“ಯಕ್ಷಕಲೆನ್ ಕ್ಷಯ ಮಲ್ಪುನ ಬೊರ್ಚಿ ಅಕ್ಷಯ ಮಲ್ಪುಗ ” -ಪಳ್ಳಿ ಕಿಶನ್ ಹೆಗ್ಡೆ ಬಂಟರ ಸಂಘ ಸುರತ್ಕಲ್ ಡ್ “ಯಕ್ಷಸಿರಿ” ಉದಿಪನ
ಸುರತ್ಕಲ್: ಬಂಟರ ಸಂಘ(ರಿ.) ಸುರತ್ಕಲ್ ಮೆಕ್ಲೆನ ಒಟ್ಟು ಸೇರಿಗೆಡ್ ನಡತಿನ “ಯಕ್ಷಸಿರಿ” ಯಕ್ಷಗಾನ ತರಬೇತಿ ಕೇಂದ್ರದ ಉದಿಪನದ ಲೇಸ್ ಸುರತ್ಕಲ್ ಬಂಟರ ಭವನಡ್ ನಡತುಂಡು .
ಪಂಚ ಯಕ್ಷಗಾನ ಮೇಳದ ಸಂಚಾಲಕೆರಾಯಿನ ಪಳ್ಳಿ ಕಿಶನ್ ಹೆಗ್ಡೆ ಮೇರ್ ಉದಿಪನ ಮಲ್ತೆರ್ .
ಐರ್ದ್ ಬೊಕ್ಕ ಪಾತೆರಿನ ಆರ್ , “ಯಕ್ಷಗಾನ ತರಬೇತಿ ಕೇಂದ್ರ ಅವ್ವೆತೋ ಕಡೆಟ್ ಉಂಡು ಆಂಡ ದಿನ ಪೋಯಿಲಕ ಕಲ್ಪುನಕ್ಲೆನ ಲೆಕ್ಕ ಕಮ್ಮಿ ಆವೊಂದು ಉಂಡು ಆಂಡ ಸುರತ್ಕಲ್ ಬಂಟರ ಸಂಘ ನಾನೊರಿಯಗ್ ಸ್ಫೂರ್ತಿಯಾದ್ ಬೇಲೆ ಮಲ್ತೊಂದು ಉಪ್ಪುನವು ಶ್ಲಾಘನೀಯ. ಯಕ್ಷಗಾನ ಸೇವೆ ಪನ್ಪಿನವು ದೇವೆರ್ನ ಸೇವೆ ಇತ್ತಿಲಕ . ಪಿರಾಕ್ ಡ್ ಯಕ್ಷಗಾನ ಕಲಾವಿದೆರ್ನ ಬಗ್ಗೆ ತಾತ್ಸಾರಲ್ ಇತ್ತ್oಡ್ ಆಂಡ ಇತ್ತೆ ವಿದ್ಯಾವಂತ ಯುವಜನತೆ ಯಕ್ಷಗಾನ ಕಲೆತಡೆ ಆಕರ್ಷಿತೇರಾವೊಂದು ಉಲ್ಲೆರ್ . ಸಮಾಜದ ಮಾತಾ ವರ್ಗದ ಜನಕ್ಲೆನ್ ಒಟ್ಟು ಸೇರಾದ್ ಯಕ್ಷ ಸೇವೆಗ್ ದುಂಬು ಬೈದಿನ ಸುರತ್ಕಲ್ ಬಂಟರ ಸಂಘದ ಶ್ರಮ ಸಾರ್ಥಕ ಆವಡ್ . ಯಕ್ಷ ಕಲೆನ್ ಕ್ಷಯ ಮಲ್ಪುನ ಬೊರ್ಚಿ ಅಕ್ಷಯ ಮಲ್ಪುಗ ಪಂದ್ ಪಂಡೆರ್ “.
ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಬಂಟರ ಸಂಘದ ಗುರ್ಕಾರ್ಲಾಯಿನ ಸುಧಾಕರ ಎಸ್ ಪೂಂಜ ವಹಿಸ್ ದಿತ್ತೆರ್ . ಬೆಳ್ಳಿ ಪರ್ಬದ ತಡ್ದೆ ಡ್ ಇಪ್ಪುನ ಬಂಟರ ಸಂಘ ಸುರತ್ಕಲ್ ನಿರಂತರ ಕಾರ್ಯ ಚಟುವಟಿಕೆಲೆನ್ ಮಲ್ತೊಂದು ಬೈದುಂಡು . ಬೇತೆ ಬೇತೆ ಸಮಿತಿ ಮಲ್ತ್ ಬೇತೆ ಬೇತೆ ಸಂಚಾಲಕೆರ್ , ಸದಸ್ಯೆರ್ ಜವಾಬ್ದಾರಿ ದೆತೊoದು ಬೇಲೆ ಮಲ್ತೊಂದು ಉಲ್ಲೆರ್. ನವಂಬರ್- ಡಿಸೆಂಬರ್ ತಿಂಗೊಲ್ ಡು ಸಂಘದ ಬೊಳ್ಳಿ ಪರ್ಬದ ಲೇಸ್ ನಡಪರೆ ಉಂಡು ನೆಕ್ಕ್ ಮಾತೆರ್ನಲ ಸಾಕಾರ ಅಗತ್ಯ ಪಂದ್ ಪಂಡೆರ್.
ಮಲ್ಲ ಬಿನ್ನೆರ್ ಆದ್ ಪಾತೆರಿನ ಕರ್ನಾಟಕ ಯಕ್ಷಗಾನ ಅಕಾಡೆಮಿ ಬೆಂಗ್ಳೂರು ನೆತ್ತ ಸದಸ್ಯೆರಾಯಿನ ನವನೀತ್ ಶೆಟ್ಟಿ ಕದ್ರಿ ಮೇರ್ , “ಸುರತ್ಕಲ್ ಲಾ ಯಕ್ಷಗಾನಗ್ಲಾ ಪರಪೋಕುದ ಪರತಿರಿ ಉಂಡು . ಪಿರಾಕ್ ಡ್ ಉಂದುವೇ ಕ್ಷೇತ್ರೋಡು ಕುಂಬ್ಳೆ ಸುಂದರ ರಾವ್ ನಂಚಿನ ಯಕ್ಷಗಾನ ಕಲಾವಿದೆರ್ ಓಟು ಡು ಉಂತುದು ಗೆಂದಿನ ಇತಿಹಾಸ ಉಂಡು. ಆರ್ನ ಗೆಲ್ಮೆದ ಪಕ್ಷರ್ದ್ ಜಾಸ್ತಿಯಾದ್ ಆರೊರಿ ಯಕ್ಷಗಾನ ಕಲಾವಿದೆರ್ ಪನ್ಪಿನ ಕಾರಣ ಆದ್ ಇತ್ತುಂಡು ಪಂದ್ ನೆಂಪು ಮಲ್ತೆರ್.
ಇಂಚೋಗು ತೀರ್ ಪೋಯಿನ ಕಟೀಲು ಮೇಳದ ಪ್ರಧಾನ ಭಾಗವತೆರಾಯಿನ ಪ್ರಸಾದ ಬಲಿಪೆರೆನ್ ಕಟ್ಲ ಲೀಲಾಧರ ಶೆಟ್ಟಿ ನೆಂಪು ಮಲ್ತ್ ಸಂತಾಪ ಸೂಚಿಸಾಯೆರ್ . ಬಂಟರ ಸಂಘ ಸುರತ್ಕಲ್ ನೆತ್ತ ನಿಕಟಪೂರ್ವ ಗುರ್ಕಾರ್ಲಾಯಿನ ಉಲ್ಲಾಸ್ ಆರ್. ಶೆಟ್ಟಿ ಮೇರ್ ಪ್ರಾಸ್ತಾವಿಕ ನುಡಿ ಪಂಡೆರ್ .
ಮಲ್ಲ ಬಿನ್ನೆರ್ ಆದ್ ಅಗರಿ ಸಂಸ್ಮರಣಾ ವೇದಿಕೆದ ಗುರ್ಕಾರ್ಲಾಯಿನ ಅಗರಿ ರಾಘವೇಂದ್ರ ರಾವ್ ಸುರತ್ಕಲ್, ಕರ್ನಾಟಕ ಯಕ್ಷಗಾನ ಅಕಾಡೆಮಿ ಸದಸ್ಯ ಮಾಧವ ಭಂಡಾರಿ ಕುಳಾಯಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ಗುರ್ಕಾರ್ಲಾಯಿನ ಸಂತೋಷ್ ಕುಮಾರ್ ಶೆಟ್ಟಿ ಬಿ.ಇ., ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಕೇಂದ್ರೀಯ ಮಹಿಳಾ ಘಟಕದ ಗುರ್ಕಾರ್ಲಾಯಿನ ಪೂರ್ಣಿಮಾ ಯತೀಶ್ ರೈ, ಯಕ್ಷಗುರು ರಾಕೇಶ್ ರೈ ಅಡ್ಕ ಪಾಲ್ ಪಡೆದಿತ್ತೆರ್ .
ಚಾವಡಿಡ್ ಸಂಘದ ಉಪಾಧ್ಯಕ್ಷ ಲೋಕಯ್ಯ ಶೆಟ್ಟಿ ಮುಂಚೂರು, ಪ್ರಧಾನಕಾರ್ಯದರ್ಶಿ ಪ್ರವೀಣ್ ಶೆಟ್ಟಿ, ಕೋಶಾಧಿಕಾರಿ ರತ್ನಾಕರ ಶೆಟ್ಟಿ, ಒತ್ತು ಕಾರ್ಯಂತೆರಾಯಿನ ಪುಷ್ಪರಾಜ್ ಶೆಟ್ಟಿ ಕುಡುಂಬೂರು, ಸಂಘಟನಾ ಕಾರ್ಯದರ್ಶಿ ದೇವೇಂದ್ರ ಶೆಟ್ಟಿ, ಕ್ರೀಡಾ ಕಾರ್ಯದರ್ಶಿ ಹರೀಶ್ ಶೆಟ್ಟಿ ಕಾಟಿಪಳ್ಳ, ಮಹಿಳಾ ಘಟಕದ ಗುರ್ಕಾರ್ಲಾಯಿನ ಚಿತ್ರಾ ಜೆ. ಶೆಟ್ಟಿ, ಯಕ್ಷ ಸಿರಿ ಸಹಸಂಚಾಲಕಿ ಕೇಸರಿ ಎಸ್. ಪೂಂಜಾ, ಪಾಲ್ ಪಡೆದಿತ್ತೆರ್ . ಉಂದುವೇ ಪೊರ್ತುಡು ಯಕ್ಷಗುರು ರಾಕೇಶ್ ರೈ ಅಡ್ಕ ಮೆರೆಗ್ ಚಾವಡಿಡ್ ಇತ್ತಿನ ಬಿನ್ನೆರ್ ಮಾನದಿಗೆ ಮಲ್ತೆರ್ .
ಯಕ್ಷಸಿರಿ ಸುರತ್ಕಲ್ ಬಂಟರ ಸಂಘ ನೆತ್ತ ಸಂಚಾಲಕೆರಾಯಿನ ಬಾಳ ಜಗನ್ನಾಥ ಶೆಟ್ಟಿ ಎದುಕೊಂಡೆರ್ .
ಖ್ಯಾತ ಭಾಗವತ ಕೇಶವ ಶೆಟ್ಟಿ ಪಡ್ರೆ ದೇವೆರ್ನ ಸುಗಿಪು ಪಂಡೆರ್ . ಲೋಕಯ್ಯ ಶೆಟ್ಟಿ ಮುಂಚೂರು ಸೊಲ್ಮೆ ಸಂದೈತ ಮಲ್ತೆರ್ . ರಾಜೇಶ್ವರಿ ಡಿ. ಶೆಟ್ಟಿ ಲೇಸ್ ನಡಪಾದ್ ಕೊರಿಯೆರ್.
ಐರ್ದ್ ಬೊಕ್ಕ ಯಕ್ಷಗುರು ರಾಕೇಶ್ ರೈ ಮೆರೆರ್ದ್ ಶಿಷ್ಯ ಸ್ವೀಕಾರ ಲೇಸ್ ನಡತುಂಡು.
