ಬೊಂಬಾಯಿದ ಸುದ್ದಿ | Mumbai News

ಸಮಾಜದ ಏಳಿಗೆಗಾದ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ನೇಜಾರ್, ಕಲ್ಯಾಣಪುರ ಮೊಕ್ಲೆರ್ದ್ ಪೊಂಜೋವುಲೆನ ಕೂಟದ ಉದಿಪನ

ಒಡಿಪು: 1957 ಟ್ಟ್ ಒಡಿಪುಡ್ ಭಗವತೀ ತೀಯಾ ಸಮಾಜ ಸೇವಾ ಸಂಘ ಸ್ಥಾಪನೆ ಆದಿತ್ತ್ ದ್ ಸುಮಾರಾತ್ ಧಾರ್ಮಿಕ ಅಂಚೆನೆ ಸಮಾಜಮುಖಿ ಕಾರ್ಯಲೆನ್ ಮಲ್ತೊಂದು ಬರೊಂದು ಉಂಡು.

ಇತ್ತೆ ತಾರೀಕ್ 24-10-2023ನೇ ಅಂಗಾರೆದಾನಿ ಕಲ್ಯಾಣಪುರಟ್ಟ್ ಸ್ವಂತ ಜಾಗೆಡ್ ಇಪ್ಪುನ ಸಮಾಜ ಮಂದಿರದ ಚಾವಡಿಡ್ ಪೊಂಜೋವುಲೆನ ಪೊಸ ಕೂಟದ ಉದಿಪನ ಆಂಡ್.

ತೀಯಾ ಸಮಾಜಡ್ ಮಸ್ತ್ ಬಡವೆರ್ ಇತ್ತ್ ದ್, ಅವಿದ್ಯಾವಂತೆರ್ ಇತ್ತ್ ದ್, ಸಮಾಜದ ಏಳಿಗೆಗಾದ್ ಸಮಾಜಡ್ ಆಪುನಂಚಿತ್ತಿನ ಮದಿಮೆ, ಮರಣ, ವಿದ್ಯೆ, ಉದ್ಯೋಗ ಸೇರಿನಂಚ ಧಾರ್ಮಿಕ ಕಾರ್ಯಕ್ರಮಟ್ಟ್ ತೀಯಾ ಸಮಾಜನ್ ಬಲಪಡಿಸಾವೂನ ಉದ್ದೇಸೊಡು ಪೊಂಜೋವುಲೆನ ಕೂಟನೊ ಮಲ್ತ್ ದ ಪಂದ್ ಸಂಘಟಕೆರ್ ತೆರಿಪಾದೆರ್.

ಈ ಪೊಸ ಕೂಟದ ಮಾನಾದಿದ ಗುರ್ಕಾರ್ಲಾದ್ ಟಿ.ಕಲ್ಯಾಣಿ ಟೀಚರ್, ಗುರ್ಕಾರ್ಲಾದ್ ಶಕುಂತಳ ಟಿ ಪ್ರಗತಿ ನಗರ, ಒತ್ತು ಗುರ್ಕಾರ್ಲಾದ್ ವನಜ ಪಾಲನ್ ತೊಟ್ಟಂ, ಕಾರ್ಯಂತೆರಾದ್ ಶಶಿಕಲಾ ಎಸ್ ಕರ್ಕೇರ ಹೊನ್ನಪ್ಪಕುದ್ರು, ಒತ್ತು ಕಾರ್ಯಂತೆರಾದ್ ಸಂಧ್ಯಾ ಪೂರ್ಣೇಶ್ ನೇಜಾರ್, ಬೊಕ್ಕ ಪ್ರೀಯಾ ವಿಕಾಸ್ ಹಂಪನಕಟ್ಟೆ, ಸಂಘಟನಾ ಕಾರ್ಯಂತೆರಾದ್ ಮನಿಷಾ ಪದ್ಮನಾಭ ಕೆಮ್ಮಣ್ಣು, ಶಾಲಿನಿ ಹರಿಪ್ರಸಾದ್ ಮುದಲಕಟ್ಟೆ, ಸಾಂಸ್ಕೃತಿಕ ಕಾರ್ಯಂತೆರಾದ್ ಶಾರದ ತಿಮ್ಮಪ್ಪ ಸಾಲ್ಯಾನ್ ಬೈಲಕೆರೆ, ಬೊಕ್ಕ ಸುಧಾ ಸದಾಶಿವ ರಂಗತೋಟ, ಕಾರ್ಯಕ್ರಮ ಸಂಯೋಜಕಿಯಾದ್ ಸೀಮಾ ಸುರೇಶ ಪಾಲನ್ ಮೂಡುಬೆಟ್ಟು ಅಂಚೆನೆ ಈ ಪೊರ್ತುಡು ಒತ್ತು ಮಾನಾದಿಗೆದ ಸಲಹೆಗಾರೆರೆನ್ ಬೊಕ್ಕ ಪದುಕೆರೆನ ಕೂಟನ್ ರಚನೆ ಮಲ್ತ್ಂಡ್.

ವರದಿ: ಪುರಂದರ ಸಾಲ್ಯಾನ್ ಮುಂಬೈ
ಪೋಟೋ: ಪ್ರಶಾಂತ್ ಸಾಲ್ಯಾನ್

ಚರ್ಚ್ ಗೇಟ್ ಶ್ರೀ ದುರ್ಗಾಂಬಿಕಾ ಭಜನಾ ಮಂಡಳಿದ 50 ನೇ ವರ್ಷದ ಮಾರ್ನೆಮಿ ಉಚ್ಚಯ ಮುಗಿತಲ

ಈ ಕ್ಷೇತ್ರದ ಶಾಸಕೆಯಾದ್ ಸೇವೆ ಮಲ್ಪೆರೆ ಪ್ರೇರಣೆ ಅಪ್ಪೆ ದುರ್ಗಾಂಬಿಕೆ: ರಾಹುಲ್ ನಾರ್ವೆಕರ್

ಬೊಂಬೈ: ಚರ್ಚ್ ಗೇಟ್ ದ ದುರ್ಗಾಂಬಿಕಾ ಭಜನಾ ಮಂಡಳಿದ ಮುತಾಲಿಕೆಡ್ ಸುರು ಆಯಿನ 50ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.24 ಕ್ಕ್ ಮುಗಿತಲ ಆಂಡ್.

ಈ ಮುಗಿತಲ ಲೇಸ್ ಡ್ ಸಭಾಪತಿ ರಾಹುಲ್ ನಾರ್ವೆಕರ್ ಪಾತೆರ್ದ್, ಕರಿನ 50 ವರ್ಷೊದಿಂಚ ಭಜನಾ ಮಂಡಳಿ ಮಲ್ಪುನ ಕೆಲಸ ಪವಿತ್ರವಾಯಿನವು, ಈ ಕ್ಷೇತ್ರದ ಶಾಸಕೆಯಾದ್ ಮಹಾರಾಷ್ಟ್ರ ವಿಧಾನಸಭೆತ್ತ ಸಭಾಪತಿಯಾದ್ ಸಾರ್ವಜನಿಕ ಸೇವೆ ಮಲ್ಪೆರೆ ಪ್ರೇರಣೆ ಅಪ್ಪೆ ದುರ್ಗಾಂಬಿಕೆ ಪಂಡ್ಂದ್ ಎನ್ನಿವೆ ಪಂದ್ ಪಂಡೆರ್.

ಲೇಸ್ ದ ಸುರುಕು ಸುಬ್ರಮಣ್ಯ ಭಟ್ ಬೊಕ್ಕ ಡಿ ಕೆ ಶೆಟ್ಟಿ ಮೊಕುಲು ಪ್ರಾರ್ತನೆ ಮಲ್ತೆರ್. ಸುಮತಿ ಪದ್ಮಾಕರ್ ಗಂಭೀರ್ ಉದಿಪನ ಮಲ್ತೆರ್. ಮಾನಾದಿಗೆದ ಗುರ್ಕಾರೆ ಜಯರಾಮ್ ಶೆಟ್ಟಿ ಎದ್ಕೊನಿಯೆರ್. ಮಂಡಳಿದ ಹಿರಿಯ ಸದಸ್ಯೆರ್ ಡಿ.ಶೆಟ್ಟಿ ಮೇರ್ ಮಂಡಳಿದ ಇತಿಹಾಸನ್ ಓದಿಯೆರ್. ಬೊಕ್ಕ ಕರಿನ 50 ವರ್ಷೊದಿಂಚ ದೇವೆರೆನ ಪೂಜೆ ಮಲ್ತೊಂದು ಬತ್ತಿನ ವಿಠಲ ಸೇರಿಗಾರ್ ಮೆರೆಗ್ ಮಂಡಳಿದ ಪರವಾದ್ ಬಲ್ಮಾನದ ಮಾನಾದಿಗೆ ನಡತ್ಂಡ್. ಈ ಬಲ್ಮಾನದ ಓಲೆನ್ ಅತ್ತೂರು ರಘು ಎಂ ಶೆಟ್ಟಿ ಓದಿಯೆರ್.

ಬೊಕ್ಕ ಮಂಡಳಿಡ್ ಬೆನ್ಪಿನ ಸದಸ್ಯೆರೆನ್, ಮಂಡಳಿದ ಹಿರಿಯ ಸದಸ್ಯೆರೆನ್ ಚಾವಡಿಗ್ ಲೆತ್ತ್ ದ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ಸುಮತಿ ಪದ್ಮಾಕರ್ ಗಂಭೀರ್, ಬೋಲ್ನಾಡ್ ಗುತ್ತು ಚಂದ್ರಹಾಸ್ ರೈ, ಸುಬ್ರಮಣ್ಯ ಭಟ್ ಮೀರಾ ರೋಡ್, ಡಿ. ಕೆ ಶೆಟ್ಟಿ, ನಿವೃತ ಸಹಾಯಕ ಕಮಿಷನರ್ ಪಿ ಎಫ್ ಅತ್ತೂರು ರಘು ಎಂ ಶೆಟ್ಟಿ, ಮಂಡಳಿದ ಮಾನದಿಗೆದ ಗುರ್ಕಾರೆ ಜಯರಾಮ ಶೆಟ್ಟಿ, ಗುರ್ಕಾರೆ ಹರೇಶ್ ಕೇಡೇಕರ್, ಒತ್ತು ಗುರ್ಕಾರೆ ನವೀನ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ಗುರ್ಕಾರೆ ಹರೇಶ್ ಕೇಡೇಕರ್ ಸೊಲ್ಮೆ ಸಂದಾಯೆರ್. ಶಶಿಕಾಂತ್ ಸಕ್ಪಾಲ್ ಲೇಸ್ ದ ಸುಧಾರಿಕೆ ಮಲ್ತೆರ್. ಅಕೇರಿಗ್ ನುಪ್ಪು ಪ್ರಸಾದ ಸೇವೆ ಆಯಿ ಬೊಕ್ಕ ದೇವಿನ ಘಟ ವಿಸರ್ಜನೆ ಗೌಜಿ ಗಮ್ಮತ್ ಡ್ ಚೌಪಾಟಿಗ್ ನಡತ್ ಪೋಂಡು.

ಬೋರಾ ಬಜಾರ್ ಭುವನೇಶ್ವರಿ ದೇವಿನ ಮಾರ್ನೆಮಿ ಉಚ್ಚಯ ಮುಗಿತಲ

ಬೊಂಬೈ: ಬೋರಾ ಬಜಾರ್ ಶ್ರೀ ಭುವನೇಶ್ವರಿ ಸೇವಾ ಸಮಿತಿದ ಮುತಾಲಿಕೆಡ್ ಸುರು ಆಯಿನ ಶ್ರೀ ಭುವನೇಶ್ವರಿ ದೇವಿನ ಮಾರ್ನೆಮಿ ಉಚ್ಚಯ ಅ.24 ಕ್ಕ್ ಮುಗಿತಲ ಆಂಡ್.

ಅ.24 ಕ್ಕ್ ಬೊಲ್ಪುಗು ಅಮ್ಮನ ನಿತ್ಯಪೂಜೆ, ಮಧ್ಯಾಹ್ನ ನುಪ್ಪು ಪ್ರಸಾದ ಸೇವೆ ನಡತ್ಂಡ್. ಬೊಕ್ಕ ಸಂಪೂರ್ಣ ಗ್ರಂಥ ಪಾರಾಯಣ, ದೇವಿ ದರ್ಶನ ಆಯಿ ಬೊಕ್ಕ ದೇವೆರೆನ ಉಚ್ಚಯ ಮೂರ್ತಿನ್ ಶ್ರೀ ಜ್ಯೋತಿಷ್ಯ ಶಾಸ್ತ್ರ ವಿದ್ವಾನ್ ರಾಜೇಶ್ ಭಟ್ ಮೆರೆನ ಮುತಾಲಿಕೆಡ್, ಪಲ್ಲೆಕಿ ಮೆರವಣಿಗೆಡ್ ಗಂಗಾಜಳಕ ಮಲ್ಪೆರೆ  ಚೌಪಾಟಗ್ ಭಾರೀ ಗೌಜಿಡ್ ಕೊನೊಯೆರ್.

ಈ ಲೇಸ್ ಗ್ ಸಮಿತಿದ ಗುರ್ಕಾರೆ ಡಾಕ್ಟರ್ ಪ್ರಕಾಶ್ ಬೆದ್ರ, ಒತ್ತು ಗುರ್ಕಾರೆ ಸಂಜೀವ ಪಿ ಬಂಗೇರ, ಕಾರ್ಯದರ್ಶಿ ಸುನಿಲ್ ಶರ್ಮ, ಕೋಶಾಧಿಕಾರಿ ಭಾಸ್ಕರ್ ವಿ ಪೂಜಾರಿ, ಶೇಖರ್ ಕರ್ಕೇರ, ಗುರುಪ್ರಸಾದ್, ಅಶೋಕ್ ಸಾಲಿಯಾನ್, ಅನಿಲ್ ಸಾಲಿಯಾನ್, ದಯಾನಂದ ಕೋಟ್ಯಾನ್, ಲೀಲಾದರ ಕೋಟ್ಯಾನ್ ಸಹಕಾರ ಕೊರಿಯೆರ್. ಸಮಿತಿದ ಗುರ್ಕಾರೆ ಡಾಕ್ಟರ್ ಪ್ರಕಾಶ್ ಬೆದ್ರ ಸೊಲ್ಮೆ ಸಂದಾಯೆರ್ ‌

ನ.5: ಮೀರಾರೋಡ್ ಡ್ 23 ನೇ ವರ್ಷೊದ ಗೋಪಾಲಕೃಷ್ಣ ಅಸ್ರಣ್ಣ ನೆಂಪು ಲೇಸ್

ದುಬೈ: ಕೀರ್ತಿ ಶೇಷ ಕಟೀಲ್ ಗೋಪಾಲಕೃಷ್ಣ ಅಸ್ರಣ್ಣ ಸಂಸ್ಮರಣ ಸಮಿತಿ ಬೊಂಬೈ ಬೊಕ್ಕ ಯುಎಇದ ಮುತಾಲಿಕೆಡ್ 23 ನೇ ವರ್ಷೊದ ನೆಂಪು ಲೇಸ್ ನ.5 ಕ್ಕ್ ಬೊಂಬೈದ ಮೀರಾರೋಡು ಪೂರ್ವದ ಪ್ರಸಾದ್ ಇಂಟರ್ ನ್ಯಾಷನಲ್ ಹೋಟೆಲ್ ಕೈತಲ್ ದಿ.ಲತಾ ಮಂಗೇಶ್ಕರ್ ನಾಟ್ಯಗೃಹದ ಚಾವಡಿಡ್ ನಡಪರೆ ಉಂಡು.

ಈ ಲೇಸ್ ಡ್ ಬಯ್ಯಗ್ ಕಟೀಲ್ ದ ಆಜಿ ಯಕ್ಷಗಾನ ಮೇಳರ್ದ್ ಆಯ್ಕೆ ಮಲ್ತಿನ ಕಲಾವಿದೆರ್ ಬೊಕ್ಕ ಪೆರ್ಡೂರು ಮೇಳದ ಕಲಾವಿದೆರೆನ ಒಟ್ಟುಸೇರಿಗೆಡ್ ಸಂಪೂರ್ಣ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.

ಕರಿನ 23 ವರ್ಷೊದಿಂಚ ಬೊಂಬೈದ ಪೇಂಟೆಡ್ ಯಶಸ್ವಿ ಸಂಘಟಕೆರ್ ಪದ್ಮನಾಭ ಕಟೀಲ್ ಸ್ಥಾಪನೆ ಮಲ್ತಿನ, ಕೀರ್ತಿಶೇಷ ಕಟೀಲ್ ಗೋಪಾಲಕೃಷ್ಣ ಅಸ್ರಣ್ಣ ಸಮಿತಿ ಬೊಂಬೈ ಬೊಕ್ಕ ಯುಎಇ ನಡಪಾವೊಂದು ಬರ್ಪುನ ಈ ಲೇಸ್ ಡ್ ಆಸಕ್ತ ಕಲಾವಿದೆರೆಗ್ ಶೈಕ್ಷಣಿಕವಾದ್ ಸಾಮೂಹಿಕ ಪನವುದ ಸಕಾಯನ್ ಕೊರೊಂದು ಬೈದ್ಂಡ್. ಅಂಚೆನೆ ಯಕ್ಷಗಾನ ನೈಪಥ್ಯ ಕಲಾವಿದೆರೆಗ್ ಪ್ರತಿವರ್ಷೊಲ ಸನ್ಮಾನ ಮಲ್ದ್ಂಡ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್, ಶ್ರೀ ಕ್ಷೇತ್ರ ಕಟೀಲ್ ದ ಪ್ರಧಾನ ಅರ್ಚಕೆರ್ ಲಕ್ಷ್ಮೀನಾರಾಯಣ ಅಸ್ರಣ್ಣೆರ್ ಬೊಕ್ಕ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಮೆರೆನ ಪಾಲ್ವಿಕೆಡ್, ಗಲ್ಫ್ ರಾಷ್ಟ್ರದ ಬೊಕ್ಕ ಬೊಂಬೈದ ಬಿನ್ನೆರೆನ ಸಮ್ಮುಖಡ್ ಈ ಲೇಸ್ ನಡಪರೆ ಉಂಡು.

ಎಡನೀರು ಮಠತ್ತ ಸಚ್ಚಿದಾನಂದ ಭಾರತಿ ಸ್ವಾಮೀಜಿ ಮೇರ್ ಲೇಸ್ ಡ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಈ ಪೊರ್ತುಡು ಸಮಿತಿದ ಮುತಾಲಿಕೆಡ್ 300 ನೇ ಸನ್ಮಾನನ್ ರಸರಾಗ ಚಕ್ರವರ್ತಿ ದಿನೇಶ್ ಅಮ್ಮಣ್ಣಾಯ ಮೆರೆಗ್ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು.

ಬೊಂಬೈದ ಮಹಾನಗರಡ್ ಇಪ್ಪುನ ಕಟೀಲ್ ದ ಭಕ್ತೆರ್ ಬೊಕ್ಕ ಊರುದ ಪರವೂರುದ ಭಕ್ತಾದಿಲೆನ ಸಹಕಾರರ್ದ್ ಈತ್ ವರ್ಷೊ ಮಲ್ತಿನ ಲೇಸ್ ಯಶಸ್ವಿ ಆತ್ಂಡ್. ಅವ್ವೇ ರೀತಿದ ಸಹಕಾರನ್ ಈ ಲೇಸ್ ಗ್ ಕೊರೊಡು ಪಂದ್ ಸಂಘಟಿಕೆರ್ ಪದ್ಮನಾಭ ಕಟೀಲ್ ದುಬೈ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

ಅ.28: ಮಾಟುಂಗಾ ಮೈಸೂರು ಅಸೋಸಿಯೇಶನ್ ಡ್ ನಾಟಕೋತ್ಸವ

ಬೊಂಬೈ: ಬೊಂಬೈ ಕನ್ನಡ ಕಲಾ ಕೇಂದ್ರದ ಮುತಾಲಿಕೆಡ್, ಮೈಸೂರು ಅಸೋಸಿಯೇಷನ್ ಬೊಕ್ಕ ಕರ್ಣಾಟಕ ಬ್ಯಾಂಕ್ ದ ಒಟ್ಟುಸೇರಿಗೆಡ್ ನಾಟಕೋತ್ಸವ ಅ.28 ಸನಿಯಾರ ಮಾಟುಂಗಾ ಮೈಸೂರು ಅಸೋಸಿಯೇಶನ್ ಡ್ ನಡಪರೆ ಉಂಡು.

ಬೊಲ್ಪುಗು ಬೊಂಬೈ ಕಲಾಸ್ಪಂದನ ಮೊಕ್ಲೆರ್ದ್ ಸೋತು ಗೆದ್ದವಳು ಕನ್ನಡ ನಾಟಕ ಬೊಕ್ಕ ವಾಸುದೇವ ಮಾರ್ನಾಡು ಬೊಕ್ಕ ಕೂಟದಕ್ಲೆರ್ದ್ ಭೀಷ್ಮ ವಿಜಯ ತಾಳಮದ್ದಳೆ, ಮಧ್ಯಾಹ್ನ ಬೊಂಬೈ ಕನ್ನಡಿಗ ಕಲಾವಿದೆರೆನ ಪರಿಷತ್ ಮೊಕ್ಲೆರ್ದ್ ಬಸುರಾದಳಲ್ಲೋ ನನ್ನ ಹುಡುಗಿ ನಾಟಕ, ಬಯ್ಯಗ್ ಬೊಂಬೈ ಕನ್ನಡ ಕಲಾಕೇಂದ್ರ ಮೊಕ್ಲೆರ್ದ್ ಬಿಸಿಲು ಬೆಳದಿಂಗಳು ನಾಟಕ, ಜ್ಯೋತಿ ಅನಂತ್ ಭಟ್ ಬೊಕ್ಕ ಕೂಟದಕ್ಲೆರ್ದ್ ಭಕ್ತಿ ಬೊಕ್ಕ ಭಾವಗೀತೆಲು, ಸಹನಾ ಸ್ಕೂಲ್ ಆಫ್ ಪರ್ಫಾರ್ಮಿಂಗ್ ಆರ್ಟ್ಸ್ ಮೊಕ್ಲೆರ್ದ್ ನೃತ್ಯ ವೈವಿಧ್ಯ ನಡಪರೆ ಉಂಡು.