ಪುತ್ತೂರು: ತಾರೆಗ್ ಬರ್ತ್ ದ್ ತಾರಾಯಿ ದೆಪ್ಪುನ ಬೇಲೆ ಮಲ್ತೊಂದಿತ್ತಿನ ಸುಚಿತ್ರ (30ವ) ಮೇರ್ ತಾರೆರ್ದ್ ಬೂರ್ದು ತೀರ್ಪೋಯಿನ ಘಟನೆ ಸವಣೂರು ಸಮೀಪದ ಪುಣ್ಚಪ್ಪಾಡಿ ಗ್ರಾಮಡ್ ನಡತ್ಂಡ್.
ಪ್ರವೀಣ್ ಬೊಳ್ಳಾಜೆ ಮೇರ್ನ ಬುಡೆದಿ ಸುಚಿತ್ರ ತಾರೆಗ್ ಬರ್ತ್ ದ್ ತಾರಾಯಿ ದೆಪ್ಪುನ ಬೇಲೆಡ್ ಪುದರ್ ಪಡೆದ್ ಇತ್ತೆರ್. ಸುಚಿತ್ರಾ ಮೇರ್ನ ಈ ಬೇಲೆಗ್ ಸಂಘ-ಸಂಸ್ಥೆಲು ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ದಿತ್ತೆರ್.
ಮುಲ್ಕಿ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟ (ರಿ) ಕುಡ್ಲ ನೆತ್ತ ಮುತಾಲಿಕೆಡ್ ಅಕ್ಟೋಬರ್ 28 ಬೊಕ್ಕ 29 ದಾನಿ ಒಡಿಪುಡು ವಿಶ್ವ ಬಂಟರ ಸಮ್ಮಿಲನ ನಡಪರೆ ಉಂಡು ಪಂದ್ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ತೆರಿಪಾದೆರ್.
ಆರ್ ಮುಲ್ಕಿದ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣದ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ನಡತಿನ ಒಕ್ಕೂಟದ ಸಭೆಟ್ ಅಧ್ಯಕ್ಷತೆ ಒಯಿಸೊಂದು ಪಾತೆರಿಯೆರ್.
ಅಕ್ಟೋಬರ್ 28 ದಾನಿ ಒಡಿಪುದ ಅಜ್ಜರಕಾಡ್ ಮೈದಾನಡ್ ವಿಶ್ವ ಬಂಟರ ಕ್ರೀಡಾಕೂಟ ಬೊಕ್ಕ ಅಕ್ಟೋಬರ್ 29 ದಾನಿ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್ಡ್ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ ನಡಪೆರೆ ಉಂಡು ಪಂದ್ ತೆರಿಪಾದೆರ್.
ಈ ಲೇಸ್ದ ಸಾಂಸ್ಕೃತಿಕ ಸಮಿತಿ ಸಂಚಾಲಕೆರಾದ್ ಚಂದ್ರಹಾಸ ಶೆಟ್ಟಿ ರಂಗೋಲಿ, ಉಪ ಸಂಚಾಲಕೆರಾದ್ ಕರ್ನೂರು ಮೋಹನ್ ರೈ, ಬೊಕ್ಕ ಕ್ರೀಡಾ ಸಮಿತಿದ ಸಂಚಾಲಕೆರಾದ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಉಪ ಸಂಚಾಲಕೆರಾದ್ ರೋಶನ್ ಕುಮಾರ್ ಶೆಟ್ಟಿ ಮೊಕ್ಲೆನ್ ಸಭೆಟ್ ಆಯ್ಕೆ ಮಲ್ತೆರ್. ಚೆನೆ ಉಪಸಮಿತಿಲೆನ್ ರಚನೆ ಮಲ್ಪೆರೆ ತೀರ್ಮಾನ ಮಲ್ತೆರ್.
ಊಟೋಪಚಾರದ ಸಮಿತಿ ಸಂಚಾಲಕೆರಾದ್ ಒಡಿಪು ಸಂತೋಷ್ ಶೆಟ್ಟಿ, ಮಾಧ್ಯಮ ಸಮಿತಿ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ ಬೊಕ್ಕ ರಾಜೇಶ್ ಶೆಟ್ಟಿ ಒಡಿಪು ಮೊಕ್ಲೆನ್ ಆಯ್ಕೆ ಮಲ್ತೆರ್. ಈ ಲೇಸ್ಡ್ ಸಾಧಕರೆಗ್ ಗೌರವ, ಯಕ್ಷಗಾನ ಮೇಳದ ಯಜಮಾನೆರೆಗ್ ಮಾನಾದಿಗೆ ಅಂಚನೆ ರಾಜಕಾರಣಿಲು, ಸಿನಿಮಾ ನಟೆರೆನ್ ಲೇಸ್ ಗ್ ಲೆಪ್ಪೆರೆ ತೀರ್ಮಾನ ಮಲ್ತೆರ್.
ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಪಾತೆರ್ದ್ ವಿಶ್ವ ಬಂಟರ ಸಮ್ಮಿಲನ ಕಾರ್ಯಕ್ರಮ ಯಶಸ್ವಿ ಆವರೆ ಮಾತಾ ವಲಯ, ತಾಲೂಕು ಬಂಟರ ಸಂಘ ಕೈ ಜೋಡಿಸಾದ್ ಕೆಲಸ ಮಲ್ಪೊಡು ಪಂಡೆರ್.
ವೇದಿಕೆಡ್ ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ, ಬಂಟ್ವಾಳ ಬಂಟರ ಸಂಘದ ಅಧ್ಯಕ್ಷೆರ್ ಚಂದ್ರ ಹಾಸ ಶೆಟ್ಟಿ ರಂಗೋಲಿ, ಬೊಲ್ತೆರ್ ಬಂಟರ ಸಂಘದ ಅಧ್ಯಕ್ಷೆರ್ ಜಯರಾಮ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಸಾಲೆತ್ತೂರು ಬಂಟರ ಸಂಘದ ಅಧ್ಯಕ್ಷೆರ್ ದೇವಪ್ಪ ಶೇಖ, ಗುರುಪುರ ಬಂಟರ ಮಾತೃಸಂಘದ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ, ಕುಕ್ಕುಂದೂರು ಬಂಟರ ಸಂಘದ ಅಧ್ಯಕ್ಷೆರ್ ರವಿ ಶೆಟ್ಟಿ, ತೋನ್ಸೆ ಬಂಟರ ಸಂಘದ ಅಧ್ಯಕ್ಷೆರ್ ಮನೋಹರ ಶೆಟ್ಟಿ, ಒಡಿಪು ಜಿಲ್ಲಾ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಅಧಿಕಾರಿ ರೋಶನ್ ಕುಮಾರ್ ಶೆಟ್ಟಿ ಮೊಕುಲ್ ಪಾಲ್ ಪಡೆಯೆರ್.
ಸುರತ್ಕಲ್ ಬಂಟರ ಸಂಘದ ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ ಪೂಂಜ, ಸುದರ್ಶನ್ ಶೆಟ್ಟಿ ಗುರುಪುರ, ಮೋಹನ್ ಶೆಟ್ಟಿ ಒಡಿಪು, ಪ್ರಕಾಶ್ ಶೆಟ್ಟಿ ಪಡುಬಿದ್ರೆ, ಸತ್ಯ ಪ್ರಕಾಶ್ ಶೆಟ್ಟಿ ಜಪ್ಪು, ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಶಮೀನಾ ಆಳ್ವ, ಕೊಲ್ಲಾಡಿ ಬಾಲಕೃಷ್ಣ ರೈ, ಬಾಳ ಜಗನ್ನಾಥ ಶೆಟ್ಟಿ, ಜೀವನ್ ಮುಲ್ಕಿ, ಸಾಯಿನಾಥ ಶೆಟ್ಟಿ, ಸಚ್ಚಿದಾನಂದ ಹೆಗ್ಡೆ ಕೊಳ್ಕೆಬೈಲು, ರವಿ ಶೆಟ್ಟಿ ಜತ್ತಬೆಟ್ಟು, ಶರತ್ ಶೆಟ್ಟಿ ಕಿನ್ನಿಗೋಳಿ, ನಿಶಾಂತ್ ಶೆಟ್ಟಿ ಕಿಲೆಂಜೂರು, ರೋಹಿನಿ ಶೆಟ್ಟಿ, ಅಮೂಲ್ಯ ಶೆಟ್ಟಿ ಕಟೀಲು, ಭಾರತಿ ಶೆಟ್ಟಿ ಮೊಕುಲ್ ಮಾತಾ ಸಲಹೆ ಸೂಚನೆ ಕೊರಿಯೆರ್.
ಆಗಸ್ಟ್ 11 ದಾನಿ ಬಯ್ಯಗ್ 4 ಗಂಟೆಗ್ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್ ಡ್ ವಿಶ್ವ ಬಂಟರ ಸಮ್ಮೇಳನದ ಬಗ್ಗೆ ಸಭೆ ನಡಪೆರೆ ಉಂಡು, ಸಮಾಜ ಬಾಂಧವೆರ್ ಹೆಚ್ಚಿನ ಸಂಖ್ಯೆಡ್ ಭಾಗವಹಿಸುವೊಡ್ ಪಂದ್ ತೆರಿಪಾದೆರ್.
ಕಾಪು: ಸುಮಾರ್ 30 ಕೋಟಿ ರೂ. ಕರ್ಚಿಡ್ ಬಾಗಲಕೋಟೆದ ಇಳ್ಕಲ್ ಶಿಲೆಟ್ಟ್ ನಿರ್ಮಾಣ ಆವೊಂದಿಪ್ಪುನ ಇತಿಹಾಸ ಪ್ರಸಿದ್ಧ ಕಾಪು ಪೊಸ ಮಾರಿಗುಡಿತ್ತ ಜೀರ್ಣೋದ್ಧಾರಗ್ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ 15 ಲಕ್ಷ ರೂ ದೇಣಿಗೆನ್ ಕೊರ್ತೆರ್.
ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಕೆ ವಾಸುದೇವ ಶೆಟ್ಟಿ ಮೇರ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಒಡಿಪು ಜಿಲ್ಲಾ ನಿರ್ದೇಶಕೆರ್ ಡಿ. ಶಿವಾನಂದ ಪ್ರಭು ಮೇರೆಗ್ ನಡತೊಂದಿಪ್ಪುನ ಕಾಮಗಾರಿದ ಬಗ್ಗೆ ಬೊಕ್ಕ ಸಮಗ್ರ ಜೀರ್ಣೋದ್ಧಾರದ ಬಗೆಟ್ಟ್ ಮಾಹಿತಿ ಕೊರಿಯೆರ್.
ಈ ಪೊರ್ತುಡು ದೇವಳ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ರಮೇಶ್ ಹೆಗ್ಡೆ ಕಲ್ಯಾ, ಕ್ಷೇತ್ರದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಶ್ರೀನಿವಾಸ ತಂತ್ರಿ ಕಲ್ಯಾ, ವ್ಯವಸ್ಥಾಪನಾ ಸಮಿತಿದ ಮಾಜಿ ಅಧ್ಯಕ್ಷೆರ್ ಬೊಕ್ಕ ಗೌರವ ಸಲಹೆಗಾರೆರ್ ರತ್ನಾಕರ ಶೆಟ್ಟಿ ನಡಿಕೆರೆ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಗಂಗಾಧರ ಸುವರ್ಣ, ದೇವಿಪ್ರಸಾದ್ ಶೆಟ್ಟಿ ಬೆಳಪು, ಮಾಧವ ಆರ್ ಪಾಲನ್, ಮನೋಹರ ಶೆಟ್ಟಿ, ಆರ್ಥಿಕ ಸಮಿತಿದ ಪ್ರಧಾನ ಸಂಚಾಲಕೆರ್ ಉದಯ ಸುಂದರ್ ಶೆಟ್ಟಿ, ಪ್ರಚಾರ ಸಮಿತಿದ ಪ್ರಧಾನ ಸಂಚಾಲಕೆರ್ ಯೋಗೀಶ್ ವಿ ಶೆಟ್ಟಿ ಬಾಲಾಜಿ, ಗ್ರಾಮ ಸಮಿತಿದ ಪ್ರಧಾನ ಸಂಚಾಲಕೆರ್ ಅರುಣ್ ಶೆಟ್ಟಿ ಪಾದೂರು, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ಚಂದ್ರಶೇಖರ್ ಅಮೀನ್, ರವೀಂದ್ರ ಎಂ, ಬಾಬು ಮಲ್ಲಾರ್, ಕಾಪು ಪುರಸಭಾ ಸದಸ್ಯೆರ್ ಅನಿಲ್ ಕುಮಾರ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಕಾಪು ತಾಲೂಕ್ದ ಯೋಜನಾಧಿಕಾರಿ ಜಯಂತಿ, ಕಾಪು ವಲಯದ ಮೇಲ್ವಿಚಾರಕೆರ್ ಸರಿತಾ, ಸಿದ್ದಿದಾತ್ರಿ ತಂಡದ ಸಂಚಾಲಕೆರಾಯಿನ ಜಗದೀಶ್ ಮೆಂಡನ್, ಬೊಕ್ಕ ಪ್ರಬಂಧಕೆರ್ ಗೋವರ್ಧನ್ ಸೇರಿಗಾರ್ ಲೇಸ್ ಡ್ ಪಾಲ್ ಪಡೆಯೆರ್.
ಬೊಂಬೈ : ಚಿಣ್ಣರ ಬಿಂಬ ನೆತ್ತ ಮುತಾಲಿಕೆಡ್ ಮೀರಾರೋಡ್ ಶಿಬಿರ ಬೊಕ್ಕ ಸಾಂಸ್ಕೃತಿಕ ಪ್ರತಿಭಾ ಸ್ಪರ್ದೆ ಆ.13 ದಾನಿ ಸೆಂಟ್ ಆಗ್ನೇಸ್ ಹೈಸ್ಕೂಲ್ ಡ್ ನಡಪರೆ ಉಂಡು.
ಲೇಸ್ದ ಉದಿಪನನ್ ರೈ ಸುಮತಿ ಎಜುಕೇಶನ್ ಟ್ರಸ್ಟ್, ಸೈಂಟ್ ಆಗ್ನೇಸ್ ಇಂಗ್ಲೀಷ್ ಹೈಸ್ಕೂಲ್ ಬೊಕ್ಕ ಕೆ.ಎಸ್ ಮೆಹತ ಸ್ಕೂಲ್& ಜೂನಿಯರ್ ಕಾಲೇಜ್ದ ಚೇರ್ಮನ್ ಡಾ.ಅರುಣೋದಯ್ ಎಸ್. ರೈ ಬಿಳಿಯೂರುಗುತ್ತು ಮೇರ್ ನಡಪಾಯೆರೆ ಉಲ್ಲೆರ್. ಲೇಸ್ದ ಗುರ್ಕಾರ್ಮೆನ್ ಬೊಂಬೈ ಬಂಟ್ಸ್ ಸಂಘದ ಪನವುದ ಒತ್ತು ಪಾಲವೆರ್ ರಮೇಶ್ ಎಮ್ ಶೆಟ್ಟಿ ಸಿದ್ದಕಟ್ಟೆ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಶುಭಂ ಹೋಟೆಲ್ದ ಉದಯ್ ಎಮ್ ಶೆಟ್ಟಿ ಮಲಾರ್ಬೀಡ್, ಶ್ರೀ ಸಾಯಿ ಬಾಲಾಜಿ ಕೋ-ಆಪರೇಟಿವ್ ಸಂಘದ ಡೈರೆಕ್ಟರ್ ಯೋಗೇಂದ್ರ ಎಸ್ ಗಾಣಿಗ, ನಿತ್ಯಾನಂದ ಸೇವಾ ಸಮಿತಿ ಮಹಿಳಾ ವಿಭಾಗದ ಅಧ್ಯಕ್ಷೆರ್ ಜಯಶ್ರೀ ಬಿ ಶೆಟ್ಟಿ ಈ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.
ಬೊಕ್ಕ ಭಾಷಣ, ಭಾವಗೀತೆ, ಜನಪದ ಗೀತೆ, ಮೊನೋ ಆ್ಯಕ್ಟ್, ದೇಶಭಕ್ತಿ ಗೀತೆ ಇಂಚನೆ ಕೆಲವು ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.
ನಟಿ ಸ್ಪಂದನಾ ಮೇರ್ನ ಮರಣ ಮಾತೆರಗ್ಲ ಆಘಾತನ್ ಕೊರ್ತುಂಡು. ಎಲ್ಯ ಪ್ರಾಯಡೆ ಪರಲೋಕ ಸೇರಿನ ಸ್ಪಂದನಾ ಮರಣರ್ದ್ ವಿಜಯ ರಾಘವೇಂದ್ರ ಬೊಕ್ಕ ಬಿ.ಕೆ ಶಿವರಾಂ ಕುಟುಂಬಗ್ ಭಾರಿ ಮಲ್ಲ ನಷ್ಟ ಆತ್ಂಡ್. ತನ್ನ ಮಗನ ಕಣ್ಣ ನೀರ್ನ್ ತೂಯಿನ ವಿಜಯ ರಾಘವೇಂದ್ರಲ ಕಂಗಾಲಾತೆರ್ .
ಮಲ್ಲ ಮಲ್ಲ ಗಣ್ಯೆರ್ ಬತ್ತ್ ದ್ ಸ್ಪಂದನಾನ ಅಂತಿಮ ದರ್ಶನನ್ ಮಲ್ತೊಂದು ಉಲ್ಲೆರ್. ಒವ್ವೆ ರೀತಿದ ನುರ್ಕಾಟಿಗೆ ಆವರೆ ಬಲ್ಲಿ ಪಂದ್ ಪೋಲಿಸೆರ್ ಬ್ಯಾರಿಕೇಡ್ ಮಾತ ಪಾಡ್ದ್ ಇನಿ ಮದ್ಯಾಹ್ನ 2 ಗಂಟೆ ಮುಟ್ಟ ಅಂತಿಮ ದರ್ಶನಗ್ ಅವಕಾಶ ಕೊರ್ತೆರ್. ಬೊಕ್ಕ ಬೆಂಗ್ಲೂರ್ದ ಶ್ರೀರಾಮಪುರದ ಹರಿಶ್ಚಂದ್ರ ಘಾಟ್ಡ್ ಅಂತ್ಯಕ್ರಿಯೆ ನಡಪರೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಮಸ್ತ್ ಕೇಸ್ ಲೆಡ್ ಇತ್ತ್ ದ್ ಕೋರ್ಟು ವಿಚಾರಣೆಗ್ ಹಾಜರ್ ಆವಂದೆ ಒಂಜರೆ ವರ್ಷರ್ದ್ ದೆಂಗ್ ದ್ ಕುಲ್ದ್ ಇತ್ತಿನ ಆರೋಪಿನ್ ಕುಡ್ಲದ ಸಿಸಿಬಿ ಪೋಲಿಸೆರ್ ಪತ್ತ್ ದ್ ದುಂಬುದ ಕ್ರಮಕ್ಕಾದ್ ಸುರತ್ಕಲ್ ಪೊಲೀಸ್ ಠಾಣೆಗ್ ಕೊರ್ತೆರ್.
ಮೊಹಮ್ಮದ್ ನೌಷದ್ ಯಾನೆ ಉಲ್ಲಂಜೆ ನೌಷದ್ (28) ಉಲ್ಲಂಜೆ, ಮೆನ್ನಬೆಟ್ಟು ಪನ್ಪುನ ಆರೋಪಿ 2018 ಡ್ ಸುರತ್ಕಲ್ ಪೊಲೀಸ್ ಠಾಣಾ ವ್ಯಾಪ್ತಿಡ್ ನಡತಿನ ದೀಪಕ್ ರಾವ್ ಕೊಲೆ ಪ್ರಕರಣ, ಮುಲ್ಕಿ ಠಾಣಾ ವ್ಯಾಪ್ತಿಡ್ ನಡತಿನ ಕೊಲೆ ಬೆದರಿಕೆ ಪ್ರಕರಣ, ಬೆಲೆಡ್ ಇತ್ತಿನ ಪೊಲೀಸೆರ್ರ್ನ ಕೊಲೆ ಯತ್ನ ಪ್ರಕರಣ ಬೊಕ್ಕ ಮಹಿಳಾ ಠಾಣೆಡ್ ದಾಖಲಾಯಿನ ಪೋಕ್ಸೋ ಪ್ರಕರಣಡ್ ಭಾಗಿಯಾದ್ ಇತ್ತೆರ್.
ಆರೋಪಿನ ಪತ್ತೆ ಕಾರ್ಯಡ್ ಸಿಸಿಬಿ ಘಟಕದ ಎಸಿಪಿ ಪಿ ಎ ಹೆಗಡೆ, ಪೊಲೀಸ್ ನಿರೀಕ್ಷಕೆರ್ ಶ್ಯಾಮ್ ಸುಂದರ್ ಹೆಚ್ ಎಂ, ಪಿಎ ಶರಣಪ್ಪ ಭಂಡಾರಿ ಬೊಕ್ಕ ಸಿಬ್ಬಂದಿಲು ಈ ಪೊರ್ತುಡು ಇತ್ತೆರ್.
ಉಳ್ಳಾಲ: ಸ್ಯಾಂಡಲ್ ವುಡ್ ದ ಪುಗರ್ತೆದ ನಟಿ ಮಾಲಶ್ರೀ ಬೊಕ್ಕ ಆರೆನ ಮಗಲ್ ಅನನ್ಯಾ ಮೊಕುಲು ಕುತ್ತಾರ್ ಡ್ ಕೊರಗಜ್ಜನ ಆದಿ ಜಾಗೆಗ್ ಭೇಟಿ ಕೊರ್ದು ಆಶೀರ್ವಾದ ಪಡೆಯೆರ್.
ಈ ಪೊರ್ತುಡು ಮಾಲಶ್ರೀ ಮೇರ್ ಪಾತೆರ್ದ್, ಮೂಜಿ ತಿಂಗೊಲ್ದ ಪಿರವು ಈ ಕೊರಗಜ್ಜನ ಕಟ್ಟೆಗ್ ಬತ್ತ್ ದ್ ಅಜ್ಜಡ ಕೇಂಡ್ ದ್ ಇತ್ತೆ. ಮಾತಲ ಆಶ್ಚರ್ಯ ಪನ್ಪುನಂಚ ನಡತ್ಂಡ್. ಕ್ಷೇತ್ರದ ಶಕ್ತಿನ್ ಪನಿಯೆರೆ ಆವೊಂದು ಇಜ್ಜಿ. ಮುಲ್ಪ ಮಸ್ತ್ ಪಾಸಿಟಿವ್ ಎನರ್ಜಿ ಉಂಡು. ಉಲಯಿ ಪೋನಗನೇ ಸಾನಿಧ್ಯದ ಶಕ್ತಿ ಗೊತ್ತಾಪುಂಡು. ಎನ್ನಿದಿನಂಚ ಆಯಿನೆಕ್ಕ್ ಪರಕೆ ಸಂದಾದ್ ಕುಡ ಆಶೀರ್ವಾದ ದೆತೊನರೆ ಕುಟುಂಬ ಬೊಕ್ಕ ದೋಸ್ತಿಲೆನೊಟ್ಟಿಗೆ ಬೈದೆ. ನನಲ ಬರ್ಪೆ ಪಂದ್ ಪಂಡೆರ್.
ಈ ಪೊರ್ತುಡು ಶ್ರೀ ಪಂಜಂದಾಯ ಬಂಟ ವೈದ್ಯನಾಥ ಆದಿ ಕೊರಗತನಿಯ ಸೇವಾ ಟ್ರಸ್ಟ್ ದಕುಲು ಮಾಲಶ್ರೀ ಬೊಕ್ಕ ಮಗಲೆನ್ ತಮ್ಮನ ಮಲ್ತೆರ್.
ಯಕ್ಷತರಂಗ ಬೆಂಗ್ಲೂರ್ ದ ಮುತಾಲಿಕೆಡ್ ಶಾಲೆದ ಜೋಕುಲೆಗ್ ಯುನಿಫಾರ್ಮ್ ಪಟ್ಟುನ ಲೇಸ್ ರಘುವನ ಹಳ್ಳಿಡ್ ಇಪ್ಪುನ ಶ್ರೀ ಸಿದ್ದಗಂಗಾ ವಿದ್ಯಾ ಕೇಂದ್ರಡ್ ಇಂಚಿಪ್ಪ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಸಿದ್ದಗಂಗಾ ಶಾಲೆದ ಸ್ಥಾಪಕ ಸದಸ್ಯೆರ್, ಶಿಕ್ಷಕೆರ್ ಸಿ. ಎನ್. ನಾಗರಾಜ್ ಮೇರ್ ಪಾತೆರ್ದ್, ಯಕ್ಷತರಂಗ ಬೆಂಗ್ಲೂರ್ ಡ್ ಕರಿನ 12 ವರ್ಷೊರ್ದಿಂಚಿ ಯಕ್ಷಗಾನ ತರಬೇತಿನ್ ಕೊರ್ದು ಸುಮಾರ್ ಯಕ್ಷಗಾನ ಪ್ರಸಂಗನ್ ಪ್ರದರ್ಶನ ಮಲ್ತ್ ದ್ ಜನ ಮೆಚ್ಚುಗೆಗ್ ಪಾತ್ರ ಆತ್ಂಡ್. ಯಕ್ಷತರಂಗ ಯಕ್ಷಗಾನಗ್ ಮಾತ್ರ ಸೀಮಿತ ಆವಂದೆ ಅನಾಥ ಆಶ್ರಮ ಬೊಕ್ಕ ಸರ್ಕಾರಿ ಶಾಲೆಡ್ ಓದುನ ಬಡ ಜೋಕುಲೆಗ್ ಸಕಾಯನ್ ಕೊರೊಂದು ಉಂಡು. ಆತೆ ಅತ್ತಾಂದೆ ಬೇತೆ ಸುಮಾರ್ ಸಮಾಜಮುಖಿ ಬೇಲೆಲು ಏಪಲ ನಡತೊಂದು ಉಂಡು. ಕರಿನ ಸುಮಾರ್ ವರ್ಷೊದಿಂಚ ಸಿದ್ದಗಂಗಾ ಶಾಲೆದ ಚಾವಡಿಡ್ ಯಕ್ಷತರಂಗದ ಮುತಾಲಿಕೆಡ್ ಯಕ್ಷಗಾನದ ತರಬೇತಿ ಶಿಬಿರ ನಡತೊಂದು ಇತ್ತ್ಂಡ್. ಈ ಶಾಲೆದ ಬಡ ಕಲ್ಪಾರ್ಥಿನಕ್ಲೆಗ್ ಧರ್ಮಾರ್ಥವಾದ್ ಯಕ್ಷಗಾನದ ತರಬೇತಿ ಕೊರೊಂದುಪ್ಪುನ ಬೊಕ್ಕ ಉಂದುವೇ ಶಾಲೆಡ್ ಓದೊಂದು ಇಪ್ಪುನ ಜೋಕುಲೆಗ್ ಯುನಿಫಾರ್ಮ್ ಪಟ್ಟುನ ಲೇಸ್ ಇಸೇಸ ಆತ್ಂಡ್. ನನದ ದಿನಟ್ಟ್ ಯಕ್ಷತರಂಗದ ಪ್ರತಿಯೊಂಜಿ ಲೇಸ್ ಪುಗರ್ತೆ ಪಡೆಯಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಯಕ್ಷತರಂಗ ಬೆಂಗ್ಲೂರ್ ದ ಅಧ್ಯಕ್ಷೆರ್ ಪಳ್ಳಿ ವಿಶ್ವನಾಥ ಶೆಟ್ಟಿ ಮೇರ್ ಪಾತೆರ್ದ್, ಕರಿನ 12 ವರ್ಷದ ಪಿರವು ತುಳುನಾಡ್ ದ ಯುವಜನತೆ ತನ್ನ ಜೀವನಗಾದ್ ಬೆಂಗ್ಲೂರ್ ಗು ಬತ್ತ್ ದ್, ಸಮಯ ಇಜ್ಜಿಂದಿನ ಪೊರ್ತುಡುಲ ನಮ್ಮ ಸಂಸ್ಕೃತಿನ್ ಮದಪೆರೆ ಬಲ್ಲಿ ಪನ್ಪುನ ಮನವರಿಕೆಡ್ ಉತ್ಸಾಹ ಇಪ್ಪುನ ಜವನೆರೆನೊಟ್ಟಿಗೆ ಸ್ಥಾಪನೆ ಆಯಿನ ಯಕ್ಷತರಂಗ ಬೆಂಗ್ಲೂರ್ ಇನಿ ಸುಮಾರ್ ಬಡ ಕುಟುಂಬಗ್ ರಕ್ಷ ರಂಗವಾದ್ ರಕ್ಷಣೆನ್ ಕೊರೊಂದು ಉಂಡು. ಯಕ್ಷತರಂಗದ ಯಕ್ಷಗಾನ ತರಬೇತಿನ್ ಪಡೆಯಿನ ಕಲ್ಪಾರ್ಥಿಲು ನನದ ಪುಗರ್ತೆದ ಕಲಾವಿದೆರಾದ್ ದುಂಬಾರಿಯಾಡ್ ಪಂದ್ ಆಶೀರ್ವಾದ ಮಲ್ತೆರ್.
ಚಾವಡಿಡ್ ಯಕ್ಷತರಂಗ ಬೆಂಗ್ಲೂರ್ ದ ಸಂಚಾಲಕೆರ್ ಗೋಪಾಲ್ ಪೂಜಾರಿ ಪಟ್ಟೆ, ಕಾರ್ಯದರ್ಶಿ ಸುಕೇಶ್ ಶೆಟ್ಟಿ ಮಾಳ, ಕೋಶಾಧಿಕಾರಿ ನಿರಂಜನ್ ಸುವರ್ಣ ಪಟ್ಟೆ ಇತ್ತೆರ್. ಲೇಸ್ ದ ಯಶಸ್ವಿಗ್ ಸಂತೋಷ್ ಶೆಟ್ಟಿ, ಸುರೇಂದ್ರ ಪೂಜಾರಿ, ಪ್ರದಿಪ್ ಶೆಟ್ಟಿ, ಚಿದಂಬರ ಶೆಟ್ಟಿ ಬೊಕ್ಕ ಶ್ರೀ ಸಿದ್ದಗಂಗಾ ಶಾಲೆದ ಆಡಳಿತ ಮಂಡಳಿ ಬೊಕ್ಕ ಜೋಕುಲು ಸಹಕಾರ ಮಲ್ತೆರ್.
ವರದಿ: ಸದಾನಂದ ಕಾರ್ಲ
ಕುಡ್ಲ: ಜೈ ತುಲುನಾಡ್ ಸಂಘಟನೆ ಮಂತಿನ ಬೇಲೆನ್ ಪುಗರ್ದ್, ತುಲು ಭಾಷೆದ ಮಿತ್ತ್ ಮೋಕೆ ಮಾನಾದಿಗೆನ್ ದೀದ್, ನಿಕ್ಲೆನ ಒಟ್ಟಿಗೆ ಯಾನ್ಲಾ ಉಲ್ಲೆ ಪನ್ಪುನ ಉತ್ತರನ್ ಅಸ್ಸಾಂದ ಮುಖ್ಯಮಂತ್ರಿ ಡಾ.ಹಿಮಂತ ಬಿಸ್ವ ಶರ್ಮಾ ಕಡಪುರ್ದು ಕೊರ್ತೆರ್.
ಭಾರತಪ್ಪೆನ ಪುಣ್ಯದ ಮಣ್ಣ್ಡ್ ತೆನ್ಕಾಯಿ ಪುಡೆತಕ್ಲು ದ್ರಾವಿಡೆರ್ಂದ್ ಪನ್ಪಾದ್ ಆನಿರ್ದ್ ಇನಿಮುಟ್ಟ ಈ ದೇಶೊಗು ತನ್ಕುಲೆನನೇ ಆಯಿನ ಸೇವೆನ್ ಸಂದಾವೊಂದು ಬೈದಿನಕುಲು, ಅಯಿಟ್ಲಾ ಭಾಷೆದ ವಿಷಯಡ್ ಪನ್ಪುನಾಂಡ ಪಂಚ ಮಹಾ ದ್ರಾವಿಡ ಭಾಷೆಲೆಡ್ ಪೆರಿಯ ಭಾಷೆ ತುಲು, ತುಲುಕು ಮೂಲು ಅಯಿತವೇ ಆಯಿನ ತಾನಮಾನ ಉಂಡು. ನಮ್ಮ ದೇಶೋಡೇ ಸಾಂಸ್ಕೃತಿಕವಾದ್ ದಿಂಜಿದಿನ ಸಿರಿತುಪ್ಪೆ ತುಲು ಪಂಡ್ದ್ ಲೋಕೊನೇ ಒತ್ತೊಂದಿನ ಸಂಗತಿ.
ತುಲುನಾಡ್ಡ್ ತುಲುಭಾಷೆ, ತುಲು ಲಿಪಿ, ತುಲು ಸಂಸ್ಕೃತಿ, ತುಲು ಆಚಾರೊ ವಿಚಾರೊಲೆನ್ ಒರಿಪೆರೆಗಾದ್ ಅವ್ವೇತೋ ತುಲುವ ಸಂಘಟನೆಲು ಪೊಂರ್ಬೊಂದು ಉಲ್ಲೆರ್. ಅಕ್ಲೆನ ಕೂಟೊಡು ಒಂಜಿ ಪಜ್ಜೆದುಂಬು ಉಪ್ಪುನ ಕೂಟ ಪಂಡ ಅವು ಜೈ ತುಲುನಾಡ್ (ರಿ.) ಕೂಟ ಪಂಡ ತಪ್ಪಾವಂದ್. ತುಲು ಲಿಪಿನ್ ತುಲುವೆರೆ ಉಡಲ್ಡ್ ಜೂವಪ್ಪ ಒರಿಪೆರೆಗಾದ್ ಪೇಂಟೆಡ್, ಊರು ಪರವೂರುಡು, ಹಳ್ಳಿ ಹಳ್ಳಿಡ್, ಇಲ್ಲ್ ಇಲ್ಲಗ್ ತುಲು ಲಿಪಿನ್ ಎತ್ತಾವುನ ಬೇಲೆ ಸುದ್ದಿ ಇಜ್ಯಂದೆ ಮಂತೊಂದೇ ಉಂಡು.ತುಲು ಭಾಷೆಗ್ ಮಾನಾದಿಗೆ ತಿಕ್ಕೊಡು, ನಮ್ಮ ಸಂವಿಧಾನದ ಎನ್ಮನೇ ಪರಿಚ್ಛೇಧಗ್ ಸೇರೊಡು ಪನ್ಪುನ ನ್ಯಾಯಯುತವಾದ್ ನಮ್ಮ ಹಕ್ಕ್ನ್ ಸರ್ಕಾರಡ್ ಕೇನೊಂದುಪ್ಪುನ ಈ ಸಂದೆರ್ಪುಡು ಜೈ ತುಲುನಾಡ್ (ರಿ.) ಕೂಟ ಒಂಜಿ ಪಜ್ಜೆ ದುಂಬು ಪೋದು, ನಮ್ಮ ದೇಶದ ಸ್ವಾತಂತ್ರ್ಯದ ಅಮೃತ ಉಚ್ಚಯೊದ ನೆಂಪುಡು ತುಲು ಪುರ್ಪ ಪನ್ಪುನ ಕಬಿತೆಲೆನ ಮಸ್ತಿರೆನ್ ಬೊಲಿಕೆಗ್ ಕನತ್ಂಡ್. ಉಂದೆಟ್ ತುಲುನಾಡ್ದ ಎಲ್ಯ ಮಲ್ಲ ಸುಮಾರ್ 111 ಜನ ಪೆರ್ಮೆದ ತುಲು ಕಬಿಕುಲು ಬರೆಯಿನ, ದೇಶ ಭಕ್ತಿ ಗೀತೆ, ತುಲುನಾಡ ಗೀತೆ, ಬೆನ್ನಿದ ಪದ, ಬೀರೆರೆ ಪದೊಕುಲು ತುಲುಲಿಪಿಟ್ ಅಚ್ಚಿ ಆದುಂಡು. ಈ ಮಸ್ತಿರೆಕ್ ಪೇಜಾವರದ ಶ್ರೀ ಶ್ರೀ ವಿಶ್ವ ಪ್ರಸನ್ನ ಸ್ವಾಮಿಲು ಬೊಕ ಧರ್ಮಸ್ಥಳತ ಧರ್ಮದರ್ಶಿ ಡಾ| ವಿರೇಂದ್ರ ಹೆಗಡೆರ್ ಮದಿಪುದ ಪಾತೆರ ಬರೆದ್, ತುಲುನಾಡ್ನ್ ಒಂಜಿ ಕಾಲೊಡು ಆಳಿನ ಅಲುಪ ಸಂತನದ ಕುರ್ಲೆ ಡಾ.ಆಕಾಶ್ ರಾಜ್ ಜೈನ್ ಸುರುತ ಪಾತೆರ ಬರೆದ್, ತುಲುನಾಡ್ ತೂಯಿನ ಜನಮೆಚ್ಚಿನ ಕುಡೊರಿ ಧರ್ಮದರ್ಶಿ ಶ್ರೀ ಹರಿಕೃಷ್ಣ ಪುನರೂರು ಬೆರಿಬೊಟ್ಟುನ ಪಾತೆರ ಕೊರ್ತೆರ್. ಜೈ ತುಲುನಾಡ್ ಕೂಟ ಸಂಪೊಲಿಗೆ ಮಂತಿನ ಈ ಮಸ್ತಿರೆದ ಉಲಯಿ ತುಲು, ಕನ್ನಡ, ಹಿಂದಿ, ಇಂಗ್ಲಿಷ್ ಭಾಷೆಲೆಡ್ ತುಲು ಭಾಷೆನ್ ಬರೆದ್ ಲೋಕೊರ್ಮೆ ಇತ್ತಿನ ಮಾತೆರ್ಲಾ ಈ ಮಸ್ತಿರೆತ ತಿರ್ಲ್ನ್ ತೆರಿಯೊನೆರೆ ಅವಕಾಶ ಮಂತ್ದ್ಂಡ್.
ಈ ತುಲು ಪುರ್ಪನ್ ನಮ್ಮ ದೇಶೊದ ಪ್ರಧಾನಿ, ರಾಷ್ಟ್ರಪತಿ ಆತೇ ಅತ್ತಂದೆ ಮಾತಾ ರಾಜ್ಯದ ಮುಖ್ಯಮಂತ್ರಿನಕ್ಲೆಗ್, ಒಡಿಪು, ಕುಡ್ಲ, ಕಾಸ್ರೋಡುದ ಸಂಸದೆರೆಗ್, ಶಾಸಕೆರೆನಕ್ಲೆಗ್, ತುಲುಭಾಷೆಗ್ ಮಾನಾದಿಗೆ ದೆತ್ತ್ ಕೊರ್ಪುನ ಪೊಂರ್ಬಾಟೊಡು ನಿಕ್ಲೆನಲಾ ಬೆರಿಸಾಯ ಬೋಡು ಪನ್ಪುನ ಬಿನ್ನಯದ ಓಲೆದೊಟ್ಟಿಗೆ ಕಡಪುರ್ದು ಕೊರ್ತುಂಡು. ಈ ಕಡಪುರ್ದು ಕೊರಿನ ಕಾಕಜಿ ಅಂಚನೆ ಬೂಕುಗು ನಮ್ಮ ಪೆರ್ಮೆದ ಅಸ್ಸಾಂದ ಮುಖ್ಯಮಂತ್ರಿ ಡಾ.ಹಿಮಂತ ಬಿಸ್ವ ಶರ್ಮಾ ಎಂಕುಲು ನಿಕುಲೆನ ಒಟ್ಟಿಗೆ ನಿಕುಲೆನ ಸೇವೆಗ್ ಬೆರಿತಾಂಗ್ ಉಲ್ಲ ಪನ್ಪುನ ಒಂಜಿ ಪೆರ್ಮೆದ ಕಾಕಜಿನ್ ಕಡಪುರ್ದು ಕೊರಿನವು ತುಲುಕು ಅಸ್ಸಾಂರ್ದ್ಲ ಮಾಮಲ್ಲ ಬೆರಿಬಲ ತಿಕ್ಕಿಲೆಕ ಆಂಡ್.
ಕಾರ್ಲ : ಸಂಸ್ಕೃತಿ ಸಿಂಚನ ರೆಂಜಾಳ, ಶ್ರೀ ಮಹಾಮ್ಮಾಯಿ ಭಜನಾ ಮಂಡಳಿ ರೆಂಜಾಳ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ರೆಂಜಾಳ ನೆತ್ತ ಮುತಾಲಿಕೆಡ್ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡು(ರಿ.) ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಉಚಿತ ತರಗತಿದ ಉದಿಪನದ ಲೇಸ್ ರೆಂಜಾಳದ ವಾಣಿಕಲಾ ಮಂದಿರ ಸರಕಾರಿ ಸಂಯುಕ್ತ ಪ್ರೌಢಶಾಲೆಡ್ ಆಗಸ್ಟ್ 13 ದಾನಿ ಮಧ್ಯಾಹ್ನ 2.30 ಕ್ಕ್ ನಡಪರೆ ಉಂಡು.
ಲೇಸ್ ದ ಉದಿಪನನ್ ಶ್ರೀ ಮಹಾಮ್ಮಾಯಿ ದೇವಲ್ಯದ ಆಡಳಿತಾಧಿಕಾರಿ ಬಿ. ಮಹಾವೀರ ಹೆಗ್ಡೆ ಬ್ರಾಣಬೆಟ್ಟು ಮಲ್ಪೆರೆ ಉಲ್ಲೆರ್. ಗುರ್ಕಾಮೆನ್ ಶ್ರೀ ಮಹಾಮ್ಮಾಯಿ ಭಜನಾ ಮಂಡಳಿ ಸಂಚಾಲಕೆರ್ ಸುಪ್ರಿಯ ಬೊಕ್ಕ ಮಲ್ಲ ಬಿನ್ನೆರಾದ್ ಜೈ ತುಲುನಾಡು(ರಿ.) ಅಧ್ಯಕ್ಷೆರ್ ವಿಶು ಶ್ರೀಕೇರ, ಬಿನ್ನೆರಾದ್ ರೆಂಜಾಳ ಹೈಸ್ಕೂಲ್ ದ ಮುಖ್ಯೋಪಾಧ್ಯಾಯೆರ್ ಸ್ವರ್ಣಲತಾ, ರೆಂಜಾಳ ಪ್ರಾಥಮಿಕ ಶಾಲೆದ ಮುಖ್ಯೋಪಾಧ್ಯಾಯೆರ್ ವಿಶಾಲಾಕ್ಷಿ, ರಮೇಶ್ ಶೆಟ್ಟಿ ಮಂಜೊಟ್ಟು, ರೆಂಜಾಳ ಸಾರ್ವಜನಿಕ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಶಿಕ್ಷಕೆರಾಯಿನ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಪವಿತ್ರ ಕೋಟ್ಯಾನ್ ಬೆಳುವಾಯಿ ಈ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.
