ಒಡಿಪು: ಜಾರ್ಖಂಡ್ ರಾಜ್ಯದ ಗಿರಡಿ ಜಿಲ್ಲೆಡ್ ಇಪ್ಪುನ ಜೈನ ಧರ್ಮದ ಪರಮೋಚ್ಚ ಪವಿತ್ರ ತೀರ್ಥಕ್ಷೇತ್ರ “ಸಮ್ಮೇದ ಶಿಖರ್ಜಿ”ನ್ ಜಾರ್ಖಂಡ್ ರಾಜ್ಯ ಸರ್ಕಾರ ಪ್ರವಾಸೋದ್ಯಮ ಇಲಾಖೆದ ಮುಖೇನ ವ್ಯಾಪಾರೀ ಉದ್ದೇಶದ ಪ್ರವಾಸಿತಾಣ ಪಂದ್ ಆದೇಶ ಮಲ್ದ್ಂಡ್. ಸರ್ಕಾರದ ಈ ಆದೇಶನ್ ದೆಪ್ಪೊಡು ಪಂದ್ ಒಡಿಪು ಜಿಲ್ಲೆದ ಜೈನ ಸಮುದಾಯರ್ದ್ ಜಿಲ್ಲಾಧಿಕಾರಿ ಕಚೇರಿದ ಚಾವಡಿಡ್ ಪೊರ್ಂಬಾಟ ನಡತ್ಂಡ್.
ಜಿಲ್ಲೆದ ಬೇತೆ ಬೇತೆ ಜೈನ ಬಸದಿಲೆನ ಪ್ರಮುಖೆರ್ ಪಾತೆರ್ದ್, ಜೈನ ಧರ್ಮದ ಅನಾದಿದ ಪರಮ ಪಾವನ ಕ್ಷೇತ್ರವಾಯಿನ ಸಮ್ಮೇದ ಶಿಖರ್ಜಿ 20 ತೀರ್ಥಂಕರೆರ್ ಮುಕ್ತಿ ಪಡೆಯಿನ ಪವಿತ್ರ ಜಾಗೆ ಆದುಂಡು. ಜೈನೆರೆಗ್ ಈ ಕ್ಷೇತ್ರದ ದರ್ಶನ ಮಲ್ತ್ಂಡ ಪೂರ ಪಾಪ ಕರಿದ್ ಪೋಪುಂಡು ಪನ್ಪುನ ನಂಬೊಲಿಗೆ ಉಂಡು. ಈ ಕ್ಷೇತ್ರದ ದರ್ಶನಗಾದ್ ವಿಶ್ವದ ಬೇತೆ ಬೇತೆ ಜಾಗೆರ್ದ್ ಜೈನೆರ್ ಬರ್ಪೆರ್. ವಫೇಲಾ ರಾಜವಂಶದ ವಿರಾಢವಲ ಬೊಕ್ಕ ವಿಶಾಲದೇವೆರೆನ ಆಳ್ವಿಕೆಡ್ ಪ್ರಧಾನಮಂತ್ರಿ ಆದಿತ್ತಿನ ವಾಸ್ತುಪಾಲೆರ್ ಶಿಖರ್ಜಿನ್ ಜೈನೆರೆನ ತೀರ್ಥಕ್ಷೇತ್ರ ಪಂದ್ ಘೋಷಣೆ ಮಲ್ದೆರ್. ಮೊಗಲ್ ದೊರೆ ಅಕ್ಬರ್ ಲ ಇತಿಹಾಸದ ದಾಖಲೆನ್ ಪರಿಶೀಲನೆ ಮಲ್ತ್ ದ್ ಉಂದು ಜೈನೆರೆನ ತೀರ್ಥಕ್ಷೇತ್ರ ಪಂದ್ ಆದೇಶ ಮಲ್ದೆರ್ ಪಂದ್ ಪೊರಂಬಾಟ ಮಲ್ಪುನ ಜೈನ ಸಮುದಾಯ ಪಂತ್ಂಡ್.
ಕ್ಷೇತ್ರಗ್ ಭಾರಿ ಅಭದ್ರತೆ:
ಬ್ರಿಟಿಷೆರ್ ಲ ಸಮ್ಮೇದ ಶಿಖರ್ಜಿ ಜೈನರೆನ ಪುಣ್ಯಕ್ಷೇತ್ರ ಪಂದ್ ಆದೇಶ ಮಲ್ದೆರ್. ಆಂಡ ಸ್ವಾತಂತ್ರ್ಯದ ಬೊಕ್ಕ ಬತ್ತಿನ ಸರಕಾರಲು ಅಲ್ಪಸಂಖ್ಯಾತೆರೆಡ ಅಲ್ಪಸಂಖ್ಯಾತೆರಾಯಿನ ಜೈನೆರೆನ ತೀರ್ಥಕ್ಷೇತ್ರದ ಇಚಾರಡ್ ಅಭದ್ರತೆದ ವಾತಾವರಣ ನಿರ್ಮಾಣ ಮಲ್ಪುನ ಬೇಜಾರ್ ದ ಇಸಯ ಪಂದ್ ಜೈನ ಮುಖಂಡೆರ್ ಪಂಡೆರ್. ಜೈನೆರೆನ ಪ್ರತಿಭಟನೆದ ನಡುಟ್ಟು ಜಾರ್ಖಂಡ್ ರಾಜ್ಯ ಸರಕಾರ ಈ ಪವಿತ್ರ ಜಾಗೆನ್ ಪ್ರವಾಸಿತಾಣ ಪಂದ್ ಘೋಷಣೆ ಮಲ್ಪುನ ಮುಖೇನ ಅವೆನ್ ಅಪವಿತ್ರ ಮಲ್ಪುನ ಕೆಲಸೊಗು ದುಂಬಾತ್ಂಡ್ ಪಂದ್ ಪಂಡೆರ್.
ಕೇಂದ್ರ ಸರ್ಕಾರ ಗೇನ ಕೊರೊಡು:
ಭಾರತದ ಸಂವಿಧಾನದ ಪ್ರಕಾರ ಭಾರತಡ್ ಜೈನೆರ್ ಇಪ್ಪುನ ಮಾತಾ ತೀರ್ಥಕ್ಷೇತ್ರದ ಪಾವಿತ್ರತೆನ್ ರಕ್ಷಣೆ ಮಲ್ಪುನವು ಸರಕಾರದ ಕರ್ತವ್ಯ. ಬೇತೆಕ್ಲೆನ ತೀರ್ಥಕ್ಷೇತ್ರಲೆನ ಬಗೆಟ್ ಸರಕಾರ ಎಂಚ ಗೇನ ಕೊರೊಂದುಂಡ ಅವ್ವೇ ರೀತಿ ಜೈನರೆನ ಸಮ್ಮೇದ ಶಿಖರ್ಜಿದ ಬಗೆಟ್ಟ್ ಭಾರತ ಸರಕಾರ ಜಬದಾರಿ ಒಯಿಸೊನೊಡು ಪಂದ್ ಪನ್ತೆರ್.
ಆಳುಪ ವಂಶಸ್ಥೆರ್,ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಡಾ. ಆಕಾಶ್ ರಾಜ್ ಜೈನ್ ಪಾತೆರ್ದ್, ಉಂದು ಅಹಿಂಸಾತ್ಮಕ ಸಾಂಕೇತಿಕ ಪ್ರತಿಭಟನೆ ಆದುಂಡು. ಸರಕಾರ ನೆನ್ ಪುರಸ್ಕಾರ ಮಲ್ಪೊಡು. ಕರ್ನಾಟಕಗ್ ಲ ಸಮ್ಮೇದ ಶಿಖರ್ಜಿ ಗ್ ಲ ಇಪ್ಪುನ ಸಂಬಂಧಗ್ ಸುಮಾರ್ ವರ್ಷದ ಇತಿಹಾಸ ಉಂಡು. ರಾಜ್ಯ ಸರಕಾರಲ ಸಮ್ಮೇದಾಚಲ ಯಾತ್ರಾರ್ಥಿಲೆನ ಅನುಕೂಲಗಾದ್ ಅನುದಾನ, ರೈಲ್ ವ್ಯವಸ್ಥೆದೊಟ್ಟಿಗೆ ಯಾತ್ರಿನಿವಾಸ ನಿರ್ಮಾಣದ ಇಚಾರಡ್ ಅಲ್ಪದ ಸರಕಾರದೊಟ್ಟಿಗೆ ಪಾತೆರಕತೆ ನಡಪಾದ್ ಕ್ರಮ ದೆತೊನೊಡು ಪಂದ್ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಪೊರ್ಂಬಾಟದ ಜಾಗೆಗ್ ಬತ್ತಿನ ಜಿಲ್ಲಾಧಿಕಾರಿ ಕೂರ್ಮಾರಾವ್ ಎಂ. ಮೇರೆನ ಮುಖೇನ ರಾಷ್ಟ್ರಪತಿ, ಪ್ರಧಾನ ಮಂತ್ರಿ ಬೊಕ್ಕ ಜಾರ್ಖಂಡ್ ರಾಜ್ಯ ಸರಕಾರಲೆನ ಬಗೆಟ್ ಸಮುದಾಯದ ಬೇಡಿಕೆನ್ ಮನ್ನಿಸ್ ದ್ ಸಮ್ಮೇದ ಶಿಖರ್ಜಿನ್ ಪ್ರವಾಸಿತಾಣ ಪಂದ್ ಘೋಷಣೆ ಮಲ್ತ್ ದ್ ಇಪ್ಪುನ ಆದೇಶನ್ ಪಿರ ದೆಪ್ಪೊಡು ಪಂದ್ ಜಾರ್ಖಂಡ್ ಆಡಳಿತಗ್ ಆದೇಶ ಕೊರೊಡು ಬೊಕ್ಕ ಸಮ್ಮೇದ ಶಿಖರ್ಜಿದ ಗೌರವಗ್ ಚ್ಯುತಿ ಬರಂದಿಲೆಕ್ಕ ಎಚ್ಚೆರ್ಗೆ ಒಯಿಸೊನುವ ಪಂದ್ ಬರೆದ್ ಭರವಸೆ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.
ನನ ದುಂಬಗ್ ಜೈನೆರೆನ ತೀರ್ಥಕ್ಷೇತ್ರಗ್ ಒವ್ವೇ ತೊಂದರೆ ಆವಂದೆ ಇಪ್ಪಡ್ ಪನ್ಪುನ ಕಾನೂನುನ್ ಕನವೊಡು ಪಂದ್ ರಾಷ್ಟ್ರಪತಿಲೆಗ್ ಬರೆಯಿನ ಈ ಪತ್ರಡ್ ತೆರಿಪಾದೆರ್. ಇತ್ತೆ ರಾಜ್ಯೊಡು ಇಡೀ ಬೇತೆ ಬೇತೆ ಜಿಲ್ಲೆಲೆಡ್ ಪೊರ್ಂಬಾಟ ನಡತೊಂದು ಉಂಡು.ಅವೇ ಪ್ರಕಾರ ಒಡಿಪುಡ್ ಜಿಲ್ಲಾಧಿಕಾರಿಲೆನ ಮುಖೇನ ಬಿನ್ನಾಪು ಸಂದಾಯೆರ್. ಜೈನ ಸಮುದಾಯದ ಬೇತೆ ಬೇತೆ ಸಂಘಟನೆದ ಪದಾಧಿಕಾರಿಲಾಯಿನ ಪ್ರೇಮ್ ಕುಮಾರ್ ಹೊಸ್ಮಾರ್, ಮಹಾವೀರ ಜೈನ್ ಅಂಡಾರ್, ಭರತ್‌ರಾಜ್ ಜೈನ್, ವಿಜಯಕುಮಾರ್ ಜೈನ್, ಯೋಗರಾಜ್ ಶಾಸ್ತ್ರಿ, ಕಾರ್ಲ ಜೈನ್ ಮಿಲನ್ ಅಧ್ಯಕ್ಷೆರ್ ಮಾಲತಿ ವಸಂತರಾಜ್, ಸುನಿಲ್ ಕುಮಾರ್ ಜೈನ್ ಪಾತೆರಿಯೆರ್.
ಈ ಪೊರ್ತುಡು ಒಡಿಪು ಜೈನ್ ಮಿಲನ್ ಅಧ್ಯಕ್ಷೆರ್ ದೀಪಾ ರಾಜೇಶ್, ಬೇತೆ ಬೇತೆ ಪ್ರದೇಶಲೆನ ಜೈನ್ ಮಿಲನ್, ಅಧ್ಯಕ್ಷೆರಾಯಿನ ನೀತು ಜೈನ್, ಪುಷ್ಪರಾಜ್ ಜೈನ್, ಜೈನ ಪುರೋಹಿತ ಸಂಘದ ಸುರೇಂದ್ರ ಇಂದ್ರ, ಸಿಂಹಸೇನ ಇಂದ್ರ, ಸನ್ಮಿತ್ರ ಸಂಘದ ಶೀತಲ್ ಜೈನ್, ದ.ಕ ಜೈನ ಯುವ ಸಂಘದ ಪಾರ್ಶ್ವನಾಥ ಜೈನ್, ನಾರಾವಿ ಅಜಿತ್ ಕುಮಾರ್ ಜೈನ್, ರೆಂಜಾಳ ಸತೀಶ್ ಕುಮಾರ, ಶಾಂತಿರಾಜ್, ಪ್ರಸನ್ನ ಕುಮಾರ, ಸುಕೀರ್ತಿ, ಯಶೋಧಾ ಅತ್ತಂದೆ ಕಾರ್ಲ, ಬಜಗೋಳಿ, ಹೊಸ್ಮಾರ್, ಶಿರ್ಲಾಲು, ರೆಂಜಾಳ, ಇರ್ವತ್ತೂರ್, ಅಳಿಯೂರು, ನಾರಾವಿ, ಅಜೆಕಾರು, ವರಂಗ, ಹಟ್ಟಿಯಂಗಡಿ, ಬೋಳ, ಮಾಳ, ಮೂಡಾರು, ನಲ್ಲೂರು ಪ್ರದೇಶಲೆರ್ದ್ ಜೈನ ಸಮಾಜದಕುಲು, ಬಸದಿಲೆನ ಪ್ರಮುಖೆರ್, ಶ್ರಾವಕೆರ್ ಇತ್ತೆರ್.
