Bangalore

ಬಡವೆರೆಗ್ ನ್ಯಾಯ ಓದಗಾದ್ ಕೊರಿನ ಪ್ರವೀಣ್ ಕುಮಾರ್ ಕೃಷ್ಣಾಪುರ

ಕುಡ್ಲ, ಜುಲೈ 27 : ಕಾರ್ಮಿಕೆರ್ನ ಇಎಸ್ಐ ಸೌಲಭ್ಯ ಇಪ್ಪುನ ರಾಜೇಶ್ ಶೆಟ್ಟಿ ಕಾಟಿಪಳ್ಳ ಮಧ್ಯ ಮೆರ್ನ ಅಪ್ಪೆ ಹುಷಾರ್ ದಾಂತೆ ಅವ್ವೆತೋ ಸಮಯ ಆದ್ ಕುಡ್ಲದ ಎ. ಜೆ ಖಾಸಗಿ ಆಸ್ಪತ್ರೆಗ್ ದಾಖಲ್ ಆತೆರ್. ಐರ್ದ್ ಬೊಕ್ಕ 15/10/2020 ಎ. ಜೆ ಆಸ್ಪತ್ತ್ರೆ ದಕುಲು ಇಎಸ್ಐ ಸೌಲಭ್ಯನ್ ಲೆಕ್ಕೊಗು ದೆತೊನಂದೇ ರಾಜೇಶ್ ಮೆರೆರ್ದ್ ಅಪ್ಪೆನ ಆಸ್ಪತ್ರೆ ಬಿಲ್ಲ್ ಸುಮಾರ್ *36,768 ರೂಪಾಯಿನ್* ರಾಜೇಶ್ ಮೆರ್ನ ಕೈರ್ದ್ ದೆತೊನ್ದೆರ್.

ಅಪಗನೆ ಮೇರ್ ಇಂಚಿನ ಖಾಸಗಿ ಆಸ್ಪತ್ರೆಲು ಪಾಪದಕ್ಲೆನೆರ್ದ್ ಮಲ್ಪುನ ಲೂಟಿದ ವಿರುದ್ಧ ಸುಮಾರ್ 20ರ್ದ್ ಜಾಸ್ತಿ ಸಮಸ್ಯೆನ್ ಪ್ರಧಾನಮಂತ್ರಿ ಕಾರ್ಯಾಲಯ, ರಾಷ್ಟ್ರಪತಿ ಕಾರ್ಯಾಲಯಗ್ಲಾ ತನ್ನ ಪೇಪರ್ ವರ್ಕ್ ಮುಖೇನ ನ್ಯಾಯಗಾದ್ ಬಿನ್ನಾಪು ಮಲ್ದೆರ್ ಅಲ್ಪರ್ದ್ ಅವ್ವೆತೋ ಸಮಸ್ಯೆನ್ ತರೆಮರೆಟ್ ಉಂತುದು ಪರಿಹಾರ ಮಲ್ತಿನಚಿoನ MRPL ONGC ಕರ್ಮಚಾರಿ ಸಂಘದ ಗುರ್ಕಾರ್ಲು ಬೊಕ್ಕ ಕಾಟಿಪಳ್ಳ ಅಭ್ಯುದಯ ಭಾರತೀ ಸೇವಾ ಟ್ರಸ್ಟ್ ಸದಸ್ಯೆರಾಯಿನ ಪ್ರವೀಣ್ ಕುಮಾರ್ ಕೃಷ್ಣಾಪುರ ಮೆರೆಗ್ ಮಾತಾ ಸಮಸ್ಯೆನ್ ಪನ್ಪರ್.

ನೆತ್ತ ವಿರುದ್ಧ ಕರ್ನಾಟಕದ ಇಎಸ್ಐ ಆಸ್ಪತ್ರೆದ ಪ್ರಧಾನ ಕಛೇರಿಗ್ ಪ್ರವೀಣ್ ಮೇರ್ ಸತತ 8 ತಿಂಗೊಲು ರ್ದು ಪತ್ರ ಬರೆಯಿನ ಪರಿಣಾಮ ಎಜೆ ಆಸ್ಪತ್ರೆದಕುಲೆ ಲೆತ್ದ್ ರಾಜೇಶ್ ಮೆರ್ನ ಬ್ಯಾಂಕ್ ಖಾತೆಗ್ 36,768₹ ನ್ ವಾಪಸ್ ಜಮೆ ಮಲ್ದಿನ ಇಚಾರ ಶ್ಲಾಘನೀಯ .

“ತುಳು ಲಿಪಿ ಮಂದಾರ” ಬುಡುಗಡೆ

ಒಡಿಪು, ಜುಲೈ 19: ತಾಳೆಗರಿ ಬಳಕೆ ಮಲ್ತೊಂದು ಇತ್ತಿನ ಕಾಲಘಟ್ಟಡ್ ತುಳು ಲಿಪಿ ಬಳಕೆಯಾವೊಂದು ಇತ್ತುಂಡು . ಪುರಾತನವಾಯಿನ ಐತಿಹಾಸಿಕ ಹಿನ್ನೆಲೆ ಉಪ್ಪುನ ತುಳು ಭಾಷೆ, ತುಳು ಲಿಪಿ ಮಧ್ವಾಚಾರ್ಯೇರ್ನ ಕಾಲಘಟ್ಟಡ್ ಬಳಕೆ ಮಲ್ತೊಂದು ಇತ್ತೆರ್ ಪನ್ಪಿನೆಕ್ಕ್ ಅಷ್ಠಮಠಟ್ ಪುರಾವೆಲು ಉಂಡು ಪಂದ್ ಶಾಸಕ ರಘುಪತಿ ಭಟ್ ಪಂಡೆರ್ .

ಒಡಿಪು ಪ್ರೆಸ್ ಕ್ಲಬ್ ಡ್ ಇನಿ ಅಟ್ಟನೆ ಮಲ್ತಿನ ತುಳು ಲಿಪಿ ಮಂದಾರ” ಬುಡುಗಡೆ ಲೇಸ್ ಡ್ ತುಳು ಲಿಪಿ ಮಂದಾರ”ನ್ ಬುಡುಗಡೆ ಮಲ್ತ್ ಆರ್ ಪಾತೆರಿಯೆರ್.

ವಿಧಾನ ಸಭಾ ಅಧಿವೇಶನಡ್ ಕರಾವಳಿ ಭಾಗದ ಶಾಸಕೆರೆಗ್ ತುಳುಟೆ ಪಾತೆರಿಯರೆ ಅವಕಾಶ ಕೊರೊಡು ಪಂದ್ ಬಿನ್ನಾಪು ಮಲ್ದೆರ್ . ಆಂಡ ಸದನಡ್ ದಾಖಲಾಪಿನ ಮಾಹಿತಿಲೆನ್ ದಾಖಲು ಮಲ್ಪುನಕ್ಲೆಗ್ ತುಳು ಭಾಷೆದ ಅರಿಕೆದ ಕೊರತೆ ಉಪ್ಪುನೆರ್ದಾವರ ದುಂಬುದ ದಿನಟ್ ಈ ಬಗ್ಗೆ ಸೂಕ್ತ ಕ್ರಮ ದೆತೊನುನ ಭರವಸೆನ್ ಸಭಾಧ್ಯಕ್ಶೆರ್ ಕೊರ್ತೆರ್ ಪಂದ್ ಪಂಡಿನ ಆರ್ ತುಳು ಲಿಪಿ, ಭಾಷೆ ಬಗ್ಗೆ ಜೈ ತುಳುನಾಡು ಸಂಘಟನೆದ ಈ ಪ್ರಯತ್ನ ಉತ್ತಮ ಬುಲೆಚ್ಚಿಲ್ ಪಂದ್ ಪಂಡೆರ್ .

ಈ ಪೊರ್ತುಡು ತುಳು ಅಕಾಡೆಮಿಯ ಸದಸ್ಯೆರಾಯಿನ ಡಾ||ಆಕಾಶ್ ರಾಜ್ ಜೈನ್, ತಾರಾ ಆಚಾರ್ಯ, ಜೈ ತುಳುನಾಡು ಸಂಘಟನೆದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್, ಸದಸ್ಯೆರಾಯಿನ ಪ್ರಹ್ಲಾದ್ ಪಿ. ತಂತ್ರಿ ಬೊಕ್ಕ ಬೇತೆ ಪದಾಧಿಕಾರಿಲು ಪಾಲ್ ಪಡೆದಿತ್ತೆರ್ .