ಬೆದ್ರ: ಬೆದ್ರಡ್ ನಡತೊಂದು ಇಪ್ಪುನ ಭಾರತ್ ಸ್ಕೌಟ್ಸ್ ಗೈಡ್ಸ್ “ಅಂತಾರಾಷ್ಟ್ರೀಯ ಸಾಂಸ್ಕೃತಿಕ ಜಾಂಬೂರಿ” ದ ಉದಿಪನ ಲೇಸ್ ನ್ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಉದಿಪನ ಮಲ್ತೆರ್.
ಈ ಪೊರ್ತುಡು ರಾಜ್ಯಸಭಾ ಸದಸ್ಯೆರ್, ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಡೆ, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಡಾ. ಎಂ. ಮೋಹನ್ ಆಳ್ವ, ಭಾರತ್ ಸ್ಕೌಟ್ಸ್ ಗೈಡ್ಸ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಪಿ. ಜಿ. ಆರ್ ಸಿಂಧಿಯ, ಶಾಸಕೆರ್ ಉಮಾನಾಥ್ ಕೋಟ್ಯಾನ್, ಜಿಲ್ಲಾಧಿಕಾರಿ ರವಿಕುಮಾರ್ ಇತ್ತೆರ್.
7 ದಿನ ನಡಪುನ ಈ ಅಂತಾರಾಷ್ಟ್ರೀಯ ಸಾಂಸ್ಕೃತಿಕ ಜಂಬೂರಿಡ್ ದೇಶ ವಿದೇಶರ್ದ್ 50,000 ಸ್ಕೌಟ್ಸ್ ಬೊಕ್ಕ ಗೈಡ್ಸ್ ರೋವರ್ಸ್ ರೇಂಜರ್ಸ್ ಬೊಕ್ಕ ದಳಪತಿಲು ಪಾಲ್ ಪಡೆತೆರ್. 10,000 ತರಬೇತಿದಾರೆರ್, 3,000 ಕಲಾವಿದೆರ್ ಪಾಲ್ ಪಡೆದಿತ್ತೆರ್. 3,000 ಸ್ವಯಂ ಸೇವಕೆರ್ ಜಂಬೂರಿದ ಯಶಸ್ವಿಗ್ ಬೆಂದೊಂದು ಉಲ್ಲೆರ್.
12 ಎಕರೆ ಪ್ರದೇಶಡ್ ಪಾರಂಪರಿಕ ಪೂ ಬೊಕ್ಕ ತರಕಾರಿ ತೋಟದ ವ್ಯವಸ್ಥೆ ಮಲ್ತಿನವು ಜಂಬೂರಿದ ಇಸೇಸ ಆಕರ್ಷಣೆ ಆತ್ಂಡ್. ಅತ್ತಂದೆ ಜಂಬೂರಿ ವಿಜ್ಞಾನ ಮೇಳ, ಜಂಬೂರಿ ಆಹಾರ ಮೇಳ, ಪುಸ್ತಕ ಮೇಳ, ಜಂಬೂರಿ ಕಾಲಾ ಮೇಳಲು ಉಂಡು.
ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಡೆ ಅಧ್ಯಕ್ಷತೆನ್ ಒಯಿಸೊಂದು ಪಾತೆರ್ದ್, ರಾಷ್ಟ್ರೀಯ ಹಿತಾಸಕ್ತಿನ್ ಒರಿಪಾವುನ ಹುಮ್ಮಸ್ಸ್ ಪ್ರತಿಯೊರಿಡಲ ಇಪ್ಪೊಡು. ಇಲ್ಲ್ ರ್ದೆ ಎಡ್ಡೆ ಗುಣ ನಡತೆ ಸುರು ಆವೊಡು. ಉಂದು ಶಾಲೆ ಕಾಲೇಜ್ ಬೊಕ್ಕ ಭವಿಷ್ಯದ ನಾಗರಿಕೆರೆನ ಮುಟ್ಟ ಪೋವೊಡು. ಪ್ರಧಾನಿ ನರೇಂದ್ರ ಮೋದಿ ಮೇರ್ ದೇಶದ ಗೌರವ ಹೆಚ್ಚ ಮಲ್ಪುನ ಬೇಲೆ ಮಲ್ತ್ ದೆರ್. ಪ್ರತೀ ಎಲ್ಯ ಇಚಾರಲ ಪ್ರಾಮುಖ್ಯತೆ ಉಂಡು. ಶಿಸ್ತು, ಸನ್ನಡತೆದೊಟ್ಟಿಗೆ ಪರಸ್ಪರರೆನ್ ಗೌರವಿಸಾವುನ ಗುಣನ್ ನಮಡ ಇಪ್ಪೊಡು ಪಂದ್ ಪಂಡೆರ್.
ವಿಶ್ವ ಸ್ಕೌಟ್ಸ್ ಗೈಡ್ಸ್ ಸಂಘಟನೆ ಪ್ರದಾನ ಕಾರ್ಯದರ್ಶಿ ಅಹಮದ್ ಅಲ್ ಹೆಂದವಿ ಮೆರೆಗ್ ಭಾರತ್ ಸ್ಕೌಟ್ಸ್ ಗೈಡ್ಸ್ ದ ಸಿಲ್ವರ್ ಎಲಿಫೆಂಟ್ ಪ್ರಶಸ್ತಿನ್ ಕೊರ್ದು ಗೌರವಿಸಾಯೆರ್. ಪೊಣ್ಣು ಜೋಕುಲೆನ ಸ್ಕೌಟ್ಸ್ ಗೈಡ್ಸ್ ಅಸೋಶಿಯಷನ್ ಅಧ್ಯಕ್ಷೆರ್ ಚಂಪಾಮಾಲಿನಿ ಶಹಮಿಲ್, ಭಾರತೀಯ ಸ್ಕೌಟ್ಸ್ ಗೈಡ್ಸ್ ರಾಷ್ಟ್ರೀಯ ಕಮಿಷನ್ ಮುಖ್ಯಸ್ಥೆರ್ ಡಾ. ಕೆ ಕೆ ಖಂದೆಲ್ ವಾಲಾ ಇತ್ತೆರ್.
ಭಾರತ್ ಸ್ಕೌಟ್ಸ್ ಬೊಕ್ಕ ಗೈಡ್ಸ್ ದ ಕರ್ನಾಟಕ ರಾಜ್ಯ ಮುಖ್ಯ ಆಯುಕ್ತೆರ್ ಪಿ. ಜಿ. ಆರ್. ಸಿಂದ್ಯಾ ಎದ್ಕೊನಿಯೆರ್. ದಕ್ಷಿಣ ಕನ್ನಡ ಜಿಲ್ಲಾ ಸ್ಕೌಟ್ಸ್ ಗೈಡ್ಸ್ ಆಯುಕ್ತೆರ್ ಡಾ. ಎಂ.ಮೋಹನ್ ಆಳ್ವ ಸೊಲ್ಮೆ ಸಂದಾಯೆರ್.
ಈ ಪೊರ್ತುಡು ಬೇತೆ ಬೇತೆ ದೇಶ, ರಾಜ್ಯಲೆನ ಸಂಸ್ಕೃತಿನ್ ತೂಪಾವುನ ಮೆರವಣಿಗೆ ನಡತ್ಂಡ್.
✍️ ಜಗದೀಶ್ ಪೂಜಾರಿ
ಬೆದ್ರ
