Dharmasthala

ತುಳು ಬಾಷೆದ ಬಗೆಟ್ಟ್ ಸಂಸತ್ತ್‌ಡ್ ಪಾತೆರ್ರೆ ಶಕ್ತಿ ಬೈದ್ಂಡ್: ಡಾ| ಡಿ.ವೀರೇಂದ್ರ ಹೆಗ್ಗಡೆರ್, ಖಾವಂದೆರೆಗ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ, ಜೈ ತುಳುನಾಡ್ ಕೂಟದಕ್ಲೆರ್ದ್ ಅಭಿನಂದನೆ

ಧರ್ಮಸ್ಥಳ (ಕುಡುಮ): ಆಳುಪ ಅರಸೆರ್ನ ವಂಶಸ್ಥೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರ್ ಡಾ.ಆಕಾಶ್ ರಾಜ್ ಜೈನ್ ಮೇರ್ನ ಮುತಾಲಿಕೆಡ್ ತಾರೀಕ್ ಜುಲೈ ೧೦ ಐತಾರ ಕಾಂಡೆ ೧೦ ಗಂಟೆಗ್ ಧರ್ಮಸ್ಥಳದ ಬೂಡುಡು ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆ, ಜೈ ತುಲುನಾಡ್ ಸಂಘಟನೆ ಅಂಚೆನೆ ತುಳುನಾಡ್ ಒಕ್ಕೂಟ ಮೊಕ್ಲೆನ ಒಟ್ಟುಸೇರಿಗೆಡ್ ಇಂಚೊಗು ರಾಜ್ಯಸಭೆಕ್ಕ್ ಸದಸ್ಯೆರಾಯಿನ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆರೆಗ್ ಅಭಿನಂದನೆ ಮಲ್ಪುನ ಅಂಚೆನೆ ತುಳು ಬಾಸೆನ್ ೮ ಪರಿಚ್ಛೇದೊಗು ಸೇರ್ಸಾವರೆ ಬಿನ್ನಯೊ ಮಲ್ಪುನ ಬೇಲೆ ನಡತ್ಂಡ್.

ಪತ್ರಿಕೆದ ಸಿಬ್ಬಂದಿನಕುಲು, ಜೈ ತುಳುನಾಡ್ ಅಂಚೆನೆ ತುಳುನಾಡ್ ಒಕ್ಕೂಟದ ಪದುಕೆರ್ ಧರ್ಮಾಧಿಕಾರಿಲೆನ ಬೂಡುಗು ಪೋದು ಫಲಪುಷ್ಪ ಕಾಣಿಕೆ ಬೊಕ್ಕ ನೆಂಪು ಕಾಣಿಕೆ ಕೊರ್ದು ಆಶೀರ್ವಾದ ದೆತೊಂಡೆರ್.

ಈ ಪೊರ್ತುಡು ಪಾತೆರಿನ ಡಾ.ಡಿ.ವೀರೇಂದ್ರ ಹೆಗ್ಗಡೆರ್, ರಾಜ್ಯ ಸಭೆತ್ತ ಸದಸ್ಯತ್ವ ತಿಕಿಬೊಕ್ಕ ತುಳು ಬಾಷೆಗ್ ಸಂವಿಧಾನದ ಮಾನಾದಿಗೆ, ರಾಜ್ಯ ಬಾಷೆದ ಗೌರವ ಕೇನರೆ ಇತ್ತೆ ಶಕ್ತಿ ಬೈದ್ಂಡ್. ಈ ವಿಚಾರೊಡು ಪ್ರಯತ್ನ ಮಲ್ಪುವೆ ಪಂದ್ ಅಭಯ ಕೊರಿಯೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ದ ಸದಸ್ಯೆರ್, ಆಳುಪ ವಂಶಸ್ಥೆರ್ ಡಾ. ಆಕಾಶ್ ರಾಜ್ ಜೈನ್, ಟೈಮ್ಸ್ ಆಫ್ ಕುಡ್ಲ ಒತ್ತು ಸಂಪೊಲಿಗೆದಾರ್ ಯಶೋಧರ ಕೋಟ್ಯಾನ್, ಪ್ರಬಂಧಕೆರ್ ಪವನ್ ರಾಜ್, ಕಚೇರಿ ವ್ಯವಸ್ಥಾಪಕೆರ್ ಭುವನಾ ದಿನೇಶ್, ಲೆಕ್ಕಪತ್ರ ವಿಭಾಗದ ದೀಕ್ಷಿತಾ, ಜೈ ತುಳುನಾಡ್‌ದ ಗುರ್ಕಾರೆ ಅಶ್ವತ್ ತುಳುವೆ, ಸಂಸ್ಥಾಪನಾ ಸಮಿತಿದ ಸದಸ್ಯೆರ್ ಕಿರಣ್ ತುಳುವೆ, ಸಾಹಿತ್ಯ ಸಮಿತಿದ ಕುಶಲಾಕ್ಷಿ ಕಣ್ವತೀರ್ಥ ಬೊಕ್ಕ ಸದಸ್ಯೆರ್, ತುಳುವೆರೆ ಒಕ್ಕೂಟದ ಸ್ಥಾಪಕಾಧ್ಯಕ್ಷೆರ್ ಶೈಲೇಶ್ ಆರ್.ಜೆ ಬೊಲ್ತೇರ್ ಬೊಕ್ಕ ಕಾರ್ಯಕರ್ತೆರ್ ಇತ್ತೆರ್.

ಧರ್ಮಸ್ಥಳೊಡು ತುಳು ಬರವುದ ಪಲವೆ ಪಾಡರೆ, ದೇವಲ್ಯದ ಉಲಯಿ ಮೈಕೊಡು ಪನ್ನಗ ತುಳು ಬಾಸೆಡ್ ಲೆತ್ತ್ ಪನರೆ ಅಂಚೆನೆ ತುಳು ಲಿಪಿಟ್ಟ್ ಬರೆತಿನ ಕಬಿತೆದ ಬೂಕುಗು ಮದಿಪು ಕೇನರೆ ಜೈ ತುಲುನಾಡ್ ಕೂಟದಕ್ಲೆರ್ದ್ ಬಿನ್ನಾಪು

ಧರ್ಮಸ್ಥಳ (ಕುಡುಮ): ತುಲು ಬಾಸೆ, ಸಂಸ್ಕೃತಿದ ಒರಿಪುದ ದಿಟ್ಟಿಡ್ ಶ್ರೀ ಕ್ಷೇತ್ರ ಧರ್ಮಸ್ಥಳಟ್ಟ್ ನಡಪುನ ಕಜ್ಜೊಲು ಏಪಲಾ ಮರಪ್ಪೆರಾವಂದಿನವು. ಶ್ರೀ ಕ್ಷೇತ್ರೊದ ಮುತಾಲಿಕೆಡ್ ತುಲು ಬರವುದ ಅವೇತೋ ತಾಡವೋಲೆ, ತಾಮ್ರದ ಓಲೆ ಅಂಚೆನೆ ಕಲ್ಲ್‌ದ ಶಾಸನಲೆನ್ ಒರಿತ್‌ದ್ ಬರ್ಪಿ ಪೀಳಿಗೆಗ್ ಗೇನ ತಿಕ್ಕುಲೆಕ್ಕ ಒರಿಪಾದ್ ದೀಪುನ ಕೆಲಸ ಆತ್ಂಡ್. ಆಂಡ ಇತ್ತೆ ನಾಲ್ ಗೋಡೆದ ನಡುಟುಪ್ಪಿ ಈ ಬರವು ಕುಡುಮದ ಸಾದಿಲೆಡ್, ಪುದರ್‌ದ ಪಲವೆಲೆಡ್ ಮೆನ್ಕೊಡು. ಅಂಚೆನೇ ದೇವಸ್ಥಾನದ ಉಲಯಿ ಮೈಕೊಡು ಲೆತ್ತ್ ಪನ್ನಗಲ ತುಲುಬಾಸೆನ್ ಗಲಸೊಡು. ಇಂಚಾಂಡ ಪಿದಯಿ ಊರುರ್ದು, ರಾಜ್ಯೊರ್ದು ಬರ್ಪಿ ಭಕ್ತೆರೆಗ್ ಈ ಮಣ್ಣ್‌ದ ಬಾಸೆ, ಬರವುದ ಪೊಲಬು ತಿಕ್ಕುಲೆಕ್ಕಾಪುಂಡು. ಈ ದಿಟ್ಟಿಡ್ ಕುಡುಮಡ್ ತುಲು ಬರವುದ ಪುದರ್ ಪಲವೆಲು ಅಂಚೆನೇ ಅನೌನ್ಸ್‌ಮೆಂಟ್‌ಲೆಡ್ ತುಲು ಬಾಸೆನ್ ಗಲಸೊಡು ಪಂದ್ ಜೈ ತುಳುನಾಡ್ ಕೂಟದಕುಲು ಖಾವಂದೆರೆಡ ಬಿನ್ನಾಪು ಮಲ್ದೆರ್.

ಅವ್ವತ್ತಾಂದೆ ತುಲುಬಾಸೆದ ಮಾಮಲ್ಲ ಪೋಷಕೆರ್, ತುಲು ಬಾಸೆದ ಸಂಸ್ಕೃತಿದ ಒರಿಪುಗು ಬೋಡಾದ್ ಕುಡುಮದ ಮಣ್ಣ್‌ಡ್ ಅವೇತೋ ಕಜ್ಜೊಲೆನ್ ಮನ್ಪಾಯಿನಾರ್ ಪೂಜ್ಯ ಖಾವಂದೆರ್ ರಾಜ್ಯಸಭೆತ ಪದುಕೆರಾಯಿನವು ಮಾತಾ ತುಲುವೆರೆಗ್ ಕುಸಿತ ಅಂಚೆನೇ ಪೆರ್ಮೆದ ವಿಷಯೊ. ಈರೆಗ್ ಮಾನಾದಿಗೆ ತಿಕ್ಕಿ ಈ ಏಲ್ಯೊಡು ಈರೆಗ್ ಎಡ್ಡೆಪ್ಪು ಬಯಕೊಂದು ಕರ್ನಾಟಕ ರಾಜ್ಯೊಡು ತುಲು ಬಾಸೆಗ್‌ಲ ಅಧಿಕೃತ ಬಾಸೆದ ಮಾನಾದಿಗೆ ತಿಕ್ಕುನ ದಿಟ್ಟಿಡ್ ಸೊರ ದೆರ್ಪೊಡುಂದು ಬಿನ್ನೈತೊಂದುಲ್ಲ. ರಾಜ್ಯ ಬಾಸೆ ಆಯಿನೇ ತುಲುಕು ೮ನೇ ಪರಿಚ್ಛೇದೊಗು ಸೇರುನ ಸಾದಿದ ಮಲ್ಲ ತಲೆಪೊಂಜಿ ಕರಿಲೆಕ್ಕಾಪುಂಡು. ಈ ತಲೆಪುಲೆನ್ ಕಳೆದ್ ತುಲು ಬಾಸೆಗೊಂಜಿ ಗೆಲ್ಮೆ ಕೊನವೊಡೂಂದಾಂಡ ಆ ಮಂಜುನಾಥ ಸ್ವಾಮಿನಲಾ ಚಂದ್ರನಾಥ ಸ್ವಾಮಿನಲಾ ಕೃಪೆರ್ದ್ ಈರೆ ಕೈರ್ದ್ ಮಾತ್ರ ಸಾಧ್ಯ ಪಂದ್ ಎನ್ನೊಂದು ಖಾವಂದೆರೆಡ ಬಿನ್ನಾಪು ಮಲ್ದೆರ್.

ಆತೇ ಅತ್ತಾಂದೆ ಜೈ ತುಲುನಾಡ್ (ರಿ.) ಸಂಘಟನೆದ ಮುತಾಲಿಕೆಡ್ ತುಲು ಅಧಿಕೃತ ಬಾಷೆ ಆವೊಡು, ೮ ಪರಿಚ್ಛೇದೊಡು ತಾನ ಮಾನ ತಿಕ್ಕೊಂಡು ಪನ್ಪಿ ದಿಟ್ಟಿಡ್ ನಡಪಾವೊಂದು ಬರೊಂದುಪ್ಪುನ ಸುಮಾರ್ ನಮುನೆದ ಪೊರ್ಂಬಾಟೊಲೆನ ಅಂಗೊವಾದ್‌ಲಾ, ನಮ್ಮ ದೇಶೊದ ತನ್ನಾಲ್ಮೆ ದಿನೊತ ಅಮುರ್ತೊ ಪರ್ಬೊದ ನೆಂಪುಡುಲಾ, ತುಲುನಾಡ್‌ದ ನೂದೆರ್ದ್‌ಲಾ ಎಚ್ಚ ಕಬಿನಕುಲು ಬರೆತಿನ ತುಲು ಕಬಿತೆಲೆನ್ ಸಂಪೊಲಿತ್‌ದ್, ತುಲು ಲಿಪಿಟ್ ಅಚ್ಚಿಮಂತ್‌ದ್ ಬೂಕುದ ರೂಪೊಡು ಕನವೊಡೂಂದು ತೀರ್ಮಾನ ಮಂತಿತ್ತ್‌ದ್ ಈ ಕಬಿತೆಲೆನ ಒಟ್ಟು ಪಾಡಾವುನ ಕೆಲಸೊನು ಸಾಹಿತ್ಯ ಸಮಿತಿದ ಕುಶಲಾಕ್ಷಿ ಕಣ್ವತೀರ್ಥ ಮಲ್ತಿತ್ತೆರ್.

ಈ ಕಬಿತೆಲೆನ ಮಸ್ತಿರೆಗ್ ಆಶೀರ್ವಾದೊದ ಮದಿಪುದ ಸಬಿ ದೇಸೆನ್ ಬರವುದ ರೂಪೊಡು ಕೊರೊಡೂಂದು ಜೈ ತುಳುನಾಡ್ ದಕುಲು ಬಿನ್ನಯೊ ಮಲ್ಪುನ ಈ ಪೊರ್ತುಡು ಜೈ ತುಲುನಾಡ್‌ದ ಗುರ್ಕಾರ್ಲು ಅಶ್ವಥ್ ತುಲುವೆ, ಸ್ಥಾಪನೆದ ಪದುಕೆರ್ ಕಿರಣ್ ತುಲುವೆ, ಕುಶಾಲಕ್ಷಿ ವಿ ಕಣ್ವತಿರ್ಥ, ವಿನಯ ರೈ ಕುಡ್ಲ, ಚಿರಶ್ರೀ, ದೀಕ್ಷಿತಾ, ಪಣವುದ ಪಾಲವೆರ್ ರಕ್ಷಿತ್ ರಾಜ್ ಕುಡ್ಲ, ಬರವು ಸಮಿತಿದ ನಿಶ್ಚಿತ್ ಗೋಳಿತ್ತಡಿ, ಪೃಥ್ವಿ ತುಲುವೆ ಕಾಜಿಮುಗೇರ್, ಪ್ರಸನ್ನ ಬೋಲ್ತೆರ್, ಮನೋಜ್ ಬೋಲ್ತೆರ್, ಶ್ರೀನಿವಾಸ್ ಬೋಲ್ತೆರ್, ಪುನೀತ್ ಬೋಳೂರು, ದಿತೇಶ್, ಗಣೇಶ್ ಕುಂದರ್, ಪುನೀತ್, ವಿಶ್ವನಾಥ್ ನಾಯ್ಕ, ಗಗನ್ ಮೊಕುಲು ಮಾತ ಪಾಲ್ ಪಡೆದಿತ್ತೆರ್.

ಖಾವಂದೆರೆಗ್ ತುಲುನಾಡ್ ಒಕ್ಕೂಟರ್ದ್ ಮಾನಾದಿಗೆ

ಧರ್ಮಸ್ಥಳ (ಕುಡುಮ): ತುಲುನಾಡ್ ಒಕ್ಕೂಟದ ಪದುಕೆರ್ ಶ್ರೀ ಕ್ಷೇತ್ರ ಕುಡುಮಡ್ ರಾಜ್ಯಸಭಾ ಸದಸ್ಯೆರಾದ್ ನಾಮನಿರ್ದೇಶನ ಆಯಿನ ಡಾ. ವೀರೇಂದ್ರ ಹೆಗ್ಗೆಡೆರೆನ್ ಐತಾರ ಭೇಟಿಯಾದ್ ಅರೆಗ್ ಎಡ್ಡೆಪ್ಪುಲು ಬಯಕ್‌ದ್ ತುಲು ಬಾಸೆನ್ ಸಂವಿಧಾನದ ೮ನೇ ಪರಿಚ್ಛೇದಗ್ ಸೇರ್ಸಾವುನ ಕಜ್ಜ ಮಲ್ಪೊಡು ಪಂದ್ ಬಿನ್ನಾಪು ಮಲ್ತೆರ್. ಅಂಚೆನೆ ಭಾರತ ದೇಸೊಡು ಪೊಸ ರಾಜ್ಯೊಲೆನ ಉದಿಪುದ ಪಾತೆರ ಜೋರುಡೆ ಕೇನೊಂದು ಇಪ್ಪುನ ಈ ಪೊರ್ತುಡು ಪೊಸ ರಾಜ್ಯೊಲೆನ ಉದಿಪುದ ಸಂಧರ್ಬೊಡು ತುಲುನಾಡ್ ರಾಜ್ಯೊಲ ಉದಿತ್ ಬರಡ್ ಪಂಡ್ದ್ ಬಿನ್ನಾಪು ಮಲ್ತೆರ್.

ಈ ಸಂದರ್ಬೊಡು ತುಲುನಾಡ್ ಒಕ್ಕೂಟದ ಸಂಸ್ಧಾಪೆಕೆರ್ ಶೈಲೇಶ್ ಆರ್. ಜೆ., ತುಲುನಾಡ್ ಒಕ್ಕೂಟ ಚಾವಡಿ ಕೂಟದ ಗುರ್ಕಾರ್ಲು ಶೇಖರ್ ಗೌಡತ್ತಿಗೆ, ಕಾರ್ಯಂತೆರ್ ವಿನ್ಸೆಂಟ್ ಲೋಬೋ, ಒತ್ತು ಕಾರ್ಯಂತೆರ್ ಉಮೇಶ್ ಆಚಾರ್ಯ, ಬೊಲ್ತೇರ್ ತಾಲ್ಲೂಕು ಕೂಟದ ಗುರ್ಕಾರ್ಲು ರಾಜೇಶ್ ಕುಲಾಲ್, ಕಾರ್ಯಂತೆರ್ ರಾಜು ಬಿ. ಎಚ್., ತುಲುವೆರೆ ಪಕ್ಷ ಚಾವಡಿ ಕೂಟದ ಒತ್ತು ಗುರ್ಕಾರ್ಲು ನವೀನ್ ಪೂಜಾರಿ ಅಡ್ಕದಬೈಲು, ತುಲುವೆರೆ ಪಕ್ಷ ಕರಂಬಾರ್ ಗ್ರಾಮ ಸಮಿತಿ ಗುರ್ಕಾರ್ಲು ಉಮೇಶ್ ಕುಲಾಲ್, ತುಲುವೆರೆ ಪಕ್ಷ ಮುಗೇರ್ ಗ್ರಾಮ ಸಮಿತಿದ ಗುರ್ಕಾರ್ಲು ಅಶ್ವಥ್ ಕುಲಾಲ್, ತುಲುವೆರೆ ಪಕ್ಷ ಬೊಲ್ತೇರ್ ಸೀಮೆದ ಒತ್ತು ಗುರ್ಕಾರ್ಲು ರಮೇಶ್ ಸಾಲಿಯಾನ್ ಪಾಲ್ ಪಡೆದಿತ್ತೆರ್.

Felicitation to Sri Veerendra Heggade by the teams of Times of Kudla newspaper and Jai Tulunadu Association

Dharmasthala: Dr Akash Raj from the Alupa linage and member of Karnataka Tulu Sahitya Akademi took lead to felicitate dr D Veerendra Heggade at his residence on Sunday along with team from Times of Kudla newspaper, Jai Tulunadu Association . Dr Veerendra Heggade has recently been nominated to the Rajya Sabha .

The representatives from the newspaper and the Tulu association felicitated him and also held discussion on the inclusion of Tulu language in the the 8th schedule of the constitution.

Speaking on the occasion Dr Heggade said that after being nominated to the Rajya Sabha he has become confident to take up the issue of Tulu language at the national level and assured that he would do his best for betterment of the mother tongue.

Members from jai Tulunadu Association also put forward a request to put name plates in Tulu language,make announcements in Tulu inside the temple premises and also print a book of Tulu poetry written in Tulu script.