Times of kudla

ಬೆದ್ರದ ಶಾಸಕೆರೆನ ಕಚೇರಿಡ್ ಜನ ಸಂಪರ್ಕ ಸಭೆ

ಬೆದ್ರ: ಬೆದ್ರದ ಶಾಸಕೆರೆನ ಕಚೇರಿಡ್ ಇನಿ ಜನ ಸಂಪರ್ಕ ಸಭೆ ನಡತ್ಂಡ್.

ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮೇರ್ ಜನಕುಲೆನ ಸಮಸ್ಯೆಲೆನ್ ಕೇನ್ದ್ ಅವ್ವೇ ಜಾಗೆಡ್ ಪರಿಹಾರ ಕೊರ್ಪುನ ಪ್ರಯತ್ನ ಮಲ್ತೆರ್.

ವರದಿ: ಜಗದೀಶ್ ಪೂಜಾರಿ ಬೆದ್ರ

ಪ್ರವಾಸೋದ್ಯಮದ ನೀತಿಡ್ ತುಳುನಾಡ ಕಂಬುಲ: ಕೇಂದ್ರ ಸಚಿವೆರ್ನ ಭರವಸೆ

ಉಳ್ಳಾಲ: ಕೇಂದ್ರ ಸರ್ಕಾರ ಪೊಸತ್ತ್ ಪ್ರವಾಸೋದ್ಯಮದ ನೀತಿನ್ ರಚನೆ ಮಲ್ಪುನಗ ಕರಾವಳಿ ಜನತ ಸಂಸ್ಕೃತಿದ ಭಾಗವಾದ್ ಇಪ್ಪುನ ಕಂಬುಲನ್ ಪ್ರವಾಸೋದ್ಯಮದ ಒಂಜಿ ಭಾಗವಾದ್ ಸೇರ್ಸಾಯೆರೆ ಪ್ರಯತ್ನ ಮಲ್ಪುವೆ ಪಂದ್ ಕೇಂದ್ರ ಸಾಂಸ್ಕೃತಿಕ ಬೊಕ್ಕ ಪ್ರವಾಸೋದ್ಯಮ ಸಚಿವೆರ್ ಶ್ರೀಪಾದ ಯೆಸ್ಸೋ ನಾಯಕ್‌ ತೆರಿಪಾಯೆರ್.

ಉಳ್ಳಾಲ ತಾಲೂಕ್ ದ ನರಿಂಗಾನ ಗ್ರಾಮದ ಮೋರ್ಲ ಬೋಳಡ್ ನಿರ್ಮಾಣ ಹಂತಡ್ ಇಪ್ಪುನ ಕಂಬುಲ ಕಂಡದ ಕಾಮಗಾರಿನ್ ತೂದು, ಶಾಸಕೆರ್ ಯು.ಟಿ. ಖಾದರ್‌ ಮೆರೆನ ಮಾಹಿತಿ ದೆತೊಂದು ಮೇರ್ ಪಾತೆರಿಯೆರ್. ಪ್ರವಾಸೋದ್ಯಮಗ್ ಪೂರಕವಾದ್ ಕಂಬುಲ ಕ್ರೀಡೆಗ್ ಬೆಂಬಲ ಕೊರ್ಪುನವು ಅಗತ್ಯ ಆತ್ಂಡ್. ಈ ನಿಟ್ಟ್ ಡ್ ಶಾಸಕೆರ್ ಖಾದರ್‌ ಮೆರೆನ ಬಿನ್ನಾಪು ಗ್ ಸ್ಪಂದಿಸಾವೆ ಪಂದ್ ಪಂಡೆರ್. ಶಾಸಕೆರ್ ಖಾದರ್‌ ಪಾತೆರ್ದ್, ಕಂಬುಲ ಕರೆ ನಿರ್ಮಾಣದೊಟ್ಟಿಗೆ ಈ ಭಾಗಡ್ ತುಳು ಗ್ರಾಮದ ಯೋಜನೆನ್ ರಚನೆ ಮಲ್ದೆರ್. ನನದ ದಿನಟ್ ಈ ಪ್ರದೇಶ ಪ್ರವಾಸೋದ್ಯಮ ಕೇಂದ್ರವಾದ್ ಅಭಿವೃದ್ಧಿ ಮಲ್ಪುನ ಯೋಜನೆ ರಚನೆ ಮಲ್ಪರೆ ಆತ್ಂಡ್. ಕಂಬುಲ ಕ್ರೀಡೆನ್ ಪ್ರವಾಸೋದ್ಯಮದ ಪಟ್ಟಿಡ್ ಸೇರ್ಸಾಂಡ ಅನುದಾನ ಬುಡುಗಡೆಗ್ ಸಕಾಯ ಆಪುಂಡು ಪಂದ್ ಪಂಡೆರ್. ಈ ಪೊರ್ತುಡು ನರಿಂಗಾನ ಗ್ರಾ.ಪಂ. ಅಧ್ಯಕ್ಷೆರ್ ಶೈಲಜಾ ಜೆ. ಶೆಟ್ಟಿ, ಉಪಾಧ್ಯಕ್ಷೆರ್ ನವಾಝ್ ನರಿಂಗಾನ, ತಾ.ಪಂ ಮಾಜಿ ಅಧ್ಯಕ್ಷೆರ್ ಮಹಮ್ಮದ್‌ ಮೋನು, ಹರೇಕಳ ಗ್ರಾ.ಪಂ. ಅಧ್ಯಕ್ಷೆರ್ ಬದ್ರುದ್ದಿನ್‌ ಫರೀದ್‌ನಗರ ಇತ್ತೆರ್.

ಅಗ್ನಿಪಥದ ಕೆಲಸೊಗು ಸೇರರೆ ಅರ್ಜಿ ಲೈದೆರ್…!

ಭಾರತೀಯ ವಾಯುಪಡೆ ವಿಜ್ಞಾನ ಬೊಕ್ಕ ವಿಜ್ಞಾನೇತರ ಸ್ಟ್ರೀಮ್‍ಲೆಗ್ ಅಗ್ನಿಪಥ್ ಯೋಜನೆಡ್ ವಾಯು ಸೇನೆ, ಅಗ್ನಿವೀರ್ ವಾಯು ಪಡೆಟ್ಟ್ ಸೇವೆ ಸಂದಾವುನಕ್ಲೆಗ್ 2023ನೇ ಜನವರಿಡ್ ನಡಪುನ ಆನ್‍ಲೈನ್ ಆಯ್ಕೆ ಪರೀಕ್ಷೆಗ್ ಅರ್ಜಿ ಲೆತ್ತ್ ದೆರ್.

ಪಿಯುಸಿಡ್ (ವಿಜ್ಞಾನ, ವಾಣಿಜ್ಯ, ಕಲೆ ಬೊಕ್ಕ ಡಿಪ್ಲೊಮಾ ಒವ್ವೇ ವಿಷಯಡ್) ಕನಿಷ್ಠ ಶೇ.50% ಬೊಕ್ಕ ಇಂಗ್ಲೀಷ್ ವಿಷಯಡ್ ಶೇ.50% ಮಾರ್ಕ್ ಇತ್ತಿನ ಜವನೆರ್ 2002ನೇ ಜೂನ್ 27ರ್ದ್ 25 ಮುಟ್ಟ, ಅರ್ಜಿ ಸಂದಾವೊಲಿ. ಬೊಕ್ಕ ಡಿಸೆಂಬರ್ 27ತ ನಡುಟ್ ಪುಟ್ಟಿನಕುಲು ವೆಬ್‍ಸೈಟ್ https://agnipathvayu.cdac.in ಮುಖೇನ 2022ತ ನವೆಂಬರ್ 23ತ ಉಲಯಿ ಅರ್ಜಿ ಸಂದಾವೊಡು. ಹೆಚ್ಚದ ಮಾಹಿತಿಗಾದ್ ವೆಬ್‍ಸೈಟ್ https://careerindianairforce.cdac.in ಪರಿಶೀಲನೆ ಮಲ್ಪೊಲಿ ಪಂದ್ ದಕ್ಷಿಣ ಕನ್ನಡ ಜಿಲ್ಲಾ ಉದ್ಯೋಗ ವಿನಿಮಯ ಕಚೇರಿ ಪ್ರಕಟಣೆಡ್ ತೆರಿಪಾದ್ಂಡ್.

ಗುಮ್ಮಟದಂಚಿನ ಬಸ್ ಸ್ಟ್ಯಾಂಡ್ ದರ್ಪರೆ ಪಂಡಿನ ಸಂಸದೆರ್ನ ಹೇಳಿಕೆಗ್ ವಿರೋಧ

ಮೈಸೂರ್: ಮೈಸೂರ್ ದ ಬಸ್ ಸ್ಟಾಂಡ್ ಡ್ ಇಪ್ಪುನ ಗುಮ್ಮಟದಂಚಿನ ವೇಟಿಂಗ್ ಶೆಡ್ ನ್ ಬುಲ್ಡೋಜರ್ ಗಲಸ್ ದ್ ದೆಪ್ಪುವ ಪಂದ್ ಬಿಜೆಪಿ ಸಂಸದೆರ್ ಒರಿ ಹೇಳಿಕೆ ಕೊರ್ನವು ವಿವಾದೊಗು ಕಾರಣ ಆತ್ಂಡ್.

ಮೈಸೂರ್, ಊಟಿ ಮಾರ್ಗದಲ್ಪ ಇಪ್ಪುನ ವೇಟಿಂಗ್ ಶೆಡ್‌ದ ಆಕಾರ ಪಲ್ಲಿದಲೆಕ್ಕನೇ ಉಂಡು. ಆಯಿನ್ ನಾಲ್ ದಿನಟ್ ದೆಪ್ಪೊಡು ಪಂದ್ ಮೈಸೂರ್ ಸಂಸದೆರ್ ಪ್ರತಾಪ್ ಸಿಂಹ ಹೇಳಿಕೆ ಕೊರ್ತೆರ್. ನೆಕ್ ಪ್ರತಿಕ್ರಿಯೆ ಕೊರ್ನ ಕರ್ನಾಟಕ ಕಾಂಗ್ರೆಸ್ ಅಧ್ಯಕ್ಷೆರ್ ಸಲೀಂ ಅಹಮದ್, ಉಂದು ಮೈಸೂರ್ ಸಂಸದೆರೆನ ಮೂರ್ಖ ಹೇಳಿಕೆ ಪಂದ್ ಪಂಡೆರ್. ಅಂಚನೆ ಗುಮ್ಮಟೊನು ಸರ್ಕಾರದ ಕಚೇರಿಲೆರ್ದ್ ದೆಪ್ಪುವರಾ ಪಂದ್ ಸಲೀಂ ಅಹ್ಮದ್ ಪ್ರಶ್ನೆ ಮಲ್ತೆರ್.

ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್, ಜೋಕುಲೆಗ್ ಸಕಾಯ

ಬೊಂಬೈ: ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ಕಾಲಿ ಐನ್ ತಿಂಗೊಲ್ಡು ಮಸ್ತ್ ಜನಪರ ಲೇಸ್ ನ್ ಅಟ್ಟಣೆ ಮಲ್ತ್ ದ್, ಜೋಕುಲೆಗ್ ಬೊಕ್ಕ ಶಿಕ್ಷಣಗ್ ಹೆಚ್ಚದ ಗೌರವ ಕೊರೊಂದು ಉಂಡು.

ಅವ್ವತ್ತಂದೆ ಸುಮಾರ್ ಜೋಕುಲೆನ ಶಿಕ್ಷಣಗ್ ಸಕಾಯ ಆತ್ಂಡ್. ನೂದು ವರ್ಷದ ಇತಿಹಾಸ ಇಪ್ಪುನ, ಉಚ್ಚಿಲ ಬೋವಿ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಷಕೆರ್ ತನ್ನ ಶಾಲೆದ 10 ಬಡಪತ್ತ್ ದ ಜೋಕುಲೆಗ್ ಯೂನಿಫಾರಂ ಕೊರ್ಯೆರೆ ಬಿನ್ನಾಪು ಮಲ್ತ್ ದಿತ್ತೆರ್. ಈ ಬಿನ್ನಾಪು ನ್ ಸ್ವೀಕಾರ ಮಲ್ತಿನ ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ಅ.29 ಕ್, ಈ 10 ಜೋಕುಲೆಗ್ ಯುನಿಫಾರಂ ಪಟ್ಟಿಯೆರ್. ಶಾಲೆದ ಪ್ರಬಂಧಕೆರಾಯಿನ ರೋಹಿತಾಶ್ವ ಉಚ್ಚಿಲ್ ಬೊಕ್ಕ ಮುಖ್ಯೋಪಾಧ್ಯಾಯೆರ್ ಮೇಘಲತಾ ಉಚ್ಚಿಲ್ ಪಾತೆರ್ದ್, ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ದ ಕಜ್ಜೊನು ಮೆಚ್ಚಿಯೆರ್. ಬೊಕ್ಕ ಅ.31 ಕ್ ಉದ್ಯಾವರ ಭಗವತಿ ಬೋವಿ ಶಾಲೆಡ್ ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ಮುತಾಲಿಕೆಡ್ ಜೋಕುಲೆಗ್ ಸ್ಕೂಲ್ ಬ್ಯಾಗ್‌, ನೀರ್ ದ ಬಾಟ್ಲಿ, ನೋಟ್‌ಬುಕ್‌ ಬೊಕ್ಕ ಸ್ಟೇಷನರಿ ಕಿಟ್‌ಲೆನ್ ಕೊರ್ಯೆರ್.

ಮುಖ್ಯ ಸಲಹೆಗಾರೆರಾದ್ ಈಶ್ವರ ಕೆ. ಐಲ್ ಪಾತೆರ್ದ್, ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ಭಾರತದ ಸುಮಾರ್ ಕಡೆಟ್ಟ್ ಕಾರ್ಯಕ್ರಮ ನಡಪಯೆರೆ ಪ್ರತಿಜ್ಞೆ ಮಲ್ದ್ಂಡ್ ಪಂದ್ ಪಂಡೆರ್. ಉದ್ಯಾವರ ಭಗವತಿ ಶಾಲೆಡ್ ಮಾತ ವ್ಯವಸ್ಥೆಲೆನ್ ಮಲ್ತ್ ದ್ ಸಕಾಯ ಮಲ್ತಿನ ಶಾಲೆದ ಪ್ರಬಂಧಕೆರ್ ಶ್ರೀನಿವಾಸ್ ಉದ್ಯಾವರ್ ಬೊಕ್ಕ ಮುಖ್ಯೋಪಾಧ್ಯಾಯಿನಿ ಗೀತಾ ಐಲ್ ಮೆರೆಗ್ ನಮೋ ಮೋಯರ್ ಗ್ಲೋಬಲ್ ಫೌಂಡೇಶನ್ ಸೊಲ್ಮೆ ಸಂದಾದ್ಂಡ್. ಈ ಪೊರ್ತುಡು ಗೌರವ ಸಲಹೆಗಾರೆರಾದ್ ರಘು ಕಾರ್ನವೆರ್, ಮುಖ್ಯ ಸಲಹೆಗಾರೆರಾದ್ ಈಶ್ವರ ಕೆ. ಐಲ್, ಉಪಾಧ್ಯಕ್ಷೆರಾದ್ ಶ್ವೇತಾ ಉಚ್ಚಿಲ್, ಫೌಂಡೇಶನ್ ನ ದಕ್ಷಿಣ ವಲಯ ಟೀಮ್ ದ ಸದಸ್ಯೆರಾದ್ ರವೀಂದ್ರ ಬೆಳ್ಚಪಾಡರು, ಚಿದಾನಂದ ಉದ್ಯಾವರ್, ಪಾವನ ಕೋಟೆಕಾರ್, ಚಂಚಲಾಕ್ಷಿ ಉಚ್ಚಿಲ್, ವಿನಿತಾ ಮಂಜೇಶ್ವರ್, ಸಂದೇಶ್ ಐಲ್ ಬೊಕ್ಕ ಅಮಿತಾ ಉಚ್ಚಿಲ್ ಇತ್ತೆರ್.
(ವರದಿ: ಈಶ್ವರ ಎಂ. ಐಲ್)

Namo Moyar Global foundation- Aid rendered to school children from the home town

Mumbai: The Namo Moyar Global foundation-has been successfully arranging several cultural programmes from the past five months.It is also interested to encourage education and students welfare in its fold.As of now it has been providing aid to several students through its various schemes.

On a request from the headmaster of Uchila Boovi primary school; ten students from less privileged families were given free uniforms by the foundation.
At a program organised on October 29th; Rohitashwa Uchila from the school committee and the headmistress Meghalatha Uchila appaluded the gesture.

On the 31st of October, students from the community of Bagavathi Boovi school Udyavara were given school bags , books educational kits and the like by Moyar Global foundation.Chief adviser Eshwar K L spoke and said that the foundation had vowed to continue with its social activities further on all over the country.

The foundation thanked the member school management
Srinivas Udyavara and the headmistress Geetha for making all arrangements at the school.

Honarary adviser Raghu Karnavar, chief advisor Eshwar K L, vice president Shwetha Uchila, and members from the South unit of the foundation Ravindra B, Chidanand Udyavara, Pavan Kotian, Chanchalakshi Uchil, Vinitha Manjeshwara, Sandesh L and Amitha Uchil were present on the occasion.

ಬೊಂಬೈಡ್ ಶ್ರೀ ಗೆಜ್ಜೆಗಿರಿ ಮೇಳ ಉದಿಪನದ ಲೆಪ್ಪೋಲೆ ಬುಡುಗಡೆ

ಬೊಂಬೈ : ಗೆಜ್ಜೆಗಿರಿ ಶ್ರೀ ದೇಯಿ ಬೈದೆತಿ ಕೋಟಿ-ಚೆನ್ನಯ ಮೂಲಸ್ಥಾನಡ್ ನವೆಂಬರ್ 27ಐತಾರ ನಡಪುನ ಶ್ರೀ ಗೆಜ್ಜೆಗಿರಿ ಮೇಳದ ಅದ್ದೂರಿ ಉದಿಪನ ಬೊಕ್ಕ ದೇವರ್ನ ಸುರೂತ್ತ ಸೇವೆಯಾಟದ ಲೆಪ್ಪೋಲೆ ಬಿಡುಗಡೆ ಲೇಸ್ ಅಂಚೆನೆ ಸಮಾಲೋಚನೆ ಸಭೆ ಬೊಂಬೈಡ್ ನಡತ್ಂಡ್.

ಶ್ರೀ ಗೆಜ್ಜೆಗಿರಿ ಯಕ್ಷಗಾನ ಮಂಡಳಿದ ಮುಂಬೈ ವ್ಯವಸ್ಥಾಪಕೆರಾಯಿನ ನವೀನ್ ಪೂಜಾರಿ ಪಡು ಇನ್ನ ಲೆಪ್ಪೋಲೆನ್ ಬೊಂಬೈ ಬಿಲ್ಲವರ ಅಸೋಸಿಯೇಶನ್ ದ ಅಧ್ಯಕ್ಷೆರೆಗ್ ಹಸ್ತಾಂತರ ಮಲ್ತೆರ್.ಅಸೋಶಿಯೇಷನ್ ಅಧ್ಯಕ್ಷೆರ್ ಹರೀಶ್. ಜಿ ಅಮೀನ್ ಅವೆನ್ ಬುಡುಗಡೆ ಮಲ್ತೆರ್. ಪೊಸ ಮೇಳೊಗು ಎಡ್ಡೆಪ್ಪು ಬಯಕ್ ದ್ ಪಾತೆರಿನ ಆರ್, ಅಪ್ಪೆ ದೇಯಿ ಬೈದ್ಯೆತಿನ ಗೆಜ್ಜೆ ಸೇವೆಗ್ ಮಾತಾ ರೀತಿಡ್ ಲ ಸಹಕಾರ ಬೊಕ್ಕ ಪ್ರೋತ್ಸಾಹ ಕೊರ್ಪೆ ಪಂಡೆರ್. ಈ ಪೊರ್ತುಡು ಬೊಂಬೈ ಬಿಲ್ಲವರ ಎಸೋಸಿಯೇಶನ್ ಉಪಾಧ್ಯಕ್ಷೆರ್ ಜಯಂತಿ ವಿ. ಉಳ್ಳಾಲ್, ಶಂಕರ್ ಡಿ. ಪೂಜಾರಿ, ಧರ್ಮಪಾಲ್ ಜಿ. ಅಂಚನ್, ಕೆ. ಸುರೇಶ್ ಕುಮಾರ್ ಗೌರವ ಪ್ರಧಾನ ಕಾರ್ಯದರ್ಶಿ – ಹರೀಶ್ ಜಿ. ಸಾಲ್ಯಾನ್, ಗೌರವ ಕೋಶಾಧಿಕಾರಿ – ರಾಜೇಶ್ ಜೆ. ಬಂಗೇರ, ಜತೆ ಕಾರ್ಯದರ್ಶಿ – ಕೇಶವ ಕೆ. ಕೋಟ್ಯಾನ್, ಕಾರ್ಯಕಾರಿ ಸಮಿತಿದ ಸದಸ್ಯೆರಾಯಿನ ನೀಲೇಶ್ ಪೂಜಾರಿ ಪಲಿಮಾರ್ , ಶಂಕರ್ ಪೂಜಾರಿ, ಸ್ಥಳೀಯ ಸಮಿತಿದ ಸದಸ್ಯೆರಾಯಿನ ಚಂದ್ರಹಾಸ್ ಪಾಲನ್, ವಿ.ಕೆ ಪೂಜಾರಿ, ಸಂಜೀವ ಪೂಜಾರಿ, ರತ್ನಾಕರ್ ಪೂಜಾರಿ ಭಿವಂಡಿ, ಸಂತೋಷ್ ಪೂಜಾರಿ ಮಲಾಡ್ , ಮೋಹನ್ ಪೂಜಾರಿ, ಜನಾರ್ಧನ್ ಭಾಂಡುಪ್ ಮೊಕುಲು ಮಾತ ಇತ್ತೆರ್.

ಮುಗಿತಲದಂಚಿ ರಿಷಿ ಪಿಕ್ಚರ್ ದ ಶೂಟಿಂಗ್

ಆರ್.ಎಸ್.ಸಾಂಗ್ಸ್ ಬೊಕ್ಕ ವೈ.ಕೆ.ಕ್ರಿಯೇಶನ್ಸ್ ಬ್ಯಾನರ್ ದ ಅಡಿಟ್, ಪ್ರಸಾದ್ ಆಳ್ವ ಬೆಂಗ್ಲೂರ್ ಬೊಕ್ಕ ಪುರಂದರ ಕುಲಾಲ್ ಮೆರೆನ ನಿರ್ಮಾಣಡ್ ತಯಾರಾವೊಂದು ಇಪ್ಪುನ ರಿಷಿ ಕನ್ನಡ ಪಿಕ್ಚರ್ ದ ಶೂಟಿಂಗ್ ಮುಗಿತಲದಡೆ ಬೈದ್ಂಡ್.

ಈ ಟೀಮದ ದ ಕಲಾವಿದೆರ್ ಇಂಚೊಗು ಕರಿಂಜೆ ಕ್ಷೇತ್ರದ ಸ್ವಾಮಿಲೆನ ಆಶೀರ್ವಾದ ಪಡೆವೊಂದೆರ್.
ನನ ಪಿಕ್ಚರ್ ದ ಡಬ್ಬಿಂಗ್ ಬೊಕ್ಕ ಎಡಿಟಿಂಗ್ ದ ಬೇಲೆ ಆವೊಡಾತೆ. ಸಂಗೀತದ ನಿರ್ದೇಶನ ಆಯಿನಾತ್ ಬೇಗ ಆದ್, ಬುಡುಗಡೆಗ್ ತಯಾರಾತ್ಂಡ್. ನೆಟ್ ಖ್ಯಾತ ನಿರೂಪಕೆರ್ ಕುಮಾರ್ ವಿಟ್ಲ ಮೇರ್ ರಿಷಿ ಪಾತ್ರಡ್ ಮಿನ್ಕೊಂದು ಉಲ್ಲೆರ್. ಯಶವಂತ್ ಕುಲಾಲ್ ಮೆರೆನ ನಿರ್ದೇಶನ ಈ ಪಿಕ್ಚರ್ ಡ್ ಖ್ಯಾತ ನಟೆರಾಯಿನ ಮಂಜುನಾಥ್ ಚೇರ್ಕಾಡಿ ಬೊಕ್ಕ ಉದಯ್ ಕುಮಾರ್ ಬೆದ್ರ ಮೊಕುಲು ವಿಭಿನ್ನ ರೀತಿಡ್ ನಟನೆ ಮಲ್ತೊಂದು ಉಲ್ಲೆರ್.

ಈ ಪಿಕ್ಚರ್ ಡ್ ರಾಜ್ಯದ ಯುವ ಸಂಗೀತ ನಿರ್ದೇಶಕೆರ್ ಬೊಕ್ಕ ಸಾಹಿತಿಲಾಯಿನ ತುಳುನಾಡ ಸಾಹಿತ್ಯ ರತ್ನ ರಕ್ಷಿತ್ ಸರಿಪಲ್ಲ ಮೇರೆನ ಕಥೆ-ಚಿತ್ರಕಥೆ-ಸಂಭಾಷಣೆ ಉಂಡು. ಚಂದು ಬೋರ್ಕಲ ಬೊಕ್ಕ ಶ್ರೇಯಸ್ ಯೆಯ್ಯಾಡಿ ಮೆರೆನ ಸಹ-ನಿರ್ದೇಶನ ಉಂಡು. ಪ್ರವೀಣ್ ಶೆಟ್ಟಿಗಾರ್ ಬೊಕ್ಕ ಪದ್ಮನಾಭ್ ಮೊಕುಲು ಈ ಪಿಕ್ಚರ್ ಡ್ ಉಲ್ಲೆರ್. ಪ್ರಸಾದ್ ಆಳ್ವ ಮೆರೆನ ಸುರುತ ನಿರ್ಮಾಣ ಪಿಕ್ಚರ್ ಉಂದು ಆತ್ಂಡ್.

ನ. 21ಕ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯಡ್ ಚಂಪಾ ಷಷ್ಠಿ ಉಚ್ಚಯ

ಸುಬ್ರಹ್ಮಣ್ಯ : ಸುಬ್ರಹ್ಮಣ್ಯ ದೇವಲ್ಯಡ್ (ನ. 21) ಕಾರ್ತಿಕ ದ್ವಾದಶಿದಾನಿ ಬೊಲ್ಪುಗು ಕೊಪ್ಪರಿಗೆ ಏರುನ ಮುಖೇನ ಕುಕ್ಕೆ ಶ್ರೀ 2022-23ನೇ ವರ್ಷದ ವಾರ್ಷಿಕ ಚಂಪಾಷಷ್ಠಿ ಉಚ್ಚಯ ಸುರು ಆಪುಂಡು.

ಡಿ.5 ಮಾರ್ಗಶಿರ ಶುದ್ಧ ದ್ವಾದಶಿದಾನಿ ಬೊಲ್ಪುಗು ಕೊಪ್ಪರಿಗೆ ಜಾದ್ ಆ ದಿನ ರಾತ್ರೆ ನೀರ್ ಬಂಡಿ ಉಚ್ಚಯ, ದೈವಲೆನ ನಡಾವಳಿ ನಡತ್ತಿ ಬೊಕ್ಕ ಈ ವಾರ್ಷಿಕ ಉಚ್ಚಯ ಸಂಪನ್ನ ಆಪುಂಡು ಪಂದ್ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನ ರಾಂ ಸುಳ್ಳಿ ಪಂಡೆರ್. ಮೇರ್ ನ.12 ದಾನಿ ಆಡಳಿತ ಕಚೇರಿಡ್ ಪತ್ರಿಕಾಗೋಷ್ಠಿ ನಡಪಾದ್ ಪಾತೆರ್ಯೆರ್. ಚಂಪಾಷಷ್ಠಿ ಉಚ್ಚಯದ ಲೆಕ್ಕೊಡು ನ. 23ದಾನಿ ಲಕ್ಷ ದೀಪೋತ್ಸವ ನಡಪರೆ ಉಂಡು. ಬಯ್ಯಗ್ 7.00 ಗಂಟೆರ್ದ್ ಶ್ರೀ ದೇವಲ್ಯದ ರಾಜಗೋಪುರದ ಕೈತಲ್ ರ್ದ್ ರಥಬೀದಿ, ಅಡ್ಡಬೀದಿ ಕಾಶಿಕಟ್ಟೆಯಾದ್ ಕುಮಾರಧಾರ ಮುಟ್ಟ ನಲಿಕೆ ಭಜನೆ ಸಂಭ್ರಮನ್ ಶ್ರೀ ದೇವಲ್ಯದ ಆಡಳಿತ ಇಸೇಸವಾದ್ ಅಟ್ಟಣೆ ಮಲ್ದ್ಂಡ್. ಈ ಭಜನೆಡ್ ಸುಮಾರ್ 1,000 ಭಜನೆ ಕೂಟಲು ಪಾಲ್ ಪಡೆಪುನ ನಿರೀಕ್ಷೆ ಉಂಡು. ಭಜನಾ ಸಂಭ್ರಮಡ್ ಪ್ರಮುಖವಾದ್ ಮಲ್ಲ ಗಾಯಕೆರ್ ಜಗದೀಶ ಆಚಾರ್ಯ ಪುತ್ತೂರ್ ಪಾಲ್ ಪಡೆಯೆರೆ ಉಲ್ಲೆರ್. ರಥಬೀದಿ, ಅಡ್ಡಬೀದಿ, ಕಾಶಿಕಟ್ಟೆ ಮುಟ್ಟ ಮಾರ್ಗದ ಬರಿಟ್ಟೆ 10 ಸದಸ್ಯೆರ್ ಇಪ್ಪುನ ಭಜನೆ ಕೂಟನ್ ರಚನೆ ಮಲ್ತ್ ದ್, ಭಜನೆ ಸಂಭ್ರಮನ್ ಆಚರಣೆ ಮಲ್ಪೆರೆ ಉಂಡು.ಬೊಕ್ಕ ದೇವೆರೆನ ಉಚ್ಚಯಗ್ ರಥಬೀದಿಗ್ ಪ್ರವೇಶ ಕೊರ್ಪುನ ಪೊರ್ತುಡು ಈ ಸುರುತ ವರ್ಷದ ಆಯಿನಂಚನೆ ಶ್ರೀ ದೇವಲ್ಯದ ಸಿಬ್ಬಂದಿಲು, ಶ್ರೀ ದೇವಲ್ಯದ ವಿದ್ಯಾಸಂಸ್ಥೆಲು ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆರ್ದ್ ಬೊಕ್ಕ ಸಾರ್ವಜನಿಕೆರೆರ್ದ್ ಲಕ್ಷ ತುಡರ್ ನ್ ಅರ್ಲಾಯೆರೆ ಉಂಡು ಪಂದ್ ತೆರಿಪಾಯೆರ್.
(ವರದಿ : ಗೋಪೀಚಂದನ್ ಕೆ.ಎಸ್.)