ಕಲ್ಪಾದಿ ಬೇಲೆಗ್ ಸೇರುನ ಆಸೆ ಇತ್ತಿನಕ್ಲೆಗ್ ಎಡ್ಡೆ ಸುದ್ದಿ: ನನರ್ದ್ ಬೊಕ್ಕ ಪ್ರತಿ ವರ್ಸೊಲ ಕಲ್ಪಾದಿನಕ್ಲೆನ ನೇಮಕಾತಿ!
ಬೆಂಗ್ಲೂರು : ಕಲ್ಪಾದಿ (ಶಿಕ್ಷಕ) ಬೇಲೆಗ್ ಕಾತೊಂದಿತ್ತಿನಕುಲು ಶಿಕ್ಷಣ ಸಚಿವೆರ್ ಬಿ.ಸಿ.ನಾಗೇಶ್ ಚೀಪೆ ಸುದ್ದಿ ಕೊರಿಯೆರ್. ನನರ್ದ್ ಬೊಕ್ಕ ಪ್ರತಿ ವರ್ಸೊಲಾ ಕಲ್ಪಾದಿ ಬೇಲೆಗ್ ನೇಮಕಾತಿ ಆವೊಂದು ಇಪ್ಪುಂಡು ಪಂದ್ ಪಂಡೆರ್.
ಸುದ್ದಿಗಾರೆರ್ನ ಒಟ್ಟುಗು ಪಾತೆರ್ನ ಇಂಬೆರ್, ಶಿಕ್ಷಣ ಇಲಾಖೆಡ್ ನಿವೃತ್ತಿ, ಬಡ್ತಿ ಸೇರ್ದ್ ಬೇತೆ ಬೇತೆ ಕಾರಣರ್ದ್ ಕಾಲಿ ಇಪ್ಪುನ ಕಲ್ಪಾದಿ ಹುದ್ದೆಗ್ ನನದುಂಬುಗು ಪ್ರತಿ ವರ್ಸೊಲಾ ನೇಮಕಾತಿ ಮಲ್ಪುವ, ಪ್ರತಿ ವರ್ಸ ಶಿಕ್ಷಣ ಇಲಾಖೆರ್ದ್ 4-5 ಸಾರ ಕಲ್ಪಾದಿಲು ನಿವೃತ್ತಿ ಆಪೆರ್. ಕಾಲಿ ಇಪ್ಪುನ ಹುದ್ದೆಲೆನ್ ಅವ್ವೇ ವರ್ಸೊಡೆ ಭರ್ತಿ ಮಲ್ಪುನ ಬಗೆಟ್ ಆರ್ಥಿಕ ಇಲಾಖೆಗ್ ಪ್ರಸ್ತಾವನೆ ಕೊರ್ತುಂಡು ಪಂದ್ ಪಂಡೆರ್.
ಇತ್ತೆ ನಡತ್ತೊಂದು ಇಪ್ಪುನ 15 ಸಾರ ಕಲ್ಪಾದಿಲೆನ ನೇಮಕಾತಿ ಪ್ರಕ್ರಿಯೆ ನನ ರಡ್ಡ್ ತಿಂಗೊಲುಡು ಮುಗಿತ್ತ್ದ್ ಅಕ್ಲೆನ್ ಸಾಲೆಗ್ ನಿಯೋಜನೆ ಮಲ್ಪುವ ಪಂದ್ ಪಂಡೆರ್. ಇಂದೆಟ್ ಕಮ್ಮಿಡ್ಲಾ 12 ಸಾರ ಹುದ್ದೆ ದಿಂಜುನ ಅಂದಾಜಿ ಉಂಡು. ನೇಮಕಾತಿ ಮುಗಿ ಬೊಕ್ಕ ಕಾಲಿ ಒರಿಯುನ ಹುದ್ದೆಗ್ ಜನವರಿಡ್ ಕುಡ ಸಿಇಟಿ ನಡಪಾದ್, ಕುಡೊಂಜಿ ನೇಮಕಾತಿ ಪ್ರಕ್ರಿಯೆ ಮಲ್ಪುವ ಪಂದ್ ಪಂಡೆರ್.
