ಪತ್ರಕರ್ತೆರ್ ದಿ. ಯಶವಂತ್ ಐಕಳ ಮೆರೆಗ್ ಮುಲ್ಕಿ ಪತ್ರಕರ್ತೆರ್ನ ಸಂಘದ ಶ್ರದ್ಧಾಂಜಲಿ, ಪುರ್ಪ ಸಂದಾಯ
ಮುಲ್ಕಿ : ಹಿರಿಯ ಪತ್ರಕರ್ತೆರ್ , ಸಮಾಜಸೇವಕೆ ಬೊಕ್ಕ ಛಾಯಾಚಿತ್ರಗ್ರಾಹಕೆರ್ ಆದಿತ್ತಿನ ದಿವಂಗತ ಯಶವಂತ ಐಕಳ ಮೆರೆಗ್ ಸೋಮಾರ ಮುಲ್ಕಿ ತಾಲೂಕು ಪತ್ರಕರ್ತೆರ್ನ ಸಂಘೊರ್ದು ಶ್ರದ್ಧಾಂಜಲಿ ಸಭೆ ಮುಲ್ಕಿದ ಸ್ವಾಗತ ಸಭಾಂಗಣೊಡು ನಡತ್ಂಡ್.
ಧರ್ಮದರ್ಶಿ ಹರಿಕೃಷ್ಣ ಪುನರೂರು ಮೇರ್ ದಿ.ಯಶವಂತ್ ಮೆರೆನ ಭಾವಚಿತ್ರೊಗು ಪುರ್ಪ ಪಾಡ್ದ್ ಗೌರವ ಸಂದಾಯೆರ್. ಅಂಚೆನೆ ಮಾತೆರ್ಲ ಮೌನ ಪ್ರಾರ್ಥನೆ ಮಲ್ತ್ ದ್ ಯಶವಂತೆರ್ನ ಆತ್ಮೊಗು ಶಾಂತಿ ತಿಕ್ಕೊಡು ಪಂಡ್ ದ್ ಎನ್ನಿಯೆರ್.
ಈ ಪೊರ್ತುಡು ಪಾತೆರಿನ ಹರಿಕೃಷ್ಣ ಪುನರೂರು , ಯಶವಂತ್ ಒರಿ ಸಮಾಜಮುಖಿ ಪತ್ರಕರ್ತೆರ್. ಅರೆನ ಕುಟುಮೊಗು ಸರಕಾರದ ವತಿರ್ದ್ ತಿಕ್ಕುನ ಪರಿಹಾರ ತಿಕ್ಕೊಡು ಪಂಡೆರ್.
ಹೊಸ ಅಂಗಣ ಪತ್ರಿಕೆದ ಸಂಪೊಲಿಗೆದಾರ್ ಡಾ.ಪಿ.ಹರಿಶ್ಚಂದ್ರ ಸಾಲ್ಯಾನ್ ಪಾತೆರ್ದ್, ಯಶವಂತೆರ್ ಬೇತೆ ಬೇತೆ ಸಂಘೊಡು ಇತ್ತ್ ದ್ ಸಮಾಜದ ಅಭಿವೃದ್ಧಿ ಗ್ ಎಡ್ಡೆ ಬೇಲೆ ಮಲ್ದೆರ್ ಪಂಡೆರ್.
ಹಿರಿಯ ಪತ್ರಕರ್ತೆರ್ ಹರೀಶ್ ಹೆಜ್ಮಾಡಿ ಪಾತೆರ್ದ್, ಯಶವಂತೆರ್ ಒರಿ ನಿಷ್ಠುರವಾದಿ ಪತ್ರಕರ್ತೆರ್. ಆರ್ ಎಚ್ಚಾದ್ ಸುದ್ದಿದ ಬೆರಿ ಪತ್ ದಿನಾರ್. ಅರೆನ ನಿಧನ ಮಾತ ಪತ್ರಕರ್ತೆರ್ ಗ್ ಲ ಎಚ್ಚೆರ್ಗೆದ ಪಾಠ. ಮಾತೆರ್ಲ ಜಾಗೃತೆಡ್ ಉಪ್ಪುಲೆ ಪಂಡೆರ್.ಹಿರಿಯ ಪತ್ರಕರ್ತೆರಾಯಿನ ಸರ್ವೋತ್ತಮ ಅಂಚನ್ ಪಾತೆರ್ದ್ , ಯಶವಂತೆರ್ ಒವ್ವೇ ವಿಷಯೊಡು ನೇರವಾದ್ ಪಾತೆರುನಾರ್. ಆಂಡ ಅರೆನ ಮನಸ್ ಎಡ್ಡೆ ಪಂಡೆರ್.ಕಾಪು ತಾಲೂಕು ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ರಾಕೇಶ್ ಕುಂಜೂರು ಪಾತೆರ್ದ್ ಯಶವಂತೆರ್ ಒರಿ ರೆಬೆಲ್ ಪತ್ರಕರ್ತೆ.ಅರೆನ ನಿಧನ ಸಮಾಜೊಗ್ಲ ಮಲ್ಲ ನಷ್ಟ ಪಂಡೆರ್.
ಕುಡೊರಿ ಪತ್ರಕರ್ತೆ ರಘುನಾಥ ಕಾಮತ್ ಪಾತೆರ್ದ್, ಯಶವಂತೆರ್ ನಿಷ್ಠುರವಾದಿ ಪತ್ರಕರ್ತೆರ್ ಪಂಡ್ ದ್ ಅರೆನೊಟ್ಟುದ ಒಡನಾಟೊನು ನೆನೆತೆರ್.
ಯುವ ಪತ್ರಕರ್ತೆರ್ ನರೇಂದ್ರ ಕೆರೆಕಾಡು ಪಾತೆರ್ದ್, ಯಶವಂತೆರ್ ನಮಕ್ ಎಚ್ಚೆರ್ಗೆ ಕೊರ್ದು ಪೋತೆರ್. ನಮ ಮಾತೆರ್ಲ ಜಾಗೃತೆಡ್ ಉಪ್ಪೊಡು ಪಂಡೆರ್.ಮುಲ್ಕಿ ತಾಲೂಕು ಪತ್ರಕರ್ತೆರ್ನ ಸಂಘದ ಅಧ್ಯಕ್ಷೆರ್ ನಿಶಾಂತ್ ಕಿಲೆಂಜೂರು ಪಾತೆರ್ದ್, ಯಶವಂತೆರ್ನ ಕುಟೊಮೊಗು ಸರಕಾರದ ಪರಿಹಾರ ತಿಕ್ಕುಲೆಕ್ಕ ಪ್ರಯತ್ನ ಮಲ್ಪುವ ಪಂಡೆರ್.ದಕ ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರ್ನ ಸಂಘದ ಸದಸ್ಯೆರ್ ಶರತ್ ಶೆಟ್ಟಿ ಕಿನ್ನಿಗೋಳಿ ಸಭೆತ್ತ ನಿರೂಪಣೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.
