ಬೆಂಗ್ಲೂರು : ಪರಿಸರ ನಿರ್ವಹಣೆ ಬೊಕ್ಕ ನೀತಿ ಸಂಶೋಧನಾ ಸಂಸ್ಥೆ (EMPRI) ಸಂಶೋಧಕೆರ್ ಬೆಂಗ್ಲೂರ್ ಮಾರ್ಕೆಟ್ ಡ್ ತಿಕುನ ತರಕಾರಿಡ್ ಕರ್ಬದ ಅಂಶ ಮಿತಿರ್ದ್ ಎಚ್ಚ ಉಂಡು ಪಂದ್ ಪಂತೆರ್.
ಪೇಂಟೆದ 20 ಅಂಗಡಿರ್ದ್ 400 ಮಾದರಿನ್ ಸಂಗ್ರಹ ಮಲ್ತ್ ದ್ ಪರೀಕ್ಷೆ ಮಲ್ಪುನಗ ಕರ್ಬದ ಅಂಶ 425.5 ಮಿಗ್ರಾಂ/ ಕೆಜಿ ಇತ್ತ್ ದ್, ಕ್ಯಾಡ್ಮಿಯಂ ಪ್ರಮಾಣ ಎಚ್ಚ ಇಪ್ಪುನವು ತೆರಿದ್ ಬೈದ್ಂಡ್. ರೈತೆರ್ ಬೊರ್ಚಂದಿನ ನೀರ್ ನ್ ಕೃಷಿಗ್ ಗಲಸೆಯೆರೆ ಬಲ್ಲಿನ್ ಸಲಹೆ ಕೊರ್ತೆರ್.
ಪವರ್ ಗ್ರಿಡ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ ಡ್ ಖಾಲಿ ಇಪ್ಪುನ 184 ಟ್ರೈನಿ ಇಂಜಿನಿಯರ್ ಬೇಲೆಗ್ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ.
ಅ.20 ರ್ದ್ ಅರ್ಜಿಲೆನ್ ಸ್ವೀಕಾರ ಮಲ್ಪರೆ ಸುರು ಮಲ್ದ್ಂಡ್. ನ.10 ಮುಟ್ಟ ಅರ್ಜಿ ಸಂದಾವೊಲಿ. ಅರ್ಹ ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ Powergird.in ಗ್ ಭೇಟಿ ಕೊರ್ದು ಅರ್ಜಿ ಸಂದಾವೊಲಿ. ಅಭ್ಯರ್ಥಿಲು BE, B.Tech, B.Sc (ಎಂಜಿನಿಯರಿಂಗ್) ಡ್ ಶೇ.60 ದಾತ್ ಮಾರ್ಕ್ ಪಡೆದಿಪ್ಪೊಡು.
ರಾಜ್ಯಡ್ ಬೇತೆ ಬೇತೆ ವಲಯಡ್ ಸೇವೆ ಸಂದಾಯಿನ 10 ಸಂಘ ಸಂಸ್ಥೆಲೆಗ್ ಸೇರಿನ 68 ಜನ ಸಾಧಕೆರೆಗ್ ಈ ಸರ್ತಿದ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಕೊರಿಯೆರೆ ಉಂಡು ಪಂದ್ ಸಚಿವೆರ್ ಶಿವರಾಜ ತಂಗಡಗಿ ಪಂಡೆರ್.
ಬೆಂಗ್ಲೂರ್ ದ ಸಿಎಂ ನಿವಾಸಡ್ ಸಭೆ ಮುಗಿನ ಬೊಕ್ಕ ಮೇರ್ ಪಾತೆರ್ದ್, ಈ ಸಲದ ರಾಜ್ಯೋತ್ಸವ ಪ್ರಶಸ್ತಿಗ್ 3523 ಅರ್ಜಿಲು ಬೈದ್ಂಡ್. ಆಯ್ಕೆ ಸಮಿತಿ ಸದಸ್ಯೆರ್ ಇತ್ತೆನೇ ಅರ್ಹರೆನ್ ಆಯ್ಕೆ ಮಲ್ದೆರ್. ಸಮಿತಿದ ಸದಸ್ಯೆರ್ ಲ ಸಿಎಂ ನಿರ್ಧಾರಗ್ ಬದ್ದೆರಾತ ಪಂದ್ ಪಂತೆರ್.
ತುಮಕೂರು : ಇಂಜಿನಿಯರಿಂಗ್ ಕಲ್ತೊಂದು ಇತ್ತಿನ ಕಲ್ಪಾರ್ಥಿ ಆತ್ಮಹತ್ಯೆ ಮಲ್ತಿನ ಘಟನೆ ಪ್ರತಿಷ್ಠಿತ ಸಿದ್ಧಾರ್ಥ ಇಂಜಿನಿಯರಿಂಗ್ ಕಾಲೇಜ್‌ಡ್‌ ನಡತ್ಂಡ್. ಚಿತ್ರದುರ್ಗ ಜಿಲ್ಲೆ ಹೊಳಲ್ಕೆರೆ ಮೂಲದ ಶಿವಪುರ ಗ್ರಾಮದ ಬನಸಿರಿ (20) ಆತ್ಮಹತ್ಯೆ ಮಲ್ತೊನ್ನ ಪೊಣ್ಣು.
ಗೃಹ ಸಚಿವ ಡಾ.ಜಿ. ಪರಮೇಶ್ವರ್ ಒಡೆತನದ ಸಿದ್ಧಾರ್ಥ ಇಂಜಿನಿಯರಿಂಗ್ ಕಾಲೇಜು ಉಂದು ಆತ್ಂಡ್. ತುಮಕೂರ್‌ದ ತಿಲಕ್ ಪಾರ್ಕ್ ಠಾಣಾ ವ್ಯಾಪ್ತಿಡ್‌ ಕೇಸ್ ದಾಖಲಾತ್‌ಂಡ್.
ಚೀನಾದ ಮಾಜಿ ಪ್ರಧಾನಿ ಲಿ ಕೆಕಿಯಾಂಗ್ ತಿಗಲೆ ಬೇನೆಡ್ ತೀರ್ ಪೋಯೆರ್.
ಮೆರೆಗ್ 69 ವರ್ಷ ಆದಿತ್ತ್ಂಡ್. ಮೆರೆಗ್ ಕೋಡೆ ಒರಾನೇ ತಿಗಲೆ ಬೇನೆ ಬೈದ್ಂಡ್. ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಮೆರೆನ್ ಒರಿಪಾಯೆರೆ ಮಾತ ಪ್ರಯತ್ನಲ ನಡತ್ಂಡ್ ಆಂಡ ಇನಿ ಬೊಲ್ಪುಗು ತೀರ್ ಪೋಯೆರ್.
ಮೇರ್ 2022 ಮುಟ್ಟ CCP ಡ್ 2ನೇ ಮಲ್ಲ ಶಕ್ತಿಶಾಲಿ ವ್ಯಕ್ತಿ ಆದಿತ್ತೆರ್. ಮೇರ್ 2013-2023 ಮುಟ್ಟ ಚೀನಾದ ಪ್ರಧಾನಿಯಾದ್ ಸೇವೆ ಸಂದಾದೆರ್.
ಒಡಿಪು: ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಮುತಾಲಿಕೆಡ್ ಅ.28-29 ದಾನಿ ನಡಪುನ ವಿಶ್ವ ಬಂಟರ ಸಮ್ಮೇಳನ-2023 ಪೂರ್ವಭಾವಿಯಾದ್ ಪುದೆ ಸಮರ್ಪಣೆ ಮೆರವಣಿಗೆ ಗೌಜಿಡ್ ನಡತ್ಂಡ್.
ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ , ಜೋಡುಕಟ್ಟೆಡ್ ಹೊರೆಕಾಣಿಕೆ ಮೆರವಣಿಗೆಗೆ ಚಾಲನೆ ಕೊರಿಯೆರ್. ಜೋಡುಕಟ್ಟೆರ್ದ್ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಂಗಣ ಮುಟ್ಟ ಹಸಿರು ಹೊರೆಕಾಣಿಕೆ ಮೆರವಣಿಗೆ ಬತ್ತ್‌ಂಡ್. ಒಡಿಪು, ದಕ್ಷಿಣ ಕನ್ನಡ ಬೊಕ್ಕ ಕಾಸರಗೋಡು ಜಿಲ್ಲೆದ 48 ಬಂಟರ ಸಂಘಟನೆದ ಪ್ರತಿನಿಧಿಲು ಹಸಿರು ಹೊರೆಕಾಣಿಕೆಡ್‌ ಪಾಲ್‌ ಪಡೆದಿತ್ತೆರ್.
ಈ ಪೊರ್ತುಡ್ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಜತೆ ಕಾರ್ಯದರ್ಶಿ ಚಂದ್ರಹಾಸ್ ಡಿ ಶೆಟ್ಟಿ, ವಿಶ್ವ ಬಂಟರ ಕ್ರೀಡಾಕೂಟದ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳಾರು, ಸಹಸಂಚಾಲಕೆರ್ ಡಾ ರೋಶನ್ ಕುಮಾರ್ ಶೆಟ್ಟಿ, ಹೊರೆಕಾಣಿಕೆ ಸಮಿತಿದ ಸಾಯಿನಾಥ್ ಶೆಟ್ಟಿ ಶಿರ್ವ, ಕಾಪು ವಾಸುದೇವ ಶೆಟ್ಟಿ, ಉದ್ಯಮಿ ಪುರುಷೋತ್ತಮ್ ಪಿ ಶೆಟ್ಟಿ, ಜಯರಾಜ್ ಹೆಗ್ಡೆ, ಶಿವಪ್ರಸಾದ್ ಹೆಗ್ಡೆ ಹಿರೇಬೆಟ್ಟು, ಮನೋಹರ್ ಶೆಟ್ಟಿ ತೋನ್ಸೆ, ಬೈಕಾಡಿ ಸುಪ್ರಸಾದ್ ಶೆಟ್ಟಿ, ನಾಗೇಶ್ ಹೆಗ್ಡೆ ಇತ್ತೆರ್.
ವಿಶ್ವ ಬಂಟರ ಕ್ರೀಡಾ ಕೂಟ ಮಹಾತ್ಮಾಗಾಂಧಿ ಕ್ರೀಡಾಂಗಣ ಅಜ್ಜಾರ ಕಾಡು, ಒಡಿಪು ಮೂಲು ಅ.28 ನೇ ಶನಿವಾರ ಭಾರಿ ಅದ್ದೂರಿಯಾದ್‌ ನಡಪೆರೆ ಉಂಡು. ಆ ದಿನ ಮಲ್ಲ ಬಿನ್ನೆರಾದ್ ಮುಖ್ಯ ಮಂತ್ರಿಲಾಯಿನ ಸಿದ್ದರಾಮಯ್ಯ ಬೊಕ್ಕ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ ಪಾಲ್‌ ಪಡೆಯೆರೆ ಉಲ್ಲೆರ್.
ಈ ನಿಟ್ಟ್‌ಡ್ ಒಡಿಪುದ ಜಿಲ್ಲಾಧಿಕಾರಿ ಬೊಕ್ಕ ಒಡಿಪು ಎಸ್.ಪಿ ಕ್ರೀಡಾಂಗಣದ ಜಾಗೆ ಪರಿಶೀಲನೆಗ್‌ ಬತ್ತಿನ ಪೊರ್ತುಡ್ ವಿಶ್ವ ಬಂಟರ ಕ್ರೀಡಾ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳರ್, ಸಹ ಸಂಚಾಲಕೆರ್ ಡಾ.ರೋಷನ್ ಕುಮಾರ್ ಶೆಟ್ಟಿ, ಜಯಕರ ಶೆಟ್ಟಿ ಇಂದ್ರಾಳಿ ಅಕ್ಲೆಗ್‌ ಬೋಡಾಯಿನ ಮಾತಾ ಮಾಹಿತಿನ್‌ ಕೊರ್ದ್‌ ಸಹಕಾರ ಕೊರಿಯೆರ್.
ಇಲ್ಲದ ಸಿಟೌಟ್‌ದ ಸ್ಲ್ಯಾಪ್‌ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಸ್ಲ್ಯಾಪ್ ಜರಿದ್ ಕಾರ್ಮಿಕೆ ಒರಿ ತೀರ್ದ್, ಕಂಟ್ರಾಕ್ಟರ್‌ಗ್ ಗಡಿ ಆತಿನ ಘಟನೆ ಪುತ್ತೂರು ತಾಲೂಕ್, ಅರಿಯಡ್ಕ ಗ್ರಾಮೊದ, ಪಾದಲಾಡಿ ಪನ್ಪಿನಲ್ಪ ಕೋಡೆ ಕಾಂಡೆ ನಡತ್‌ದ್ಂಡ್.
ತೀರ್ದಿನ ಕಾರ್ಮಿಕೆ ಅರಿಯಡ್ಕ ಗ್ರಾಮೊದ ಕೌಡಿಚ್ಚಾರ್ ನಿವಾಸಿ ಶೇಖರ ಕುಲಾಲ್ (45) ಅಂಚೆನೇ ಪೆಟ್ಟಾತಿನ ಕಂಟ್ರಾಕ್ಟರ್‌ ಸಂಜೀವ ಮೊಗೇರ ಪಂದ್ ತೆರಿದ್‌ಬೈದ್ಂಡ್. ಅರಿಯಡ್ಕ ಗ್ರಾಮೊದ ಪಾದಲಾಡಿ ನಿವಾಸಿ ಕಮಲ ಪನ್ಪಿನಾರೆನ ಇಲ್ಲದ ಸಿಟೌಟ್‌ದ ಸ್ಲ್ಯಾಪ್‌ದ ಸೆಂಟ್ರಿಂಗ್ ಬೇಲೆ ಮಲ್ತೊಂದುಪ್ಪುನಗ ಈ ನಡಕೆ ನಡತ್‌ದ್ಂಡ್. ಈ ನಡಕೆಡ್ ಶೇಖರ ಕುಲಾಲ್ ಬೊಕ್ಕ ಸಂಜೀವ ಮೊಗೇರೆರೆಗ್ ಗಡಿಕುಲಾದ್, ಗಾತಿದ ಪೆಟ್ಟಾದಿತ್ತಿನ ಶೇಖರ ಕುಲಾಲ್ ಆಸ್ಪತ್ರೆಗ್ ಲೆತೊಂದು ಪೋಪಿನ ಸಾದಿಡೇ ತೀರ್ದೆರ್. ಸಮ ಕ್ಯೂರಿಂಗ್ ಆವಂದಿನ ಜಾಗೆಡ್ ಬೇಲೆ ಮನ್ಪುನ ಜೂವೊಗು ಸಂಚಿಕರ ಪಂದ್ ತೆರಿದಿತ್ತ್‌ದ್‌ಲಾ ಶೇಖರ್ ಕುಲಾಲೆರೆನ್ ಬೇಲೆ ಮನ್ಪಾಯಿನ ಕಾಂಟ್ರ್ಯಾಕ್ಟರ್ ಸಂಜೀವ ಮೊಗೇರ ಬೊಕ್ಕ ಇಲ್ಲದ ದನಿ ಕಮಲ ಮೊಕ್ಲೆನ ಗೋಸ್ಮರಿಯೇ ನೆವನ ಪಂದ್ ತೀರ್ದಿನ ಶೇಖರ ಕುಲಾಲ್ ಮೆರೆನ ಪಲಯೆ ದಿನೇಶ್ ಕುಲಾಲ್ ಕೊರ್ತಿನ ಒಯಿಲ್‌ದಂಚ, ಪುತ್ತೂರು ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಕೇಸ್ ದಾಖಲ್ ಮಲ್ತೊಂದು, ಪೊಲೀಸೆರ್ ತನಿಖೆ ಮಲ್ತೊಂದುಲ್ಲೆರ್.
ಮುಲ್ಕಿದ ಕುಬೇರ್‌ದ ರೈಲ್ವೇ ಓವರ್ ಬ್ರಿಡ್ಜ್‌ದಲ್ಪ ರೈಲ್‌ದ ಅಡಿಕ್ ಬೂರ್ದು ಒರಿ ಆತ್ಮಹತ್ಯೆ ಮಲ್ದಿತ್ತೆರ್. ಉಂದೆತ ತನಿಖೆ ಮಲ್ಪರೆ ಸ್ಪಾಟ್‌ಗ್ ಪೋಯಿನ ಮುಲ್ಕಿ ಸ್ಟೇಷನ್‌ದ ನಾಲ್ ಪೋಲೀಸೆರ್ ಒಂತೆಡೇ ರೈಲ್ ರ್ದ್ ಬಚಾವಾತೆರ್.
ಐತಾರ 8:30ಗ್ 26 ವರ್ಸದ ವಿಶ್ಲೇಷ್ ಪನ್ಪಿನ ಆನ್ ರೈಲ್‌ದ ಅಡಿಕ್ ಬೂರ್ದು ಆತ್ಮಹತ್ಯೆ ಮಲ್ದಿತ್ತೆ. ಉಂದೆತ ಬಗೆಟ್ ಎಎಸ್ಐ ಸಂಜೀವ, ಚಂದ್ರಶೇಖರ್, ಶಂಕರ್ ಬೊಕ್ಕ ಬಸವರಾಜ್ ಮೇರ್ ಸ್ಪಾಟ್‌ಗ್ ಪೋದು ಜಡ್ತೆ ಮಲ್ತೊಂದಿಪ್ಪುನಗ ಒರಾನೆ ಪಟ್ಟೆಡ್ ರೈಲ್ ಪೋತುಂಡು. ಅಲ್ಪ ಅಂಚಿಂಚಿ ತೆಲಾರೆ ಜಾಗ ದಾಂತಿನೆರ್ದಾವರ ನಾಲ್ ಜನಲಾ ತಿರ್ತ್ ಲಾಗಿಗ್ ಜೀವ ಒರಿತೊಂದೆರ್.
ದೇಶೊಡು ಪೊಸ ವರ್ಕ್ ಕಲ್ಚರ್ ಅಗತ್ಯ ಉಂಡು. ಐಟಿ ಬೇಲೆದಕುಲು ವಾರೊಗು 70 ಗಂಟೆ ಬೇಲೆ ಮಲ್ಪೊಡು ಪನ್ದ್ ಇನ್ಫೋಸಿಸ್‌ದ ನಾರಾಯಣ ಮೂರ್ತಿ ಪನ್ತಿನ ಪಾತೆರ ಇತ್ತೆ ವೈರಲ್ ಆತ್ಂಡ್. ನಾರಾಯಣ ಮೂರ್ತಿನ ಈ ಪಾತೆರ ಸೋಶಿಯಲ್ ಮೀಡಿಯಾಡ್ ಬಾರೀ ಚರ್ಚೆಗ್ ಬೈದ್ಂಡ್.
ಇಂಚ 70 ಗಂಟೆ ಆಂಡ ಉಂದು ಬೇಲೆ ಬೊಕ್ಕ ಜೀವನದ ಮಿತ್ತ್ ಮಸ್ತ್ ಪರಿಣಾಮ ಬೂರುಂಡು. ನಾರಾಯಣ ಮೂರ್ತಿ ಮೆರೆನ ಪಾತೆರೊಗು ಓಲಾದ ಸಿಇಓ ಭವೀಶ್ ಅಗರ್ವಾಲ ಬೆರಿಬಲ ಕೊರ್ತೆರ್. ಐಟಿದಕಲೆಗ್ ಕಾಲಿ ಬೇಲೆನೆ ಮಾತ್ರ ಅತ್ತ್ ಪರ್ಸನಲ್ ಜೀವನಲ ಉಂಡು, ನಿಕಲೆನ ಕಿಸೆ ದಿಂಜಾವೊನರೆ ಜವನೆರೆನ್ ದಿನೊಕು 12 ಗಂಟೆ ಬೆನ್ಪಾವುನ ಪಾತೆರ ಬೊಡ್ಚಿ ಪನ್ದ್ ಜವನೆರ್ ಪಿಸಿರಾತೆರ್.
