2024

ನಾರಾಯಣ ಸನಿಲ್ ರೆನ ಬದ್ ಕ್ ಒಂಜಿ ಬುಡ್ಪಾದ್ ದೀತಿನ ಬೂಕುದಂಚ: ರಾಜೇಶ್ವರಿ ಸೂರ್ಯ ಕುಮಾರ್

ಹಳೆಯಂಗಡಿಡ್ ಬಡವೆರ್ ಬೊಕ್ಕ ಮಧ್ಯಮ ವರ್ಗದ ಜನಕ್ಲೆಗ್ ಅನುಕೂಲ ಆಪುನ ದೃಷ್ಟಿರ್ದ್ ಸಹಕಾರಿ ಕ್ಷೇತ್ರನ್ ಅಭಿವೃದ್ಧಿ ಮಲ್ತ್ ದ್, ಅವೆತ್ತ ಮುಕೇನ ಅವೆತೊ ಜನಕ್ಲೆಗ್ ಉದ್ಯೋಗ ಅವಕಾಶ, ವ್ಯಾಪಾರ ಅಭಿವೃದ್ಧಿಗ್ ಸಕಾಯ ಮಲ್ತಿನ ಸಹಕಾರಿ ಭೀಷ್ಮ ಎಚ್. ನಾರಾಯಣ ಸನಿಲ್ ಮೆರೆನ ಸಾಮಾಜಿಕ ಜೀವನ ಪಂಡ ಅವೊಂಜಿ ಬುಡ್ಪಾದಗ ದೀತಿನ ಬೂಕುದಲೆಕ ಪಂದ್ ಹಳೆಯಂಗಡಿದ ಸಮಾಜ ಸೇವಕಿ ರಾಜೇಶ್ವರಿ ಸೂರ್ಯ ಕುಮಾರ್ ಪಂಡೆರ್.

ಮೇರ್ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಹಳೆಯಂಗಡಿದ ಮುತಾಲಿಕೆಡ್ ನಡತಿನ ಎಚ್ ನಾರಾಯಣ ಸನಿಲ್ ಸ್ಮರಣ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.

ಬಿನ್ನೆರಾದ್ ಪಾಲ್ ಪಡೆಯಿನ ನಮ್ಮ ಟಿವಿದ ನವೀನ್ ಶೆಟ್ಟಿ ಎಡ್ಮೆಮಾರ್ ಪಾತೆರ್ದ್, ನಾರಾಯಣ ಸನಿಲ್ ಮೆರೆನ ಸಾಮಾಜಿಕ ಕಳಕಳಿ ನಮಕ್ ಮಾತೆಗ್ಲಾ ಆದರ್ಶ. ಸನಿಲ್ ಮೇರ್ ಸಮಾಜಗ್ ಬುಡ್ದು ಪೋಯಿನ ಆಸ್ತಿಲೆಡ್ ಇತ್ತೆದ ಸಮಾಜಡ್ ಕೆಲಸ ಮಲ್ಪುವ ಅವೆತೊ ಜನಕ್ಲೆಗ್ ಸಾಕ್ಷಿ ಆತೆರ್ ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಸೊಸೈಟಿದ ಅಧ್ಯಕ್ಷೆರ್ ಎಚ್. ವಸಂತ ಬೆರ್ನಾಡ್ ಒಯಿಸ್ ದಿತ್ತೆರ್.

ಚಾವಡಿಡ್ ನಿರ್ದೇಶಕೆರರಾಯಿನ ಉಮಾನಾಥ ಜೆ ಶೆಟ್ಟಿಗಾರ್, ವಿಜಯ ಕುಮಾರ್ ಸನಿಲ್, ಗೌತಮ್ ಜೈನ್, ನವೀನ್ ಕುಮಾರ್ ಪಂಜ ಪಾಲ್ ಪಡೆದಿತ್ತೆರ್. ಮುಖ್ಯ ಕಾರ್ಯನಿರ್ವಾಣಾಧಿಕಾರಿ ಸುದರ್ಶನ್ ಎದ್ಕೊನಿಯೆರ್. ಅಕ್ಷತಾ ಶೆಟ್ಟಿ ಸೊಲ್ಮೆ ಸಂದಾಯೆರ್.

ತಿಬಾರ್ ಕೊಡಮಣಿತ್ತಾಯ ಕ್ಷೇತ್ರಡ್ ಬ್ರಹ್ಮ ಕುಂಭಾಭಿಷೇಕ, ನಾಗಮಂಡಲದ ನಿಲೆಟ್ಟ್ ಸಮಾಲೋಚನೆ ಸಭೆ

ಶಿಬರೂರು ಕ್ಷೇತ್ರದ ಬ್ರಹ್ಮ ಕುಂಭಾಭಿಷೇಕದ ಯಶಸ್ಸ್ ಗ್ ಮಾತೆರ್ಲಾ ಕೈಜೋಡಿಸಾವೊಡು: ಕೋಂಜಾಲಗುತ್ತು ಪ್ರಭಾಕರ್ ಎಸ್ ಶೆಟ್ಟಿ

ಬೊಂಬೈ: ಶಿಬರೂರು (ತಿಬಾರ್) ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಎಪ್ರಿಲ್22-30 ಮುಟ್ಟ ಶ್ರೀ ಉಳ್ಳಾಯ, ಶ್ರೀ ಕೊಡಮಣಿತ್ತಾಯ ಬೊಕ್ಕ ಪರಿವಾರ ದೈವೊಲೆಗ್ ಬ್ರಹ್ಮ ಕುಂಭಾಭಿಷೇಕ ಬೊಕ್ಕ ಅಷ್ಟಪವಿತ್ರ ನಾಗಮಂಡಲ ಸೇವೆ, ಜಾತ್ರೆದ ನಿಲೆಟ್ಟ್ ಸಮಾಲೋಚನೆ ಸಭೆ ಬೊಕ್ಕ ಲೆಪ್ಪೋಲೆ ಬುಡುಗಡೆ ಲೇಸ್ ಚೆಂಬೂರು ರೈಲ್ವೆ ನಿಲ್ದಾಣದ ಎದುರುದ ವೈಶಾಲಿ ಗಾರ್ಡನ್ ಡ್ ಮಾ.17 ಐತಾರ ನಡತ್ಂಡ್.

ಶಿಬರೂರುಗುತ್ತು ಉಷಾ ಶೆಟ್ಟಿ ಮೇರ್ ತುಡರ್ ಅರ್ಲಾದ್ ಸಭೆಕ್ಕ್ ಚಾಲನೆ ಕೊರಿಯೆರ್.

ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಶಿಬರೂರುದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಕೋಂಜಾಲಗುತ್ತು ಪ್ರಭಾಕರ್ ಎಸ್. ಶೆಟ್ಟಿ ಮೇರ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ತುಳುನಾಡ್ ಡ್ ದೈವ ಶಕ್ತಿದ ಆರಾಧನೆ ವಿಶೇಷವಾದ್ ನಡತೊಂದು ಉಂಡು. ತುಳುವೆರೆಗ್ ದೈವೊನೇ ಪ್ರಧಾನ, ಮಸ್ತ್ ಶ್ರದ್ಧಾ- ಭಕ್ತಿರ್ದ್ ನಾಡ್ ದ ಜನಕುಲು ದೈವೊಲೆನ್ ನಂಬುದು ಆರಾಧನೆ ಮಲ್ತೊಂದು ಬೈದೆರ್.

ದೈವಾನುಗ್ರಹರ್ದ್ ತುಳುನಾಡ್ ದ ಜನಕುಲು ದೇಶ ವಿದೇಶದ ವಾ ಮೂಲೆಗ್ ಪೋಂಡಲ ಯಶಸ್ವಿ ಜೀವನ ನಡಪಾವೊಂದು ಉಲ್ಲೆರ್. ಪಾನ್, ಚಾ ಮಾರುನಕುಲು, ಹೋಟೆಲ್ ದಕುಲು ಅತ್ತಂದೆ ಎಲ್ಯ ಎಲ್ಯ ಉದ್ಯಮಿಲು, ಉದ್ಯೋಗಿಲು ಬೊಂಬೈ ಮಹಾನಗರಡ್ ದೈವಾನುಗ್ರಹದೊಟ್ಟಿಗೆ ಕಠಿಣ ಪರಿಶ್ರಮ ಬೊಕ್ಕ ಪ್ರಾಮಾಣಿಕತೆದ ದುಡಿಮೆರ್ದ್ ಪ್ರಸಿದ್ಧಿನ್ ಪಡೆತೆರ್. ಬೇತೆ ಬೇತೆ ಕ್ಷೇತ್ರಡ್ ಇಸೇಸವಾದ್ ತನ್ನನ್ ತಾನ್ ಗುರುತಿಸಾದೆರ್. ತುಳುವೆರೆನ ಭಕ್ತಿಗ್ ಇಸೇಸ ಶಕ್ತಿ ಉಂಡು. ತನ್ನ ಇಷ್ಟಾರ್ಥನ್ ದೈವ ದೇವೆರ್ ಲ ಆಯಿನಾತ್ ಬೇಗಡೇ ಈಡೇರಿಸಾವೆರ್ ಪನ್ಪುನ ನಂಬಿಕೆ ಭಕ್ತೆರೆಡ ಉಂಡು. ಊರುದ ದೈವಸ್ಥಾನ, ದೇವಸ್ಥಾನಲು ಭಕ್ತೆರೆನ ಸಹಕಾರರ್ದ್ ಅಭಿವೃದ್ಧಿ ಆವೊಂದು ಉಂಡು. ಒವ್ವೇ ದೇವಸ್ಥಾನ, ದೈವಸ್ಥಾನಲೆನ ಅಭಿವೃದ್ಧಿಗ್ ಇಜ್ಜಿಂಡ ಜೀರ್ಣೋದ್ಧಾರಗ್ ಮಾತ ಭಕ್ತೆರ್ ಒಟ್ಟು ಸೇರ್ಂಡ ಅವು ಖಂಡಿತಾ ಯಶಸ್ಸ್ ನ್ ಪಡೆವೊಂಡು. ಕಾರ್ಣಿಕ ಕ್ಷೇತ್ರವಾಯಿನ ಶಿಬರೂರು ಶ್ರೀ ಕೊಡಮಣಿತ್ತಾಯ ದೈವಸ್ಥಾನಡ್ ಬ್ರಹ್ಮ ಕುಂಭಾಭಿಷೇಕ ಬೊಕ್ಕ ಅಷ್ಟಪವಿತ್ರ ನಾಗಮಂಡಲ ಸೇವೆ, ಜಾತ್ರೆ ನಡಪರೆ ಉಂಡು. ನೆಕ್ಕ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಮಾತ ದೈವಭಕ್ತೆರ್ ತನ್ನ ಶಕ್ತ್ಯಾನುಸಾರ ದೇಣಿಗೆನ್ ಕೊರ್ದು ಬ್ರಹ್ಮ ಕುಂಭಾಭಿಷೇಕದ ಯಶಸ್ಸ್ ಗ್ ಕೈಜೋಡಿಸಾವೊಡು ಪಂದ್ ಪಂಡೆರ್.

ಈ ಪೊರ್ತುಡು ಉಚ್ಚಯದ ಲೆಪ್ಪೋಲೆನ್ ಕೋಂಜಾಲಗುತ್ತು ಪ್ರಭಾಕರ್ ಎಸ್ ಶೆಟ್ಟಿ ಬೊಕ್ಕ ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ ಬುಡುಗಡೆ ಮಲ್ತೆರ್.

ಸೂರ್ಯಕಾಂತ್ ಜೆ. ಸುವರ್ಣ ಮೇರ್ ಪಾತೆರ್ದ್, ಎಂಕ್ಲೆಗ್ ಒವ್ವೇ ಕಷ್ಟ ಸಮಸ್ಯೆಲು ಬನ್ನಗ ನಮ ಸುರುಕು ದೈವ ದೇವೆರೆನ್ ನೆಂಪು ಮಲ್ಪೊಡು. ನಮಕ್ ದೈವ ದೇವೆರ್ ಅನುಗ್ರಹಿಸಾದ್ ಎಡ್ಡೆ ತಾದಿನ್ ತೂಪಾದ್ ಕಷ್ಟನ್ ಪರಿಹಾರ ಮಲ್ಪುವೆರ್. ಕೋಲ, ನೇಮ, ಜಾತ್ರೆ, ಬ್ರಹ್ಮಕಲಶ ಉಚ್ಚಯ ಉಂದು ಮಾತ ಸಮಾಜನ್ ಒಟ್ಟು ಸೇರ್ಸಾವುನ ಮಲ್ಲ ಉಚ್ಚಯ, ಇಂಚಿನ ಉಚ್ಚಯದ ಯಶಸ್ಸಿಗ್ ಭಕ್ತೆರಾಯಿನ ನಮ ಮಾತ ಒಟ್ಟಾದ್ ಶ್ರದ್ಧಾಭಕ್ತಿರ್ದ್ ಸಹಕರಿಸಾವೊಡು ಪಂದ್ ಪಂಡೆರ್.

ಥಾಣೆದ ಮಾಜಿ ಮೇಯರ್ ಮಹಾರಾಷ್ಟ್ರ ನಮ್ಮ ಕರ್ಮಭೂಮಿ ಆಂಡಲ ನಮ ಮಾತ ಮುಲ್ಪ ನಮ್ಮ ಸಂಸ್ಕೃತಿ, ಸಂಸ್ಕಾರ, ನಂಬಿಕೆನ್ ಕಾಪಾಡೊಂಡು ಬೈದ್ಂಡ್. ದೈವಭಕ್ತೆರಾಯಿನ ನಮ ಮಾತ ಊರುದ ದೈವಸ್ಥಾನ, ದೇವಸ್ಥಾನಲೆನ ಅಭಿವೃದ್ಧಿಗ್ ಸಹಕರಿಸಾದ್ ಜಾತ್ರೆ ಉಚ್ಚಯಡ್ ಪಾಲ್ ಪಡೆವೊಡು ಉಲ್ಲ. ದೇಶದ ಬೇತೆ ಕಡೆರ್ದ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಧಾರ್ಮಿಕ ಕ್ಷೇತ್ರಗ್ ಮಸ್ತ್ ಪಾವಿತ್ರ್ಯತೆ ಉಂಡು. ಈ ಧಾರ್ಮಿಕ ಕ್ಷೇತ್ರಲೆನ ಅಭಿವೃದ್ಧಿಗ್ ಸಹಕರಿಸಾವುನೇ ಭಕ್ತೆರಾಯಿನ ನಮ ಮಾತೆರ್ನಾಲ ಕರ್ತವ್ಯ. ದೈವದೇವೆರೆನ ಸೇವೆರ್ದ್ ಖಂಡಿತ ನಮಕ್ಕ್ ಅನುಗ್ರಹ ಪ್ರಾಪ್ತಿ ಆಪುಂಡು. ಧಾರ್ಮಿಕದೊಟ್ಟಿಗೆ ಸಮಾಜ ಸೇವೆನ್ ನಮ ಮಲ್ಪುಗ.ಮಹಾರಾಷ್ಟ್ರದ ಮುಖ್ಯಮಂತ್ರಿ ಏಕನಾಥ ಸಿಂಧೆ ಮೇರ್ ನಮ್ಮ ಸಂಸ್ಕೃತಿ, ಆರಾಧನಾ ಪದ್ಧತಿನ್ ಮಸ್ತ್ ಮೆಚ್ಚಿನಾರ್. ಮೇರ್ ನಮ್ಮೂರುದ ಜನಕ್ಲೆನ ಮಿತ್ತ್ ಮಸ್ತ್ ಪ್ರೀತಿ, ಗೌರವನ್ ತೂಪಾವೊಂದು ಇತ್ತೆರ್. ಹೋಟೆಲ್ ಉದ್ಯಮಲೆನ ಸಮಸ್ಯೆಲೆನ್ ಬಗೆಹರಿಸಾಯೆರೆ ಸಹಕಾರ ಮಲ್ತೊಂದು ಉಲ್ಲೆರ್ ಪಂದ್ ಪಂಡೆರ್.

ಶಿಬರೂರು ಕ್ಷೇತ್ರದ ಜೀರ್ಣೋದ್ಧಾರ ಸಮಿತಿ, ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಕೋರ್ಯಾರು ಪಾತೆರ್ದ್, ಎಪ್ರಿಲ್ 26 ಕ್ಕ್ ಶಿಬರೂರು ಬ್ರಹ್ಮಕುಂಭಾಭಿಷೇಕ, ನಾಗಮಂಡಲ ಉಚ್ಚಯ ಬೊಕ್ಕ ಪ್ರಜಾಪ್ರಭುತ್ವದ ಉಚ್ಚಯ ಉಂಡು. ಎಂಪಿ ವೋಟುದಾನಿಯೇ ಶಿಬರೂರು ಕ್ಷೇತ್ರಡ್ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು. ಕ್ಷೇತ್ರದ ಶಕ್ತಿಲೆನ ಅನುಗ್ರಹರ್ದ್ ಒವ್ವೇ ಅಡೆತಡೆ ಇಜ್ಜಂದೆ ನಮ್ಮ ಉಚ್ಚಯ ಯಶಸ್ವಿಯಾದ್ ನಡಪರೆ ಉಂಡು ಪನ್ಪುನವು ಆಶಯ ನಮ್ಮ ಆತ್ಂಡ್. ಬೊಂಬೈ ಭಕ್ತೆರೆನ ಎಚ್ಚದ ಆರ್ಥಿಕ ನೆರವುರ್ದ್ ತುಳುನಾಡ್ ಇಡೀ ಧಾರ್ಮಿಕ ಕ್ಷೇತ್ರಲೆನ ಜೀರ್ಣೋದ್ಧಾರ ಕೆಲಸಲು ನಡತೊಂದು ಬೈದ್ಂಡ್. ಇತ್ತೆ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಮಲ್ಲ ಪುಗರ್ತೆನ್ ಪಡೆಯಿನ ಕಾರಣಿಕ ಶಿಬರೂರು ಕ್ಷೇತ್ರಡ್ 9 ಕೋಟಿರ್ದ್ ಎಚ್ಚದ ಕರ್ಚ್ ವೆಚ್ಚಡ್ ಸುಮಾರ್ ಅಭಿವೃದ್ಧಿ ಕೆಲಸಲು ಅತ್ತಂದೆ ಬ್ರಹ್ಮ ಕುಂಭಾಭಿಷೇಕ ನಡಪರೆ ಉಂಡು. ಬಂಗಾರ್ ದ ಪಲ್ಲಕ್ಕಿಲ ಶ್ರೀ ಕೊಡಮಣಿತ್ತಾಯ ದೈವೊಗು ಅರ್ಪಣೆ ಆಪುಂಡು. ಉಂದು ಮಾತ ಧರ್ಮ ಕೆಲಸಗ್ ಬೊಂಬೈ ಭಕ್ತೆರ್ ಮಾತೆರ್ಲಾ ಸಹಕಾರ ಮಲ್ಪೊಡು ಪಂದ್ ಪಂಡೆರ್.

ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಕೈಯೂರಗುತ್ತು ಬೊಕ್ಕ ಮೊಕ್ತೇಸರೆರ್, ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ಎಮ್. ಮಧುಕರ್ ಅಮೀನ್, ಶಿಬರೂರು ಕ್ಷೇತ್ರಡ್ ಇತ್ತೆ ನಡತೊಂದು ಇಪ್ಪುನ ಅಭಿವೃದ್ಧಿ ಕೆಲಸದ ಬಗೆಟ್ಟ್
ಬೊಕ್ಕ ಕಾಮಗಾರಿಲೆನ ಕರ್ಚಿ ವೆಚ್ಚದ ವಿವರನ್ ಕೊರಿಯೆರ್. ಶ್ಯಾಮಲಾ ಪ್ರಭಾಕರ್ ಶೆಟ್ಟಿ ಶಿಬರೂರು ಗುತ್ತು ಸಲಹೆ ಕೊರಿಯೆರ್.

ಈ ಪೊರ್ತುಡು ಪರ್ಲ ಬೈಲುಗುತ್ತು ತುಕಾರಾಮ ಶೆಟ್ಟಿ, ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜೆ. ಸುವರ್ಣ, ಕುಡ್ತಿಮಾರ್ ಗುತ್ತು ಭಾಸ್ಕರ್ ಶೆಟ್ಟಿ ಕಾಶಿಮಮೀರಾ, ಶಿಬರೂರು ಕ್ಷೇತ್ರದ ಉಚ್ಚಯ ಸಮಿತಿದ ಸಂಚಾಲಕೆರ್, ಕರ್ನಾಟಕ ಸರಕಾರ ಹಿಂದೂ ಧಾರ್ಮಿಕ ಸಂಸ್ಥೆಲು ಬೊಕ್ಕ ಧರ್ಮಾದಾಯ ದತ್ತಿ ಇಲಾಖೆದ ದಕ್ಷಿಣ ಕನ್ನಡ ಜಿಲ್ಲೆ ಧಾರ್ಮಿಕ ಪರಿಷತ್ ದ ಸದಸ್ಯೆರ್ ಸುಬ್ರಹ್ಮಣ್ಯ ಪ್ರಸಾದ್ ಕೋರ್ಯಾರು, ಆಹಾರ್ ದ ಗೌರವ ಕಾರ್ಯದರ್ಶಿ ಸುಧಾಕರ್ ಆರ್. ಶೆಟ್ಟಿ, ಪೊವಾಯಿ, ಶ್ರೀ ಮಹಾಶೇಷ ರುಂಡ ಮಾಲಿನಿ ದೇವಸ್ಥಾನದ ಜಗದೀಶ್ ಸುವರ್ಣ, ಥಾಣೆದ ಮಾಜಿ ಮೇಯರ್ ಮೀನಾಕ್ಷಿ ಸಿಂಧೆ, ಬೊಂಬೆ ಹೈಕೋರ್ಟ್ ನ್ಯಾಯವಾದಿ ಮಹೇಶ್ ಎನ್. ಕೋಟ್ಯಾನ್ ಮೊಕ್ಲೆಗ್ ಶಾಲ್ ಪೊದೆಪಾದ್ ಪುರ್ಪ ಕೊರ್ದು ಕೋಂಜಾಲ ಗುತ್ತು ಪ್ರಭಾಕರ್ ಎಸ್. ಶೆಟ್ಟಿ ಮೇರ್ ಮಾನಾದಿಗೆ ಮಲ್ತೆರ್.

ಚಾವಡಿಡ್ ಶಿಬರೂರು ಗುತ್ತು ಕಿಶೋರ್ ಶೆಟ್ಟಿ, ಶಿಬರೂರು ಗುತ್ತು ಶೈಲೇಶ್ ಶೆಟ್ಟಿ, ಶಿ‌ಬರೂರು ಮೂಡುಮನೆ ಯಾದವ ಕೃಷ್ಣ ಶೆಟ್ಟಿ, ಶಿಬರೂರು ಅಡುಮನೆ ಶಂಕರ್ ಶೆಟ್ಟಿ, ಶಿಬರೂರು ಗುತ್ತು ದಾಮೋದರ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಶಿಬರೂರು ಅಡುಮನೆ ಸುರೇಶ್ ಎಲ್. ಶೆಟ್ಟಿ ಪ್ರಾರ್ಥನೆ ಮಲ್ತೆರ್. ಕೋರ್ಯಾರು ಹೊಸಮನೆ ವಿಜೇಶ್ ಶೆಟ್ಟಿ ಲೇಸ್ ನ್ ಶಿಬರೂರುಗುತ್ತು ಸುರೇಶ್ ಎಸ್.ಶೆಟ್ಟಿ ಸಹಕಾರ ಕೊರಿಯೆರ್. ಮಾಸ್ತ್ ಸಂಖ್ಯೆಡ್ ದೈವಭಕ್ತೆರ್ ಪಾಲ್ ಪಡೆದಿತ್ತೆರ್.

ತಿಬಾರ್ ದ ಬ್ರಹ್ಮಕಲಶ ಉಚ್ಚಯಗ್ ಧರ್ಮಸ್ಥಳರ್ದ್ 10 ಲಕ್ಷ ರೂ.

ಸುರತ್ಕಲ್: ಶಿಬರೂರು ದೈವಸ್ಥಾನದ ಬ್ರಹ್ಮಕಲಶ ಉಚ್ಚಯಗ್ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ ಪ್ರಸಾದ ರೂಪವಾದ್ 10 ಲಕ್ಷ ಬತ್ತಿನವು ನಮಗೆ ಕುಸಿ ಕನದ್ಂಡ್. ಶ್ರೀ ಮಂಜುನಾಥ ಸ್ವಾಮಿ, ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವೊದ ಅನುಗ್ರಹರ್ದ್ ಉಚ್ಚಯ ಸಾಂಗವಾದ್ ನಡಪುನೆಟ್ಟ್ ಒವ್ವೇ ಸಂಶಯ ಇಜ್ಜಿ ಪಂದ್ ಶಿಬರೂರು ಬ್ರಹ್ಮಶ್ರೀ ವೇದವ್ಯಾ ಸ ತಂತ್ರಿಲು ಪಂಡೆರ್.

ಮೇರ್ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನಡ್ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ ಕೊರ್ಪುನ 10 ಲಕ್ಷ ರೂಪಾಯಿ ಚೆಕ್ ನ್ ದೆತೊಂದು ಪಾತೆರಿಯೆರ್.

ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಪಾತೆರ್ದ್, ಧರ್ಮಸ್ಥಳ ಕ್ಷೇತ್ರರ್ದ್ 10 ಲಕ್ಷ ಬತ್ತಿನ ಬೊಕ್ಕ ಶಿಬರೂರು ಕ್ಷೇತ್ರಗ್ ಬರ್ಪುನ ಮಾತ ಅನುದಾನಲು ಕೂಡುದು ಬರ್ಪುಂಡು. ಕ್ಷೇತ್ರಗ್ ನಿರೀಕ್ಷೆರ್ದ್ ಎಚ್ಚದ ಅನುದಾನ, ಉದ್ಯಮಿಲೆನ ಸಹಕಾರ ಬರಡ್ ಪಂದ್ ಪಂಡೆರ್. ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಪ್ರಾದೇಶಿಕ ನಿರ್ದೇಶಕೆರ್ ದುಗ್ಗೆ ಗೌಡ ಚೆಕ್ ಕೊರಿಯೆರ್.

ಈ ಪೊರ್ತುಡು ಶಿಬರೂರುಗುತ್ತು ಪ್ರಶಾಂತ್ ಶೆಟ್ಟಿ, ಸುಧಾಕರ ಶೇಣವ ದೇಂದೊಟ್ಟುಗುತ್ತು, ಜೀತೇಂದ್ರ ಶೆಟ್ಟಿ ಕೊರ್ಯಾರುಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಜಗದೀಶ್ ಶೆಟ್ಟಿ ಪರ್ಲಬೈಲು ಗುತ್ತು, ಸುಧಾಕರ ಶೆಟ್ಟಿ ಬಾಂಗಾವು, ಸೂರಿಂಜೆ ಪಂಚಾಯತ್ ಅಧ್ಯಕ್ಷೆರ್ ಗೀತಾ ಶೆಟ್ಟಿ, ಭುವನಾಭಿರಾಮ ಉಡುಪ, ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಜಿಲ್ಲಾ ನಿರ್ದೇಶಕೆರ್ ಮಹಾಬಲ ಕುಲಾಲ್, ಬಜಪೆ ತಾಲೂಕ್ ಯೋಜನಾಧಿಕಾರಿ ಕರುಣಾಕರ ಆಚಾರ್ಯ, ಮೇಲ್ವಿಚಾರಕೆರ್ ಅರುಣಾ ಸಾಲಿಯಾನ್, ಅಧ್ಯಕ್ಷೆರ್ ರವೀಂದ್ರ ಭಟ್, ಕಾರ್ಯದರ್ಶಿಲು ಆಶಾ ಶೆಟ್ಟಿ ಶಿಬರೂರು, ಸುಜಾತಾ ಶೆಟ್ಟಿ ಕೊರ್ಯಾರು, ರೋಹಿತಾಶ್ವ ಆಚಾರ್ಯ, ಸುಮನ್ ಶೆಟ್ಟಿ, ವಿನೀತ್ ಶೆಟ್ಟಿ, ಗೀತಾ ಮಡಿವಾಳ, ಸುರೇಶ್ ಕೈಯೂರು, ದಿನೇಶ್ ಕುಲಾಲ್, ನಿತ್ಯನ್ ಶೆಟ್ಟಿ ಶಿಬರೂರು ಗುತ್ತು, ಪ್ರಭಾಕರ ಶೆಟ್ಟಿ ಪೊಸಕಟ್ಟ ಪಾಲ್ ಪಡೆದಿತ್ತೆರ್.

ಎಸ್ಸೆಸ್ಸೆಲ್ಸಿದ ವಿದ್ಯಾರ್ಥಿಲು ಪೂರಕ ಪರೀಕ್ಷೆನ್ ಗಂಭೀರವಾದ್ ದೆತೊನೊಡು: ಡಾ.ಎಂ. ಮೋಹನ್ ಆಳ್ವ

ಸುರತ್ಕಲ್ ಬಂಟರ ಸಂಘಡ್ ಎಸ್ಸೆಸ್ಸೆಲ್ಸಿ ಕಲ್ಪಾರ್ಥಿಲೆಗ್ ಪೊಲಬು ಲೇಸ್

ಸುರತ್ಕಲ್: ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ಬೆದ್ರ ಬೊಕ್ಕ ಬಂಟರ ಸಂಘ ಸುರತ್ಕಲ್ ದ ಒಟ್ಟುಸೇರಿಗೆಡ್ “ಎಸ್ಸೆಸ್ಸೆಲ್ಸಿರ್ದ್ ಬೊಕ್ಕ ನನ ದಾದ ?” ಪನ್ಪಿನ ಇಚಾರದ ಬಗೆಟ್ಟ್ ಪೊಲಬು ಕೊರ್ಪಿನ ಲೇಸ್ ಸನಿಯಾರ ಬಯ್ಯಗ್ ಮುಲ್ಪದ ಬಂಟರ ಭವನಡ್ ನಡತ್ಂಡ್.

ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಗುರ್ಕಾರೆ ಡಾ.ಎಂ. ಮೋಹನ್ ಆಳ್ವ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರ್ದ್, “ಇತ್ತೆದ ಪಾಠಬೂಕುಡು ಎಸ್ಸೆಸ್ಸೆಲ್ಸಿಡ್ 100 ಮಾರ್ಕ್ಸ್ ದೆಪ್ಪುನೇ ಕಷ್ಟ ಅತ್ತ್, ಆಂಡ ನನ ಬರಿಯೆರೆ ಇಪ್ಪುನ ಪಿಯು ಶಿಕ್ಷಣ ಪ್ರತಿಯೊರಿ ಕಲ್ಪಾರ್ಥಿನ ಜೀವನಡ್ ಅತ್ಯಮೂಲ್ಯ ಆತ್ಂಡ್. ಎನ್ ಸಿ ಆರ್ ಸಿಲೆಬಸ್ ಡ್ ಏತ್ ಮಾರ್ಕ್ಸ್ ದೆತ್ತ್ಂಡಲ ಮೆಡಿಕಲ್, ಡೆಂಟಲ್ ಅತ್ತ್ಂಡ ಬೇತೆ ಶಿಕ್ಷಣ ಪಡೆಯೆರೆ ಸಾಧ್ಯ ಆಪುಜಿ. ಮೆಡಿಕಲ್ ಸೀಟ್ ಪಡೆವೊಡಾಂಡ ನೀಟ್ ದಂಚಿನ ಪೂರಕ ಪರೀಕ್ಷೆಗ್ ಹಾಜರಾವೊಡು. ಜೋಕ್ಲೆಗ್ ಕರ್ನಾಟಕ ಬುಡ್ನ ಬೇತೆ ರಾಜ್ಯಲೆಡ್ ಒಂಜಿನೇ ಕ್ಲಾಸ್ ರ್ದೆ ಪೂರಕ ಪರೀಕ್ಷೆ ತರಬೇತಿ ಸುರು ಆಪುಂಡು. ಉಂದು ಬುಲೆವೊಂದು ಜೋಕ್ಲೆನ ಶೈಕ್ಷಣಿಕ ಪ್ರಗತಿಗ್ ಸಹಕಾರಿ ಆಪುಂಡು. ನಮ್ಮ ಇಡೀ ದೇಶಡ್ ಇಪ್ಪುನೇ ಅಂದಾಜ್ ರಡ್ಡರೆ ಲಕ್ಷ ಸಿಎ, ಸಿಎಸ್ ಆಯಿನಕುಲು. ಆಂಡ 20 ಲಕ್ಷದಾತ್ ಸಿಎ ದೇಶಗ್ ಅಗತ್ಯ ಉಲ್ಲೆರ್. ನೆಕ್ಕ್ ಕಾರಣ ಜೋಕುಲು ಪೂರಕ ಪರೀಕ್ಷೆ ಬಗೆಟ್ಟ್ ಪೋಡಿನವು. ನೆನ್ ನಿವಾರಣೆ ಮಲ್ತ್ಂಡ ಮಾತ್ರ ಜೋಕುಲು ಸಾಧನೆ ಮಲ್ಪೆರೆ ಆಪುಂಡು” ಪಂದ್ ಪಂಡೆರ್.‌

ಆಳ್ವಾಸ್ ಶಿಕ್ಷಣ ಸಂಸ್ಥೆ ಈ ದಿಟ್ಟಿಡ್ ಬಹುಮುಖ್ಯ ಸಾಧನೆ ಮಲ್ದ್ಂಡ್. ನನದ ಶೈಕ್ಷಣಿಕ ವರ್ಷಡ್ ಪೂರಕ ಪರೀಕ್ಷೆ ಕೋಚಿಂಗ್ ವ್ಯವಸ್ಥೆನ್ ನನಾತ್ ಪರಿಣಾಮಕಾರಿಯಾದ್ ಮಲ್ಪೆರೆ ಕ್ರಮ ದೆತೊನಿಯೆರೆ ಉಂಡು. ಈತೆ ಅತ್ತಂದೆ ಶಿಕ್ಷಣ ಸಂಸ್ಥೆದ 15-20 ಕಿಮೀ ಸುತ್ತಮುತ್ತದ ಪ್ರದೇಶದ ಜೋಕ್ಲೆಗ್ ಫೀಸ್ ಡ್ ಶೇ.50 ದಾತ್ ರಿಯಾಯಿತಿ ತಿಕ್ಕುಂಡು” ಪಂದ್ ಪಂಡೆರ್.

“ಆಳ್ವಾಸ್ ಡ್ ಬೊಲ್ಪುಗು 8:30 ಕ್ಕ್ ಸರಿಯಾದ್ ಪಿಯು ಕ್ಲಾಸ್ ಸುರು ಆದ್ ಮಧ್ಯಾಹ್ನ ಕ್ಲಾಸ್ ಮುಗಿತ್ ದ್ ವನಸ್ ನ್ ಅಲ್ಪನೇ ಮುಗಿತ್ ದ್ 4 ಗಂಟೆಗ್ ಲಘು ಉಪಹಾರ ಮಲ್ತ್ ದ್ ಆನಿದ ಪಾಠನ್ ಅಲ್ಪನೇ ಓದುದು ಮನನ ಮಲ್ತೊಂದು 5:30 ಕ್ಕ್ ಅಲ್ಪರ್ದ್ ಪಿದಾಡುವೆರ್. ದಾಯೆ ಪಂಡ ಜೋಕ್ಲೆಗ್ ಗುರಿ, ಇಚ್ಛಾಶಕ್ತಿ ಇತ್ತ್ಂಡ ಮಾತ್ರ ಜೀವನಡ್ ಯಶಸ್ಸ್ ಆಯೆರೆ ಸಾಧ್ಯ. ನಮ್ಮ ದಿನಚರಿ ಇಂಚ ಉಂಡು. ಜೋಕುಲು ಅವೆತ್ತ ಸದುಪಯೋಗ ಪಡೆವೊಡು. ಒಂಜಿ ವೇಳೆ ಆಳ್ವಾಸ್ ಹಾಸ್ಟೆಲ್ ಡ್ ಇತ್ತ್ ದ್ ಕಲ್ಪುನುಂದಾಂಡ ಕೈತಲ್ದ ಕಲ್ಪಾರ್ಥಿಲೆಗ್ ಶೇ.50 ರಿಯಾಯಿತಿ ಕೊರ್ಪುಂಡು” ಪಂದ್ ಪಂಡೆರ್.

ಈ ಪೊರ್ತುಡು ಚಾವಡಿಡ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಡಾ.ಎಂ. ಮೋಹನ್ ಆಳ್ವ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಮಾಜಿ ಅಧ್ಯಕ್ಷೆರ್ ಸುಧಾಕರ್ ಎಸ್. ಪೂಂಜ, ದೇವಾನಂದ ಶೆಟ್ಟಿ, ಉಪಾಧ್ಯಕ್ಷೆರ್ ಪುಷ್ಪರಾಜ್ ಶೆಟ್ಟಿ ಕುಡುಂಬೂರು, ಪ್ರಧಾನ ಕಾರ್ಯದರ್ಶಿ ಲೀಲಾಧರ್ ಶೆಟ್ಟಿ, ಕೋಶಾಧಿಕಾರಿ ಅವಿನಾಶ್ ಶೆಟ್ಟಿ, ಶಿಕ್ಷಣ ಸಮಿತಿ ಸಂಚಾಲಕೆರ್ ಲೊಕೇಶ್ ರೈ ಪಾಲ್ ಪಡೆದಿತ್ತೆರ್. ಮಾಧವಿ ಚಡಗ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಪ್ರಭಾತ್ ಸೊಲ್ಮೆ ಸಂದಾದೆರ್.

ದ.ಕ. ಜಿಲ್ಲಾ ಧಾರ್ಮಿಕ ಪರಿಷತ್ ದ ಸದಸ್ಯೆರಾದ್ ಸುಬ್ರಹ್ಮಣ್ಯ ಪ್ರಸಾದ್ ಶಿಬರೂರು ಆಯ್ಕೆ

ಸುರತ್ಕಲ್: ದಕ್ಷಿಣ ಕನ್ನಡ ಜಿಲ್ಲಾ ಧಾರ್ಮಿಕ ಪರಿಷತ್ ದ ಸದಸ್ಯೆರಾದ್ ಸುಬ್ರಹ್ಮಣ್ಯ ಪ್ರಸಾದ್ ಶಿಬರೂರು ಆಯ್ಕೆ ಆತೆರ್.

ಕರ್ನಾಟಕ ಹಿಂದೂ ಧಾರ್ಮಿಕ ಸಂಸ್ಥೆ ಘೋಷಣೆ ಮಲ್ತಿನ ಆದೇಶಡ್ ಸರಕಾರದ ಅಧೀನ‌ ಕಾರ್ಯದರ್ಶಿಲು ಸುಬ್ರಹ್ಮಣ್ಯ ಪ್ರಸಾದ್ ಮೆರೆನ ಆಯ್ಕೆನ್ ಪ್ರಕಟ ಮಲ್ದೆರ್.

ಸುಬ್ರಹ್ಮಣ್ಯ ಪ್ರಸಾದ್ ಮೇರ್ ಶಿಬರೂರು ಕೊಡಮಣಿತ್ತಾಯ ಕ್ಷೇತ್ರದ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಸಂಚಾಕೆರಾತೆರ್. ಅತ್ತಂದೆ ಧಾರ್ಮಿಕ ಕ್ಷೇತ್ರಡ್ ಸಕ್ರಿಯವಾದ್ ಉಲ್ಲೆರ್.

ಇನಿ ಪ್ರಿಯದರ್ಶಿನಿ ಕೊ-ಆಪರೇಟಿವ್ ಸೊಸೈಟಿ (ಲಿ.) ದ ಮುತಾಲಿಕೆಡ್ ಎಚ್. ನಾರಾಯಣ ಸನಿಲ್ ನೆಂಪು ಲೇಸ್

ಹಳೆಯಂಗಡಿ ಪ್ರಿಯದರ್ಶಿನಿ ಕೊ-ಆಪರೇಟಿವ್ ಸೊಸೈಟಿ (ಲಿ.) ದ ಮುತಾಲಿಕೆಡ್ ಸಂಘದ ಪ್ರೇರಣಾಶಕ್ತಿ, ಸಹಕಾರಿ ರಂಗದ ಬೀಷ್ಮೆ ಎಚ್. ನಾರಾಯಣ ಸನಿಲ್ ಮೆರೆನ ಸ್ಮರಣಾ ಲೇಸ್ ಮಾ.18 ಸೋಮಾರ (ಇನಿ) ಸಂಘದ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಹಳೆಯಂಗಡಿ ಶ್ರೀ ದುರ್ಗಾದ ರಾಜೇಶ್ವರಿ ಸೂರ್ಯ ಕುಮಾರ್, ಬಿನ್ನೆರಾದ್ ಕುಡ್ಲ ನಮ್ಮ ಟಿ.ವಿದ ನವೀನ್ ಶೆಟ್ಟಿ ಎಡ್ಮೆಮಾರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಗುರ್ಕಾರೆ ಎಚ್ ವಸಂತ್ ಬೆರ್ನಾರ್ಡ್, ಒತ್ತು ಗುರ್ಕಾರೆ ಪ್ರತಿಭಾ ಕುಳಾಯಿ, ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಸುದರ್ಶನ್ ಲೆಪ್ಪೋಲೆಡ್ ತೆರಿಪಾದೆರ್.

ನಂದಳಿಕೆ ಇಂಚರ ಸೇವಾ ಬಳಗದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವು ಸಕಾಯ

ಕಾರ್ಲ: ನಂದಳಿಕೆ ಇಂಚರ ಸೇವಾ ಬಳಗದಕುಲು 20ನೇ ಸೇವಾ ಯೋಜನೆದ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವು ಸಕಾಯನ್ ಮಲ್ತೆರ್.

ಬೆಳುವಾಯಿ ಗ್ರಾಮದ ಕರಿಯಣ್ಣಂಗಡಿ ಕೈತಲ್ದ ಸೋಮನಾಥ ಬೊಕ್ಕ ಸವಿತಾ ದಂಪತಿಲೆನ 8 ವರ್ಷದ ಬಾಲೆ ಸಮರ್ಥ ಕಿಡ್ನಿ ಸಮಸ್ಯೆರ್ದ್ ನರಲೊಂದು ಉಂಡು. ಇತ್ತೆ ಕುಡ್ಲದ ಕೆ.ಎಸ್ ಹೆಗ್ಡೆ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಂಡು.

ಈ ಬಾಲೆದ ಇಲ್ಲದಕ್ಲೆನ ಆರ್ಥಿಕ ಪರಿಸ್ಥಿತಿ ಸರಿ ಇಜ್ಜಂದಿನೆರ್ದಾವೆರ ಚಿಕಿತ್ಸೆದ ಖರ್ಚಿಗ್ ನಂದಳಿಕೆ ಇಂಚರ ಸೇವಾ ಕೂಟಗ್ ಬಿನ್ನಾಪು ಮಲ್ದೆರ್. ಈ ಬಿನ್ನಾಪುಗು ಸ್ಪಂದಿಸಾಯಿನ ಕೂಟದ ಗೌರವ ಸಲಹೆಗಾರೆರ್ ಸರಿತಾ ರವೀಂದ್ರ ಶೆಟ್ಟಿ ಮೆರೆನ ಮುಕೇನ 15000 ರೂ.ದ ಚೆಕ್ಕ್ ನ್ ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಕೊರಿಯೆರ್.

ಈ ಪೊರ್ತುಡು ಕೂಟದ ಮಾನಾದಿಗೆದ ಗುರ್ಕಾರೆ ಶೈಲೇಶ್ ಕೋಟ್ಯಾನ್, ಗುರ್ಕಾರೆ ದೀಕ್ಷಿತ್ ದೇವಾಡಿಗ, ಸದಸ್ಯೆರ್ ಅಶ್ವಥ್ ಶೆಟ್ಟಿ, ಸೌಮ್ಯ ಬಂಟಕಲ್, ಕಿರಣ್ ಬೋಳ, ದೀಕ್ಷಾ ಕಾರ್ಲ, ಸುಷ್ಮಿತಾ ರಾಕೇಶ್, ಸಾಯಿನಾಥ್ ಕುಂದರ್ ಸೂಡ, ನಾಗರಾಜ್ ಬೆಳ್ಮಣ್ ಬೊಕ್ಕ ಅಬ್ಬನಡ್ಕ ಫ್ರೆಂಡ್ಸ್ ಕ್ಲಬ್ ಸಂಚಾಲಕೆರ್ ಸಂದೀಪ್ ವಿ ಪೂಜಾರಿ ಪಾಲ್ ಪಡೆದಿತ್ತೆರ್.