107 ದಿನ ರಾಹುಲ್ ಗಾಂಧಿ ಮುತಾಲಿಕೆಡ್ ನಡತಿನ ಭಾರತ್ ಜೋಡೋ ಯಾತ್ರೆ ಇನಿ ಡೆಲ್ಲಿಗ್ ಎತ್ತಿಯೆರೆ ಉಂಡು. ಮುಲ್ಪ ಮಸ್ತ್ ಜನ ಸೇರುನ ನಿರೀಕ್ಷೆ ಉಂಡು ಪಂದ್ ಪೊಲೀಸೆರ್ ತೆರಿಪಾದೆರ್.
ಬದರ್ ಪುರ ಗಡಿರ್ದ್ ಡೆಲ್ಲಿಗ್ ಎತ್ತುನ ಈ ಯಾತ್ರೆ ಬಯ್ಯಗ್ 4:30 ಕ್ ರಾಜ್ ಘಾಟ್ ಗ್ ಎತ್ತುಂಡು. ಇನಿ ಸುಮಾರ್ 40000 ಜನ ಯಾತ್ರೆಡ್ ಪಾಲ್ ಪಡೆವೆರ್ ಪಂದ್ ಡೆಲ್ಲಿ ಕಾಂಗ್ರೆಸ್ ಸಂವಹನ ವಿಭಾಗದ ಅಧ್ಯಕ್ಷೆರ್ ಅನಿಲ್ ಭಾರದ್ವಾಜ್ ಪಂಡೆರ್.
ಇರುಮುಡಿ ಪತೊಂದು ಶಬರಿಮಲೆಕ್ ಪೋವೊಂದು ಇತ್ತಿನ ಭಕ್ತೆರೆನ ಗಾಡಿ ಗುಂಡಿಗ್ ಬೂರ್ದು 8 ಜನ ತೀರ್ ಪೋಯಿನ ಘಟನೆ ಶುಕ್ರಾರ ನಡುರಾತ್ರೆ ಕೇರಳದ ಇಡುಕ್ಕಿಡ್ ನಡತ್ಂಡ್.
ಈ ಘಟನೆದ ಜಾಗೆಗ್ ಅಗ್ನಿಶಾಮಕ ಸಿಬ್ಬಂದಿ, ರಕ್ಷಣಾ ತಂಡ ಬತ್ ದ್, ಸಾವುದ ಸಂಖ್ಯೆ ನನಾತ್ ಹೆಚ್ಚಾಪುಂಡು ಪಂದ್ ಅಂದಾಜಿ ಮಲ್ದೆರ್. ಹೆಚ್ಚದ ಮಾಹಿತಿ ನನ ತೆರಿದ್ ಬರೊಡಾತೆ.
ಐಪಿಎಲ್ ವಾರ್ ಲೆಪ್ಪುನೆಟ್ಟ್ ಇಂಗ್ಲೆಂಡ್ ದ ಆಲ್ ರೌಂಡರ್ ಸ್ಯಾಮ್ ಕರನ್ ನ್ 18.50 ಕೋಟಿ ರೂ. ಗ್ ಪಂಜಾಬ್ ಕಿಂಗ್ಸ್ ದೆತೊಂದುಂಡು.
ಮೆರೆನ್ ಬೊಂಬೈ ಇಂಡಿಯನ್ಸ್, ಆರ್ ಸಿಬಿ, ರಾಜಸ್ಥಾನ್ ರಾಯಲ್ಸ್, ಚೆನ್ನೈ ಸೂಪರ್ ಕಿಂಗ್ಸ್ ತಂಡಲು ದೆತೊನಿಯೆರೆ ತೂಯೆರ್. ಆಂಡ ಮೇರ್ ಪಂಜಾಬ್ ಕಿಂಗ್ಸ್ ದ ಪಾಲಾಯೆರ್. ಅವ್ವತ್ತಂದೆ ಮೇರ್ ಐಪಿಎಲ್ ಇತಿಹಾಸಡೇ ಮಸ್ತ್ ಹೆಚ್ಚ ಬಿಲೆಕ್ ಬಿಡ್ ಆಯಿನ ಆಟಗಾರೆ ಪನ್ಪುನ ಪುಗರ್ತೆ ಪಡೆದೆರ್.
Punjab Kings buys England’s all rounder Sam Curran for 18.50 crores
At the IPL auction at Cochin All rounder Sam Curran was bought for 18.50 crore by Punjab Kings.
He was bid by Mumbai Indians, RCB, Rajasthan Royals, Chennai Super Kings team also .But he was finally auctioned off to Punjab Kings.He is the highest bid player to date in the history of IPL auctions.
ಬಡಪತ್ತ್ ದ ಮೂಜಿ ಕುಟುಂಬದ ಚಿಕಿತ್ಸೆಗ್ ಡಿ.31 ಶನಿಯಾರದಾನಿ ನಡಪುನ ಉಪ್ಪಳ ಅಯ್ಯಪ್ಪ ದೀಪ ಉಚ್ಚಯದ ಪೊರ್ತುಡು ತತ್ವಮಸಿ ಸೇವಾಚಕ್ರ ಪನ್ಪುನ ಇಸೇಸ ವೇಷದೊಟ್ಟಿಗೆ, ಬೇತೆ ಬೇತೆ ಸಂಘ ಸಂಸ್ಥೆಲೆನ ಸಹಕಾರಡ್ ಪಣವುದ ಸಕಾಯನ್ ಕೇನೊಂದು ಸಾಯಂಜನಿ ಯುವ ಬಳಗ ನಿಕುಲೆನ ಎದುರು ಬರೊಂದು ಉಲ್ಲೆರ್. ಅಂಚನೆ ನಿಕುಲೆಡ ಆಪುನಾತ್ ಪಣವುದ ಸಕಾಯನ್ ಕೇನೊಂದೆರ್.
ಕೊಣಾಜೆಡ್ ಸ್ವಾಂಡಲೋಸಿಸ್ ರೋಗರ್ದ್ ನರಲೊಂದು ಇಪ್ಪುನ ಅಪ್ಪೆನ ಚಿಕಿತ್ಸೆಗ್ ಕಾಸ್ ಇಜ್ಜಂದೆ, ಪರದಾಡುನ ಮೂಜಿ ಪೊಣ್ಣು ಜೋಕುಲು ದಾನಿಲೆನ ನೆರವುದ ನಿರೀಕ್ಷೆಡ್ ಉಂಡು ಈ ಕುಟುಂಬ.
ಕಾಸ್ರೋಡು ಜಿಲ್ಲೆದ ಬದಿಯಡ್ಕ ಗ್ರಾಮ ಪಂಚಾಯತಿ ವ್ಯಾಪ್ತಿಡ್ ಇಪ್ಪುನ ಏತಡ್ಕ ವಲಕುಂಜಡ್ ಇಪ್ಪುನ ಜನಾರ್ದನ ಪನ್ಪುನರೆನ ರಡ್ಡ್ ಜೋಕುಲು ನೂದೆರ್ದ್ ಹೆಚ್ಚ ಕನನ್ ಕಟ್ಟೊಂದು ತನ್ನ ಭವಿಷ್ಯನ್ ಕಟ್ಟೊನ್ನ ಪ್ರಾಯಡೇ ತನ್ನ ರಡ್ಡ್ ಕಿಡ್ನಿದ ತೊಂದರೆಗ್ ಗುರಿಯಾಯಿನ ಮೊಕ್ಲೆನ ಖರ್ಚ್ ಗ್ ಒವ್ವೇ ತಾದಿ ಇಜ್ಜಂದೆ, ಚಿಕಿತ್ಸೆಗ್ ದಾನಿಲೆನ ಸಕಾಯನ್ ಕೇನೊಂದುಂಡು ಕುಟುಂಬ.
ಕಾಸ್ರೋಡು ಜಿಲ್ಲೆದ ಉಪ್ಪಳ ಬಾಯಾರ್ ನಿವಾಸಿ ಆಯಿನ ಗುಲಾಬಿ ಪನ್ಪುನರ್ ಲಿವರ್ ಸಮಸ್ಯೆರ್ದ್ ನರಲೊಂದು ಉಲ್ಲೆರ್. ಮೆರೆನ್ ಮಹೇಶ್ ಆಸ್ಪತ್ರೆಡ್ ಐ.ಸಿ.ಯು ಗ್ ಸೇರ್ಸಾದೆರ್. ಚಿಕಿತ್ಸೆಗ್ ಅಂದಾಜ್ 3 ಲಕ್ಷ ಖರ್ಚ್ ಆಪುಂಡು. ಮೇರ್ ಮಸ್ತ್ ಬಡಪತ್ತ್ ಡ್ ಉಲ್ಲೆರ್. ಆಸ್ಪತ್ರೆದ ಕಾಸ್ ಕಟ್ಟೆರೆ ಸಾಧ್ಯ ಆವಂದಿನ ಕಾರಣ ನಿಕಲೆನ ಮಾತ ಸಕಾಯ ಕೇನೊಂದೆರ್.
ಬಂಟ್ವಾಳ: ರಿಕ್ಷಾಡ್ ಅಮಲ್ ಸೊತ್ತುಲೆನ್ ಕಲ್ವ ತಾದಿಡ್ ಕೊನೊಂದು ಇತ್ತಿನ ರಡ್ಡ್ ಆರೋಪಿಲೆನ್ ಗುರುವಾರ ಗೂಡಿನಬಳಿ ಕೈತಲ್ ರಿಕ್ಷಾದೊಟ್ಟಿಗೆ ವಶಕ್ ಪಡೆತೆರ್.
ಬಂಟ್ವಾಳ ಬಾರೆಕಾಡು ನಿವಾಸಿ ಇರ್ಷಾದ್‌ (23) ಬೊಕ್ಕ ಮಂಜೇಶ್ವರ ಉದ್ಯಾವರಗುತ್ತು ನಿವಾಸಿ ದೀಕ್ಷಿತ್‌ (19) ಅರೆಸ್ಟ್ ಆಯಿನ ಆರೋಪಿಲು. ಮೊಕ್ಲೆರ್ದ್ ಸುಮಾರ್ 20 ಸಾರ ರೂ. ಬಿಲೆತ ಅಮಲ್ ಸೊತ್ತುಲೆನ್ ಬೊಕ್ಕ 75 ಸಾರ ರೂ. ಬಿಲೆತ ರಿಕ್ಷಾನ್ ಬಂಟ್ವಾಳ ನಗರ ಠಾಣೆದ ಎಸ್‌ಐ ಅವಿನಾಶ್‌ ಗೌಡ ಬೊಕ್ಕ ಸಿಬಂದಿ ವಶಕ್ ಪಡೆತೆರ್. ಈ ಬಗೆಟ್ ಬಂಟ್ವಾಳ ನಗರ ಪೊಲೀಸ್‌ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಜೆದ್ದಾ: ಸೌದಿ ಅರೇಬಿಯಾದ ಪೊಸ ಭಾರತೀಯ ರಾಯಭಾರಿಯಾದ್ ಸುಹೇಲ್ ಎಜಾಸ್ ಖಾನ್ ಮೆರೆನ್ ಭಾರತದ ವಿದೇಶಾಂಗ ವ್ಯವಹಾರಲೆನ ಸಚಿವಾಲಯ ನೇಮಕ ಮಲ್ದ್ಂಡ್.
ಇತ್ತೆ ಲೆಬನಾನ್‌ಗ್ ಭಾರತೀಯ ರಾಯಭಾರಿ ಆದಿಪ್ಪುನ ಮೇರ್ ಕೆಲವೇ ದಿನಟ್ ಅಧಿಕಾರ ಒಯಿಸೊನಿಯೆರೆ ಉಲ್ಲೆರ್ ಪಂದ್ ವಿದೇಶಾಂಗ ವ್ಯವಹಾರಲೆನ ಸಚಿವಾಲಯ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್. ಮೇರ್ ಜೆಡ್ಡಾಡ್ ಕಾನ್ಸುಲ್ ಜನರಲ್ ಆದ್ ಬೊಕ್ಕ ರಿಯಾದ್‌ಡ್ ಡೆಪ್ಯೂಟಿ ಚೀಫ್ ಆಫ್ ಮಿಷನ್ ಆದ್ ಬೇಲೆ ಮಲ್ಪೆರೆ ಉಲ್ಲೆರ್.
ಮಿರ್ಜಾಪುರದ ಸಾನಿಯಾ ಮಿರ್ಜಾ ಎನ್‌ಡಿಎ ಪರೀಕ್ಷೆಡ್ 149 ನೇ ರ್ Rank ಪಡೆಯಿನ ಬೊಕ್ಕ ಭಾರತದ ಸುರುತ ಮುಸ್ಲಿಂ ಪೊಂಜೋವ್ ಫೈಟರ್ ಪೈಲಟ್ ಆದ್ ನೇಮಕ ಆತೆರ್.
ಮೇರ್ ಫ್ಲೈಟ್ ಲೆಫ್ಟಿನೆಂಟ್ ಅವನಿ ಚತುರ್ವೇದಿ ಮೆರೆರ್ದ್ ಸ್ಫೂರ್ತಿ ಪಡೆದ್ ಬೊಕ್ಕ ಅರೆನ್ ತೂದು ಎನ್‌ಡಿಎ ಸೇರಿಯೆರೆ ನಿರ್ಧಾರ ಮಲ್ತೆ ಪಂದ್ ಪಂಡೆರ್. ಅತ್ತಂದೆ ಯುವ ಪೀಳಿಗೆ ಎನ್ನೆರ್ದ್ ಸ್ಫೂರ್ತಿ ಪಡೆಪುಂಡು ಪಂದ್ ಯಾನ್ ಎನ್ನಿವೆ ಪಂದ್ ಪಂಡೆರ್.
ಆಸ್ಟ್ರೇಲಿಯಾದ 23 ವರ್ಷದ ಆಲ್ ರೌಂಡರ್ ಕ್ಯಾಮರೂನ್ ಗ್ರೀನ್ ಮೆರೆನ್ ₹17.5 ಕೊರ್ದು ಮುಂಬೈ ಇಂಡಿಯನ್ಸ್ ದೆತೊಂದುಂಡು.
ಬ್ಯಾಟಿಂಗ್ ದೊಟ್ಟಿಗೆ ಮಸ್ತ್ ಬೇಗ ಬೌಲಿಂಗ್‌ ಮಲ್ಪುನ ಸಾಮರ್ಥ್ಯ ಮೆರೆಗ್ ಉಂಡು. ಮೆರೆನ ಟಿ 20 ದಾಖಲೆ ಆಕರ್ಷಕ ಆದುಂಡು.
ಬೊಲ್ತೇರ್: ಬಳ್ಳಾರಿರ್ದ್ ಶಬರಿಮಲೆಕ್ಕ್ ಪೋವೊಂದು ಇತ್ತಿನ ಮಿನಿ ಬಸ್ ಮುಂಡಾಜೆದ ಉಳ್ಳಾಲ್ತಿ ಕಟ್ಟೆದಲ್ಪ ಬ್ರೇಕ್ ಫೇಲ್ ಆದ್ ಮಾರ್ಗದ ಬರಿತ ಕಾಡ್ ಗ್ ಪೊಗ್ಗುದು ಸುಮಾರ್ ಜನಕ್ ಪೆಟ್ಟಾಯಿನ ಘಟನೆ ಡಿ.23 ಕ್ ಬೊಲ್ಪುಗು ನಡತ್ಂಡ್.
ಈ ಘಟನೆಡ್ ಕೂಡ್ಲಗಿ ತಾಲೂಕ್ ದ ಚಿಕ್ಕಜೋಗೆ ಹಳ್ಳಿದ ಶಶಿ, ಜಲಧರ, ರಘು, ಬಸವರಾಜ್, ಲೋಕ ಪನ್ಪುನಕ್ಲೆಗ್ ಪೆಟ್ಟಾತ್ಂಡ್. ನೆಟ್ ರಡ್ಡ್ ಜನಕ್ ಮಸ್ತ್ ಪೆಟ್ಟಾತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಗಾಡಿ ಪೊಗ್ಗಿನ ಜಾಗೆಡ್ ಕನಿ ಬೊಕ್ಕ ಕರೆಂಟ್ ದ ಕಂಬ ಇತ್ತ್ಂಡ್. ಡ್ರೈವರ್ ನ ಸಮಯ ಪ್ರಜ್ಞೆರ್ದ್ ಮಲ್ಲ ಅನಾಹುತ ತತ್ತ್ಂಡ್. ಈ ಘಟನೆದ ಜಾಗೆಗ್ ಬೊಲ್ತೇರ್ ಸಂಚಾರಿ ಠಾಣೆ ಪೊಲೀಸೆರ್ ಬತ್ ದ್, ಪೆಟ್ಟಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಕರ್ನಾಟಕ ಮಹಾರಾಷ್ಟ್ರ ಗಡಿಭಾಗಡ್ ಪುದರ್ ಪಡೆಯಿನ ಮಂದ್ರೂಪ ಪಟ್ಟಣದ ರೇಣುಕಾಚಾರ್ಯ ಶಿವಾಚಾರ್ಯ ಸ್ವಾಮೀಜಿ (65) ತಿಗಲೆ ಬೇನೆಡ್ ತೀರ್ ಪೋಯೆರ್.
ಪೂಜೆ ಮಲ್ತೊಂದು ಇಪ್ಪುನಗ ಬೂರ್ನ ಮೆರೆನ್ ಕೈತಲ್ ದ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ಚಿಕಿತ್ಸೆ ಫಲಿಸಂದೆ ತೀರ್ ಪೋಯೆರ್. ಎಲ್ಲೆ ಮಧ್ಯಾಹ್ನ 3 ಗಂಟೆಗ್ ಮಹಾರಾಷ್ಟ್ರದ ಸೊಲ್ಲಾಪುರ ಜಿಲ್ಲೆದ ಮಂದ್ರೂಪಡ್ ಇಪ್ಪುನ ಮಠತ ಚಾವಡಿಡ್ ಅಕೇರಿದ ಕ್ರಿಯೆ ನಡಪರೆ ಉಂಡು.
