ಕುಡ್ಲ ಇಮಾನ ನಿಲ್ದಾಣಡ್ ತುಳು ಭಾಷೆ, ಸಂಸ್ಕೃತಿದ ದೃಶ್ಯ ರೂಪಕ ತೂಪರಿಕೆ : ಕಿಶೋರ್ ಆಳ್ವ
ಕುಡ್ಲ : ಪುರಾತನ ಹಿನ್ನೆಲೆ ಉಪ್ಪುನ ತುಳು ಭಾಷೆ ಬೊಕ್ಕ ತುಳುನಾಡ್ ದ ಸಂಸ್ಕೃತಿನ್ ಒರಿಪಾದ್ ಬುಲೆಪಾವುನ ನಿಲೆಟ್ಟ್ ಸರಕಾರ, ಸಮುದಾಯ ಬೊಕ್ಕ ಖಾಸಗಿ ರಂಗದಕುಲು ಒಟ್ಟಾದ್ ಕೈಜೋಡಿಸಾವುನ ಅಗತ್ಯ ಉಂಡು ಪಂದ್ ಅದಾನಿ ಕಂಪೆನಿದ ಕಾರ್ಯನಿರ್ವಾಹಕ ನಿರ್ದೇಶಕೆರ್, ಅಧ್ಯಕ್ಷೆರ್ ಕಿಶೋರ್ ಆಳ್ವ ಪಂಡೆರ್.
ಆರ್ ಕುಡ್ಲದ ತುಳು ಭವನಡ್ ‘ಎಸ್ .ಯು. ಪಣಿಯಾಡಿ ತುಳುನಾಡ ಚಾವಡಿ’ಡ್ ಹಿರಿಯ ಛಾಯಾಗ್ರಾಹಕೆ ಯಜ್ಞ ಮೇರ್ ದೈದಿನ ಪಿರಾಕ್ದ ಕಾಲದ ಕುಡ್ಲದ ಫೊಟೊಕ್ಲೆನ ತೂಪರಿಕೆ (ಪ್ರದರ್ಶನ)ನ್ ಉದಿಪನ ಮಲ್ತ್ ಪಾತೆರಿಯೆರ್.
ಕುಡ್ಲದ ವಿಮಾನ ನಿಲ್ದಾಣಡ್ಲ ತುಳು ಭಾಷೆ ಬೊಕ್ಕ ಸಂಸ್ಕೃತಿನ್ ತೊಜಪಾವುನ ದೃಶ್ಯ ರೂಪಕಲೆನ್ ತುಳು ಅಕಾಡೆಮಿದ ಒಟ್ಟುಸೇರಿಗೆಡ್ ಮಲ್ಪುನ ಆಲೋಚನೆ ಉಂಡು ಪಂದ್ ಕಿಶೋರ್ ಆಳ್ವ ತೆರಿಪಾಯೆರ್.
ತುಳು ಭಾಷೆ ಬೊಕ್ಕ ಸಂಸ್ಕೃತಿ ಬಗ್ಗೆ ಮಾಹಿತಿ ದೆತೊನರೆ ದೇಶ ವಿದೇಶದ ಜನಕುಲು ಮಸ್ತ್ ಆಸಕ್ತಿ ತೋಜಾವುನು ಎಡ್ಡೆ ಸಂಗತಿ. ಯಜ್ಞ ಮೇರ್ ಅರೆನ ಕ್ಯಾಮೆರಾ ಕಣ್ಣ್ದ ಮುಕೇನ ಪಿರಾಕ್ದ ಕಾಲದ ಕುಡ್ಲನ್ ದಾಖಲೀಕರಣ ಮಲ್ದಿನೆರ್ದಾವರ ಕುಡ್ಲದ ಬಗ್ಗೆ ಚಾರಿತ್ರಿಕ ಒಳನೋಟ ತೆರಿಯೊನರೆ ಸಾಧ್ಯ ಆತ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ಯಜ್ಞ ಮೆರೆಗ್ ತುಳು ಸಾಹಿತ್ಯ ಅಕಾಡೆಮಿದ ‘ಚಾವಡಿ ತಮ್ಮನ’ ಕೊರ್ದು ಮಾನಾದಿಗೆ ಮಲ್ತೆರ್.
ಮುಡಿಪು ತುಳುನಾಡ ಸಿರಿ ಮ್ಯೂಸಿಯಂದ ಸ್ಥಾಪಕೆರ್ ಡಾ. ಮದನ್ ಮೋಹನ ನಾಯಕ್ ಮೇರ್ ‘ಎಸ್ . ಯು. ಪಣಿಯಾಡಿ ತುಳುನಾಡ ಚಾವಡಿ’ ಪನ್ಪಿನ ಪುದರ್ ಪಲವೆನ್ ಉದಿಪನ ಮಲ್ತೆರ್.
ಆರ್ಟ್ ಕೆನರಾ ಟ್ರಸ್ಟ್ ದ ಅಧ್ಯಕ್ಷೆರ್ ಸುಭಾಷ್ ಚಂದ್ರ ಬಸು ಮೇರ್, ಯಜ್ಞ ಮೆರೆನ ಕಪ್ಪು ಬಿಳುಪು ಛಾಯಾಚಿತ್ರದ ಮಹತ್ವದ ಬಗ್ಗೆ ತೆರಿಪಾಯೆರ್.
ಹಿರಿಯ ಪತ್ರಕರ್ತೆ ಅನಿತಾ ಪಿಂಟೋ ಪಾತೆರ್ದ್, ಯಾನ್ ತರಂಗ ವಾರಪತ್ರಿಕೆ ಮುಕೇನ ಪತ್ರಕರ್ತೆಯಾದ್ ಬುಳೆಯರೆ ಯಜ್ಞ ಮೆರೆನ ಫೊಟೊಕುಲು ಮಲ್ಲ ಕೊಡುಗೆ ಆತ್ಂಡ್ ಪಂದ್ ಪಂಡೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರ್ ತಾರಾನಾಥ್ ಗಟ್ಟಿ ಕಾಪಿಕಾಡ್ ಅಧ್ಯಕ್ಷತೆ ವಹಿಸ್ದಿತ್ತೆರ್. ಎಸ್.ಯು. ಪಣಿಯಾಡಿ ತುಳುನಾಡ ಚಾವಡಿಡ್ ತುಳು ಸಂಸ್ಕೃತಿದ ಬೇತೆ ಬೇತೆ ಸರಣಿದ ಫೊಟೊಕ್ಲೆನ ತೂಪರಿಕೆ ದುಂಬರಿಯುಂಡು ಪಂದ್ ತಾರಾನಾಥ ಗಟ್ಟಿ ತೆರಿಪಾಯೆರ್.
ಲೇಸ್ಡ್ ಕಟ್ಟೆಮಾರ್ ಮನೆತನದ ಪ್ರಶಾಂತ್ ಕುಮಾರ್ ಕಟ್ಟೆಮಾರ್ , ಹಿರಿಯ ಪತ್ರಕರ್ತ ಆನಂದ ಶೆಟ್ಟಿ, ತುಳು ಅಕಾಡೆಮಿ ಸದಸ್ಯೆರ್ ಬೂಬ ಪೂಜಾರಿ ಮಳಲಿ, ಬಾಬು ಕೊರಗ ಪಾಂಗಾಳ ಇತ್ತೆರ್.
ತುಳು ಅಕಾಡೆಮಿ ರಿಜಿಸ್ಟ್ರಾರ್ ಪೂರ್ಣಿಮಾ ಬಿನ್ನೆರೆನ್ ಎದ್ಕೊಂಡೆರ್. ಕಾರ್ಯಕ್ರಮದ ಸದಸ್ಯ ಸಂಚಾಲಕೆರ್ ಸಂತೋಷ್ ಶೆಟ್ಟಿ ಹಿರಿಯಡ್ಕ ಲೇಸ್ ಸುದಾರಿಕೆ ಮಲ್ತೆರ್. ಅಕಾಡೆಮಿ ಸದಸ್ಯೆರ್ ಉದ್ಯಾವರ ನಾಗೇಶ್ ಕುಮಾರ್ ಸೊಲ್ಮೆ ಸಂದಾಯೆರ್.
