ತುಳು ಸುದ್ದಿ

ಸಮಾಜಸೇವಕಿ ಪದ್ಮಿನಿ ವಸಂತ್ ಮೆರೆಗ್ ಹೊಸ ಅಂಗಣ ಮಾನಾದಿಗೆ

ಮುಲ್ಕಿ : ಸಮಾಜಸೇವಕಿ, ಬಹುಮುಖ ಪ್ರತಿಭೆ ಪದ್ಮಿನಿ ವಸಂತ್ ಐಕಳ ಮೆರೆಗ್ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಬುಡುಗಡೆ ಲೇಸ್ ಡ್ ಮಾನಾದಿಗೆ ನಡತ್ಂಡ್.

ಲೇಸ್ ದ ಅಧ್ಯಕ್ಷತೆನ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಸಮಾಜ ಸೇವಕಿ ನಂದಾ ಪಾಯಸ್ , ಉದ್ಯಮಿ ಕಮಲಾಕ್ಷ ಬಡಗುಹಿತ್ಲು, ಮಯೂರಿ ಫೌಂಡೇಶನ್ ದ ಜಯ ಕೆ. ಶೆಟ್ಟಿ ಇತ್ತೆರ್.
ಲೇಸ್ ಡ್ ರಮೇಶ್ ಅಮೀನ್ ಕೊಕ್ಕರಕಲ್, ಸರೋಜಿನಿ ಶೆಟ್ಟಿ, ಜಯಪ್ರಕಾಶ್ ಶೆಟ್ಟಿ ಐಕಳ, ಪುರಂದರ ಸಾಲ್ಯಾನ್, ರವೀಶ್ ಕಾಮತ್ ಮೊಕುಲು ಮಾತ ಇತ್ತೆರ್.

ಉದ್ಯಮಿ ವಾಸು ಪೂಜಾರಿ ಪ್ರಾರ್ಥನೆ ಮಲ್ತೆರ್. ಹೊಸ ಅಂಗಣ ಸಂಪಾದಕೆರ್ ಡಾ| ಹರಿಶ್ಚಂದ್ರ ಸಾಲ್ಯಾನ್ ಸ್ವಾಗತ ಮಲ್ತೆರ್. ವೈ.ಎನ್. ಸಾಲ್ಯಾನ್ ಸನ್ಮಾನದ ಓಲೆ ಓದಿಯೆರ್.
ರವಿಚಂದ್ರ ನಿರೂಪಣೆ ಮಲ್ತೆರ್.

ಮಾ.27: ಹರ್ಕೂರು ಶ್ರೀ ಮಹಾಗಣಪತಿ ದೇವಸ್ಥಾನಡ್ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶ ಉಚ್ಚಯ

ಮರವಂತೆ: ಕುಂದಾಪುರ ತಾಲೂಕ್ ದ ಹರ್ಕೂರು ಗ್ರಾಮದ ಶ್ರೀ ಮಹಾಗಣಪತಿ ದೇವಸ್ಥಾನದ ಪೊಸ ಶಿಲಾದೇವಸ್ಥಾನ ಸಮರ್ಪಣೆ, ಬ್ರಹ್ಮಕಲಶ ಉಚ್ಚಯ ಬೊಕ್ಕ ಅನ್ನ ಪ್ರಸಾದ ಸೇವೆ, ಧಾರ್ಮಿಕ ವಿಧಿವಿಧಾನದೊಟ್ಟಿಗೆ ಮಾ.26-28 ಮುಟ್ಟ ನಡಪರೆ ಉಂಡು.

ಮಾ.25 ಕ್ಕ್ ಹರ್ಕೂರು ಶ್ರೀ ಮಹಾಗಣಪತಿ ದೇವೆರೆನ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಲೇಸ್ ದ ಲೆಕ್ಕೊಡು ಶ್ರೀದೇವೆರೆನ ಬೊಳ್ಳಿ ಪ್ರಭಾವಳಿ ವೈಭವದ ಮೆರವಣಿಗೆ ನಡತ್ಂಡ್.

ಮಾ.26 ಕ್ಕ್ ಶ್ರೀ ಗಣಪತಿ ದೇವೆರೆನ ಪುನರ್ ಪ್ರತಿಷ್ಠೆ ಬೊಕ್ಕ ಶಿಲಾಮಯ ದೇವಸ್ಥಾನ ಉದಿಪನ ಲೇಸ್ ದ ಲೆಕ್ಕೊಡು ಬೇತೆ ಬೇತೆ ಧಾರ್ಮಿಕ ಲೇಸ್ ಲು ನಡಪರೆ ಉಂಡು.

ಮಾ.27 ಕ್ಕ್ ಬೊಲ್ಪುಗು ಪೀಠ ಪ್ರತಿಷ್ಠೆದೊಟ್ಟಿಗೆ ಧಾರ್ಮಿಕ ಲೇಸ್ ಸುರು ಆದ್, ಶ್ರೀಮಹಾಗಣಪತಿ ದೇವೆರೆನ ಅಷ್ಟಬಂಧ ಪ್ರತಿಷ್ಠಾ ಮಹೋಚ್ಚಯ ಲೇಸ್, ಮಹಾಪೂಜೆ ಪ್ರಸಾದ ವಿತರಣೆ ನಡಪರೆ ಉಂಡು.

ಮಾ.28 ಕ್ಕ್ ಶ್ರೀದೇವೆರೆನ ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಎ.24-26 ಮುಟ್ಟ ಡ್ರಿಂಕ್ಸ್ ಮಾರಾಟ ನಿಷೇಧ

ಒಡಿಪು: ಲೋಕಸಭೆ ವೋಟುದ ನಿಲೆಟ್ಟ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ರ್ದ್ ಮದ್ಯ ನಿಷೇಧ ಜಾರಿಗ್ ಬರ್ಪುಂಡು.

ವೋಟಿಂಗ್ ಬೊಕ್ಕ ಕೌಂಟಿಂಗ್ ನಡಪುನ ಪೊರ್ತುಡು ಕಾನೂನು ಬೊಕ್ಕ ಸುವ್ಯವಸ್ಥೆದ ಸಲುವಾದ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ಕ್ಕ್ ಬಯ್ಯಗ್ 6 ಗಂಟೆರ್ದ್ ಎ.26 ನಡುರಾತ್ರೆ 12 ಗಂಟೆ ಮುಟ್ಟ, ಬೊಕ್ಕ ವೋಟುದ ಲೆಕ್ಕದ ದಿನ ಜೂನ್ 3 ಕ್ಕ್ ನಡುರಾತ್ರೆ 12 ಗಂಟೆರ್ದ್ ಜೂನ್ 4 ಕ್ಕ್ ನಡುರಾತ್ರೆ 12 ಗಂಟೆ ಮುಟ್ಟ ಮದ್ಯ ಮುಕ್ತ ದಿನಲು ಪಂದ್ ಘೋಷಣೆ ಮಲ್ದ್ಂಡ್.

ಆ ದಿನಟ್ಟ್ ಮಾತ ರೀತಿದ ಮದ್ಯದ ಅಂಗಡಿಲು, ಮದ್ಯ ಮಾರಾಟ ಡಿಪೋಲು, ಮದ್ಯ ತಯಾರಿಕಾ ಡಿಸ್ಟಿಲರಿಲು, ಸ್ಟಾರ್ ಹೋಟೆಲ್‌ಲು ಬೊಕ್ಕ (ಕಲಿ) ಶೇಂದಿ ಅಂಗಡಿಲೆನ್ ಮುಚ್ಚೊಡು ಪಂದ್ ಜಿಲ್ಲಾಧಿಕಾರಿಲು ಆದೇಶ ಕೊರ್ತೆರ್.

ನಂದಿಕೇಶ್ವರ ದೇವಸ್ಥಾನದ ಪುನರ್ ಪ್ರತಿಷ್ಠೆ ಲೆಪ್ಪೋಲೆ ಬುಡುಗಡೆ

ಕುಂದಾಪುರ: ಸರಕಾರಿ ಆಸ್ಪತ್ರೆ ಆವರಣಡ್ ಇಪ್ಪುನ ನಂದಿಕೇಶ್ವರ ದೇವಸ್ಥಾನ ಪ್ರಾಚೀನವಾಯಿನವು. ದೇವೆರೆನ ಮಹಿಮೆ ಮಾತೆರೆಗ್ಲಾ ತೆರಿನವೇ. ಶಿಥಿಲಾವಸ್ಥೆಗ್ ಬತ್ತಿನ ದೇವಸ್ಥಾನನ್ ಶಿಲಾಮಯವಾದ್ ನಿರ್ಮಾಣ ಮಲ್ಪುನ ಯೋಜನೆ ಭಕ್ತೆರೆನ ಸಹಕಾರರ್ದ್ ನಡತ್ ದ್ಂಡ್. ದೇವೆರೆನ ಅನುಗ್ರಹರ್ದ್ ನಿರ್ಮಾಣ ಕೆಲಸ ಮುಗಿಪುನಡೆಗ್ ಬೈದ್ಂಡ್. ಎ.14-16 ಮುಟ್ಟ ಪೊಸ ಶಿಲಾಮಯ ದೇವಸ್ಥಾನದ ಉದಿಪನ, ಪುನರ್‌ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು ಪಂದ್ ಕುಂದಾಪುರ ಸಾರ್ವಜನಿಕ ಆಸ್ಪತ್ರೆದ ನಂದಿಕೇಶ್ವರ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಡಾ.ಡಿ ನಾಗೇಶ್ ಪಂಡೆರ್.

ಮೇರ್ ಪುನ‌ರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ ಲೇಸ್ ಡ್ ಐತಾರ ಪಾತೆರಿಯೆರ್.

ವಿದ್ಯುತ್ ಗುತ್ತಿಗೆದಾರೆರ್ ಕೆ.ಆರ್. ನಾಯ್ಕ, ರೆಡ್ ಕ್ರಾಸ್ ಸೊಸೈಟಿ ಘಟಕದ ಸಭಾಪತಿ ಜಯಕರ ಶೆಟ್ಟಿ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ಕೈತಲ್ದ ನಂದಿಕೇಶ್ವರ ಫ್ರೆಂಡ್ಸ್ ಸಂಸ್ಥೆದ ಅಧ್ಯಕ್ಷೆರ್ ಶಿವಪ್ರಕಾಶ್, ಪೂತ್ತ ವ್ಯಾಪಾರಿಲೆನ ಸಂಘದ ಅಧ್ಯಕ್ಷೆರ್ ಸತೀಶ್‌ ಕುಮಾರ್, ಫ್ರೆಂಡ್ಸ್ ಸರ್ಕಲ್ ಸಂಸ್ಥೆದ ಅಧ್ಯಕ್ಷೆರ್ ನಾಗರಾಜ ಖಾರ್ವಿ, ಮೈಲಾರೇಶ್ವರ ದೇವಸ್ಥಾನದ ಮಾಜಿ ಆಡಳಿತ ಮೊಕ್ತೇಸರೆರ್ ಡಿ.ಕೆ.ಅಣ್ಣಪ್ಪಯ್ಯ, ಜೀರ್ಣೋದ್ಧಾರ ಸಮಿತಿದ ಖಜಾಂಚಿ ಬಿ.ಎಂ. ಚಂದ್ರಶೇಖರ ಪಾಲ್ ಪಡೆದಿತ್ತೆರ್.

ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ರಾಧಾಕೃಷ್ಣ ಎದ್ಕೊನಿಯೆರ್. ಗೋಪಾಲ ಪೂಜಾರಿ ಲೇಸ್ ನ್ ಸುಧಾರಿಕೆ ಮಲ್ತೆರ್.

ವೈದ್ಯೆರೆನ ಗ್ರಾಮೀಣ ವೈದ್ಯಕೀಯ ಸೇವೆ ಶ್ರೇಷ್ಠವಾಯಿನವು: ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿ

ಸುಬ್ರಹ್ಮಣ್ಯ: ಸಮಾಜ ಸೇವೆನೇ ಜನಕ್ಲೆನ ಸೇವೆ ಪನ್ಪುನ ಉದಾರ ಮನೋಭಾವರ್ದ್ ನಿಟ್ಟೆ ಜಸ್ಟಿಸ್ ಕೆ ಎಸ್ ಸದಾನಂದ ಹೆಗಡೆರ್ ಸುಮಾರ್ ದುಂಬೇ ಮುಲ್ಪ ಗ್ರಾಮೀಣ ಬಡಪತ್ತ್ ದ ಜನಕ್ಲೆಗ್ ದೂರಗ್ ಪೋಪುನ ಬದಲ್ ಕೈತಲ್ ಡ್ ಮಾತ ವೈದ್ಯಕೀಯ ಸೇವೆಲು ತಿಕುಲೆಕ್ಕ ಆವೊಡು ಪನ್ಪುನ ಉದ್ದೇಶರ್ದ್ ಮುಲ್ಪ ಸದಾನಂದ ಆಸ್ಪತ್ರೆನ್ ಸುರು ಮಲ್ದೆರ್. ದುಂಬುದ ಕಾಲಡ್ ವೈದ್ಯಕೀಯ ಕರ್ಚಿಲು ರೋಗಿಲೆಗ್ ದಿಂಜ ಇತ್ತಿನೆನ್ ತೆರಿನ ಹೆಗಡೆರ್ ಬಡಪತ್ತ್ ದ ರೋಗಿಲೆಗ್ ಕಡಿಮೆ ಕಿರಯಡ್ ಬೊಕ್ಕ ಕೆಲವು ಪೊರ್ತುಡು ಧರ್ಮಾರ್ಥವಾದ್ ಸೇವೆನ್ ಕೊರ್ಪುನ ಮುಕೇನ ಸೇವಾ ತೃಪ್ತಿನ್ ಸುರು ಮಲ್ದೆರ್. ಮುಲ್ಪ ಪೂರ್ಣಕಾಲಿಕ ವೈದ್ಯೆರ್, ದಂತ ವೈದ್ಯೆರ್, ಬೊಕ್ಕ ತರಬೇತಿ ವೈದ್ಯೆರ್ ಲು ದಿನತ್ತ ಮಾತ ಪೊರ್ತುಡು ಸೇವೆನ್ ಒದಗಾವೊಂದು ಬೈದೆರ್. ಮುಲ್ಪದ ಸೇವೆನ್ ಫಲಾನುಭವಿಲು ಉಪಯೋಗಿಸಾವೊಡು ಪಂದ್ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿಲು ಪಂಡೆರ್.

ಮೇರ್ ಐತಾರ ಸುಬ್ರಹ್ಮಣ್ಯದ ಸದಾನಂದ ಆಸ್ಪತ್ರೆಡ್ ಜಸ್ಟಿಸ್ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆ ದೇರಳಕಟ್ಟೆ, ಸದಾನಂದ ವೈದ್ಯಕೀಯ ಬೊಕ್ಕ ದಂತ ಚಿಕಿತ್ಸಾ ಕೇಂದ್ರ ಸುಬ್ರಹ್ಮಣ್ಯ, ಬೊಕ್ಕ ರೋಟರಿ ಕ್ಲಬ್, ಲಯನ್ಸ್ ಕ್ಲಬ್, ಇನ್ನರ್ ವೇರ್ ಕ್ಲಬ್, ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಒಟ್ಟುಸೇರಿಗೆಡ್ ನಡತಿನ ಧರ್ಮಾರ್ಥ ಆರೋಗ್ಯ ತಪಾಸಣಾ ಶಿಬಿರನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಮಲ್ಲ ಬಿನ್ನೆರಾದ್ ಬತ್ತಿನ ನೆಟ್ಟೆ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆದ ಮುಖ್ಯಸ್ಥೆರ್ ಸತೀಶ್ ಭಂಡಾರಿ ಪಾತೆರ್ದ್, ನಮಡ 23 ಗ್ರಾಮೀಣ ಆಸ್ಪತ್ರೆಲು ಉಂಡು. ಆಯಿಟ್ಟ್ ಸುಬ್ರಹ್ಮಣ್ಯ ಸದಾನಂದ ಆಸ್ಪತ್ರೆಗ್ ನಮ ಎಚ್ಚದ ಮಹತ್ವನ್ ಕೊರೊಂದು ಉಲ್ಲ, ಅತ್ತಂದೆ ಇಡೆಗ್ ಬೋಡಾಯಿನ ಸೌಲಭ್ಯನ್ ಲ ಹಂತ ಹಂತವಾದ್ ಕೊರೊಂದು ಉಲ್ಲ. ಶ್ರೀ ಸುಬ್ರಹ್ಮಣ್ಯ ಮಠ ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಸಹಾಕಾರರ್ದ್ ನನಾತ್ ಈ ಆಸ್ಪತ್ರೆನ್ ಅಭಿವೃದ್ಧಿ ಮಲ್ಪೆರೆ ಉಂಡು ಪಂದ್ ಪಂಡೆರ್.

ಚಾವಡಿಡ್ ಸದಾನಂದ ಆಸ್ಪತ್ರೆ ಆಡಳಿತ ಅಧಿಕಾರಿ ಮೇಜರ್ ರಾಘವೇಂದ್ರ, ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಳಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ಪ್ರಶಾಂತ್ ಕೋಡಿಬೈಲು, ಇನ್ನರ್ ವೇಲ್ ಕ್ಲಬ್ ಪ್ರಭಾರ ಅಧ್ಯಕ್ಷೆರ್ ಶ್ರುತಿ, ಡಾ|ರವಿ ಕಕ್ಕೆ ಪದವು, ನಿವೃತ್ತ ಪ್ರಾಂಶುಪಾಲೆರ್ ಎಸ್ಎನ್ ಭಟ್, ಸುಬ್ರಹ್ಮಣ್ಯದ ಉದ್ಯಮಿ ಹರೀಶ್ ಕಾಮತ್, ಸದಾನಂದ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ. ಭಾನುಮತಿ ಪಾಲ್ ಪಡೆದಿತ್ತೆರ್.

ಲಯನ್ಸ್ ಕ್ಲಬ್ ದ ವಿಮಲಾ ರಂಗಯ್ಯ ಎದ್ಕೊಂದು ಲೇಸ್ ನ್ ಸುಧಾರಿಕೆ ಮಲ್ತೆರ್. ಲಯನ್ ರಾಮಚಂದ್ರಪ್ಪಳಂಗಾಯ ಸೊಲ್ಮೆ ಸಂದಾದೆರ್. ಶಿಬಿರಡ್ ಕಣ್ಣ್ ದ ಪರೀಕ್ಷೆ, ಚರ್ಮ ರೋಗದ ಪರೀಕ್ಷೆಲು, ಕಣ್ಣ್ ಕೆಬಿ ಮೂಂಕುದ ಪರೀಕ್ಷೆಲು, ಕೂಲಿದ ಪರೀಕ್ಷೆ, ಇಂಚ ಬೇತೆ ಬೇತೆ ಪರೀಕ್ಷೆಲೆನ್ ನಿಟ್ಟೆ ಆಸ್ಪತ್ರೆದ ವೈದ್ಯೆರೆನ ಕೂಟಲು ನಡಪಾದ್ ಕೊರಿಯೆರ್.

ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ

ವಿಟ್ಲ: ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪುನ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಸ್ಥಾನದ ಧರ್ಮದರ್ಶಿಲು ಶ್ರೀ ಶ್ರೀಕೃಷ್ಣ ಗುರೂಜಿ ಮೇರ್ ಬುಡುಗಡೆ ಮಲ್ತ್ ದ್ ಆಶೀರ್ವಾದ ಕೊರಿಯೆರ್.

ಈ ಲೇಸ್ ಡ್ ಸಾಹಿತ್ಯ ಬೊಕ್ಕ ಗಾಯನ ಮಲ್ತಿನ ಶ್ವೇತಾ ಪ್ರವೀಣ್ ಆಚಾರ್ಯ ಮೆರೆಗ್ ಮಾನಾದಿಗೆ ನಡತ್ಂಡ್.

ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರು, ದೇವಿಪ್ರಸಾದ್ ಕುಕ್ಕಾಜೆ, ಸತ್ಯಪ್ರಸಾದ್ ಕುಕ್ಕಾಜೆ, ಅಶ್ವಿನ್ ಕುಕ್ಕಾಜೆ ಪಾಲ್ ಪಡೆದಿತ್ತೆರ್.

ಈ ಪದ್ಯಗ್ ಶ್ವೇತಾ ಪ್ರವೀಣ್ ಆಚಾರ್ಯ ಬೆದ್ರ ಗಾಯನ ಬೊಕ್ಕ ಸಾಹಿತ್ಯ ಮಲ್ದೆರ್. ಪ್ರಚಾರ ಕಲೆ ಬೊಕ್ಕ ಸಂಕಲನ ಜಿತೇಶ್ ಸರಪಾಡಿದ ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ ಆತ್ಂಡ್. ಈ ಪದ್ಯನ್ ದಯಾ ಕ್ರಿಯೇಷನ್ you tube channel ಡ್ ತೂವೊಲಿ.

ತಿಬಾರ್ ಬ್ರಹ್ಮಕಲಶ, ನಾಗಮಂಡಲ ಅಟ್ಟಣೆದ ಸಭೆ

ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿರ್ದ್ ಬೊಳ್ಳಿದ ಕಲಶ ಸಮರ್ಪಣೆ

ಸುರತ್ಕಲ್: ತಿಬಾರ್ ಡ್ ನಡಪುನ ಮೂಜಿನೇ ಬ್ರಹ್ಮ‌ಕಲಶ ಉಚ್ಚಯ ತೋಪುನ ಭಾಗ್ಯ ಎಂಕ್ ತಿಕ್ ದ್ಂಡ್, ಊರುದ ಪರವೂರುದ ಗ್ರಾಮಸ್ಥೆರೆನ ಸಹಕಾರರ್ದ್ ನನ ಎಪ್ರಿಲ್ ಡ್ ನಡಪುನ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನಾಗಮಂಡಲ ಗೌಜಿಡ್ ನಡಪುಂಡು ಪನ್ಪುನೆಟ್ಟ್ ಒವ್ವೇ ಸಂಶಯ ಇಜ್ಜಿ ಪಂದ್ ಶಿಬರೂರುಗುತ್ತು ಗುತ್ತಿನಾರ್ ಉಮೇಶ್ ಎನ್ ಶೆಟ್ಟಿ ಪಂಡೆರ್.

ಮೇರ್ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವಸ್ಥಾನಡ್ ಏಪ್ರಿಲ್ 26 ಕ್ಕ್ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನಾಗಮಂಡಲದ ತಯಾರಿಗಾದ್ ಶಿಬರೂರು ದೈವಸ್ಥಾನಡ್ ನಡತಿನ ಅಟ್ಟಣೆ ಸಭೆಟ್ಟ್ ಪಾತೆರಿಯೆರ್.

ಜೀರ್ಣೋದ್ದಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಪ್ರಭಾಕರ ಎಸ್ ಶೆಟ್ಟಿ ಕೋಂಜಾಲಗುತ್ತು ಪಾತೆರ್ದ್, ಶಿಬರೂರು ಬ್ರಹ್ಮಕಲಶ ಉಚ್ಚಯಗ್ ಬೊಂಬೈ ಭಕ್ತೆರ್ ಕೈ ಜೋಡಿಸಾದೆರ್. ಉದ್ಯಮಿಲೆನ ಸಹಕಾರಲ ಬರೊಂದು ಉಂಡು, ಕೊಡಮಣಿತ್ತಾಯನ ಶಕ್ತಿ ದಾದ ಪಂದ್ ಭಕ್ತೆರೆಗ್ ತೆರಿದ್ಂಡ್. ಕೊಡಮಣಿತ್ತಾಯಗ್ ಇತ್ತೆದ ಬಂಗಾರ್ ದ ಪಲ್ಲಕ್ಕಿ ಅರ್ಪಣೆ ಮಲ್ಪುನ ನಿರ್ಧಾರ ಮಲ್ದ್ಂಡ್, ದಾನಿಲೆನ ಸಹಕಾರರ್ದ್ ಅವು ನಡಪರೆ ಉಂಡು ಪಂದ್ ಪಂಡೆರ್.

ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಕೈಯೂರುಗುತ್ತು ಪಾತೆರ್ದ್, ಶಿಬರೂರುಡು ನಡಪರೆ ಇಪ್ಪುನ ಉಚ್ಚಯ ಗೌಜಿಡ್ ನಡಪರೆ ಉಂಡು, ಹಿಂದಿ ಚಿತ್ರರಂಗದ ಪುಗರ್ತೆದ ನಟಿ ಶಿಲ್ಪಾ ಶೆಟ್ಟಿ ಉಚ್ಚಯದ ಪ್ರಧಾನ ಬೊಳ್ಳಿದ ಕಲಶನ್ ಕೊರ್ತೆರ್. ಪ್ರಮುಖ ಮೂಜಿ ದಿನಟ್ಟ್ ಮುಲ್ಪದ ಲೇಸ್ ಡ್ ಮೇರ್ ಪಾಲ್ ಪಡೆಯೆರೆ ಉಲ್ಲೆರ್. ಕೊಡಮಣಿತ್ತಾಯನ ಮಿತ್ತ್ ದ ಭಕ್ತಿರ್ದ್ ಬಂಗಾರ್ ದ ಪಲ್ಲಕ್ಕಿಗಾದ್ ಭಕ್ತೆರ್ ಅಕಲ್ನ ಬಂಗಾರ್ ನೇ ದಾನ ರೂಪವಾದ್ ಕೊರೊಂದು ಉಲ್ಲೆರ್ ಪಂದ್ ಪಂಡೆರ್.

ಈ ಪೊರ್ತುಡು ತುಕಾರಾಮ ಶೆಟ್ಟಿ ಪರ್ಲಬೈಲ್ ಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಸೂರಿಂಜೆ ಪಂಚಾಯತ್ ಅಧ್ಯಕ್ಷೆ ಗೀತಾ ಶೆಟ್ಟಿ, ಮಧುಕರ ಅಮೀನ್ ಶಿಬರೂರು, ಪುರಂದರ ಎಂ ಶೆಟ್ಟಿ, ಸುಬ್ರಮಣ್ಯ ರಾವ್ ಕೋರ್ಯಾರು, ಕಾಂತಪ್ಪ ಸಾಲಿಯಾನ್, ದಿವಾಕರ ಸಾಮಾನಿ ಪಾಲ್ ಪಡೆದಿತ್ತೆರ್.

ಸ್ವಾಗತ ಸಮಿತಿದ ಜಿತೇಂದ್ರ ಶೆಟ್ಟಿ ಕೋರ್ಯಾರುಗುತ್ತು, ಸ್ವಯಂಸೇವಕ ಸಮಿತಿದ ಗಿರೀಶ್ ಶೆಟ್ಟಿ ಪಡುಮನೆ, ಪ್ರಚಾರ ಬೊಕ್ಕ ಆಮಂತ್ರಣ ಸಮಿತಿದ ವಿನೀತ್ ಶೆಟ್ಟಿ, ಮಾಧ್ಯಮ ಸಮಿತಿದ ಬಾಳ ಜಗನ್ನಾಥ ಶೆಟ್ಟಿ, ಮಾತೃ ಸಮಿತಿದ ಆಶಾ ಶೆಟ್ಟಿ, ಸಾಂಸ್ಕ್ರತಿಕ ಸಮಿತಿದ ವಿಜೇಶ್ ಶೆಟ್ಟಿ, ಅನ್ನಸಂತರ್ಪಣೆ ಸಮಿತಿದ ಜಗದೀಶ್ ಶೆಟ್ಟಿ, ಉಗ್ರಾಣ ಸಮಿತಿದ ದಯಾನಂದ ದೇವಾಡಿಗ, ಹೊರೆಕಾಣಿಕೆ ಸಮಿತಿದ ಬಾಲಕೃಷ್ಣ ಕುಲಾಲ್, ಆರೋಗ್ಯ ಬೊಕ್ಕ ನೈರ್ಮಲ್ಯ ಸಮಿತಿದ ಸುಜಾತ ಶೆಟ್ಟಿ, ಪ್ರಸಾದ ವಿತರಣಾ ಸಮಿತಿದ ಸುಧಾಕರ ಶೆಟ್ಟಿ ಶಿಬರೂರುಗುತ್ತು, ವಾಹನ‌ ಪಾರ್ಕಿಗ್ ಸಮಿತಿದ ದಿನಕರ ಕೈಯೂರು, ಅಲಂಕಾರ ಸಮಿತಿದ ಭುವನೇಶ್ ಆಚಾರ್ಯ, ವಸತಿ ಸಮಿತಿದ ಸಂದೀಪ್ ಶೆಟ್ಟಿ, ಮಾತೃ ಸಮಿತಿದ ಶಾಮಲ ಪಿ ಶೆಟ್ಟಿ ಕೊಂಜಾಲಗುತ್ತು, ಅರ್ಥಿಕ ಸಮಿತಿದ ಪ್ರವೀಣ್ ಶೆಟ್ಟಿ, ಸಮಿತಿ ಇಡೇ ಮುಟ್ಟ ನಡಪಾಯಿನ ಕೆಲಸದ ಬಗೆಟ್ಟ್ ಪೊಲಬು, ಸಲಹೆ ಕೊರಿಯೆರ್.

ಮಧುಕರ ಅಮೀನ್ ಸೊಲ್ಮೆ ಸಂದಾದೆರ್. ಸುಬ್ರಮಣ್ಯ ರಾವ್ ಕೋರ್ಯಾರು ಲೇಸ್ ದ ಸುಧಾರಿಕೆ ಮಲ್ತೆರ್.

ಕುರುವರಬೆಟ್ಟು ಕುಸುಮ ಮೆರೆನ ಉತ್ತರಕ್ರಿಯೆ

ಹೊಸಬೆಟ್ಟು ಶ್ರೀ ಕೋರ್ದಬ್ಬು ದೈವಸ್ಥಾನದ ಅಧ್ಯಕ್ಷೆರ್, ಕುರುವರಬೆಟ್ಟು ಕೇಶವ ಮೆರೆನ ಮೆರೆನ ಬೊಡೆದಿ ಕುಸುಮ ಮೇರ್ ಮಾ.12 ಕ್ಕ್ ಅಂಗಾರೆ ದೇವೆರೆ ಪಾದ ಸೇರ್ದೆರ್. ಮೆರೆನ ಉತ್ತರಕ್ರಿಯೆ ಮಾ.25 ಸೋಮಾರ ಕುರುವರ ಬೆಟ್ಟುದ ಇಲ್ಲಡ್ ನಡತ್ಂಡ್.

ಉತ್ತರಕ್ರಿಯೆಗ್ ಮಾತೆರ್ಲಾ ಬತ್ತ್ ದ್ ಕುಸುಮ ಮೆರೆನ ಆತ್ಮೊಗು ಚಿರಶಾಂತಿಗ್ ಪ್ರಾರ್ತನೆ ಮಲ್ಪೊಡು ಪಂದ್ ಅರೆನ ಕಂಡನಿ, ಜೋಕುಲು ಬೊಕ್ಕ ಕುರುವರಬೆಟ್ಟು ಕುಟುಂಬಸ್ಥೆರ್ ಪ್ರಕಟಣೆಡ್ ತೆರಿಪಾದಿತ್ತೆರ್.

ಮಾ.28-31: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನಡ್ ಜಾತ್ರೆ

ಕಿನ್ನಿಗೋಳಿ: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನದ ವರ್ಷದ ಜಾತ್ರೆ ಮಾ.28-31 ಮುಟ್ಟ ನಡಪರೆ ಉಂಡು.

ಮಾ.28 ಕ್ಕ್ ಬೊಲ್ಪುಗು ಅರಸು ಕುಂಜಿರಾಯೆರ್ನ ಭಂಡಾರ ಬರಿಯೆರೆ, ಶ್ರೀ ಅರಸು ಕುಂಜಿರಾಯೆರೆಗ್ ನವಕ ಪ್ರಧಾನ ಕಲಶಾಭಿಷೇಕ, ಕೊಡಿ ಏರಿಯೆರೆ, ಬಯ್ಯಗ್ ದೇಲಂತಬೆಟ್ಟು ಗ್ರಾಮದ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವೊದ ಭಂಡಾರ ಬರಿಯೆರೆ, ಕಿಲೆಂಜೂರು ಶ್ರೀ ಸರಳ ಧೂಮಾವತಿ ದೈವೊದ ಭಂಡಾರ ಬರಿಯೆರೆ, ಮೂಡ್ರಗುತ್ತು ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊಲೆನ ಭಂಡಾರ ಬರಿಯೆರೆ, ಕೊಯಿಕುಡೆ ಶ್ರೀ ಜಾರಂದಾಯ ದೈವೊದ ಬಂಟ ದೈವೊದ ಭಂಡಾರ ಬರಿಯೆರೆ, ರಾತ್ರೆ ಶ್ರೀ ಅರಸು ಕುಂಜಿರಾಯನ ನೇಮ ನಡಪರೆ ಉಂಡು.

ಮಾ.29 ಕ್ಕ್ ಬೊಲ್ಪುಗು ಶ್ರೀ ಉಳ್ಳಾಯ ದೈವೊದ ನೇಮ, ರಾತ್ರೆ ಕೊಡಮಣಿತ್ತಾಯ ದೈವೊದ ನೇಮ, ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊದ ನೇಮ ನಡಪರೆ ಉಂಡು.

ಮಾ.30 ಕ್ಕ್ ಬಯ್ಯಗ್ ಕುಸಾಲ್ದ ಕಲಾವಿದೆರ್ ಸುರಗಿರಿ ಮೊಕ್ಲೆರ್ದ್ ತುಳು ನಾಟಕ “ಕಥೆ ಏರ್ ಬರೆಪೆರ್,” ರಾತ್ರೆ ಶ್ರೀ ಜಾರಂದಾಯ ಬಂಟ ದೈವೊದ ನೇಮ, ಅತ್ತೂರು‌ ಮಾಗಣೆ ಶ್ರೀ ಕೊರ್ದಬ್ಬು ಶ್ರೀ ಬಂಟ ದೈವೊಲೆನ ಭಂಡಾರ ಬರಿಯೆರೆ, ಶ್ರೀ ಜಾರಂದಾಯ ಬಂಟ ದೈವೊಲೆನ ಬಂಡಿ ಉಚ್ಚಯ ಬೊಕ್ಕ ಸೂಟೆದಾರ ಸೇವೆ, ಜಾರಂದಾಯ- ಬಂಟ ಬೊಕ್ಕ ಕೋರ್ದಬ್ಬು ಶ್ರೀ ಧೂಮಾವತಿ ದೈವೊಲೆನ ಭೇಟಿ, ರಾತ್ರೆ ಶ್ರೀ ಸರಳ ಧೂಮಾವತಿ ಬಂಟ ದೈವೊದ ನೇಮ ನಡಪರೆ ಉಂಡು.

ಮಾ.31 ಕ್ಕ್ ಬೊಲ್ಪುಗು ಕೊಡಿ ಜಾವೆರೆ ಬೊಕ್ಕ ಶ್ರೀ ದೈವೊಲೆನ ಭಂಡಾರ ಪೋಯೆರೆ ಉಂಡು. ಅಂಚೆನೆ ಈ ಉಚ್ಚಯದ ಪೊರ್ತುಡು ಪ್ರತೀ ದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೈವಸ್ಥಾನದ ಪ್ರಕಟನೆ ತೆರಿಪಾದ್ಂಡ್.

ಮಾ.24-31: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ

ಕುಂಪಲ: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ ಮಾ.24-31 ಮುಟ್ಟ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.