ತುಳು ಸುದ್ದಿ

ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ಮಾರ್ನೆಮಿ ಉಚ್ಚಯ ಮುಗಿತಲ

ಬಡಗನ್ನೂರುಃ ದೇಯಿ ಬೈದೆತಿ ಕೋಟಿ ಚೆನ್ನಯ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡತ್ಂಡ್.

ಅ.15 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಕುರಲ್ ಕಟ್ಟುನ ಮುಖೇನ ಸುರು ಆಯಿನ ಮಾರ್ನೆಮಿಡ್ ದೇಯಿ ಬೈದೆತಿಗ್ 9 ದಿನಲ ಇಸೇಸ ಅಲಂಕಾರ ಪೂಜೆ ನಡತ್ಂಡ್. ಅಂಚೆನೆ ಪ್ರತಿ ದಿನೊಲ ಮಧ್ಯಾಹ್ನ ಪುಷ್ಪಲಂಕಾರ ಮಹಾಪೂಜೆದ ಬೊಕ್ಕ ನುಪ್ಪು ಪ್ರಸಾದ ಸೇವೆ ಇತ್ತ್ಂಡ್.

ಅತ್ತಂದೆ ಭಕ್ತಾಧಿಲೆಗ್ ಇಸೇಸ ಸೇವೆಗ್ ಅವಕಾಶ ಮಲ್ತ್ ದ್ ಕೊರ್ದಿತ್ತೆರ್. ದೇಯಿ ಬೈದೆತಿಗ್ ಪುಷ್ಪಲಂಕಾರ ಬೊಕ್ಕ ಅನ್ನದಾನ ಸೇವೆ, ನವರಾತ್ರಿ ಪೂಜೆ ಮಲ್ಪು ಅವಕಾಶ ಇತ್ತ್ಂಡ್. ಅ.24 ವಿಜಯ ದಶಮಿದಾನಿ ಸರಸ್ವತಿ ಪೂಜೆ ಬೊಕ್ಕ ಬೊಲ್ಪುರ್ದ್ ಮಧ್ಯಾಹ್ನ ಮುಟ್ಟ ಅಕ್ಷರಾಭ್ಯಾಸ ನಡತ್ಂಡ್. ಅತೆ ಅತ್ತಂದೆ ಸುಮಾರ್ 30 ಬೇತೆ ಬೇತೆ ಭಜನೆ ಕೂಟಲೆರ್ದ್ ಶ್ರೀ ಕ್ಷೇತ್ರಡ್ ಏಪಲ ಭಜನಾ ಸಂಕೀರ್ತನೆ ನಡತ್ಂಡ್.

ಈ ಪೊರ್ತುಡು ಗೆಜ್ಜೆಗಿರಿ ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರೆ ಪೀತಾಂಬರ ಹೆರಾಜೆ, ಪ್ರಧಾನ ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್, ಉಪಾಧ್ಯಕ್ಷೆರ್ ರವಿಪೂಜಾರಿ ಚಿಲಿಂಬಿ, ಜಯಂತ ನಡುಬೈಲು, ಸತೀಶ್ ಕೆಡೆಂಜಿ, ನವೀನ್ ಸುವರ್ಣ, ಪ್ರವೀಣ್ ಪೂಜಾರಿ ಮೂಡಿಗೆರೆ, ಕೃಷ್ಣಪ್ಪ ಪೂಜಾರಿ, ಜಯಶ್ರೀ ಉಬಾರ್, ವಿಶ್ವನಾಥ ಪೂಜಾರಿ ಮೂಡಿಗೆರೆ, ನಾರಾಯಣ ಮಚ್ಚಿನ ಬೊಕ್ಕ ಊರುದ ಪರವೂರುದ ಭಕ್ತೆರ್ ಪಾಲ್ ಪಡೆದಿತ್ತೆರ್.

ಸಾಯಿಬಾಬಾ ದೇವಲ್ಯಗ್ ಇನಿ ಪ್ರಧಾನಿ ಮೋದಿ ಭೇಟಿ

ಪ್ರಧಾನಿ ನರೇಂದ್ರ ಮೋದಿ ಮೇರ್ ಇನಿ ಶಿರಡಿ ಸಾಯಿಬಾಬಾ ದೇವಲ್ಯಗ್ ಭೇಟಿ ಕೊರ್ದು‌ ಅಲ್ಪದ ಪೊಸ ದರ್ಶನ ಸಂಕೀರ್ಣನ್ ಉದಿಪನ ಮಲ್ಪುವೆರ್.

ಮೇರ್ ಮಹಾರಾಷ್ಟ್ರಡ್ 7500 ಕೋಟಿ ರೂ ಕರ್ಚಿದ ಬೇತೆ ಬೇತೆ ಅಭಿವೃದ್ಧಿ ಯೋಜನೆಗ್ ಕೆಸರ್ ಪಾಡಿಯೆರೆ ಉಲ್ಲೆರ್. ಅತ್ತಂದೆ 86 ಲಕ್ಷ ರೈತೆರೆಗ್ ಅನುಕೂಲ ಆಪುನ ಯೋಜನೆದ ಉದಿಪನಗ್ ಇನಿ ಮಹಾರಾಷ್ಟ್ರಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಟೀಮ್ ಇಂಡಿಯಾಗ್ 2ನೇ ತಾನ

ವಿಶ್ವಕಪ್ ಇತಿಹಾಸಡ್ ಮಸ್ತ್ ಸಲ ಮ್ಯಾಚ್ ಗೆಂದ್ಂದ್ ಟೀಮ್ ಇಂಡಿಯಾ 2ನೇ ತಾನ ಪಡೆತ್ಂಡ್.

AUS 72 ಮ್ಯಾಚ್, IND ಬೊಕ್ಕ NZ 58 ಮ್ಯಾಚ್, ಇಂಗ್ಲೆಂಡ್ 49 ಮ್ಯಾಚ್, ಪಾಕಿಸ್ತಾನ 47 ಮ್ಯಾಚ್, ದಕ್ಷಿಣ ಆಫ್ರಿಕಾ 42 ಮ್ಯಾಚ್, ಶ್ರೀಲಂಕಾ 39 ಮ್ಯಾಚ್, ಬಾಂಗ್ಲಾದೇಶ 15 ಮ್ಯಾಚ್ ಗೆಂದ್ಂಡ, ಅಫ್ಘಾನಿಸ್ತಾನ ಬೊಕ್ಕ ನೆದರ್ಲೆಂಡ್ ಈ ಮೆಗಾ ಟೂರ್ನಿಡ್ ಬಜಿ 3 ಮ್ಯಾಚ್ ಮಾತ್ರ ಗೆಂದ್ ದ್ಂಡ್.

ಕ್ಯಾರೆಟ್ ಆರೋಗ್ಯಗ್ ಎಡ್ಡೆ

ಕ್ಯಾರೆಟ್ ತಿನ್ಪುನೆರ್ದ್ ಆರೋಗ್ಯಗ್ ಮಸ್ತ್ ಪ್ರಯೋಜನ ಉಂಡು.

ಉಂದು ಜೀರ್ಣಕ್ರಿಯೆನ್ ಎಚ್ಚ ಮಲ್ಪುಂಡು. ನೆಟ್ಟ್ ಫೈಬರ್ ಅಂಶ ಮಲಬದ್ಧತೆನ್ ಕಮ್ಮಿ ಮಲ್ಪುಂಡು. ಅಂಚೆನೆ ಕರ್ಲ್ ದ ಪುರಿರ್ದ್ ಬಂಜಿಡ್ ಆಪಿನ ತೊಂದರೆನ್ ಕಮ್ಮಿ ಮಲ್ಪುಂಡು.

ಲಿವರ್ ರ್ದ್ ಬೊರ್ಚಂದಿನ ಕೊಲೆಸ್ಟ್ರಾಲ್ ಕಮ್ಮಿ ಮಲ್ಪರೆ ಬೊಕ್ಕ ಶರೀರಡ್ ಇಪ್ಪುನ ಇಸತ್ತ ಅಂಶನ್ ಪಿದಯಿ ಪಾಡಿಯೆರೆ ಸಹಕಾರಿ ಆಪುಂಡು. ಬಾಯಿದ ವಾಸನೆನ್ ಕಮ್ಮಿ ಮಲ್ಪುಂಡು. ಕ್ಯಾರೆಟ್ ಚರ್ಮದ ಆರೋಗ್ಯನ್ ಕೊರ್ಪುಂಡು. ನೆರ್ದ್ ಎಲು ಗಟ್ಟಿ ಆಪುಂಡು.

ಹಿಮಾಚಲ ಪ್ರದೇಶದ ಸಿಎಂ ಆಸ್ಪತ್ರೆಗ್ ದಾಖಲ್

ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿ ಸುಖವಿಂದರ್ ಸಿಂಗ್ ಸುಖು ಆಸ್ಪತ್ರೆಗ್ ದಾಖಲ್ ಆತೆರ್.

ಮೆರೆಗ್ ನಡುರಾತ್ರೆಡ್ ಬಂಜಿ ಬೇನೆ ಬತ್ತಿರ್ನೆದಾವೆರ ಶಿಮ್ಲಾದ ಐಜಿಎಂಸಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಇತ್ತೆ ಮೆರೆನ ಸ್ಕ್ಯಾನಿಂಗ್ ಮಲ್ತಿನ ಡಾಕ್ಟರ್ ಒವ್ವೇ ಸಮಸ್ಯೆ ಇಜ್ಜಿ ಪಂದ್ ತೆರಿಪಾದೆರ್.

ನ.2: ಹಾಸಾನಂಬೆ ದೇವಿ ದರ್ಶನ

ಹಾಸನದ ಪುಗರ್ತೆದ ಹಾಸನಾಂಬೆ ದೇವಿನ ಜಾತ್ರೆ ಉಚ್ಚಯದ ಲೆಕ್ಕೊಡು ನ.2 ಕ್ಕ್ ಸಾಂಪ್ರದಾಯಿಕ ವಿಧಿ ವಿಧಾನಲು ಇಪ್ಪುರ್ನೆದಾವೆರ ದೇವಿನ ಗರ್ಭಗುಡಿತ್ತ ಬಾಗಿಲ್ ನ್ ದೆಪ್ಪುವೆರ್.

ಅಂಚೆನೆ ಭಕ್ತೆರೆಗಾದ್ ದೇವಿನ ದರ್ಶನಗ್ ದೇವಲ್ಯದ ಆಡಳಿತ ಮಾತ ತಯಾರಿನ್ ಮಲ್ತೊಂದು ಉಂಡು. ಶಕ್ತಿ ಯೋಜನೆರ್ದ್ ಧರ್ಮೊಗು ಬಸ್ ಪ್ರಯಾಣ ಇಪ್ಪುರ್ನೆದಾವೆರ ಕರಿನ ವರ್ಷೊರ್ದ್ ಈ ಸರ್ತಿ ಎಚ್ಚದ ಭಕ್ತೆರ್ ಬರ್ಪುನ ನಿರೀಕ್ಷೆ ಉಂಡು ಪಂದ್ ತೆರಿದ್ ಬೈದ್ಂಡ್.