2024

ಕೊಡಿಪಾಡಿ ಶ್ರೀ ಜನಾರ್ದನ ದೇವಸ್ಥಾನಡ್ ಪುನರ್ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ ಸಂಪನ್ನ

ಪುತ್ತೂರು: ಕೊಡಿಪಾಡಿ ಶ್ರೀ ಜನಾರ್ದನ ದೇವಸ್ಥಾನಡ್ ಪುನರ್ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯ, ಪೊಸ ಕೊಡಿಮರ, ಮಲ್ಲ ತೇರ್ ಸಮರ್ಪಣೆ ಬೊಕ್ಕ ಮಲ್ಲ ತೇರ್ ಉಚ್ಚಯ ಮಾ.20 ಕ್ಕ್ ಸುರು ಆದ್ ಇನಿ (ಎ.2) ಸಂಪನ್ನ ಆಪುಂಡು.

ಈ ಲೇಸ್ ಬ್ರಹ್ಮಕಲಶ ಸಮಿತಿದ ಗೌರವಾಧ್ಯಕ್ಷೆರ್, ಮಾರ್ಗದರ್ಶಕೆರ್ ಪೇಜಾವರ ಮಠತ್ತ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿಲೆನ ಆಶೀರ್ವಾದಡ್, ಶ್ರೀ ಕ್ಷೇತ್ರದ ತಂತ್ರಿಲಾಯಿನ ಬ್ರಹ್ಮಶ್ರೀ ಕೆಮ್ಮಿಂಜೆ ನಾಗೇಶ ತಂತ್ರಿಲೆನ ಮುತಾಲಿಕೆಡ್ ನಡತೊಂದು ಉಂಡು.

ಮಾ.19 ಅಂಗಾರೆ ಬೊಲ್ಪುಗು ಉಗ್ರಾಣ ಮೂರ್ತ, ಬಯ್ಯಗ್ ಪುದೆಕಾಣಿಕೆ ಸಮರ್ಪಣೆ ನಡತ್ಂಡ್.

ಮಾ.20 ಬುದಾರ ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ವಾಸ್ತುಹೋಮ, ವಾಸ್ತುಪೂಜೆ ಬಲಿ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಭಕ್ತಿ ರಸಮಂಜರಿ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಮಾ.21 ಗುರುವಾರ ಬೊಲ್ಪುಗು ಮಹಾಗಣಪತಿ ಹೋಮ, ಮಧ್ಯಾಹ್ನ ಹೋಮಲೆನ ಕಲಶಾಭಿಷೇಕ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ದುರ್ಗಾಪೂಜೆ, ಸುದರ್ಶನ ಹೋಮ, ಮಹಾಪೂಜೆ, ಭರತನಾಟ್ಯ ನೃತ್ಯಾರ್ಪಣಂ, ನೃತ್ಯರೂಪಕ ಶ್ರೀನಿವಾಸ ಕಲ್ಯಾಣ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಮಾ.22 ಸುಕ್ರಾರ ಬೊಲ್ಪುಗು ಮಹಾಗಣಪತಿ ಹೋಮ, ಮಧ್ಯಾಹ್ನ ಹೋಮಲೆನ ಕಲಶಾಭಿಷೇಕ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ತ್ರಿಚಕ್ರಪೂಜೆ ರಾತ್ರೆ ಯಕ್ಷಗಾನ ನಡತ್ಂಡ್.

ಮಾ.23 ಸನಿಯಾರ ಬೊಲ್ಪುಗು ಮಹಾಗಣಪತಿ ಪೂಜೆ, ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ದುರ್ಗಾಪೂಜೆ, ಕಲಶಪೂಜೆ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಗಾನಸಿರಿ ಸ್ವರ ಮಾಧುರ್ಯ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಮಾ.24 ಐತಾರ ಬೊಲ್ಪುಗು ಮಹಾಗಣಪತಿ ಹೋಮ, ಜೀವಕಲಶ ಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ವಾಸ್ತುಹೋಮ, ಮಂಡಲಪೂಜೆ, ಮಹಾಪೂಜೆ, ಶಶಿಪ್ರಭೆ ಪರಿಣಯ ಯಕ್ಷಗಾನ ನಡತ್ಂಡ್.

ಮಾ.25 ಸೋಮಾರ ಬೊಲ್ಪುಗು ಮಹಾಗಣಪತಿ ಹೋಮ, ಶ್ರೀ ಜನಾರ್ದನ ದೇವೆರೆನ ಪುನರ್ ಪ್ರತಿಷ್ಠೆ, ಶ್ರೀ ಶಾಸ್ತಾರ ದೇವೆರೆನ ಪುನರ್ ಪ್ರತಿಷ್ಠೆ, ಜೀವಕಲಶಾಭಿಷೇಕ, ಪ್ರತಿಷ್ಠಾ ಪೂಜೆ, ಭಜನೆ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ದುರ್ಗಾಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಸಾಂಸ್ಕೃತಿಕ ವೈವಿಧ್ಯ ನಡತ್ಂಡ್.

ಮಾ.26 ಬೊಲ್ಪುಗು ಅಂಕುರ ಪೂಜೆ, ತ್ರಿಕಾಲ, ಮಹಾಬಲಿ, ಪೀಠ ಪ್ರತಿಷ್ಠೆ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಅನ್ನ ಪ್ರಸಾದ ಸೇವೆ ರಾತ್ರೆ ಬಪ್ಪನಾಡ್ ಮೇಳದಕ್ಲೆರ್ದ್ ನಾಡೂರ ನಾಗಬನ ಯಕ್ಷಗಾನ ಬಯಲಾಟ ನಡತ್ಂಡ್.

ಮಾ.27 ಬುದಾರ ಬೊಲ್ಪುಗು ಮಹಾಗಣಪತಿ ಹೋಮ, ಶಾಂತಿಹೋಮ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಅನ್ನ ಪ್ರಸಾದ ಸೇವೆ ರಾತ್ರೆ ಅಮ್ಮೆರ್ ತುಳು ನಾಟಕ ನಡತ್ಂಡ್.

ಮಾ.28 ಗುರುವಾರ ಬೊಲ್ಪುಗು ಶ್ರೀ ಜನಾರ್ದನ ದೇವೆರೆನ ಬ್ರಹ್ಮಕಲಶಾಭಿಷೇಕ, ಪೊಸ ಮಲ್ಲ ತೇರ್ ಸಮರ್ಪಣೆ, ಲಘ ಸಂಗೀತ, ಭಜನೆ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಶ್ರೀ ದೇವೆರೆ ಬಲಿ ಪಿದಾಡ್ ದ್ ಶ್ರೀ ಭೂತಬಲಿ ಉಚ್ಚಯ ನಡತ್ಂಡ್.

ಮಾ.29 ಸುಕ್ರಾರ ಬೊಲ್ಪುಗು ನವಕ ಕಲಶ ಪೂಜೆ, ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಶ್ರೀ ಭೂತಬಲಿ ಉಚ್ಚಯ, ನೃತ್ಯ ಬಲಿ ನಡತ್ಂಡ್.

ಮಾ.30 ಸನಿಯಾರ ಬೊಲ್ಪುಗು ನವಕ ಕಲಶ ಪೂಜೆ, ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಯಕ್ಷಗಾನ ತಾಳಮದ್ದಳೆ, ರಾತ್ರೆ ಪಲ್ಲಕ್ಕಿ ಉಚ್ಚಯ, ಅನ್ನ ಪ್ರಸಾದ ಸೇವೆ, ಸಾಂಸ್ಕೃತಿಕ ವೈವಿಧ್ಯ ನಡತ್ಂಡ್.

ಮಾ.31 ಐತಾರ ಬೊಲ್ಪುಗು ನವಕ ಕಲಶ ಪೂಜೆ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಮಲ್ಲ ತೇರ್ ಉಚ್ಚಯ, ಮಹಾಪೂಜೆ, ಶ್ರೀ ಭೂತಬಲಿ ಉಚ್ಚಯ, ಅನ್ನ ಪ್ರಸಾದ ಸೇವೆ, ವಿಠಲ್ ನಾಯಕ್ ಬೊಕ್ಕ ಕೂಟದಕ್ಲೆರ್ದ್ ಗೀತಾ ಸಾಹಿತ್ಯ ಸಂಭ್ರಮ ನಡತ್ಂಡ್.

ಎ.1 ಸೋಮಾರ ಬೊಲ್ಪುಗು ತುಲಾಭಾರ ಸೇವೆ, ಪಂಚಾಮೃತಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಶ್ರೀ ದೇವೆರೆನ ಬಲಿ ಪಿದಾಡ್ ದ್ ಆರಾಟ ಉಚ್ಚಯ, ಕೊಡಿ ಜಾವೆರೆ, ದೈವೊಲೆನ ಭಂಡಾರ ದೆಪ್ಪೆರೆ, ಅನ್ನ ಪ್ರಸಾದ ಸೇವೆ ನಡತ್ಂಡ್.

ಎ.2 ಅಂಗಾರೆ (ಇನಿ) ಬೊಲ್ಪುಗು ಪಿಲಿಚಾಮುಂಡಿ ದೈವೊದ ನೇಮ, ಕಲಶಾಭಿಷೇಕ, ಮಹಾಪೂಜೆ, ನಡತ್ಂಡ್. ಬಯ್ಯಗ್ ರಕ್ತೇಶ್ವರಿ ದೈವೊಗ್ ತಂಬಿಲ ಆದ್ ಈ ಲೇಸ್ ಸಂಪನ್ನ ಆಪುಂಡು.

ಇನಿ ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನಡ್ ನಡಾವಳಿ ಉಚ್ಚಯ

ಮುಲ್ಕಿ: ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನಡ್ ನಡಾವಳಿ ಉಚ್ಚಯ (ಎ.2) ಇನಿ ನಡಪುಂಡು.

ಇನಿ ಬೊಲ್ಪುಗು ನಾಗತಂಬಿಲ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್. ಬಯ್ಯಗ್ ಭಜನೆ, ಸಾಂಸ್ಕೃತಿಕ ಲೇಸ್, ಅನ್ನ ಪ್ರಸಾದ ಸೇವೆ ಬೊಕ್ಕ ಶ್ರೀ ಕ್ಷೇತ್ರದ ಸಸಿಹಿತ್ಲು ಶ್ರೀ ಭಗವತೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ನಾಗರ ಪಂಚಮಿ ಆಟ, ರಾತ್ರೆ ಮಹಾಪೂಜೆ, ಬಲಿ, ಮೂರ್ತಿ ದರ್ಶನ, ಕಂಚಿಲ್ ಸೇವೆ, ಮಡಸ್ತಾನ ಸೇವೆ, ಪರಕೆ, ತುಲಾಭಾರ ನಡಪರೆ ಉಂಡು ಪಂದ್ ದೇವಸ್ಥಾನದ ಆಡಳಿತ ಸಮಿತಿ ಬೊಕ್ಕ ಅಭಿವೃದ್ಧಿ ಸಮಿತಿದಕುಲು ಪ್ರಕಟಣೆಡ್ ತೆರಿಪಾದೆರ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದಕುಲು 39ನೇ ತಿಂಗೊಲ್ದ ಸೇವಾಯೋಜನೆದ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕುಡ್ಲ ತಾಲೂಕ್ ದ ಪಕ್ಷಿಕೆರೆ ನಿವಾಸಿ ಆಯಿನ ಪ್ರಶಾಂತ್ ಪನ್ಪುನಾರ್ ವೃತ್ತಿಡ್ ರಿಕ್ಷಾ ಡ್ರೈವರ್ ಆತೆರ್. ಮದಿಮೆಯಾದ್ 5 ವರ್ಷ ಆತ್ಂಡ್. ಆಂಡ ಮೆರೆಗ್ ಇಂಚಿಪ್ಪ ಆರೋಗ್ಯಡ್ ತೊಂದರೆಯಾದ್ ವೈದ್ಯೆರೆಡ ತೂಪಾನಗ ರಡ್ಡ್ ಕಿಡ್ನಿ ವೈಫಲ್ಯ ಆತ್ಂಡ್ ಪಂದ್ ತೆರಿಪಾದೆರ್. ಇತ್ತೆ ಕುಡ್ಲದ ಎ. ಜೆ ಆಸ್ಪತ್ರೆಡ್ ವಾರಗ್ ಮೂಜಿ ಸರ್ತಿ ಡಯಾಲಿಸಿಸ್ ಮಲ್ತೊಂದು ಉಲ್ಲೆರ್. ನನದ ಚಿಕಿತ್ಸೆಗ್ ಕಿಡ್ನಿ ಟ್ರಾನ್ಸ್ ಪ್ಲಾಂಟ್ ಕೊವೈ ಮೆಡಿಕಲ್ ಸೆಂಟರ್ ಅಂಡ್ ಹಾಸ್ಪಿಟಲ್ ಕೊಯಂಬತ್ತೂರುಡು ಮಲ್ಪವೊಡು ಪಂದ್ ಪಂತೆರ್. ನೆತ್ತ ಕರ್ಚಿ ಸುಮಾರ್ 10 ಲಕ್ಷ ಬೋಡಾವು ಪಂದ್ ತೆರಿಪಾದೆರ್, ಮಸ್ತ್ ಬಡವೆರಾಯಿನ ಮೆರೆಗ್ ಈತ್ ಮಲ್ಲ ಕಾಸ್ ನ್ ಮಲ್ಪೆರೆ ಕಷ್ಟ ಆತ್ಂಡ್. ಆಯಿನಾತ್ ಬೇಗ ಚಿಕಿತ್ಸೆ ಮಲ್ಪೊಡು ಪಂದ್ ತೆರಿಪಾಯಿರ್ನೆದಾವೆರ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಮುಕೇನ ಪನವುದ ಸಕಾಯ ಮಲ್ಪೊಡು ಪಂದ್ ಈ ಕೂಟಗ್ ಬಿನ್ನಾಪು ಸಂದಾದಿತ್ತೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 20,000/- ರೂ.ದ ಚೆಕ್ ನ್ ಮೆರೆನ ಕುಟುಂಬಗ್ ಕೊರ್ತುಂಡು.

ಈ ಪೊರ್ತುಡು ಕೂಟದ ಕಾರ್ಯದರ್ಶಿ ದಯಾನಂದ ಮಿಜಾರ್ ಬೊಕ್ಕ ಸದಸ್ಯೆರ್ ಅಕ್ಷಯ್ ದೋಡ್ಲಾ ಪಾಲ್ ಪಡೆದಿತ್ತೆರ್.

ಎಕ್ಕಾರ್ ಡ್ ಗೌಜಿಡ್ ನಡತ್ಂಡ್ ಶ್ರೀ ಕೊಡಮಣಿತ್ತಾಯ, ಪಿಲಿಚಾಮುಂಡಿ ದೈವೊದ ನೇಮ

ಬಜಪೆ: ಎಕ್ಕಾರು ಶ್ರೀ ಕೊಡಮಣಿತ್ತಾಯ ದೈವಸ್ಥಾನಗ್ ಸಂಬಂಧಪಟ್ಟಿನ ದೈವೊದ ಗಡು ಜಾಗೆದ ಎಕ್ಕಾರು ಮೂಡಾಯಿಗುಡ್ಡೆಡ್ ಶ್ರೀ ಕೊಡಮಣಿತ್ತಾಯ ಬೊಕ್ಕ ಪಿಲಿಚಾಮುಂಡಿ ದೈವೊದ ನೇಮ ಗೌಜಿಡ್ ನಡತ್ಂಡ್.

ಈ ಪೊರ್ತುಡು ಎಕ್ಕಾರು ಶ್ರೀ ಕೊಡಮಣಿತ್ತಾಯ ದೈವಸ್ಥಾನದ ಆಡಳಿತ ಮೊಕ್ತೇಸರೆರ್ ನಿತಿನ್ ಹೆಗ್ಡೆ ಕಾವರಮನೆ, ಎಕ್ಕಾರು ಶ್ರೀ ಕೃಷ್ಣ ಮಠತ್ತ ವೇದಮೂರ್ತಿ ಹರಿದಾಸ ಉಡುಪ, ಭಾಸ್ಕರ ಮುದ್ದ ನಡ್ಯೋಡಿಗುತ್ತು, ರತ್ನಾಕರ ಶೆಟ್ಟಿ ಬಡಕರೆ ಬಾಳಿಕೆ, ರಮೇಶ್ ಭಂಡಾರಿ ಮಿತ್ತೊಟ್ಟು ಬಾಳಿಕೆ ಮೇಲೆಕ್ಕಾರು, ನಾಲ್ ಕರೆ 32 ವರ್ಗ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಪಾಲ್ ಪಡೆದಿತ್ತೆರ್.

ನ್ಯಾಯಬದ್ಧವಾದ್ ಓಟು ನಡಪುಲೆಕ ಕರ್ತವ್ಯ ಮಲ್ಪುಲೆ: ಡಾ. ಚೂಂತಾರು

ಗೃಹರಕ್ಷಕ ದಳತ್ತ ಸಮಾದೇಷ್ಟೆರ್ ಸುಬ್ರಮಣ್ಯ ಘಟಕಗ್ ಭೇಟಿ

ಜಿಲ್ಲಾ ಗೃಹರಕ್ಷಕ ದಳತ್ತ ಸಮಾದೇಷ್ಟರಾಯಿನ ಡಾ| ಮುರಲೀ ಮೋಹನ್ ಚೂಂತಾರು ಮೇರ್ ಸುಬ್ರಮಣ್ಯ ಘಟಕಗ್ ಮಾ.31 ಐತಾರ ಭೇಟಿ ಕೊರ್ದು ಗ್ರಹ ರಕ್ಷಕೆರೆನ ಕಷ್ಟಸುಖನ್ ವಿಚಾರಣೆ ಮಲ್ತೊಂಡೆರ್.

2024ತ್ತ ಲೋಕಸಭೆ ವೋಟುದ ಕರ್ತವ್ಯಗ್ ಗೃಹರಕ್ಷಕೆರೆನ್ ನಿಯೋಜನೆ ಮಲ್ಪುನ ಬಗೆಟ್ಟ್ ಬೊಕ್ಕ ನಿಷ್ಕ್ರಿಯ ಆಯಿನ ಗೃಹರಕ್ಷಕೆರೆನ್ ಮನವೊಲಿಸಾದ್ ವೋಟುಗು ನಿಯೋಜನೆ ಮಲ್ಪುನ ಬಗೆಟ್ಟ್ ಚರ್ಚೆ ಮಲ್ತೆರ್.

ಈ ಪೊರ್ತುಡು ಪ್ರತಿಯೊರಿ ಗೃಹರಕ್ಷಕೆರ್ ವೋಟುದ ಕರ್ತವ್ಯನ್ ನಿರ್ವಹಿಸಾವೊಡು ಬೊಕ್ಕ ವೋಟುದ ಕರ್ತವ್ಯ ನಿರ್ವಹಿಸಾವುನ ಗೃಹರಕ್ಷಕೆರ್ ಅಂಚೆ ಮುಕೇನ ವೋಟು ಮಲ್ಪೆರೆ ವೋಟುದ ಐಡಿನ್ ಬೊಕ್ಕ ಭಾಗ ಸಂಖ್ಯೆನ್ ಘಟಕಾಧಿಕಾರಿಲೆಡ ಕೊರ್ಪುಲೆಕ್ಕ ಆದೇಶ ಮಲ್ತೆರ್.

ಈ ಪೊರ್ತುಡು ಸುಬ್ರಮಣ್ಯ ಘಟಕದ ಪ್ರಭಾರ ಘಟಕಾಧಿಕಾರಿ ಹರಿಶ್ಟಂದ್ರ ಬೊಕ್ಕ ಸುಬ್ರಮಣ್ಯ ಘಟಕದ 30 ಗೃಹರಕ್ಷಕೆರ್ ಪಾಲ್ ಪಡೆದಿತ್ತೆರ್.

ರೈಲ್ವೆ ಇಲಾಖೆಡ್ 9144 ಬೇಲೆ

ರೈಲ್ವೆ ಇಲಾಖೆ ಬುಡುಗಡೆ ಮಲ್ತಿನ 9144 ಬೇಲೆಗ್ ಅರ್ಜಿ ಸಂದಾಯೆರೆ ಉಂದುವೇ 8 ತಾರೀಕ್ ಅಕೇರಿದ ದಿನ ಆತ್ಂಡ್.

ಟೆಕ್ನಿಷಿಯನ್ ಗ್ರೇಡ್-1 1092, ಗ್ರೇಡ್- 38052 ಬೇಲೆ ಖಾಲಿ ಉಂಡು. ಬಿಇ, ಬಿಟೆಕ್, ಬಿಎಸ್ಸಿ, ಇಂಟರ್, ಪತ್ತನೇ, ಪಾಲಿಟೆಕ್ನಿಕ್ ಓದಿನಕುಲು ಅರ್ಜಿ ಪಾಡೊಲಿ.

ಪ್ರದೇಶವಾರು ಬೇಲೆಲು, ವಯೋಮಿತಿ, ಬೇತೆ ಪೊಲಬುಗಾದ್ ಅರ್ಜಿ ಸಂದಾಯೆರೆ ವೆಬ್ ಸೈಟ್ https://Indian railways.gov.inಗ್ ಭೇಟಿ ಕೊರೊಲಿ.

ಬಿತ್ತ್ ಲ್ ದ ಭಗವತಿ ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ ” ನಡರಿ’

ಸಸಿಬಿತ್ತ್ ಲ್ದ ಶ್ರೀ ಭಗವತಿ ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ, ನಡರಿ ಬಾರಿ ವಿಶೇಷವಾಯಿನ ಜಾತ್ರೆ

ಸಸಿಬಿತ್ತಿಲ್ ದ ಊರುದಕಲೆಗ್ ಉಂದು ಗ್ರಾಮದ ಜಾತ್ರೆ. ಜಾತಿ ಬಾಂಧವೆರೆಗ್ ಕುಲದೇವಿನ ಜಾತ್ರೆ. ಭಗವತಿನ್ ನಂಬಿಂಚಿತ್ತಿನ ಭಕ್ತೆರೆಗ್ ಭಗವತಿನ ನಡರಿದ ಜಾತ್ರೆ. ಬಪ್ಪನಾಡ್ ಜಾತ್ರೆದ ಕೊಡಿ ಜಾಯಿನೆ ರಡ್ಡನೇ ದಿನತಾನಿ ನಡಪುಂಡು ಸಸಿಬಿತ್ತ್‌ಲ್ ದ ಅಪ್ಪೆನ ನಡರಿದ ಪರ್ವ.

ಬಪ್ಪನಾಡ್ ದ ಅಪ್ಪೆ ಜಲದುರ್ಗೆ ಮೆಗ್ದಿಗ್ ಕೊರ್ತಿನ ಭಾಷೆದ ಪ್ರಕಾರ ಪಲ್ದಿ ಭಗವತಿ, ಮೆಗ್ದಿನ ಬಪ್ಪನಾಡ್ ದ ಸಾನಿದ್ಯೊಗು ಪೋಪೆರ್. ಆನಿಡ್ದ್ ಇನಿಕ್ ಲಾ ಈ ಮೆಗ್ದಿ ಪಲ್ದಿನ ಭಾವನಾತ್ಮಕ ಭೇಟಿದ ಐತಿಹಾಸಿಕ ಕ್ಷಣತ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತೆರ್ ಲಕ್ಷಗಟ್ಟಳೆ ಸಂಖ್ಯೆಡ್ ಒಟ್ಟು ಸೇರುವೆರ್. ಬಪ್ಪನಾಡ್ ದ ಅಪ್ಪೆ ಜಲದುರ್ಗೆನ ವರ್ಷದ ಪರ್ವೊಗು ಹಳೆಯಂಗಡಿ ಕದಿಕೆದ ಭಂಡಾರದ ಇಲ್ಲಡ್ದ್ ಪಲ್ದಿ ಭಗವತೀ ಪರಿವಾರ ಸಮೇತ ಸುಮಾರ್ 8 ಮೈಲ್ ನಡತೊಂದು ಪೋದು ಮೆಗ್ದಿನ ವರ್ಷದ ಪರ್ವೊಡು ಜೊತೆಯಾಪಿನ ಆ ಪೊರ್ಲುನು ತೂಪಿನನೆ ಒಂಜಿ ಭಾಗ್ಯ.

ಮೆಗ್ದಿ ಪಲ್ದಿನ ಭೇಟಿದ ಪೊರ್ತುಡು ಮೆಗ್ದಿ ಜಲದುರ್ಗೆ ಕೈ ಸನ್ನೆ ಕಣ್ಣ್ ಸನ್ನೆದ ಭಾಷೆಡ್ ಅಪ್ಪೆ ಭಗವತೀ ಮಲಯಾಳಿ ಬಾಷೆಡ್ ಪಾತೆರುನ ಮೆಗ್ದಿ ಪಲ್ದಿನ ಮೋಕೆನ್ ತೂಪಿನನೆ ಒಂಜಿ ಸೌಭಾಗ್ಯ. ಮೆಗ್ದಿನ ಜಾತ್ರೆನ್ ಕರಿತೊಂದು ಬಪ್ಪನಾಡ್ ದ ಕೊಡಿ ಜಾಯಿನೆಗೆ ಅಪ್ಪೆ ಭಗವತೀ ಪರಿವಾರ ಸಮೇತ ಪಿರ ಕದಿಕೆದ ಭಂಡಾರದ ಇಲ್ಲಗ್ ಬತ್ತ್ ಸೇರೊನುವೆರ್. ಕುಡ ಬಯ್ಯಗ್ ತನ್ನ ವರ್ಷದ ಪರ್ವ ಕರಿತೊನರೆ ಭಂಡಾರದ ಇಲ್ಲಡ್ದ್ ತುದೆತ ಆಪೆದ ಮೈಟ್ ಉಪ್ಪುನ ತನ್ನ ಆದಿಸ್ಥಳ ಸಸಿಬಿತ್ತ್ ಲ್ ಗ್ ಆವೇಶೊಡು ಪರಿವಾರ ಸಮೇತ ಭಂಡಾರ ಏರೊಂದು ಪಲ್ಲೆಂಕಿಡ್ ಕುಲ್ಲೊಂದು ಅಪ್ಪೆ ಭಗವತೀ ತನ್ನ ಮೂಲ ಜಾಗೆನ್ ಸೇರೊನುವೆರ್.

ಮನದಾನಿ ಸಾನಿದ್ಯದ ನಾಗಗ್ ನಾಗ ತಂಬಿಲದೊಟ್ಟುಗು ಪೂಜೆ ಕರಿತೊಂದು ಬಯ್ಯಡ್ ರಾಶಿ ರಾಶಿ ಮಲ್ಲಿಗೆಡ್ ಸಿರಿ ಸಿಂಗಾರ ಆವೊಂದು ಬತ್ತಿನ ಭಕ್ತರೆಗ್ ಅನ್ನ ಪ್ರಸಾದೊನು ಕೊರೊಂದು ರಾತ್ರೆ 12 ಗಂಟೆಗ್ ಮಹಾಪೂಜೆದ ಒಟ್ಟುಗು ಅಪ್ಪೆ ಭಗವತೀ ಮಲ್ಲಿಗೆಡ್ ಐತ ಆತಿನ ದಂಡಿಗೆನ್ ಏರೊಂದು 64 ಸುತ್ತುದ ಸುತ್ತ ಬಲಿಕ್ ಪಿದಾಡುವೆರ್. ಅಂಚೆನೆ ಅಂಗನೊಡು ನಾಲ್ ಸುತ್ತಲಾ ಕಂಚಿಲ್ ದ ಜೋಕುಲು. ಈ ಕಂಚಿಲ್ ದ ಪರಕೆ ಅಪ್ಪೆಗ್ ಬಾರಿ ಪ್ರೀತಿದ ಸಿರಿ ಪರಕೆ. ಜೋಕುಲು ಬಾಲೆಲೆಗ್ ಸೀಕ್ ಸಂಕಡ ಬನ್ನಗ ಅಪ್ಪೆನ್ ನೆನತೊಂದು “ಜೋಕುಲೆಗ್ ಬೈದಿಂಚಿತ್ತಿನ ದುರಿತೊಲೆನ್ ದೂರ ಮಲ್ಪುಲೆ ಅಪ್ಪೆ ಭಗವತೀ.. ಇರೆಗ್ ಕಂಚಿಲ್ ದ ಪರಕೆ ಸಂದೈತ ಮಲ್ಪುವ” ಪಂದ್ ಕೈ ಮುಗಿದ್ ನಟೊನುವೆರ್. ಸೀಕ್ ಗುಣ ಆಯಿನೆಗೆ ಅಪ್ಪೆ ಭಗವತಿನ ಸನ್ನಿದಾನೊಡು ನಡರಿದ ಪರ್ವದಾನಿ ಜೋಕುಲೆನ್ ಮದ್ಮಯೆ ಮದಿಮಾಲ್ ಐತ ಮಲ್ಪಾವೊಂದು, ಅಪ್ಪೆನ ಮೋಕೆದ ಪರಕೆ ಕಂಚಿಲ್ ಸೇವೆನ್ ಸಂದಾವೆರ್.

ಸುರುತ ಸಾಲ್ ಸುತ್ತುದ ಬಲಿಕಲ್ಲ್ ಸೇವೆ, ದಾರಿಗಾಸುರನ್ ಸಂಹಾರ ಮಲ್ದಿನ ಸಂಕೇತವಾದ್ ಅಸುರ ಕ್ರಿಯೆಡ್ ಬೊಕ್ಕದ ದೇವತಾ ಕ್ರಿಯೆಡ್ ಬಲಿಕಲ್ಲ್ ಗ್ ಚರ್ವದೊಟ್ಟುಗು ಬಲಿ ಸೇವೆ ನಡಪುಂಡು. ಪುಲ್ಯ ಕಾಂಡೆ ನಡಪುನಂಚಿನ ಮೂರ್ತಿ ದರ್ಶನದ ಪೊರ್ತು. ಈ ಘಳಿಗೆಗೋಸ್ಕರನೇ ಇಡೀ ಊರುಗು ಊರೇ ಸೇರೊಂದು ಅಪ್ಪೆನ ಮೂರ್ತಿ ದರ್ಶನೊಡು ತೋಜಿದ್ ಬರ್ಪೆರ್ . ಬ್ರಾಹ್ಮೀ ಮುರ್ತೊಡು ಅಪ್ಪೆನ ಪ್ರಧಾನ ಅರ್ಚಕೆರಾದುಪ್ಪುನ ಕಾರ್ನವೆರ್ ಪಟ್ಟೆ ಸೀರೆ ತುತ್ತೊಂದು ಸಿರಿ ಸಿಂಗಾರ ಆತಿನ ಭಗವತೀ ಅಪ್ಪೆನ ಮೂರ್ತಿನ್ ಮಂಡೆಡ್ ಏರಾವೊಂದು, ಅಂಗನ ಜಪ್ಪುಂಚಿತ್ತಿನ ಪೊರ್ತು. ಅಂಗನದ ನಾಲ್ ಮೈಟ್ ಲಾ ಕಂಚಿಲ್ದ ಬಾಲೆಲೆನ್ ಪುಗ್ಗೆಲ್ ಡ್ ತುಂಬೊಂದು ಮಡಸ್ತಾನಾದೊಟ್ಟುಗು ಬಾರಿ ಗೌಜಿಡ್ ನಡಪುಂಡು ಮೂರ್ತಿ ದರ್ಶನ ಬಲಿ. ಸೇರ್ದಿಂಚಿತ್ತಿನ ಭಕ್ತೆರ್ ಅಪ್ಪೆನ ಮೂರ್ತಿ ದರ್ಶನದ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತಿ ಪರವಶೊಡು ಕೈಮುಗಿದು ಅಪ್ಪೆನ್ ಸುಗಿಪುವೆರು. ಮೂರ್ತಿ ದರ್ಶನೊಡ್ದು ಬೊಕ್ಕ ತುಲಾಭಾರ ಸೇವೆ, ಅಪ್ಪೆ ಭಗವತೀ ಪರ್ವತೊಡು ಕುಲ್ಲೊಂದು ಬತ್ತಿನ ಭಕ್ತೆರೆಗ್ ನಂಬೊಲಿಗೆದ ಪ್ರಸಾದೊನು ಕೊರ್ಪೆರ್. ಆನಿ ಮಧ್ಯಾಹ್ನ ಅಪ್ಪೆ ಭಗವತೀ ತನ್ನ ಪರಿವಾರ ಸಮೇತವಾದ್ ಭಂಡಾರ ಏರೊಂದು ಪಿರ ತನ್ನ ಕದಿಕೆದ ಭಂಡಾರದ ಇಲ್ಲ್ ಸೇರೊನುವೆರ್.

🖋 ಸರಸ್ವತಿ ಅಮಿತ್ ಬಜ್ಪೆ