ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ದಂಪತಿನ್ ಕೇಂದ್ರ ಸರ್ಕಾರ ಭಾರತೀಯ ಸಮ್ಮಾನ್ ಪ್ರಶಸ್ತಿಗ್ ಆಯ್ಕೆ ಮಲ್ದ್ಂಡ್.
ಅಂಚನೆ ಗಯಾನ ಅಧ್ಯೆಕ್ಷೆರ್ ಮೊಹಮ್ಮದ್ ಇರ್ಫಾನ್ ಆಲಿ, ಕೆನಡಾದ ಪುಗರ್ತೆದ ವಿಜ್ಞಾನಿ ಡಾ.ವೈಕುಂಟಂ ಅಯ್ಯರ್ ಲಕ್ಷ್ಮಣನ್ ಸೇರ್ದ್ 27 ಜನ 2023ನೇ ವರ್ಷದ ಈ ಪ್ರಶಸ್ತಿನ್ ದೆತೊನಿಯೆರೆ ಉಲ್ಲೆರ್. ಜ.8 ರ್ದ್ 10 ಮುಟ್ಟ ಇಂದೋರ್ ಡ್ ನಡಪರೆ ಇಪ್ಪುನ ಪ್ರವಾಸಿ ಭಾರತೀಯ ದಿವಸ್ ಸಮಾವೇಶಡ್ ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಪ್ರಶಸ್ತಿನ್ ಪಟ್ಟುವೆರ್.
ವಿಟ್ಲ: ಮಾರ್ಗದ ಬರಿಟ್ಟ್ ಉಂತುದು ಇತ್ತಿನ ಶಾಲೆದ ಪೊಣ್ಣಗ್ ಬೈಕ್ ಗುದ್ದುದು ಮಸ್ತ್ ಪೆಟ್ಟಾಯಿನ ಘಟನೆ ಒಕ್ಕೆತ್ತೂರುಡ್ ನಡತ್ಂಡ್.
ಈ ಘಟನೆಡ್ ಒಕ್ಕೆತ್ತೂರುದ ನಿವಾಸಿ ಬಶೀರ್ ಪನ್ಪುನರೆನ ಮಗಲ್ ಫಾತಿಮತ್ ನಿದಾ ಪೆಟ್ಟಾಯಿನ ಕಲ್ಪಾರ್ಥಿ. ಮೇರ್ ವಿಟ್ಲ ಸರಕಾರಿ ಮಾದರಿ ಶಾಲೆಡ್ 5ನೇ ಕ್ಲಾಸ್ ಕಲ್ತೊಂದು ಉಲ್ಲೆರ್. ಶಾಲೆಗ್ ಪೋವೆರೆ ಉಂತಿನ ಪೊರ್ತುಡು ಬೈಕ್ ಗುದ್ದುದ್ಂಡ್. ಕೂಡ್ಲೆ ಕೈತಲ್ ದಕುಲು ಪುತ್ತೂರ್ ಆಸ್ಪತ್ರೆಗ್ ಸೇರ್ಸಾದೆರ್. ಆಂಡ ಹೆಚ್ಚದ ಚಿಕಿತ್ಸೆಗಾದ್ ಕುಡ್ಲ ಆಸ್ಪತ್ರೆಗ್ ದಾಖಲ್ ಮಲ್ದೆರ್.
ಪುಣೆ: ವಾಟ್ಸ್ಆ್ಯಪ್ ಗ್ರೂಪ್ರ್ದ್ ದೆತ್ತಿನೆಕ್ ಐನ್ ಆರೋಪಿಲು ಸೇರ್ದ್ ಗ್ರೂಪ್ ಅಡ್ಮಿನ್ ನ ನಾಲಯಿನೇ ತುಂಡು ಮಲ್ತಿನ ಘಟನೆ ಪುಣೆದ ಫರ್ಸುಂಗಿ ಪ್ರದೇಶಡ್ ನಡತ್ಂಡ್.
ಈ ಬಗೆಟ್ ಪೆಟ್ಟಾಯಿನ ಜನತ ಬೊಡೆದಿ ಹಡಪ್ಸರ್ ಠಾಣೆಡ್ ಪೊಲೀಸೆರೆಗ್ ದೂರು ಕೊರ್ತೆರ್. ಪೊಲೀಸೆರ್ ಐನ್ ಜನತ ಮಿತ್ತ್ ಕೇಸ್ ದಾಖಲ್ ಮಲ್ದೆರ್.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಪಡ್ಡೆದ್ರ ಶಾಖೆಡ್ ಜ.3 ಕ್ ನಬಾರ್ಡ್ ದ ಮುತಾಲಿಕೆಡ್ ಗ್ರಾಹಕರೆಗ್ ಪಣವುದ ವೈವಾಟ್ ತೆರಿಪಾವುನ ಕಜ್ಜ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಶಾಖೆದ ವ್ಯವಸ್ಥಾಪಕೆರ್ ಪ್ರಬೋದ್ ಚಂದ್ರ ಪೆಜಮಾಡಿ ಒಯಿಸ್ ದಿತ್ತೆರ್. ಖಾದಿ ಬೊಕ್ಕ ಗ್ರಾಮೋದ್ಯೋಗ ಮಂಡಳಿದ ನಿರ್ದೇಶಕೆರ್ ಮಿಥುನ್ ಆರ್ ಹೆಗ್ಡೆ ಉದಿಪನ ಮಲ್ತೆರ್. ಆರ್ ಪಾತೆರ್ದ್, ಡಾ.ಎಂ.ಎನ್ ರಾಜೇಂದ್ರ ಕುಮಾರ್ ಮೆರೆನ ಮುತಾಲಿಕೆಡ್ SCDCC ಬ್ಯಾಂಕ್ ಜನಕ್ ಇಸೇಸ ಯೋಜನೆದೊಟ್ಟಿಗೆ ಎಡ್ಡೆ ಸೇವೆ ಕೊರೊಂದು ಉಂಡು. ಜನಕುಲು ಬ್ಯಾಂಕ್ ದ ಯೋಜನೆಲೆನ ಪ್ರಯೋಜನನ್ ಪಡೆವೊಡು ಪಂದ್ ಪಂಡೆರ್. ಬ್ಯಾಂಕ್ ದ ಸಿಬ್ಬಂದಿ ಶ್ರೀನಿಧಿ ರಾವ್ ಕಾಸ್ ಒರಿಪಾವುನ ಬೊಕ್ಕ ಆರ್ಥಿಕ ನಿರ್ವಹಣೆದ ಬಗೆಟ್ ಮಾಹಿತಿ ಕೊರಿಯೆರ್. ಶಾಖೆದ ವ್ಯವಸ್ಥಾಪಕೆರ್ ಪ್ರಭೋದ್ ಚಂದ್ರ ಪೆಜಮಾಡಿ ಎದ್ಕೊನಿಯೆರ್. ಶೋಭಿತ ಹರೀಶ್ ಸೊಲ್ಮೆ ಸಂದಾಯೆರ್. ಅನಂತ ಪ್ರಭು ಲೇಸ್ ಸುಧಾರಿಕೆ ಮಲ್ತೆರ್. ಮಲ್ಲ ಬಿನ್ನೆರಾದ್ ಪೆಜಮಾಡಿದ ಧಾರ್ಮಿಕ ಮುಖಂಡೆರ್ ಮಾಧವ ಸನಿಲ್, ಪರ್ತಕರ್ತೆರ್ ರಾಮಚಂದ್ರ ಆಚಾರ್ಯ ಪಡ್ಡೆದ್ರ, ಪಡ್ಡೆದ್ರ ಗಣಪತಿ ಪ್ರೌಢ ಶಾಲೆದ ಮುಖ್ಯೋಪಾಧ್ಯಾಯೆರ್ ಗಣಪತಿ ಭಟ್, Scdcc Bank ಉಚ್ಚಿಲ ಶಾಖೆದ ವ್ಯವಸ್ಥಾಪಕೆರ್ ಮನೋಹರ್ ಪೆಜಮಾಡಿ, ಕೇಂದ್ರ ಕಚೇರಿದ ಸಿಬ್ಬಂದಿ ವೀರೆಂದ್ರ ನಾಯಕ್, ನವೋದಯ ಸ್ವ ಸಹಾಯ ಸಂಘದ ಪ್ರೇರಕಿಯೆರಾಯಿನ ಶಶಿಕಲಾ, ವಿಮಲಾ ದಯಾನಂದ್, ಶಾಖೆದ ಸಿಬ್ಬಂದಿಲು ಶೋಭಿತ ಹರೀಶ್, ಅನಂತ್ ಪ್ರಭು, ಶ್ವೇತಾ ಪಿ ಅಡಿಗ, ಯಾದವ್ ಇತ್ತೆರ್.
ಪುಗರ್ತೆದ ಜಾಗೆ ಶಬರಿಮಲೆಟ್ಟ್ ಮಕರ ಜ್ಯೋತಿ ತೂಯರೆ ದೇವಸ್ವಂ ಬೋರ್ಡ್ ಮಾತ ರೀತಿದ ತಯಾರ್ ಸುರು ಮಲ್ತ್ ದಂಡ್.
ಬತ್ತಿನ ಭಕ್ತೆರ್ ಮಕರ ಜ್ಯೋತಿ ತೂಯರೆ ಅನುಕೂಲ ಆಪಿಲೆಕ್ಕ ಆ ಜಾಗೆಡ್ ತಡೆಪು ಬೇಲಿ ನಿರ್ಮಾಣ, ಬೊಲ್ಪು ಅಂಚನೆ ಪರ್ಪಿನ ನೀರ್ದ ವ್ಯವಸ್ಥೆ ಮಲ್ತ್ದೆರ್. ತೂತ್ತ ಅಪಾಯನ್ ತಡೆಯರೆ ಕಾಡ್ಡ್ ಅಟಿಲ್ ಮಲ್ಪುನೆನ್ ನಿಷೇಧ ಮಲ್ತ್ದೆರ್.
ದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಮೇರ್ ಜ.27 ಕ್ಕ್ ವಾರ್ಷಿಕ ಪರೀಕ್ಷಾ ಪೇ ಚರ್ಚಾ ಲೇಸ್ಡ್ ಕಲ್ಪಾರ್ಥಿಲು, ಪೋಷಕೆರ್ ಅಂಚನೆ ಶಿಕ್ಷಕೆರ್ನೊಟ್ಟುಗು ಸಂವಾದ ನಡಪಾಯರೆ ಉಲ್ಲೆರ್.
ಟಾಲ್ಕಟೋರಾ ಸ್ಟೇಡಿಯಂಡ್ ಸಂವಾದ ನಡಪರೆ ಉಂಡು. ಬೋರ್ಡ್ ಪರೀಕ್ಷೆಡ್ ಪಾಲ್ ಪಡೆಯುನ ಕಲ್ಪಾರ್ಥಿಲೆನೊಟ್ಟುಗು ಸಂವಾದ ಮಲ್ಪುವೆರ್. ಉಂದೆಕ್ಕಾದ್ ಒಟ್ಟು 38.80 ಲಕ್ಷ ಕಲ್ಪಾರ್ಥಿಲು ರಿಜಿಸ್ಟರ್ ಮಲ್ತ್ದೆರ್.
ಎಚ್ಚದ ಜನಕುಲು ಗೂಗಲ್ಗ್ ಪೋದು ಕೆಲ ವಿಷಯನ್ ತೂಪೆರ್. ಆಂಡ ಇತ್ತೆ ಕೆಲ ವಿಷಯಲೆನ್ ನಾಡ್ಂಡ ಅಪಾಯಗ್ ತಿಕ್ಕುನವು ಗ್ಯಾರೆಂಟಿ ಪಂದ್ ತಜ್ಞೆರ್ ತೆರಿಪಾದೆರ್.
ಬಾಂಬ್ ತಯಾರ್ ಮಲ್ಪುನವು ಎಂಚ, ಫ್ರೆಶರ್ ಕುಕ್ಕರ್ ಬಾಂಬ್ ತಯಾರ್ ಮಲ್ಪುನ ವಿಧಾನ, ಜೋಕ್ಲೆನ ಆಶ್ಲಿಲ ಚಿತ್ರಲು, ಜೋಕ್ಲೆನ ಲೈಂಗಿಕ ಕಿರುಕುಳದ ವಿಡಿಯೋ, ಡ್ರಗ್ಸ್ದ ಬಗೆಟ್ಟ್ ಮಾಹಿತಿ, ಪೊಂಜೊವುಲು ಗರ್ಭಪಾತ ಮಲ್ಪುನವು ಎಂಚ ಇಂಚಿತ್ತಿನ ಮಾಹಿತಿನ್ ಸರ್ಚ್ ಮಲ್ತ್ಂಡ್ ಪೊಲೀಸೆರ್ ನಿಕ್ಲೆನ ಮಿತ್ತ್ ಸರಿಯಾಯಿನ ಕ್ರಮ ದೆತೊನ್ಯರ ಉಲ್ಲೆರ್.
ವಿಪಕ್ಷ ನಾಯಕೆರ್ ಸಿದ್ದರಾಮಯ್ಯ ಸಿಎಂ ಆಪಿನ ಆಸೆನ್ ಪಿದಯ್ ಪಾಡ್ದೆರ್. ನಮ್ಮ ಸರ್ಕಾರ ಅಧಿಕಾರಗ್ ಬತ್ತ್ಂಡ ಪ್ರತಿ ಒರಿಯಗ್ಲ 10 ಕೆ.ಜಿ ಅರಿನ್ ಧರ್ಮಾರ್ಥವಾದ್ ಕೊರ್ಪ ಪಂದ್ ಪಂಡೆರ್.
ರಾಜ್ಯಡ್ ಏರ್ಲಾ ಬಡವುಡ್ ಜೆಪ್ಪರೆ ಬಲ್ಲಿ. ಯಾನ್ ಸಿಎಂ ಆದಿಪ್ಪುನಗ ಪ್ರತಿ ಒರಿಯಗ್ಲ 7 ಕೆ.ಜಿ ಅರಿ ಕೊರೊಂದಿತ್ತೆ. ಆಂಡ ಬಿಜೆಪಿ ಸರ್ಕಾರ 5೫ ಕೆ.ಜಿ ಮಲ್ತ್ದ್ಂಡ್ ಪಂದ್ ಸ್ವರ ಲಕ್ಕಾಯೆರ್.
ಹಾಸನ: ಮಿಕ್ಸಿ ಪುಡಾದಿನ ಕೇಸ್ಗ್ ಸಂಬಂಧಿಸಾದ್ ಆರೋಪಿನ್ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್.
ಅನೂಪ್ ಕುಮಾರ್ ಅರೆಸ್ಟ್ ಆಯಿನ ಆರೋಪಿ. ಏಳ್ ದಿನ ಆರೋಪಿನ್ ಪೊಲೀಸೆರ್ ವಶಕ್ಕ್ ಪಡೆಯೊಂದೆರ್. ಡಿ.26 ಕ್ಕ್ ಕುವೆಂಪು ನಗರದ ಮುಖ್ಯ ರಸ್ತೆಡ್ ಮಿಕ್ಸಿ ಬ್ಲಾಸ್ಟ್ ಆದಿತ್ತ್ಂಡ್.
ಮೈಸೂರ್: ಸಿಲಿಂಡರ್ ಪುಡಾದ್ 10 ತೆರ್ದ್ ಎಚ್ಚ ಜನಕ್ಕ್ ಮಸ್ತ್ ಪೆಟ್ಟ್ ಆತಿನ ಘಟನೆ ಮೈಸೂರ್ದ ಬನ್ನಿಮಂಟಪದ ಅಗ್ನಿಶಾಮಕ ದಳತ್ತ ವಸತಿಗೃಹಟ್ಟ್ ನಡತ್ಂಡ್.
ಉಂದೆರ್ದಾವರ ಒಂಜೇ ಇಲ್ಲದ ನಾಲ್ ಜನ ಅಂಚನೆ ಬರಿತ್ತ ಇಲ್ಲದ ಆಜಿ ಜನಕ್ಕ್ ಪೆಟ್ಟಾತ್ಂಡ್. ಪೆಟ್ಟ್ ಆತಿನಕ್ಲೆನ್ ಮೈಸೂರ್ದ ಆಸ್ಪತ್ರೆಗ್ ದಾಖಲ್ ಮಲ್ತ್ದೆರ್. ಮೈಸೂರ್ ಪೊಲೀಸೆರ್ ಜಾಗೆಗ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್ದೆರ್.
