ತುಳು ಸುದ್ದಿ

ಕುಡ್ಲ ಕೈತಲ್ದ ಕೆರೆಕ್ಲೆಡ್ ನೀರ್ ದ ಕೊರತೆ

ಕುಡ್ಲ: ಅರೆಗಾಲ ಸುರು ಆವೊಂದು ಇಪ್ಪುನಗನೇ ಕುಡ್ಲ ಪೇಂಟೆಡ್ ನೀರ್ ದ ತಾಪತ್ರೆ ಸುರು ಆತ್ಂಡ್.

ಕುಡ್ಲ ಪೇಂಟೆ ಬೊಕ್ಕ ಗ್ರಾಮಾಂತರ ಪ್ರದೇಶಗ್ ಪರ್ಪಿನ ನೀರ್ ಪೂರೈಕೆ ಮಲ್ಪುನ ತುಂಬೆ ಡ್ಯಾಂ ಡ್ ಇತ್ತೆ ನೀರ್ ಬರ್ಪುನವು ಸುಮಾರ್ ಕಡಿಮೆ ಆತ್ಂಡ್. ನೀರ್ ದ ಪ್ರಮಾಣ ಆಜಿ ಮೀಟರ್ ಗ್ ಜೈದ್ಂಡ್. ಪೇಂಟೆದ ಕೆರೆಕುಲು ಕೋಟಿ ಕೋಟಿ ಅನುದಾನರ್ದ್ ಅಭಿವೃದ್ಧಿ ಆವೊಂದು ಉಂಡು ಆಂಡ ನೀರ್ ಮಾತ್ರ ಪರಿಯೆರೆ ಯೋಗ್ಯ ಇಜ್ಜಿ.

ಮಂಗಳಾದೇವಿ ಕೈತಲ್ದ ಗುಜ್ಜರಕೆರೆ, ಕಾವೂರು ಕೆರೆ ಸ್ಮಾರ್ಟ್ ಸಿಟಿಡ್ ಅಭಿವೃದ್ಧಿ ಆಂಡ, ಮೊಯಿಲಿ ಕೆರೆ, ಕರ್ಂಭಿಸ್ಥಾನ, ಬೈರಾಡಿ ಕೆರೆ, ಜೋಗಿ ಕೆರೆಕುಲು ಮೂಡಾರ್ದ್ ಅಭಿವೃದ್ಧಿ ಆತ್ಂಡ್. ಈ ಕೆರೆತ್ತ ಅಭಿವೃದ್ಧಿಗ್ ಕೋಟಿ ಕೋಟಿ ಕಾಸ್ ಪಾಡ್ದ್ಂಡ್. ಆಂಡ ಒಳಚರಂಡಿ ತ್ಯಾಜ್ಯ ಕೆರೆತ್ತ ಉಲಯಿ ಸೇರ್ದ್ ನೆತ್ತ ನೀರ್ ಪರಿಯೆರೆ ಯೋಗ್ಯ ಆತಿಜಿ. ಮೊಯಿಲಿಕೆರೆ ಪಾಚಿರ್ದ್ ದಿಂಜಿದ್ ಪೋಂಡ, ಕಾವೂರು ಕೆರೆ ಪಂತಿರ್ದ್ ದಿಂಜಿದ್ ಪೋತ್ಂಡ್. ಕೆರೆ ಅಭಿವೃದ್ಧಿ ಪುದರ್ ಡ್ ಜನಕ್ಲೆನ ತೆರಿಗೆ ಕಾಸ್ ಪೋಲಾತ್ಂಡ್ ಬುಡುಂಡ ಒಂಜಿ ನಯಾ ಪೈಸೆಲ ಲಾಭ ಆತಿಜಿ. ಕಡೆ ಪಕ್ಷ ಅಂತರ್ಜಲ ಮಟ್ಟನ್ ಎಚ್ಚ ಮಲ್ಪೆರೆಲ ಆವೊಂದು ಇಜ್ಜಿ.

ಗುಜ್ಜರಕೆರೆ ಬಜಿ ಕೆರೆ ಮಾತ್ರ ಅತ್ತ್, ನೆತ್ತ ಪಿರವು ದೈವಿಕ ಹಿನ್ನಲೆ ಉಂಡು. ಉಂದು ನಾಥಪಂಥದ ಗುರು ಮಚ್ಚೇಂದ್ರ ನಾಥೆರೆಗ್ ಮೆರೆನ ಶಿಷ್ಯೆ ಗೋರಕ್ಷನಾಥೆರ್ದ್ ಸ್ಥಾಪನೆ ಆಯಿನ ಕೆರೆ. ಗುರು ಜನಕ್ಲೆನ ಕೆರೆ ಗುಜ್ಜರಕೆರೆ ಆತ್ಂಡ್. ಈ ಕೆರೆಟ್ಟ್ ದುಂಬು ಮಂಗಳಾದೇವಿ ಬೊಕ್ಕ ಹಳೆಕೋಟೆ ದೇವಲ್ಯದ ಜಾತ್ರೆದ ಬೊಕ್ಕ ಅವಭೃತಸ್ನಾನ ನಡತೊಂದು ಉಂಡು. ಈ ಇತಿಹಾಸ ಕುಡ ಬರೊಡು ಪಂದ್ ಕೈತಲ್ದಕುಲು ಗುಜ್ಜರಕೆರೆ ತೀರ್ಥಸಂರಕ್ಷಣಾ ಸಮಿತಿನ್ ರಚನೆ ಮಲ್ತ್ ದ್, ಈ ಬಗೆಟ್ಟ್ ಏಪಲ ಪೊರ್ಂಬಾಟ ನಡಪಾವೊಂದು ಉಲ್ಲೆರ್. ‌ನೆಕ್ಕೊಂಜಿ ಫಲಶ್ರುತಿಲ ತಿಕೊಡಾತ್ಂಡ್.

ಆಡಳಿತ ನಡಪಾವುನಕುಲು, ಅಧಿಕಾರಿಲು ಅಭಿವೃದ್ಧಿ ಪುದರ್ ಡ್ ಕೆರೆಲೆನ್ ಆಕರ್ಷಣೀಯ ಸ್ಪಾಟ್ ದಲೆಕ್ಕ ಮಲ್ತೊಂದು ಉಲ್ಲೆರ್ ಬುಡುಂಡ ಅವೆತ್ತ ಮೂಲ ಆಶಯನ್ ಪೂರ್ಣ ಮಲ್ಪುನಲ್ಪ ವಿಫಲರಾತೆರ್. ಸ್ಮಾರ್ಟ್ ನಗರಿ ಪುದರ್ ಡ್ ಮರಕುಲು ಅಭಿವೃದ್ಧಿಯಡಿಟ್ಟ್ ಸಮಾಧಿ ಆವೊಂದು ಉಂಡು. ಪಶ್ಚಿಮ ಘಟ್ಟಲೆಡ್ ಮಳೆ ಕಾಡ್ ನಾಶ ಆವೊಂದು ಉಂಡು. ಕರಾವಳಿಗ್ ಬರ್ಸ ಮರೀಚಿಕೆ ಆವೊಂದು ಉಂಡು. ನೀರ್ ಗ್ ಬಂಗ ಆತ್ಂಡ್. ಇಂಚಿನ ಪೊರ್ತುಡು ಲೆಕ್ಕ ಮಲ್ಪುನತ್ ಇಪ್ಪುನ ಈ ಕೆರೆಕ್ಲೆನ ನೀರ್ ದ ತಾಪತ್ರೆ ಸರಿ ಮಲ್ಪರೆ ಸಹಕಾರಿ ಆಪುನ ಮಟ್ಟಡ್ ಅಭಿವೃದ್ಧಿ ಮಲ್ಪೊನಲ್ಪ ಅನಿವಾರ್ಯತೆದ ಕಾಲಘಟ್ಟಡ್ ನಮ ಉಲ್ಲ. ಜನಪ್ರತಿನಿಧಿಲು, ಅಧಿಕಾರಿಲು ಈ ನಿಲೆಟ್ಟ್ ಯೋಚನೆ ಮಲ್ಪೊಡಾಪುಂಡು. ಪೂರ್ವಜೆರೆರ್ದ್ ಬತ್ತಿನ ಇಂಚಿನ ಪ್ರಕೃತಿ ಸಂಪತ್ತ್ ಕಿರಿಯೆರೆಗ್ ತಿಕುಲೆಕ್ಕ ಮಲ್ಪುನ ಅನಿವಾರ್ಯತೆಲ ಉಂಡು. ನೆಕ್ಕ್ ಕೈತಲ್ದಕ್ಲೆನ ಸಹಕಾರಲ ಅತ್ಯಗತ್ಯ ಆತ್ಂಡ್.

ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊದ ನೇಮ

ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ಶ್ರೀ ಅರಸು ಕುಂಜರಾಯ ದೈವೊದ ನೇಮ ಗೌಜಿಡ್ ಸುಕ್ರಾರದಾನಿ ನಡತ್ಂಡ್.

ಧಾರ್ಮಿಕ ಲೇಸ್ ದ ಲೆಕ್ಕೊಡು ಬೊಲ್ಪುಗು ಅಧಿವಾಸ ವಾಸ್ತು ಹೋಮ, ಕೊಡಿ ಏರ್ ದ್ ಬ್ರಹ್ಮಕಲಶಾಭಿಷೇಕ, ಪ್ರಸನ್ನ ಪೂಜೆ, ಪ್ರಸಾದ ವಿತರಣೆ, ಅನ್ನ ಪ್ರಸಾದ ಸೇವೆ ಆದ್ ರಾತ್ರೆ ಅರಸು ಕುಂಜರಾಯ ದೈವೊದ ನೇಮ ಬೊಕ್ಕ ಕೊಂಡೆಲ್ತಾಯ ದೈವೊದ ನೇಮ, ಮೈಸಂದಾಯ ದೈವೊದ ನೇಮ ನಡತ್ಂಡ್.

ಈ ಪೊರ್ತುಡು ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಉಮಾನಾಥ್ ಕೋಟ್ಯಾನ್, ಸಮಿತಿದ ಅಧ್ಯಕ್ಷೆರ್, ಪದುಕೆರ್ ಬೊಕ್ಕ ಸಾರರ್ದ್ ಎಚ್ಚ ಭಕ್ತೆರ್ ಪಾಲ್ ಪಡೆದಿತ್ತೆರ್.

ಕಲ್ಯಾಣ್ ತುಳುನಾಡ ತುಳುವೆರ್ ಪೊಂಜೊವುಲೆನ ಕೂಟಕ್ಲೆರ್ದ್ ಪಂಢರಪುರ ಯಾತ್ರೆ

ಬೊಂಬೈದ ಕಲ್ಯಾಣ್ ತುಳುನಾಡ ತುಳುವೆರ್ ಕೂಟದ ಪೊಂಜೊವುಲು ಅಂತಾರಾಷ್ಟ್ರೀಯ ವಿಶ್ವ ಮಹಿಳಾ ದಿನತ್ತ ನಿಲೆಟ್ಟ್ ಪಂಢರಪುರ ಯಾತ್ರೆ ಬೊಕ್ಕ ದೇವೆರ್ನ ದರ್ಶನ ಮಲ್ತೆರ್.

ಮಾರ್ಚ್ 8 ಗು ಯಾತ್ರೆ ಪಿದಾಡ್ದ್ ಮಾ.10 ಕ್ಕ್ ಪೊರ್ಲುಡು ಶ್ರೀ ವಿಠ್ಠಲ ರುಕ್ಮಿಣಿ ದೇವೆರೆನ ದರ್ಶನ ಮಲ್ತ್ ದ್ ಸಂತೋಷ ಪಡೆಯೆರ್.

ಈ ಪ್ರವಾಸದ ಜವಾಬ್ದಾರಿನ್ ತುಳುನಾಡ ತುಳುವೆರ್ ಕಲ್ಯಾಣ್ ದ ಸಂಸ್ಥಾಪಕ ಮಹಿಳಾ ಸದಸ್ಯೆರಾಯಿನ ಪದ್ಮಿನಿ ಕೋಟ್ಯಾನ್ ಮಲ್ತ್ ದೆರ್. ಸಂಸ್ಥೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಲ್ಯ ಗುತ್ತು ಪಂಜ–ಕೊಯಿಕುಡೆ ಮೆರೆನ ಮುತಾಲಿಕೆಡ್ ಪ್ರತಿ ವರ್ಷ ಧಾರ್ಮಿಕ, ಶೈಕ್ಷಣಿಕ ಬೊಕ್ಕ ಸಮಾಜಿಕ ಸೇವೆ ನಡತೊಂದು ಉಂಡು.

ಈ ಪ್ರವಾಸೊಡು ಸದಸ್ಯೆರಾಯಿನ್ ಪದ್ಮಿನಿ ಕೋಟ್ಯಾನ್, ಪ್ರಭಾವತಿ ಸುವರ್ಣ, ಭವಾನಿ ಪೂಜಾರಿ, ಶ್ರೀಮತಿ ಕೋಟ್ಯಾನ್, ದಯಾವತಿ ಸುವರ್ಣ, ಪ್ರೀತಿ ಸುವರ್ಣ, ಸುಮಿತ್ರ ಪೂಜಾರಿ, ಸ್ವಪ್ನ ಪೂಜಾರಿ, ಶಿಲ್ಪ ಪೂಜಾರಿ, ಅರ್ಚನಾ ಕೋಟ್ಯಾನ್, ನಿಶಾ ಕೋಟ್ಯಾನ್, ಅವ್ಯಾನ್ ಕೋಟ್ಯಾನ್, ಸಂಜೀವಿನಿ ಕರ್ಕೇರ, ಚೈತ್ರ ಕರ್ಕೇರ, ಜ್ಯೋತಿ ಸುವರ್ಣ, ವಿಶಾಲಾಕ್ಷಿ ಕೋಟ್ಯಾನ್, ವನಿತಾ ಪಾಲನ್, ಸುಂದರಿ ಕೋಟ್ಯಾನ್, ಶಶಿಕಲಾ ಸಾಲ್ಯಾನ್, ಸಾವಿತ್ರಿ ಕರ್ಕೇರ, ಪುಷ್ಪ ಪೂಜಾರಿ, ಚಂದ್ರಾವತಿ, ಶ್ರೇಯಾಳ ಶೇರಿಗಾರ್, ಲಲಿತ ಗೋಸಾಯಿನ್, ಅಶೋಕ್ ಕೋಟ್ಯಾನ್ ಬೊಕ್ಕ ಸದಾನಂದ ಶೇರಿಗಾರ್ ಇತ್ತೆರ್.

ಮಾ.17: ಬೋಳೂರು ಬತ್ತೇರಿ ಫ್ರೆಂಡ್ಸ್ (ರಿ.) ದ ಪೊಸ ಕಾರ್ಯಾಲಯ ಉದಿಪನ

ಕುಡ್ಲ: ಬೋಳೂರು ಸುಲ್ತಾನ್ ಬತ್ತೇರಿದಲ್ಪ ಬತ್ತೇರಿ ಫ್ರೆಂಡ್ಸ್ (ರಿ.) ದಕುಲು ಪೊಸತಾದ್ ನಿರ್ಮಾಣ ಮಲ್ತಿನ ಕಾರ್ಯಾಲಯ ಕಟ್ವಾನದ ಉದಿಪನ ಲೇಸ್ ಮಾ.17 ಐತಾರ ನಡಪರೆ ಉಂಡು.

ಈ ಲೇಸ್ ದ ಉದಿಪನನ್ ಶಾಸಕೆರ್ ಡಿ. ವೇದವ್ಯಾಸ ಕಾಮತ್ ಮಲ್ಪೆರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ಬೋಳೂರು ಮೊಗವೀರ ಮಹಾಸಭಾ (ರಿ.) ದ ಗುರ್ಕಾರೆ ಯಶವಂತ್ ಪಿ ಮೆಂಡನ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಕುಡ್ಲ ಮ.ನ.ಪಾ ಮಹಾ ಪೌರೆರ್ ಸುಧೀರ್ ಶೆಟ್ಟಿ ಕಣ್ಣೂರು, ಕಾಂಚನಾ ಹ್ಯುಂಡೈ ಕಂಪೆನಿದ ಆಡಳಿತ ನಿರ್ದೇಶಕೆರ್ ಪ್ರಸಾದ್ ರಾಜ್ ಕಾಂಚನ್, ಕುಡ್ಲ ಬರ್ಕೆ ಪೊಲೀಸ್ ಠಾಣೆದ ಆರಕ್ಷಕ ನಿರೀಕ್ಷಕೆರ್ ನಾಗೇಶ್ ಎಸ್ ಹಸ್ಲರ್, ಬಿರುವೆರ್ ಕುಡ್ಲ (ರಿ.) ದ ಸ್ಥಾಪಕ ಗುರ್ಕಾರೆ ಉದಯ ಪೂಜಾರಿ, ಬೋಳೂರು ವಾರ್ಡ್ ಕಾರ್ಪೊರೇಟರ್ ಜಗದೀಶ ಶೆಟ್ಟಿ, ಉಳ್ಳಾಲ ಮಾರುತಿ ಜನಸೇವಾ ಸಂಘ (ರಿ‌.) ದ ಗುರ್ಕಾರೆ ವರದರಾಜ್ ಬಂಗೇರ ಉಳ್ಳಾಲ, ಕುಡ್ಲ ಶ್ರೀ ವಿಘ್ನೇಶ್ವರ ಟ್ರಾನ್ಸ್‌ಪೋರ್ಟ್‌ ಕಂಪೆನಿ ಧಣಿ ಪ್ರವೀಣ್ ಎಸ್ ಸುವರ್ಣ ಬಗಂಬಿಲ, ಕುಡ್ಲ ಲೆಕ್ಕ ಪತ್ರ ಸ್ಥಾಯಿ ಸಮಿತಿ ಗುರ್ಕಾರೆ ಗಣೇಶ್ ಕುಲಾಲ್, ಬೋಳೂರು ಬತ್ತೇರಿ ಫ್ರೆಂಡ್ಸ್ (ರಿ.) ದ ಗುರ್ಕಾರೆ ಗೌತಮ್ ಕರ್ಕೇರ, ಬೋಳೂರು ಮೊಗವೀರ ಮಹಿಳಾ ಸಂಘದ ಗುರ್ಕಾರ್ದಿ ಯೋಗಿನಿ ಬಂಗೇರ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬೋಳೂರು ಬತ್ತೇರಿ ಫ್ರೆಂಡ್ಸ್ (ರಿ.) ದ ಗುರ್ಕಾರೆ, ಪದುಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಇನಿ ಶಿವರಾತ್ರಿ ತೇರ್ ಉಚ್ಚಯ

ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಮಹಾಶಿವರಾತ್ರಿ ಬೊಕ್ಕ ವರ್ಷಾವಧಿ ಜಾತ್ರೆದ ನಿಲೆಟ್ಟ್ ಇನಿ ರಾತ್ರೆ (ಮಾ.8) ತೇರ್ ಉಚ್ಚಯ ನಡಪರೆ ಉಂಡು.

ಅವೆರ್ದ್ ಬೊಕ್ಕ ವಿಷ್ಣುಬಲಿ, ಶಿವಬಲಿ, ಮಹಾಶಿವರಾತ್ರಿ ಜಾಗರಣೆ ಬಲಿ, ಕಟ್ಟೆಪೂಜೆ, ತೇರ್ ಉಚ್ಚಯ, ಕೆರೆದೀಪ, ಮಂಟಪ ಪೂಜೆ ನಡಪರೆ ಉಂಡು.

ಮಾ.9 ಕ್ಕ್ ಮಧ್ಯಾಹ್ನ ಪಂಚಾಮೃತಾಭಿಷೇಕ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀಕ್ಷೇತ್ರ ಕುದ್ರೋಳಿದ ಆಡಳಿತ ಬೊಕ್ಕ ಅಭಿವೃದ್ಧಿ ಸಮಿತಿದಕುಲು ತೆರಿಪಾದೆರ್.

ಸುಬ್ರಹ್ಮಣ್ಯ ಆರೋಗ್ಯ ಕೇಂದ್ರಗ್ ಪ್ರಿಂಟರ್ ಕೊಡುಗೆ

ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯ ಪ್ರಾಥಮಿಕ ಆರೋಗ್ಯ ಕೇಂದ್ರಗ್ ಕುಡ್ಲ ವಿಜಯ ಗ್ರಾಮೀಣ ಪ್ರತಿಷ್ಠಾನ ಸಂಸ್ಥೆದಕುಲು ರಡ್ಡ್ ಕಂಪ್ಯೂಟರ್ ಪ್ರಿಂಟರ್ ನ್ ಮಾ.7 ಗುರುವಾರ ಕೊಡುಗೆಯಾದ್ ಕೊರಿಯೆರ್.

ಈ ಕೊಡುಗೆನ್ ಕುಡ್ಲದ ವಿಜಯ ಗ್ರಾಮೀಣ ಪ್ರತಿಷ್ಠಾನ ಸಂಸ್ಥೆದ ಕಾರ್ಯದರ್ಶಿ ರಾಜೇಂದ್ರ ರೈ ಬೆಳ್ಳಿಪಾಡಿ ಮೇರ್ ಆರೋಗ್ಯ ಕೇಂದ್ರದ ಆಡಳಿತ ವೈದ್ಯಾಧಿಕಾರಿ ಡಾ/ ತ್ರಿಮೂರ್ತಿ ಮೆರೆಗ್ ಕೊರಿಯೆರ್.

ಈ ಪೊರ್ತುಡು ಸುಬ್ರಹ್ಮಣ್ಯದ ನಿವೃತ್ತ ಉಪನ್ಯಾಸಕೆರ್ ವಿಶ್ವನಾಥ ನಡುತೋಟ, ವಿಜಯ ಪ್ರತಿಷ್ಠಾನ ಸಂಸ್ಥೆದ ಪಂಡರಿನಾಥ, ಪ್ರಾಥಮಿಕ ಆರೋಗ್ಯ ಕೇಂದ್ರದ ಶುಶ್ರೂಷನೆ ಅಧಿಕಾರಿ ಸುಮಾ, ಪ್ರಾಥಮಿಕ ಸುರಕ್ಷಾ ಅಧಿಕಾರಿ ಹೇಮಲತಾ, ಹಿರಿಯ ಪ್ರಾಥಮಿಕ ಆರೋಗ್ಯ ಸುರಕ್ಷಾಧಿಕಾರಿ ಭಾಗ್ಯಶ್ರೀ, ಬೊಕ್ಕ ಆರೋಗ್ಯ ಕೇಂದ್ರದ ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್.

ಪಂಜ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಡ್ ದಂತ ಚಿಕಿತ್ಸೆ ಶಿಬಿರ

ಸುಬ್ರಹ್ಮಣ್ಯ: ಸುಳ್ಯದ ಕೆವಿಜಿ ದಂತ ಮಹಾವಿದ್ಯಾಲಯದಕುಲು ಪಂಜ ಪಂಚಶ್ರೀ ಜೆ.ಸಿ ಮೊಕ್ಲೆನ ಒಟ್ಟುಸೇರಿಗೆಡ್ ಪಂಜ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆದ ಜೋಕ್ಲೆಗ್ ಉಚಿತ ದಂತ ಚಿಕಿತ್ಸಾ ಶಿಬಿರನ್ ಬುದಾರ ಶಾಲೆಡ್ ಮಲ್ತೆರ್.

ಪಂಜ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆದ ಶಾಲಾಭಿವೃದ್ಧಿ ಬೊಕ್ಕ ಮೇಲುಸ್ತುವಾರಿ ಸಮಿತಿ ಗುರ್ಕಾರೆ ಸೋಮಶೇಖರ ನೇರಳ ಶಿಬಿರ ಉದಿಪನ ಮಲ್ತ್ ದ್ ಪಾತೆರ್ದ್, ಸೌಂದರ್ಯವರ್ಧಕ ಬೊಕ್ಕ ಆರೋಗ್ಯಗ್ ಪೂರಕ ಆಯಿನ ಕೂಲಿದ ಬಗೆಟ್ಟ್ ಕಲ್ಪಾರ್ಥಿಲೆಡ ಅರಿವು ಬೊಕ್ಕ ಕಾಳಜಿ ಮುಖ್ಯ ಪಂದ್ ಪಂಡೆರ್.

ಕೆವಿಜಿ ದಂತ ಮಹಾವಿದ್ಯಾಲಯದ ಡಾ. ಆಲ್ವಿನ್ ಪಾತೆರ್ದ್, ದಂತ ಚಿಕಿತ್ಸಾ ಶಿಬಿರದ ಮಹತ್ವ ಬೊಕ್ಕ ಕಾರ್ಯವಿಧಾನನ್ ತೆರಿಪಾಯೆರ್.

ಪಂಜ ಪಂಚಶ್ರೀ ಜೆಸಿ ಗುರ್ಕಾರೆ ಜೀವನ್ ಮಲ್ಕಜೆ ಸಭಾಧ್ಯಕ್ಷತೆನ್ ಒಯಿಸ್ ದಿತ್ತೆರ್.

ಈ ಪೊರ್ತುಡು ಕೆವಿಜಿ ದಂತ ಮಹಾ ವಿದ್ಯಾಲಯದ ಡಾ. ಅಮೋಘ, ಶಾಲೆದ ಮುಖ್ಯ ಶಿಕ್ಷಕಿ ಲೀಲಾ ಕುಮಾರಿ.ಟಿ, ಜೆಸಿ ನಿಕಟ ಪೂರ್ವ ಗುರ್ಕಾರೆ ಶಿವ ಪ್ರಸಾದ್ ಹಾಲೆಮಜಲು, ಕಾರ್ಯದರ್ಶಿ ಜೀವನ್ ಶೆಟ್ಟಿ ಗದ್ದೆ, ನಾಗಮಣಿ ಕೆದಿಲ ಪಾಲ್ ಪಡೆದಿತ್ತೆರ್.

ಮಾ.16: ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ 23ನೇ ವಾರ್ಷಿಕ ಉಚ್ಚಯ, ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ

ಕುಡ್ಲದ ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ (ರಿ.) ದ 23ನೇ ವಾರ್ಷಿಕ ಉಚ್ಚಯದ ಲೆಕ್ಕೊಡು ಮಾ.16 ಸನಿಯಾರ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ “ಕಥೆ ಎಡ್ಡೆಂಡು” ತುಳು ಹಾಸ್ಯಮಯ ನಾಟಕ ನಡಪರೆ ಉಂಡು.

ಬಯ್ಯಗ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ, ಮಹಾಪೂಜೆ ಆದ್ ಪ್ರಸಾದ ವಿತರಣೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಅಂಚೆನೆ ರಾತ್ರೆ ನಡಪುನ ಧರ್ಮಸಭೆಟ್ಟ್ ಶಾಸಕೆರ್ ಡಿ. ವೇದವ್ಯಾಸ್ ಕಾಮತ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯರೆ ಉಲ್ಲೆರ್. ಬೊಕ್ಕ ಶಾರದಾ ಆಟ್ಸ್ ಕಲಾವಿದೆರ್ (ರಿ.) ಮಂಜೇಶ್ವರ ಕೂಟದಕ್ಲೆರ್ದ್ “ಕಥೆ ಎಡ್ಡೆಂಡು” ತುಳು ಹಾಸ್ಯಮಯ ನಾಟಕ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಹೊೖಗೆಬಜಾರ್ ಫ್ರೆಂಡ್ಸ್ ಕ್ರಿಕೆಟರ್ಸ್ ದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಮಾ.10: ಬಿಲ್ಲವರ ಮಹಾ ಮಂಡಲದ ಬೊಳ್ಳಿ ಪರ್ಬ

ಸಮಾವೇಶೊಗು 50 ಸಾರ ಜನ ಸೇರುನ ನಿರೀಕ್ಷೆ: ಡಾ|ರಾಜಶೇಖರ ಕೋಟ್ಯಾನ್

ಮುಲ್ಕಿ: ದೇಶ ವಿದೇಶಡ್ ಸಕ್ರಿಯವಾದುಪ್ಪುನ 275 ಬಿಲ್ಲವ ಸಂಘಟನೆಲೆನ ಸಂಸ್ಥೆ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲ(ರಿ) ಮುಲ್ಕಿ ನೆತ್ತ ಬೊಳ್ಳಿ ಪರ್ಬದ ಲೇಸ್ ಮಾ.10 ಕ್ಕ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಕೈತಲ್ದ ಭವಾನಿ ಶಂಕರ ಕಾಂಪೌಂಡ್ ಡ್ ನಡಪರೆ ಇತ್ತ್ ದ್ ದೇಶ ವಿದೇಶೊರ್ದು ಸುಮಾರ್ 50 ಸಾರ ಮುಟ್ಟ ಸಮಾಜ ಬಾಂಧವೆರ್ ಪಾಲ್ ಪಡೆಪಿನ ನಿರೀಕ್ಷೆ ಉಂಡು ಪಂದ್ ಮಹಾ ಮಂಡಲದ ಅಧ್ಯಕ್ಷೆರ್ ಡಾ|ರಾಜಶೇಖರ ಕೋಟ್ಯಾನ್ ತೆರಿಪಾಯೆರ್.

ಆರ್ ಮುಲ್ಕಿಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ದ್, ಮಾ.10 ಕ್ಕ್ 9 ಗಂಟೆಗ್ ಲೇಸ್ ನ್ ಕೇಂದ್ರದ ಮಾಜಿ ಸಚಿವೆರ್ ಜನಾರ್ದನ ಪೂಜಾರಿ ಉದಿಪನ ಮಲ್ಪರೆ ಉಲ್ಲೆರ್. ಸೋಲೂರು ಮಠ ಆರ್ಯ ಈಡಿಗ ಸಂಸ್ಥಾನದ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಕನ್ಯಾಡಿ ಶ್ರಿರಾಮ ಕ್ಷೇತ್ರದ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ, ಶಿವಗಿರಿ ಮಠತ್ತ ಶ್ರೀ ಸತ್ಯಾನಂದತೀರ್ಥ ಸ್ವಾಮೀಜಿ ಮೊಕುಲು ಆಶೀರ್ವಚನ ಮಲ್ಪರೆ ಉಲ್ಲೆರ್ ಪಂದ್ ತೆರಿಪಾಯೆರ್.

ಬೊಳ್ಳಿ ಪರ್ಬದ ಈ ಒಂಜಿ ಲೇಸ್ ಸಮಾಜದ ಬೇಡಿಕೆಲೆನ್ ಈಡೇರಿಸಾವರೆ ಶಕ್ತಿ ತೋಜಾವುನ ಸಮಾವೇಶ ಆವರೆ ಉಂಡು. ಬಿಲ್ಲವೆರೆಗ್ ಪ್ರತ್ಯೇಕ ನಿಗಮ, ಮಾತ ಪಕ್ಷೊಡುಲ ರಾಜಕೀಯ ಪ್ರಾತಿನಿಧ್ಯ, ಮೀಸಲಾತಿ, ಸರಕಾರಿ ಅನುದಾನ ಇಂಚಿನ ಮಾತ ಸವಲತ್ತುಲೆನ್ ಸರಕಾರ ಒದಗಾದ್ ಕೊರ್ಪಿನ ನಿಲೆಟ್ಟ್ ಈ ಸಮಾವೇಶ ಮಲ್ಲ ಮಟ್ಟ್ ದ ಹಕ್ಕೊತ್ತಾಯ ಸಮಾವೇಶ ಆದ್ ತೋಜಿದ್ ಬರಿಯರೆ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ದೇಶದ ಬೊಕ್ಕ ಪಿದಯಿ ಊರುದ ಬಿಲ್ಲವ ಸಂಘಟನೆಲೆಗ್ “ಬಿಲ್ಲವ ಸಂಘಟನಾ ರತ್ನ” ಪ್ರಶಸ್ತಿ ಅಂಚೆನೆ ಸಮಾಜದ ಪುಗರ್ತೆದ ಕಲಾವಿದೆರಾಯಿನ ಸುಮನ್ ತಲ್ವಾರ್, ಜಯಮಾಲಾ, ನವೀನ್ ಡಿ. ಮೊಕ್ಲೆಗ್ “ಬಿಲ್ಲವ ಕಲಾ ಸಾಮ್ರಾಟ” ಪ್ರಶಸ್ತಿ ಅವ್ವತ್ತಾಂದೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬನ್ನಂಜೆ ಬಾಬು ಅಮೀನ್, ದಿನೇಶ್ ಅಮೀನ್ ಮಟ್ಟು, ಜಯರಾಮ್ ಬನಾನ್, ರಾಜ್ ಕುಮಾರ್ ಬೆಹರಿನ್, ಯುವವಾಹಿನಿ ಮೊಕ್ಲೆಗ್ ಗೌರವ ಸನ್ಮಾನ ನಡಪರೆ ಉಂಡು.ಅಂಚೆನೆ ರಜತ ವಿಶ್ವವಾಣಿ ಜಯ ಸಿರಿ ಬುಡುಗಡೆ, ಸ್ಥಾಪಕ ಸದಸ್ಯೆರೆಗ್ ಅಭಿನಂದನೆ, ಪ್ರತಿಭಾವಂತ ವಿದ್ಯಾರ್ಥಿಲೆಗ್ ವಿದ್ಯಾರ್ಥಿವೇತನ, ವಿಶೇಷಚೇತನ ಜೋಕ್ಲೆನ ಅಭಿವೃದ್ಧಿ ಸಂಸ್ಥೆಲೆಗ್ ಪನವುದ ಸಕಾಯ ಕೊರ್ಪಿನ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.

ಈ ಲೇಸ್ ಡ್ ರಾಜ್ಯದ ಸಚಿವೆರ್, ಮಾಜಿ ಸಚಿವೆರ್, ಶಾಸಕೆರ್ ಪಾಲ್ ಪಡೆಯರೆ ಉಲ್ಲೆರ್. ಒಟ್ಟಾರೆ ಉಂದೊಂಜಿ ಬಿಲ್ಲವ ಸಮುದಾಯದ ಮಹಾ ಸಮ್ಮೇಳನ ಆವರೆ ಉಂಡು ಪಂದ್ ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಉಪಾಧ್ಯಕ್ಷೆರ್ ಹರೀಶ್ ಡಿ.ಸಾಲ್ಯಾನ್, ಗೌ.ಪ್ರ.ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾಯಿರು,ಜತೆ ಕಾರ್ಯದರ್ಶಿಲು ಗಣೇಶ್ ಪೂಜಾರಿ ಮೂಡುಪೆರಾರ, ಶಿವಾಜಿ ಸುವರ್ಣ ಬೆಳ್ಳೆ, ಕೋಶಾಧಿಕಾರಿ ಪ್ರಭಾಕರ ಬಂಗೇರ ಕಾರ್ಕಳ, ಸಹ ಕೋಶಾಧಿಕಾರಿ ಗಣೇಶ್ ಎಲ್. ಪೂಜಾರಿ ಬೈಂದೂರು, ಬಿ.ಬಿ.ಪೂಜಾರಿ, ಸುರೇಶ್ ಪೂಜಾರಿ ಕುಳಾಯಿ, ತಿಮ್ಮಪ್ಪ ಪೂಜಾರಿ ಕಟೀಲು ಇತ್ತೆರ್.