ಡೆಟ್ರಾಯಿಟ್ : ಮಿಚಿಗನ್ ತುಳುವೆರೆರ್ದ್ ಬಿಸು ಪರ್ಬ ಆಚರಣೆ
ಅಮೆರಿಕಾಡ್ ತುಳುನಾಡ ವನಸ್ ತೆನಸ್, ಸಂಪ್ರದಾಯದ ಅನಾವರಣ
ಡೆಟ್ರಾಯಿಟ್ : ಅಮೆರಿಕಾದ ಮಿಚಿಗನ್ ಪೇಂಟೆದ ತುಳುವ ಬಂಧುಲು ಎಪ್ರಿಲ್ 19 ಐತಾರದಾನಿ ತುಳುವೆರೆ ಪೊಸ ವರ್ಷ ” ಬಿಸು ಪರ್ಬ” ನ್ ಭಾರಿ ಗೌಜಿಡ್ ಆಚರಣೆ ಮಲ್ತೆರ್.
ಈ ಪರ್ಬದ ನೆವಟ್ಟ್ ಮಾತಾ ತುಳು ಬಂಧುಲೆನ್ ಒಟ್ಟು ಸೇರಾದ್ ತುಳುವೆರೆನ ಒಗ್ಗಟ್ಟ್ ನ್ ತೂಪರಿಕೆ ಮಲ್ಪರೆ ಅವಕಾಶ ಆಂಡ್.
ಪುಟ್ಟುದಿನ ಊರುರ್ದು ಭಾರಿ ದೂರದ ದೇಶೊಡು ವಾಸ ಇತ್ತ್ಂಡಲ ಅಕುಲು ತುಳುನಾಡ್ದ ಸಾಂಪ್ರದಾಯಿಕ ಆಚರಣೆ, ತುತ್ತೈತ ಬೊಕ್ಕ ವನಸ್ ತೆನಸ್ದ ರುಚಿನ್ ತೊಜಪಾದ್ ಕೊರಿಯೆರ್.
ಈ ಪರ್ಬದ ವಿಶೇಷ ಪಂಡ ಮಾತೆರ್ಲ ಅಕ್ಲೆನ ಇಲ್ಲಡ್ ತಯಾರ್ ಮಲ್ದಿನ ತುಳುನಾಡ್ದ ವನಸ್ ತೆನಸ್ ಲೆನ್ ಕನತ್ದ್ ಪಟ್ದ್ ತಿನ್ಪಿನ ಮೂಲಕ ಕುಷಿ ಪಡೆಯೆರ್. ಬಿಸು ಪರ್ಬದ ಆಚರಣೆಡ್ ತುಳುನಾಡ್ದ ಅಟಿಲ್ದ ಕಮ್ಮೆನ ಇಡೀ ಚಾವಡಿಡ್ ಪಸೆರ್ದ್ ಊರುದ ವಾತಾವರಣನ್ ಸೃಷ್ಟಿ ಮಲ್ತ್ಂಡ್.
ಸಾಂಸ್ಕೃತಿಕ ಕಾರ್ಯಕ್ರಮ ಅಂಚೆನೆ ಮನರಂಜನೆ ಕಾರ್ಯಕ್ರಮ ಬಿಸು ಪರ್ಬದ ಪ್ರಧಾನ ಅಂಗವಾದಿತ್ತ್ಂಡ್. ತುಳು ಕರೋಕೆ, ಗುಂಪುದ ಗೊಬ್ಬುಲು, ಇಂಟರಾಕ್ವಿವ್ ಸೆಷನ್ ಮುಕೇನ ಪ್ರತಿಯೊರಿಲ ಕಾರ್ಯಕ್ರಮಡ್ ಪಾಲ್ ಪಡೆಯುಲೆಕ ಆಂಡ್. ಹಿರಿಯೆರ್ ಬಿಸು ಪರ್ಬ ಆಚರಣೆದ ಬಗೆಟ್ಟ್ ಕಿರಿಯೆರೆಗ್ ಪೊಲಬು ಮಲ್ತ್ ಕೊರಿಯೆರ್. ಪೊಸ ಪೀಳಿಗೆದ ಜೋಕುಲು, ಜವನೆರ್ ಈ ಆಚರಣೆದ ಬಗೆಟ್ಟ್ ತೆರಿಯೊಂಡೆರ್.
ಇಂಚಿನ ಲೇಸ್ದ ಮುಕೇನ ತುಳು ಬಾಷೆ, ಸಂಸ್ಕೃತಿ, ಆಚರಣೆ, ಸಂಪ್ರದಾಯನ್ ಒರಿಪಾವರೆ ಒಂಜಿ ಮಲ್ಲ ವೇದಿಕೆಯಾಂಡ್ ಪಂದ್ ಮಿಚಿಗನ್ ತುಳುವೆರ್ ಅಭಿಪ್ರಾಯ ತೆರಿಪಾಯೆರ್. ಅಂಚೆನೆ ಪ್ರತಿವರ್ಷಲ ಇಂಚಿನ ಲೇಸ್ ನಡಪಾವೊಡು ಪನ್ಪಿನ ಅಭಿಪ್ರಾಯೊನು ಕೊರ್ತೆರ್.