Dakshina Kannada

ತುಳುವ ಮಹಾಸಭೆ ಇಂಟರ್ನ್ಯಾಷನಲ್‌‌ದ ಅಮೆರಿಕ, ಇಟಲಿ, ಸಿಡ್ನಿ ಎಗ್ಗೆಲೆಗ್ ಗುರ್ಕಾರ್ಲೆನ ನೇಮಕ

ಕಟೀಲ್ : ನೂದು ವರ್ಷದ ಸಂಭ್ರಮಡ್ ಉಪ್ಪುನ ಐತಿಹಾಸಿಕ ತುಳುವ ಮಹಾಸಭೆತ್ತ ಜಾಗತಿಕ ಸಂಘಟನೆ “ತುಳುವ ಮಹಾಸಭೆ ಇಂಟರ್ನ್ಯಾಷನಲ್” ತನ್ನ ಅಂತರರಾಷ್ಟ್ರೀಯ ಸಂಘಟನೆನ್ ನನಾತ್ ಗಟ್ಟಿ ಮಲ್ಪುನ ನಿಲೆಟ್ಟ್ ಅಮೆರಿಕ ಸಂಯುಕ್ತ ಸಂಸ್ಥಾನ (USA), ಇಟಲಿ ಬೊಕ್ಕ ಆಸ್ಟ್ರೇಲಿಯಾದ ಸಿಡ್ನಿ ಎಗ್ಗೆಲೆಗ್ ಪೊಸ ಗುರ್ಕಾರೆನ್ ನೇಮಕ ಮಲ್ದ್ಂಡ್.
ಅಮೆರಿಕ ಸಂಯುಕ್ತ ಸಂಸ್ಥಾನ (USA) ಎಗ್ಗೆದ ಗುರ್ಕಾರ್ಲಾದ್ ಒಡಿಪು ಜಿಲ್ಲೆ ಕಾರ್ಲ ತಾಲೂಕು ಮಾಳ ಗ್ರಾಮ ಮೂಲದ, ಬೋಸ್ಟನ್‌ ನಿವಾಸಿ ಪುಗರ್ತೆದ ಖ್ಯಾತ ತಂತ್ರಜ್ಞ, ಸಮಾಜಸೇವಕ ಅಂಚೆನೆ ತುಳು ಭಾಷೆ-ಸಂಸ್ಕೃತಿದ ಅಭಿಮಾನಿ ಭಾಸ್ಕರ್ ಶೆರಿಗಾರ್ ಮೆರೆನ್ ನೇಮಕ ಮಲ್ದೆರ್.
ಡಿಜಿಟಲ್ ವೀಡಿಯೊ ತಂತ್ರಜ್ಞಾನ ಬೊಕ್ಕ VLSI-IC ವಿನ್ಯಾಸ ಕ್ಷೇತ್ರಡ್ ಅಂತರರಾಷ್ಟ್ರೀಯ ಮಟ್ಟದ ಸಾಧನೆ ಮಲ್ದಿನ ಮೇರ್, 7 ಅಮೆರಿಕನ್ ಪೇಟೆಂಟ್‌ದ ಕರ್ತೃ ಆದ್, ಆಲ್ ಅಮೆರಿಕಾ ತುಳು ಅಸೋಸಿಯೇಷನ್ (AATA) ಸ್ಥಾಪಕ ಅಧ್ಯಕ್ಷೆರ್ ಬೊಕ್ಕ ನ್ಯೂ ಇಂಗ್ಲೆಂಡ್ ತುಳು ಕೂಟ (NETK) ಮಾಜಿ ಅಧ್ಯಕ್ಷೆರಾದ್ ಸೇವೆ ಮಲ್ದೆರ್.

ಇಟಲಿ ಘಟಕದ ಗುರ್ಕಾರ್ಲು ಆದ್ ಒಡಿಪು ಜಿಲ್ಲೆ ಕಾರ್ಲ ತಾಲೂಕು ಕೌಡೂರು ಗ್ರಾಮದ ಮೂಲದ ಹಿರಿಯ ಯಕ್ಷಗಾನ ಕಲಾವಿದ, ಸಾಹಿತಿ ಬೊಕ್ಕ ಔಷಧೋದ್ಯಮ ತಜ್ಞೆ ಕೌಡೂರು ನಾರಾಯಣ ಶೆಟ್ಟಿ ಮೆರೆನ್ ನೇಮಕ ಮಲ್ದೆರ್. ಸುಮಾರ್ 30 ವರ್ಷ ಇಟಲಿಡ್ ಬಹುರಾಷ್ಟ್ರೀಯ ಔಷಧ ಕಂಪನಿಡ್ ಕರ್ತವ್ಯ ಮಲ್ದಿನ ಮೇರ್, ತುಳು ಸಾಹಿತ್ಯ, ಯಕ್ಷಗಾನ ಬೊಕ್ಕ ಸಂಸ್ಕೃತಿದ ಪ್ರಚಾರ-ಪ್ರಸಾರಗ್ ವಿಶಿಷ್ಟ ಕೊಡುಗೆ ಕೊರ್ತೆರ್.

ಸಿಡ್ನಿ ಘಟಕದ ಗುರ್ಕಾರ್ಲಾದ್ ಕಾಸ್ರೋಡು ತಾಲೂಕುದ ಕೊಡಿಬೈಲು ಮೂಲದ, ಆಸ್ಟ್ರೇಲಿಯಾದ ಸಿಡ್ನಿಡ್ ವಾಸ ಉಪ್ಪುನ ಸಮಾಜಸೇವಕೆರ್, ತುಳು ಭಾಷೆ-ಸಂಸ್ಕೃತಿದ ಅಭಿಮಾನಿ ಸುರೇಶ್ ಪೂಂಜ ಮೆರೆನ್ ನೇಮಕ ಮಲ್ದೆರ್. ಆಟೊಮೊಬೈಲ್ ಉದ್ಯಮಿ ಆದುಪ್ಪುನ ಮೇರ್ ಸಮಾಜಸೇವೆ, ರಕ್ತದಾನ ಅಂಚೆನೆ ತುಳು ಸಂಸ್ಕೃತಿದ ಒರಿಪು- ಪರಪುಗಾದ್ ಪುನೆವೊಂದುಲ್ಲೆರ್. ಸಿಡ್ನಿದ ತುಳು ಸಮುದಾಯನ್ ಒಟ್ಟು ಮಲ್ಪುನೆಟ್ಟ್ ಸಕ್ರಿಯವಾಯಿನ ವ್ಯಕ್ತಿ.
ತುಳುವ ಮಹಾಸಭೆ ಇಂಟರ್ನ್ಯಾಷನಲ್‌ದ ಅಂತರರಾಷ್ಟ್ರೀಯ ಗುರ್ಕಾರ್ಲು ಸರ್ವೋತ್ತಮ ಶೆಟ್ಟಿ ಬೊಕ್ಕ ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಕೃಷ್ಣ ಆಳ್ವ ಮೊಕ್ಲೆನ್ ಆಯ್ಕೆ ಮಲ್ತ್‌ದ್ ಘೋಷಣೆ ಮಲ್ದೆರ್.