2024

ಜೆಸಿಐ ಮುಲ್ಕಿ ಶಾಂಭವಿ ಪೊಸ ಅಧ್ಯಕ್ಷೆರ್ ಪದುಕೆರ್ ನ ಪದಗ್ರಹಣ

ಮುಲ್ಕಿ: ಜೇಸಿಐ ಮುಲ್ಕಿ ಶಾಂಭವಿ 41 ನೇ ವರ್ಷದ ಪೊಸ ಅಧ್ಯಕ್ಷೆರಾದ್ ಸತೀಶ್ ಕುಮಾರ್ ಕಿಲ್ಪಾಡಿ ಮೇರ್ನ ಬೊಕ್ಕ ಪದುಕೆರ್ನ ಪದಗ್ರಹಣ ಲೇಸ್ ಅಂಗಾರೆ ಬಯ್ಯಡ್ ಮುಲ್ಕಿ ಆದಿಧನ್ ಹೋಟೆಲ್ ದ ಚಾವಡಿಡ್ ನಡತ್ಂಡ್.

ಉದ್ಯಮಿ, ಸಿನಿಮಾ ಕ್ಷೇತ್ರದ ಸಾಧಕೆರ್ ದೇವದಾಸ್ ನಾಯಕ್ ಲೇಸ್ ಉದಿಪನ ಮಲ್ತೆರ್.

ನಿಕಟಪೂರ್ವ ಅಧ್ಯಕ್ಷೆರ್ ಅನಿಲ್ ಕುಮಾರ್ ಪೊಸ ಅಧ್ಯಕ್ಷೆರ್ ಸತೀಶ್ ಕುಮಾರ್ ಕಿಲ್ಪಾಡಿ ಮೆರೆಗ್ ಅಧಿಕಾರ ಕೈ ಏರ್ದ್ ಕೊರಿಯೆರ್.

ಪೊಸ ಅಧ್ಯಕ್ಷೆರಾದ್ ಅಧಿಕಾರ ದೆತೊಂದು ಪಾತೆರಿನ ಸತೀಶ್ ಕುಮಾರ್ ಕಿಲ್ಪಾಡಿ, ಈ ವರ್ಷ
ಜೇಸಿಐ ಭವನದ ಕನಸ್ ಸಾಕಾರ ಮಲ್ಪರೆ ಮಾತೆರ್ಲ ಸಹಕಾರ ಕೊರ್ಲೆ ಪಂದ್ ಬಿನ್ನಾಪು ಮಲ್ತೆರ್.

ಅಂಚೆನೆ ಪೊಸ ಪದಾಧಿಕಾರಿಲೆನ ಪದಗ್ರಹಣ, ಜಬದಾರಿ ಬುಡ್ದು ಕೊರ್ಪಿನ ಬೇಲೆ ನಡತ್ಂಡ್.

ಮೂಜಿ ಜನ ಪೊಸ ಸದಸ್ಯೆರೆಗ್ ಸಿಎ ಸನತ್ ಕುಮಾರ್ ನಾಯ್ಕ್ ಪ್ರಮಾಣವಚನ ಬೋಧನೆ ಮಲ್ತೆರ್.

ಮಲ್ಲ ಬಿನ್ನೆರಾದ್ ವಿಜಯ ರೈತರ ಸೇವಾ ಸಂಘದ ಅಧ್ಯಕ್ಷೆರ್ ರಂಗನಾಥ್ ಶೆಟ್ಟಿ, ಜೇಸಿಐ ಮುಲ್ಕಿ ಶಾಂಭವಿ ಜೇಸಿಐ ಟ್ರಸ್ಟ್ ದ ಹಬೀಬುಲ್ಲ, ಕಲ್ಲಪ್ಪ ತಡವಲಗ ಇತ್ತೆರ್.

ಈ ಪೊರ್ತುಡು ದಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆತಿನ ಶ್ರೀಪತಿ ಭಟ್ ಶಿಮಂತೂರು ಮೆರೆಗ್ ಸಮಾಜಸೇವಾ ರತ್ನ ಪ್ರಶಸ್ತಿ ಕೊರ್ದು ಸನ್ಮಾನ ಮಲ್ತೆರ್. ರಾಷ್ಟ್ರೀಯ ಕಬಡ್ಡಿ ಡ್ ಪಾಲ್ ಪಡೆದಿನ ಶಾಹಿದಾ ಖಾಜೇ ಸಾಬ್ ಕೆ.ಎಸ್.ರಾವ್ ನಗರ ಮೆರೆಗ್ ಕ್ರೀಡಾ ರತ್ನ ಪ್ರಶಸ್ತಿ ಕೊರ್ದು ಸನ್ಮಾನ ಮಲ್ತೆರ್.

ವಿಶ್ವನಾಥ್ ಶೆಣೈ, ಅಶೋಕ್ ಕುಮಾರ್ ಶೆಟ್ಟಿ , ಪೂರ್ಣಿಮಾ ಶೆಟ್ಟಿ, ಮೋಹನ್ ಸುವರ್ಣ ಮೊಕುಲು ಬಿನ್ನೆರ್ನ ಪರಿಚಯ ಮಲ್ತೆರ್ .ದಿನೇಶ್ ಕೆ.ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ವಿಮಲಪ್ರಭು ಸೊಲ್ಮೆ ಸಂದಾಯೆರ್.

ಪಡುಪಣಂಬೂರು ಧರ್ಮದೈವ ಶ್ರೀ ಜಾರಂದಾಯ ದೈವೊಲ್ಯಡ್ ಬ್ರಹ್ಮಕಲಶಾಭಿಷೇಕ

ಮುಲ್ಕಿ: ಪಡುಪಣಂಬೂರು ಧರ್ಮದೈವ ಶ್ರೀ ಜಾರಂದಾಯ ದೈವೊಲ್ಯಡ್ ವೆ.ಮೂ.ಶಿಬರೂರು ವೇದವ್ಯಾಸ ತಂತ್ರಿಲೆನ ಮುತಾಲಿಕೆಡ್ ಬ್ರಹ್ಮಕಲಶಾಭಿಷೇಕ ನಡತ್ಂಡ್.

ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಗಣಹೋಮ, ಕಲಶ ಹೋಮ, ಮಹಿಷಂದಾಯ ಪ್ರತಿಷ್ಠೆ ಕಲಶಾಭಿಷೇಕ, ಜಾರಂದಾಯಗ್ 108 ಕಲಶಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಪ್ರಸಾದ ವಿತರಣೆ, ಭಂಡಾರ ಜಪ್ಪುನ ಲೇಸ್ ಆದ್ ಅನ್ನ ಪ್ರಸಾದ ಸೇವೆ ನಡತ್ಂಡ್.

ಫೆ.4: ಐರೋಲಿದ ಐತಮಜಲ್ ಶ್ರೀಮತಿ ಜಯಂತಿ ಹೆಗ್ಡೆ ಮೆಮೋರಿಯಲ್ ಹಾಲ್ ಡ್ ಗಣಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ

ಬೊಂಬೈ ಹೆಗ್ಗಡೆ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಗಣಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ವಾರ್ಷಿಕೋಚ್ಚಯ ಲೇಸ್, ಅಮರವೀರ ಬೂಕು ಬುಡುಗಡೆ, ಸನ್ಮಾನ ಬೊಕ್ಕ ಸಾಂಸ್ಕೃತಿಕ ಲೇಸ್ ಫೆ.4 ಐತಾರ ನವಿಬೊಂಬೈ ಐರೋಲಿದ ಐತಮಜಲ್ ಶ್ರೀಮತಿ ಜಯಂತಿ ಹೆಗ್ಡೆ ಮೆಮೋರಿಯಲ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಸಮಾಜ ಸೇವೆರ್ದ್ ಜೀವನ ಸಾರ್ಥಕ: ಡಾ.ಹರಿಕೃಷ್ಣ ಪುನರೂರು

ಮುಲ್ಕಿ: ಸಮಾಜ ಸೇವೆರ್ದ್ ನಮ್ಮ ಜೀವನ ಎಚ್ಚ ಅರ್ಥಪೂರ್ಣ ಆದಿಪ್ಪುಂಡು ಪಂದ್ ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಪಂಡೆರ್.

ಮೇರ್ ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಸಭಾಂಗಣಡ್ ಪುನರೂರು ಪ್ರತಿಷ್ಠಾನದ ಅಂಗ ಸಂಸ್ಥೆ ಆಯಿನ ಜನವಿಕಾಶ ಸಮಿತಿದ ಪದಗ್ರಹಣ ಲೇಸ್ ಡ್ ಪಾತೆರಿಯೆರ್.

ಜನವಿಕಾಸ ಸಮಿತಿದ ಪೊಸ ಗುರ್ಕಾರೆ ಶಶಿಕರ ಕೆರೆಕಾಡು, ಪ್ರಧಾನ ಕಾರ್ಯದರ್ಶಿ ಗೀತಾ ಶೆಟ್ಟಿ ಮೆರೆಗ್ ಅಧಿಕಾರ ಕೊರಿಯೆರ್. ಪುನರೂರು ಪ್ರತಿಷ್ಠಾನದ ಗುರ್ಕಾರೆ ದೇವಪ್ರಸಾದ್ ಪುನರೂರು ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಈ ಪೊರ್ತುಡು ದೇವಲ್ಯದ ಅರ್ಚಕೆರ್ ಶಶಾಂಕ್ ಮುಚ್ಚಿಂತ್ತಾಯ, ಜನವಿಕಾಸ ಸಮಿತಿದ ಒತ್ತು ಗುರ್ಕಾರ್ದಿ ಅಕ್ಷತಾ ಶೆಟ್ಟಿ, ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಜೀವನ್ ಶೆಟ್ಟಿ, ಶೋಭಾ ರಾವ್, ದಾಮೋದರ ಶೆಟ್ಟಿ ಕೊಡೆತ್ತೂರು, ಪ್ರಾಣೇಶ್ ಭಟ್ ದೇಂದಡ್ಕ, ಜಿತೇಂದ್ರ ವಿ ರಾವ್ ಪೆಜಮಾಡಿ ಪಾಲ್ ಪಡೆದಿತ್ತೆರ್.

ಅಯೋಧ್ಯೆಡ್ ಬಾಲರಾಮನ ದರ್ಶನ ಪಡೆಯಿನ ಮುಸ್ಲಿಂ ಭಕ್ತೆರ್

ಅಯೋಧ್ಯೆ: ಬಾಲರಾಮನ ದರ್ಶನಗ್ ಜನಕ್ಲೆನ ರಾಶಿನೇ ಬರೊಂದು ಉಂಡು.

ಜಾತಿ, ಧರ್ಮದ ಭೇದ ಇಜ್ಜಂದೆ ಮಾತೆರ್ಲಾ ಭಗವಾನ್ ರಾಮನ ಭಕ್ತಿಡ್ ಇತ್ತ್ ದ್ ಅಯೋಧ್ಯೆ ಬತ್ತ್ ದ್ ಜೈ ಶ್ರೀ ರಾಮ್ ಪಂದ್ ಪನೊಂದು ಉಲ್ಲೆರ್.

ಇಡೇಗ್ ಹಿಂದೂಲೆರ್ದ್ ಪತ್ತಿನ ಮುಸ್ಲಿಂ ಮುಟ್ಟ ಮಾತೆರ್ಲಾ ರಾಮನ ಭಕ್ತಿಡ್ ಮಗ್ನರಾತೆರ್. ಅತ್ತಂದೆ ಲಕ್ಷರ್ದ್ ಎಚ್ಚ ಮುಸ್ಲಿಂ ಭಕ್ತೆರ್ ಅಯೋಧ್ಯೆ ರಾಮಲಲ್ಲಾನ ದರ್ಶನ ಮಲ್ತೊಂದು ಉಲ್ಲೆರ್.

ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿನ ಕಾರ್ ದ ಮಿತ್ತ್ ದಾಳಿ

ಪಶ್ಚಿಮ ಬಂಗಾಳದ ಮಾಲ್ಡಾಡ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮೆರೆನ ಕಾರ್ ದ ಮಿತ್ತ್ ಕಿಡಿಕೇಡಿಲು ದಾಳಿ ನಡಪಾದೆರ್.

ನೆರ್ದ್ ಮೆರೆನ ಕಾರ್ ದ ಗ್ಲಾಸ್ ಪೊಡಿ ಪೊಡಿ ಆತ್ಂಡ್. ಆಂಡ ರಾಹುಲ್ ಗಾಂಧಿ ದಾಳಿರ್ದ್ ಸುರಕ್ಷಿತವಾದ್ ಪಾರಾತೆರ್.

ಫೆ.4: ನಾಲಾಸೋಪಾರ ಗ್ಯಾಲಕ್ಸಿ ಹಾಲ್ ಡ್ ಪದಗ್ರಹಣ ಲೇಸ್

ಬೊಂಬೈ ಬಂಟರ ಸಂಘ ಬೊಕ್ಕ ವಸಾಯಿ ಡಹಣು ಪ್ರಾದೇಶಿಕ ಸಮಿತಿದ ಒಟ್ಟುಸೇರಿಗೆಡ್ ಪದಗ್ರಹಣ ಲೇಸ್ ಫೆ.4 ಐತಾರ ನಾಲಾಸೋಪಾರ ಗ್ಯಾಲಕ್ಸಿ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಂಟರ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ ಒಯಿಸೊನ್ವೆರ್. ಈ ಲೇಸ್ ಫೆಡರೇಶನ್ ಆಫ್ ವರ್ಲ್ಡ್ ಬಂಟ್ಸ್ ಅಸೋಸಿಯೇಷನ್ಸ್ ದ ಗುರ್ಕಾರೆ ಐಕಳ ಹರೀಶ್ ಶೆಟ್ರೆನ ಉಪಸ್ಥಿತಿಡ್ ನಡಪುಂಡು.‌ ಅಂಚೆನೆ ವಸಾಯಿ ಡಹಣು ಪ್ರಾದೇಶಿಕ ಸಮಿತಿದ ಗುರ್ಕಾರೆ ಮಂಜುನಾಥ್ ಎನ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬೊಂಬೈ ಬಂಟರ ಸಂಘ ಬೊಕ್ಕ ವಸಾಯಿ ಡಹಣು ಪ್ರಾದೇಶಿಕ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕಿದಿಯೂರು ನಾಗಮಂಡಲ ಉಚ್ಚಯದ ಲೆಕ್ಕೊಡು ಗಂಗರಾತಿ

ಒಡಿಪು: ಕಿದಿಯೂರು ನಾಗಮಂಡಲ ಉಚ್ಚಯದ ಲೆಕ್ಕೊಡು ಪವಿತ್ರ ಗಂಗಾರತಿ ನಡತ್ಂಡ್.

ಕಿದಿಯೂರು ನಾಗನ ಸನ್ನಿಧಾನಡ್ ವಾರಣಾಸಿರ್ದ್ ಬತ್ತಿನ ಅರ್ಚಕೆರ್ ಶಾಸ್ತ್ರೋತ್ರವಾದ್ ಆರತಿನ್ ಮಲ್ತೆರ್. ಸುರುಟ್ಟ್ ನಾಗದೇವೆರೆಗ್ ಇಸೇಸ ಧೂಪಸೇವೆ ನಡಪಾದ್, ಬೊಕ್ಕ ಗಂಗೆನ ತಟಡ್ ನಡಪುನ ಮಾದರಿದ ಆರತಿನ್ ನಾಗದೇವೆರೆನ ಸನ್ನಿಧಾನದ ಎದುರುಡು ಮಲ್ತೆರ್.

ನಾಗ ದೇವೆರೆನ ಸನ್ನಿಧಾನಡ್ ಇಸೇಸವಾದ್ ರಚನೆ ಮಲ್ತಿನ ಬೇತೆ ಬೇತೆ ವೇದಿಕೆಡ್ ವಾರಾಣಾಸಿರ್ದ್ ಬತ್ತಿನ ಅರ್ಚಕ ವೃಂದದಕುಲು ಆರತಿ ಬೆಳಗಾಯೆರೆ ವ್ಯವಸ್ಥೆ ಮಲ್ತೆರ್. ಆಕರ್ಷ, ಸಾಮೂಹಿಕ ಗಂಗಾರತಿನ್ ಸಾರರ್ದ್ ಎಚ್ಚ ಜನ ಕಣ್ಣ್ ದೀಂಜಾಯೆರ್. ಜನವರಿ 26 ರ್ದ್ ವಿದ್ವಾಂಸೆರ್ ಕಬಿಯಾಡಿ ಜಯರಾಮ ಆಚಾರ್ಯ ಮುತಾಲಿಕೆಡ್ ಬೇತೆ ಬೇತೆ ಧಾರ್ಮಿಕ ಲೇಸ್ ಲು ನಡತೊಂದು ಉಂಡು. ಭುವನೇಂದ್ರ ಕಿದಿಯೂರು ಕುಟುಂಬ ಸಂಪೂರ್ಣ ಸೇವೆ ಮಲ್ಪವೊಂದು ಉಲ್ಲೆರ್. ಸ್ವಾಗತ ಸಮಿತಿ, ಸಾರ್ವಜನಿಕೆರೆನ ಸಹಕಾರರ್ದ್ ಇನಿ ಅಷ್ಟಪವಿತ್ರ ನಾಗಮಂಡಲ ನಡಪರೆ ಉಂಡು.

ಪಾಕಿಸ್ತಾನದ ಮಾಜಿ ಪ್ರಧಾನಿಗ್ 10 ವರ್ಷ ಜೈಲ್

ದೇಶದ ಗೌಪ್ಯತೆನ್ ಲೀಕ್ ಮಲ್ತಿನ ಕೇಸ್ ಡ್ ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಗ್ ನ್ಯಾಯಾಲಯವೊಂಜಿ 10 ವರ್ಷ ಜೈಲ್ ಶಿಕ್ಷೆನ್ ಕೊರ್ತುಂಡು.

ಈ ಬಗೆಟ್ಟ್ ಪಾಕಿಸ್ತಾನದ ಇಸ್ಲಾಮಾಬಾದ್ ಡ್ ಇಪ್ಪುನ ಇಸೇಸ ನ್ಯಾಯಾಲಯ ವಿಚಾರಣೆ ನಡಪಾಯಿನ ಬೊಕ್ಕ ಮಾಜಿ ಪ್ರಧಾನಿ ಬೊಕ್ಕ ಆರೆನ ನಿಕಟವರ್ತಿ ಆಯಿನ ಮಾಜಿ ಸಚಿವೆರ್ ಮೆಹಮೂದ್ ಖುರೇಸಿಗ್ 10 ವರ್ಷ ಜೈಲ್ ಶಿಕ್ಷೆ ಕೊರಿಯೆರೆ ಆದೇಶ ಕೊರ್ತುಂಡು.