ಕಾರ್ಲ : ಭಾರತ ಸರಕಾರದ ವತಿರ್ದ್ ಆಜಾದಿ ಕಾ ಅಮೃತ ಉಚ್ಚಯ ಪೊರ್ತುಡು ಮಕರಸಂಕ್ರಾಂತಿ ಪರ್ಬದಾನಿ ಸೂರ್ಯ ನಮಸ್ಕಾರ ಲೇಸ್ ನ್ ಸರಕಾರಿ ಸಾರ್ವಜನಿಕ ಆಸ್ಪತ್ರೆ ವತಿರ್ದ್ ಜೆಸಿಸ್ ಆಂಗ್ಲ ಮಾದ್ಯಮ ಶಾಲೆಡ್ ಆಚರಣೆ ಮಲ್ತೆರ್ .ಸುಮಾರ್ ನೂದು ಜೋಕುಲು ಪಾಲ್ ಪಡೆದಿತ್ತೆರ್ .
ಲೇಸ್ ನ್ ಉದಿಪನ ಮಲ್ತಿನ ಡಾಕ್ಟರ್ ಮಾನಸಾ ಶ್ರೀ ರಾಮ ತುಡರ್ ಅರ್ಲಾದ್ . ಡಾಕ್ಟರ್ ಸುಜಾತಾ ಶೆಟ್ಟಿ,ಡಾಕ್ಟರ್ ಲಹರಿ, ಡಾಕ್ಟರ್ ಅಂಬಿಕಾ, ಶಾಲಾ ಮುಖ್ಯ ಶಿಕ್ಷಕಿ ಸುರೇಖಾರಾಜ್ ಪಾಲ್ ಪಡೆದಿತ್ತೆರ್ .
ಒಡಿಪು : ಒಡಿಪು ಶ್ರೀಕೃಷ್ಣ ಮಠತ ಪರ್ಯಾಯ ಉಚ್ಚಯದ ಲೇಸ್ ಗ್ ಕಾರ್ಕಳರ್ದ್ ಪುದೆ ಕಾಣಿಕೆ ಕೊರ್ಪಿನ ಬಗ್ಗೆ ಸಮಾಲೋಚನಾ ಸಭೆನ್ ತಾರೀಖ್ 13.01.2022 ಗ್ ಗುರುವಾರದಾನಿ ಬೈಯ್ಯಗ್ 5.00 ಗಂಟೆಗ್ ಸರಿಯಾದ್ ಶ್ರೀ ಮಾರಿಗುಡಿ ದೇವಸ್ಥಾನ ಕಾರ್ಲಡ್ ನಡತುಂಡು .
ಕಾರ್ಲ ಮಾರಿಗುಡಿಟ್ ಸೋಮವಾರ ತಾರೀಖ್ 17/1/2022 ಕ್ಕ್ ಕಾಂಡೆ 9 ಗಂಟೆಗ್ ಮೂಜಿ ಗಂಟೆ ಮುಟ ಪುದೆ ಕಾಣಿಕೆ ದೆತೊನುವ ಪಂದ್ ಕಾರ್ಲ ಪುದೆ ಕಾಣಿಕೆದ ವ್ಯವಸ್ಥಾಪಕೆರಾಯಿನ ಅನಂತಕೃಷ್ಣ ಶೆಣೈ ಪ್ರಕಟಣೆಡ್ ತೆರಿಪಾದೆರ್
ಎಚ್ಚದ ಮಾಹಿತಿಗಾದ್: 9880012313
ಮಣಿಪಾಲ: ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆದ ಮಾನವ ಸಂಪನ್ಮೂಲ ವಿಭಾಗದ ಚೀಫ್ ಮ್ಯಾನೇಜರ್ ಸುರೇಶ್ ಶೆಣೈ ತನ್ನ ವಿಶಿಷ್ಟ ಪ್ರತಿಭೆ ಮುಖೇನ “ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್” ಡ್ ತನ್ನ ಸಾಧನೆನ್ ದಾಖಲ್ ಮಲ್ದೆರ್ .
ಭಾರತೊಡು ರಂಗ್ ಪಾಡoದೆ ಪರತ್ತ್ ಮ್ಯಾಗಝೀನ್ ಕಾಕಜಿ ಪಾರ್ದ್ ಚಿತ್ರಗಾರಿಕೆಯಾಯಿನ Collage Art- Painting without Paint no 233 ಮಲ್ದಿನ ಬಗ್ಗೆ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್ಗ್ ಆಯ್ಕೆಯಾದ್ ಸಾಧನೆ ಮಲ್ದೆರ್ .
ರಂಗ್ ಪಾಡoದೆ ಪರತ್ತ್ ಮ್ಯಾಗಝೀನ್ ಕಾಕಾಜಿ ದ ಮುಖೇನ ಚಿತ್ರ ಮಲ್ಪುನ ಕಲೆನ್ ಆರ್ನ ಪೊಪ್ಪ ದಿವಂಗತ ಕೆಪಿ ಶೆಣೈ ಅರೆರ್ದ್ ಕಲ್ತ್ ಇತ್ತೆರ್ . ಈ ವಿಶಿಷ್ಟ ಚಿತ್ರಗಾರಿಕೆ ಮೂಜಿ ಆಯಾಮ ಉಪ್ಪುನ ಪ್ರಭಾವದಲಕ ತೋಜುನ ಚಿತ್ರ ಕಲೆಯಾತುಂಡು ಅವೆನ್ ಕುಡೋರ ಏರ್ಲ ಕಾಪಿ ಮಲ್ಪರೆ ಸಾಧ್ಯ ಇಜ್ಜಿ . ಉಂದೆನ್ ಮರುಸೃಷ್ಟಿ ಮಲ್ಪರೆ ಮೂಲ ಕಲಾವಿದೆ.ಸುರೇಶ್ ಶಣೈ ತನ್ನ ಈ ಅಪರೂಪದ ಪ್ರತಿಭೆಗಾದ್ ಇಂಡಿಯಾ ಬುಕ್ ಅಫ್ ರೆಕಾರ್ಡ್ಸ್ಡ್ ತನ್ನ ಪುದರ್ ನ್ ಬರೆಯೆರಿ .
ಕೇರಳ : ಅಯ್ಯಪ್ಪ ಸ್ವಾಮಿ ಭಕ್ತ ಸೇವಾ ಸಮಿತಿ (ರಿ.) ವಿವೇಕ ನಗರ ಬಲ್ಲಾಳ್ ಬಾಗ್ ಮೆಕ್ಲೆನ ಅಯ್ಯಪ್ಪ ಮಾಲಾಧಾರಿಲೆನ ಕೂಟ ಶ್ರೀ ಕ್ಷೇತ್ರ ಶಬರಿ ಮಲೆತ ತಿರ್ತ ಅಂಗಣೊಡು ತುಳುನಾಡ ಕೊಡಿ ನ್ ಮೆನ್ಕಾವುನ ಮುಖೇನ ತುಲುವಪ್ಪೆಗ್ ಗೌರವ ಸಂದೈತ ಮಲ್ತೆರ್. ನಿಕ್ಲೆಗ್ ನಮ ನಂಬಿಚಿ ಮಲೆತ ಮಿತ್ತ್ ದ ದೇವೆರ್ ಅಂಚನೆ ನಮನ ತುಳುವಪ್ಪೆ ಎಡ್ಡೆ ಮಲ್ಪಡ್ ಸಮಸ್ತ ತುಲುವೆರ್ನ ಪರವಾದ್ ಉಡಲ್ ಜಿಂಜಿ ಸೊಲ್ಮೆಲು.
ಪೊಣ್ಣು. ಈ ಪದ ಕೇನ್ನಗ ಕುಲ್ದಿನಾಯೇ ಲಕ್ಕುವೆ,ಲಕ್ಕುದ್ ಉಂತಿನಾಯೇ ಕೈ ಗೋಡ್ಯಾದು ಉಂತುವೆ. ಅಮ್ಮೆರೆನ ಮೋಕೆಗ್ ಅಪ್ಪೆನ ಜೀವನದ ಉಸುಲುಡ್ ಒಂಜಿ ಬಾಲೆ ಒರುಂಬ ತಿಂಗೊಲು ಬೆಚ್ಚ ಗರ್ಬಡ್ ಬುಲೆಯುಂಡು ಅವ್ವ್ ಅಪ್ಪೆ ಪನ್ಪಿ ಒಂಜಿ ಪೊಣ್ಣಗು ಮಾತ್ರ ಸಾಧ್ಯಗೇ. ಕೆಕ್ಕಿಲುಡ್ ಕರಿಯಮಣಿ ಪಾಡುದು, ಏಲ್ ಪಜ್ಜೆಡು ಲೋಕೊದ ಏಲ್ ನಿಯಮನು ತೋಜಾದ್ ಇಲ್ಲು ಬೊಲ್ಪು ಮಲ್ಪುನಾಲ್ ಬೊಡೆದಿ ಪನ್ಪಿ ಪೊಣ್ಣು. ಚಕ ಚಕ ನಲಿತೊಂದು, ಪುಗೆಲುಡು ಕುಲ್ಲೊದು ಅಮ್ಮೆರೆನ ಮೋಕೆದ ಮಗಲ್ ಆಲ್ ಪೊಣ್ಣು. ಒರಿ ಕವಿ ಒಂಜಿ ದೇಶ, ರಾಜ್ಯ, ಒಂಜಿ ಸಂಸ್ಕೃತಿ, ಒಂಜಿ ಪಚ್ಚೆ ಪಜೀರುನುಲಾ ಒಂಜಿ ಪೊಣ್ಣಗೇ ಹೋಲಿಕೆ ಮಲ್ದೆ. ದಾಯೆ ಪಂಡ ಪೊಣ್ಣು ಪನ್ಪಿನ ಕಣ್ಣುದ ಪೊರ್ಲುಗ್, ಕೈತ ಪುಂಡಿಗ್ ಎಣಿಕೆಗ್ ತಿಕ್ಕಂದಿ ಸೊತ್ತುಂದು.
ಬುಲೆನಗ ಅಮ್ಮೆರೆನ ಮೋಕೆಗ್ ಕುಂದು ಬತ್ತುಂಡಲಾ,ಅಪ್ಪೆ ಮೋಕೆದ ರಂಗುಗ್, ಕುಂದೆಲ್ ಬರಂದಿಲೆಕ, ಅಪ್ಪೆನ ಆಸೆಗ್ ಚಲಿ ನೀರು ತೇಪಂದೇ, ನಲಿಕೆಡ್, ಅಭಿನಯಡ್, ತನ್ನ ಪಾತೆರದ ಪೊರ್ಲುಡು ಪುಗಾರ್ತೆ ಕನತಿ ಪೊಣ್ಣು ಮಗಲೆನ ಸಾಧನೆ ಪಜ್ಜೆನ್ ಎಸಲು ಎಸಲಾದ್ ಬುಡ್ಪಾದ್ ನಿಕುಲೆನ ದುಂಬು ದೀವರೆ ಬಯ್ದೆ. ಆರೆ ವಂದನ ಭಂಡಾರಿ.
ಮೋಕೆ ಸಂಪುಡ್ ಜೋಕೆದುಲಾಯಿ, ಬಿತ್ತಿ ಬೀಜಗು ಪೊರ್ಲ ಫಲ. ಅಪ್ಪೆ ಮಟ್ಟೆಲುಡು ಲೋಕ ನೀತಿಗ್, ಸಂಸ್ಕಾರದ ಜೀವನೊಗು ಉದಿತಿ ಮಗಲ್. ಕಸ್ತೂರಿ ಶೆಟ್ಟಿ ಅಮ್ಮ ಬೊಕ್ಕ ಸಂತೋಷ್ ಭಂಡಾರಿ ಮೊಕುಲೆನ ದಾಂಪತ್ಯದ ಜೀವನಡ್ ಉದಿತಿ ಬಾಲೆಗ್ ವಂದನ ಪನ್ಪಿ ಪುದರ್ ದೀಪೆರ್. ಈ ವಂದನ ಶ್ರೀ ವಿದ್ಯಾವರ್ಧಕ ಹೈಸ್ಕೂಲ್ ಮೀಯಾಪದವು ,ಸರೋಜಿನಿ ಮದುಸೂದನ್ ಕಾಲೇಜ್ ಅತ್ತಾವರ ಕುಡ್ಲ, ಶ್ರೀನಿವಾಸ್ ಇನ್ಸ್ಟಿಟ್ಯೂಟ್ ಆಪ್ ಇಂಜಿನಿಯರಿಂಗ್ ವಲಚ್ಚಿಲ್ ಕುಡ್ಲ ತನ್ನ ಇಂಜಿನಿಯರಿಂಗ್ ಮಲ್ತುದ್ ತನ್ನ ಬರವುದಕೊಟ್ಯಡು ಕಲ್ಪಾರ್ತಿಯಾದಿತ್ತಿನಾರ್.
ಅಮ್ಮೆರೆ ಮೋಕೆಗ್ ಕುಂದು ಬತ್ತುಂಡಲಾ ಅಜ್ಜಿ ತಾಂಕಿನ ಮೋಕೆದ ಪುಲ್ಲಿ. ಲೋಕದ ಜ್ಞಾನ, ತಾನುಲಾ ದಾದಲಾ ಮಲ್ಪೊಡು ಪನ್ಪಿ ಹಠ. ಪಾತೆರದ ಎಸಲು ಮುತ್ತುದಲೆಕ,ನಲಿಕೆಗ್ ಉಂತುಂಡ ಕಾರ್ ನೆಲಕ್ ಊರರೇ ಆವಂದಿ ಮನಸ್ಸುದಲೆಕ.
4ನೇ ತರಗತಿಡು ಇಪ್ಪುನಗನೇ ನಲಿಕೆದುಲಾಯಿದ ಚಾತುರ್ಪ ತೋಜಾಯರೇ ಪಿದಾಡಿನ ಮೇರ್ 2003 ನೇ ಇಸವಿಡ್ ಜಿಲ್ಲಾ ಮಟ್ಟಡ್ ನಡತಿನ ಬಾಲಕಮೇಳಡ್ ಪದ ಪನ್ಪಿನೆಟ್ಟ್ ಸುರುತ ಇನಾಮು ಗೆತೊನುನ ಮುಖೇನ ಮೇರೆನ ಕಲಾ ಬದುಕುದ ತಾದಿ ಮುಟ್ಟರೆ ಪಿದಾಡಿನಾರ್. ಒವ್ವೇ ತರಬೇತಿದಾಂತೆ ಪೂರ ನೃತ್ಯದ ಆಯಾಯಮೊಲೆನ್ ಕಲ್ತುದಿನಾರ್.ಅವೇನ್ ರಂಗ ಮಂಟಪಡ್ ತನ್ನ ನಲಿಕೆದ ಚಾತುರ್ಪನ್ ತೋಜಾದಿನ ಬಿರ್ಸೆದಿ.ರಂಗ ಚಾವಡಿಡ್ ಅಭಿನಯ ಮಲ್ಪೊಡು ತಾನುಲಾ ಒಂಜಿ ನಟಿ ಆವೊಡು ಪಂದ್ ಕಾಸರಗೋಡುದ ರಾಷ್ಟ್ರೀಯ ನಾಟಕ ಶಾಲೆಡ್ ಪಾಲು ಪಡೆಯೊಂದು, “ಮಾಯಾ ಪೆಟ್ಟಿಗೆ ” ಪನ್ಪಿ ಪುದರ್ ಪುಗಾರ್ತೆದ ನಾಟಕಡೊ ಪಾಲು ಪಡೆಯೊಂದಿತ್ತಿನಾರ್.ಅಯಿಟ್ ಅಭಿನಯ ಮಲ್ತಿನಾರ್.
ರಂಗ ವಿಜ್ಞಾನ ಕೇಂದ್ರ ಉದಯ್ ಅಡ್ಯಂತಡ್ಕ ರಚನೆ ಬೊಕ್ಕ ನಿರ್ದೆಶನದ ಮಾಯಾಪೆಟ್ಟಿಗೆ ನಾಟಕ ಮಂಡ್ಯ ಜಿಲ್ಲೆದ ಆದಿ ಚುಂಚನಗಿರಿಟ್ ನಡತಿ ಸನ್ಮಾನ ಲೇಸುಡ್ ಪಾಲು ಪಡೆತಿನ ಕೂಟಡಿತ್ತಿನಕುಲು.ಅವ್ ಅತ್ತಂದೆ “ಸುಖ ನಿವಾಸ” ಪುಗಾರ್ತೆ ಕನಯಿನ ನಾಟಕೊಡುಲಾ ಪಾಲು ಪಡೆತಿನಾರ್ ವಂದನ.
ನಲಿಕೆ ಬೊಕ್ಕ ನಟನೆಡ್ ಪುಗಾರ್ತೆ ಕನತಿನ ವಂದನ, ತನ್ನ ಸ್ವರ ಚಾತುರ್ಪನುಲಾ ತೋಜಾದಿನಾರ್ ಮನಸು ಇನ್ಪಿರೇಷನ್ಡ್ ಸೊರ ಕೊರೊಂದಿತ್ತಿನಾರ್ ,ವಿಸಿನಿಂಗ್ ವಡ್ಸ್ ಪನ್ಪಿ ಒನ್ ಲೈನ್ಡ್ ಸೊರೊ ಕೊರ್ನಗ ಮೇರೆಗ್ ತಿಕ್ಕಿನವೇ ದಿಲ್ ರಂಗ್ ಟೀಮ್. ದಿಲ್ರಂಗ್ ದ 2 ಭಾಗಡುಲಾ ತನ್ನ ಸೊರೊಟು ಇಡೀ ತುಳುನಾಡು ಪಿರ ತಿರ್ಗುದ್ ತೂಯಿಲೆಕ ಮಲ್ತಿನಾರ್.ನೆಕ್ಕಾದ್ ಆರ್ ದಿಲ್ ರಂಗ್ದ ನಿರ್ದೇಶಕೆ ಅಭಿಷೇಕ್ ರಾವ್ ಮೇರೆನ್ ಏಪಲಾ ನೆನೆಪುವೆರ್.ಅವು ಅತ್ತಂದೆ ಮಲೆನಾಡು, ಕಹಾನಿ, ಮೌನ ಮಾತಾದಾಗ ಇಂಚಿತ್ತಿನ ಅಲ್ಬಮ್ ವೀಡಿಯೋಗು ಪೂರ ಮೆರೆನ ಸೊರೊಲಾ ಅಚ್ಚಾದು ಉಂತುದುಂಡು.
ಕಾಸರಗೋಡು ತುಳು ಅಕಾಡೆಮಿ ನಡಪಾಯಿನ ನಲಿಕೆ ಬೊಕ್ಕ ಪದತ ಕಜ್ಜ ಪಾಲುಪಡೆಯೊಂದಿನಾರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಕುಡ್ಲಡು ನಡತಿನ ತುಳುನಾಡ ವೈಭವ ನಲಿಕೆ ಪಂಥಡು ಮೂಜನೇ ಸ್ಥಾನ, ಸೋಲ್ಸ್ ಆ್ಯಂಡ್ ಬೀಟ್ಸ್ ದುಬೈ ನಲಿಕೆ ಪಂಥಡು ಮೂಜನೇ ಸ್ಥಾನ, ಮುಂಬೈ ಸಾಪಲ್ಯ ಸೇವಾ ಸಂಘ ನಡಪಾಯಿನ ವಿರ್ಚುವಲ್ ಕಲಾಕ್ಷೇತ್ರ ಪಂಥಡು 3ನೇ ಇನಾಮು, ರಾಷ್ಟ್ರೀಯ ಮಕ್ಕಳ ನಾಟಕೋತ್ಸವಡು ಪಾಲು ಪಡೆತಿನಾರ್,ದಿಯಾ ಡಾನ್ಸರ್ 2ನೇ ಇನಾಮು,ಡಾನ್ಸ್ ವಿದ್ ಮಾದುರಿ 2ನೇ ಇನಾಮು,ಶ್ರೀ ವೇದವ್ಯಾಸ ಯೋಗ ಪೌಂಡೇಶನ್ ಮೈಸೂರು .ಯೋಗಶ್ರೀ ಪ್ರಬೋದಡ್ ಬಂಗಾರುದ ಪದಕ ಗೆಂದಿನಾರ್,ತುಳುನಾಡ ಜವನೆರ್ ಬೆಂಗಳೂರು ನಡಪಾಯಿನ ನಲಿಪು ನವಿಲೇ -2 ಮೂಜನೇ ಇನಾಮು ಸೇರಿನಂಚ ಅವ್ವೇತೋ ಪಂಥಡು ಇನಾಮು ಗೆಂದಿನಾರ್. ಅವ್ವತ್ತಂದೇ ಕೇರಳ ಬೊಕ್ಕ ಕರ್ನಾಟಕದ ರಾಜ್ಯದ ಅವ್ವೇತೋ ಜಿಲ್ಲೆಡು 150ಜಾಸ್ತಿ ತನ್ನ ನಲಿಕೆದ ಪೊರ್ಲು ಜನಮಾನಿಲೆನ ಗೇನಗು ಎತ್ತಾಂದು ಕಣ್ಣುಗ್ ಪರ್ಬ ಕೊರಿನಾರ್.
ಎನ್ನ ಬಗ್ಗೆ ಅಲ್ಪ ಮುಲ್ಪ ಕೇನುನಂಚಿನ ಕೆಲವೊಂಜಿ ಪಾತೆರೊಲು, ಅವಮಾನ, ಉಂದು ಪೂರ ಎಂಕು ಮಸ್ತ್ ಬೇಜಾರು ಕೊರುಂಡಲಾ ,ಯಾನ್ ಪನ್ಪಿ ಸಾರ ಮನಸ್ಸುಲೆನ ನಡುಟ್ ಈ ಪೊಣ್ಣು ಅರೆನ ಮಗಲು ಪನೊಡು ,ಯಾನ್ ರಾತ್ರೆ ಪಗೇಲು ಬುಡಂದೆ ಬತ್ತಿನ ಬಂಗಗು ದೇವೆರೆ ಪ್ರತಿಫಲ ತಿಕ್ಕೊಂಡುಂದು ಪನ್ಪೆರ್. ಪೊಪ್ಪ ದಾಂತಿನ ಎಂಕು ಎನ್ನ ಅಮ್ಮನೇ ಪೂರ,ಎನನ್ ಒಂಜಿ ಪೊಣ್ಣು ಮಗಲಾದ್ ತೂವಂದೇ ಆನ್ ಮಗೆ ಆದ್ ಬುಲೆಪಾದೆರ್. ಯಾನ್ ಇಂಜಿನಿಯರ್ ಆವೊಡುಂಡು ಎನ್ನ ಅಮ್ಮನ ಆಸೆ ಈಡೇರವೊಡುಂದು ಪನ್ಪೆರ್ ವಂದನ.
ಮೆರೆನ ಪ್ರತಿ ಕನಟ್ ಗೆಂದುನ ಛಲ ಉಂಡು,ನನಲಾ ಬುಲೆಯೊಡು ಪನ್ಪಿ ಉಮೇದು ಉಂಡು. ಒರುಂಬ ತಿಗೊಂಲು ಬೆಚ್ಚ ಗರ್ಭಡು ಬುಲೆಪಾದ್ ,ಮಿರೆಪೇರ್ ಕೊರ್ದು ತಡ್ಯ ದಾಂಟಿನ ಅಪ್ಪೆನೇ ಎಂಕ್ ಪೂರ ಪನ್ಪುನ ಮೇರ್,ಯಾನ್ ಕಲ್ಪರೇಲಾ ತಯಾರ್, ಕಲ್ಪಯೇರೆಲಾ ತಯಾರ್ ಪನ್ಪೆರ್.
ಬದುಕುದ ನೆಲೆ ಪೊರ್ಲು ಮಲ್ಪಿನ ಎನ್ನ ಕನ, ಯಾನ್ ಬೆನ್ಪಿನ ಬಗ್ಗೆ ಇಪ್ಪುನ ಮೋಕೆ ಉಂದು ರಡ್ಡುಲಾ ಎನ್ನ ಜೀವನೊನು ಪೊರ್ಲು ಮಲ್ಪುನವು. ನಮ್ಮ ಮಲ್ಪಿ ಬೇಲೆಡು, ನಿಯತ್ತು ಬೊಕ್ಕ ಮೋಕೆ,ವಿಶ್ವಾಸ ಇಪ್ಪೊಡು. ತಿಕ್ಕಿನ ಅವಕಾಶನು ಬುಡರೆ ಬಲ್ಲಿಂದ್ ಪನ್ಪೆರ್.
ಇನ್ಫೋಸಿಸ್ ಲಿಮಿಟೆಡ್ಡು ಸಾಪ್ಟ್ವೇರ್ ಇಂಜಿನಿಯರ್ ಆದ್ಬೇಲೆ ಮಲ್ತೊಂದು, ಸ್ಟೇಪ್ ಆಪ್ ಡಾನ್ಸ್ ಕೂಪೆಡ್ 65 ಜೋಕುಲೆಗ್ ನಲಿಕೆ ಕಲ್ಪಾವೊಂದು ಇಪ್ಪುನ ವಂದನನಾ ಜೀವನ ನನಾತ್ ಪೊರ್ಲವಡು ಪನ್ಪಿ ಅಂಗು ಎನ್ನವು.
ಅಪ್ಪೆ ಮೋಕೆಗ್ ಪ್ರತಿ ಮೋಕೆ ಕೋರಿನಾರ್
ಪೊಣ್ಣು ಪನ್ಪಿ ಪುದರುಗ್ ಆನ್ ಮಗಲೆಕಾಂತಿನಾಲ್ ಪನ್ಪಿ ಛಲ ದಿಂಜಿ ಮಗಲ್
ನಲಿಕೆ,ಪದಟ್ ಪುದರ್ ಕನತ್ ಸ್ಪರೊತಜನೆಡ್ ಜನಮಾನಿಲು ಕೆಬಿ ಕೊಂಡೆ ಮಲ್ತೆರ್.
ವಂದನ ,ವಂದನ ಈರೆ ಸಾದನೆದ ದೊಂಪದಡಿಟ್ ಕುಲ್ಲೊಂದು ನನಲಾ ಕೇನುವ ಈರೆ ಪುದರ್ಡ್ ಕೇನುವ ವಂದನೆ ಪನ್ಪಿ ಪೆರ್ಮೆದ ಮಾನಾದಿಗೆನ್.
ಒಡಿಪು : ಶ್ರೀಕೃಷ್ಣಾಪುರದ ಪರ್ಯಾಯ ಉಚ್ಚಯಗ್ ಒಡಿಪು ಜಿಲ್ಲಾ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಯೋಜನೆ ಒಕ್ಕೂಟದ ವತಿರ್ದ್ ಒಟ್ಟು 45377 ಅರಿ ,131000 ತಾರಾಯಿ,18636 ಕೆ.ಜಿ.ಬೆಲ್ಲ4152 ಕೆ.ಜಿ.ಸಕ್ಕರೆ,26770 ಬಾರೆದ ಇರೆ,1063 ಬೊಂಡ ,6271 ಕೆ.ಜಿ.ತರಕಾರಿ,7423 ಗೆಡ್ಡೆಗೆಣಸು,102 ಬಜ್ಜೆಯಿ ,100 ಕೆ.ಜಿ.ಬಜ್ಜಯಿ ,607 ಕೆ.ಜಿ.ಬೇಳೆ,622 ಕೆ.ಜಿ.ಬಜಿಲ್,462 ಲೀ.ಎಣ್ಣೆ 3 ಉಪ್ಪು ಚೀಲ,263 ಕೆ.ಜಿ.ತುಪ್ಪ,198 ಸಿಂಗಾರ ಗೊನೆ,4 ಅರಿತ ಮುಡಿ,25 ಕೆಜಿ.ರವೆ,13 ಕೆ.ಜಿ.ಸಬ್ಬಕ್ಕಿ 50 ಕೆ.ಜಿ.ಫಲ ವಸ್ತು ,415 ಪಾಲೆದ ತಟ್ಟೆ,1000 ಬತ್ತಿ ಕಟ್ಟುಲೆನ ಪುದೆಕಾಣಿಕೆನ್ ಸಮರ್ಪಣೆ ಮಲ್ತಿನ ಭಕ್ತಾದಿಲೆನ್ ಉದ್ದೇಶಿಸಾದ್ ಅನುಗ್ರಹ ಸಂದೇಶ ಕೊರ್ದು ಫಲ ಮಂತ್ರಾಕ್ಷತೆನ್ ಕೊರಿಯೆರ್ ..
ಈ ಪೊರ್ತುಡು ಪರ್ಯಾಯ ಉಚ್ಚಯ ಸಮಿತಿದ ಗುರ್ಕಾರ್ಲಾಯಿನ ಕೆ.ಸೂರ್ಯನಾರ್ಯಣ ಉಪಾಧ್ಯಾಯೆರು,ಕಾರ್ಯದರ್ಶಿ ವಿಷ್ಣುಪಾಡಿಗಾರು ಬೊಕ್ಕ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಯೋಜನೆ ಟ್ರಸ್ಟ್ ದ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಲಾಯಿನ ಡಾ. ಎಲ್.ಎಚ್.ಮಂಜುನಾಥ್, ಪ್ರದೇಶಾಯಿಕ ನಿರ್ದೇಶಕೆರಾಯಿನ ವಸಂತ ಸಾಲ್ಯಾನ್,ಜಿಲ್ಲಾ ನಿರ್ದೇಶಕೆರಾಯಿನ ಗಣೇಶ್,ತಾಲೂಕು ನಿರ್ದೇಶಕೆರಾಯಿನ ರಾಮ್ ಕುಮಾರ್ ಬೊಕ್ಕ ಪದಾಧಿಕಾರಿಲು,ಸದಸ್ಯೆರ್ ಪಾಲ್ ಪಡೆದಿತ್ತೆರ್ .
ಕುಡ್ಲ : ಮಹಿಳಾ ಬೊಕ್ಕ ಮಕ್ಕಳ ಅಭಿವೃದಿ ಇಲಾಖೆ, ಶಿಶು ಅಭಿವೃದಿ ಯೋಜನೆ ಕುಡ್ಲ ನಗರ ಯೋಜನಾ ಮಟ್ಟದ ಒಂಜಿ ದಿನತ , ಮಗಲೆನ್ ಒರಿಪಾಲೆ ಮಗಲೆನ್ ಓದಾಲೆ ಕಾರ್ಯಾಗಾರ ಬಾಬು ಗುಡ್ಡೆ ಕುದ್ಮುಲ್ ರಂಗರಾವ್ ಚಾವಡಿಡ್ ಅಟ್ಟನೆ ಮಲ್ತಿತ್ತೆರ್.
ಈ ಲೇಸ್ ನ್ ಮಹಾ ಪೌರೇರಾಯಿನ ಪ್ರೇಮಾನಂದ ಶೆಟ್ಟಿ ಉದಿಪನ ಮಲ್ತ್ ಎಡ್ಡೆಪುದ ನುಡಿ ಪಂಡೆರ್. ಲೇಸ್ ಡ್ ಪ್ರೊಫೆಸರ್ ವಿನುತಾ,, ಸ್ಕೂಲ್ ಆಫ್ ಸೋಶಿಯಲ್ ವರ್ಕ್ ರೋಶನಿ ನಿಲಯ,ಹೃದಯನಾಥ್ ಕುದ್ಮುಲ್ ರಂಗರಾವ್ ಎಜುಕೇಶನ್ ಟ್ರಸ್ಟ್,, ಟ್ರಸ್ಟ್ ದ ಸದಸ್ಯೆರ್ ರಘು ವೀರ್, ಪ್ರಭಾರ ಶಿಶು ಅಭಿವೃದಿ ಯೋಜನಾಧಿಕಾರಿಲು ಶ್ರೀ ಹರೀಶ್,ಬೊಕ್ಕ ಮಲ್ಲ ಬಿನ್ನೆರ್ ಆಯಿನ ಡಾ.ದುರ್ಗಾ ಪ್ರಸದ್, ಲೇಡಿ ಘೋಷನ್ ಹಾಸ್ಪಿಟಲ್, ರೇನಿಡಿಸೋಜಾ, ರಾಜಶೇಖರ್ ರೆಡ್ಡಿ ಬೊಕ್ಕ ವಕೀಲೆರಾಯಿನ ಚಂಗಪ್ಪ, ಪೋಕ್ಸ್, ಕಾಯ್ದೆ ಜೋಕ್ಲೆನ ದತ್ತು ಸ್ವೀಕಾರ ಕಾರ್ಮಿಕ ಕಾಯ್ದೆ,, ಬಾಲ್ಯ ವಿವಾಹ,ಪಿಸಿ ಕಾಯ್ದೆ ಬಗ್ಗೆ ಶಾಲೆದ ಶಿಕ್ಷಕೆರ್, ಆರಕ್ಷಕ ಠಾಣಾ ಸಿಂಬಂಧಿ , ಸ್ತ್ರೀ ಶಕ್ತಿ ಸದಸ್ಯೆರ್ ಮಾಹಿತಿ ಕೊರಿಯೆರ್. ಪ್ರಾರ್ಥನೆ ಮೇಲ್ವಿಚಾರಿಕಿ ಪೂರ್ಣಿಮಾನಡಪಾದ್ ಕೊರಿಯೆರ್.
ಒಡಿಪು : ಶ್ರೀಕೃಷ್ಣಾಪುರ ಮಠದ ಪರ್ಯಾಯ ಉಚ್ಚಯಗ್ ,ಭಕ್ತಾದಿಲು ಕೊರ್ಪಿನ ಪುದೆ ಕಾಣಿಕೆನ್ ಒಟ್ಟು ಮಲ್ಪರೆ “ಸುಮೇಧ” ಉಗ್ರಾಣನ್ ಭಾವೀ ಪರ್ಯಾಯ ಕೃಷ್ಣಾಪುರ ಮಠಾಧೀಶೆರಾಯಿನ ಶ್ರೀ ವಿದ್ಯಾಸಾಗರತೀರ್ಥ ಶ್ರೀಪಾದೆರ್ ಉದಿಪನ ಮಲ್ತೆರ್ .
ಪರ್ಯಾಯ ಉಚ್ಚಯಗ್ ಭಕ್ತಾದಿಲು ಯಥಾನುಶಕ್ತಿ ಭಕ್ತಿಪೂರ್ವಕ ಕೊರ್ಪಿನ ಮುಖೇನ ಕಾಣಿಕೆನ್ ಸ್ವೀಕಾರ ಮಲ್ತ್ ಒಡಿಪು ಶ್ರೀಕೃಷ್ಣದೇವೆರ್ ಎಡ್ಡೆ ಮಲ್ಪಡ್ ಪಂದ್ ಪಂಡೆರ್.
ಈ ಪೊರ್ತುಡು ಕಿದಿಯೂರು ಹೋಟೆಲ್ ದ ಭುವನೇಂದ್ರ ಕಿದಿಯೂರು, ಗಾಂಧಿ ಆಸ್ಪತ್ರೆದ ಡಾ| ಹರೀಶ್ಚಂದ್ರ, ಗಿರಿಜಾ ಸಿಲ್ಕಿನ ರಾಜಾರಾಮ್ ಪೈ, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಗಣೇಶ್,ಪರ್ಯಾಯೋತ್ಸವ ಸಮಿತಿದ ಗುರ್ಕಾರ್ಲಾಯಿನ ಸೂರ್ಯನಾರಾಯಣ ಉಪಾಧ್ಯಾಯ, ಪ್ರಧಾನ ಕಾರ್ಯದರ್ಶಿ ವಿಷ್ಣುಪ್ರಸಾದ್ ಪಾಡಿಗಾರು, ವಾಸುದೇವ ಭಟ್ ಪೆರಂಪಳ್ಳಿ, ಪಾಲ್ ಪಡೆದಿತ್ತೆರ್.
ಒಡಿಪು : ಶ್ರೀ ಅಯ್ಯಪ್ಪ ಸ್ವಾಮಿ ಭಕ್ತ ವೃಂದ ಶ್ರೀ ವೆಂಕಟರಮಣ ದೇವಸ್ಥಾನ ವಠಾರ ಕರಂಬಳ್ಳಿ, ಸೋಮವಾರ 6 ನೇ ವರ್ಷದ ಪೂಜೆದ ಪರವಾದ್ ಅವ್ವೆತೋ ಅಯ್ಯಪ್ಪ ಸ್ವಾಮಿಲೆನ ಒಟ್ಟು ಸೇರಿಗೆಡ್ ಕರಿನ 18 ವರ್ಷದ ವ್ರತಧಾರಿಯಾದ್ ಗುರುಸ್ವಾಮಿ ಸೇವೆ ಕೊರಿನ ಮಂಜುನಾಥ ಗುರುಸ್ವಾಮಿಲೆನ ಗುರುದೀಕ್ಷೆ ಲೇಸ್ ನಡತ್oಡ್.
ಕೃಷ್ಣ ಗುರುಸ್ವಾಮಿ, ಅರವಿಂದ ಗುರುಸ್ವಾಮಿ, ನಡಪಾದ್ ಕೊರಿಯೆರ್ . ಮಹಾಪೂಜೆರ್ದ್ ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡತ್oಡ್. .
ಮಲ್ಪೆ: ಕೊಡವೂರುದ ವಿಪ್ರಶ್ರೀ ಚಾವಡಿಡ್ ಏಳ್ ದಿನ ಶಾಕಲ ಋಕ್ ಸಂಹಿತಾ ಯಾಗ ಬೊಕ್ಕ ಭಾಗವತ ಸಪ್ತಾಹ ನಡತುಂಡು .ಈ ನೆಲೆಟ್ಟ್ ಕೊಡವೂರುದ ಶಂಕರನಾರಾಯಣ ದೇವೆರ್ನ ಸನ್ನಿಧಾನರ್ದ್ ವಿಪ್ರಶ್ರೀ ಸಭಾಭವನ ಜಿಂಜಿದ್ ಇತ್ತುಂಡು . ದಾಯೆ ಪಂಡ ಭಾಗವತೆರೆನ್ ಶುಕಾಚಾರ್ಯೆರೆಗ್ ಉಪದೇಶ ಮಲ್ದಿನಿ ನಾರಾಯಣ ದೇವೆರ್ , ಅವೆನ್ ಪರೀಕ್ಷಿತ ರಾಜಗ್ ಉಪದೇಶ ಕೊರಿನ ಶುಕಾಚಾರ್ಯೆರ್ ಸಾಕ್ಷಾತ್ ರುದ್ರ ದೇವೆರ್ . ಲೋಕೊಗು ಕಂಟಕವಾಯಿನ ಸೀಕ್ ನಾಶ ಆದ್ ದೇಶ ಸುಭಿಕ್ಷೆ ಯಾವಡ್ ಪಂದ್ ಶ್ರೀ ಶ್ರೀವಿದ್ಯಾಧೀಶ ತೀರ್ಥ ಶ್ರೀಪಾದೆರ್ ಪಂಡೆರ್.
ಸಮಾಜದ ಬೇತೆ ಬೇತೆ ವರ್ಗದ ಪೆರಿಯಾಕುಲು ಸಾಧಕೆರ್ ಬೊಕ್ಕ ತಮ್ಮ ತಮ್ಮ ವೃತ್ತಿನ್ ನಿಷ್ಠೆಡ್ ಮಲ್ತೊಂದು ಉಪ್ಪುನ 11 ಜನ ಮಹನೀಯೆರಾಯಿನ ವಿಶ್ವನಾಥ ಶೆಣೈ ಮಲ್ಪೆ, ಕಾಳು ಸೇರಿಗಾರ ಕೊಡವೂರು, ಶಿವಪ್ಪ ಕಾಂಚನ್ ಕೊಡವೂರು, ಕರುಣಾಕರ ಶೆಟ್ಟಿಗಾರ್ ಉದ್ದಿನಹಿತ್ತು, ಹರೀಶ್ ಪೂಜಾರಿ ಕೊಡವೂರು, ಅಣ್ಣಪ್ಪ ಶೆಟ್ಟಿ ಜುಮಾದಿ ನಗರ, ಶಂಕರ ಗಾಣಿಗ, ರತ್ನಾಕರ ಆಚಾರ್ಯ, ಬೇಬಿ ಅಮೀನ್, ಶೇಖರ ಮೂಡುಬೆಟ್ಟು, ಬೊಕ್ಕ ವಾಮನ ಮೆರೆಗ್ ಮಾನಾದಿಗೆ ಮಲ್ತೆರ್.
