Mon. Jun 22nd, 2026

Dakshina Kannada

ಕಾಂಚನ ಹೋಂಡಾ” ಬಿಗ್ ವಿಂಗ್” ಮೋಟರ್ ಸೈಕಲ್‌ ಬುಡುಗಡೆ

ಕುಡ್ಲ, ಜುಲೈ 22: ವಾಹನ ಮಾರಾಟ ಬೊಕ್ಕ ಸೇವೆಡ್ ಬಾರಿ ಅನುಭವ ಉಪ್ಪುನ ಅಂಚನೇ ಕುಡ್ಲಡ್ ಅವ್ವೆತೋ ವರ್ಷರ್ದ ಗ್ರಾಹಕೆರೆಗ್ ಕೊರೊಂದು ಉಪ್ಪುನ ಕಾಂಚನ ಮೋಟರ್ಸ್‌ದ ಅಂಗಸಂಸ್ಥೆ ಕಾಂಚನ ಹೋಂಡಾದ ಕಂಕನಾಡಿ ಬೈಪಾಸ್ ಮಾರ್ಗದ ಶೋರೂಂಡ್ ಹೋಂಡಾದ ಬಿಗ್ ವಿಂಗ್ ಮೋಟರ್ ಸೈಕಲ್ ಕುಡ್ಲದ ಮಾರುಕಟ್ಟೆಗ್ ಬುಡುಗಡೆ ಆತುಂಡು .

ಯುವ ಜನಾಂಗದ ಬಹುನಿರೀಕ್ಷಿತ ಹೋಂಡಾ ಬಿಗ್ ವಿಂಗ್ ಮೋಟರ್ ಸೈಕಲ್‌ನ್ ಅತ್ಯಾಧುನಿಕ ತಂತ್ರಜ್ಞಾನದೊಟ್ಟುಗು ತಯಾರ್ ಮಲ್ದೆರ್. ಹೋಂಡಾ ಗಾಡಿದ ಅಧಿಕೃತ ಮಾರಾಟಗಾರೆರಾಯಿನ ಕಾಂಚನ ಹೋಂಡಾ ಶೋರೂಂಡ್ ಮಾತ್ರ ಈ ಬಿಗ್ ವಿಂಗ್ ಮೋಟರ್ ಸೈಕಲ್‌ ಖರೀದಿಗ್ ಲಭ್ಯ ಉಂಡು ಪಂದ್ ಪ್ರಕಟಣೆಡ್ ತೆರಿಪಾದೆರ್ .

ಪುರಸಭಾ ನಿರ್ಲಕ್ಷ್ಯ: ಪರ್ಪಿನ ನೀರ್ ಗ್ ತತ್ವಾರ

ಬಂಟ್ವಾಳ, ಜುಲೈ 21: ಕರಿನ ಒಂಜಿ ವಾರರ್ದ್ ಬುಡoದೆ ಬರೊಂದು ಉಪ್ಪುನ ಬರ್ಸರ್ದಾವರ, ಒರಾನೆ ನೆರೆಯ ಭೀತಿ ಎದುರಾಯಿನ ಸ್ಥಿತಿ ಬತ್ತುಂಡಲ ಬಂಟ್ವಾಳ ಪುರಸಭಾ ವ್ಯಾಪ್ತಿದ ಕೆಲವು ಕಡೆಟ್ ಪರಿಯರೆ ನೀರ್ ಇಜ್ಜಿ ಪನ್ಪಿ ಸೊರ ಲಕ್ಕ್ ದುಂಡು.

ಇಂದು ನಂಬರೇ ಸಾಧ್ಯ ಆವಂದಿನ ಇಚಾರ ಆಂಡಲಾ , ಸ್ಥಳೀಯಾಡಳಿತದ ನಿರ್ಲಕ್ಷ್ಯರ್ದ್ ಈ ದುರ್ಗತಿ ಬೈದಿನವು ಸತ್ಯದ ಇಚಾರ. ಪುರಸಭಾ ವ್ಯಾಪ್ತಿದ ಕಾಮಾಜೆ ಮೆಲ್ಕರ್ ಪರಿಸರಡ್ ಕರಿನ ಐನ್ ದಿನರ್ದ್ ಪರ್ಪಿನ ನೀರ್ ಗ್ ತತ್ವಾರ ಆತುಂಡು ಈ ಬಗ್ಗೆ ಪುರಸಭೆಟ್ ಇಚಾರ ಮಲ್ತುಂಡ ಪಂಪ್ ಹಾಳಾತುಂಡು ಪನ್ಪಿನ ಉತ್ತರ ಕೊರ್ಪೆರ್.ವಿಜ್ಞಾನ ತಂತ್ರಜ್ಞಾನ ದುಂಬರಿದಿನ ಈ ಕಾಲಡ್ ಸ್ಥಳೀಯಾಡಳಿತ ಮೂಲಭೂತ ಅಗತ್ಯನೇ ಪೂರೈಕೆ ಮಲ್ಪುನಲ್ಪ ವಿಫಲವಾದ್ ನೆವನ ಕೊರ್ಪಿನವು ಮುಲ್ಪದಕ್ಲೆನ ಆಕ್ರೋಶಗ್ ಕಾರಣ ಆಂಡ್.

ಮುಕ್ತ ವಿವಿಡ್ ಎಂಬಿಯೆ ಕೋರ್ಸ್ ಸುರು

ಒಡಿಪು, ಜುಲೈ 21: ಕೇಂದ್ರ ಶಿಕ್ಷಣ ಸಚಿವಾಲಯದ ಶಾಸನಬದ್ಧ ಅಂಗವಾಯಿನ ನವದೆಹಲಿದ ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಪರಿಷತ್ತು, ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯಗ್ ನಿರ್ವಹಣಾ ವಿಭಾಗದಡಿ ಸ್ನಾತಕೋತ್ತರ ವ್ಯವಹಾರ ನಿರ್ವಹಣಾ ಕೋರ್ಸ್ ನಡಪಾಯೆರೆ (ಮಾಸ್ಟರ್ ಆಫ್ ಬಿಸಿನೆಸ್ ಅಡ್ಮಿನಿಟ್ರೇಷನ್- ಎಂಬಿಎ-) ಅನುಮತಿ ಕೊರ್ತುಂಡು .

ಮುಕ್ತ ಬೊಕ್ಕ ದೂರ ಶಿಕ್ಷಣ ಮಾದರಿದಡಿ ಎಂಬಿಎ ಕೋರ್ಸ್ ನಡಪಾಯೆರೆ ಮಾನ್ಯತೆ ಪಡೆಯಿನ ದೇಶದ ಏಕೈಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯ ಪನ್ಪಿನ ಪುಗಾರ್ತೆ ಪಡೆತುಂಡು , ಪ್ರಸಕ್ತ ಸಾಲ್ ಡ್ ಮುಕ್ತ ಬೊಕ್ಕ ದೂರ ಶಿಕ್ಷಣ ಕಲಿಕಾ ವಿಧಾನದಡಿ ಎಂಬಿಎ ಕೋರ್ಸ್‌ಗ್ (ಜನರಲ್ ಅಡ್ಮಿನಿಸ್ಟ್ರೇಷನ್) 10,000 ಸೀಟುಗ್ ಪ್ರವೇಶ ಕಲ್ಪಿಸಾಯೆರೆ ಎಐಸಿಟಿಇ ಅನುಮತಿ ಕೊರ್ತುಂಡು .

ವಿವಿ ವತಿರ್ದ್ ಯಕ್ಷಗಾನ ಕಲಾವಿದೆರೆಗ್ ಯಕ್ಷ ನಮನ

ಕುಡ್ಲ, ಜುಲೈ 21: ಕುಡ್ಲ ವಿಶ್ವ ವಿದ್ಯಾಲಯ ಡಾ. ಪಿ ದಯಾನಂದ ಪೈ ಬೊಕ್ಕ ಶ್ರೀ. ಪಿ. ಸತೀಶ್ ಪೈ ಯಕ್ಷಗಾನ ಅಧ್ಯಯನ ಕೇಂದ್ರ ಮಂಗಳಗಂಗೋತ್ರಿ ಮೆಕ್ಲೆನ ಒಟ್ಟು ಸೇರಿಗೆಡ್ ಯಕ್ಷಗಾನ ಕಲಾರಾಧಕೇರಾಯಿನ ಎಡನೀರು ಮಠಾದೀಶ ಶ್ರೀ ಶ್ರೀ ಶ್ರೀ ಕೇಶವಾನಂದ ಭಾರತಿ ಸ್ವಾಮಿಲೆನ ಸಂಸ್ಮರಣೆ ಬೊಕ್ಕ ಅಗಲಿನ ಯಕ್ಷಗಾನ ಕಲಾವಿದೆರೆಗ್ ಯಕ್ಷ ನಮನ ಕಾರ್ಯಕ್ರಮ ಅಂಗಾರೆ ಮಂಗಳೂರು ವಿಶ್ವವಿದ್ಯಾಲಯದ ಸಿಂಡಿಕೆಟ್ ಸಭಾಂಗಣಡ್ ನಡತುಂಡು.

ದೇವಸ್ಥಾನಡ್ ಅನ್ನದಾಸೋಹ ಸುರು ಮಲ್ಪರೆ ನಿರ್ಧಾರ : ಸಚಿವ ಕೋಟ

ಕುಂದಾಪುರ : ದೇವಸ್ಥಾನ ಇತ್ತೇ ಭಕ್ತೆರೆಗ್ ಮುಕ್ತವಾತುಂಡು . ದೂರರ್ದ್ ಬರ್ಪಿನ ಭಕ್ತರ್ಗ್ ಸಮಸ್ಯೆಯಾಯೆರೆ ಬಲ್ಲಿ ಪನ್ಪಿನ ಕಾರಣಗ್ ಸೀಮಿತ ಭಕ್ತೆರೆಗ್ ದೇವಾಲಯಡ್ ಅನ್ನದಾಸೋಹ ನಡಪಾಯೆರೆ ಚರ್ಚೆ ಮಲ್ದೆರ್ . ಇತ್ತೇ ಮುಖ್ಯಮಂತ್ರಿನೊಟ್ಟುಗು ಈ ಬಗ್ಗೆ ಚರ್ಚೆ ನಡಪಾದೆರ್ .

ಕೆಲವೇ ದಿನಟ್ ತೀರ್ಮಾನ ದೆತೊನುವ ಪಂದ್ ಹಿಂದು ಧಾರ್ಮಿಕ ದತ್ತಿ ಇಲಾಖೆ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಪಂಡೆರ್ .

ತುಳು ಲಿಪಿಕ್ ಕೇಂದ್ರ ಬೊಕ್ಕ ರಾಜ್ಯ ಸರಕಾರರ್ದ್ ಅಧಿಕೃತ ಮಾನದಿಗೆ

ಕುಡ್ಲ : ಕರಿನ 9 ತಿಂಗೊಲುರ್ದು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮುಖೇನ ತುಳು ಅಕಾಡೆಮಿದ ಗುರಿಕಾರೆ ದಯಾನಂದ್.ಜಿ.ಕತ್ತಲ್ಸಾರ್ ನ ಬೆರಿತಾಂಗ್ ದೊಟ್ಟುಗು ಅಳುಪ ಅರಸೆರ್ನ ವಂಶಸ್ಥೆರಾಯಿನ ಡಾ. ಆಕಾಶ್ ರಾಜ್ ಜೈನ್ ಮೇರ್ ಇಡೆಬುಡoದೆ ಕರ್ನಾಟಕದ ಮುಖ್ಯ ಮಂತ್ರಿಲೆನ ಡಿಜಿಟಲ್ ಮೀಡಿಯಾದ ಆಡಳಿತ ಅಧಿಕಾರಿ ಆಯಿನ ಸುದರ್ಶನ್ ಬೇಳೂರು ಅರೆನ ಸಾಕಾರ ದೆತೊoದು ಸಚಿವೆರಾಯಿನ ಅರವಿಂದ ಲಿಂಬಾವಳಿದರೆನ ಮೂಲಕ ತುಳು ಲಿಪಿನ್ ರಾಜ್ಯದ ಅಂಚನೇ ಕೇಂದ್ರ ಸರಕಾರದ ಅಧಿಕೃತ ಪಟ್ಟಿಗ್ ಸೇರಾದ್ ತುಳು ಲಿಪಿಕ್ ರಾಜ ಮಾನದಿಗೆ ಕನತ್ ಕೊರಿನವು ಸಮಸ್ತ ತುಳುವೆರೆಗ್ ಮಲ್ಲ ಪೆರ್ಮೆದ ಸಂಗತಿ ಆತ್oಡ್.

9 ತಿಂಗೊಲುರ್ದು ದುಂಬು ತುಳು ಅಕಾಡೆಮಿದ ಮೂಲಕ ಡಾ. ಆಕಾಶ್ ರಾಜ್ ಜೈನ್ ಮೇರ್ ಸರಕಾರಗ್ ತುಳುಲಿಪಿ ಅಧಿಕೃತ ಆಯೆರೆ ಬೋಡಾದ್ ಬಿನ್ನಾಪು ಮಲ್ತಿತ್ತೆರ್. ಈ ಮನವಿನ್ ರಾಜ್ಯಸರಕಾರ ಕೇಂದ್ರ ಸರಕಾರದ ಭಾರತೀಯ ಭಾಷಾ ಸಂಸ್ಥಾನಗ್ ಎತ್ತಾದ್ (ಸಿ. ಐ. ಐ. ಎಲ್ )ಇತ್ತೆ ಅಕುಲು ತುಳು ಲಿಪಿನ್ ಅಧಿಕೃತ ವಾದ್ ಮಲ್ಪರೆ ಒಪ್ಪಿಗೆ ಪತ್ರ ಕೊರ್ತೆರ್.

ಕೊಲ್ಲಿ ದೇವಸ್ಥಾನ : ಸುತ್ತು ಪೌಳಿ ಶಿಲಾಪೂಜೆ

ಬೆಳ್ತಂಗಡಿ, ಜುಲೈ 19: ತಾಲೂಕುದ ಮಿತ್ತಬಾಗಿಲು ಗ್ರಾಮದ ಕೊಲ್ಲಿ ದುರ್ಗಾದೇವಿ ದೇವಸ್ಥಾನದ ಜೀರ್ಣೋದ್ಧಾರ ಕಾಮಗಾರಿ ಪ್ರಗತಿಡ್ ಉಂಡು . ತೀರ್ಥ ಮಂಟಪ ಬೊಕ್ಕ ಸುತ್ತು ಪೌಳಿದ ಶಿಲಾಪೂಜೆ ಕಾರ್ಯಕ್ರಮ ಶನಿವಾರ ನಡತುಂಡು .

ಉಜಿರೆ ಜನಾರ್ದನ ದೇವಸ್ಥಾನದ ಶರತ್ ಕೃಷ್ಣ ಪಡುವೆಟ್ನಾಯ ಲೇಸ್ ಗ್ ಚಾಲನೆ ಕೊರಿಯೆರ್ . ತಂಡವಾದ್ ಬೇಲೆ ಮಲ್ತುಂಡ ಅವು ಹೊರೆಯಾತುಜಿ . ಊರುದ ದೇವಸ್ಥಾನದ ಅಭಿವೃದ್ಧಿ ಪ್ರತಿಯೊರಿನ ಜವಾಬ್ದಾರಿಯಾತುಂಡು . ಪರಸ್ಪರ ಸಹಕಾರದ ಬೇಲೆ ನಿರ್ವಿಘ್ನವಾದ್ ಸಾಗುಂಡು ಬೊಕ್ಕ ಯೋಜಿತ ಅವಧಿದುಲಯಿ ಪೂರ್ಣ ಆತುಂಡು ಪಂದ್ ಪಂಡೆರ್.

ಜಮಾ ಉಗ್ರಾಣದ ಮುತ್ಸದ್ದಿ ಬಿ. ಭುಜಬಲಿ, ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲಾಯಿನ ವಾಸುದೇವ ರಾವ್ ಕಕ್ಕೆನೇಜಿ, ಜೀರ್ಣೋದ್ಧಾರ ಸಮಿತಿ ಗುರ್ಕಾರ್ಲಾಯಿನ ಲೋಕೇಶ್ ರಾವ್, ಮಿತ್ತಬಾಗಿಲು ಗ್ರಾಮ ಪಂಚಾಯಿತಿ ಗುರ್ಕಾರ್ಲಾಯಿನ ಲತಾ, ಕಡಿರುದ್ಯಾವರ ಗ್ರಾಮ ಪಂಚಾಯಿತಿ ಗುರ್ಕಾರ್ಲಾಯಿನ ಅಶೋಕ್ ಕುಮಾರ್, ನಾವುರು ಗ್ರಾಮ ಪಂಚಾಯಿತಿ ಗುರ್ಕಾರ್ಲಾಯಿನ ಗಣೇಶ ಗೌಡ, ಬಂಗಾಡಿ ಸಿಎ ಬ್ಯಾಂಕಿನ ಗುರ್ಕಾರ್ಲಾಯಿನ ಹರೀಶ್ ಸಾಲಿಯಾನ್, ಉದ್ಯಮಿಲಾಯಿನ ಅರುಣ್ ಕುಮಾರ್ ದಿನೇಶ್ ಕುಮಾರ್, ಮುಖಂಡೆರಾಯಿನ ದಿನೇಶ್ ಗೌಡ, ಮೋಹನಗೌಡ, ಕೇಶವ ಫಡ್ಕೆ, ರಾಜಶೇಖರ್ ರಾವ್, ಮೃತ್ಯುಂಜಯ ರಾವ್, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಇತ್ತೆರ್ .

ಕೋವಿಡ್ ನಿಯಮ ಪಾಲಿಸಾಲೆ : ಕಮಿಷ್ನರ್

ಸುರತ್ಕಲ್, ಜುಲೈ 19 : ಕೋವಿಡ್‍ ಮೂರನೇ ಅಲೆಟ್ ತಡೆಯುನ ನೆಲೆಟ್ಟ್ ದೇವಸ್ಥಾನ, ಚರ್ಚ್, ಮಸೀದಿಡ್ ಸಾಮೂಹಿಕವಾದ್ ಪರ್ಬ ನಡಪಾಯೆರೆ ಅನುಮತಿ ಕೊರ್ತುಜೆರ್ . ನನ ದುಂಬುದ ಬಕ್ರೀದ್ ಪರ್ಬನ್ ಮಾತೆರ್ಲ ನಿಯಮದಲಕ ಆಚರಣೆ ಮಲ್ಪೊಡು ಪಂದ್ ಪೊಲೀಸ್ ಕಮಿಷನರ್ ಎನ್.ಶಶಿಕುಮಾರ್ ಪಂಡೆರ್ .

ಕೃಷ್ಣಾಪುರ 7ನೇ ಬ್ಲಾಕ್‍ದ ಬದ್ರಿಯಾ ಜುಮ್ಮಾ ಮಸೀದಿ, ಕೇಂದ್ರ ಜಮಾತ್‌ಡ್ ಶನಿವಾರ ಆಡಳಿತ ಮಂಡಳಿದ ಜತೆ ನಡಪಾಯಿನ ಸಭೆಟ್ ಮೇರ್ ಪಾತೆರಿಯೆರ್ .

“ತುಳು ಲಿಪಿ ಮಂದಾರ” ಬುಡುಗಡೆ

ಒಡಿಪು, ಜುಲೈ 19: ತಾಳೆಗರಿ ಬಳಕೆ ಮಲ್ತೊಂದು ಇತ್ತಿನ ಕಾಲಘಟ್ಟಡ್ ತುಳು ಲಿಪಿ ಬಳಕೆಯಾವೊಂದು ಇತ್ತುಂಡು . ಪುರಾತನವಾಯಿನ ಐತಿಹಾಸಿಕ ಹಿನ್ನೆಲೆ ಉಪ್ಪುನ ತುಳು ಭಾಷೆ, ತುಳು ಲಿಪಿ ಮಧ್ವಾಚಾರ್ಯೇರ್ನ ಕಾಲಘಟ್ಟಡ್ ಬಳಕೆ ಮಲ್ತೊಂದು ಇತ್ತೆರ್ ಪನ್ಪಿನೆಕ್ಕ್ ಅಷ್ಠಮಠಟ್ ಪುರಾವೆಲು ಉಂಡು ಪಂದ್ ಶಾಸಕ ರಘುಪತಿ ಭಟ್ ಪಂಡೆರ್ .

ಒಡಿಪು ಪ್ರೆಸ್ ಕ್ಲಬ್ ಡ್ ಇನಿ ಅಟ್ಟನೆ ಮಲ್ತಿನ ತುಳು ಲಿಪಿ ಮಂದಾರ” ಬುಡುಗಡೆ ಲೇಸ್ ಡ್ ತುಳು ಲಿಪಿ ಮಂದಾರ”ನ್ ಬುಡುಗಡೆ ಮಲ್ತ್ ಆರ್ ಪಾತೆರಿಯೆರ್.

ವಿಧಾನ ಸಭಾ ಅಧಿವೇಶನಡ್ ಕರಾವಳಿ ಭಾಗದ ಶಾಸಕೆರೆಗ್ ತುಳುಟೆ ಪಾತೆರಿಯರೆ ಅವಕಾಶ ಕೊರೊಡು ಪಂದ್ ಬಿನ್ನಾಪು ಮಲ್ದೆರ್ . ಆಂಡ ಸದನಡ್ ದಾಖಲಾಪಿನ ಮಾಹಿತಿಲೆನ್ ದಾಖಲು ಮಲ್ಪುನಕ್ಲೆಗ್ ತುಳು ಭಾಷೆದ ಅರಿಕೆದ ಕೊರತೆ ಉಪ್ಪುನೆರ್ದಾವರ ದುಂಬುದ ದಿನಟ್ ಈ ಬಗ್ಗೆ ಸೂಕ್ತ ಕ್ರಮ ದೆತೊನುನ ಭರವಸೆನ್ ಸಭಾಧ್ಯಕ್ಶೆರ್ ಕೊರ್ತೆರ್ ಪಂದ್ ಪಂಡಿನ ಆರ್ ತುಳು ಲಿಪಿ, ಭಾಷೆ ಬಗ್ಗೆ ಜೈ ತುಳುನಾಡು ಸಂಘಟನೆದ ಈ ಪ್ರಯತ್ನ ಉತ್ತಮ ಬುಲೆಚ್ಚಿಲ್ ಪಂದ್ ಪಂಡೆರ್ .

ಈ ಪೊರ್ತುಡು ತುಳು ಅಕಾಡೆಮಿಯ ಸದಸ್ಯೆರಾಯಿನ ಡಾ||ಆಕಾಶ್ ರಾಜ್ ಜೈನ್, ತಾರಾ ಆಚಾರ್ಯ, ಜೈ ತುಳುನಾಡು ಸಂಘಟನೆದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್, ಸದಸ್ಯೆರಾಯಿನ ಪ್ರಹ್ಲಾದ್ ಪಿ. ತಂತ್ರಿ ಬೊಕ್ಕ ಬೇತೆ ಪದಾಧಿಕಾರಿಲು ಪಾಲ್ ಪಡೆದಿತ್ತೆರ್ .

ಇನಿರ್ದ್ ಕುಡ್ಲರ್ದ್ ಕಾಸರಗೋಡುಗು ಬಸ್ ಸಂಚಾರ

ಜುಲೈ 19: ದಕ್ಷಿಣ ಕನ್ನಡ ಜಿಲ್ಲೆಡ್ ಕೋವಿಡ್-19 ಆನ್ ಲಾಕ್ ಪ್ರಕ್ರಿಯೆ ಜಾರಿಡ್ ಉಂಡು , ಸೋಂಕು ಪಸರುನೇನ್ ಉಂತಾವುನ ನೆಲೆಟ್ಟ್ ಎಚ್ಚದ ಜಾಗರೂಕತೆನ್ ಅನುಸರಿಸಾವುನ ಅನಿವಾರ್ಯ ಉಂಡು . ದುಂಬು ಬರ್ಪಿನ ದಿನಟ್ ಸಂಭಾವ್ಯ 3 ನೇ ಅಲೆನ್ ಸಮರ್ಪಕವಾದ್ ಮಲ್ಪುನ ನೆಲೆಟ್ಟ್ ಮಾತಾ ಮುಂಜಾಗ್ರತಾ ಕ್ರಮಕ್ಲೆನ್ ದೆತೊನೊಂದು ಉಲ್ಲೆರ್ .

ಪ್ರಸ್ತುತ ರಾಜ್ಯ ಸರ್ಕಾರ ಕೇರಳ ರಾಜ್ಯಡ್ ಕೋವಿಡ್-19 ಪರಿಸ್ಥಿತಿನ್ ಅವಲೋಕನೆ ಮಲ್ತ್ ದಕ್ಷಿಣ ಕನ್ನಡ ಜಿಲ್ಲೆಗ್ ಉಪ್ಪುನ ಕೇರಳ ರಾಜ್ಯದ ಕಾಸರಗೋಡು ಜಿಲ್ಲೆರ್ದ್ ವಿದ್ಯಾಭ್ಯಾಸ, ಕಚೇರಿ ಕೆಲಸ, ವ್ಯಾಪಾರ ವ್ಯವಹಾರ ಸೇರಿನoಚ ಬೇತೆ ಬೇತೆ ಕಾರಣಗ್ ಸಂಖ್ಯೆಡ್ ದಿನನಿತ್ಯ ಜೋಕುಲು , ಸಾರ್ವಜನಿಕೆರ್ ಸಂಚಾರ ಮಲ್ತೊಂದು ಉಲ್ಲೆರ್ , ಕಾಸರಗೋಡು – ಕುಡ್ಲ ನಡುತ ಬಸ್ ಸಂಚಾರಗ್ ಸೋಮವಾರರ್ದ್ ಷರತ್ತು ದ ಮಿತ್ತ್ ಬಸ್ ಚಾಲನೆ ಮಲ್ದೆರ್.

You Missed