ಕಾರ್ಮಿಕೆ

ಕಟ್ಟಡ ಕಾರ್ಮಿಕೆರೆಗ್ ಕೋವಿಡ್ ಲಸಿಕೆ

ಒಡಿಪು , ಜೂ.6: ಒಡಿಪು ಜಿಲ್ಲೆದ ಆದ್ಯತಾ ಕೂಟದ ಕಟ್ಟಡ ಕಾರ್ಮಿಕೆರೆಗ್ ಸರಕಾರದ ನಿರ್ದೇಶನದಲಕ ಜೂ.5ರ್ದ್ ಪ್ರಾಥಮಿಕ ಆರೋಗ್ಯ ಘಟಕದ ವ್ಯಾಪ್ತಿಡ್ ಕಟ್ಟಡ ಕಾರ್ಮಿಕೆರೆಗ್ ಲಸಿಕೆ ಕೊರ್ಪಿನ ಕಾರ್ಯನ್ ಸುರು ಮಲ್ದೆರ್ .

ಐರ್ದಾವರ ಜಿಲ್ಲೆದ ನೋಂದಾಯಿತ ಕಟ್ಟಡ ಕಾರ್ಮಿಕೆರ್ , ಕಟ್ಟಡ ಬೊಕ್ಕ ಇತರೆ ನಿರ್ಮಾಣ ಕಾರ್ಮಿಕೆರ್ನ ಕಲ್ಯಾಣ ಮಂಡಳಿರ್ದ್ ಪಡೆಯಿನ ಮೂಲ ಗುರುತಿನಚೀಟಿ ಬೊಕ್ಕ ಆಧಾರ್‌ಕಾರ್ಡ್ ನ್ ತಮ್ಮ ಕೈತಲ್ದ ಪಿಹೆಚ್‌ಸಿ ಅತ್ತುಂಡ ಕೋವಿಡ್ ವ್ಯಾಕ್ಸಿನ್ ಸೆಂಟರ್‌ಡ್ ಹಾಜರ್ ಪಡಿಸಾದ್ ಲಸಿಕೆ ಲಭ್ಯತೆದ ಆಧಾರದ ಮಿತ್ತ್ ಲಸಿಕೆನ್ ಪಡೆಯೋಡು ಪಂದ್ ತೆರಿಪಾಯೆರ್.

ನೋಂದಣಿಯಾವಂದಿನ ಕಟ್ಟಡ ಕಾರ್ಮಿಕೆರ್ ಕಾರ್ಮಿಕೆರೆನ್ ಇಲಾಖೆರ್ದ್ ಈಗಾಗಲೇ ಪಡೆಯಿನ ಅನುಬಂಧ-3 ಬೊಕ್ಕ ಆಧಾರ್‌ಕಾರ್ಡ್‌ನ್ ಹಾಜರು ಪಡಿಸಾದ್ ಲಸಿಕೆನ್ ಲಭ್ಯತೆ ಆಧಾರದ ಮಿತ್ತ್ ಪಡೆಯೋಡು ಅಂಚನೇ ಇತ್ತೇ ಮುಟ ಅನುಬಂಧ-3ನ್ ಪಡೆವಂದಿನ ಕಟ್ಟಡ ಕಾರ್ಮಿಕೆರ್ ತಮ್ಮ ತಾಲೂಕು ಕಾರ್ಮಿಕ ನಿರೀಕ್ಷಕೆರೆನ್ ಸಂಪರ್ಕಿಸಾದ್ ಅನುಬಂಧ-3ನ್ ಪಡೆದ್ ಲಸಿಕೆ ಪಡೆಯೋಡು ಪಂದ್ ಜಿಲ್ಲಾ ಕಾರ್ಮಿಕ ಅಧಿಕಾರಿ ಕುಮಾರ್ ಪ್ರಕಟಣೆಡ್ ತೆರಿಪಾಯೆರ್ .

ಪೌರ ಕಾರ್ಮಿಕೆ ಅರುಣ್ ಕುಮಾರ್ ಗ್ ಹೊಸ ಅಂಗಣದ ಮಾನಾದಿಗೆ

ಮುಲ್ಕಿ : ಕೋವಿಡ್ ದಂಚಿನ ಸೀಕ್ ದ ಪೊರ್ತುಡು ತನ್ನ ಜೀವದ ಮಿತ್ತ್ ದ ಆಸೆ ದೀವಂದೆ ಪ್ರಾಮಾಣಿಕವಾದ್ ಸ್ವಚ್ಛತೆದ ಕೆಲಸ ಮಲ್ಪುನ ಪೌರ ಕಾರ್ಮಿಕೆರೆನ್ ನಮ ನಿಜವಾದ್ ಲ ಗುರ್ತಿಸಾದ್ ಗೌರವ ಮಲ್ಪೊಡು ಪಂಡ್ ದ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಪಂಡೆರ್.
ಮುಲ್ಕಿಡ್ ಗುರುವಾರ ಕಾಂಡೆ ನಡತಿನ ಹೊಸ ಅಂಗಣ ಪತ್ರಿಕೆದ ಸಂಚಿ ಬುಡುಗಡೆ ಬೊಕ್ಕ “ತಿಂಗೊಲ್ದ ಬೊಲ್ಪು” ಸರಣಿ ಮಾನಾದಿಗೆದ ಲೇಸ್ ದ ಗುರ್ಕಾರ್ಮೆ ಒಯಿಸ್ ದ್ ಆರ್ ಪಾತೆರಿಯೆರ್.
ಮುಲ್ಕಿ ರೋಟರಿ ಕ್ಲಬ್ ದ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ರ್ ಪಾತೆರ್ದ್, ಕೊರೊನಾ ವಾರಿಯರ್ಸ್ ನ್ ಮಾನಾದಿಗೆ ಮಲ್ದಿನ ಹೊಸ ಅಂಗಣ ಪತ್ರಿಕೆದ ಕೆಲಸ ಮೆಚ್ಚೊಡಾಯಿನವು ಪಂಡೆರ್.

ಉಂದುವೇ ಪೊರ್ತುಡು ಮುಲ್ಕಿ ನಗರ ಪಂಚಾಯ್ತಿದ ಪೌರ ಕಾರ್ಮಿಕೆ ಅರುಣ್ ಕುಮಾರ್ ಮೆರೆನ ಮಾನಾದಿಗೆ ನಡತ್ಂಡ್.
ಮುಲ್ಕಿ ಬಿಲ್ಲವ ಸಂಘದ ಗುರ್ಕಾರ್ಲು ರಮೇಶ್ ಅಮೀನ್ ಕೊಕ್ಕರಕಲ್, ನಿವೃತ್ತ ಪ್ರಾಚಾರ್ಯೆರ್ ವೈ.ಎನ್.ಸಾಲ್ಯಾನ್, ಪುರಂದರ ಸಾಲ್ಯಾನ್, ಅಬ್ದುಲ್ ರಜಾಕ್ ಮೊಕುಲು ಮಾತ ಬಿನ್ನೆರಾದ್ ಬತ್ತಿತ್ತೆರ್.ಹೊಸ ಅಂಗಣ ಪತ್ರಿಕೆದ ಸಂಪೊಲಿಗೆದಾರ್ ಡಾ.ಹರಿಶ್ಚಂದ್ರ ಪಿ.ಸಾಲ್ಯಾನ್ ಬಿನ್ನೆರೆನ್ ಎದ್ಕೊಂಡೆರ್.ವಿಜಯ ಕುಮಾರ್ ಕುಬೆವೂರು ಲೇಸ್ ನಡಪಾದ್ ಕೊರಿಯೆರ್.