2024

ಮಾ.16: ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ 23ನೇ ವಾರ್ಷಿಕ ಉಚ್ಚಯ, ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ

ಕುಡ್ಲದ ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ (ರಿ.) ದ 23ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಮಾ.16 ಸನಿಯಾರ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ “ಕಥೆ ಎಡ್ಡೆಂಡು” ತುಳು ಹಾಸ್ಯಮಯ ನಾಟಕ ನಡಪರೆ ಉಂಡು.

ಬಯ್ಯಗ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಹಾಪೂಜೆ ಆದ್ ಪ್ರಸಾದ ವಿತರಣೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಅಂಚೆನೆ ರಾತ್ರೆ ನಡಪುನ ಧರ್ಮಸಭೆಟ್ಟ್ ಶಾಸಕೆರ್ ಡಿ. ವೇದವ್ಯಾಸ್ ಕಾಮತ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯರೆ ಉಲ್ಲೆರ್. ಬೊಕ್ಕ ಶಾರದಾ ಆಟ್ಸ್ ಕಲಾವಿದೆರ್ (ರಿ.) ಮಂಜೇಶ್ವರ ಕೂಟದಕ್ಲೆರ್ದ್ “ಕಥೆ ಎಡ್ಡೆಂಡು” ತುಳು ಹಾಸ್ಯಮಯ ನಾಟಕ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ ದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಮಾ.10: ಬಿಲ್ಲವರ ಮಹಾ ಮಂಡಲದ ಬೊಳ್ಳಿ ಪರ್ಬ

ಸಮಾವೇಶೊಗು 50 ಸಾರ ಜನ ಸೇರುನ ನಿರೀಕ್ಷೆ: ಡಾ|ರಾಜಶೇಖರ ಕೋಟ್ಯಾನ್

ಮುಲ್ಕಿ: ದೇಶ ವಿದೇಶಡ್ ಸಕ್ರಿಯವಾದುಪ್ಪುನ 275 ಬಿಲ್ಲವ ಸಂಘಟನೆಲೆನ ಸಂಸ್ಥೆ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲ(ರಿ) ಮುಲ್ಕಿ ನೆತ್ತ ಬೊಳ್ಳಿ ಪರ್ಬದ ಲೇಸ್ ಮಾ.10 ಕ್ಕ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಕೈತಲ್ದ ಭವಾನಿ ಶಂಕರ ಕಾಂಪೌಂಡ್ ಡ್ ನಡಪರೆ ಇತ್ತ್ ದ್ ದೇಶ ವಿದೇಶೊರ್ದು ಸುಮಾರ್ 50 ಸಾರ ಮುಟ್ಟ ಸಮಾಜ ಬಾಂಧವೆರ್ ಪಾಲ್ ಪಡೆಪಿನ ನಿರೀಕ್ಷೆ ಉಂಡು ಪಂದ್ ಮಹಾ ಮಂಡಲದ ಅಧ್ಯಕ್ಷೆರ್ ಡಾ|ರಾಜಶೇಖರ ಕೋಟ್ಯಾನ್ ತೆರಿಪಾಯೆರ್.

ಆರ್ ಮುಲ್ಕಿಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ದ್, ಮಾ.10 ಕ್ಕ್ 9 ಗಂಟೆಗ್ ಲೇಸ್ ನ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಉದಿಪನ ಮಲ್ಪರೆ ಉಲ್ಲೆರ್. ಸೋಲೂರು ಮಠ ಆರ್ಯ ಈಡಿಗ ಸಂಸ್ಥಾನದ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಕನ್ಯಾಡಿ ಶ್ರಿರಾಮ ಕ್ಷೇತ್ರದ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ, ಶಿವಗಿರಿ ಮಠತ್ತ ಶ್ರೀ ಸತ್ಯಾನಂದತೀರ್ಥ ಸ್ವಾಮೀಜಿ ಮೊಕುಲು ಆಶೀರ್ವಚನ ಮಲ್ಪರೆ ಉಲ್ಲೆರ್ ಪಂದ್ ತೆರಿಪಾಯೆರ್.

ಬೊಳ್ಳಿ ಪರ್ಬದ ಈ ಒಂಜಿ ಲೇಸ್ ಸಮಾಜದ ಬೇಡಿಕೆಲೆನ್ ಈಡೇರಿಸಾವರೆ ಶಕ್ತಿ ತೋಜಾವುನ ಸಮಾವೇಶ ಆವರೆ ಉಂಡು. ಬಿಲ್ಲವೆರೆಗ್ ಪ್ರತ್ಯೇಕ ನಿಗಮ, ಮಾತ ಪಕ್ಷೊಡುಲ ರಾಜಕೀಯ ಪ್ರಾತಿನಿಧ್ಯ, ಮೀಸಲಾತಿ, ಸರಕಾರಿ ಅನುದಾನ ಇಂಚಿನ ಮಾತ ಸವಲತ್ತುಲೆನ್ ಸರಕಾರ ಒದಗಾದ್ ಕೊರ್ಪಿನ ನಿಲೆಟ್ಟ್ ಈ ಸಮಾವೇಶ ಮಲ್ಲ ಮಟ್ಟ್ ದ ಹಕ್ಕೊತ್ತಾಯ ಸಮಾವೇಶ ಆದ್ ತೋಜಿದ್ ಬರಿಯರೆ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ದೇಶದ ಬೊಕ್ಕ ಪಿದಯಿ ಊರುದ ಬಿಲ್ಲವ ಸಂಘಟನೆಲೆಗ್ “ಬಿಲ್ಲವ ಸಂಘಟನಾ ರತ್ನ” ಪ್ರಶಸ್ತಿ ಅಂಚೆನೆ ಸಮಾಜದ ಪುಗರ್ತೆದ ಕಲಾವಿದೆರಾಯಿನ ಸುಮನ್ ತಲ್ವಾರ್, ಜಯಮಾಲಾ, ನವೀನ್ ಡಿ. ಮೊಕ್ಲೆಗ್ “ಬಿಲ್ಲವ ಕಲಾ ಸಾಮ್ರಾಟ” ಪ್ರಶಸ್ತಿ ಅವ್ವತ್ತಾಂದೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬನ್ನಂಜೆ ಬಾಬು ಅಮೀನ್, ದಿನೇಶ್ ಅಮೀನ್ ಮಟ್ಟು, ಜಯರಾಮ್ ಬನಾನ್, ರಾಜ್ ಕುಮಾರ್ ಬೆಹರಿನ್, ಯುವವಾಹಿನಿ ಮೊಕ್ಲೆಗ್ ಗೌರವ ಸನ್ಮಾನ ನಡಪರೆ ಉಂಡು.ಅಂಚೆನೆ ರಜತ ವಿಶ್ವವಾಣಿ ಜಯ ಸಿರಿ ಬುಡುಗಡೆ, ಸ್ಥಾಪಕ ಸದಸ್ಯೆರೆಗ್ ಅಭಿನಂದನೆ, ಪ್ರತಿಭಾವಂತ ವಿದ್ಯಾರ್ಥಿಲೆಗ್ ವಿದ್ಯಾರ್ಥಿವೇತನ, ವಿಶೇಷಚೇತನ ಜೋಕ್ಲೆನ ಅಭಿವೃದ್ಧಿ ಸಂಸ್ಥೆಲೆಗ್ ಪನವುದ ಸಕಾಯ ಕೊರ್ಪಿನ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.

ಈ ಲೇಸ್ ಡ್ ರಾಜ್ಯದ ಸಚಿವೆರ್, ಮಾಜಿ ಸಚಿವೆರ್, ಶಾಸಕೆರ್ ಪಾಲ್ ಪಡೆಯರೆ ಉಲ್ಲೆರ್. ಒಟ್ಟಾರೆ ಉಂದೊಂಜಿ ಬಿಲ್ಲವ ಸಮುದಾಯದ ಮಹಾ ಸಮ್ಮೇಳನ ಆವರೆ ಉಂಡು ಪಂದ್ ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಉಪಾಧ್ಯಕ್ಷೆರ್ ಹರೀಶ್ ಡಿ.ಸಾಲ್ಯಾನ್, ಗೌ.ಪ್ರ.ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾಯಿರು,ಜತೆ ಕಾರ್ಯದರ್ಶಿಲು ಗಣೇಶ್ ಪೂಜಾರಿ ಮೂಡುಪೆರಾರ, ಶಿವಾಜಿ ಸುವರ್ಣ ಬೆಳ್ಳೆ, ಕೋಶಾಧಿಕಾರಿ ಪ್ರಭಾಕರ ಬಂಗೇರ ಕಾರ್ಕಳ, ಸಹ ಕೋಶಾಧಿಕಾರಿ ಗಣೇಶ್ ಎಲ್. ಪೂಜಾರಿ ಬೈಂದೂರು, ಬಿ.ಬಿ.ಪೂಜಾರಿ, ಸುರೇಶ್ ಪೂಜಾರಿ ಕುಳಾಯಿ, ತಿಮ್ಮಪ್ಪ ಪೂಜಾರಿ ಕಟೀಲು ಇತ್ತೆರ್.

ದುಬೈ ತುಳು ಪಾತೆರ್ಗ ತುಳು ಒರಿಪಾಗ ನೆತ್ತ 11ನೇ ವರ್ಷದ ಗೌಜಿ ಗಮ್ಮತ್ತ್ ತುಳುನಾಡ ಗೊಬ್ಬುದ ಲೇಸ್

ದುಬೈ ತುಳು ಪಾತೆರ್ಗ ತುಳು ಒರಿಪಾಗ ನೆತ್ತ 11ನೇ ವರ್ಷದ ಗೌಜಿ ಗಮ್ಮತ್ತ್ ತುಳುನಾಡ ಗೊಬ್ಬುದ ಲೇಸ್ ಮಾ.3 ಐತಾರ ದುಬೈದ ಝಬೀಲ್ ಪಾರ್ಕ್ ಡ್ ಗೌಜಿಡ್ ನಡತ್ಂಡ್.

ತುಳುನಾಡ್ ದ ಸಂಪ್ರದಾಯದಂಚೆನೆ ಪಾಲ್ ಪಡೆಯೆರೆ ಬತ್ತಿನ ಮಾತ ತುಳುವೆರೆಗ್ ಬೆಲ್ಲ ನೀರ್ ಬೊಕ್ಕ ಬಚ್ಚಿರೆ ಪೂಲು ಕೊರ್ಪುನ ಮುಕೇನ ಎದ್ಕೊನಿಯೆರ್.

ಕುಮಾರಿ ಪ್ರಿಶಾ, ಕುಮಾರಿ ಶಾರ್ವಿ, ಮಾಸ್ಟರ್ ಸುಹನ್ ಮೊಕುಲು ದೇವೆರೆನ ಪ್ರಾರ್ತನೆದೊಟ್ಟಿಗೆ ದುಬೈದ ತುಳು ಕನ್ನಡ ಸಂಘಟನೆದ ಹಿರಿಯೆರ್ ಸರ್ವೋತ್ತಮ ಶೆಟ್ಟಿ, ಸಂಸ್ಥೆದ ಹಿರಿಯ ಸದಸ್ಯೆರ್ ಅಜ್ಮಲ್ ದುಬೈ, ನೊವೆಲ್ ಅಲ್ಮೆಡ ಮೊಕುಲು ತುಳುವಪ್ಪೆನ ಭಾವಚಿತ್ರಗ್ ಪುಷ್ಪಾರ್ಚನೆ ಮಲ್ಪುನ ಮುಕೇನ ಲೇಸ್ ದ ಉದಿಪನ ಮಲ್ತ್ ದ್ ಕೂಟಗ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ತುಳುನಾಡ ಸುಗಿಪುನ್ ಪಂಡೆರ್.

ಊರುರ್ದ್ ಬತ್ತಿನ ಹಿರಿಯೆರ್ ಸುಶೀಲ ಸಂಜೀವ ಪೂಜಾರಿ ಬೊಕ್ಕ ಸುಲೋಚನಾ ಜಯ ಅಮಿನ್ ಮೊಕುಲು ಭೂಲೋಕದ ಕಲ್ಪವೃಕ್ಷ ತಾರೆದ ದೈ ನಡ್ಪುನ ಮುಕೇನ ತುಳುನಾಡ್ ದ ಗೊಬ್ಬುಗು ಚಾಲನೆ ಕೊರಿಯೆರ್.

ಮಧ್ಯಾಹ್ನ ನಡತಿನ ಸಭಾ ಲೇಸ್ ಡ್ ಮಲ್ಲ ಬಿನ್ನೆರಾಯಿನ ಹರೀಶ್ ಬಂಗೇರ, ಡೋನಿ ಕೊರೆಯ, ಜಯಂತ್ ಶೆಟ್ಟಿ, ಮನೋಹರ್ ಹೆಗಡೆ, ಶೋಧನ್ ಪ್ರಸಾದ್, ಸುದರ್ಶನ್ ಹೆಗಡೆ, ಸತೀಶ್ ಪೂಜಾರಿ, ಜೋಸೆಫ್ ಮಥಾಯಿಸ್ ಬೊಕ್ಕ ಸಂಸ್ಥೆದ ಹಿರಿಯ ಸದಸ್ಯೆರ್ ಸತೀಶ್ ಉಳ್ಳಾಲ್, ಸಂದೀಪ್ ಕೊಟ್ಯಾನ್, ಗುರ್ಕಾರೆ ಪ್ರೇಮ್ ಜೀತ್ ಮೇರ್ ಪಾಲ್ ಪಡೆದಿತ್ತೆರ್.

ದುಬೈದ ಹಿರಿಯೆರ್, ಸಮಾಜ ಸೇವಕೆರ್ ಮಾಧವ ಪೆಜಮಾಡಿ ಕೋಡಿ ಮೆರೆಗ್ ಸನ್ಮಾನ ಮಲ್ತ್ ದ್ “ಅಪ್ಪೆ ಭಾಷೆ ತುಳುವ ತುಡರ್” ಪನ್ಪುನ ಬಿರ್ದ್ ನ್ ಕೊರ್ದು ಮಾನಾದಿಗೆ ಮಲ್ತೆರ್. ದುಬೈದ ತುಳು ಕನ್ನಡ ಸಂಘಟನೆಡ್ ಉತ್ತಮ ಕಾರ್ಯಕರ್ತೆರಾದ್ ಸೇವೆ ಸಂದಾಯಿನ ಶಮೀರ್ ಬೋಳಾರ, ತುಳು ಯೂಟ್ಯೂಬ್ ಚಾನಲ್ ಮುಕೇನ ತುಳುನಾಡ ಸಂಸ್ಕೃತಿನ್ ಪಸೆರುನ ಸವಿತಾ ಸಂದೀಪ್ ದೇವಾಡಿಗ ಬೊಕ್ಕ ಬಾಕ್ಸಿಂಗ್ ಕ್ರೀಡಾಪಟು ಸಚಿನ್ ಪೂಜಾರಿ, ಸಮಾಜ ಸೇವಕೆರ್ ಮಾಧವ ಪೂಜಾರಿ ಮೊಕ್ಲೆಗ್ ಶಾಲ್ ಪೊದೆಪಾದ್ ನೆಂಪುದ ಕಾಣಿಕೆ ಕೊರ್ದು ಸನ್ಮಾನ ಮಲ್ತೆರ್.

ಲೇಸ್ ಡ್ ಊರುದ ಅಶಕ್ತ ಎಲ್ಯ ಬಾಲೆದ ವೈದ್ಯಕೀಯ ಕರ್ಚ್ ಗಾದ್ ಸಹಾಯ ನಿಧಿನ್ ಸಮರ್ಪಣೆ ಮಲ್ತೆರ್. ದುಬೈದ ತುಳುವೆರೆನ್ ಬೆದ್ರ, ಕಾರ್ಲ, ಕಾಸ್ರೋಡು, ಬಾರಕೂರ್ ಪನ್ಪುನ ಪುದರ್ ದ ನಾಲ್ ಕೂಟ ರಚನೆ ಮಲ್ತ್ ದ್ ತುಳುನಾಡ್ ದ ಗೊಬ್ಬುಲಾಯಿನ ಕಬಡ್ಡಿ, ಲಗೋರಿ, ಬಲ್ಲ್ ಒಯಿಪುನ, ಕಾಕಜಿದ ಗೊಬ್ಬು, ಸೈಕಲ್ ಚಕ್ರ ಗಿಡಪುನೇ, ತುಳು ಸಂಸ್ಕೃತಿದ ರಸಪ್ರೆಶ್ನೆ, ಕಂಗ್ ದ ಪಾಲೆಡ್ ಒಯಿಪುನ ಗೊಬ್ಬು, ಮಡಲ್ ಮುಡೆಪುನ ಪಂತೊ ಇಸೇಸವಾದ್ ಪೊಂಜೋವುಲೆಗ್ ಬೊಕ್ಕ ಜೋಕ್ಲೆಗ್ ಬೇತೆ ಬೇತೆ ತರಹದ ಗೊಬ್ಬುಲೆನ್ ಆಯೋಜನೆ ಮಲ್ದೆರ್.

ಮಧ್ಯಾಹ್ನ ಕಜೆ ಅರಿತ್ತ ಗಂಜಿ, ಕುಡುತ್ತ ಚಟ್ನಿ, ಕಡ್ಲೆ ಬಲ್ಲ್ಯಾರ್, ನುಂಗೆಲ್ ನಂಗ್ ಫ್ರೈ, ಕಾಯಿ ಕುಕ್ಕುದ ತಲ್ಲಿ ಬೊಕ್ಕ ಕಡ್ಲೆ ಸಲಾಯಿದ ಪಾಯಸನ್ ಊರುರ್ದ್ ಕನಪಾಯಿನ ಪಾಲೆದ ಬಟ್ಟಲ್ ಡ್ ವನಸ್ ದ ವ್ಯವಸ್ಥೆ ಮಲ್ತ್ ದಿತ್ತೆರ್.

ಬೊಕ್ಕ ಗೆಂದಿನ ಕೂಟಲೆಗ್ ಪ್ರಶಸ್ತಿ ಪತ್ರ, ಪದಕ ಕೊರ್ದು ಮಾನಾದಿಗೆ ಮಲ್ತೆರ್. ಲೇಸ್ ಗ್ ಸಹಕಾರ ಕೊರ್ನ ದಾನಿಲೆಗ್ ನೆಂಪುದ ಕಾಣಿಕೆ ಕೊರ್ದು ಅಭಿನಂದನೆ ಸಂದಾಯೆರ್. ನೊವೆಲ್ ಅಲ್ಮೇಡಾ ಬೊಕ್ಕ ಅಮರ್ ನಂತೂರ್, ಶೋಭಿತ ಪ್ರೇಮ್ ಜೀತ್, ಜಯ ಪ್ರೇಮಾನಂದ್, ಲಕ್ಷ್ಮೀ ಪೂಜಾರಿ, ಅಶ್ವಿನಿ ಸತೀಶ್, ಲಿಖಿತ ದೀಪಕ್, ಶ್ವೇತಾ
ಸಂದೀಪ್ ಗೊಬ್ಬುದ ನಿರ್ವಹಣೆ ಮಲ್ತೆರ್.

500 ರ್ದ್ ಎಚ್ಚ ದುಬೈದ ಬಂಧು ಬಾಂಧವೆರ್ ಈ ಲೇಸ್ ಡ್ ಪಾಲ್ ಪಡೆದ್ ಕುಸಿ ಪಡೆಯೆರ್. ಸಂಸ್ಥೆದ ಕಾರ್ಯದರ್ಶಿ ರೀತು ಅಂಚನ್ ಕುಲಶೇಖರ ಎದ್ಕೊಂದು ಸಂಸ್ಥೆದ ಸಾಧನೆನ್ ತೆರಿಪಾದ್, ಲೇಸ್ ನ್ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್. ತುಳು ಪಾತೆರ್ ಗ ತುಳು ಒರಿಪಾಗದ ಗುರ್ಕಾರೆ, ಸರ್ವಸದಸ್ಯೆರೆನ ಪಾಲ್ವಿಕೆ ಬೊಕ್ಕ ಸಂಪೂರ್ಣ ಸಹಕಾರಡ್ ಲೇಸ್ ಯಶಸ್ವಿಯಾದ್ ಮುಗಿತಲ ಆಂಡ್.

ಉಜಿರೆದ ಲಾಡ್ಜ್ ಗ್ ಪೊಲೀಸ್ ರೈಡ್: ಮೂಜಿ ಜನ ಅರೆಸ್ಟ್

ಉಜಿರೆ: ಉಜಿರೆದ ಹಳೇಪೇಟೆ ಕೈತಲ್ದ ಲಾಡ್ಜ್ ಒಂಜೇಟ್ ವೇಶ್ಯಾವಾಟಿಕೆ‌ ನಡತೊಂದು ಇಪ್ಪುನ ಬಗೆಟ್ಟ್ ಪೊಲಬು ತೆರಿದ್ ಬೊಲ್ತೇರ್ ಪೊಲೀಸೆರ್ ರೈಡ್ ಮಲ್ತ್ ದ್ ಮೂಜಿ ಜನ ಆರೋಪಿಲೆನ್ ಅರೆಸ್ಟ್ ಮಲ್ತಿನ ಘಟನೆ ಮಾ.6 ಕ್ಕ್ ನಡತ್ಂಡ್.

ಬೊಲ್ತೇರ್ ಪೊಲೀಸ್ ಠಾಣೆದ ಪೊಲೀಸ್ ನಿರೀಕ್ಷಕೆರ್ ಬಿ.ಜಿ. ಸುಬ್ಬಾಪೂರ ಮಠ್ ಮೇರ್ ಠಾಣೆದ ಸಿಬಂದಿಲೆನೊಟ್ಟಿಗೆ ಜಾಗೆಗ್ ಬತ್ತ್ ದ್ ಆರೋಪಿಲಾಯಿನ ರೇಣುಕಾ ಪ್ರಸಾದ್ ಅರಳೇ ಪೇಟೆ, ತುಮಕೂರು ರಾಜೇಶ್ ಮೋಹನ್ ನಾಯರ್ ನಿಟ್ಟೆ ಕಾರ್ಲ, ನಿತಿನ್ ಕುಮಾರ್, ನೂರಾಲ್ ಬೆಟ್ಟು ಕಾರ್ಲ ಮೊಕ್ಲೆನ್ ಅರೆಸ್ಟ್ ಮಲ್ದೆರ್.

ಈ ಕೇಸ್ ದ ಜಾಗೆಡ್ ಇತ್ತಿನ ಪೊಂಜೋವುನ್ ಮಹಿಳಾ ಸಿಬ್ಬಂದಿಲೆನ ಭದ್ರತೆಗ್ ಕೊರ್ತೆರ್. ಆರೋಪಿಲೆನ ಮಿತ್ತ್ ಬೊಲ್ತೇರ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಮಾ.16: ಮಹಾರಾಷ್ಟ್ರ ಕನ್ನಡಿಗ ಕಲಾವಿದರ ಪರಿಷತ್ತ್ ಡ್ 15ನೇ ವರ್ಷದ ಸಾಂಸ್ಕೃತಿಕ ಕಲಾ ಉಚ್ಚಯ

ಮಹಾರಾಷ್ಟ್ರ ಕನ್ನಡಿಗ ಕಲಾವಿದರ ಪರಿಷತ್ತ್ ಬೊಕ್ಕ ಬೆಂಗ್ಲೂರು ಕನ್ನಡ ಸಂಸ್ಕೃತಿ ಇಲಾಖೆದ ಒಟ್ಟುಸೇರಿಗೆಡ್ 15ನೇ ವರ್ಷದ ಸಾಂಸ್ಕೃತಿಕ ಕಲಾ ಉಚ್ಚಯ ಮಾ.16 ಸನಿಯಾರ ಬೊಂಬೈದ ಕುರ್ಲಾ ಪೂರ್ವ ಬಂಟರ ಸಂಘದ ಶ್ರೀಮತಿ ರಾಧಾಬಾಯಿ ಟಿ. ಭಂಡಾರಿ ಆಡಿಟೋರಿಯಮ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಗುರ್ಕಾರೆ ಡಾ| ಸುರೇಂದ್ರ ಕುಮಾರ್ ಹೆಗ್ಡೆ, ಉಪಸಮಿತಿದ ಪದುಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಾ.9: ಮೀರಾ ಭಾಯಂಧರ್ ತುಳು ಕನ್ನಡ ವೆಲ್ ಫೇರ್ ಅಸೋಸಿಯೇಶನ್ ದ ಮುತಾಲಿಕೆಡ್ ವಿಶ್ವ ಮಹಿಳಾ ದಿನಾಚರಣೆ

ಮೀರಾ ಭಾಯಂಧರ್ ತುಳು ಕನ್ನಡ ವೆಲ್ ಫೇರ್ ಅಸೋಸಿಯೇಶನ್ ದ ಸಾಹಿತ್ಯ ಬೊಕ್ಕ ಕಲಾ ವಿಭಾಗದ ಮುತಾಲಿಕೆಡ್ ದತ್ತಿನಿಧಿ ಸಂಸ್ಮರಣಾ ಪ್ರಶಸ್ತಿ ಪ್ರದಾನ ಲೇಸ್ ಬೊಕ್ಕ ವಿಶ್ವ ಮಹಿಳಾ ದಿನಾಚರಣೆ ಮಾ.9 ಸನಿಯಾರ ಮೀರಾರೋಡ್ ಪೂನಮ್ ಸಾಗರ್ ಕಾಂಪ್ಲೆಕ್ಸ್ ದ ರಾಧಾಕೃಷ್ಣ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಬೊಂಬೈದ ಪುಗರ್ತೆದ ಪತ್ರಕರ್ತೆರ್ ಅಶೋಕ್ ಸುವರ್ಣ ಮೆರೆಗ್ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು.

ಅಂಚೆನೆ ಆನಿ ಬಯ್ಯಗ್ ಹಳದಿ ಕುಂಕುಮ ಲೇಸ್ ಉದಿಪನ, ಜೋಕ್ಲೆರ್ದ್ ಸಾಂಸ್ಕೃತಿಕ ಲೇಸ್, ಪೊಂಜೋವುಲೆರ್ದ್ ಹರಟೆ, ನೃತ್ಯ ರೂಪಕ ವೈವಿಧ್ಯಮಯ ಲೇಸ್, ದತ್ತಿನಿಧಿ ಸಂಸ್ಮರಣಾ ಪ್ರಶಸ್ತಿ ಕೊರ್ಪಿನ ಲೇಸ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಕಾರ್ಯಕಾರಿ ಸಮಿತಿ, ಮಹಿಳಾ ವಿಭಾಗ, ಸಾಹಿತ್ಯ ಬೊಕ್ಕ ಕಲೆ, ಸಾಂಸ್ಕೃತಿಕ ವಿಭಾಗದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಾ.8: ಬೊಂಬೈ ಬಿಲ್ಲವರ ಅಸೋಸಿಯೇಶನ್‌ ಮಹಿಳಾ ವಿಭಾಗದ ಮುತಾಲಿಕೆಡ್ ಮಹಿಳಾ ದಿನಾಚರಣೆ

ಬೊಂಬೈ ಬಿಲ್ಲವರ ಅಸೋಸಿಯೇಶನ್‌ ಮಹಿಳಾ ವಿಭಾಗದ ಮುತಾಲಿಕೆಡ್ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆನ್ ಮಾ.8 ಸುಕ್ರಾರ ಸಾಂತಾಕ್ರೂಜ್‌ ಬಿಲ್ಲವರ ಭವನಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಬಿಲ್ಲವರ ಅಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಜಿ ಅಮೀನ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ದೇವಾಡಿಗ ಸಂಘದ ಮಹಿಳಾ ವಿಭಾಗದ ಒತ್ತು ಗುರ್ಕಾರ್ದಿ ಪ್ರತಿಭಾ ದೇವಾಡಿಗ, ಜ್ಯೋತಿಷಿ ಭಾರತಿ ಶೆಟ್ಟಿ, ಕಾಲಂಬೋಲಿ ಅಯ್ಯಪ್ಪ ಸ್ವಾಮಿ ಭಕ್ತ ಸಂಸ್ಥೆದ ಮಹಿಳಾ ವಿಭಾಗದ ಗುರ್ಕಾರ್ದಿ ರೇವತಿ ಬಾಬು ಪೂಜಾರಿ, ಸಮಾಜ ಸೇವಕಿ ಮಮತಾ ಚಂದ್ರಶೇಖರ್ ಅಂಚನ್ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಕೈತಲ್ದ ಕಚೇರಿದಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಬಿಲ್ಲವರ ಅಸೋಸಿಯೇಶನ್ ದ ಗೌರವ ಪ್ರಧಾನ ಕಾರ್ಯದರ್ಶಿ ಹರೀಶ್ ಜಿ ಸಾಲ್ಯಾನ್, ಗೌರವ ಪ್ರಧಾನ ಖಜಾಂಚಿ ರಾಜೇಶ್ ಜೆ ಬಂಗೇರ, ಮಹಿಳಾ ವಿಭಾಗದ ಗುರ್ಕಾರ್ದಿ ಶಂಕುತಲಾ ಕೆ ಕೋಟ್ಯಾನ್, ಗೌರವ ಕಾರ್ಯದರ್ಶಿ ಸಬಿತಾ ಜಿ ಪೂಜಾರಿ ಲೆಪ್ಪೋಲೆಡ್ ತೆರಿಪಾದೆರ್.

ಮಾ.8: ದೇವಂದಗುಡ್ಡೆ ಶ್ರೀ ಕ್ಷೇತ್ರ ನೀಲಕಂಠೇಶ್ವರ ಸ್ವಾಮಿ ಸನ್ನಿಧಿಡ್ ಮಹಾಗಣಪತಿ ಹೋಮ, ಫಲಪಂಚಾಮೃತ ಅಭಿಷೇಕ, ಇಸೇಸ ಸರ್ವಾಲಂಕಾರ ಪೂಜೆ

ದೇವಂದಗುಡ್ಡೆ ಶ್ರೀ ಕ್ಷೇತ್ರ ನೀಲಕಂಠೇಶ್ವರ ಸ್ವಾಮಿ ಸನ್ನಿಧಿಡ್ ಮಹಾಶಿವರಾತ್ರಿ ಲೆಕ್ಕೊಡು ಮಾ.8 ಸುಕ್ರಾರ ಮಹಾಗಣಪತಿ ಹೋಮ, ಸಾಮೂಹಿಕ ಪ್ರಾರ್ತನೆ, ಫಲಪಂಚಾಮೃತ ಅಭಿಷೇಕ, ಇಸೇಸ ಸರ್ವಾಲಂಕಾರ ಪೂಜೆ ನಡಪರೆ ಉಂಡು.

ಅಂಚೆನೆ ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಕಲಾಸಾರಥಿ ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ ಗಿರಿಜಾ ಕಲ್ಯಾಣ ಹರಿಕಥೆ, ರಾತ್ರೆ ಫಲಹಾರ ಆದ್ ಭಜನೆ ನಡಪರೆ ಉಂಡು.

ಈ ಲೇಸ್ ಡ್ ಊರುದ ಪರವೂರುದ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ನೇಜಾರ್ ಭಗವತೀ ತೀಯಾ ಸಮಾಜದ ಕಲ್ಪೋಕ್ತ ಪೂಜೆ ಮುಗಿತಲ

ಮಲ್ಪೆ: ಕಲ್ಯಾಣಪುರದ ನೇಜಾರ್ ಭಗವತೀ ತೀಯಾ ಸಮಾಜದ 8ನೇ ವರ್ಷದ ಗಣಪತಿ ಹೋಮ ಬೊಕ್ಕ ಭಗವತೀ ಕಲ್ಪೋಕ್ತ ಪೂಜೆ ಮಾ.3 ಕ್ಕ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಸಂಸ್ಥೆದ ಗುರ್ಕಾರೆ ಪ್ರಶಾಂತ್ ಸಾಲ್ಯಾನ್ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಮಾನಾದಿಗೆದ ಗುರ್ಕಾರೆ ಲಂಭೋದರ ತೋನ್ಸೆ, ಒತ್ತು ಗುರ್ಕಾರೆ ಪದ್ಮನಾಭ ಕೋಟ್ಯಾನ್, ಹಿರಿಯ ಗೌರವ ಸಲಹೆಗಾರೆ ಟಿ. ಭೋಜಪ್ಪ ಸಾಲ್ಯಾನ್, ಎಲ್ ಎಂ ತೋನ್ಸೆ, ರಾಮಪ್ಪ ಮಾಸ್ಟರ್, ಅಣ್ಣಯ್ಯ ಪಾಲನ್, ಸುಂದರ ಸಾಲ್ಯಾನ್, ವಿಶ್ವನಾಥ್ ಪಂದುಬೆಟ್ಟು, ಜಯಪ್ರಕಾಶ್ ಆದಿ ಉಡುಪಿ, ಮಹಿಳಾ ಘಟಕದ ಮಾನಾದಿಗೆದ ಗುರ್ಕಾರೆ ಕಲ್ಯಾಣಿ, ಗುರ್ಕಾರ್ದಿ ಶಕುಂತಲಾ ಟಿ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಸಂಸ್ಥೆದ 3 ಜನ ಗುರಿಕಾರೆರಾಯಿನ ರಾಮಪ್ಪ ಮಾಸ್ಟರ್, ಅಣ್ಣಯ್ಯ ಪಾಲನ್, ಸುಂದರ ಸಾಲ್ಯಾನ್ ಬೊಕ್ಕ ಅರ್ಚಕೆರ್ ಅಶೋಕ್ ಕುಮಾರ್ ಬೊಕ್ಕ ಕಲಾ ಸಾರಥಿ ತೋನ್ಸೆ ಪುಷ್ಕಳ್ ಕುಮಾರ್ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಎಸ್ ಎಸ್ ಎಲ್ ಸಿ ಬೊಕ್ಕ ಪಿಯುಸಿಡ್ ಶೇ. 85 ರ್ದ್ ಎಚ್ಚ ಮಾರ್ಕ್ಸ್ ಪಡೆಯಿನ ಪಡೆದ 8 ಜನ ಕಲ್ಪಾರ್ಥಿಲೆಗ್ ಮಾನಾದಿಗೆ ಮಲ್ತೆರ್. ಕಾರ್ಯದರ್ಶಿ ಮೋಹನ್ ಕಲ್ಯಾಣಪುರ ಮೇರ್ ಲೇಸ್ ದ ನಿರ್ವಹಣೆ ಮಲ್ತೆರ್. ಕೋಶಾಧಿಕಾರಿ ಕೃಷ್ಣ ಕೋಟ್ಯಾನ್ ಸೊಲ್ಮೆ ಸಂದಾಯೆರ್. ಡಾ| ಲಕ್ಷ್ಮೀ ನಿಧಿ ಸಭಾ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಮಾ.9: ರಾಧಾಕೃಷ್ಣ ನಗರ ಶ್ರೀ ಶನೀಶ್ವರ ಚಾಮುಂಡೇಶ್ವರಿ ಮಂದಿರಡ್ 24ನೇ ವರ್ಷದ ಮಹಾಪೂಜೆ, ಚಾಮುಂಡಿ ಗುಳಿಗ ದೈವೊದ ಗಗ್ಗರ ಸೇವೆ

ಬೊಂಬೈ: ರಾಧಾಕೃಷ್ಣ ನಗರ ಶ್ರೀ ಶನೀಶ್ವರ ಚಾಮುಂಡೇಶ್ವರಿ ಮಂದಿರಡ್ ಮಾ.9 ಸನಿಯಾರ 24ನೇ ವರ್ಷದ ಮಹಾಪೂಜೆ ಬೊಕ್ಕ ಚಾಮುಂಡಿ ಗುಳಿಗ ದೈವೊದ ಗಗ್ಗರ ಸೇವೆ ನಡಪರೆ ಉಂಡು.

ಈ ಲೇಸ್ ಸಾಣೂರು ಸಾತಿಂಜ ಜನಾರ್ಧನ ಭಟ್ ಮೆರೆನ ಪೌರೋಹಿತ್ಯಡ್ ನಡಪುಂಡು.

ಮಾ.8 ಸುಕ್ರಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಮಹಾಗಣಪತಿ ಹೋಮ, ನವಕಲಶ ಅಭಿಷೇಕ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ಬಯ್ಯಗ್ ದುರ್ಗಾನಮಸ್ಕಾರ, ಭಜನೆ ನಡಪರೆ ಉಂಡು.

ಮಾ.9 ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಪಲ್ಲಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಭಜನೆ, ಚಾಮುಂಡಿ, ಗುಳಿಗ ದೈವೊಲೆಗ್ ಗಗ್ಗರ ಸೇವೆ ನಡಪರೆ ಉಂಡು.

ಮಾ.10 ಐತಾರ ಬೊಲ್ಪುಗು ಶ್ರೀ ಚಾಮುಂಡಿ ಗುಳಿಗ ಪಂಚಕಜ್ಜಾಯ ಸೇವೆ, ಭಜನೆ ನಡಪರೆ ಉಂಡು.

ಈ ಲೇಸ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಶನೀಶ್ವರ ಚಾಮುಂಡೇಶ್ವರಿ ಮಂದಿರದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.