2021

ಪೊರ್ಂಬಾಟೊ ಮಲ್ತ್ ದ್ ತುಳು ಅಧಿಕೃತ ಆವರೆ ಅಡ್ಡಿ ಮಲ್ಪಡೆ ; ಶಾಸಕ ವೇದವ್ಯಾಸ್ ಕಾಮತ್ !

ತುಳು ಪೊರ್ಂಬಾಟೊ ಸಮಿತಿದಕುಲ್ ಇನಿ ಕುಡ್ಲದ ಡಿಸಿ ಆಫೀಸ್ ದ ಎದುರ್ ಪ್ರತಿಭಟನೆಗ್ ತಯಾರ್ ಆದ್ ಇತ್ತೆರ್. ಈ ಪೊರ್ತುಡ್ ಕುಡ್ಲ ಪೊಲೀಸ್ ದಕುಲ್ ಆಯಿಕ್ ಪರ್ಮಿಷನ್ ಕೊರಂದಿನೆಡ್ದಾವರ ಇನಿ ಪೊರ್ಂಬಾಟೊ ಸಮಿತಿದಕುಲ್ ಪತ್ರಿಕಾಗೋಷ್ಠಿ ಮಲ್ಪುನ ಮುಖೇನ ಅಕಲ್ನ ಬೇಜಾರ್ ನ್ ಪಿದಯಿ ಪಾಡಿಯೆರ್.

ನಮ ಶಾಲೆ ಕಲ್ಪುನಗಲ ಪಠ್ಯ ಪುಸ್ತಕಡ್ ನಮ್ಮ ಊರುದ ಅರೆಸೆರ್ ನಕಲ್ನ ಬಗೆಟ್ ತೆರಿಪಾವಂದೇ ಪಿದಯಿ ಊರುದ ಅರೆಸೆರ್ ನ ಬಗ್ಗೆಟ್ ನಮಕ್ ಪಾಠ ಕಲ್ಪವೊಂದ್ ಇತ್ತೆರ್. ಊರುದಕ್ಲೆಗ್ ಬೇಲೆ ಕೊರ್ಪುನೆಡ್ದ್ ಪತ್ ದ್ ತುಳು ಸಂಸ್ಕೃತಿ, ತುಳು ಭಾಷೆಗ್ ಪ್ರತಿಯೊಂಜಿ ವಿಷಯಡ್ಲಾ ಅನ್ಯಾಯ ಅವೊಂದೆ ಬೈದ್ಂಡ್.

ಸುಮಾರು 70 ವರ್ಷಡ್ದಿಂಚಲ ತುಳು ಭಾಷೆಗ್ ಸರಕಾರ ಕೊರೊಡಾಯಿನ ಮಾನ್ಯತೆ ಇನಿ ಮುಟ್ಟಲ ಕೊರ್ತಿಜಿ. ಕರಿನ ಸರ್ತಿ ಸಿ.ಟಿ ರವಿ ಸಚಿವೆರಾದಿಪ್ಪುನಗ ತುಳುಕ್ ಮಾನ್ಯತೆ ಕೊರ್ಪೆ ಪಂಡ್ ದ್ ವಿಧಾನ ಸಭೆಟ್ ಪಾತೆರ್ನಗ ತುಳುಕ್ ಒಂತೆ ವಿರೋಧವಾದ್ ಪಾತೆರ್ನವ್ ಅವ್ ಇನಿಕ್ ಲಾ ತುಳುವೆರೆಗ್ ಬೆಚ್ಚ ಕುಲ್ದುಂಡ್.

ಆ ಹಿನ್ನಲೆಡ್ ಮಿನಿಸ್ಟರ್ ಸುನೀಲ್ ಕುಮಾರ್ ಆರ್ ಆಶ್ವಾಸನೆ ಕೊರ್ಂಡಲ ಈತ್ ದಿನ ದಾಯೆ ನಿಧಾನ ಮಲ್ಪುವೆರ್ ಪಂದ್ ಗೊತ್ತಿಜಿ. ಅಂಚಾದ್ ಆಯಿನಾತ್ ಬೇಗ ತುಳುನ್ ರಾಜ್ಯದ ಅಧಿಕೃತ ಭಾಷೆನ್ ಮಲ್ಪೊಡ್ ಅಂಚನೆ 8ನೇ ಪರಿಚ್ಛೇದಗ್ ಸೇರಾವೊಡು ಪನ್ಪಿನ ಒಂಜಿ ಬೇಡಿಕೆನ್ ಸರಕಾರೊಗು ಎತ್ತಾವೊಡು ಪನ್ಪಿನ ನಿಲೆಟ್ ಇನಿ ಪತ್ರಿಕಾಗೋಷ್ಠಿ ಲೆತ್ತಿತೆರ್.

ಇಂದೆಟ್ ಜೈ ತುಳುನಾಡ್ ದ ಸುದರ್ಶನ್ ಕುಲಾಲ್, ಯುವ ತುಳುನಾಡ್ ದ ದಿಲ್ ರಾಜ್ ಆಳ್ವೆರ್ ಅಂಚನೆ ತುಳುನಾಡ ರಕ್ಷಣಾ ವೇದಿಕೆದ ಯೋಗೀಶ್ ಶೆಟ್ಟಿ ಜೆಪ್ಪು ,ತುಳುವೆರ್ ಕುಡ್ಲದ ಪ್ರತೀಕ್ ಪೂಜಾರಿ, ತುಳುನಾಡ ನಿರ್ಮಾಣ ಸೇನೆದ ಸುನೀಲ್ ಕುಮಾರ್, ಸುಭಾಷ್ ಶೆಟ್ಟಿ ಕೊಪ್ಪ, ಉದಯ್ ಆಚಾರ್ಯ ಪತ್ರಿಕಾಗೋಷ್ಠಿಡ್ ಪಾಲ್ ಪಡೆದಿತ್ತೆರ್.

—————————————————————

ತುಳು ರಾಜ್ಯದ ಅಧಿಕೃತ ಭಾಷೆ ಆಯರೆ ಬೋಡಾದ್ ಈ ಪಿರವುದ ಸರಕಾರ ಮಲ್ಲ ಮಟ್ಟದ ಪ್ರಯತ್ನ ಬೈಜ. ಆಂಡ ನಮ್ಮ ಸರಕಾರ ಅಯಿಕೊಂಜಿ ಸಮಿತಿ ರಚನೆ ಮಲ್ತುದ್ ತುಳು ರಾಜ್ಯದ ಅಧಿಕೃತ ಭಾಷೆ ಆಯೆರೆ ಅಂಚನೆ ತುಳು 8 ನೇ ಪರಿಚ್ಛೇದಗ್ ಸೇರಾಯೆರೆ ತೊಡಕ್ ದಾದ ಉಲ್ಲನ ಆ ತೊಡಕುಲೆನ್ ದೆತ್ತುದ್ ಸರಕಾರದ ನಿಯಮದ ಪ್ರಕಾರ ತುಳು ರಾಜ್ಯದ ಅಧಿಕೃತ ಭಾಷೆ ಆಯೆರೆ ಅಂಚನೆ ತುಳು 8 ನೇ ಪರಿಚ್ಛೇದಗ್ ಸೇರಾವುನ ಪ್ರಯತ್ನನ್ ಸಚಿವೆರ್ ಸುನೀಲ್ ಕುಮಾರ್ ನ ಮುಖೇನ ನಮ ಪೂರ ಒಟ್ಟು ಸೇರ್ದ್ ಮಲ್ತೊಂದುಲ್ಲ. ಇಂಚಿತ್ತಿನ ಎಡ್ಡೆ ಬೇಲೆ ಮಲ್ಪುನಗ ನಿಕುಲ್ ಪೊರ್ಂಬಾಟೊ ಮಲ್ತ್ ದ್ ತುಳುನ್ ಅಧಿಕೃತ ಅವಂದಿಲೆಕ್ಕ ಮಲ್ಪಡೆ ಪಂದ್ ವೇದವ್ಯಾಸ ಕಾಮತೆರ್ ತುಳು ಪೊರ್ಂಬಾಟ ಸಮಿತಿದಕಲೆಡ ಪಂಡೆರ್.

ತುಳುಕ್ಕಾದ್ ಪೊರ್ಂಬಾಟೊ ಮಲ್ಪರೆ ಅವಕಾಶ ಕೊರಂದಿನೆಕ್ ತುಳು ಸಂಘಟನೆದ ರೋಷನ್ ರೆನಾಲ್ಡ್ ಮೆರೆನ ಮುತಾಲಿಕೆಡ್ ಪಾಂಡೇಶ್ವರ ಪೊಲೀಸ್ ಸ್ಟೇಷನ್ ದ ಎದುರುಡ್ ಕೊರೊನಾ ಪಿಪಿಇ ಕಿಟ್ ಪಾಡೊಂದು ತುಳು ಧ್ವಜನ್ ಪತ್ತೊಂದ್ ಮೌನ ರೀತಿದ ಪ್ರತಿಭಟನೆ ಮಲ್ಪುನ ಕಾರ್ಯಕ್ರಮ ಇನಿ ಪಾಂಡೇಶ್ವರ ಪೊಲೀಸ್ ಸ್ಟೇಷನ್ ದ ಎದುರುಡ್ ನಡತ್ಂಡ್.