ಬೆಂಗ್ಲೂರು: ಅರಮನೆ ಮೈದಾನಡ್ ನಿರ್ಮಾಣ ಮಲ್ತಿನ ಬೆಂಗ್ಲೂರು ಕಂಬುಲ ನಮ್ಮ ಕಂಬುಲ ಕಚೇರಿ ಉದಿಪನ ಆಂಡ್.
ಈ ಪೊರ್ತುಡು ಕಂಬುಲ ಸಮಿತಿದ ಗುರ್ಕಾರೆ, ಪುತ್ತೂರು ಶಾಸಕೆರ್ ಅಶೋಕ್ ರೈ, ಉಪಾಧ್ಯಕ್ಷೆರ್ ಗುಣರಂಜನ್ ಶೆಟ್ಟಿ, ದಿನೇಶ್‌ ಹೆಗಡೆ, ಕಾರ್ಯಾಧ್ಯಕ್ಷೆರ್ ಗುರುಕಿರಣ್, ಖಜಾಂಚಿ ಸುಂದರ್ ರಾಜ್ ರೈ, ಪ್ರಧಾನ ಕಾರ್ಯದರ್ಶಿ ಕೆ.ವಿ.ರಾಜೇಂದ್ರಕುಮಾರ್, ಕಾರ್ಯಾಧ್ಯಕ್ಷೆರ್ ಉಮೇಶ್ ಶೆಟ್ಟಿ, ಉದಯ್‌ ಶೆಟ್ಟಿ, ಜಿ.ಶ್ರೀನಿವಾಸ್ ಸೇರಿನಂಚೆನೆ ಪದುಕೆರ್ ಪಾಲ್ ಪಡೆದಿತ್ತೆರ್.
ತೆಲಂಗಾಣ, ರಾಜಸ್ಥಾನ, ಛತ್ತೀಸ್ ಗಢ, ಮಿಜೋರಾಂ ಬೊಕ್ಕ ಮಧ್ಯಪ್ರದೇಶ ವಿಧಾನಸಭೆ ವೋಟುಗು ಅಭ್ಯರ್ಥಿಲೆನ್ ಆಯ್ಕೆ ಮಲ್ಪರೆ ಇನಿ ಬಿಜೆಪಿ ಕೇಂದ್ರ ಚುನಾವಣಾ ಸಮಿತಿ ಸಭೆ ನಡಪರೆ ಉಂಡು.
ಡೆಲ್ಲಿಡ್ ನಡಪುನ ಈ ಸಭೆಟ್ಟ್ ಅಮಿತ್ ಶಾ, ಜೆಪಿ ನಡ್ಡಾ ಸೇರಿನಂಚೆನೆ ಸುಮಾರ್ ಜನ ಸದಸ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್. ಬಿಜೆಪಿ ಇತ್ತೆನೇ ಎಂಪಿಗ್ 136, ರಾಜಸ್ಥಾನಗ್ 41 ಬೊಕ್ಕ ಛತ್ತೀಸ್ ಗಢನ್ 85 ಅಭ್ಯರ್ಥಿನ್ ಘೋಷಣೆ ಮಲ್ದ್ಂಡ್. ಒರಿನ ತಾನಗ್ ಇನಿಯೇ ಅಭ್ಯರ್ಥಿಲೆನ್ ಆಯ್ಕೆ ಮಲ್ಪುನ ಅಂದಾಜಿ ಉಂಡು.
ಕುಡ್ಲ: ನೀರುಮಾರ್ಗ ಮಾಣೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಗ್ ಪ್ರತಿದಿನೊಲ ಬತ್ತ್ ದ್ ನಲಿಪುನ ನವಿಲ್ ಗ್ ಮುಲ್ಪದ ಅರ್ಚಕೆರ್ ಇತ್ತೆ ಗೆಜ್ಜೆ ಕಟ್ಟ್ ದೆರ್. ನವಿಲ್ ಖುಷಿರ್ದ್ ನಲಿಪುನ ವಿಡಿಯೋ ಇತ್ತೆ ಸಾಮಾಜಿಕ ಜಾಲತಾಣಡ್ ವೈರಲ್‌ ಆತ್ಂಡ್.
ಗೆಜ್ಜೆ ಕಟ್ಟೊಂದು ಗಲ್ ಗಲ್ ನಲಿಪುನ ನಾಟ್ಯ ಮಯೂರಿನ ಡ್ಯಾನ್ಸ್ ತೂಯೆರೆ ಪಂದೇ ದೇವಲ್ಯದ ಭಕ್ತೆರ್ ಕಾತ್ ಕುಲ್ಲುದು ದೇವಲ್ಯಗ್ ಬರ್ಪೆರ್. ದೇವಲ್ಯದೊಲಯಿ ಬತ್ತ್ ದ್ ಡ್ಯಾನ್ಸ್ ಮಲ್ಪುನ ಈ ನವಿಲ್ ಬಯ್ಯ ಆನಗ ಅರ್ಚಕೆರೆನ ಇಲ್ಲಗ್ ಪೋದು ಅಲ್ಪ ಡ್ಯಾನ್ಸ್ ಮಲ್ಪುಂಡು.
ಬೋಲ್ತೆರ್: 45ನೇ ವರ್ಷದ ಸಾರ್ವಜನಿಕ ಶ್ರೀ ಶಾರದೋತ್ಸವ ಉದಿಪನ ಬೋಲ್ತೆರ್: ಸಾರ್ವಜನಿಕ ಶ್ರೀ ಶಾರದೋತ್ಸವ ಸಮಿತಿ ಬೋಲ್ತೆರ್ ನೆತ್ತ ಮುತಾಲಿಕೆಡ್ ಇದರ 45ನೇ ವರ್ಷದ ಶ್ರೀ ಶಾರದಾ ಪೂಜೋತ್ಸವನ್ ರೈತ ಬಂಧು ಆಹಾರೋದ್ಯಮದ ಮುಖ್ಯಸ್ಥೆರ್ ಶಿವಶಂಕರ್ ಭಟ್ ತುಡರ್ ಅರ್ಲಾದ್‌ ಉದಿಪನ ಮಲ್ತೆರ್.
ಸಮಿತಿದ ಗೌರವಾಧ್ಯಕ್ಷೆರ್ ಮುಗುಳಿ ನಾರಾಯಣ ರಾವ್, ಅಧ್ಯಕ್ಷೆರ್ ಮುರಳೀಧರ, ಕಾರ್ಯದರ್ಶಿ ನಾರಾಯಣ ಶೆಟ್ಟಿ, ಉಪಾಧ್ಯಕ್ಷೆರ್ ಸುರೇಂದ್ರ ಕೋಟ್ಯಾನ್, ಸಂಜೀವ ಎನ್, ಕೋಶಾಧಿಕಾರಿ ಜನಾರ್ದನ, ಗೌರವ ಸಲಹೆಗಾರೆರ್ ಗಣೇಶ್ ಐತಾಲ್, ಸದಸ್ಯೆರ್ ಕುಮಾರ್ ದಾಸ್, ಜಿ.ವಿ ಹರೀಶ್ ಸವಣಾಲು ಈ ಪೊರ್ತುಡ್‌ ಇತ್ತೆರ್.
ವಿಟ್ಲ : ಬಲ್ಲ್ ದೆತೊಂದು ಜವನೆ ಆತ್ಮಹತ್ಯೆ ಮಲ್ತಿನ ಘಟನೆ ವಿಟ್ಲ ಕೈತಲ್‌ದ ಪುಣಚಡ್‌ ನಡತ್ಂಡ್. ಪುಣಚ ಚೆಕ್ಕುತ್ತಿ ನಿವಾಸಿ ಶ್ರೀ ಕೃಷ್ಣ (26) ಆತ್ಮಹತ್ಯೆ ಮಲ್ತೊನ್ನ ಜವನೆ. ಕೃಷ್ಣ ಸೆಂಟ್ರಿಂಗ್ ಬೇಲೆ ಮಲ್ತೊಂದು ಇತ್ತೆರ್. ಆತ್ಮಹತ್ಯೆಗ್ ನಿಖರ ಕಾರಣ ತೆರಿದ್‌ ಬೈದಿಜಿ. ವಿಟ್ಲ ಪೊಲೀಸೆರ್ ಜಾಗೆಗ್‌ ಬತ್ತ್‌ದ್ ಪರಿಶೀಲನೆ ಮಲ್ತೊಂದು ಉಲ್ಲೆರ್.
ಸುಳ್ಯ: ಪೊಂಜೊವ್ ಒರ್ತಿ ಹಾರ್ಟ್‌ ಅಟ್ಯಾಕ್‌ಡ್‌ ತೀರ್‌ಪೋಯಿನ ಘಟನೆ ಸುಳ್ಯದ ಗುತ್ತಿಗಾರ್ಡ್ ನಡತ್ಂಡ್.
ಗುತ್ತಿಗಾರ್ಡ್ ಗ್ಯಾರೇಜ್ ನಡಪಾವೊಂದು ಇಪ್ಪುನ ಕಾಂತಪ್ಪ ಪೂಜಾರಿನ ಬುಡೆದಿ ನೀತಾ ಕುಮಾರಿ (43) ತೀರ್‌ಪೋಯಿನಾರ್. ಮೇರೆಗ್‌ ಕಂಡನಿ, ರಡ್ಡ್‌ ಜೋಕುಲ್‌ ಉಲ್ಲೆರ್.
ಉಲ್ಲಂಜೆ ಶ್ರೀ ಕ್ಷೇತ್ರ ಕೊರಗಜ್ಜ ಮಂತ್ರಾದೇವತಾ ಚಾಮುಂಡೇಶ್ವರಿ ಗುಳಿಗ ಭದ್ರಕಾಳಿ ಸನ್ನಿಧಿಡ್ ಲಲಿತಾ ಪಂಚೆಮಿ ಆಚರಣೆ ನಡತ್ಂಡ್.
ನವರಾತ್ರಿ ಲೆಕ್ಕೊಡು ಶ್ರೀ ಸನ್ನಿಧಿಡ್ ಲಲಿತಾ ಪಂಚೆಮಿದ ದಿನ ಬೊಲ್ಪುಗು ದೇವೆರೆಗ್ ಬೊಂಡದ ಅಭಿಷೇಕ ನಡತ್ಂಡ್. ಒಂಜಿ ಸಾರರ್ದ್ಲ ಎಚ್ಚ ಪೊಂಜೊವುಲು ಶ್ರೀ ದೇವೆರೆನ ಸೀರೆನ್ ಪ್ರಸಾದ ರೂಪಡ್ ಪಡೆಯೆರ್. ಈ ಪೊರ್ತುಡು ಧರ್ಮದರ್ಶಿಲು ಹರೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
ದೆಲ್ಲಿ: ದೇಶದ ಸುರುತ ರ‍್ಯಾಪಿಡ್ ಎಕ್ಸ್ ರೈಲ್ ಸಂಚಾರ ಅ. 20 ದಾನಿ ಸುರು ಆವೆರೆ ಉಂಡು. ವಂದೇ ಭಾರತ್ ರೈಲ್‌ದ ವೇಗಗ್ ಸರಿಸಮನಾದ್ ಪೋಪುನ ನನೊಂಜಿ ಸೆಮಿ ಸ್ಪೀಡ್ ರೈಲ್ ಉಂದು ಆತ್ಂಡ್. ಪ್ರಧಾನಿ ನರೇಂದ್ರ ಮೋದಿ ಲೋಕಾರ್ಪಣೆ ಮಲ್ಪೆರೆ ಉಲ್ಲೆರ್.
ಈ ರೈಲ್ ಪ್ರತಿ ಗಂಟೆಗ್ ಸರಾಸರಿ 100 ಕಿ.ಮೀ. ಸ್ಪೀಡ್ ಸಂಚಾರ ಮಲ್ಪುಂಡ್. ರ‍್ಯಾಪಿಡ್ ಎಕ್ಸ್ ರೈಲ್‌ದ ಯೋಜನೆನ್ ರಾಷ್ಟ್ರೀಯ ರಾಜಧಾನಿ ಪ್ರಾದೇಶಿಕ ಸಾರಿಗೆ ಸಂಸ್ಥೆ (ಎನ್ಸಿಆರ್ಟಿಸಿ) ಜಾರಿ ಮಲ್ತ್‌ದ್‌ಂಡ್.
ಸ್ಟ್ಯಾಂಡರ್ಡ್ ಕೋಚ್‌ಲೆಗ್ ಕನಿಷ್ಠ ದರ 20 ರೂ. ಬೊಕ್ಕ ಗರಿಷ್ಠ 50 ರೂ. ಪ್ರೀಮಿಯಂ ಕೋಚ್‌ಲೆಗ್ ಕನಿಷ್ಠ ದರ 40 ರೂ. ಬೊಕ್ಕ ಗರಿಷ್ಠ 100 ರೂ. ಈ ರೈಲ್ ಕಾಂಡೆ 6 ರ್ದ್‌ ರಾತ್ರೆ 11 ಮುಟ್ಟ ಕಾರ್ಯಾಚರಣೆ ಮಲ್ಪುಂಡ್. ಪ್ರತಿ 15 ನಿಮಿಷಗ್ ಒಂಜಿ ರೈಲ್ ಸಂಚಾರ ಮಲ್ಪೆರೆ ಉಂಡು.
ಪಂಜ ಕೊಯಿಕುಡೆ: ಶ್ರೀ ಚಾಮುಂಡೇಶ್ವರಿ ದೇವಿ ಸನ್ನಿಧಿಡ್ ಶರನ್ನವರಾತ್ರಿ ಉಚ್ಚಯದ ಲೆಕ್ಕೊಡು ಅ.19 ಗುರುವಾರ ಲಲಿತ ಪಂಚಮಿಗ್ ಚಂಡಿಕಾ ಹೋಮ ಬೊಕ್ಕ ಮಹಾಪೂಜೆ ನಡತ್ಂಡ್.
ವಿದ್ವಾನ್ ಪ್ರಸನ್ನ ತಂತ್ರಿಲೆನ ಮಾರ್ಗದರ್ಶನಡ್ ಪಂಜ ಮಹಾಗಣಪತಿ ಮಂದಿರದ ಅರ್ಚಕೆರ್ ಸುರೇಶ್ ಭಟ್ ಪಂಜ ಬೊಕ್ಕ ಕಾರ್ತಿಕೇಯ ಭಾರ್ಗವ ಮೊಕ್ಲೆನ ಮುತಾಲಿಕೆಡ್ ಪೂಜೆದ ವೈದಿಕ ವಿಧಿ ವಿಧಾನಲು ನಡತ್ಂಡ್. ಮಧ್ಯಾಹ್ನ ದೇವಿನ ದರ್ಶನ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಇತ್ತ್ಂಡ್.
ಈ ಪೊರ್ತುಡು ಚಾಮುಂಡೇಶ್ವರಿ ಸನ್ನಿಧಿದ ಮುಖ್ಯಸ್ಥೆರ್ ಸೀತಾರಾಮ ಆಮೀನ್ ಬೊಕ್ಕ ದೇವಿನ ಭಕ್ತ ವೃಂದದಕುಲು, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಸುಳ್ಯದ ಶ್ರೀ ಶಾರದಾಂಬ ದಸರಾ ಸೇವಾ ಟ್ರಸ್ಟ್ , ಸಾರ್ವಜನಿಕ ಶ್ರೀ ಶಾರದಾಂಬ ಸೇವಾ ಸಮಿತಿ (ರಿ.) ದಸರಾ ಉತ್ಸವ ಸಮಿತಿದ ಮುತಾಲಿಕೆಡ್ 52ನೇ ವರ್ಷದ ಶ್ರೀ ಶಾರದಾಂಬ ಉತ್ಸವ ಶ್ರೀ ಚೆನ್ನಕೇಶವ ದೇವಾಲಯದ ಎದುರು ಶ್ರೀ ಶಾರದಾಂಬ ಕಲಾ ವೇದಿಕೆಡ್ ಒರ್ಂಬ ದಿನ ಗೌಜಿಡ್ ನಡಪರೆ ಉಂಡು.
ಕಾಂಡೆ ಪೇಂಟೆದ ಜ್ಯೋತಿ ಸರ್ಕಲ್‌ರ್ದ್ ಶ್ರೀ ಶಾರದಾದೇವಿ ಮೂರ್ತಿದ ಪ್ರತಿಷ್ಠಾ ಮೆರವಣಿಗೆಗ್ ಶಾಸಕೆರ್ ಭಾಗೀರಥಿ ಮುರುಳ್ಯ ಚಾಲನೆ ಕೊರಿಯೆರೆ ಉಲ್ಲೆರ್. ಒರ್ಂಬ ದಿನ ಬೇತೆ ಬೇತೆ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟಿಗೆ ಶ್ರೀ ಶಾರದಾಂಬ ಕಲಾವೇದಿಕೆಡ್ ದಸರಾ ಮಹೋತ್ಸವ ನಡಪರೆ ಉಂಡು. ಅ.28ದಾನಿ ಮಧ್ಯಾಹ್ನ ಸುಳ್ಯ ಪೇಂಟೆದ ಪ್ರಮುಖ ಬೀದಿಡ್ ದಸರಾ ಉತ್ಸವದ ಶೋಭಾಯಾತ್ರೆ ನಡಪರೆ ಉಂಡು.
