kudla

ಶ್ರೀಕೃಷ್ಣ ಮಠಟ್ ಸಂಪ್ರದಾಯಬದ್ಧವಾದ್ ನಡಪರೆ ಉಂಡು ಶ್ರೀಕೃಷ್ಣ ಜನ್ಮಾಷ್ಟಮಿ

ಒಡಿಪು : ಶ್ರೀಕೃಷ್ಣ ಮಠಟ್ ಏಪದಲಕ ಪೂಜೆಲು ಸಂಪ್ರದಾಯಬದ್ಧವಾದ್ ನಡಪರೆ ಉಂಡು . ಶ್ರೀಕೃಷ್ಣ ಜನ್ಮಾಷ್ಟಮಿ (ಆಗಸ್ಟ್ 30, ಸೋಮವಾರ) ಪರ್ವಕಾಲಡ್ ಕಾಂಡೆ ಮಹಾಪೂಜೆರ್ದ್ ದುಂಬು ಶ್ರೀಕೃಷ್ಣ ದೇವೆರೆಗ್ ಪರ್ಯಾಯ ಪೀಠಾಧೀಶರಾಯಿನ ಶ್ರೀ ಶ್ರೀ ಈಶಪ್ರಿಯ ತೀರ್ಥ ಶ್ರೀಪಾದರು  ವಿಶೇಷವಾದ್ ಲಕ್ಷ ತುಳಸಿ ಅರ್ಚನೆ ಮಲ್ಪರೆ ಉಲ್ಲೆರ್ . ವಿಪ್ರ ಬಾಂಧವೆರ್ ತುಳಸಿ ಅರ್ಚನೆಡ್ ಪಾಲ್ ಪಡೆಯರೇ ಉಲ್ಲೆರ್ . ತುಳಸಿ, ಪುಷ್ಪ ಕೊರ್ಪಿನಕುಲು ಆಗಸ್ಟ್ 29, ಐತಾರ ಬೈಯ್ಯದುಲಯಿ ಶ್ರೀಮಠಕ್ ಕೊರೋಲಿ .

ಆಗಸ್ಟ್‌ 30, ಸೋಮವಾರ ಶ್ರೀಕೃಷ್ಣ ಜನ್ಮಾಷ್ಟಮಿದಾನಿ ಸೂರ್ಯಶಾಲೆಡ್ ಸ್ಯಾಕ್ಸೋಫೋನ್, ನಾಗಸ್ವರ ಬೊಕ್ಕ ಕೊಳಲು ವಾದನ ಕ‌ಛೇರಿ ನಡಪರೆ ಉಂಡು .

ಶ್ರೀಕೃಷ್ಣ ಜಯಂತಿ ಬೊಕ್ಕ ಶ್ರೀಕೃಷ್ಣ ಲೀಲೋತ್ಸವ (ವಿಟ್ಲಪಿಂಡಿ) ದಿನತಾನಿ ಶ್ರೀಕೃಷ್ಣ ದರ್ಶನವಾವೊಡು ಪನ್ಪಿನ ಶ್ರೀಕೃಷ್ಣ ಭಕ್ತರ ಹಂಬಲದಲಕ ದರ್ಶನಗ್ ಅವಕಾಶ ಕೊರ್ತೆರ್ . ಆಗಸ್ಟ್ 30, ಸೋಮವಾರದಾನಿ ಕಾಂಡೆ 08.00 ಗಂಟೆರ್ದ್ ಬೈಯ್ಯಗ್ 06.00 ಗಂಟೆ ಮುಟ ಶ್ರೀಕೃಷ್ಣ ದರ್ಶನಗ್ ಅವಕಾಶ ಉಂಡು . ಆಗಸ್ಟ್ 31, ಅಂಗಾರೆ ದಾನಿ ಕಾಂಡೆ 7.30ರ್ದ್ ಮಧ್ಯಾಹ್ನ 01.00 ಗಂಟೆ ಮುಟ , ಅಂಚನೇ ಶ್ರೀದೇವೆರ್ನ ರಥೋತ್ಸವರ್ದ್ ಬೊಕ್ಕ ಬೈಯ್ಯಗ್ 5.00 ಗಂಟೆರ್ದ್ ಶ್ರೀಕೃಷ್ಣ ದರ್ಶನಗ್ ಅವಕಾಶ ಉಂಡು .

ಶ್ರೀಕೃಷ್ಣ ಭಕ್ತೆರ್ ಮಾಸ್ಕ್ ಪಾರ್ದ್ , ಸಾಮಾಜಿಕ ಅಂತರ ಪಾಲಿಸಾವೊಡು ಪಂದ್ ಆಡಳಿತ ಮಂಡಳಿರ್ಡ್ ಬಿನ್ನಾಪು ಮಲ್ದೆರ್.ಶ್ರೀಕೃಷ್ಣ ಮಠಟ್ ಆಗಸ್ಟ್ 30, ಸೋಮವಾರ ಶ್ರೀಕೃಷ್ಣ ಜಯಂತಿ ದಿನತಾನಿ ರಾತ್ರಿ 12.30ರ್ದ್ ಬೊಕ್ಕ ಅರ್ಘ್ಯ ಪ್ರದಾನಗ್ ಭಕ್ತೇರೆಗ್ ಅವಕಾಶ ಉಂಡು , ಕನಕನ ಕಿಂಡಿ ದುಂಬು ಬೊಕ್ಕ ಮಧ್ವ (ವಸಂತ) ಮಂಟಪಡ್ ಅವಕಾಶ ಕೊರ್ತೆರ್ ಪಂದ್ ಶ್ರೀಕೃಷ್ಣ ಮಠ, ಪರ್ಯಾಯ ಶ್ರೀ ಅದಮಾರು ಮಠದ ವ್ಯವಸ್ಥಾಪಕೆರ್ ಪ್ರಕಟಣೆಡ್ ತೆರಿಪಾದೆರ್.

ಸಂತ್ರಸ್ತ ಪೊಣ್ಣನ್ ಯಾನ್ ಮಗಲೆನ ಸ್ಥಾನಡ್ ತೂತೆ : ಸಚಿವ ಆರಗ ಜ್ಞಾನೇಂದ್ರ

ಬೆಂಗ್ಳೂರು: ಮೈಸೂರುದ ವೈದ್ಯಕೀಯ ವಿದ್ಯಾರ್ಥಿನಿ ಮಿತ್ತ್ ನಡತಿನ ಗ್ಯಾಂಗ್‌ ರೇಪ್‌ ಪ್ರಕರಣಗ್ ಸಂಬಂಧಿ “ಕಾಂಗ್ರೆಸ್‌ ನಾಯಕೆರ್ ನಮನ್ ಅತ್ಯಾಚಾರ ಮಲ್ತೊಂದು ,’ ಉಲ್ಲೆರ್ ಪಂದ್ ವಿವಾದಾತ್ಮಕ ಪಾತೆರ ಪಂಡಿನ ಗೃಹ ಸಚಿವ ಆರಗ ಜ್ಞಾನೇಂದ್ರ, ಇತ್ತೆ ತಾನ್ ಪಂಡಿನ ಪಾತೆರನ್ ಪಿರ ದೆತೊoದು ತಪ್ಪು ಒತ್ತೊoದೆರ್ .

ಮೈಸೂರು ಗ್ಯಾಂಗ್‌ ರೇಪ್‌ ಪ್ರಕರಣದ ಬಗ್ಗೆ ಹೇಳಿಕೆ ಕೊರ್ಪಿನ ಪೊರ್ತುಡು ಕಾಂಗ್ರೆಸ್‌ ನಾಯಕೆರ್ ಅಕ್ಲೆನ್ ಅತ್ಯಾಚಾರ ಮಲ್ತೊಂದು ಉಲ್ಲೆರ್ ಪಂದ್ ತಪ್ಪು ಪಾತೆರ ಪಂದ್ ಇತ್ತೆರ್ ಈ ವಿಚಾರವಾದ್ ಖುದ್ದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿಲಾ ಅಸಮಧಾನ ಪಂಡೆರ್ .

ಈ ನೆಲೆಟ್ಟ್ ಪಂಡಿ ಪಾತೆರ ಪಿರ ದೆತೊನ್ಡಿನ ಆರ್ ತಪ್ಪುಒತ್ತೊoದೆರ್.

ಅಪಘಾತ ಆದ್ ಗಾಯ ಆಯಿನಕ್ಲೆನ್ ಭೇಟಿಯಾಯಿನ ಶಕುಂತಲಾ ಶೆಟ್ಟಿ ಬೊಕ್ಕ ಬ್ಲಾಕ್ ಕಾಂಗ್ರೆಸ್ ನಾಯಕೆರ್

ಪುತ್ತೂರು : ಬೈಕ್ ಅಪಘಾತಡ್ ಪುತ್ತೂರು ಸರಕಾರಿ ಆಸ್ಪತ್ರೆಗ್ ದಾಖಲಾದ್ ಮರ್ದ್ ಪಡೆಯೊಂದು ಉಪ್ಪುನ ಹಿರೆಬಂಡಾಡಿ ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ಸತೀಶ್ ಬೊಕ್ಕ ದೊಡ್ಡಡ್ಕ ನಿವಾಸಿ ಕಾರ್ಮಿಕ ಲೋಹಿತ್ ಪನ್ಪಿನರೆನ್ ಭೇಟಿಯಾಯಿನ ಮಾಜಿ ಶಾಸಕಿ ಶ್ರೀಮತಿ ಶಕುಂತಲಾ ಟಿ ಶೆಟ್ಟಿ ಬೊಕ್ಕ ಬ್ಲಾಕ್ ಕಾಂಗ್ರೆಸ್ ಗುರ್ಕಾರ್ಲಾಯಿನ ಎಂ ಬಿ ವಿಶ್ವ ನಾಥ ರೈ, ಅಕ್ಲೆನ ಆರೋಗ್ಯನ್ ವಿಚಾರಣೆ ಮಲ್ತೆರ್.

ಈ ಪೊರ್ತುಡು ಬ್ಲಾಕ್ ಪ್ರದಾನ ಕಾರ್ಯಂತೆರಾಯಿನ ಅಮಲಾ ರಾಮಚಂದ್ರ, ಬ್ಲಾಕ್ ಕಾರ್ಮಿಕ ಘಟಕದ ಗುರ್ಕಾರ್ಲಾಯಿನ ಶರೊನ್ ಸಿಕ್ವೆರಾ, ರಾಜೀವ್ ಗಾಂಧಿ ಪಂಚಾಯತ್ ರಾಜ್ ಸಂಘಟಣೆದ ಗುರ್ಕಾರ್ಲಾಯಿನ ಸಂತೋಷ್ ಭಂಡಾರಿ ಚಿಲ್ಮೆತ್ತಾರ್ ಪಾಲ್ ಪಡೆದಿತ್ತೆರ್.

ತುಲು ಅಧಿಕೃತ ಆಪಿನೆತ್ತ ಬಗ್ಗೆ ಸರಕಾರಡ ನಿಕುಲೆ ಪಾತೆರ್ಲೆ – ವಿಶ್ವೇಶ್ವರ್ ಹೆಗಡೆ ಖಾಗೇರಿ

ಕುಡ್ಲ : ಇನಿ ಕುಡ್ಲದ ಸರ್ಕ್ಯೂಟ್ ಹೌಸ್ಡ್ ನಡತಿನ ಸುದ್ದಿ ಗೋಷ್ಠಿಡ್ ಮಾಧ್ಯಮದಕ್ಲೆನೊಟ್ಟುಗು ಪಾತೆರ್ನಗ ತುಲು ಅಧಿಕೃತ ಭಾಷೆದ ಬಗ್ಗೆ ಕೇನ್ನಗ ತುಲು ಭಾಷೆದ ಮಿತ್ತ್ ಗೌರವ ಉಂಡು,ತುಲು ಸಂಸ್ಕೃತಿ ಪರಂಪರೆದ ಬಗ್ಗೆ ಗೌರವ ಕೊರ್ಪೆ ಆಂಡ ಭಾಷೆ ಅಧಿಕೃತ ಆಪಿನೆತ್ತ ಬಗ್ಗೆ ಸರಕಾರಡ ನಿಕುಲೆ ಕೇನ್ಲೆ ಪಂದ್ ವಿಧಾನಸಭಾ ಸ್ಪೀಕರ್ ಆಯಿನ ವಿಶ್ವೇಶ್ವರ್ ಹೆಗಡೆ ಖಾಗೇರಿ ಪಂಡೆರ್. ಉಂದು ಜನಕ್ಲೆಗ್ ಗೊಂದಲ ಸೃಷ್ಟಿ ಮಲ್ತುಂಡು.

ಹುಷಾರ್ದಾಂತೆ ತೀರ್ ಪೋಯಿನ ತುಳು ಸಾಹಿತ್ಯ ಅಕಾಡಮಿದ ಮಾಜಿ ಸದಸ್ಯೆರಾಯಿನ ಡಿ.ಎಂ.ಕುಲಾಲ್

ಬಂಟ್ವಾಳ: ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿದ ಮಾಜಿ ಸದಸ್ಯೆ , ಪೆರಿಯ ಪತ್ರಕರ್ತ, ಸಂಘಟಕ, ಸಾಮಾಜಿಕ ಕಾರ್ ಯಂತೆರಾಯಿನ ಡಿ.ಎಂ.ಕುಲಾಲ್ (54) (ದೈಪಲ ಮಾಧವ ಕುಲಾಲ್) ಮೇರ್ ಕೋಡೆ ದೈಪಲಡ್ ಉಪ್ಪುನ ತನ್ನ ಇಲ್ಲಡ್ ತೀರ್ ಪೋಯೆರ್.

ಮೃತೆರ್ ಅಪ್ಪೆ , ಬೊಡೆದಿ , ಒಂಜಿ ಪೊಣ್ಣು ಬೊಕ್ಕ ಆಣ್ ಬಾಲೆದೊಟ್ಟುಗು ಅವ್ವೆತೋ ಇಷ್ಟ ಮಿತ್ರೆರೆರ್ದ್ ದೂರ ಆತೆರ್.ಮುಂಗಾರು, ಕುಡ್ಲ ಮಿತ್ರ, ನೇತ್ರಾವತಿ ವಾರ್ತೆ ಪತ್ರಿಕೆಡ್ ಪತ್ರಕರ್ತರಾದ್ ಬೇಲೆ ಮಲ್ತಿನ ಆರ್ ಬೇತೆ ಬೇತೆ ಪತ್ರಿಕೆಗ್ ಬರವು ಬರೆಯೊಂದು ಇತ್ತೆರ್. ಉಜಿರೆಡ್ ನಡತಿನ ವಿಶ್ವ ತುಳು ಸಾಹಿತ್ಯ ಸಮ್ಮೇಳನಡ್ ಸಕ್ರೀಯವಾದ್ ಬೇಲೆ ಮಲ್ತಿನ ಮೆರೆಗ್ ಡಾ. ಹೆಗ್ಗಡೆರ್ ಮಾನದಿಗೆ ಮಲ್ದೆರ್.

ಜಾಸ್ತಿ ಟೇಸ್ಟಿ ಪೊಡಿ ಪಾಡುಂಡ ಕ್ರಿಮಿನಲ್ ಕೇಸ್ : ಎಚ್ಚರಿಕೆ ಕೊರಿನ ಒಡಿಪು ಜಿಲ್ಲಾಧಿಕಾರಿ

ಒಡಿಪು : ಜಿಲ್ಲೆಡ್ ಒವ್ವೆ ಬಗೆತ ತೆನಸ್ ತಯಾರ್ ಮಲ್ಪುನಗ ಜಾಸ್ತಿ ಟೇಸ್ಟಿ ಪೌಡರ್ ಬಳಕೆ ಮಲ್ತಿನ ತೊಜಿಂಡ ಅಂಚಿನ ತೆನಸ್ ತಯಾರಿಕೆರ್ನ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲ್ ಮಲ್ಪುವ ಪಂದ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಎಚ್ಚರಿಕೆ ಕೊರ್ತೆರ್ .

ಗುರುವಾರ ಮಣಿಪಾಲದ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣಡ್ ನಡತಿನ ಆಹಾರ ಸುರಕ್ಷತೆ ಬಗ್ಗೆ ಜಿಲ್ಲಾ ಮಟ್ಟದ ಸಲಹಾ ಸಭೆತ ಗುರ್ಕಾರ್ಮೆ ವಹಿಸ್ ದ್ ಆರ್ ಪಾತೆರಿಯೆರ್.

ಶಂಸುಲ್ ಉಲೆಮಾ ಕಮಿಟಿರ್ದ್ ಮಾನದಿಗೆ

ಬಂಟ್ವಾಳ : ಇಂಚೋಗು ನಡತಿನ 2020-2021ನೇ ಸಾಲ್ ದ ಎಸೆಸೆಲ್ಸಿ ಪರೀಕ್ಷೆಡ್ ಬಂಟ್ವಾಳ ತಾಲೂಕುದ ಕಾವಳ ಮೂಡೂರು, ಕಾವಳ ಪಡೂರು ಗ್ರಾಮ ವ್ಯಾಪ್ತಿದ ಕೈಲಾರ್ ಪ್ರದೇಶದ ರಡ್ಡ್ ಜೋಕುಲು ಎಡ್ಡೆ ಅಂಕ ದೆಪ್ಪುನ ಮುಖೇನ ಸಾಧನೆ ಮಲ್ದೆರ್ .

ಈ ನೆಲೆಟ್ಟ್ ಶಂಸುಲ್ ಉಲೆಮಾ ಯಂಗ್ಮೆನ್ಸ್ ಕೈಲಾರ್-ಬರ್ಕಟ್ಟ ಸಮಿತಿದ ವತಿರ್ದ್ ಸಾಧಕಿಲೆನ್ ಮಾನದಿಗೆ ಮಲ್ತೆರ್.

ಕಾವಳಮೂಡೂರು ಗ್ರಾಮದ ರಫೀಕ್ ಕೈಲಾರ್ ಪನ್ಪಿನರ್ನ ಮಗಲ್ ರಿಶಾನ 563 ಅಂಕ ಪಡೆತೆರ್, ರಫೀಕ್ ಜಿ.ಎಂ. ಮೆರ್ನ ಮಗಲ್ ಅಲಿಫ 521ಅಂಕ ಪಡೆಯುನ ಮುಖೇನ ಪುಗಾರ್ತೆ ಪಡೆತೆರ್ . ಲೇಸ್ ಡ್ ಸಮಿತಿದ ಒತ್ತು ಗುರ್ಕಾರ್ಲಾಯಿನ ಇಬ್ರಾಹೀಂ ಕೈಲಾರ್, ಗುರ್ಕಾರ್ಲಾಯಿನ ಸಜ್ಜಾದ್ ಬರ್ಕಟ್ಟ, ಇಝ್ಝತುಲ್ ಇಸ್ಲಾಮ್ ಮಸೀದಿದ ಗುರ್ಕಾರ್ಲಾಯಿನ ಹನೀಫ್ ಖಂಡಿಗ, ಯಾಕೂಬ್ ಖಂಡಿಗ ಪಾಲ್ ಪಡೆದಿತ್ತೆರ್.

ಬಂಟ್ವಾಳದ ಪ್ರವಾಸಿ ಮಂದಿರಗ್ ಭೇಟಿ ಕೊರಿನ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ

ಬಂಟ್ವಾಳ : ಕರ್ನಾಟಕ ರಾಜ್ಯ ವಿಧಾನಸಭಾ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಮೇರ್ ಗುರುವಾರ ಬೈಯ್ಯಗ್ ಬಂಟ್ವಾಳ ಪ್ರವಾಸಿ ಮಂದಿರಗ್ ಭೇಟಿ ಕೊರ್ತೆರ್ .

ಧರ್ಮಸ್ಥಳ ಮಂಜುನಾಥೇಶ್ವರ ದೇವಸ್ಥಾನಗ್ ಖಾಸಗಿಯಾದ್ ಭೇಟಿ ನೀಕೊರ್ಪಿನ ನೆಲೆಟ್ಟ್ ಕುಡ್ಲರ್ದ್ ಬತ್ತಿನ ಆರ್ ಸಾದಿದ ನಡುಟ ಬಂಟ್ವಾಳ ಪ್ರವಾಸಿ ಮಂದಿರಗ್ ಭೇಟಿ ಕೊರ್ತೆರ್ .