ತುಳು ಸುದ್ದಿ

ಗಡಿಬಿಡಿ ಆವಡೆ ! ಎಲ್ಲೆ ನಿಕ್ಲೆನ ಮೊಬೈಲ್‌ಗ್ ಬರ್ಪುಂಡು “ಬೀಪ್‌ ಸೌಂಡ್”

ಭೂಕಂಪ, ತೂ, ಬೊಲ್ಲ, ಸುನಾಮಿ , ಇಂಚಿನ ಮಾತ ಬರ್ಪುನೆನ್ ತೆರಿಪಾದ್ ಜೂವ ಬಚಾವ್ ಮಲ್ಪುನ ನಿಲೆಟ್ಟ್ ಜನಕ್ಲೆಡ ಜನ ಜಾಗೃತೆ ಪುಟ್ಟಾವರೆ ಎಚ್ಚರ್ಗೆ ಕೊರ್ರೆ ನಿಕ್ಲೆನ ಮೊಬೈಲ್ ಜೋರುಡು , ಬುಡಂದೆ ಬೀಪ್ ಸೌಂಡ್ ಬರ್ಪಿನ ವ್ಯವಸ್ಥೆನ್ ಸರ್ಕಾರ ಮಲ್ದ್ಂಡ್. ಅಯಿತ್ತ ನಿಲೆಟ್ಟ್ ಎಲ್ಲೆ (ಅ.12) ಕ್ಕ್ ನಿಕ್ಲೆನ ಮೊಬೈಲ್ ಗ್ ಬುಡಂದೆ ಬೀಪ್ ಸೌಂಡ್ ಬರ್ಪುಂಡು.
ನನದ ದಿನೊಕ್ಲೆಡ್ ಪ್ರಕೃತಿ ವಿಕೋಪದ್ ಬಗೆಟ್ ಮುನ್ಸೂಚನೆ ಕೊರ್ಪುನ ನಿಟ್ಟ್ ಡ್ ಟೆಲಿಕಮ್ಯುನಿಕೇಶನ್‌ ಇಲಾಖೆ ಬೊಕ್ಕ ರಾಷ್ಟ್ರೀಯ ವಿಪತ್ತು ನಿರ್ವಹಣ ಪ್ರಾಧಿಕಾರದ ಸಹಯೋಗಡ್ ಸಕಾಲಿಕ ಮುನ್ನೆಚ್ಚರಿಕೆ (ವಿಭಿನ್ನ ಧ್ವನಿ ಮತ್ತು ಕಂಪನ) ಕೊರ್ಪುನ ವ್ಯವಸ್ಥೆ ನ್ ಮಲ್ದೆರ್. ಅವೆತ್ತ ಪರೀಕ್ಷಾರ್ಥ ರಾಜ್ಯಡ್ ಅ. 12 ದಾನಿ ತುರ್ತು ಎಚ್ಚೆರ್ಗೆ ಸೌಂಡ್ ಬರ್ಪುಂಡು. ಉಂದೆಕ್ಕ್ ಮಂಡೆ ಬೆಚ್ಚ ಮಲ್ಪುನ ಅಗತ್ಯ ಇಜ್ಜಿ. ರೆಸ್ಪಾಂಡ್ ಮಲ್ಪುನಲ ಅಗತ್ಯ ಇಜ್ಜಿ ಪಂದ್ ತೆರಿಪಾದೆರ್.

ಪ್ರಯೋಜನ ದಾದ? ಭೂಕಂಪ, ಸುನಾಮಿ, ಅಗ್ನಿ ದುರಂತ ಬೊಕ್ಕ ಹಠಾತ್‌ ಪ್ರವಾಹ, ಯುದ್ಧದಂಚಿನ ವಿಪತ್ತುದ ಪೊರ್ತುಡು ವಿಪತ್ತು ನಿರ್ವಹಣ ಪ್ರಾಧಿಕಾರನ್ ಸಾರ್ವಜನಿಕೆರೆಗ್ ಎಚ್ಚರಿಕೆ ಕೊರಿಯೆರೆ ಈ ವ್ಯವಸ್ಥೆ ಸಹಕಾರ ಆಪುಂಡ್. ದುಂಬುದ ದಿನಟ್ ವಿಕೋಪ ಆಪುನ ಜಾಗೆಡ್ ಮೊಬೈಲ್‌ ಯೂಸ್ ಮಲ್ಪುನಕ್ಲೆಗ್ ಈ ಫ್ಲಾಶ್‌ ಮೆಸೇಜ್ ಮುಖೆನ ಎಚ್ಚರ ಕೊರ್ಪುಂಡು.

ನನ ಮದಿಮೆ, ಗಣಪತಿ ಮೆರವಣಿಗೆ, ರಾಜಕೀಯ ಮೆರವಣಿಗೆಡ್ ಪಟಾಕಿ ಬ್ಯಾನ್!

ರಾಜ್ಯಡ್ ನನ ಮದಿಮೆ, ಗಣೇಶ ಉತ್ಸವ ಬೊಕ್ಕ ರಾಜಕೀಯ ಕಾರ್ಯಕ್ರಮಡ್ ಪಟಾಕಿ ಪುಡಾಪುನೆನ್ ನಿಷೇಧ ಮಲ್ಪೊಡ್ ಪಂದ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ತೆರಿಪಾದೆರ್.

ಅತ್ತಿಬೆಲೆ ಪಟಾಕಿ ಮಳಿಗೆ ಸ್ಪೋಟ ಪ್ರಕರಣಗ್ ಸಂಬಂಧ ಪಟ್ಟಿನಂಚ ಅಧಿಕಾರಿಲೆನ ಒಟ್ಟಿಗೆ ಸಭೆ ಮಲ್ತಿನ ಬೊಕ್ಕ ಮಾಧ್ಯಮದೊಟ್ಟಿಗೆ ಪಾತೆರ್ನ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಸುಪ್ರೀಂಕೋರ್ಟ್ ಆದೇಶದ ಪ್ರಕಾರ, ಪಚ್ಚೆ ಪಟಾಕಿ ನಿಯಾಮವಳಿಗ್ ವಿರುದ್ಧವಾದ್ ಅಂಗಡಿ ಇತ್ತ್ಂಡ ಕ್ರಮ ದೆತೊನೊಡು. ನನ ದುಂಬು ಅನಧಿಕೃತ ಮಳಿಗೆಲು ಇತ್ತ್ಂಡ ಪರಿಶೀಲನೆ ಮಲ್ತ್ ದ್ ಕ್ರಮ ದೆತೊನಿಯೆರೆ ಸೂಚನೆ ಕೊರ್ತ. ಪಟಾಕಿ ಅಂಗಡಿಲೆಗ್ ಲೆಸೆನ್ಸ್ ಸುಪ್ರೀಂಕೋರ್ಟ್ ಆದೇಶದ ಪ್ರಕಾರನೆ ಲೆಸೆನ್ಸ್ ಕಡ್ಡಾಯ ಕೊರ್ಪುನಂಚ ಸೂಚನೆ ಕೊರ್ತ ಪಂದ್ ಪಂಡೆರ್.

ಅಂಚನೆ ರಾಜಕೀಯ ಕಾರ್ಯಕ್ರಮ , ಮದಿಮೆ ಕಾರ್ಯಕ್ರಮ, ಗಣೇಶ ಉತ್ಸವ ಸೇರಿನಂಚ ಬೇತೆ ಬೇತೆ ಸಂಭ್ರಮಾಚರಣೆದ ಪೊರ್ತುಡು ಪಟಾಕಿ ಪುಡಾಪುನೆನ್ ಬ್ಯಾನ್‌ ಮಲ್ತ್ ದೆರ್. ದೀಪಾವಳಿ ಪೊರ್ತುಡು ಪಚ್ಚೆ ಪಟಾಕಿಗ್ ಮಾತ್ರ ಅವಕಾಶ. ಪಟಾಕಿ ಮಾರಾಟ ಬೊಕ್ಕ ಸಂಗ್ರಹಣೆ ಪರವಾನಗಿ ಪರಿಶೀಲನೆ ಮಲ್ಪೆರೆ ಸೂಚನೆ ಕೊರ್ತೆರ್. ಪ್ರಸ್ತುತ 5 ವರ್ಷ ಮುಟ ಇತ್ತಿನ ಲೈಸೆನ್ ಅವಧಿನ್ 1 ವರ್ಷಗ್ ಕಡಿಮೆ ಮಲ್ತ್ ದ್ ಪರಿಷ್ಕರಣೆ ಮಲ್ಪೆರೆ ತೀರ್ಮಾನ ಮಲ್ತ್ ದೆರ್. ಪ್ರತಿ ವರ್ಷಲ ಪರಿಷ್ಕರಣೆ ಮಲ್ಪೆರೆ ಅಧಿಕಾರಿಲೆಗ್ ಸೂಚನೆ ಕೊರ್ತ ಪಂದ್ ತೆರಿಪಾದೆರ್.