ಯುವಚೇತನ ಹೊಸಬೆಟ್ಟು ಕುಳಾಯಿ ವತಿರ್ದ್ ಶಿಕ್ಷಕರ ದಿನಾಚರಣೆ, ಗೌರವಾರ್ಪಣೆ
ಸುರತ್ಕಲ್ : ನವಗಿರಿ ಸೇವಾ ಟ್ರಸ್ಟ್ (ರಿ ) ಹೊಸಬೆಟ್ಟು ಕುಳಾಯಿ ಉಂದೆತ್ತ ಪ್ರಧಾನ ಯುವ ಸಂಘಟನೆ ಯುವಚೇತನ ಹೊಸಬೆಟ್ಟು ಕುಳಾಯಿ ನೆತ್ತ ನಿರೆಲ್‌ಡ್ ಶಿಕ್ಷಕರ ದಿನಾಚರಣೆದ ಅಂಗವಾದ್ ವಿದ್ಯಾದಾಯಿನಿ ಪ್ರೌಢ ಶಾಲೆದ ನಿವೃತ್ತ ಮುಖ್ಯೋಪಾಧ್ಯಾಯಿನಿ, ಸಂಚಾಲಕಿ, ಹಿಂದೂ ವಿದ್ಯಾದಾಯಿನಿ ಸಂಘದ ಕಾರ್ಯದರ್ಶಿಯಾದ್ ಗುರುತರ ಸೇವೆ ಮಲ್ದಿನ ಶ್ರೀಮತಿ ಐ. ಉಮಾದೇವಿ ಬೊಕ್ಕ ವಿದ್ಯಾದಾಯಿನಿ ಪ್ರೌಢ ಶಾಲೆದ ನಿವೃತ್ತ ಮುಖ್ಯೋಪಾಧ್ಯಾಯೆರ್ ಬಿ ರಮೇಶ್ ಮೆರೆಗ್ ಅಕ್ಲೆನ ಇಲ್ಲಡ್ ಗುರು ನಮನ ಸಂದಾವುನ ಲೇಸ್ ನಡತ್ಂಡ್.
ವಿದ್ಯಾದಾಯಿನಿ ಹಳೆ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿ ಶ್ರೀನಿವಾಸ ಕುಳಾಯಿ ಅಭಿನಂದನಾ ಭಾಷಣ ಮಲ್ತ್‌ದ್, “ನಮಕ್ಕ್ ಅಪ್ಪೆ ಅಮ್ಮೆರ್ ಜೀವನ ಕೊರಿಯೆರ್‌ಡ ಶಿಕ್ಷಕೆರ್ ಜೀವನಗ್ ಸರಿಯಾಯಿನ ಸಾದಿ ತೋಜಾವೆರ್. ಅಂಚಿನ ಶಿಸ್ತು ಸಮಾನತೆದ ಒಟ್ಟುಗು ಜ್ಞಾನದಾನ ಮಲ್ದಿನ ಶಿಕ್ಷಕೆರ್ ಸದಾ ಅಭಿನಂದನೀಯೆರ್” ಪಂದ್ ಪಂಡೆರ್.
ವಿದ್ಯಾದಾಯಿನಿ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಹಿರಿಯ ನ್ಯಾಯವಾದಿ ರಾಘವೇಂದ್ರ ಹೆಚ್ ವಿ, ಯುವಚೇತನದ ಅಧ್ಯಕ್ಷೆರ್ ಅರುಣ್ ಕಕ್ಕೆಸಾಲು, ಕಾರ್ಯದರ್ಶಿ ವಿಕ್ರಮ್ ಮೈರ್ಪಾಡಿ, ಕೋಶಾಧಿಕಾರಿ ಅಮಿತ್ ಹತ್ವಾರ್, ಉಪಾಧ್ಯಕ್ಷೆರಾಯಿನ ಪ್ರಶಾಂತ್ ರಾವ್ ಹೆಚ್, ಅಶೋಕ್, ವಸಂತ ರಾಜ ಹೆಚ್, ಉಜ್ವಲ್ ಮೊಕುಲು ಮಾತ ಇತ್ತೆರ್. ಪವನ್ ಮೈರ್ಪಾಡಿ ಲೇಸ್ ಸುದಾರಿಕೆ ಮಲ್ತೆರ್.
