೆ “ಮೂಳೂರ್ದ ಮುತ್ತು” ಪಂದ್ ಬಿರುದು ಕೊರ್ದು ತಮ್ಮನ ಮಲ್ತೆರ್.
ಈ ಪೊರ್ತುಡು ಮಹಾಲಕ್ಷ್ಮಿ ಕೋ ಆಪರೇಟಿವ್ ಬ್ಯಾಂಕ್ ಅಧ್ಯಕ್ಷೆರ್ ಯಶ್ಪಾಲ್ ಸುವರ್ಣ, ಡಾ.ವೈ.ಎನ್.ಶೆಟ್ಟಿ, ಮೂಳೂರು ಬಿಲ್ಲವ ಸಂಘದ ಉಪಾಧ್ಯೆಕ್ಷೆರ್ ಪ್ರಕಾಶ್ ಮೂಳೂರು, ಮಟ್ಟಾರ್ ರತ್ನಾಕರ್ ಹೆಗ್ಡೆ, ಸೇಸು ಮಾಸ್ಟರ್, ಪಾಂಡುರಂಗ ಎಸ್.ಪಡ್ಡಮೆ, ಸಂತೋಷ್, ವೀರ ಕೇಸರಿ ಶೆಟ್ಟಿ, ಕೊರಗ ಬಂಗೇರ, ಸತೀಶ್ ಚಂದ್ರ ಇತ್ತೆರ್. ಪುರುಷೋತ್ತಮ್ ಮೂಳೂರು ಪ್ರಾಸ್ತಾವಿಕ ಪಾತೆರ್ದ್ ಎದ್ಕೊನಿಯೆರ್.
ಕಾಣಿಯೂರು: ಭೂತಾರಾಧನೆ ಬೊಕ್ಕ ದೈವನರ್ತಕೆರೆನ ಬಗೆಟ್ ವಿವಾದದ ಹೇಳಿಕೆ ಕೊರ್ನ ಮಾಜಿ ಸಚಿವೆರ್ ಬಿ.ಟಿ ಲಲಿತಾ ನಾಯ್ಕ್ ಮಿತ್ತ್ ಜಿಲ್ಲಾ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ದೋಳ್ಪಾಡಿ ಗ್ರಾಮದ ಶೀನ ಪರವ ಮೆರೆನ ಮಗೆ ಕಾಣಿಯೂರು ಗ್ರಾ.ಪಂ.ಸದಸ್ಯೆ ಲೋಕಯ್ಯ ಪರವ ದೋಳ್ಪಾಡಿ ಮೇರ್ ಕಡಬ ಪೋಲಿಸ್ ಠಾಣಾಧಿಕಾರಿಲೆನ ಮುಖೇನ ಜಿಲ್ಲಾ ಪೋಲಿಸ್ ಅಧೀಕ್ಷಕೆರೆಗ್ ದೂರು ಕೊರ್ತೆರ್.
“ಪರವ ಸಮುದಾಯಗ್ ಸೇರಿನ ಯಾನ್ 23 ವರ್ಷರ್ದ್ ತುಳುನಾಡ್ ದ ಸಂಸ್ಕೃತಿ ಆಯಿನ ದೈವನರ್ತಕೆ ಆದ್ ಸೇವೆ ಮಲ್ತೊಂದು ಬೈದೆ. ಇಂಚಿಪ್ಪ ತುಳುನಾಡ್ ದ ಸಂಸ್ಕೃತಿ ಭೂತಾರಾಧನೆ ಬಗೆಟ್ ಮಾಜಿ ಸಚಿವೆ ಬಿ.ಟಿ ಲಲಿತಾ ನಾಯ್ಕ್ ಹುಬ್ಬಳ್ಳಿಡ್ ಮಾಧ್ಯಮದೊಟ್ಟಿಗೆ ಪಾತೆರ್ದ್ ಭೂತಾರಾಧನೆ ಬೊಕ್ಕ ದೈವ ನರ್ತಕೆರೆನ್ ಮಿತ್ತ್ ಬೊಡ್ಚಾಂದಿನ ಹೇಳಿಕೆ ಕೊರ್ತೆರ್. ಮೇರ್ ಈ ಹೇಳಿಕೆರ್ದ್ ದೈವನರ್ತಕೆರೆನ ಸಮುದಾಯನ್ ಎಲ್ಯ ಮಲ್ಪುನ ಬೇಲೆ ಮಲ್ತೊಂದು ಉಲ್ಲೆರ್. ನನ ದುಂಬುಗ್ ದಕ್ಷಿಣ ಕನ್ನಡ ಜಿಲ್ಲೆಡ್ ಎಂಕುಲೆನ ಸಮುದಾಯನ್ ಕೀಳಾದ್ ಪಾತೆರುನ ಇಂಚಿನಕಲೆನ ಮಿತ್ತ್ ಸಮುದಾಯ ಅಕಲೆಗ್ ಬಹಿಷ್ಕಾರ ಪಾಡುಂಡು ಪಂದ್ ಲೋಕಯ್ಯ ಪರವೆರ್ ಬಿ.ಟಿ ಲಲಿತಾ ನಾಯ್ಕ್ ಮಿತ್ತ್ ಪೋಲಿಸ್ ಠಾಣೆಗ್ ಕೊರ್ನ ದೂರುಡು ತೆರಿಪಾದೆರ್.
