ಕಾಂತಾರ ಪಿಚ್ಚರ್ಡ್ ಬರ್ಪಿನ ಪಂಜುರ್ಲಿ ದೈವದ ಕೋಲದಲೆಕನೆ ವೇಷ ಪಾಡ್ದಿನ ಮೇಕಪ್ ಆರ್ಟಿಸ್ಟ್ ಶ್ವೇತ ರೆಡ್ಡಿ ರೀಲ್ಸ್ ಮಲ್ತ್ದೆರ್. ಉಂದೆಕ್ಕ್ ಮಸ್ತ್ ವಿರೋಧ ಬೈದ್ಂಡ್. ಈ ರೀಲ್ಸ್ನ್ ತೂದು ತುಳುನಾಡ್ದ ಜನಕುಲು ಬೆಚ್ಚ ಆತೆರ್.
ಕುಡ್ಲದ ಪೊಣ್ಣು ಮಲ್ತಿನ ಈ ವಿಡಿಯೋ ಇತ್ತೆ ಮಸ್ತ್ ವೈರಲ್ ಆದಿತ್ತ್ದ್, ಭೂತಕೋಲ ಮನ್ಪಿನವ್ ಮೇಕಪ್ ಫ್ಯಾಶನ್ ಅತ್ತ್. ಅವು ಜನಕ್ಲೆನ ನಂಬಿಕೆ. ಸಂಪ್ರದಾಯ ಸಂಸ್ಕೃತಿ, ಆರಾಧನೆ. ಉಂದೆತ್ತ ಮಿತ್ತ್ ತಮಾಷೆ ಮಲ್ಪುನವ್ ಸರಿ ಅತ್ತ್ ಪಂದ್ ತುಳುವೆರ್ ಬೆಚ್ಚ ಆತೆರ್.
ಅಮೆರಿಕೊಡು ಇತ್ತ್ ದ್ ಕನ್ನಡದ “ಕಾಂತಾರ” ಪಿಚ್ಚರ್ ತೂಯಿನ ಮಲ್ಲ ನಟೆ ಜಗ್ಗೇಶ್, ಈ ಸಿನಿಮೊನು ರಿಷಭ್ ಶೆಟ್ರ್ ಮಲ್ದಿನಿ ಅತ್ತ್, ದೇವೆರೇ ಅರೆನ ಕೈಯಿರ್ದ್ ಮಲ್ಪಾದೆರ್” ಪಂದ್ ಪನ್ತೆರ್.
“ಯಾನ್ ತುಳುನಾಡ್ದ ಅಭಿಮಾನಿ. ವರ್ಷಗ್ ಒಂಜಿ ಸರ್ತಿ ಪೊಳಲಿ, ಕಟೀಲ್, ಒಡಿಪು ಕೃಷ್ಣ ಮಠ, ಮೂಕಾಂಬಿಕೆ, ಕೊರಗಜ್ಜ ಇಂಚ ದೇವೆರೆನ ದರ್ಶನ ಮಲ್ಪುವೆ. ಇಂಚಿನ ತುಳುನಾಡ್ಡ್ ಪುಟ್ಟಿನ ನಟೆ ಬೊಕ್ಕ ನಿರ್ದೇಶಕ ರಿಷಬ್ ಶೆಟ್ಟಿ ಈ ಪಿಚ್ಚರ್ನ್ ಎಡ್ಡೆ ರೀತಿಡ್ ಮಲ್ತ್ದೆರ್. “ಕಡೆತ್ತ 25 ನಿಮಿಷ ಯಾನ್ ಒಲ್ಪ ಉಲ್ಲೆ ಪಂದ್ ಮದತ್ ಪೋಂಡು” ಪಂದ್ ಜಗ್ಗೇಶ್ ಪಂಡೆರ್.
ಕನ್ನಡದ ಸೂಪರ್ ಹಿಟ್ ಪಿಚ್ಚರ್ ಕಾಂತಾರ ಸದ್ಯೊಗು ಹಿಂದಿಡ್ ಬುಡುಗಡೆ ಆದಿತ್ತ್ದ್, ಎಲ್ಲೆ ತಮಿಳ್ ಬೊಕ್ಕ ತೆಲುಗು ಭಾಷೆಡ್ ಬುಡುಗಡೆ ಆಯರೆ ಉಂಡು. ಅಂಚನೆ ತುಳು ಭಾಷೆಡ್ಲ ಡಬ್ ಆಯರೆ ಉಂಡು. ಇಂಚಿನ ಒಂಜಿ ಕುಷಿತ್ತ ಸಂಗತಿನ್ ಕೊರಿಯರೆ ಪಿಚ್ಚರ್ದ ತಂಡ ದುಂಬು ಬೈದ್ಂಡ್.
ತುಳುನಾಡ್ದ ಭಾಷೆ, ಆಚಾರ-ವಿಚಾರ, ಅಲ್ಪದ ಸಂಸ್ಕೃತಿನ್ ಈ ಪಿಚ್ಚರ್ದ ಮುಖೇನ ತೋಜ್ಪಾದೆರ್. ಅತ್ತಂದೆ ಕೆಲ ಕಡೆಟ್ಟ್ ತುಳು ಭಾಷೆನ್ಲ್ ಗಲಸ್ ದೆರ್. ಇಂಚಾದ್ ಕಾಂತಾರ ದುಂಬು ಬರ್ಪಿನ ದಿನಟ್ಟ್ ತುಳು ಭಾಷೆಡ್ಲ ತೂವೊಲಿ.
